Pẽdra wũãwũãta jẽda zokʼaibʉ

Kue ze ẽ basidera, Jeowaba Elíasʼa jarasi: «Wãra Sareptaeda, mama bʉ pẽdrata, iya bʉaʼa diayi yikota». Maʉ̃ pʉwʉrʉ puertade Elíasbara ũdusi ẽbẽra wẽrã aba kʼãrẽ neẽãbʉta tʉbʉ jʉrepebʉta, maʉ̃ra pẽdrabasi. Aramaʉ̃ta Elíasbara widisi baniata. Iyi bania jʉrʉ wãside Elíasba jarasi: «Mʉ̃ bia okʼãrãpe, ¿pansida diaseabʉka?». Pẽdraba panʉsi: «Mʉ̃ra pan neẽ, neẽ kʼãrẽ diaita, mʉ̃ara wiña erbʉ arinata akʉza nedragata. Mʉ̃ta mʉ̃ wũãwũãʉ̃me nekoitrʉ bʉ». Eliásba jarasi: «Jeowaba jarasi bʉa mʉ̃aʼa panta odiara, iyara bʉaʼa mejãcha arinata akʉza nedragata diaita, naʉ̃ kʼãwũã kue ze ẽ nʉmʉena».

Mawũã naʉ̃ pẽdrabara deda jʉ̃ẽ kʼãrãpe panta osi Elíasʼita. Mawũã maʉ̃ pẽdraba yi wũãwũãʉ̃meba yikora erpanasi kue zeyeda. Jeowaba jarada kĩrãkʼa iya arina akʉza nedragara erbadara jõ ẽ basi.

Maʉ̃ tẽã berabarisi ãya jʉ̃ã ẽ badata. Pẽdra wũãwũãra kaya kʼãrãpe beisi. Maʉ̃ kʼarea Elíasʼa widisi iyita kʼarebamarẽã. Elíasbara wũãwũã jirabarieda kʼãrãpe edesi de ʉ̃tre, mama kamane kʉ kʼãrãpe Jeowaʼa yiwidʼisi: «Jeowa mʉ̃ bia okʼãrãpe jẽda zokʼai babira naʉ̃ wũãwũãra». Mawũã wũãwũã beidara jẽda iñabasi. Maʉ̃ berabaridara arigʉ yibiabasi, maʉ̃ ewaribayedara miõ ẽbẽra beidata jẽda piradrʉbikabasi baera. Adewara maʉ̃ pẽdrata yi wũãwũãʉ̃mera Israeldebema ẽ basi baera.

Akʉza wũãwũãra jẽda zokʼai besi. Elíasbara jarasi pẽdraʼa: «¡Akʉra! Bʉ wũãwũã zakera zokʼaibʉ». Iyira mejãcha sobia kʼãrãpe jarasi Elíasʼa: «Idibʉrʉ kʼawuabʉrʉ bʉra Daizeze nezokʼata akʉza bʉa jarabʉra Jeowadeba zebʉ baera wãrĩnu berabaribʉ».