¿Badu religionba Daizeze kʼawa babiseabʉka?

¿Daizeze Bedʼeaba panʉbʉta?

Mawũã ẽ, religion jõmaʉ̃ta awuarapanʉ akʉza Daizeze Bedʼeadebʉ eda Daizezeba religionʼra kãga ẽ badata, akʉdaya kʼãrẽa kãga ẽ basita.

Nããra: Daizeze zeri ẽã yiwidʼipanasi

Daizeze Bedʼeaba jarabʉ daizeze zeri ẽã yiwidʼi ẽ bamarẽã ãya kʼareba ẽ baera (Jeremías 10:3-5; 16:19, 20). Jeowabaa Israel pʉwʉrʉʼa jarasi: «Awuru daizeze zeri ẽãta erbarãra mʉ̃ awuara» (Éxodo 20:3, 23; 23:24). Israelitara daizeze zeri ẽã yiwidʼibasidera Jeowara mejãcha kĩrʉsi (Números 25:3; Levítico 20:2; Jueces 2:13, 14).

Idi ewadebida Daizezera maʉ̃ ʉ̃rʉra abarika krĩchabʉ, daizeze zeri ẽã ʉ̃rʉra (1 Corintios 8:5, 6; Gálatas 4:8). Daizezeba jarabʉ iyi ode bakĩrãbʉbʉrʉ idubʉmarẽã religion zeri ẽãta. Daizeze Bedʼeaba jarabʉ: «Ãĩ wãidua ãyideba akʉza jãpe bʼaidua» (2 Corintios 6:14-17). ¿Daizezeba maʉ̃ bedʼeata jara ẽ bakasi iya religionʼrata jõma abarika bia akʉbasibʉrʉ akʉza iyi kʼawa babibasibʉrʉ maʉ̃ra religionba?

Ũmeta: Daizezebara kãga ẽ basi ãyi sãwũã yiwidʼibadara iyaʼa

Jeowabara Israelitarãra bia akʉ ẽ basi daizeze zeri ẽã yiwidʼi jʉ̃drʉsi baera akʉza religion zeri ẽãba opanʉta ojʉ̃drʉsi baera (Éxodo 32:8; Deuteronomio 12:2-4). Jesubara kʼẽãsi religion nokʼora iyi ewaride Daizezeʼa sãwũã yiwidʼibada kʼarea. Ãyara ʉ̃rʉbʉrʉ ũdubibasi Daizezeʼa yiwidʼibʉ kĩrãkʼa, ãyara wãrĩnu bʼaira Leyba jarabada awuara opanasi, aripe obʉta ũdubida ẽ basi, so zʉbʉria ũdubida ẽ basi akʉza Daizezeʉ̃me kʼẽrẽpa ba ẽ basi (Mateo 23:23).

Religion wãrĩnu Daizeze Bedʼeaba jarabʉ kĩrãkʼa obʉrabʉrʉ, maʉ̃rabʉrʉ Daizeze kʼawa babiyi (Juan 4:24; 17:17; 2 Timoteo 3:16, 17). Religionʼraba Daizezeba jaradiabʉ kĩrãkʼa jaradia ẽ bara, ẽbẽrarãta jĩgara babibʉ Daizezedeba. Mejãchaʉba krĩchapanʉ Daizeze Bedʼeaba naʉ̃ta jaradiabʉta: Zeze ũbeabʉ ʉ̃rʉ, ẽbẽra beibʉrʉde jaurede bida ʉ̃rʉ akʉza ẽbẽra beibʉrʉde tʉbʉeda wãbʉ ʉ̃rʉ. Mamina maʉ̃ra wãrĩnu ẽ, maʉ̃ra zebʉ daizeze zeri ẽãneba. Religionʼraba maʉ̃ jaradiabʉra zewida ãyimabʉta jaradiabʉ baera, maʉ̃ kʼarea zeri ẽ (Marcos 7:7, 8).

Daizezebara jipa jʉra iyi kãgachu abarita, bari ʉ̃rʉbʉrʉ obʉbʉrʉ (Tito 1:16). Religion wãrĩnu Daizeze kʼawa babibʉbara bari ãyimabʉtrʉ jara ẽ, awuarabʉ ẽbẽrarã kʼarebabʉ awuara bʼaita. Bari jaraita, Daizeze Bedʼeaba jarabʉ: «Ẽbẽra abaʉba krĩchabʉbʉrʉ Daizeze odebʉta, mamina iyi bedʼeata biʼia akʉ ẽ bʉrʉ, iyi sota sewabʉ. Maʉ̃ba iya Daizezeita obʉra zeri ẽ bayi. Daizezebara kãgabʉ jaigʉa neẽã iyaʼa yiwidʼidamarẽã kʼãwũã jẽrãmara akʉita akʉza pẽdrata ãyi zʉbʉriabʉrʉde adewara naʉ̃ drʉaba nekayirua obʉ kĩrãkʼa oẽã» (Santiago 1:26, 27; notara). La palabra de Dios para todos libroba, Daizezeʼa sãwũã yiwidʼibada ʉ̃rʉ jarabʉrʉde zokʼabʉ naʉ̃ bedʼeata «religion jaigʉa neẽãbʉta».