¿Jõma kristianora jarapanʉra opanʉka Jesúsba jarada kĩrãkʼa?

¿BɄARA kʼawuabʉka naʉ̃ drʉa jõmaʉ̃nẽ kristianora apanʉra kʼãrẽababʉta? Atlas of Global Christianity libroba jarabʉ 2010de basi 2.300 millones ẽbẽrarã ãyi kristiano apanʉta, maʉ̃rãra 41.000 religione drakʉabasi akʉza maʉ̃ra aba abakaʉba nekʼãrẽ awuara ĩjãpanasi. Religion mejãchaʉba jarapanʉ ãyira kristianota, maʉ̃ kʼarea ẽbẽrarã mejãchaʉba kʼawua ẽ sama wãita. Maʉ̃ kʼarea ẽbẽrarã mejãchaʉba widipanʉ: «¿Wãrĩnu kristianorabara opanʉka Jesúsba obada kĩrãkʼa?».

Audre biʼia ũrĩnaita krĩchadadrʉ naʉ̃ yizata. Bʉta awuru pʉwʉrʉeda wãbʉrʉ, ũdubibara bʉ sedulata, mawũã kʼawuadamarẽã kʼaita bʉra, mawũã bari jarabe ẽ bʉra kʼaita. Maʉ̃ kĩrãkʼa ẽbẽra aba wãrĩnu kristianoara aira bari jarabe ẽ Jesús kʼaidubemata awuarabʉrʉ iya obʉdeba ũdubibara wãrĩnu kristiano arata. Akʉdaya maʉ̃ta sãwũã opanʉta.

10 poaga Jesús beida tẽã bedʼea cristianora zokʼa jʉ̃drʉsida. Lucasba jarasi: «Antioquíadebʉrʉ nããra, Daizeze kʼarebadeba, iyi ode panʉrãra kristiano trʉ̃gasida» (Hechos 11:26). Wãrĩnu kristianoarara Jesús kʼaidu bʼaibarabasi mamina, ¿kʼãrẽta jarakĩrãbʉ Jesús kʼaidudebemara bʼaita? Diccionario Teológico del Nuevo Testamento libroba jarabʉ: «Jesús kʼaidubemara bʼaibara jarakĩrãbʉ dayi bebʉta diaibarata akʉza iya jarabʉrʉde bʼaibarata ewari jõmaʉ̃nẽ». Mawũẽra wãrĩnu kristianoarabara aripe obʉ Jesúsba jaradata.

¿Bʉka kristianora mawũã Jesúsba zokʼada kĩrãkʼa aripe obʉta? ¿Jesúsbara kʼãrẽta jarasi ẽbẽrarãba kʼawuadamarẽã wãrĩnu kʼairata iyi kʼaidupanʉrãra? Kʼawuadaita kʼãrẽta jarabʉta Daizeze Bedʼeaba akʉra maʉ̃arebemara artikulota. Maʉ̃ra aba abaka bedʼeayi kʼãrẽ nebiata erbʉta wãrĩnu kristianoarabara Jesúsba jarada kĩrãkʼa. Atia akʉdayi sãwũã kristianora siglo nããbemaraba ũdubisidata ãyira wãrĩnu kristianoarabasita, maʉ̃ta akʉdayi idi ewade kʼaiba maʉ̃rane kĩrãkʼa opanʉta.

«Mʉ̃a jaradiabʉde panʉbʉrʉ»

«Mʉ̃a jaradiabʉde panʉbʉrʉ mawũãra marara mʉ̃ kʼaidubemara, wãrĩnuta kʼawuadaya, maʉ̃ wãrĩnuba ẽdrʉbigayi» (JUAN 8:​31, 32).

¿Jesúsbara maʉ̃bara kʼãrẽta jarakĩrãbasi? Iya naʉ̃ bedʼea jarasidera jaradiakĩrãbasi jõma iyi kʼaidubemara jaradiadata. Mamina iya jarasi maʉ̃ iya jaradiabʉra yi audre yi zromaneba zebʉta, iya jarasi: «Awuarabʉrʉ mʉ̃ Zeze mʉ̃ zokʼadadeba, iya jarasi kʼãrẽta jaraibarata akʉza kʼãrẽta bedʼeaibarata» (Juan 12:49). Iyira yiwidʼisi yi Zeze Jeowaʼa akʉza jarasi: «Bʉ bedʼeabara wãrĩnuta jaradiabʉ». Jesúsba jaradiabasidera bedʼeabasi Daizezeba ẽbẽrarã iyi ode kʼẽrẽpa badara jarada ʉ̃rʉ (Juan 17:17; Mateo 4:​4, 7, 10). Jesúsba jarasi «Mʉ̃a jaradiabʉde panʉbʉrʉ», maʉ̃ bedʼeabara ¿kʼãrẽta jarakĩrãbasi? Jarakĩrãbʉ kristianoarabara kʼawuapanʉ Daizeze Bedʼeaba jarabʉra wãrĩnuta, adewara kʼawuapanʉ Daizeze Bedʼeabʉrʉ jarabʉta kʼãrẽne ĩjãibarata akʉza sãwũã bʼaibarata.

Kristianora nããrabema yizata. Apostol Pablobara Jesúsba Daizeze Bedʼea wawia ũdubida kĩrãkʼa, mawũã wawia ũdubibasi. Iya jarasi: «Daizezeba jõma bʉbisi iyi bedʼeara jõma maʉ̃ra biga jaradiaita» (2 Timoteo 3:​16). Adewara kongregasione yi nãã edebaribara bari jaradiaibarabasi Daizezeba jaradiadatrʉ (Tito 1:​7, 9). Adewara kristianora jarasida: «Jʉra kʼawuapanaidʉa miõʼa yi edebi ẽ baita, sewa nebʉradeba akʉza bedʼea zeri ẽãneba, maʉ̃ jõmabʉra ẽbẽra krĩchadeba zebʉ baera, mawũã ze ẽ Kristodeba» (Colosenses 2:8).

¿Kʼairaba idi ewadera ãyide kĩrãkʼa opanʉ? Catecismo de la Iglesia Católica libroba jarabʉ «Iglesia katolikaba jarabʉ ãya dããra wedaʉba ozebʉrʉta Daizeze Bedʼeaba jarabʉmera abarikabʉta». Nokʼo wẽrãba (Toronto, Canadá) religionebemaba jarasi maʉ̃ta Macleanʼs kartade: «Kʼãrẽa ũrĩnaibara ẽbẽra 2.000 poaga badaba jarada ʉ̃rʉra, daiba jarapanʉra nebiata jarapanʉ, bia krĩcha kʼãrãpe opanʉ baera, mamina Jesúsba jaradaʉ̃me ãba zebibʉrʉdera daiba jaradara kʼãrẽ ẽ kĩrãkʼa akʉpanʉ».

New Catholic Encyclopedia libroba naʉ̃ta jarabʉ Jeowa ʉ̃rʉ Kʼawuabipanʉrã ʉ̃rʉ: «Ãyara krĩchabʉ Daizeze Bedʼeabʉrʉ jaraibarata kʼãrẽ ʉ̃rʉ ĩjãibarata akʉza kʼãrẽta oibarata». Ewari aba mebẽã abaʉba jaradiaibasi yumakẽrã, aramaʉ̃ta maʉ̃ yumakẽrãta bedʼeasi: «Mʉ̃a kʼawuabʉ marara kʼaira, bʉa jari libro juwade erbʉba ũdubibʉ bʉra kʼaita».

«Marara naʉ̃ drʉadebema ẽ»

«Naʉ̃ drʉadebemabara jʉradea marara naʉ̃ drʉadebema ẽ baera» (JUAN 17:14).

¿Jesúsbara maʉ̃bara kʼãrẽta jarakĩrãbasi? Oẽbasi baera eda politikade wãita. Iya jarasi: «Mʉ̃ Nokʼota naʉ̃ drʉadebemabasibʉrʉ mʉ̃ kʼaidupanʉrãra yõkasida mʉ̃ judioraba jidasidade. Wãrĩnu bʼaira mʉ̃ Nokʼora naʉ̃ drʉadebema ẽ» (Juan 18:36). Daizeze Bedʼeaba jarabʉ nekʼãrẽta dayirãba obe ẽãta akʉza nekʼãrẽta dayirãba jarabe ẽãta, maʉ̃ta jaradiasi Jesúsbara iyi kʼaidupanʉra, mõbe jaradiasi odamarẽã Daizeze Bedʼeaba jarabʉ kĩrãkʼa (Mateo 20:​25-​27).

Kristianora nããrabema yizata. Jonathan Dymondba naʉ̃ta jarasi kristianora nããrabema ʉ̃rʉ «kristianora nããrabemabara oẽbasi eda yõne wãira, ãyi karselde eda bʉedaimina, ãyi beadaimina akʉza ãyi kʼarea ipidadaimina». Ãya kʼawuabasi zʉbʉria odaira, mawũãsidu kʼaiare wã ẽ basi. Ãyi sãwũãbʉdeba akʉza kʼãrẽ oũdubibʉdeba, ũdubisida jipa awuarabʉta. Maʉ̃ kʼarea jarasida ãya wuabemaraba nemitia obʉ kĩrãkʼa oẽbasi baera, ãyi ʉ̃rʉ aña bedʼeasida (1 Pedro 4:4). Will Durantba naʉ̃ta jarasi kristianora ʉ̃rʉ: «Naʉ̃ra ẽbẽrarãta jipa kʼẽrẽpabasi baera akʉza bia ũdubipanasi baera, ũdubibasi wuabemara ẽbẽrarãbara jipa nekayiruata obʉta».

¿Kʼairaba idi ewadera ãyide kĩrãkʼa opanʉ? New Catholic Encyclopedia libroba naʉ̃ta jarabʉ ẽbẽrarã kʼaiarebʉ ẽ ʉ̃rʉ: «Ẽbẽra aba iya ĩjãbʉ kʼarea yõena wã ẽ bʉrʉ maʉ̃ra biachu ẽ». Reformierte Presse periodikoba naʉ̃ta jarasi iglesiara ʉ̃rʉ: «1994de Ruanda pʉwʉrʉde yõbasidera, edara neẽbasi yõnera Jeowa ʉ̃rʉ Kʼawuabipanʉrãtrʉ. Wuabemara religionʼra jõma wãsimina yõena».

Propesor aba bedʼeasi naziraba Holocausto oda ʉ̃rʉ «mio organizasionba jara auda ẽ akʉza bedʼeada ẽ, maʉ̃ra ẽbẽrarãba mawũã nekayirua odara akʉza kʼãrẽ zʉbʉriabidata adewara kʼãrẽ sewida jarada ẽ bʉrʉ». Maʉ̃ tẽã wãsi Museo Conmemorativo del Holocausto Estados Unidosdebemainʉ, mõbe bʉsi: «Idibʉrʉ kʼawuabʉrʉ mʉ̃a krĩchabada kĩrãkʼa ba ẽ basita». Iya maʉ̃ne kʼawuasi Jeowa ʉ̃rʉ Kʼawuabipanʉrã bia edasida ẽ mina, zʉbʉria edasidamina. Idubʉ ẽ basi Jeowaʉ̃me kʼẽrẽpa bʼaita.

Kristianora nããbemarãra kʼẽrẽpapanasi, idi ewadera ¿kʼairata mawũãpanʉ? U.S. Catholic kartaba jarabʉ: «Idi ewadera warrara religion katolikade edabʉrabara juwa jidai nãã ãba kʼãĩ ʉ̃rʉ wawiata ũduda ẽ». Diakono (katolikora kʼarebabari) abaʉba jarabʉ: «Ẽbẽrarã mʉ̃inʉ ũrãgʼa widi zebʉrʉra juwa jidai ʉ̃rʉ, naena ãba kʼãĩsi». The New Encyclopædia Britannica libroba jarabʉ «Jeowa ʉ̃rʉ Kʼawuabipanʉrãbara ãya nekʼãrẽ obʉde zarea obʉ kʼẽrẽpa bʼaita».

«Mayirai yiya kãgapanʉbʉrʉ»

«Mʉ̃a mara bedʼea yiwidita jarayi maraba odamarẽã: mayirai yiya kãgadamarẽã, mʉ̃a mara kãga zebʉrʉ kĩrãkʼa, marasida mawũã yiya kãga panamarẽã. Mawũãtrʉ jõmaʉ̃ba kʼawuadayi marara mʉ̃ kʼaidubemarata, mayirai yiya kãgapanʉbʉrʉ» (JUAN 13:​34, 35).

¿Jesúsbara maʉ̃bara kʼãrẽta jarakĩrãbasi? Jesucristobara jarasi iyi kʼaidupanʉra iya kãgada kirãkʼa ãyirai yiya mawũã kãgadaibarata, mamina ¿Jesúsbara sãwũãbʉde kãga ũdubisi? Jesúsbara mitia akʉ ẽ basi wẽrãrata akʉza ẽbẽrarã awuru pʉwʉrʉdebemarãra wuabemara ẽbẽrarãba obada kĩrãkʼa (Juan 4:​7-​10). Jesubara iyi zareata akʉza iyi ewarita zokʼasi wuabemara ẽbẽrarã kʼarebaita mawũã krĩcha ẽ basi iyi sãwũãbʉ ʉ̃rʉ (Marcos 6:​30-​34). Mamina iya audre ũdubisi kãgara iyi bebʉ diaside wuabemara bari. Jesuba jarasi: «Mʉ̃ra obeja akʉbari bia akʉza yi obeja akʉbari biabara iyi bebʉta diabʉ iyi obejara bari» (Juan 10:11).

Kristiano nããrabema yizata. Naʉ̃ra kristianorabara yiya jarapanasi mebẽã (Filemón 1, 2). Kongregasionera bia edepanasida ẽbẽrarã badu pʉwʉrʉdebemata. Jõmaʉ̃ba Jesús ʉ̃rʉ ĩjãpanasi baera awuara akʉda ẽ basi judiorata akʉza griegorata (Romanos 10:​11, 12). Poaga 33baside Pentecostés piesta jõna tẽã Jerusalénʼne Jesús kʼaidubadarabara naʉ̃ta osida: «Ẽjũã ãzhidʼera, ne ãzhidʼera nendodʼape platara abʼa abʼaʉa dra bʼeasia zhi nesidʼa kʼawua». ¿Kʼãrẽã nẽdosi ãya mawũã erpananara? Mawũã yi ʉ̃rabʉrʉ buru kʼoedarata pʉwʉrʉde panamarẽã akʉza apostoleraba jaradiabʉta ũrĩnamarẽã (Hechos 2:​41-​45). 200 poagabade apostolera beida tẽã Tertulianoba jarasi ãya drʉa kʼãrẽ nẽdo bʉeda ʉ̃rʉ, iya jarasi awuruba jaradata kristianora ʉ̃rʉ: «Akʉra sãwũã ãyira yiya mejãcha kãgapanʉta akʉza beiya awabʉta ãyi mebẽrã kʼarea».

¿Kʼairaba idi ewade ãyide kĩrãkʼa opanʉ? Historia de la decadencia y ruina del Imperio romano libroba jarabʉ: «Dããra wedaʉba ẽbẽrarã kristiano abʉrabara ãyirai audre zʉbʉria obasi ẽbẽrarã kristianora ẽãba obʉira». Estados Unidosde ũdusida ẽbẽrarã kristiano apanʉrabara audre jʉrapanasita ẽbẽrarã awuru yaradebʉra, adewara jarasi ẽbẽrarã awuru pʉwʉrʉdebemata mamina iyabaʉ religionebʉmina, maʉ̃ zebʉrʉdʉdera bia edada ẽãta, maʉ̃ kʼarea karebakĩrã ẽ awuruba kʼareba nesidabʉdera.

2004de Florida pʉwʉrʉde kimare zesi pʉãndrʉ zromata maʉ̃ra berabarisi jedeko ũmene, maʉ̃ audre ẽãne nokʼoba akʉ jʉ̃ẽsi ẽbẽrarãba ãya nekʼãrẽ zokʼada sãwũã zokʼabarabʉta. Maʉ̃ne iya ũdusi sãwũã Jeowa ʉ̃rʉ Kʼawuabipanʉrãnetrʉ jõma ãya nekʼãrẽ erbadara daucha zokʼabasita, maʉ̃ kʼarea jarasi diaita ãya nesidabʉta mawũã kʼareba wãnamarẽã. 1997 mebẽrãrata jʉ̃ẽsida República Democrática del Congodebemainʉ dedekaita remediorata, yikota akʉza wata, maʉ̃ra diasida mebẽrãra akʉza yi nesidabʉra. Maʉ̃ba diasi mebẽrã Europadebemaba akʉza maʉ̃ edadapeadara balesi 1 millón de dolares.

«Mʉ̃a ũdukʼawuabisi bʉ trʉ̃ra»

«Mʉ̃a ũdukʼawuabisi bʉ trʉ̃ra, jari bʉa mʉ̃aʼa diada drʉadebema [...] Mʉ̃a ũdukʼawuabisi bʉ trʉ̃ra, adewara ũdukʼawuabiyi» (JUAN 17:​6, 26).

¿Jesubara maʉ̃bara kʼãrẽta jarakĩrãbasi? Iya jaradiabasidera Daizeze trʉ̃ ʉ̃rʉ jaradiabasi. Jesúsba Escrituras Hebreas lebasidera iya Daizeze trʉ̃ ũdubaside maʉ̃sida lebasi (Lucas 4:​16-​21). Jesúsba jarasi iyi kʼaidubemara yiwidʼibʉrʉdera Daizeze trʉ̃ta neneẽã babimarẽã (Lucas 11:2).

Kristiano nããrabemara yizata. Apostol Pedrobara zõrãrã Jerusalénʼnebemara jarasi: Daizezeba «pʉwʉrʉ aba jidaita iyi trʉ̃ita» (Hechos 15:14). Apostoleraba akʉza Jesús kʼaidubadaraba ãya jaradiabaside naʉ̃ bedʼeata jarasida: «Jõma Jeowa trʉ̃ jarabʉrʉra, bei ẽã ẽdrʉya» (Hechos 2:​21; Romanos 10:13). Adewara kristianoraba libro bʉbadade, ãyara bʉbasi Daizeze trʉ̃sida. Libro abaʉde ãba zebisida judiora leyta, maʉ̃ne naʉ̃ bedʼeata jarasi: «Ʉ̃kʉrʉ kristianoba bʉsi ʉ̃kʉrʉ librota, bari jaraita Mateo, Marcos, Lucas akʉza Juan, maʉ̃ra librode eda bʉsida Daizeze trʉ̃sida. Mamina ãyi nejʉraraba maʉ̃ librora babʉesida Daizeze trʉ̃ eda bʉbasimina».

¿Kʼairaba idi ewade ãyide kĩrãkʼa opanʉ? Revised Standard Version kartaba nããrabema paginane naʉ̃ta jarabʉ: «Dayirã ewari nãã judiorabara Daizeze trʉ̃ra zokʼa ẽ jʉ̃drʉsi, ãya krĩchasi baera Daizeze trʉ̃ kʼarea zokʼaira neẽãta, krĩchapanasi baera iyira Daizeze wãrĩnuarata bʉ baera, nesida ẽ basi trʉ̃ta mawũã wuabemara daizeze zeri ẽãira awuara bʼaita, badu kristianoitara biga ẽãta Daizeze trʉ̃ ara zokʼaira». Maʉ̃ kʼarea naʉ̃ Biblia tradusionʼra ãya Daizeze trʉ̃ eda bʉei kaude bʉesida Señorta. Adewara Vaticanoba iyi obispora jarasi maʉ̃ta odamarẽã: «Mara yiwidʼibʉdade, trãbʉdade akʉza misa obʉdade jararaidua eda Daizeze trʉ̃ta, maʉ̃ trʉ̃ta zebʉ maʉ̃ra bedʼeadeba YHWH».a

¿Bʉka religionʼra mejãchabʉranebema Daizeze trʉ̃ zokʼapanʉta akʉza jaradiapanʉta? Sergeyba kʼawuasi religion aba bʉta Daizeze trʉ̃ jaradiabʉta. Iyi warrabasieda iyi Kirguistán baside, iya akʉsi pelikulata maʉ̃ne jarabasi Jeowa trʉ̃ta. Maʉ̃neba 10 poaga berabarisi Daizeze trʉ̃ara ũrĩ ẽã. Maʉ̃ tẽã Estados Unidos pʉwʉrʉeda wãside jʉ̃ẽsi Jeowa ʉ̃rʉ Kʼawuabipanʉrãta ũme iyi deda, maʉ̃raba Daizeze Bedʼeadeba ũdubisi kʼaita Daizeze trʉ̃ta. Sergeyra mejãcha sobiasi religion aba Daizeze trʉ̃ jarabʉta ũdusi baera. Websterʼs Third New International Dictionary librode «Jeowa Dios» abʉmae naʉta jarabʉ: «Jeowa ʉ̃rʉ Kʼawuabipanʉrarã naʉ̃ Daizeze abaʉʼabʉrʉ yiwidʼipanʉ».

[Nota]

«Bedʼea bia Daizeze Nokʼo ʉ̃rʉra jaradiadayi»

«Akʉza bedʼea bia Daizeze Nokʼo ʉ̃rʉra jaradiadayi naʉ̃ drʉa jõmaʉ̃nẽ ẽbẽrarãba kʼawuadamarẽã pʉwʉrʉra jõmaʉ̃nẽ, maʉ̃ tẽã zeyi jõĩta» (MATEO 24:14).

¿Jesúsbara maʉ̃bara kʼãrẽta jarakĩrãbasi? Lucasba naʉ̃ta jarasi Jesús ʉ̃rʉ: «Iyara Daizeze Nokʼoba bedʼea bia erbʉta jaraka wãsi pʉwʉrʉza akʉza komunidaza» (Lucas 8:​1). Akʉza Jesúsba naʉ̃ta jarasi: «Mʉ̃ara adewara jaradiaibara bedʼea bia Daizeze Nokʼo ʉ̃rʉ. Mʉ̃ra maʉ̃ kʼarea zokʼasida» (Lucas 4:​43). Nãã Jesúsba jarasi yi kʼaidubemara jaradia wãmarẽã pʉwʉrʉ audre arakʼaitapanʉʼa maʉ̃are naʉ̃ta jarasi: «Maraba jaradiadaya mʉ̃ ʉ̃rʉ [...] akʉza wawara naʉ̃ drʉa jõmaʉ̃nẽ» (Hechos 1:8; Lucas 10:1).

Kristiano nããrabema yizata. Jesús kʼaidubemarabara mesera osi Jesuba zokʼadara. Hechos 5:42​ba jarabʉ: «Ewariza enaʉ ẽã jaradiabasi bedʼea biata Jesús ʉ̃rʉ, templode akʉza deza deza». Mawũã jaradiabaside jaradia ẽ basibʉrʉ buru biarabʉrʉ, awuarabʉrʉ jõmaʉ̃ra daucha jaradiabasi. Ẽbẽra aba yi trʉ̃ August Neander naʉ̃ta jarabʉ: «Celsobara aña bedʼeabasi kristianora ʉ̃rʉra akʉza ãyi ʉ̃rʉ ipidapanasi. Maʉ̃ra obasi erpanasi baera trajo kʼãrẽ ẽ kĩrãkʼabʉta, bari jaradaita ʉ̃kʉrʉbara wata tõbasi, zapatota ara okʉabasi akʉza mejãcha estudia wari ẽ basi, mawũãsidu jaradiapanasi Daizeze Nokʼo ʉ̃rʉ». Jean Bernardiba bʉsi librota aba, maʉ̃ libro trʉ̃ra Les premiers siècles de LʼÉglise (Los primeros siglos de la Iglesia), maʉ̃ librode iya jarasi: «Kristianora wãrĩnuarabara badumae jaradiaibasi ode, deda, pʉwʉrʉza. Maʉ̃ra ãyara obasi zareamina mawũã ẽ bʉrʉ zarea ẽ mina». Ãyira wawabara wãibara basi naʉ̃ drʉa jõmaʉ̃nẽ.

¿Kʼairaba idi ewade ãyide kĩrãkʼa opanʉ? Nokʼo iglesia anglikananebemaba yi trʉ̃ David Watson jarabʉ: «Idi ewadera ẽbẽrarãbara kʼawuakĩrã ẽ Daizeze ʉ̃rʉra, iglesiaraba jaradiada ẽ baera». José Luis Pérez Guadalupeba bʉsi librota aba, maʉ̃ libro trʉ̃ra ¿Por qué se van los católicos?, naʉ̃ librode iya jarabʉ: «Jeowa ʉ̃rʉ Kʼawuabipanʉrarã deza deza wãpanʉ. Mamina ebangelikoraba, abentistaraba akʉza awuru religionʼraba maʉ̃ta oẽ».

Jonathan Turleyba naʉ̃ta bedʼeata jarasi: «Ẽbẽrarãba ũrĩbʉrʉde Jeowa ʉ̃rʉ Kʼawuabipanʉrã trʉ̃ta, ãyi krĩchamara waña zebʉ maʉ̃ra ẽbẽrarãbara deza deza jaradiabʉta akʉza daya jʉ̃ã ẽãne zepanʉta. Jeowa ʉ̃rʉ Kʼawuabipanʉrãbara maʉ̃ra oẽ ẽbẽrarãba ũdudamarẽã ãya nekʼãrẽ ĩjãbʉ ʉ̃rʉ, awuarabʉrʉ opanʉ mawũãbʉdebida yiwidʼibʉta Daizezeʼa» (Cato Supreme Court Review, 2001-2002).

[Recuadro]

¿Kʼawuabʉrʉka kʼaita kristianoarata?

Nããrabema artikulode ũdusida Daizeze Bedʼeaba jarabasita kʼãrẽta oibarata wãrĩnu kristiano ara bʼaira. ¿Maʉ̃neba bʉara ũdukʼawuaseabʉka kʼaita kristianoarãra? Wãrĩnu religionʼra mejãchaʉba jarapanʉ ãyira kristianoarata, mamina kĩrãbera Jesúsba iyi kʼaidupananara jaradata: «Jõma mʉ̃a Nokʼo jaraberãra eda wãna ẽ bayi Daizeze Nokʼo ʉ̃trebemanera. Eda wãnañi mʉ̃ Zeze ʉ̃tʉbemaba jarabʉ obʉtrʉ» (Mateo 7:​21). Maʉ̃ kʼarea Daizezeba dayirãita nebia weya abʉ erbaira, kʼawuaibara kʼairabʉrʉ opanʉta Jeowaba jarabʉ kĩrãkʼa, maʉ̃ba jarakĩrãbʉ ũdukʼawuadaibarata kʼairatrʉ kristiano arata akʉza mawũã ãyibawara bʼaibarata. ¿Bʉara kʼawuakĩrãbʉka kʼãrẽta maʉ̃ Nokʼora akʉza iya kʼãrẽ nebia diaita? (Lucas 4:​43). Mawũẽra daiba kãgapanʉ bedʼeadamarẽã Jeowa ʉ̃rʉ Kʼawuabipanʉrãbawara.