Yuwẽrã judia abaʉba jara ũrĩbibʉ kʼãrẽa iya ĩjãbadata idubʉsita

Bʉ ʉ̃rʉ wiña bedʼeada.

Mʉ̃ra tosida 1979de Estados Unidosde. Mʉ̃ 3 poagabaside mʉ̃ yibarirãra yi idubʉsida. Mʉ̃ papara judiabasi baera maʉ̃ne dapʉẽsi iyara akʉza wãbasi eskuela judioraita maʉ̃ trʉ̃ra yeshivás. Maʉ̃ne mʉ̃ 7 poaga babʉrʉde daira wãsi Israel pʉwʉrʉeda mʉ̃ eskuelaeda wãbada trʉ̃ra kibutz, poaga aba babʉrʉde wãsi daira Méxicoeda.

Mʉ̃ badamae sinagoga neẽbasimina mʉ̃ara idubʉ ẽ basi judioraba obadara, bari jaraita: sabadode belara koakʉaita, lebasi Toráta (libro judiodebemata) sidur kʼarebadeba yiwidʼibasi (libro yiwidʼi ʉ̃rʉdebemata). Mʉ̃ kopaerora kolegiodebema jarakabasi mʉ̃ religiontrʉ iyi arata. Mʉ̃ara jipa lekabasi libro Nuevo Testamentora (maʉ̃ra bedʼeabʉ Jesuba kʼãrẽ obada ʉ̃rʉ akʉza jaradiada ʉ̃rʉ). Mʉ̃ papaba mʉ̃aʼa jarabarisi baera maʉ̃ta akʉ ẽ bamarẽã, mawũã mʉ̃ krĩchata aña ba ẽ bamarẽã.

¿Kʼãrẽa akʉita besi bʉara Nuevo Testamentora?

Mʉ̃ 17 poaga babʉrʉde estudiaita jẽda wãsi Estados Unidosʼeda, mʉ̃a erchuasi neũdukʼawua kristianota, maʉ̃ba jarabarisi Jesu zedata ĩjã ẽ basibʉrʉ, mawũãra dayi bebʉde nekʼãrẽ waebʉ kĩrãkʼabasita.

Maʉ̃ne mʉ̃a panʉsi: «Ẽbẽrarã yi Jesu ʉ̃rʉ ĩjãbibʉra sewapanʉ».

Iya mʉ̃aʼa widisi: «¿Bʉara lebarika Nuevo Testamentora?».

Mʉ̃a panʉsi: «Leka».

Iya mʉ̃aʼa jarasi: «Bʉa maʉ̃ta akʉkabʉrʉ mawũã krĩchabe ẽ, mawũãra ẽbẽra bia krĩcha ẽãba panʉbari kĩrãk ʼabayi».

Iya mawũã jaradaba mʉ̃ta krĩchabara amaesi, mʉ̃abida mawũã krĩchabasi baera, maʉ̃nera perasi mʉ̃ra. Mʉ̃a ĩjãsi iya maʉ̃ Biblia mʉ̃aʼa diadara akʉita.

¿Sãwũã ũdusi bʉa lebadara?

Mʉ̃ra kĩrãmigasi kʼawuaside maʉ̃ Nuevo Testamentora judioraba bʉdata. Mʉ̃a maʉ̃ lebʉrʉza ũdu wãsi Jesura jipa ẽbẽra biabasita akʉza edabʉta krĩchabasita, adewara ẽbẽrarãta kʼarebakĩrãbasita. Maʉ̃ne wãsi mʉ̃ra bibliotekama mawũã Jesu ʉ̃rʉ audre bedʼeabʉ jʉrʉita. Mʉ̃a maʉ̃ra librora lebʉde mʉ̃a krĩchabi ẽ basi Jesura Dayirã ẽdrʉbibarita. Mʉ̃a maʉ̃ra librora lebʉde ʉ̃kʉrʉba jarabasi Jesura Daizezebasita, mamina mʉ̃itara maʉ̃ra añabasi. Maʉ̃ kʼãrẽa mʉ̃a krĩchasi: «Jesu yiwidʼibasidera, ¿kʼaiaʼa obasi? ¿Iyikʉza yiwidʼibasika?». Adewara Jesura beisi mamina Daizeze Bedʼeaba jarabʉ: Daizezera bei ẽãta.a

¿Aramaʉ̃ta kʼãrẽta osi bʉara?

Mʉ̃a kʼawuasi wãrĩnu ʉ̃rʉ kʼawuaira zare ẽãta, mʉ̃ra soiduba Daizezeʼa jẽga yiwidʼibasi maʉ̃nera mʉ̃ara zokʼa ẽ basi libro sidurʼra yiwidʼita. Maʉ̃ne mʉ̃ yiwidʼi berabaridogode Jeowa Kʼawuabipanʉrã ũmeta mʉ̃ deidu zesida, mʉ̃aʼa bedʼeada kʼãrãpe kartarata ũme amaesida. Ãya karta dia amaenaba akʉza ãyi sãwũã bedʼeadaba mʉ̃a wãrĩnu kʼawuabisi aya ĩjãbʉra wãrĩnu Daizezedeba zebʉta. Jeowa ʉ̃rʉ Kʼawuabipanʉrãbara ĩjã ẽ Daizeze ũbeabʉ ʉ̃rʉra, awuarabʉrʉ kʼaupanʉ Jesura «Daizeze warrata»b akʉza iyira «Daizezeba nããra oda».c

Maʉ̃ audre ẽãne jẽda wãsi mʉ̃ra Méxicoeda akʉza Jeowa ʉ̃rʉ Kʼawuabipanʉrãbawara propesia Jesu bedʼeada ʉ̃rʉ audre kʼawua wãsida. Mawũãsidu ĩjãita mʉ̃itara wiña zarea basi, maʉ̃ kʼarea mʉ̃a krĩchabasi: «¿Wãrĩnu Jesu abaʉʼabʉrʉ maʉ̃trʉ oseabasika? akʉza ¿iya sewasibʉrʉ ẽbẽrarã jarabʉde iyira Dayirã ẽdrʉbibarita?».

¿Kʼãrẽba ĩjãbisi bʉara?

Jeowa ʉ̃rʉ Kʼawuabipanʉrãbara mʉ̃aʼa ũdubisi propesiarata mejãcha. Maʉ̃rãra awuru ẽbẽranera berabari ẽ baibasi. 700 poaga berabari nãã, Miqueasba jara ũrĩbisi Dayirã ẽdrʉbibarira todaita Belénʼne.d ¿Kʼaibʉrʉ jidaibasi yi sama todaira? Isaíasba bʉsi Dayirã ẽdrʉbibarira beadaita ẽbẽra kayirua kĩrãkʼa, mamina joudaita ẽbẽrarã plata mejãcha erbada kĩrãkʼa.e Maʉ̃ra propesiara jõma aripe berabarisi Jesude.

Mʉ̃itara audrera yibiabasi kʼawuaita Jesu samaʉ̃ba zedata. Daizeze Bedʼeabara jara ũrĩbibʉ Jesura zeibasita nokʼo Davidʼdeba.f Judiorabara erbasi registro ẽbẽrarã samaʉ̃ba zeda bia kʼawuaita, maʉ̃ kʼarea Jesuta David mebẽrãneba ze ẽ basibʉrʉ ẽbẽrarã waña jarakasida, mamina ãya maʉ̃ra obe ẽ basi, wãrĩnu jõmaʉ̃ba kʼawuabasi baera Jesura David mebẽrãneba zesita. Ẽbẽrarã mejãchaʉba jarapanasi Jesura David warrata.g

Poaga 70de, Jesu beida 37 poaga berabarida tẽã gorogorora Romanebemarabara Jerusalén pʉwʉrʉta ãrĩsida maʉ̃ne registrorasida jõma aduakʉasi. Maʉ̃ kʼarea Jesu samaʉ̃ba zeda kʼawuaita, Jesura zeibarabasi poaga 70 nãã.

¿Bʉa mawũã estudiadadeba kʼãrẽta kʼawuasi?

Deuteronomio 18:18, 19​de Daizezeba jarasi Israel pʉwʉrʉdera propetata Moisés kĩrãkʼa zeita. Akʉza jarasi: «Yumakẽrãra mʉ̃ bedʼea ũrĩ ẽãra iyira mʉ̃ trʉ̃neba bedʼeai baera, mʉ̃abʉrʉ kʼawua oya». Mʉ̃a mawũã Daizeze ʉ̃rʉ mejãcha akʉdaba wãrĩnu kʼawua zesi Jesu Nazaretdebemara propeta arabasita.