Jesúsbara ẽbẽrarã mejãchaʉta ne diabʉrʉ

Poaga 32de Jesús apostoleraba jaradiade wãsi, ãyira jẽda mejãcha pae zesida, maʉ̃ kʼarea Jesúsba jarasi enaʉ̃ne wãita jãbade Betsaida pʉwʉrʉeda. Mamina ãyi mainʉ arakʼaita bade, Jesúsba ũdusi ẽbẽrarã mejãchaʉta ãyi wãma wãta. Iyira bakĩrãbasi iyi apostolerabitapai, mawũãsidu bia edasi ẽbẽrarã. Bebikʉasi kayaberata akʉza nekʼãrẽ mejãcha jaradia jʉ̃drʉsi. Badua jaradiabasi Daizeze Nokʼo ʉ̃rʉ. Kewarare iyi apostoleraba jarasi: «Ẽbẽrarãra jarrabʉbaibara. Jarada wãnamarẽã yiko jʉrʉde».

Jesúsba jarasi: «Ãyira kʼãrẽa wãira neẽ. Awuarabʉrʉ maraba diaidua yikora». Iyi apostoleraba widisida: «¿Bʉara kãgabʉka daita wãmarẽã pan edade ãyi kʼãrẽa?». Felipeba apostoleranebema abaʉba jarasi: «Dayirãba plata mejãcha erbʉmina, kʼaʉ̃ra ẽbẽrarã jõmaitara yikora edaʉbeda ẽ bayi».

Jesúsba widisi: «¿Yikora kʼãrẽaba erbʉ dayirãbara?». Andrésba panʉsi: «Daibara panta juesoma erpanʉ akʉza bedata ũme. Mamina naʉ̃ra wika ẽbẽrarã mejãchaitara». Jesúsba jarasi: «Weidua panta akʉza bedata». Maʉ̃ tẽã jarasi egorode jewedamarẽã 50tade akʉza 100ne. Maʉ̃ne panta bedaʉ̃me jida kʼãrãpe ʉ̃ta akʉsi, mõbe yiwidʼisi. Maʉ̃are diasi iyi apostolera ẽbẽrarã jõmaʉʼa dedekamarẽã. Mamara basi 5.000 yumakẽrãra, wẽrãra bʉ awuara akʉza wũãwũãra bʉ awuara. Ãyira jõma nekosi adewara jãwasida. Maʉ̃ tẽã apostolerabara ẽbẽraba yiko amaenakʉadata jõma jẽda jʉrepesida, mawũã mia ababida ãrĩ ẽ basi yikora. ¡Ẽra 12 bʉrata jõma birasida! Jesúsba kʼãwũã odara miõba okabasi, ¿bʉmabi Jesúsba mawũã odara jipa yibiabasika?

Jõmaʉ̃ta kĩrãmigasida, maʉ̃ kʼarea ẽbẽrarã mejãchaʉba kãgapanasi Jesúsʼra ãyi nokʼo bamarẽã. Mamina Jesúsbara kʼawuabasi iyira wabida nokʼo babe ẽãta, Jeowabara kãgabasi baera tẽãbʉrʉ nokʼo bamarẽã. Maʉ̃ tẽã Jesúsbara jarasi iyi kʼaidupanʉra puza Galilea kĩrãbari wãnamarẽã. Ãyira wãsi jãbade, waya Jesúsʼra doba wãsi katumaena. ¿Kʼãrẽa Jesúsʼra doba mawũã wãsi? Yi Zezeʉ̃me bedʼeakĩrãbasi baera. Jesúsbara iyi nekʼãrẽ mejãcha oibarabasimina ewari jʉrʉbasi yi Zezeʉ̃me bedʼeaita.