¿Wãrĩnubʉka Diarura?

Daizeze Bedʼeaba panʉbʉ

Mawũã Diarura wãrĩnu bʉ. Iyira agelbasi maʉ̃ta iyara Daizeze bedʼeara jipa ũrĩ ẽ basi. Daizeze Bedʼeaba naʉ̃ta jarabʉ iyi ʉ̃rʉ: «Naʉ̃ ẽjũãne nokʼota» (Juan 14:30; Efesios 6:11, 12). Daizeze Bedʼeaba trʉ̃ bio daibʉ Diaru sãwũãbʉ dayirã kʼawuabita:

• Satanás, naʉ̃ bedʼeaba jarakĩrãbʉ ẽbẽra abaʉ ʉ̃rʉbʉta (Job 1:6).

• Diablo, naʉ̃ bedʼeaba jarakĩrãbʉ wuabema ʉ̃rʉ imitia bedʼeabʉta (Revelación [Apocalipsis] 12:9).

• Damata, naʉ̃ bedʼeaba jarakĩrãbʉ sewabʉta (2 Corintios 11:3).

• Aña obikĩrãbʉta (Mateo 4:3).

• Sewa nebʉrʉ omia (Juan 8:44).

Diarura dayide nekayiruata edabʉ ẽ

Ʉ̃kʉrʉba krĩchapanʉ nekʼãrẽ kayirua dayirãba obʉde, mawũã opanʉta Diaruta edabʉ baera. Akʉza jarapanʉ Daizezebida nekayiruata eda abʉta. Daizeze Bedʼeaba jarabʉ Daizezera bedʼeasita Diaruʉ̃me, mamina Daizezera nekayirua neẽ (Deuteronomio 32:4; Job 2:1-6.) Adewara Daizeze Bedʼeadera jarabʉ Diarubara Jesúsʼa kayirua obikĩrãbasita, mamina Jesúsʼsida nekayirua oka. (Mateo 4:8-10; 1 Juan 3:5.) Daizeze Bedʼeabara ũdubibʉ Diarura wãrĩnubʉta, mawũã dayirãba nekʼãrẽ kayirua eda erbʉ ẽ.

Ʉ̃kʉrʉba ĩjãpanʉ Diarura wãrĩnu chu ẽãta. Ẽbẽrarãba mawũã krĩchapanʉ Daizeze Bedʼeaba jarabʉ baera Diaruba ẽbẽrarã sewabʉta (2 Tesalonicenses 2:9, 10). Diaruitara jipa yibia ẽbẽrarãba krĩchaita iyira neẽãta (2 Corintios 4:4).

Ẽbẽrarãba kʼãrẽta aña krĩchabʉ Diaru ʉ̃rʉ

Wãrĩnuta: Daizeze Bedʼeade bedʼea Lucifer zebʉ ebreodeba, maʉ̃ bedʼeara jarakĩrãbʉ uruyabʉta (Isaías 14:12). Naʉ̃ bedʼeara zokʼasida Jeowaba jaraside jõbita Babiloniata, Babiloniadebemarãra ʉ̃tabʉta krĩchapanasi baera (Isaías 14:4, 13-20). Akʉza naʉ̃ propesiade Babiloniane nokʼora makenana ʉ̃rʉ bedʼeabʉde, ãyi kʼarea ipidaya Daizeze Bedʼeaba jarabʉ uruyabʉta.

Wãrĩnuta: Diarura Daizeze nejʉra, mawũã iyi nezokʼa ẽ. Diarura Daizeze odepanʉrã nejʉra, maʉ̃ kʼarea pẽwãpanʉ akʉza sewidata jarapanʉ (1 Pedro 5:8; Revelación 12:10).