Jesúsʼra jidasida

Jesústa akʉza iyi apostolerata wãsi katuma Olivosʼeda. Maʉ̃ diamasira jedekora bia ʉ̃nanʉmasi. Ãyi Getsemaníena jʉ̃ẽside Jesúsba jarasi: «Nama kʉpanaidʉa akʉza uruma bʼaidua». Jesúsʼra mejãcha krĩcha zroma obasi baera jĩga toto kʼãrãpe sãkokode yiwidʼisi, iya jarasi: «Berabaribira bʉa kãgabʉta». Jeowabara zokʼasi angel aba Jesústa so zarea diaita. Jesús jẽda jʉ̃ẽbʉrʉde iyi apostolera ũbea kʼãĩnʉmʉta ũdu jʉ̃ẽsi. Jesúsba jarasi: «Urumaidua atiara kʼãĩ ẽ baibara. Idi mʉ̃ra nejʉrarabara jidadayi».

Maʉ̃ne ẽbẽrarãta mejãcha erbʉesi. Maʉ̃rabara ãyi juwadera erbasi bakururata akʉza nekʼãrẽ kuchodebemarata, maʉ̃ne edabasi Judasta. Nããra Jesúsʼra Getsemaníena wãbasi baera iyi apostolerabawara, Judasbara kʼawuabasi Jesús sama chuadara. Judasbara jarasi iyi kʼaidu gorogoropanʉrãra ũdubita saʉ̃ta Jesústa, maʉ̃ kʼarea Judasʼra Jesúsʼidu jʉ̃ẽ kʼãrãpe jarasi: «Kʉa Nejaradiabari». Mõbe kĩrãma ñẽgasi. Aramaʉ̃ta Jesúsba jarasi: «Judas, ¿kʼãrẽta obʉ bʉra namara?».

Jesúsʼra wuabemara nãã kʉbepe widisi: «¿Kʼaita jʉrʉbʉ marabara?». Ãya panʉsi: «Jesús Nazaretdebemata». Aramaʉ̃ta Jesúsba jarasi: «Mʉ̃ta iyi». Aramaʉ̃nẽ yumakẽrãrãra sãkokode totosi. Akʉza Jesúsbara jẽda widisi: «¿Kʼaita jʉrʉbʉ marabara?». Aramaʉ̃ta ãya panʉsi: «Jesús Nazaretdebemata». Aramaʉ̃ta Jesúsba panʉsi: «Mʉ̃a mara jarasi mʉ̃ta iyita. Idubʉidua mʉ̃ kʼaidubʉrãra».

Pedroba ũduside kʼãrẽ berabarinʉmʉta aramaʉ̃ta kuchota jiraeda kʼãrãpe Malco kʉwʉrʉta kõtasi. Malcora sumo saserdote nezokʼabasi. Aramaʉ̃ta Jesúsbara maʉ̃ ẽbẽra Malco kʉwʉrʉma tã kʼãrãpe jẽda bebisi. Maʉ̃ne Jesúsba jarasi Pedroʼa: «Merada kaʉ̃ kuchora. Bʉta kaʉ̃ kuchoba yõbʉbʉrʉ, abarika beadayi kuchoba». Aramaʉ̃ta maʉ̃ra gorogororabara Jesúsʼra jidada kʼãrãpe juwama jʉ̃sida akʉza iyi kʼaidubemarãra mĩrʉ wẽba wãkʉasida. Maʉ̃ tẽã gorogororabara Jesúsʼra edesida saserdote Anásʼidu. Aramaʉ̃ta maʉ̃ saserdote Anásbara Jesúsʼa nekʼãrẽ mejãcha widisi, maʉ̃ tẽã zokʼasi Caifásma, iyira sumo saserdotebasi. Mamina maʉ̃nera, ¿kʼãrẽta berabarisi apostolerãra?