Jeowaba jidasi Josuéta

Moisésbara poaga biobayeda jʉrebasi Israel pʉwʉrʉra, mamina iyira beibodobasi. Jeowaba jarasi Moisésʼa: «Bʉara ede ẽ bayi israelitarãra mʉ̃a Drʉa diaya adamara. Mamina mʉ̃a bʉaʼa ũdubiyi maʉ̃ drʉata». Moisésba widisi Jeowaʼa ẽbẽra aba jidamarẽã Israel pʉwʉrʉ akʉita. Jeowaba panʉsi: «Bedʼeara Josuéʉ̃me, mõbe jarara iya akʉ bʼaita Israel pʉwʉrʉra».

Moisésbara Israel pʉwʉrʉʼa jarasi iyira beibodo baera Jeowabara Josuéta jidasita. Mawũã ãyira Josuéba edeita Jeowaba Drʉa diaya adama. Mawũẽra Moisésba jarasi Josuéʼa: «Perarãra Jeowaba kʼarebayi bʉra». Maʉ̃ tẽã juneane Moisésʼra, Nebo katumainʉ ʉ̃tʉ jʉ̃ẽsi. Jeowaba maʉ̃ katumaneba Moisésʼa ũdubisi Drʉa bia diaya adata Abrahánʼa, Isaacʼa akʉza Jacobʼa. Moisésʼra 120 poagabasi iyi beisidera.

Jeowaba Josuéʼa jarasi: «Jordán do kĩrãbari kʼãrãpe wãra Canaánʼena. Mʉ̃a Moisés kʼarebada kĩrãkʼa bʉsida abarika kʼarebayi. Kĩrãduarãra ewariza akʉ bʼaita mʉ̃a Ley diadata. Perarãra, so zareabara. Ora mʉ̃a omarẽã jaradata».

Josuébara ẽbẽrarãta ũme zokʼasi Jericó pʉwʉrʉta ordadamarẽã. Yi kapitulo ababemanera audre kʼawuadayi miaordamiara ʉ̃rʉ. Miaordabarira jẽda zesidadera jarasida wãbeseabʉta Canaán drʉa eda. Maʉ̃ nrʉema Josuéba jarasi israelitarãra ãyi wua jõma ara ope wãñawa panamarẽã. Saserdoterabʉrʉ edepanasi arka bedʼea abarika zedara. Maʉ̃ kʼarea Josuébara jarasi Jordán doeda nãã akʉpanamarẽã, naʉ̃ dora do zromabasi. Mamina saserdoteraba doeda nẽbʉrʉde, dora põasã totosi, ãyira do põasãda ẽzadra besi israelitarata do kĩrãbariyeda. Bʉmara, ¿ãya naʉ̃ ũdubʉrʉdera kĩrãbesidaka Jeowaba puza Rojode ãyi sãwũã kʼarebadata?

Poaga mejãcha berabarida tẽã israelitarãra jʉ̃ẽsida Jeowaba Drʉa bia diaya adama. Ãyara mama deta parãseapanasi akʉza ne uta useapanasi. Maʉ̃ drʉadera lecheta akʉza kũrabari kũatabasi.