Jehoiadára zowaĩnĩgʉabasi

Jezabelbara kauta aba erbasi, abarika iyi kĩrãkʼa so kayiruabasi maʉ̃ra, maʉ̃ trʉ̃ra Atalíabasi. Atalíara juwa jidasi nokʼo Judádebemaʉ̃me. Maʉ̃ nokʼo beida tẽã yi warraba zokʼa besi. Yi warra beida tẽã Atalíaba zokʼa jʉ̃drʉsi Judá pʉwʉrʉra. Iya zokʼabʉta kʼaiba jãrĩ ẽ bamarẽã, yi warrarata akʉza yi nietorata makenasi.

Sumo saserdote Jehoiadába akʉza yi kima Jehosebaba ũdusida Atalíaba onʉmʉra zeri ẽãta. Ãyira bebʉdepanʉmina, wũãwũãra merasida Atalíaba bea ẽ bamarẽã. Maʉ̃ wũãwũã trʉ̃ra Jehoásbasi. Ãyara maʉ̃ wũãwũãra dapʉẽsida templode.

Jehoás 7 poaga babʉrʉde, Jehoiadába nokʼo babisi. Jehoiadába ẽbẽra akʉbarira nokʼota ãba jʉre edasi akʉza lebitarata. Mõbe jarasi: «Templo puertara biʼia akʉidua, mõbe mia abaʉta eda zebirãra». Mõbebʉrʉ Jehoiadába koronata jʉ̃bisi Jehoásʼa, Judáde nokʼo bamarẽã. Maʉ̃ kʼarea ẽbẽrarã Judádebemara jʉrasi: «¡Naʉ̃trʉ nokʼoara!».

Nokʼo wẽrã Atalíabara ũrĩsi ẽbẽrarã bʉgadrʉbarabʉta, mõbe wẽba wãsi temploeda. Iya nokʼo ũduside jarasi: «¡Marara mʉ̃arebʉ ẽ!». Akʉbarira nokʼorabara Atalíata jidada kʼãrãpe, jĩga ededa kʼãrãpe beasida. Pʉwʉrʉraitara iyira yiza bia ba ẽ basi. Mawũẽra, ¿kʼãrẽta berabaribasi mamaʉ̃ba ʉ̃tara?

Jehoiadábara kʼarebasi pʉwʉrʉta bedʼea abarika zedamarẽã Jeowaʉ̃me. Pʉwʉrʉbara jarasi Daizezeʼabʉrʉ yiwidʼidaita. Jehoiadábara zokʼasi jõma Baal templora ãrĩnamarẽã akʉza ãya nekʼãrẽ oma erbadasida. Mõbe bʉesi saserdoterata, lebitarata maʉ̃ templode trajadamarẽã. Mawũã jẽda Daizezeʼa yiwidʼidamarẽã. Mõbe templo akʉmarẽã ẽbẽrarãta bʉesi, mawũã mamaeda wãna ẽ bamarẽã ẽbẽrarã jaigʉabʉta. Jehoiadába akʉza akʉbarira nokʼoba edesida Jehoásta nokʼo deda, mama nokʼo jewedabarimae jewedabisi. Idibʉrʉ ãyira Jeowabʉrʉ yiwidʼiseabasi nekʼãrẽ krĩcha ẽã, neẽbasi baera Atalíata akʉza Baalta. ¿Bʉmara Jehoiadára perabasika? Iyira pera ẽ basi baera ẽbẽra mejãchaʉta kʼarebasi.