Kʉ̃rara kimareba Jeowa bedʼeata ũrĩpanʉ

Nabucodonosorbara kʉ̃rara Judádebemata edesi Babiloniaena, ãyira prinsiperabasi. Aspenazta jʉrʉsida kʉ̃rarata akʉmarẽã. Akʉza Nabucodonosorba jarasi Aspenaz jʉrʉmarẽã maʉ̃ra kʉ̃raranebemata yi audre buru biata akʉza bebʉ bia erbʉta. Maʉ̃ra kʉ̃rara nekʼãrẽ mejãcha jaradiadaibasi 3 poagabayeda, mawũã Babiloniane zokʼa jʉ̃drʉmarẽã. Bʉ kʼawuaibarabasi, bia le kʼawuaibarabasi akʉza Babiloniane bedʼeabʉ kĩrãkʼa bedʼea kʼawuaibarabasi. Akʉza ãyara nokʼo deda yiko kobʉta koibarabasi. Maʉ̃ra kʉ̃rara biobʉdebemara yi kimarera naʉ̃rabasi: Daniel, Hananías, Misael akʉza Azarías. Aspenazba diasi maʉ̃ra kʉ̃rara trʉ̃ Babilonianebemata: Beltsasar, Sadrac, Abednego akʉza Mesac. ¿Bʉmara maʉ̃ba Jeowadeba jĩga baseabasika?

Maʉ̃ra kʉ̃rara kimarebara wãrĩnu Jeowa bedʼeata ũrĩkĩrãpanasi. Ãyara kʼawuabasi maʉ̃ nokʼoba yiko diabʉra kobe ẽãta, Leyba jarabasi baera. Maʉ̃ kʼarea ãya Aspenazʼa jarasida: «Dai bia okʼãrãpe nokʼoba kobʉta daiʼabida kobirãra». Maʉ̃ne Aspenazba jarasi: «Marata nokʼoba ũdura bia neko ẽãta akʉza kayabʉ kĩrãkʼabʉta, mʉ̃ra beadayi».

Maʉ̃ne Danielba jarasi ãyi akʉbʉa: «Daiʼa diara berdurarata, netarata akʉza baniata 10 ewaribayeda. Maʉ̃ tẽã bʉa akʉseabʉ daita wuabemara kʉ̃rarabawara kʼaita audre biabʉta». Aspenazʼitara naʉ̃ bedʼeara yibiabasi.

10 ewari berabarida tẽã, Danielta akʉza iyi kʼaidu ũbeapananarata, wuabemara kʉ̃raraira audre bia ũdubasi. Jeowara maʉ̃ra kʉ̃rara kimareba oda kʼarea mejãcha sobiabasi, iyi bedʼeata ũrĩbasi baera. Jeowabara Danielta kʼarebasi kʼãĩmokʼãrãde kʼãrẽ sãwũã berabarida jaraita akʉza ʉ̃ra zeide kʼawuamarẽã kʼãrẽ berabarita.

3 poaga berabarida tẽã, Aspenazbara edesi maʉ̃ra kʉ̃rara Nabucodonosor nãã. Nokʼora kʉ̃rarabawara bedʼeaside, kʼawuasi Danielta, Misaelta, Hananíasta akʉza Azaríasta jipa buru biabasita wuabemara kʉ̃raraira. Maʉ̃ kʼarea iya jidasi iyita trajamarẽã. Mawũã berabarida tẽã nokʼobara jʉrʉbasi ũrãgʼa widita. Jeowabara kʼarebasi audre buru bia bamarẽã jaibana nokʼoita trajabʉraira akʉza mamabema buru biabʉraira.

Danielta, Hananíasta, Misaelta akʉza Azaríasta ãyi pʉwʉrʉde ba ẽ basi, mamina ãyara ewari jõmaʉ̃nẽ kĩrãbebasi Jeowa pʉwʉrʉdebemata. Mawũẽra bʉara, ¿bʉ yibarirata bʉme ãba bʉ ẽ bʉrʉ, bʉara ewari jõmaʉ̃nẽ kĩrãbebʉka Jeowara?