Bʉ kãgara audre wari wãbira

1. ¿Bʉa Daizeze Bedʼea kʼawua jʉ̃drʉsidera kʼãrẽ wãrĩnu ʉ̃rʉ kʼawuasi?

¿BɄARA kĩrãbebʉka Daizeze Bedʼea kʼawua jʉ̃drʉdara? Bʉra sobiasibaibara kʼawuaside Diazezera trʉ̃ barabʉta, sobiasibaibara kʼawuasi baera Daizezebara ẽbẽrarã babʉe ẽãta tʉbʉde eda, adewara sobiabasibaibara bʉa kʼawuaside bʉ mebẽrã beidara jẽda ũduita akʉza maʉ̃rabawara ewari jõmaʉ̃nẽ bʼaita ẽjũã kĩrãwãreãnẽ.

2. Daizeze Bedʼea kʼawuada tẽã, ¿kʼãrẽta awuara osi audre Jeowa kʼawa bʼaita? (Efesios 5:​1, 2).

² Bʉa Daizeze Bedʼea audre akʉ wãne, audre kãga wãsi bʉara Jeowara, maʉ̃ kãgaba bʉara ojʉ̃drʉsi iya zokʼabʉta. Bʉa jidasidera nekʼãrẽ biata jidasi Daizeze Bedʼearadebemaba jarabʉta osi baera. Bʉ kʼãrẽ obʉta akʉza sãwũã krĩchabʉta ara osi Jeowa sobiabita. Maʉ̃ra wũãwũãba yi zezeba obʉ kĩrãkʼa okĩrãbʉ ẽbẽra bia baera. Mamina bʉara Daizeze Jeowade kĩrãkʼa okĩrãbʉ (akʉra Efesios 5:​1, 2).

3. ¿Dayirãkʉza kʼãrẽta widiseapanʉ?

³ Dayirãkʉza naʉ̃ta widiseabʉ: ‹¿Mʉ̃ara Jeowara idi ewadera audre kãgabʉka mʉ̃ buru kʼoei nãã kãgabadaira? ¿Mʉ̃ buru kʼoedadeba ʉ̃ta mʉ̃a krĩchabʉta akʉza mʉ̃a obʉta Jeowaba kãgabʉdebʉka? ¿Mʉ̃ara kãgata ũdubibʉka wuabemarãra, mamina audre mebẽrã kongregasionebemara?›. Bʉa nãã kãgabada kĩrãkʼa kãga ẽ bʉrʉ, maʉ̃ kʼarea sopʉarãra. Maʉ̃ kĩrãkʼa berabarisi mebẽrã kristiano nããbemarata, Jesubara ãya aña obʉ kʼarea mitia akʉ ẽ basi akʉza pae ẽ basi. Abarika obʉ dayirã kʼareabida, iyira pae ẽ (Apoc. 2:​4, 7). Jesubara kʼawuabʉ dayirãba Daizeze Bedʼea kʼawuaside nãã kãgabadaira audre kãga wãseabʉta.

4. ¿Kʼãrẽta akʉdai naʉ̃ artikulodera?

⁴ Naʉ̃ artikulode kʼawuadayi sãwũã dayirãba audre Jeowa kãga wãseabʉ ʉ̃rʉ akʉza wuabemarasida. Maʉ̃are akʉdayi kʼãrẽ nebiata ũduseabʉta dayirãba akʉza wuabemaraba dayirã kãga audre wari wãne.

AUDRE KÃGA WÃRA JEOWARA

5, 6. ¿Pablobara kʼãrẽ bedʼea zromata ũdusi iya Jeowaita obada kʼarea akʉza kʼãrẽba kʼarebasi iya maʉ̃ obʼaita?

⁵ Pablora mejãcha sobiabasi iya Jeowaʼa audre diabasi baera, mamina iyara maʉ̃ne bedʼea zromata mejãcha ũdusi. Pablora badua jĩgara wãibarabasi akʉza maʉ̃ ode wãira zarebasi. Edaʉde do zromane wãibarabasi, edaʉde nezrʉgamiaraba zrʉgapanasi akʉza mejãcha popanasi iyi jʉrapanʉraba (2 Cor. 11:​23-27). Kristiano Pablo ewaridebemarabara wãrĩnu kãgabʉta ũdubida ẽ basi Pabloʼara ãyi kʼarebaya zarea obadara (2 Cor. 10:10; Filip. 4:​15).

⁶ ¿Pablora kʼãrẽba kʼarebasi Jeowade audre obʼaita? Pablobara kʼawuabasi Daizeze Bedʼeadeba Jeowa sãwũãchu ʉ̃rʉ akʉza iyi sãwũã berabaridadeba. Pablobara wãrĩnu ĩjãbasi Daizeze Jeowabara iyira wãrĩnu kãgabʉta (Rom. 8:​38, 39; Efes. 2:​4, 5). Maʉ̃ba iyara mejãcha kãga zesi Jeowara. Pablobara Jeowa kãgabʉta ũdubisi, Jeowaʼa audre diabaside akʉza wuabemara kʼarebaside (Heb. 6:​10).

7. ¿Kʼãrẽta oibara Jeowa audre kãga wãita?

⁷ Dayirãbara Jeowara audre kãga wãseabʉ iyi bedʼeata kĩrãkita akʉpanʉbʉrʉ. Daizeze Bedʼea akʉbʉrʉde bia kʼawuara kʼãrẽta jaradiakĩrãbʉta Jeowa ʉ̃rʉ. Maʉ̃ba bʉyikʉza widira: «¿Naʉ̃ testoba sãwũã ũdubibʉ mʉ̃ra wãrĩnu Jeowaba kãgabʉ kʼawuaita? ¿Naʉ̃ testoba sãwũã ũdubibʉ mʉ̃ara kʼãrẽa kãgaibarata Jeowara?».

8. ¿Sãwũã yiwidʼibʉba dayirãbara audre kãga wãseabʉ Jeowara?

⁸ Adewara dayirãba Jeowa kãgabʉra wari wãbiseabʉ, dayirã sãwũã sentibʉ iyaʼa jarabʉde (Sal. 25:​4, 5). Akʉza Jeowabara dayirã yiwidʼira panʉñi (1 Juan 3:​21, 22). Khanh,b mebẽã Asiadebemaba jarabʉ: «Mʉ̃a Jeowara kãgabasi ũdukʼawuabasi baera, mamina audre kãga wãsi mʉ̃a iyaʼa widibadata panʉbasi baera. Naʉ̃ba mʉ̃a audre obikĩrãsi iya kãgabʉta».

WUABEMARA AUDRE KÃGA WÃRA

9. ¿Timoteobara sãwũã ũdubisi wuabemara mejãcha kãga wãsita?

⁹ Pablo kristianobada dããra ẽãne, ũdukʼawuasi Timoteota. Timoteobara kãgabasi Jeowara akʉza wuabemara ẽbẽrarãsida. Pablobara naʉ̃ta jarasi mebẽrã pilipensera: «Mʉ̃are iyi kĩrãkʼabʉta neẽ baera [Timoteo], iyara marata wãrĩnu krĩchabʉ baera» (Filip. 2:​20). Pablo mawũã bedʼeasidera jara ẽ basi Timoteoba sãwũã jõma daucha obada ʉ̃rʉ akʉza sãwũã biʼia jaradiabada ʉ̃rʉ. Awuarabʉrʉ Pablobara bia akʉbasi Timoteoba sãwũã mebẽrã kãga ũdubibadata. Timoteoba kongregasion akʉ jʉ̃ẽbadabara jʉ̃ãkĩrã jʉ̃ãpanasi (1 Cor. 4:​17).

10. ¿Annaba yi kimaʉ̃mebara sãwũã kãgabʉta ũdubisida ãyi mebẽrã kongregasionebemarãra?

¹⁰ Dayirãbida jʉrʉpanʉ sãwũã mebẽrã kongregasionebemara kãga ũdubidaita (Heb. 13:16). Nãgʉ zroma berabarida tẽã Annaba yi kimaʉ̃meba, akʉ jʉ̃ẽsida mebẽrã Jeowa ʉ̃rʉ Kʼawuabipanʉrãta. Maʉ̃ne ãya ũdusi maʉ̃ra de joabʉta pʉãdrʉba ãrĩnata, maʉ̃ba ãyi wuara jaigʉabasi. Annaba jarabʉ: «Maʉ̃ba daibara ãyi wua jida kʼãrãpe tõsi, mõbe beda kʼãrãpe jẽda ãyaʼa diasi. Maʉ̃ra daitara kʼãrẽ ẽ kĩrãkʼabasimina, kʼarebasi ãyi neũdukʼawua bʼaita idibasidu». Mawũã Annaba iyi kimaʉ̃meba mebẽrã kãga ũdubidaba, kʼarebasi wuabemaraba nesidabʉ diaita (1 Juan 3:​17, 18).

11. (1) Dayirãba wuabemara kãga ũdubibʉ kʼarea, ¿ãyira sãwũã sentibʉ? (2) Proverbios 19:17​ba jarabʉdebara, ¿ Jeowabara kʼãrẽta obʉ dayirãba kãga ũdubibʉdera?

¹¹ Dayirãba wuabemara bia edabʉde akʉza kãga ũdubibʉde, ãya ũdubʉ dayirãba sãwũã zarea obʉta Jeowaba krĩchabʉ kĩrãkʼa akʉza obʉ kĩrãkʼa obʉta, adewara ãya maʉ̃ kʼarea mejãcha biga diaseabʉ. Khanhba ewariza biode kĩrãbebʉ kʼaiba iyi kʼarebadapeadata. Iya jarabʉ: «Mʉ̃ara jĩpa biga diakĩrãbʉ jari mebẽrã mʉ̃ deidu eda jʉ̃ẽnara Daizeze Bedʼea jaradia wãita akʉza maʉ̃ tẽã nekobibasi baera, adewara deda kʼãrẽ neida berabari ẽã edebasi baera. Idi mʉ̃a kʼawuabʉrʉ ãyara sãwũã mejãcha zarea obasita maʉ̃ oita, adewara maʉ̃ra osida kãgaba». Mamina ʉ̃kʉrʉba biga diada ẽ bayi ãyita mawũã obʉ kʼareara. Maʉ̃ta jarabʉ Khanhba iyi kʼarebada ʉ̃rʉ: «Ãya mawũã oda kʼarea nebiata diakĩrãbʉ, mamina Jeowaba kʼawuachu ãyi samachura. Jeowa yiwidʼibʉ ãyaʼa nebiata diamarẽã». Khanhba jarabʉra wãrĩnu, Jeowabara akʉbʉ dayirãba kʼãrẽ nebia obʉra wikakirumina, maʉ̃ra iyara jĩpa nebia zroma kĩrãkʼa akʉbʉ akʉza Jeowaba jẽda diayi (akʉra Proverbios 19:17).

12. ¿Mebẽãbara sãwũã ũdubiseabʉ kãgara mebẽrã kongregasionebemara? (Akʉra potorata).

¹² Bʉta mebẽãbʉrʉ, ¿sãwũã kʼarebaseabʉ wuabemara mebẽrãra akʉza kãgata ũdubiseabʉ? Kʉ̃ra abaʉba iyi trʉ̃ Jordanba zõrãrã widisi kʼãrẽta oseabʉta kongregasione kʼarebaita. Zõrãrãbara iya nekʼãrẽ bia obada kʼarea biga diasi, tẽã ũrãgʼa diasi sãwũã audre oibarata kongregasione. Jarasi Jordanʼa ãba yi jʉrebarima ãza jʉ̃ẽ ẽ bamarẽã mawũã mebẽrãbawara bedʼeaita, ãba yi jʉrebari deda badua komentario dia bamarẽã akʉza badua deza deza jaradia wãmarẽã iyi grupobawara, adewara kʼarebamarẽã wuabemaraba nesidabʉde. Jordanba naʉ̃ ũrãgʼa ũrĩside, iyara audre nekʼãrẽ biata okʼawuasi akʉza mebẽrãrata audre kãga wãsi. Jordanba kʼawuasi wuabemarãra kʼarebaibarata dayi zõrãrã kʼarebabari bʼai naena, maʉ̃ba zõrãrã kʼarebabari babʉrʉdera audre kʼareba bʼaita (1 Tim. 3:​8-10, 13).

13. ¿Sãwũã kʼarebasi Christianʼra kãga ũdubiba jẽda zõrãrã kongregasionebema bʼaita?

¹³ ¿Kʼãrẽta berabariseabʉ naweda zõrãrãbasibʉrʉ, mawũã ẽ bʉrʉ zõrãrã kʼarebabaribasibʉrʉ? Jeowabara kĩrãbebʉ bʉa naweda odara akʉza sãwũã kãgaba odata (1 Cor. 15:58). Jeowabara akʉbʉ dayirãba kãga ũdubibʉta wuabemara. Mebẽã aba iyi trʉ̃ Christianta, iyira mejãcha sopʉasi jarasidade iyira wua zõrãrã ẽãta. Iya jarabʉ: «Mʉ̃a oita krĩchasi kãgaba mʉ̃a oseabʉta Jeowaita, mʉ̃ zõrãrãta mawũã ẽ bʉrʉ zõrãrã ẽãta». Maʉ̃ta ewari bio berabarida tẽã jẽda zõrãrã kongregasionebema ­babisida. Christianba jarabʉ: «Mʉ̃ra wika perabasi akʉza jẽda zõrãrã bʼaita. Mamina ĩjãsi jẽda zõrãrã bʼaita Jeowata kãgabʉ baera akʉza mebẽrã kongregasionebemata».

14. Mebẽã Georgiadebemaba jaradadebara, ¿kʼãrẽta kʼawuapanʉ?

¹⁴ Jeowa odebʉrabara kãgata ũdubibʉ Jeowa odebʉra ẽãbida (Mat. 22:​37-39). Bari jaradaita, mebẽã Elena Georgiadebemaba jarabʉ: «Nããrãra mʉ̃ara jaradiabasi Jeowata kãgabasi baera, mamina Jeowa audre kãgabʉrʉza, ẽbẽrarãsida kãga wãsi. Krĩchabasi ẽbẽrarã kʼãrẽ bedʼea zroma erbʉta akʉza jʉrʉsi sãwũã ẽbẽrarã soidu jʉ̃ẽita. Mʉ̃a ãyi ʉ̃rʉ mawũã krĩchabaside audre kʼarebakĩrã wãsi» (Rom. 10:​13-15).

DAYA WUABEMARA KÃGA ŨDUBIBɄBA NEBIATA ŨDUSEABɄ

15, 16. ¿Wuabemara kãga ũdubibʉba kʼãrẽ nebiata ũduseabʉ?

¹⁵ Dayirãba kãga ũdubibʉde wuabemara mebẽrãra, ãya awabʉrʉ nebia ũdu ẽ. Paoloba yi kimaʉ̃meba COVID-19 jʉ̃drʉda tẽã, mebẽrã zõrãrãbʉta mejãcha kʼarebasi internet sãwũã zokʼaibarata ãyi selulardeba akʉza sãwũã jaradiaita. Mebẽã abaita zarebasi internet sãwũã zokʼaira, mamina iya okʼawuabʉrʉde maʉ̃ba iya trʉ̃si Jesu beida jẽda kĩrãbepanʉ ewaride ũrĩnamarẽã. Maʉ̃ranebema ẽbẽrarãba ũrĩsi 60raba Jesu beida jẽda kĩrãbedai ʉ̃rʉ. Paoloba akʉza yi kimaʉ̃meba mawũã zarea odaba, kʼarebasi maʉ̃ mebẽã wẽrãta akʉza maʉ̃ra mebẽrãta. Maʉ̃ tẽã maʉ̃ mebẽãba bʉsi Paoloʼa: «Biga diakĩrãbʉ kʼãwũã zõrãrã jaradiasi baera akʉza kʼãwũã Jeowaba kĩrãdua ẽ baera, adewara zarea osi baera kʼãwũã jaradiaita».

¹⁶ Mawũã berabaridaba Paoloʼara nekʼãrẽ biata jaradiasi. Iya kʼawuasi audre yibiata kãga ũdubita daya kʼawuabʉira akʉza nekʼãrẽ okʼawuabʉira. Iya kĩrãbebʉ: «Mʉ̃ kongregasionʼra akʉbari zõrãrãbaside, mebẽrãbara kĩrãduasibaibara mʉ̃a diskurso diabadara, mamina ãya kĩrãdua ẽ baibara mʉ̃a sãwũã kʼarebadara».

17. ¿Kãga ũdubibʉdera kʼairabida nebia ũduseabʉ?

¹⁷ Dayirãba awurura kãga ũdubibʉrʉde, dayirãbida nebiata ũdupanʉ. Jonathan, Nueva Zelandadebemaba jarabʉ maʉ̃ta. Jonathanbara ũdusi mebẽã abaʉba jaradianʉmʉta, maʉ̃ra yi nãã edabaribasi, maʉ̃ ewaribasidera sabadobasi, maʉ̃ ewaridera jʉ̃wʉrʉabasi. Jonathanba krĩchasi iyiʉ̃meba jaradiaita maʉ̃ sabadobaside akʉza wuabema sabadode. Iyara kʼawua ẽ basi kʼãrẽaba nebia ũduita mawũã kʼarebabʉdeba. Jonathanba jarabʉ: «Mʉ̃ara maʉ̃ ewaribasidera jaradiakĩrã ẽ basi, mamina mʉ̃a ũduside maʉ̃ mebẽã sãwũã bia wãta jaradiabʉde, mʉ̃abida kãga zesi mõbe jaradiakĩrãsi. Mʉ̃a ũdusi neũdukʼawua biata akʉza maʉ̃ mebẽãba kʼarebasi audre Jeowa kʼawa bʼaita, adewara sobia jaradia bʼaita».

18. ¿ Jeowabara kʼãrẽta omarẽã kãgabʉ?

¹⁸ Jeowabara kãgabʉ iyita audre kãga wãnamarẽã akʉza wuabemarata dayirãba kʼawuada kĩrãkʼa. Dayirãbara audre wari wãbiseabʉ Jeowa kãga wãita iyi Bedʼea akʉpanʉne akʉza maʉ̃ ʉ̃rʉ krĩchapanʉne. Adewara iyaʼa badua yiwidʼipanʉne mawũã jaraita dayi sãwũã sentibʉta. Dayirã mebẽrãra kãga ũdubiseabʉ ãyi kʼarebabʉde akʉza maʉ̃ba audre Jeowa kʼawa babiseabʉ, adewara dayirã mebẽrãsida audre kãga wãseabʉ, mawũã ewari jõmaʉ̃nẽ ãyi neũdukʼawua bia baseabʉ.