Jeowade kĩrãkʼa ora maya krĩchabʉta oẽãne

1. ¿Kristianorãra sãwũã bakuru kĩrãkʼa baseabʉ? (Akʉra potota).

«BAKURUTA susuabʉbʉrʉ pʉãdrʉbara kora bʉe ẽ». Naʉ̃ bedʼeaba ũdubibʉ kʼãrẽta nesidabʉta bakuru bia pawãraita: susua bʼaita. Abarika bakuru bia pawãrai kĩrãkʼa, kristianorãbara ãyimabʉta oẽ baibaira, ¿sãwũã oi maʉ̃ra? Zarea oibara nekʼãrẽ awuara oita dayirã bebʉde awuarabidabʉrʉ akʉza wuabemaraba jarabʉ wawia ũdubibʉde.

2. ¿Kʼãrẽ nebia erbʉba kʼarebai dayi bebʉde awuarabidabʉrʉ akʉza kʼãrẽta kʼawuadai naʉ̃ artikulodera?

² Dayirãra Jeowa nezokʼa baera daya krĩchabʉta oẽ, eda krĩchabʉta ũdubibʉ akʉza wuabemara so borekea akʉbʉta ũdubibʉ. Naʉ̃ artikulode kʼawuadayi sãwũã maʉ̃ra nebia sode erbʉba kʼarebasita ʉ̃kʉrʉ kristianorãra ãyi bebʉde nekʼãrẽ awuara zesidamina. Akʉza akʉdayi maʉ̃ra nebiaba sãwũã kʼarebaseabʉta dayirãra. Sãwũã Jeowaba Jesuʉ̃meba yiza bia diabʉ daya krĩchabʉta oẽã ʉ̃rʉ.

JEOWABA JESUɄ̃MEBA JIPA ÃYA KRĨCHABɄTA OẼ

3. ¿Kʼãrẽneba kʼawuapanʉ Jeowabara jipa iya krĩchabʉta oẽãta?

³ Daizeze Bedʼeaba jarabʉ Jeowara «Mõgara», iyira zareabarabʉ baera akʉza iduaribi ẽ baera nekʼãrẽ baduba awuara babita (Deut. 32:4). Mamina iya edaʉde awuara krĩchabʉ. Naʉ̃ drʉata awuara wã baera Jeowabida awuara owã, mawũã iya oya adata aripe berabarimarẽã. Akʉza Jeowaba dayirãra iyi kĩrãkʼa parãsi baera, dayirãbida awuara owãseabʉ dayirã bebʉ awuara bʼaimina. Iya dayirã Daizeze Bedʼeadebemata diasi dayirã kʼarebaita bia jida kʼawuamarẽã krĩcha ẽã kʼãrẽ bedʼea zroma ũdubʉrʉde. ­Jeowa yizaba akʉza Daizeze Bedʼeadebemaba dayirã ũdubibʉ Jeowara mõgaramina, iyara jipa iya krĩchabʉta oẽ.

4. Yiza aba jara ũrĩbira sãwũã Jeowaba iya krĩchabʉta oẽãta (Levíticos 5:​7, 11).

⁴ Jõma Jeowaba obʉra aripe obʉ akʉza jipa iya krĩchabʉta oẽ, adewara ẽbẽ­rarã aukʼara omarẽã widi ẽ. Krĩchara sãwũã Jeowaba ũdubisita jipa iya krĩchabʉta oẽãta israelitara nekʼãrẽ omarẽã widiside. Iya widi ẽ basi nekʼãrẽ erbʉba akʉza nekʼãrẽ neẽãba iyabaʉ sakripisio diamarẽã, maʉ̃ kʼarea iduaribisi ãyi aba abakaʉba diamarẽã ãya diaseabʉta (akʉra Levíticos 5:​7, 11).

5. Yiza aba jara ũrĩbira sãwũã Jeowaba eda krĩchabʉta ũdubibʉta akʉza so zʉbʉria akʉbʉta ũdubibʉta.

⁵ Jeowa edabʉta krĩchabʉ baera akʉza wuabemara so zʉbʉria akʉbʉta ũdubibʉ baera iya krĩchabʉta jipa oẽ. Bari jaradaita, Jeowaba eda krĩchabʉta ũdubisi ẽbẽrarã Sodomanebema makenaita krĩchaside. Iyi angeleraneba Jeowaba Lotʼa jarasi katumaena mĩrʉ wãmarẽã. Lotʼra mejãcha perabasi baera Jeowaʼa widisi iduaribimarẽã iyita akʉza yi mebẽrãbawara wãita Zóar pʉwʉrʉeda, mamina Jeowaba krĩchabasi maʉ̃ pʉwʉrʉsida makenaita. Maʉ̃ kʼarea Jeowaba jaraseabasi Lotʼara iya jarabʉta jõma omarẽã. Maʉ̃ widi kʼaude iya iduaribisi Lotʼara idu wãmarẽã Zóar pʉwʉrʉeda iya nãã krĩchasimina ẽbẽrarã maʉ̃ pʉwʉrʉdebema makenaita (Gén. 19:​18-​22). Poaga mejãcha berabarida tẽã Jeowaba so zʉbʉria akʉbʉta ũdubisi ẽbẽrarã Nínivedebemara. Jeowaba zokʼasi Jonásʼa jaramarẽã iya maʉ̃ pʉwʉrʉ ãrĩta akʉza ẽbẽrarã kayirua mamabʉrata makenaita. Mamina ninibitaraba ãya kayirua obada idubʉsida, maʉ̃ kʼarea Jeowaba so zʉbʉria akʉ kʼãrãpe makena ẽ basi maʉ̃ pʉwʉrʉra ( Jon. 3:​1, 10; 4:​10, 11).

6. Jara ũrĩbira sãwũã Jesuba Jeowaba obada kĩrãkʼa, iya krĩchabʉta jipa oẽbasita.

⁶ Jesuba Jeowaba obada kĩrãkʼa obasi iya krĩchabʉta jipa oẽãne. Jeowaba Jesuʼa zokʼasi jaradiamarẽã israelitara Jeowadeba jĩgabadara. Mamina iya ũdubisi wuabemara ʉ̃rʉ krĩchabʉta Daizeze Bedʼea jaradiabaside. Ewari aba yuwẽrã Israeldebema ẽãba Jesuʼa widisi iyi kau wawabʉta bebimarẽã, Jesuba so zʉbʉria akʉita ũdubibasi baera, osi yuwẽrãba wididara, iyi kaura bebisi (Mat. 15:​21-28). Akʉdaya awuru yizata. Jesuba Daizeze Bedʼea jaradia jʉ̃drʉside iya jarasi: «Zhãrã kĩrãbita mʉ pẽwã bʼʉ ẽã ara, mʉãbidʼa mʉ pẽwã bʼʉ ẽã aya» (Mat. 10:33). Mamina Pedroba ũbeabayeda jaraside Jesura ũduaduata, maʉ̃ kʼarea Jesubara iyideba jĩga babi ẽ basi. Jesuba ũdusi Pedrora iya jarada kʼarea mejãcha sopʉabasita akʉza iya wãrĩnu ĩjãbasita. Jẽda piradrʉda tẽã Jesura Pedroʼa yi ũdubisi, mõbe jarasi kĩrãduasita iya aña jaradara akʉza iyita kãgabʉta ũdubisi (Luc. 24:​33, 34).

7. Filipenses 4:5​ba jarabʉdebara, ¿sãwũã kãgabʉ wuabemaraba dayirãta akʉmarẽã?

⁷ Dayirãba ũdutabeda Jeowaba akʉza Jesuʉ̃meba ãya krĩchabʉta jipa oẽãta akʉza Jeowaba jʉ̃ãbʉ dayirãba iyide kĩrãkʼa daya krĩchabʉta oẽ marẽã (akʉra Filipenses 4:⁠5). Awuru Daizeze Bedʼeaba naʉ̃ testota mawũã tradusibʉ: «Wuabemaraba ũdukʼawuamarẽã bʉara obʉ ẽãta bʉyimabʉtrʉ». Maʉ̃ kʼarea dayikʉza widibara: «¿Wuabemaraba mʉ̃ ʉ̃rʉ krĩchabʉde krĩchabʉka mʉ̃ya krĩchabʉta oẽãta akʉza wuabemara ʉ̃rʉ krĩchabʉta, adewara kĩrʉ ẽãta? Mawũã ẽ bʉrʉ ¿mʉ̃ra akʉpanʉka mʉ̃a kãgabʉta jõma aripe omarẽã, adewara ẽbẽra so zareata akʉza mʉ̃yimabʉta obʉta? Mawũã ẽ bʉrʉ ¿ũrĩbʉka ãya jarabʉra akʉza ãya widibʉ omarẽã bigabʉrʉ obʉka?». Dayirãba daya krĩchabʉta oẽãne ũdubibʉ kʼãrẽaba Jeowaba akʉza Jesuba obada kĩrãkʼa obʉta. Akʉdaya nekʼãrẽ ũmene dayirãba nesidabʉta daya krĩchabʉta oẽ bʼaita: dayirã bebʉ awuarabidade, adewara wuabemaraba krĩchabʉta akʉza jidabʉta awuarabʉta dayirãba obʉira.

DAYA KRĨCHABɄTA OẼ BAIBARA DAYI BEBɄ AWUARABIDADE

8. ¿Kʼãrẽba kʼarebaseabʉ daya krĩchabʉ oẽ bʼaita dayi bebʉ awuarabidade? (Akʉra notata).

⁸ Daya krĩchabʉta oẽ bʉrʉ nekʼãrẽ awuara odayi dayi bebʉ awuarabidade. Dayi bebʉ awuarabidaba bedʼea zromata ũduseabʉ. Dayirãra kayaseabʉ, plata neẽãseabʉ mawũã ẽ bʉrʉ politikoraba obʉ kʼarea bedʼea zromata ũduseabʉ (Ecl. 9:​11; 1 Cor. 7:​31). Akʉza dayirã Jeowaita awuru trajota omarẽã jarabʉdade, maʉ̃ kʼarea mejãcha krĩcha zroma oseabʉ. Kʼãrẽ ẽ kʼãrẽ bedʼea zromata ũdura, dayirãba naʉ̃ra nekʼãrẽ kimareta obʉbʉrʉ bia wãseabʉ: (aba) wãrĩnu ĩjãra bʉ bebʉra awuarabidata, (ũme) krĩchara bʉa atia kʼãrẽ oita, (ũbea) krĩchara bʉa kʼãrẽ nebia erbʉta bʉ bebʉde, (kimare) wuabemara kʼarea nebiata ora.b Atia akʉdayi naʉ̃ra nekʼãrẽ kimareba sãwũã kʼarebasita mebẽrãra.

9. ¿ Juwa jidapanʉrabara bedʼea zroma ãya jʉ̃ã ẽ badata sãwũã awuantasi?

⁹ Wãrĩnu ĩjãra bʉ bebʉra awuarabidata. Emanuele Francescaʉ̃mera zokʼasida misionerora bamarẽã awuru pʉwʉrʉeda. Ãyi kongregasione biakʉidade akʉza mamabema bedʼea kʼawuaitakʉidade baesi COVID-19ta, maʉ̃ kʼarea mebẽrãneba jĩgarabaibarabasi, mõbe Francesca papara beisi. Francescara yi mebẽrãbawara ãba bakĩrãbasi, mamina wãbe ẽ basi pandemia kʼarea. ¿Kʼãrẽta osi iya mawũã zʉbʉriabada awuantaira? Aba, Emanueleʼba Francescaʉ̃meba Jeowaʼa yiwidʼisida, ãyaʼa buru biata diamarẽã, mawũã bedʼea zroma ewarizadebema ũdubʉra awuantaita akʉza mejãcha krĩcha zroma oẽ bʼaita. Jeowabara ãyi yiwidʼira panʉsi ãya nesidabʉ ewaride iyi organizasioneba. Bari jaraita, ãya bideode ũdusi mebẽãba bedʼea jaradata, maʉ̃ bedʼeaba ãyaʼa mejãcha so zarea diasi. Mebẽã bideode eda bedʼeabʉba naʉ̃ta jarasi: «Dayirãba mesera wãrĩnu ĩjãbʉbʉrʉ dayi bebʉra awuarabidata akʉza jẽda mesera sobiabayi. Mawũãra dayirãra mejãcha zarea odayi nekʼãrẽ awuarabidade».c Yi ũmeta, audre bia okĩrãpanasi Daizeze Bedʼea jaradiaita telepononeba, mõbe ũdusida kʼaiʼa Daizeze Bedʼea jaradiaita. Yi ũbeata, ãya ĩjãsida mebẽrãba so zareata diamarẽã akʉza kʼarebamarẽã. Mebẽã aba bia krĩchabʉba mensajede zokʼa bʉebasi bedʼea Daizeze Bedʼeadebemata, ewariza zokʼasi poaga ababayeda. Dayirãba maʉ̃ra mebẽrãne kĩrãkʼa wãrĩnu ĩjãbʉbʉrʉ dai bebʉra awuarabidata, sobiade odayi dayirãba oseabʉde.

10. ¿Mebẽã abaʉba sãwũã awuara osi iyi bebʉ awuaraside?

¹⁰ Krĩchara bʉa atia kʼãrẽ oita akʉza krĩchara bʉa kʼãrẽ nebia erbʉta bʉ bebʉde. Krĩchara mebẽã Christina ʉ̃rʉ, iyira Rumanianebema maminachu Japónʼne akʉza iyira ãba yi jʉrebasi kongregasion ingle bedʼeade bedʼeabʉde. Mamina maʉ̃ kongregasion ãĩ bʉesida maʉ̃ kʼarea mebẽã Christina mejãcha sopʉa sentisi, mamina iya awuara oita krĩchasi, iya zarea osi iya oseabʉde oita kongregasion japone bedʼeade bedʼeabʉde akʉza audre jaradiaita Daizeze Bedʼea ʉ̃rʉ. Iyira bedʼeasi iyiʉ̃me trajabada kʼarebamarẽã audre bia bedʼea kʼawuaita japone bedʼeata. Iyiʉ̃me trajabadaba ĩjãsi zokʼaita Daizeze Bedʼeata akʉza karta Bʉra ewari jõmaʉ̃nẽ sobia baseabʉta, iyaʼa jaradiaita japone bedʼeata. Christinabara bia bedʼea jʉ̃drʉsi japone bedʼeata, mamina iya maʉ̃ awa ũdu ẽ basi, iyiʉ̃me trajabadabida kʼawuakĩrãbasi Daizeze Bedʼea ʉ̃rʉ. Dayirãba ʉ̃ra zei kʼãrẽ oita krĩchabʉbʉrʉ akʉza bia krĩchabʉbʉrʉ daya jʉ̃ã ẽãta zebʉrʉde, nebiata ũduyi.

11. ¿Kʼãrẽta osida juwa jidapanʉrãra ãyi plata neẽã beside?

¹¹ Wuabemara kʼarea nebiata ora. Juwa jidapanʉra abaʉba ãya nekʼãrẽ jõma erbʉra aduasi pʉwʉrʉ ãyichumae plata neẽbasi baera. ¿Kʼãrẽta osida ãyi bia bʼaita ãyi mawũã berabarinʉmʉinʉ? Nããra, ãya nekʼãrẽ osida plata mejãcha gasta ẽ baita. Tẽã, ãyi bedʼea zroma krĩchai kʼaude, krĩchasida wuabemara sãwũã kʼarebaita Daizeze Bedʼea jaradiabʉdeba (Hech. 20:35). Yumakẽrãba jarabʉ: «Dai kʼãwũã Daizeze Bedʼea jaradiabʉba kʼarebasi aukʼara dai bedʼea zroma ʉ̃rʉ krĩcha ẽ baita mawũã audre oita Jeowaba kãgabʉ kĩrãkʼa». Dayirã bebʉ awuarabidade krĩchaira yibia wuabemara kʼarebaita audre Daizeze Bedʼea jaradiabʉdeba.

12. ¿Sãwũã Pablo yizaba dayirãra kʼarebaseabʉ Daizeze Bedʼea jaradiabʉrʉde?

¹² Dayirãba jaradiabʉrʉdera zarea oibara daya krĩchabʉta oẽ baita. Daizeze Bedʼea jaradiabʉrʉde ũdukʼawuabʉ ẽbẽrarãba awuara krĩchabʉta, awuara obʉta akʉza pʉwʉrʉ awuara awuarakadeba zebʉta. Apostol Pablobara iya krĩchabʉta oẽ basi, dayirãba kʼawuaseabʉ iyi yizadeba. Jesuba zokʼasi apostol Pablota judiora ẽã jaradiamarẽã (Rom. 11:13). Maʉ̃nera Pabloba jaradiasi judiora, griegora, ẽbẽra buru biara, ẽbẽra oidebemara, ẽbẽra yi zokʼabʉra akʉza nokʼora. Pablo ẽbẽrarã soidu jʉ̃ẽita nekʼãrẽ mejãcha osi «wuabema kĩrãkʼa abarika» bʼaita (1 Cor. 9:​19-23). Pabloba akʉbasi ẽbẽrarã samaʉ̃ba zebʉta, kʼãrẽ kultura erbʉta, kʼãrẽne ĩjãbʉta akʉza maʉ̃neba jaradiabasi. Dayirãbida ẽbẽrarã soidu jʉ̃ẽbiseabʉ zarea obʉbʉrʉ bia akʉita ẽbẽraba kʼãrẽta kãgabʉta, kʼãrẽta obʉta, mawũã maʉ̃neba ãyaʼa jaradiaita.

WAWIABɄTA ŨDUBIRA WUABEMARABA KRĨCHABɄ Ʉ̃RɄ

13. 1 Corintios 8:9​ba jarabʉdebara, ¿wuabemara wawia ũdubita kʼãrẽta oibara?

¹³ Daya krĩchabʉ oẽãba kʼarebabʉ wawia ũdubita wuabemara sãwũã krĩchabʉ ʉ̃rʉ. Bari jaradaita, ʉ̃kʉrʉ dayirã mebẽrãnebemara yokĩrã ʉ̃kʉrʉra yo ẽ, ʉ̃kʉrʉ mebẽrãba wiña dobʉ ituara ʉ̃kʉrʉba do ẽ, jõmaʉ̃ta zroga bakĩrãpanʉ mamina dayirã aba abakaʉba jidabʉ kʼãrẽ remedio doita. Dayirãba wuabemara obikĩrãbʉbʉrʉ dayimabʉta, maʉ̃ba baebiseabʉ wuabemarata akʉza kongregasionʼra ãba ba ẽ bayi, mamina maʉ̃ra okĩrãpanʉ ẽ (akʉra 1 Corintios 8:9; 10:​23, 24). Atia yiza ũme kʼawuadayi, naʉ̃ra yizaba kʼarebayi kʼawuaita sãwũã Daizeze Bedʼearadebemara jarabʉ oiba kʼarebaseabʉta mebẽrãbawara ãba bʼaita.

14. ¿Kʼãrẽ Daizeze Bedʼearadebemaba kʼarebaseabʉ kʼawuaita kʼãrẽ wua jʉ̃ita akʉza dayi bʉda sãwũã ara oita?

¹⁴ Wua sãwũã jʉ̃bʉta akʉza bʉda sãwũã ara obʉta. Jeowaba dayirã kʼãrẽ wua jʉ̃i jarai kʼaude, jarabʉ ũrãgʼa dayirã sãwũã wua jʉ̃i ʉ̃rʉ. Wua jʉ̃bʉrʉdera maʉ̃ wuara ariguide akʉza kʼẽrẽpa bʼaibara ẽbẽra Jeowa odebʉba wua jʉ̃bʉ kĩrãkʼa (1 Tim. 2:​9, 10; 1 Ped. 3:3). Maʉ̃ kʼarea oẽ ẽbẽraba dayita akʉmarẽã dayi sãwũã wua jʉ̃bʉdeba. Daizeze Bedʼearadebemaba kʼarebayi zõrãrã kongregasionebemara ãya jara ẽ marẽã mebẽrã kʼãrẽ wua jʉ̃ita akʉza bʉda sãwũã ara oita. Bari jaradaita, zõrãrã kongregasionebemaba kʼarebakĩrãbasi warrara ãyi bʉda sãwũã tʉbadata ara oi ʉ̃rʉ. ¿Zõrãrãbara sãwũã ũrãgʼa diaseabasi warraraba krĩcha ẽ bamarẽã ãyi krĩchamabʉta jarabʉ ẽãta? Kongregasionʼra akʉbari zõrãrãba jarasi zõrãrã warrara jaramarẽã: «Maraba diskurso diabʉrʉde, ẽbẽrarãba audre akʉbʉbʉrʉ mara sãwũã yobʉta diskurso ũrĩ kʼaude, naʉ̃ba ũdubibʉ mara wua jʉ̃bʉra akʉza mara bʉda sãwũã tʉbʉra bigachu ẽãta». Maʉ̃ ũrãgʼaba warrarata kʼarebasi ãyaʼa krĩchabi ẽã kʼãrẽta oibarata.d

15. ¿Kʼãrẽ leyba akʉza kʼãrẽ Daizeze Bedʼearadebemaba kʼarebaseabʉ bia jida kʼawuaita kʼãrẽ tratamiento oita? (Romanos 14:5).

¹⁵ Dayi bebʉ sãwũã bia erbaita. Kristiano aba abakaʉba jidaibara ãyi bebʉ sãwã bia akʉita (Gál. 6:5). Daizeze Bedʼeaba jara ẽ mina kʼãrẽ tratamiento jidaibarata, jarabʉ wara zokʼa ẽ bʼaibarata akʉza jaidebemata oẽ baibarata (Hech. 15:20; Gál. 5:​19, 20). Maʉ̃ awuara ẽbẽra aba abakaʉba jidaseabʉ kʼãrẽ tratamiento oita. Ʉ̃kʉrʉ ẽbẽra kayabʉrʉdera jʉrʉbʉ mediko kʼarebata, mamina awuruba jʉrʉbʉ awuru tratamiento oita. Dayirãba tratamiento jidabʉrʉdera jara ẽ baibara mebẽrã kʼãrẽ tratamiento jidaita, awuarabʉrʉ iduaribibara ãya jidamarẽã. Maʉ̃ oita maʉ̃ ʉ̃rʉ krĩchaibara: (aba) Daizeze Nokʼobʉrʉ jõbiyi kayara (Is. 33:24). (Ũme) kristiano aba abakaʉba biʼia krĩchaibara ãyita kʼãrẽta audre yibiata (akʉra Romanos 14:5). (Ũbea) imitia bedʼea ẽ dayirã mebẽrã ʉ̃rʉ ãya jidabʉ kʼarea akʉza baebidaita krĩchada ẽ (Rom. 14:13). (Kimare) kristianorabara kãgata ũdubibʉ maʉ̃ kʼarea ãyimabʉta oẽ, awuarabʉrʉ krĩchabʉ mebẽrã kongregasionebemarata (Rom. 14:​15, 19, 20). Naʉ̃ra kimare ʉ̃rʉ krĩchabʉbʉrʉ mebẽrã kongregasionebemarabawara sobiade ãbapanañi.

16. ¿Zõrãrã ãba yi jʉrebʉdera sãwũã ũdubidaibara ãya krĩchabʉta oẽãta? (Akʉra potorata).

¹⁶ Zõrãrã kongregasionebemarabara ũdubibara ãya krĩchabʉta oẽãta (1 Tim. 3:​2, 3). Zõrãrãba jʉ̃ã ẽ baibara jõma iya jarabʉta ĩjãnamarẽãra iyita yi nããbema baera. Jeowa jaure zareaba kʼarebaseabʉ badu zõrãrãta iya bia jida kʼawuamarẽã kʼãrẽta oibarata. Maʉ̃ra zõrãrãnebema abaʉba iya jaradata Daizeze Bedʼeadebema ʉ̃rʉbʉ ẽ bʉrʉ, wuabemara zõrãrãbawara bedʼea abarika zeseabʉ, maʉ̃ranebemata awuara krĩchabasimina.

¿KʼÃRẼ NEBIATA ŨDUSEABɄ DAYA KRĨCHABɄ OẼÃNE?

17. ¿Dayirãba daya krĩchabʉta oẽ bʉrʉ kʼãrẽ nebiata ũduseabʉ?

¹⁷ Kristianorabara ãya krĩchabʉta oẽãne nebiata mejãcha ũduseabʉ. Meberabawara bia wãseabʉ akʉza kongregasione aduʼa baseabʉ. Akʉza sobiabayi Daizeze pʉwʉrʉde mebẽrã awuara awurakabʉ baera akʉza audre sobiabayi Daizeze Jeowaba obʉ kĩrãkʼa obʉ baera daya krĩchabʉde oẽãne.