Kʉra ãbaʉba akʉbʉ ẽbẽrarã ãba yi jʉrẽbarima eda wãbʉsita

WARRARABA WIDIPANɄTA

¿Kʼãrẽa yibia Daizeze Nokʼo ʉ̃rʉ bedʼeabaridema wãita?

Jeowa ʉ̃rʉ Kʼawuabipanʉrãbara semanaza reunion ũme opanʉ, ¿Mamara kʼãrẽta opanʉ ãba yi jʉrebʉrʉdera? ¿Bʉitara yibia bʼaika mama wãira?

¿Kʼãrẽta opanʉ Jeowa ʉ̃rʉ Kʼawuabipanʉrãbara ãyi ãba yi jʉrebʉmaera?

Mama ãba yi jʉrepanʉ Daizeze Bedʼea ʉ̃rʉ audre kʼawuadaita, bʉta mama wãbʉbʉrʉ naʉ̃ nebiata ũduyi:

Wãrĩnu kʼawuaita Daizeze ʉ̃rʉ.
Idi ewade kʼawuaita naʉ̃ drʉade kʼãrẽ berabaribʉta.
Kʼawuaita sãwũã ẽbẽra bia bʼaita.
Neũdukʼawuara bia ũduita.

¿Bʉara maʉ̃ra kʼawuabasika? Ãba yi jʉrebarira kapʉria bedʼeade jarachu Salón del Reino, naʉ̃ra mawũã jarabʉ Daizeze Nokʼo ʉ̃rʉ audre bedʼeabʉ baera (Mateo 6:9, 10; 24:14; Lucas 4:43).

¿Kʼãrẽa biga bʼai bʉ mama wãira?

Mama jaradiabʉba mejãcha kʼarebayi bʉra. Mawũã, ãba yi jʉrebarimae Daizeze Bedʼea akʉbʉba kʼarebayi bʉra burubia bʼaita (Proverbios 4:5). Maʉ̃ba jarakĩrãbʉ Daizeze Bedʼeaba kʼarebaita bʉra nekʼãrẽ obʉde bia jida kʼawuaita. Akʉza bʉara ũduseabʉ naʉ̃ bedʼeaba widibʉta:

Bʉta wãra sabadode mawũã ẽ bʉrʉ domingode ãba yi jʉrebarimae, bedʼea naʉ̃ kĩrãkʼabʉta ũrĩñi:

¿Kʼãrẽa Daizeze Bedʼea idu yi edebibara?
¿Kʼaita jʉrʉseabʉ dayi bedʼea zroma erbʉdera?
¿Atiara Daizeze Nokʼobara kʼãrẽta obʉ dayirã kʼareara?

«Mʉ̃ kopaero ãba yi jʉrebarima jʉ̃ẽ kʼãrãpe mʉ̃ yibarirabawara ãba jewedasi, mama iya kartata kʼareba akʉdiasida. Iya mʉ̃a jarasi iyira kĩrãmigasita bedʼea widipananata aripe panʉbasi baera, adewara jarasi iyi iglesiadera neẽãta karta kʼãwũã kʼaidu akʉ wãnaita» (Brenda).

¿Bʉara maʉ̃ra kʼawuabasika? Ãba yi jʉrebarimae eda wãira bari wabʉ, mama eda plata widida ẽ.

Mama panʉra ẽbẽrabara bʉra kʼarebayi. Daizeze Bedʼeabara jarabʉ baera mama yiya zowaĩnĩgʉa diabʉta (Hebreos 10:24, 25). Idi ewadera ẽbẽrarãra ayitrʉ krĩchabʉ mamina dayita ãbabʉbʉrʉ jari ẽbẽrarã wuabemara ʉ̃rʉ krĩchabʉbawara dayirã sobiabʉ.

«Mʉ̃ trajodeba berabarida tẽãra mapaekʉ akʉza masẽkʉ mamina mʉ̃ ãba yi jʉrebari eda wãbʉrʉdera mamabema ẽbẽrabara mʉ̃ra sobiabibʉ, maʉ̃ba zarea jidabʉ akʉza nruemara aduʼa trajabʉ» (Elisa).

¿Bʉara maʉ̃ra kʼawuabasika? Naʉ̃ drʉade 120.000 audrebʉ kongregasionta akʉza 60.000 audrebʉ ãba yi jʉrebarideta. Poagaza 1.500 kʼawa parãpanʉ Daizeze Nokʼodeta, ẽbẽrarã Daizeze ʉ̃rʉ kʼawuakĩrãpanʉta eaba wã baera.a

Ʉ̃kʉrʉ warraraba jarabʉta

«Mʉ̃ warrarabaside kopaerota mʉ̃me wãsi ãba yi jʉrebarimae, iya mʉ̃aʼa jarasi iyitara yibiabasita ũdusibaera ẽbẽrarã kĩrã awuara awuarakabʉta ãbabʉta Daizeze ʉ̃rʉ kʼawuaita. Ara nʉweda mʉ̃ zokʼabʉta zesi, iyira mejãcha kĩrãmigasi ẽbẽrarãba Daizeze Bedʼeata mejãcha zokʼapanʉ baera. Maʉ̃ba mʉ̃ta kʼarebasi audre kãgaita ãba yi jʉrebarima wãita» (Jessica).

«Mʉ̃ ãba yi jʉrebarimae wãbʉrʉdera mejãcha krĩchabi ẽ mʉ̃ bedʼea zroma ʉ̃rʉ. Mamara dayi bebʉra wãrĩnu bebʉara babibʉ, ẽbẽra bia babibʉ akʉza nekʼãrẽ awuara obibʉ. Ãba yi jʉreda tẽã mʉ̃ra mejãcha zarea barabʉ akʉza aduʼayida» (Timothy).

«Mʉ̃a trʉ̃si yumakẽrã aba jʉ̃ẽmarẽã ãba yi jʉrebarimae, iya jarasi: ‹Mama wãsita ũdubita daiba aña jarabʉta› mamina wãrĩnu baira jarasi iya krĩchabadatrʉ aña basita. Iyara kãgasi mama pananaba kãgata ũdubipanasi baera, iya jarasi: ‹Ãya mʉ̃ ʉ̃rabʉrʉ ũdukʼawuasimina edasida neũdukʼawua kĩrãkʼa›» (Jacob).

«Edaude mʉ̃a krĩchabʉ: ‹Mʉ̃ ãba yi jʉrebarida tẽã mesẽra deda wãita›. Mamina reuniora mejãcha yibia baera, mama bakĩrãbida akʉza mʉ̃ neũdukʼawuarabawara mejãcha bedʼeabʉ. Kʼãwũã ãba yi jʉrebarimae wã ẽ basibʉrʉ, neũdukʼawuara biata erba ẽ bakasi» (Madison).

a Bʉa kʼawuakĩrãbʉbʉrʉ ãba yi jʉrebarima sama wãita, eda wãra internetʼne akʉza jʉrʉda «Jeowa ʉ̃rʉ Kʼawuabipanʉrã ãba yi jʉrebarimae». Mama, eda wãra «jʉrʉra sãma waĩta».