Jeowaba zareata diasi Sansonʼa

Akʉza mejãcha israelitarãra jẽda daizeze zeri ẽã yiwidʼi jʉ̃drʉsida. Maʉ̃ kʼarea Jeowabara iduaribisi israelitarãra pilisteo juwa edre baebimarẽã. Mamina ʉ̃kʉrʉ israelitarabara Jeowata wãrĩnu kãgapanasi, bari jaradaita Manóah. Manóah iyi kimaʉ̃mera wũãwũã neẽbasi. Ewari aba Jeowaba zokʼasi angelta naʉ̃ bedʼeata jaramarẽã Manóah kimaʼa: «Bʉara wũãwũã aba toyi, maʉ̃bara ẽdrʉbiyi israelitarãra pilisteoraneba. Iyira nazareobayi». ¿Bʉara kʼaubʉka kʼairabasita nazareorãra? Maʉ̃rabara wuabemaraba obʉira awuara obasi Jeowaba kãgabʉ oita akʉza bʉdata jipa tʉda ẽ basi.

Tẽã Manóah kimara tosi wũãwũãta, maʉ̃ wũãwũãra trʉ̃gasida Sansón. Maʉ̃ wũãwũã wariside Jeowaba mejãcha diasi zareata. Sansónbara leonta beaseabasi juwaba. Ewari aba iyidobaʉba pilisteora 30 beasi. Maʉ̃ kʼarea pilisteorabara Sansónʼra mejãcha jʉradebasi akʉza jʉrʉpanasi sãwũã beadaita. Ewari aba Sansónʼra Gaza pʉwʉrʉde kʼãĩsi, maʉ̃ kʼarea pilisteorabara Gaza pʉwʉrʉ ãĩ jʉ̃ãbasi Sansón ʉ̃tʉ zeyeda, mawũã beadaita. Maʉ̃ diamasi Sansónʼra wãsi Gaza puertaidu, mõbe maʉ̃ puertata ẽda kʼãrãpe edesi okiwade Hebrón katumaena.

Sansónʼra nobia barabasi, yi trʉ̃ra Dalilabasi, maʉ̃ne pilisteorãra Dalilaʉ̃me bedʼeade jʉ̃ẽsida. Ãya jarasida: «Daiba bʉara plata mejãcha diadayi bʉa daiʼa jarara kʼãrẽba Sansónʼra zarea mejãcha barabʉta. Daibara iyira jidakĩrãpanʉ akʉza karsel eda bʉekĩrãpanʉ». Dalilabara platata mejãcha kãgabasi baera ĩjãsi pilisteora bedʼeara. Sansónbara jipade jarakĩrã ẽ basi iyira kʼãrẽba mejãcha zarea barabibʉra. Dalilara mejãcha kĩrʉsi baera Sansónba jarasi iyi kʼãrẽba zarea barabibʉta. Sansónba jarasi: «Mʉ̃ bʉdara tʉka mʉ̃ra nazareo baera. Mʉ̃ bʉdata tʉdara mʉ̃ zareara neẽã totoyi». Sansónba mawũã odara yibia ẽ basi, ¿bʉmabida?

Aramaʉ̃ta Dalilabara meserabai jarasi pilisteora: «Mʉ̃ara kʼauchu iyira kʼãrẽba mejãcha zarea barabibʉra». Sansónʼra iyi sãkokode kʼãĩbi kʼãrãpe trʉ̃si Sansón bʉdata tʉdamarẽã. Dalilabara jarasi: «Sansón, pilisteorãra namabʉ». Sansón piradrʉsidera kʼawuasi iyi zareara neẽbasita. Pilisteorabara jida kʼãrãpe dabʉ ãĩ bʉeda kʼãrãpe ibalbʉesida karselde.

Ewari aba pilisteorãra ãba yi jʉresida Dagón templode, mawũã ãyi daizezeʼa yiwidʼita. Ãyira jʉrasida: «Dai daizezeba Sansónʼa dai juwa edre baebibʉrʉ. Ãĩ bʉeidua iyi kʼarea ipidadaita». Sansónʼra karseldeba ãĩ edesidadera drʉ̃dau kʼawa edaʉnʉmasida, iyi kʼarea ipidadaita. Sansónʼra jʉrasi: «Jeowa mʉ̃ bia okʼãrãpe mʉ̃aʼa diara jẽda zareata». Mainʉbayedara iyi bʉdara yi warimabasi, maʉ̃ kʼarea drʉ̃daurata iyi zareaba koretasi. Mawũã beisi Sansónʼra akʉza wuabemara iyi kʼawa badasida.