Zʉbʉria 1, 2, 3debemata

Israelitarãra egipsiora nezokʼabasi akʉza trajabipanasi. Jeowaba zokʼasi Moisésta Aarónʼʉ̃me naʉ̃ bedʼeata jaramarẽã paraonʼa: «Idu bʉera mʉ̃ pʉwʉrʉra, mawũã mʉ̃aʼa yiwidʼidamarẽã drʉa ibʉawabʉde». Paraonta ʉ̃ta krĩchabasi baera jarasi: «Mʉ̃a sãwũãi Jeowaba jaradara, mʉ̃ara iduaribi ẽ bayi israelitarãra wãmarẽãra». Maʉ̃ tẽã paraonbara audre trajabisi israelitarãra, mamina Jeowabara ũdubibarabasi iyira yi zromata, ¿kʼãrẽta oibasi maʉ̃nera? Jeowaba zokʼasi zʉbʉria kĩrãtananebema 10 Egipto ʉ̃rʉ. Jeowaba jarasi Moisésʼa: «Paraonbara ũrĩ ẽ mʉ̃ bedʼeara. Nrʉema diapeda iyira bayi Nilo dode. Jarada maʉ̃ dora wa bʼaita, iya idu bʉe ẽ baera mʉ̃ pʉwʉrʉta». Moisésbara Jeowa bedʼea ũrĩ kʼãrãpe wãsi paraon akʉde. Paraonbara akʉsi sãwũã Aarónba bakurura Nilo do ʉ̃rʉ deguebidara akʉza sãwũã Nilo do waba totodata, mawũã dora ũsia totosi akʉza dobeda ẽ basi maʉ̃ baniara, adewara bedarãra beisi. Mawũãsidu paraonbara israelitarãra idu bʉe ẽ basi drʉa ibʉawabʉ edara.

Ewari 7 berabarida tẽã Jeowabara Moisésʼa jarasi bedʼeata jara wãmarẽã paraonʼa: «Bʉa mʉ̃ pʉwʉrʉta idu bʉe ẽ bʉrʉ, jõma pʉwʉrʉrãra baʉbaba birayi». Paraonba ũrĩ ẽ basi baera, Aarónba iyi bakuru ʉ̃ta jira edabʉrʉba, pʉwʉrʉdera baʉbawa totosi. Eda netatarane, kʼãĩbadamae, ¡jõma baʉbaba birasi! Paraonba jarasi Moisésʼa: «Jeowaʼa yiwidʼidua mawũã baʉbata neẽã omarẽã. Mʉ̃a mawũãtrʉ bʉeyi israelitarãra». Mawũã Jeowaba wua zebi ẽ basi baʉbarãra. Maʉ̃ tẽã egipsiorabara baʉbarãra jõma ãba jʉrepesida, maʉ̃ra baʉbarãra beisi baera mĩguiabʉsasi. Mamina paraonbara israelitarãra mawũãsidu idu bʉe ẽ basi.

Maʉ̃ tẽã Jeowaba jarasi Moisésʼa: «Obira Aarónba egorota deguebimarẽã bakuruba, mawũã jõma pʉwʉrʉdera sunata mejãcha bayi». Aarónba mawũã odaba pʉwʉrʉra jõmaʉ̃mae birasi sunarãra akʉza sunabara ẽbẽrarãra mejãcha ka jʉ̃drʉsi. Egipsiorabara jarasi paraonʼa: «¡Zʉbʉriara Daizezedeba zesi!». Mawũãsidu paraonbara israelitarãra idu bʉe ẽ basi.