«Zarea bʼaidua»

1, 2. ¿Kʼãrẽne abarikabʉ kristianorãra chigoroʉ̃mera? (1 Corintios 15:58).

CHIGORORA ʉ̃tʉ drazoa warichu akʉza teiteachu maʉ̃ daucha susuabʉ. Maʉ̃ba pʉãdrʉ mejãcha zebʉrʉdera mesera kora wã ẽ. Kristianorata maʉ̃ chigoro kĩrãkʼabʉ, ¿kʼãrẽne?

² Kristianora Jeowa ode kʼẽrẽpabʉra zareabaibara Jeowaba zokʼabʉta aripe oita, mamina daya krĩchabʉta oẽ baibara. Jeowaba zokʼabʉta oya awabaibara akʉza krĩcha ẽ baibara awuara oita (akʉra 1 Corintios 15:58). Adewara krĩcha ẽ baibara wuabemarabara daya krĩchabʉ kĩrãkʼa odamarẽã (Sant. 3:17). Dayirãba naʉ̃ta bia kʼawuabʉbʉrʉ krĩchada ẽ bayi daya kãgakʉtrʉ ẽbẽraba oibarata, mawũã ẽ bʉrʉ mejãchade iduaribita ẽbẽraba ãya kãgabʉta odamarẽã. Naʉ̃ artikulode kʼawuadayi sõbede dayirãra zareabaibarata akʉza sõbede iduaribi ẽ baibarata nekʼãrẽ baduba awuara babita, adewara kʼawuadayi Diarubara nekʼãrẽ juesoma erbʉta dayirãba Jeowaba zokʼabʉta oide zarea ba ẽ marẽã.

¿KʼÃRẼNE ZAREABAIBARA?

3. ¿ Jeowabara kʼãrẽta omarẽã zokʼabʉ Hechos 15:​28, 29​dera?

³ Jeowabʉrʉ dayirãra leyta diaseabʉ akʉza iya ley diabʉra zare ẽ iyi pʉwʉrʉba ũrĩpe maʉ̃ oũdubita (Is. 33:22). Bari jaraita, Zõrãrã Buru bia siglo nããbemaba jarasi kʼãrẽne kristianorãra kʼẽrẽpabaibarata. Jarasi naʉ̃ kĩrã ũbeade kʼẽrẽpabaibarata: nããra, jipa yiwidʼida ẽ baibarata nekʼãrẽ omara awuarabʉrʉ Jeowaʼabʉrʉ yiwidʼibaibarata, ũmeta wawia ũdubibarata wara akʉza yi ũbeata, wawia ũdubibarata Jeowaba zokʼabʉra mia erkʼãĩ ʉ̃rʉ (akʉra Hechos 15:​28, 29). Idi ewadera dayirãbara, ¿sãwũã aripe obʉta ũdubidai naʉ̃ nekʼãrẽ ũbeade?

4. ¿Kʼãrẽta jarakĩrãbʉ Jeowaʼa abapaiʼabʉrʉ yiwidʼibarata? (Apocalipsis 4:11).

⁴ Jipa yiwidʼida ẽ nekʼãrẽ omara awuarabʉrʉ Jeowaʼabʉrʉ yiwidʼibaibara. Jeowaba jarasi israelitara iyaʼabʉrʉ yiwidʼipanamarẽã (Deut. 5:​6-10). Diaruba Jesuʼa jaraside iyaʼa yiwidʼimarẽã Jesubara jarasi Jeowaʼabʉrʉ yiwidʼibarata (Mat. 4:​8-10). Maʉ̃ kʼarea yiwidʼida ẽ nekʼãrẽ oma, adewara akʉda ẽ ẽbẽra abaʉta Daizeze kĩrãkʼa. Bari jaraita, religion nokʼorata, politikorata, jemenemiarata mawũã ẽ bʉrʉ ẽbẽra trãbarirata, awuarabʉrʉ Jeowarepanʉ, nekʼãrẽ jõma parãnare iyaʼabʉrʉ yiwidʼipanʉ (akʉra Apocalipsis 4:11).

5. ¿Kʼãrẽa wawia ũdubipanʉ dayirã bebʉta akʉza wata?

⁵ Wawia ũdubipanʉ dayirã bebʉra akʉza wasida. ¿Kʼãrẽã? Jeowaba jarabʉ wara dayirã bebʉta akʉza bebʉra iya diada (Lev. 17:14). Jeowaba iduaribiside ẽbẽrarã nedʉwʉrʉ chichita komarẽã, jarasi wata ko ẽ marẽã (Gén. 9:4). Adewara iyabaʉta jarasi israelitara Moisésdeba Leyta diaside (Lev. 17:10). Nããbema siglodera Zõrãrã Buru biadeba kristianora jarasi wata koda ẽ marẽã (Hech. 15:​28, 29). Dayirãbida nama naʉ̃ leyba jarabʉde okĩrãpanʉ, medikoraba kʼãrẽ tratamiento oita jarabʉrʉde.b

6. ¿Kʼãrẽba kʼarebai dayirãba jõma aripe oita Jeowaba mia erkʼãĩ ʉ̃rʉ zokʼabʉra?

⁶ Wawia ũdubipanʉ Jeowaba zokʼabʉta mia erkʼãĩ ʉ̃rʉ (Heb. 13:4). Apostol Pabloba jarasi: «Beaibara, dayirã kakuadebemara». Naʉ̃ ũrãgʼa biaba dayirã kʼarebabʉ dayi sode akʉza krĩchade nemitia oita krĩchabʉ ãĩ bʉeita. Bari jaraita, akʉda ẽ baibara akʉza nekʼãrẽ oda ẽ baibara dayi mia erkʼãĩena edebʉta (Col. 3:5; Job 31:1). Maʉ̃ba nemitia oita krĩcha zera jipa oda ẽ baibara maʉ̃ta, mawũã Jeowa sopʉabida ẽ baita dayirãba obʉdeba.

7. ¿Kʼãrẽta odaita krĩchaibara akʉza kʼãrẽa?

⁷ Jeowabara kãgabʉ dayirãba wãrĩnu soiduba odamarẽã iya zokʼabʉra (Rom. 6:17). Jeowaba dayirã omarẽã jarabʉra dayirã biaita, maʉ̃ba iya zokʼabʉra awuara obeda ẽ (Is. 48:​17, 18; 1 Cor. 6:​9, 10). Maʉ̃ba nekʼãrẽ jõma okĩrãpanʉ Jeowa sopʉabida ẽ baita adewara salmistaba obada kĩrãkʼa okĩrãpanʉ. Iya jarasi: «Soiduba mʉ̃a okĩrãbʉ bʉa zokʼabʉta ewari jõma, jõñiena» (Sal. 119:112). Diarubara nekʼãrẽ jõma oyi dayirãba Daizezeba zokʼabʉta ũrĩna ẽ marẽã. Maʉ̃ra, ¿sãwũã obʉ iyara?

¿KʼÃRẼTA ZOKʼABɄ DIARUBARA DAYIRÃTA KʼẼRẼPA BA Ẽ MARẼÃRA?

8. ¿Kʼãrẽa pẽwãbʉ Diarubara Jeowa odebʉra?

⁸ Pẽwãbʉ. Dayirãta Jeowaʉ̃me kʼẽrẽpa ba ẽ marẽãra, Diarubara pẽwãbʉ akʉza maʉ̃ daucha mejãcha pobʉ, ¿kʼãrẽa mawũã obʉ? Dayirãta wua Jeowa neũdukʼawua bada ẽ marẽã (1 Ped. 5:8). Kristianora nããbema siglodebemara zʉbʉria odaita jarasida, pẽwãsida, posida akʉza beasida, ãyita Jeowaʉ̃me kʼẽrẽpapana ẽ marẽã (Hech. 5:​27, 28, 40; 7:​54-60). Idi ewadebida Diarubara pẽwãbʉ. Bari jaradaita, dayirã mebẽrã Rusiadebemara zʉbʉria opanʉ akʉza awuru pʉwʉrʉdebemasida. Naʉ̃ drʉa jõmaʉ̃nẽ mebẽrãra pẽwãpanʉ ãyi zʉbʉria odaita.

9. Yiza abaʉdeba jara ũrĩbira, ¿kʼãrẽa jʉra kʼawuabaibarata Diarua yi kʉ̃rʉ̃gabi ẽ baita?

⁹ Diarubara kʉ̃rʉ̃ga kʼawuabʉ. Diarubara dayirãra edaʉde pẽwãbʉ maʉ̃ta neẽbʉrʉ kʉ̃rʉ̃gabʉ (Efes. 6:11). Akʉdaya Bob yizata. Iyira ospitaldebasi operadai baera, iya medikora jarasi iyi nekʼãrẽ berabaribʉrʉbʉsida wara iyi kẽgʉdera eda bʉeda ẽ marẽã. Medikobara jarasi wawiaita Bobʼba jaradara, mamina diamasi iyi operai nãã yi mebẽrã wãna tẽã awuru medikoba iyita akʉ jʉ̃ẽsi, medikoba jarasi wara bʉe ẽ baita mamina erbaita neida berabaribʉrʉde zokʼaita. Naʉ̃ medikobara krĩchasibaibara Bobʼra awuara krĩchaita yi mebẽrãta wãsi baera, mamina Bobʼra awuara krĩcha ẽ basi awuarabʉrʉ jarasi nekʼãrẽ neida berabaribʉrʉbʉsida wara kẽgʉde eda bʉe ẽ marẽã.

10. ¿Kʼãrẽa ẽbẽra Jeowa odebʉ ẽ kĩrãkʼara krĩchabeda ẽ baibara? (1 Corintios 3:​19, 20).

¹⁰ Ẽbẽra kĩrãkʼa krĩchabibʉ. Dayirãta krĩchapanʉbʉrʉ ẽbẽra kĩrãkʼa, mawũãra ũrĩna ẽ bayi Jeowaba zokʼabʉra akʉza Jeowadeba jĩga wãñi (akʉra 1 Corintios 3:​19, 20). Ẽbẽra naʉ̃ drʉadebemabara kãgabʉ ewari jõmaʉ̃nẽ daya kãgabʉtrʉ odamarẽã. Atia kʼawuadaya kʼãrẽta berabarisita kongregasion Pérgamone akʉza Tiatirade. Kristianora mamabemabara ojʉ̃drʉsida wuabemaba obʉ kĩrãkʼa, nekʼãrẽ oma yiwidʼi jʉ̃drʉsida akʉza mia erkʼãĩ jʉ̃drʉsida. Maʉ̃ kʼarea Jesubara naʉ̃ kongregasion ũmera kʼẽãsi ãya iduaribisida baera mia erkʼãĩ marẽã (Apoc. 2:​14, 20). Idi ewadebida ẽbẽrabara dayirã jaraseabʉ ãya krĩchabʉ kĩrãkʼa krĩchadamarẽã, edaʉde dayi mebẽrãba, dayi neũdukʼawuaba jaraseapanʉ odamarẽã dayirãba kãgabʉta, mawũã Jeowaba kãgabʉta oda ẽ marẽã. Ãya jaraseapanʉ kayirua ẽãta daya kãgabʉ oira, adewara jaraseapanʉ Daizeze Bedʼeaba jarabʉra kikibari baera zeri ẽãta.

11. ¿Kʼãrẽta oda ẽ baibara?

¹¹ Edaʉde dayirãbara krĩchaseapanʉ Jeowabara audre bia jara ũrĩbibarata, maʉ̃ba edaʉde dayirãbara krĩchaseabʉ Daizeze Bedʼeaba zokʼabʉde wueta oita (1 Cor. 4:6). Jesu ewari basidera nokʼo religionʼrabara maʉ̃ta osida, Jeowaba Ley diadade ãya krĩchabʉta eda bʉesida, maʉ̃ra wuabemaraba aripe oira zarebasi (Mat. 23:4). Mamina Jeowabara Daizeze Bedʼeadeba akʉza iyi organizasioneba dayirã ẽza jara ũrĩbibʉ kʼãrẽta oibarata. Maʉ̃ba dayirãbara neẽ kʼãrẽ eda bʉeira (Prov. 3:​5-7). Maʉ̃ba dayirãbara Daizeze Bedʼeade eda zokʼabʉde wuetara oẽ akʉza wuabemara jara ẽ kʼãrẽta oibarata.

12. ¿Kʼãrẽneba sewabʉ Diarubara?

¹² Sewabʉ. Diarubara sewabʉ ẽbẽrarã sewa nebʉradeba, mawũã awuara krĩchapanamarẽã (Col. 2:8). Bari jaradaita, siglo nããbemanera Diarubara sewasi ẽbẽra krĩchadeba. Judiorabara jaradiapanasi Daizeze Bedʼeade edabʉ ẽãta akʉza jarapanasi kristianorabara oibarabasita Jeowaba Moisésʼa Ley diadata, maʉ̃ra jipa sewidabasi, maʉ̃ba obasi baera ẽbẽrarãba wãrĩnuta kʼawuada ẽ marẽã Jeowa ʉ̃rʉ. Idi ewadera Diarubara zokʼabʉ ẽbẽra sewaita telebisorta, internetʼta, radiota. Adewara politikorabida maʉ̃ta zokʼabʉ wuabemara sewaita. Bari jaraita, COVID-19nʉmaside mejãcha jarasida sewa nebʉrata maʉ̃ ʉ̃rʉ.c Mamina Jeowa ʉ̃rʉ Kʼawuabipanʉrãbara Jeowa organizasionba zokʼabʉta ũrĩsida baera krĩcha zroma oda ẽ basi yi sewabida ẽ basi baera (Mat. 24:45).

13. ¿Kʼãrẽne jʉra kʼawuabaibara dayirã ewari bari ewarade aduabi ẽ baita?

¹³ Ewari aduabibʉ. Dayirãbara oibara yi audre yibiata (Filip. 1:​9, 10). Dayirãta jʉra kʼawuapanʉ ẽ bʉrʉ, nekʼãrẽ mejãcha obʉba dayirã ewari bia zokʼaibadasida aduaseabʉ. Bari jaraita, jemeneiba, nekoiba, kʼãrẽ doiba, dayirã ewarira bari ewarade aduabiseabʉ maʉ̃ oita dayirãita audre yibia kĩrãkʼabʉbʉrʉ (Luc. 21:​34, 35). Ewariza akʉpanʉ politikorãra sãwũã ãyirainʉ yi bedʼeakapanʉta, maʉ̃raba jarabʉta akʉbʉde ewari adua ẽ baibara. Dayirãta jʉra kʼawuapanʉ ẽ bʉrʉ dayi sode ãyiare bʼaita krĩchaseabʉ. Diarubara naʉ̃ta kʼãwũã kĩrã juesoma zokʼabʉ dayirãta Jeowaʉ̃me kʼẽrẽpa ba ẽ marẽã. Akʉdaya kʼãrẽba kʼarebaseabʉta dayirã yi sewabida ẽ baita akʉza Jeowaʉ̃me kʼẽrẽpa bʼaita.

¿KʼÃRẼTA OIBARA DAYIRÃ KʼẼRẼPA BʼAITA?

14. ¿Kʼãrẽba kʼarebaseabʉ Jeowaʉ̃me kʼẽrẽpa bʼaita?

¹⁴ Krĩchadadrʉ kʼãrẽa dayirã bebʉra Jeowaʼa diasita akʉza buru kʼoesidata. Mawũã osida Jeoware bakĩrãpanasi baera. Kĩrãbera bʉa ĩjãbasita naʉ̃ra wãrĩnuta, Jeowara bʉa ũdukʼawuasita akʉza akʉbasita Jeowara bʉ Zeze kĩrãkʼa. Maʉ̃ba bʉa jarasi iyaʼa wawia ũdubita akʉza kãga bʼaita. Bʉa ĩjãbʉra warisi akʉza nãã nemitia obadara idubʉsi, mawũã Jeowaba jʉrabʉta oẽ basi awuarabʉrʉ ojʉ̃drʉsi iya kãgabʉta, mawũẽra mejãcha sobiabasi kʼawuaside Jeowaba bʉa nemitia odata jipa kĩrãduasi baera (Sal. 32:​1, 2). Krĩchasi ãba yi jʉrebarieda wãita akʉza Jeowa ʉ̃rʉ kʼawuadata awuru ẽbẽrarã jaradiaita, atiara bʉ bebʉra Jeowaʼa diasi baera akʉza buru kʼoesi baera, wã o ewari jõmaʉ̃nẽ babibʉ ode akʉza Daizeze odeba ãĩ wãita krĩchabʉ ẽ (Mat. 7:​13, 14).

15. ¿Sãwũã kʼarebabʉ Daizeze Bedʼea lepe maʉ̃ ʉ̃rʉ bia krĩchabʉbara?

¹⁵ Daizeze Bedʼea ledadrʉ akʉza maʉ̃ ʉ̃rʉ krĩchadadrʉ. Bakuruta mesera kora wã ẽ marẽãra biʼia karra jidanʉmaibara, abarika dayirãbida Jeowa ʉ̃rʉ wãrĩnu ĩjãibara zareapanaita. Bakurura wari wãbʉrʉza audre karra jida wã, maʉ̃ba mesera kora wã ẽ. Abarika dayirãba Daizeze Bedʼea le kʼãrãpe maʉ̃ ʉ̃rʉ krĩchabʉba, kʼarebabʉ audre Jeowa ʉ̃rʉ ĩjãita akʉza audre ĩjãbibʉ Jeowaba jaradia wãra yibiata (Col. 2:​6, 7). Krĩchadadrʉ sãwũã nãã ẽbẽrarã Jeowa odepananara bia wãsita Jeowaba zokʼabʉ ũrĩpanasidera. Bari jaraita, Ezequielbara biʼia akʉbasi angelba obadara, kʼawuaita templo kʼãrẽababʉta. Ezequielba mawũã ũdudabara biode kʼarebasi iya audre ĩjãita. Naʉ̃ba dayirã jaradiabʉ sãwũã Jeowa wawia ũdubibarata iya kãgabʉde obʼaitad (Ezeq. 40:​1-4; 43:​10-12). Dayirãsida idi ewadera mejãcha kʼarebaseabʉ ewari jʉrʉpanʉbʉrʉ Daizeze Bedʼea lepe maʉ̃ ʉ̃rʉ bia krĩchapanʉbʉrʉ.

16. ¿Sãwũã kʼarebasi Bobʼba iyi so teitea erbaibara? (Salmo 112:7).

¹⁶ Daya ĩjãbʉta zarea erbaibara. Nokʼo Davidba iyi trãside naʉ̃ta jarasi: «Mʉ̃ sora teiteabʉ, Daizeze» (Sal. 57:7). Dayirã sosida teitea baseabʉ, wãrĩnu soiduba ĩjãpanʉbʉrʉ Jeowa ʉ̃rʉ (akʉra Salmo 112:7). Jẽda kĩrãbedadrʉ Bob yizata, medikoba jarasi neida berabarira wa zokʼaita, mamina Bobʼba panʉsi maʉ̃ta mawũã odara iyira wãita. Bobʼba jarabʉ: «Mʉ̃a kʼãrẽ krĩcha ẽã mawũã jarasi akʉza krĩcha zroma oẽ basi mʉ̃ kʼãrẽ berabari kʼareara».

17. ¿Kʼãrẽta kʼawuapanʉ Bob yizadebara? (Akʉra potorata).

¹⁷ Bobʼbara jʉ̃ã ẽ basi iyi ospitalʼeda ededamarẽã Jeowaba zokʼabʉta ũrĩta wa ʉ̃rʉ, iya nãã kʼawuabasi kʼãrẽ oita. Iyara kãgabasi ewari jõmaʉ̃nẽ Jeowata sobia bamarẽã, adewara iyara bia kʼawuasi Daizeze Bedʼeade akʉza dayirã kartarane sãwũã krĩchabʉta Jeowaba wa ʉ̃rʉ adewara dayi bebʉ ʉ̃rʉ, adewara soiduba ĩjãbasi iyita Jeowaʉ̃me kʼẽrẽpabasibʉrʉ Jeowaba iyaʼa nebia mejãcha diaita.

18. ¿Kʼãrẽta jaradiabʉ Barac yizabara? (Akʉra poto yi nããrabemata).

¹⁸ Ĩjãnadrʉ Jeowa ʉ̃rʉ. Krĩchadadrʉ Barac ʉ̃rʉ, iya Jeowa bedʼeata ũrĩbasi baera jõma bia wãsi. Maʉ̃ ewaridera israelitarabara kʼawua ẽ basi sãwũã yõita, mia neẽbasi joudrʉbarita akʉza miazʉta, mawũãsidu Jeowaba jarasi Baracʼa yõ wãnamarẽã Sísara akʉza iyi gorogorora Canaánʼnebemabawara, maʉ̃rãra jõma yõ kʼawuabasi ( Juec. 5:8). Propeta Déboraba jarasi Baracʼa katuma Tabordeba zemarẽã koribieda mawũã Sísara akʉza yi gorogorabawara yõita, maʉ̃raba erbasi 900 karru yõbaridebemata. Maʉ̃ koribidera gorogorora karru mejãcha erbadaba ganai kĩrãkʼabasimina Baracʼbara ũrĩsi Jeowaba zokʼadara, wãsi maʉ̃ koribieda. Barac gorogorora katumanebayeda urueda, Jeowabara kueta mejãcha zebisi, mawũã karru yõbarira jõma jousi egorobade. Mawũã Jeowabara makenasi iyi nejʉrarãra ( Juec. 4:​1-7, 10, 13-16). Dayirãsida abarika bia wãseabʉ ũrĩpanʉbʉrʉ Jeowaba zokʼabʉta akʉza iyi organizasionba (Deut. 31:6).

KRĨCHADAIBARA ARIYA ZAREAPANAITA

19. ¿Kʼãrẽa Jeowaʉ̃me zarea bakĩrãbʉ?

¹⁹ Dayirã naʉ̃ drʉa mitiade panʉenara krĩchadaibara zareapanaita (1 Tim. 6:​11, 12; 2 Ped. 3:17). Iduaribida ẽ baibara Jeowaʉ̃me kʼẽrẽpa bʼaita pẽwãpanʉ kʼarea, kʉ̃rʉ̃gapanʉ kʼarea, ẽbẽraba krĩchabʉ obipanʉ kʼarea, ẽbẽraba sewabʉ kʼarea akʉza ewari aduabʉ kʼarea (Efes. 4:14). Mawũẽra krĩchadaibara zarea bʼaita akʉza iduaribi ẽ baibara nekʼãrẽ baduba awuara babita akʉza jʉ̃ãna ẽ baibara wuabemaba daya krĩchabʉta odamarẽã. Wuarebema artikulode kʼawuadayi sãwũã dayirãbara Jeowa akʉza Jesude kĩrãkʼa oseapanʉta wuabema sãwũã edabʉdade.