¿Kʼãrẽa Daizezebara iduaribisi Holocausto berabarimarẽã?

Maʉ̃ Holocausto ewaride ẽbẽrarã mejãcha beida mebẽrãba akʉza maʉ̃ ewaribaside yi ẽbẽra mejãcha zʉbʉriabadaraba so zareata nesidabasi akʉza naʉ̃ bedʼeata widibʉ: ¿Kʼãrẽa berabarisi Holocausto judiora? ¿Kʼãrẽa Daizezebara idu berabaribisi? Ʉ̃kʉrʉba krĩchapanʉ maʉ̃ Holocausto berabaridara jipa nekayiruabasita maʉ̃ba ãyitara Daizezera neẽãta.

¿Ʉ̃kʉrʉba kʼãrẽta kĩchabʉ Holocausto ʉ̃rʉ akʉza Daizeze ʉ̃rʉ?

Nebʉrata: Kayirua widita kʼãrẽa Daizezebara iduaribisita Holocaustora.

Wãrĩnuta: Ẽbẽrarã Daizeze ʉ̃rʉ ĩjãbʉraba widisida kʼãrẽa Daizezebara iduaribibʉta zʉbʉriara. Bari jaraita propeta Habacucba widisi naʉ̃ta Daizezeʼa: «¿Kʼãrẽa mʉ̃a ũdubibʉpe nemitiara? ¿Kʼãrẽa bʉa iduaribibʉ maʉ̃ nemitiara?» (Habacuc 1:3). Jeowabara Habacucʼba bedʼea widida kʼarea kʼẽã ẽ basi, awuarabʉrʉ Habacucʼba maʉ̃ bedʼea wididara bʉbisi iyi bedʼeade, mawũã jõmaʉ̃ba kʼawuadamarẽã.

Nebʉrata: Daizezebara dayirã zʉbʉriabʉra akʉ ẽ.

Wãrĩnuta: Daizezebara jipa kãga ẽ ẽbẽrarãra nekayirua berabarimarẽãra akʉza zʉbʉriamarẽãra (Proverbios 6:16-19). Daizeze Bedʼeaba jarabʉ Noé ewaribaside Daizezeba ũduside ẽbẽrarãba mejãcha nekayirua obʉta iyira sopʉasi (Génesis 6:5, 6). Maʉ̃ba ũdubibʉ ẽbẽrarã Holocausto kʼarea mejãcha zʉbʉriasidera Daizezera sopʉasi (Malaquías 3:6).

Nebʉrata: Daizezeba mawũã zokʼasi Holocaustora judiorata zʉbʉria odamarẽã.

Wãrĩnuta: Siglo nããrabemane Jeowabara iduaribisi romanoraba Jerusalén pʉwʉrʉta ãrĩnamarẽã (Mateo 23:37-24:2). Mamina maʉ̃ oda tẽã miõ pʉwʉrʉta iyara zʉbʉria oka. Adewara Daizeze Bedʼeaba jarabʉ judiorata akʉza judiora ẽãta Daizezebara jõma abarika akʉbʉta (Romanos 10:12).

Nebʉrata: Wãrĩnubasibʉrʉ Daizezeba dayirã kãgabʉra, iduaribi ẽ bakasi kʼãwũã Holocausto berabarimarẽãra.

Wãrĩnuta: Iyara obi ẽ ẽbẽrarãra zʉbʉria berabarimarẽãra, mamina edaʉde iduaribibʉ berabarimarẽã (Santiago 1:13; 5:11).

¿Daizezebara kʼãrẽa iduaribisi Holocausto berabarimarẽãra?

Jardin Edénʼne Adán Evaʉ̃meba nekʼãrẽ oda kʼarea, maʉ̃neba ʉ̃ta Jeowabara iduaribibʉ kʼãrẽ, zʉbʉria berabarimarẽãra mawũã ũdubita iyi abapaibʉrʉ zokʼaseabʉta, mamina Daizeze Bedʼeaba jarabʉ Diarubʉrʉ zokʼabʉta naʉ̃ drʉara, mawũã Daizezeba zokʼabʉ ẽãta (Lucas 4:1, 2, 6; Juan 12:31). Nekʼãrẽ ũmebʉ Daizezeba jaradata kʼãrẽa iya berabaribi ẽ basita Holocaustora.

1. Daizezebara parãsi ẽbẽrarãra ãya kãgabʉta jidamarẽã. Daizezebara jarasi Adánʼa akʉza Evaʼa kʼãrẽta oibarabasita, mamina maʉ̃ra obi ẽ basi iya ajuerzadera, ãyidobaʉba jidasi saʉ̃ta nebiata akʉza saʉ̃ta nekayiruata. Ãya mawũã nekayirua odaba mejãcha ũdusida zʉbʉriata (Génesis 2:17; 3:6; Romanos 5:12). Maʉ̃ba Adánba akʉza Evaʉ̃meba mawũã odadeba ẽbẽrarãra mejãcha zʉbʉriapanʉ. Statement of Principles of Conservative Judaism (Declaración de principios del judaísmo conservador) naʉ̃ libroba naʉ̃ta jarabʉ: «Naʉ̃ drʉade kʼãwũã mejãcha zʉbʉria berabaribʉra berabaribʉ daya bia jida ẽ baera». Mamina Daizezebara idibasidu iduaribibʉ ẽbẽrarãba ãyikʉza nekʼãrẽ jidamarẽã adewara iduaribibʉ ewari berabarimarẽã ẽbẽrarãba ãyi bedʼea zromara ara omarẽã ãyimabʉde.

2. Daizezebara Holocausto ewaride mejãcha zʉbʉriadara iyara jõbikĩrãbʉ adewara iyara maʉ̃ra oseabʉ. Daizezebara jarasi ẽbẽrarãra beidarãra mejãcha piradrʉbita maʉ̃ne edabʉta Holocausto ewaride beidarasida. Adewara jarabʉ kʼãrẽ Holocausto ewaride yi ẽbẽrarã zokʼai berabaridara akʉza maʉ̃ kʼarea mejãcha krĩcha zroma obʉra, Daizezebara maʉ̃ra krĩchara zʉbʉriara ãĩ bʉeita (Isaías 65:17; Hechos 24:15). Kʼawuapanʉ Daizezebara iya jaradara aripe berabaribita iya ẽbẽrarã mejãcha kãga baera (Juan 3:16).

Ẽbẽrarã mejãchaʉba Holocaustode nekʼãrẽ berabaridabara ũdusi kʼãrẽa bʼaira akʉza jẽda ĩjãbʉta ũdubisida, ¿kʼãrẽba kʼarebasi ãyira? Ãya kʼawua zesi Daizezebara kʼãrẽa iduaribibʉta zʉbʉriara akʉza aranʉbai iyara jõbita zʉbʉriara.