Jeftéba bedʼea oya jaradata

Akʉza israelitarabara Jeowara kĩrãduadape, daizeze zeri ẽã jẽda yiwidʼi jʉ̃drʉsida. Mamina maʉ̃ra daizeze zeri ẽãbara israelitarãra kʼareba ẽ basi, mawũã ammonitaraba ãyira zʉbʉriabibasida, poaga biobayeda mejãcha zʉbʉriasida. Mawũã ãya Jeowaʼa jarasida: «Daira nekayirua obʉda. Kʼarebara daira dai nejʉraraneba». Israelitarabara nekʼãrẽ daizeze zeri ẽãita odara mãrĩkʉasida, mawũã jẽda Jeowa yiwidʼita. Aramaʉta Jeowaba ãyira so borekea akʉsi.

Maʉ̃ kʼarea israelitarabara yumakẽrã aba jʉrʉsida ãyi nãã yi edebari bamarẽã, maʉ̃ trʉ̃ra Jeftébasi. Jeftébara edeibarabasi israelitarãra yõne ammonitaraʉ̃me. Jeftéba Jeowaʼa jarasi: «Naʉ̃ yõnera bʉa mʉ̃ta kʼarebara, yi ẽbẽra mʉ̃ dedaʉba nãã mʉ̃ma wẽba deguebʉrʉta, bʉaʼa diayi». Jeowabara kʼarebasi Jeftéra bia wãmarẽã.

Jeftéra wãsi iyi deda, maʉ̃ne yi nãã iya akʉ wẽba wãnara yi kaubasi, Jeftébara kauta abapai erbasi. Iyira bera jʉ̃drʉsi akʉza panderetata zabasi. ¿Jeftébara kʼãrẽta oibasi? Iyara kĩrãbesi Jeowaʼa bedʼea jaradara, maʉ̃ kʼarea jarasi: «¡Kau! Mʉ̃ra mejãcha sopʉadogo. Mʉ̃a bedʼea jarada aripe berabarimarẽãra, mʉ̃a bʉra zokʼaibara tabernakuloidu Silóde». Yi kauba panʉsi: «Zeze bʉa maʉ̃ta Jeowaʼa oya asibʉrʉ oibara, mamina mʉ̃ mama wãi naena jedeko ũmebayeda idu wãbira katumaena mʉ̃ neũdukʼawuarabawara. Maʉ̃ berabarida tẽã wãñi mʉ̃ra tabernakuloeda». Jefté kaura jipa kʼẽrẽpabasi akʉza ewari jõmaʉnẽ tabernakulode Jeowaba jarabʉdebasi. Iyi neũdukʼawuarabara poagaza akʉ wãpanasi tabernakulo Siló bʉidu.