Bedʼeata bʉsi parede

Ewari berabari wãne Belsasarʼra Babilonia nokʼobasi. Ewari aba diamasi ẽbẽrarã mejãchaita osi piestata, maʉ̃rãra maʉ̃ pʉwʉrʉdebema audre yi zromabasi. Belsasarbara jarasi iyi nezokʼara basorata wemarẽã, maʉ̃ra Nabucodonosorba Daizeze templodeba jãrĩ wesida. Belsasarta akʉza ẽbẽrarã iyi kʼawa badarabawara maʉ̃ basode binota dosi akʉza ãyi daizezeʼa yiwidʼisida. Mawũãnʉmʉne ũdusi juwaba bʉ jʉ̃drʉsita parede.

Aramaʉ̃ta Belsasarʼra mejãcha perasi, maʉ̃ kʼarea trʉ̃ bʉesi iyi jaibanarata. Mõbe jarasi: «Badu ẽbẽraba naʉ̃ bedʼeata mʉ̃aʼa jarara kʼãrẽta jarakĩrãbʉta, mʉ̃a oyi yi zroma bamarẽã wuabemaraira». Mamina miõba jara ũrĩbida ẽ basi kʼãrẽta jarakĩrãbʉta. Maʉ̃ne nokʼo wẽrãba jarasi: «Ẽbẽra aba yi trʉ̃ Danielba, Nabucodonosorʼa kʼãĩmokʼãrãdata jara ũrĩbibasi kʼãrẽta jarakĩrãbasita. Danielbara jara ũrĩbiseabʉ parede juwaba bʉdara kʼãrẽta jarakĩrãbʉta».

Danielʼra nokʼo akʉ jʉ̃ẽsidera, Belsasarba jarasi: «Bʉa jara ũrĩbira naʉ̃ba kʼãrẽta jarakĩrãbʉta mʉ̃a bʉaʼa diayi kadena oro omata akʉza Babiloniane yi zroma babiyi». Danielba panʉsi: «Mʉ̃ara ĩjã ẽ bʉa nekʼãrẽ diabʉrʉra, mamina jara ũrĩbiyi kʼãrẽta jarakĩrãbʉta. Bʉ zeze Nabucodonosorʼra jipa ʉ̃ta krĩchabasi, maʉ̃ kʼarea Jeowaba jaradiasi sãwũã eda krĩcha bʼaibarata. Bʉa maʉ̃ta kʼawuabasimina bʉara wawiata ũdubi ẽ basi Jeowara, bʉara zokʼasi Daizeze templodebema basorata bino doita, maʉ̃ kʼarea Daizezeba bʉsi naʉ̃ bedʼeara: MENÉ, MENÉ, TEQUEL akʉza PARSÍN. Naʉ̃ bedʼeabara jarakĩrãbʉ medoraba akʉza persaraba Babiloniara baebita, adewara bʉra wua nokʼo ba ẽ bayi».

Maʉ̃ ewaridera zarebasi pʉwʉrʉ abaʉba Babilonia zroma baebira, Babilonia audura muro akʉza do zromatabasi baera. Mamina maʉ̃ diamasi Babiloniabawara yõ wãsi medorata adewara persarata. Nokʼo Persiadebema Ciroba osi maʉ̃ do nãbʉbʉra awuru oare wãmarẽã, mawũã baniara erraʉsi akʉza gorogororãra puerta jirabʉidʉ jʉ̃ẽsi. Mama jʉ̃ẽbʉrʉde ¡puertara ewara jirabasi! Maʉ̃ kʼarea eda wãsi ãyira akʉza nokʼo eda badara beasida. Maʉ̃neba ʉ̃ta Cirora Babilonia nokʼobasi.

Ciroba poaga aba Babilonia zokʼabʉrʉde jarasi: «Jeowabara mʉ̃aʼa jarasi Jerusalén templota jẽda ara omareã, maʉ̃ kʼarea judiora mama wãkĩrãbʉra wãseapanʉ». Jerusalén ãrĩnapeada 70 poaga berabarida tẽã, mejãchaʉta jẽda wãsida Jerusalénʼena, mawũã aripe berabarisi Jeowaba jarabaridara. Cirobara jẽda diabari jʉ̃ẽsi Nabuconodosorba jõma nekʼãrẽ Jeowa templodeba ededapeadara. ¿Bʉara kʼawuasika sãwũã Jeowabara iyi pʉwʉrʉta kʼarebasita Cirodeba?