Bʉ bebʉ Jeowaʼa diaya awabʉka

1, 2. ¿Kʼãrẽta oibara ẽbẽra abaʉba buru kʼoei nãã?

ẼBẼRA mejãchaʉta 5 poaga badeba ʉ̃ta buru kʼoe zebʉda Jeowa ʉ̃rʉ Kʼawuabipanʉrã bʼaita, maʉ̃ranebema mejãchaʉba Jeowara ũdu kʼawua zebʉda Timoteode kĩrãkʼa ãyi warrarainʉba (2 Tim. 3:​14, 15). Ʉ̃kʉrʉbara ãyi yi zroma chuidade ũdukʼawuasi Jeowara, mawũã ẽ bʉrʉ ʉ̃kʉrʉbara ãyi zõna babʉrʉdebʉrʉ ũdukʼawuabʉ Jeowara. Bari jaraita, dããrabade yuwẽrã aba iyi 97 poaga bidade buru kʼoesi Jeowa ʉ̃rʉ Kʼawuabipanʉrã bʼaita.

² Bʉa Daizeze ʉ̃rʉ kʼawuanʉmʉbʉrʉ, mawũã ẽ bʉrʉ bʉ yibarirata Jeowa ʉ̃rʉ Kʼawuabipanʉrãbʉrʉ, bʉara ¿krĩchabarika buru kʼoeita? Maʉ̃ ʉ̃rʉ krĩchaira yibia, mamina bʉ buru kʼoei nããra bʉ bebʉta nãã diaibara Jeowaʼa. Naʉ̃ artikulode akʉdayi kʼãrẽta jarakĩrãbʉta dayi bebʉ Jeowaʼa diaiba akʉza kʼãrẽa pera ẽ baibarata dayi bebʉ Jeowaʼa diaita, adewara buru kʼoeita.

¿KʼÃRẼTA JARAKĨRÃBɄ BɄ BEBɄ JEOWAʼA DIAIBARA?

3. Jara ũrĩbira kʼaira ẽbẽrarãba ãyi bebʉta Daizezeʼa diasita.

³ Daizeze Bedʼeade jarabʉ ẽbẽra abaʉba iyi bebʉ Jeowaʼa diabasidera, naʉ̃ ẽbẽrarã wuabemaraneba jãpe bʉebʉ kĩrãkʼabasi mawũã Jeowaba kãgabʉta oita. Israel pʉwʉrʉ jõmaʉ̃ta Jeowadebasi, mawũãsidu ãyidebema ʉ̃kʉrʉbara krĩchasi ãyi bebʉ Jeowaʼa diaita, mawũã audre trajaita Jeowaita. Bari jaraita, Aarónbara nei jʉ̃basi mawũã ũdubita iyi bebʉ Daizezeʼa diasita, iyara burubarita jʉ̃basi, maʉ̃ burubaribara yi datrʉare nei oro omata abasi, mawũã ũdubita iyira Daizezeita bʉta. Iya mawũã obʉrʉba iyira Israel sumo saserdote baseabasi (Lev. 8:9). Nazareorabida ãyi bebʉta Jeowaʼa diasida. Bedʼea nazareora zebʉ ebreo bedʼeadeba, yi bedʼea nazírʹdeba, naʉ̃bara jarakĩrãbʉ wuabemaraneba jãpebʉta, mawũã ẽ bʉrʉ iyi bebʉ diabʉta. Nazareorabara Moisés Leyba ãyaʼa kʼãrẽ oi jarabʉta oibarabasi (Núm. 6:​2-8).

4. (1) Ẽbẽra abaʉba iyi bebʉ Jeowaʼa diabʉrʉdera, ¿kʼãrẽta oita jidabʉ? (2) Bedʼea «bʉzha krĩñata aribʼaerãrũã» jarabʉbara, ¿kʼãrẽta jarakĩrãbʉ? (Akʉra potota).

⁴ Ẽbẽra abaʉba iyi bebʉ Daizezeʼa diabʉrʉdera, jidabʉ Jesu kʼaidubema bʼaita akʉza iyitara audre yibia Jeowaba jarabʉta nããra oita. ¿Bʉara kʼãrẽta oibara bʉ bebʉ Jeowaʼa diaita? Jesuba jarasi: «Iabʼaʉba mʉta pẽwã krĩña bʼʉbʉrʉ bʉzha krĩñata aribʼaerãrũã» (Mat. 16:24). «Bʉzha krĩñata aribʼaerãrũã» bedʼeabara, griego bedʼeadera jarakĩrãbʉ dayi bebʉra dayide ẽãta. Bʉa bʉ bebʉta Jeowaʼa diasi baera jipade oẽ baibara nekʼãrẽ Jeowa sobiabibʉ ẽãra (2 Cor. 5:​14, 15). Maʉ̃bara jarakĩrãbʉ, oẽ baibarata nekʼãrẽ dayi kakuaba okĩrãbʉta, bari jaraita mia erkʼãĩta (Gál. 5:​19-21; 1 Cor. 6:18). ¿Maʉ̃ oira bʉitara zare bʼaika? Bʉa Jeowata kãgabʉbʉrʉ akʉza bʉa biʼia kʼawuabʉbʉrʉ iya nekʼãrẽ omarẽã jarabʉra bʉitara yibiata, mawũãra zare ẽ bayi maʉ̃ oira (Sal. 119:97; Is. 48:​17, 18). Mebẽã Nicholasba naʉ̃ta jarasi Jeowaba dayirãba nekʼãrẽ omarẽã zokʼabʉ ʉ̃rʉ: «Jeowaba dayirã nekʼãrẽ omarẽã zokʼabʉbara bʉra karselde edabʉ kĩrãkʼa sentibibʉka mawũã ẽ bʉrʉ akʉbʉka leonʼrata jiorroba audu purranʉmʉne edabʉkĩrãkʼa, maʉ̃ba bʉta kʼarebai baera neida oda ẽ marẽã».

5. (1) ¿Kʼãrẽta oibara bʉ bebʉ Jeowaʼa diaira? (2) ¿Sãwũã awuarabʉ bʉ bebʉ Jeowaʼa diaita buru kʼoeiʉ̃mera? (Akʉra potota).

⁵ ¿Kʼãrẽta jarakĩrãbʉ dayirãba dayi bebʉ Jeowaʼa diaira? Jarakĩrãbʉ Daizezeʼa yiwidʼita maʉ̃ne jaraita dayi bebʉra ewari jõmaʉ̃nẽ iya kãgabʉde erbaita akʉza Jeowaba kãgabʉtrʉ nããra oita. Naʉ̃ba jarakĩrãbʉ dayirãba kãgaita Daizezera dayi so jõmainʉba, dayi krĩcha jõmainʉba, kakua jõmainʉba akʉza dayi zarea jõmainʉba (Mar. 12:30). Bʉ bebʉ Jeowaʼa diaira, maʉ̃ra miõba kʼawuabe ẽ, maʉ̃ra kʼawuabʉ Jeowaba akʉza bʉa. Mamina bʉ buru kʼoebʉrʉdera ẽbẽra jõmaʉ̃ba ũdupanʉ, maʉ̃ba ũdubibʉ bʉ bebʉra Jeowa diasita. Bʉ bebʉ Jeowaʼa diaira jipade yibia akʉza Jeowaba kãgabʉ bʉa jarada kĩrãkʼa omarẽã (Ecl. 5:​4, 5).

¿KʼÃRẼBA KʼAREBAI BɄ BEBɄ JEOWAʼA DIAITA?

6. ¿Ẽbẽra abaʉba kʼãrẽa diabʉ iyi bebʉ Jeowaʼa?

⁶ ¿Kʼãrẽa dayi bebʉra Jeowaʼa diabʉ? Iyita kãgabʉ baera. Bʉa Jeowara audre kãga wã, kʼawuasi baera iyi ʉ̃rʉ akʉza kʼawuasi baera kʼãrẽ nebiata oita iya ʉ̃ra zeide (Col. 1:9). Daizeze Bedʼea akʉbʉdeba nekʼãrẽ ũbea kʼawuayi: Nããra, Jeowara wãrĩnu chuta. Yi ũmeta, Daizeze Bedʼeara wãrĩnu Jeowadeba zebʉta. Yi ũbeata, Jeowaba zokʼabʉta iyi organizasionta iya kãgabʉ jõma aripe oita.

7. ¿Kʼãrẽta oibara dayi bebʉ Jeowaʼa diai nãã?

⁷ Yi ẽbẽra iyi bebʉ Jeowaʼa diabʉbara kʼawuasi Jeowaba kʼãrẽta jaradiabʉta akʉza Daizeze Bedʼeaba jarabʉdebʉ akʉza zarea obʉ ãya kʼawuada wuabemara jaradiaita (Mat. 28:​19, 20). Ãya Jeowata kãgapanʉ baera maʉ̃ kʼarea Jeowaʼa abapaiʼabʉrʉ yiwidʼipanʉ. ¿Bʉsida maʉ̃ra kĩrãkʼa krĩchabʉka? Bʉa Jeowata kãgabʉbʉrʉ buru kʼoe ẽ bayi, bari bʉ neũdukʼawuaraba mawũã opanʉ baera, mia bʉaʼa Daizeze Bedʼea jaradiabʉ sobiabita mawũã ẽ bʉrʉ bʉyi yibarira sobiabita.

8. ¿Biga diaiba sãwũã kʼarebaseabʉ bʉ bebʉ Jeowaʼa diaita? (Salmo 116:​12-14).

⁸ Bʉa krĩchabʉrʉde Jeowaba kʼãrẽ ozebʉrʉta, maʉ̃ kʼarea bʉ bebʉ Jeowaʼa diakĩrãñi (akʉra Salmo 116:​12-14). Daizeze Bedʼeaba jarabʉ «Jõma kʼãrẽ biara akʉza jõma nekʼãrẽ aripe bʉra» Daizezedeba zebʉta (Sant. 1:17). Jeowaba dayirãʼa nekʼãrẽ jõmaʉ̃ra audre yibia diadara naʉ̃: yi Warra Jesu bebʉ. Jesuta dayirãbari beisi baera, Jeowa neũdukʼawua baseabʉ akʉza ewari jõmaʉ̃nẽ baseabʉ (1 Juan 4:​9, 10, 19). Bʉa bʉ bebʉ Jeowaʼa diabʉrʉde maʉ̃ba ũdubibʉ biga diabʉta Jeowaba bʉaʼa nebia dia zebʉrʉ kʼarea (Deut. 16:17; 2 Cor. 5:15). Libro Bʉra ewari jõmaʉ̃nẽ sobia baseabʉ yi 46, punto 4de, ũdubibʉ bideota, yi bideo trʉ̃ra Kʼãrẽta diaseabʉ dayirãbara Daizezeara. Naʉ̃ba ũdubibʉ kʼãrẽa biga diaibarata Jeowaʼa.

¿BɄ BEBɄ JEOWAʼA DIAYA AWABɄKA AKɄZA BURU KʼOEYA AWABɄKA?

9. ¿Kʼãrẽa krĩcha ẽ baibara dayi bebʉ Jeowaʼa diaita wuabemaraba mawũã obʉ baera?

⁹ Bʉa krĩchaseabʉ waidide bʉ bebʉ Jeowaʼa diabe ẽãta akʉza buru kʼoebe ẽãta, krĩchabʉ baera nekʼãrẽ awuara oibarata, mawũã ẽ bʉrʉ nesidabʉta audre ĩjãita Jeowa ʉ̃rʉ (Col. 2:​6, 7). Daizeze Bedʼea ʉ̃rʉ kʼawuapanʉrabara, jõmaʉ̃ba Daizezera abarika kãga ze ẽ akʉza warrara jõmaʉ̃ba ãyi bebʉ Jeowaʼa dia ẽ wuabemara daucha. Akʉra kʼãrẽne audre bia oibarata, mamina krĩcharãra wuabemaraba obʉ kĩrãkʼa oibarata bʉabida (Gál. 6:​4, 5).

10. ¿Kʼãrẽta oibara bʉa krĩchabʉbʉrʉ waidide waebʉta bʉ bebʉ Jeowaʼa diaita akʉza buru kʼoeita? (Akʉra rekuadro «Bʉ yibarirata Jeowa ʉ̃rʉ Kʼawuabipanʉrãbʉrʉ»).

¹⁰ Bʉa waidide krĩchabʉbʉrʉ Daizezeʼa bʉ bebʉ diaita waebʉta, krĩchara bʉa kʼãrẽta awuara oibarata mawũã tẽã bʉ bebʉ Jeowaʼa diaita. Jeowaʼa kʼareba widira mawũã bʉa nekʼãrẽ awuara oitabʉta ara oita (Filip. 2:13; 3:16). Ĩjãra Jeowabara bʉa widibʉra panʉita (1 Juan 5:14).

KʼÃRẼA Ʉ̃KɄRɄRA KRĨCHA OBɄ ÃYI BEBɄ JEOWAʼA DIAITA AKɄZA BURU KʼOEITA

11. ¿Jeowabara sãwũã kʼarebaseabʉ iyiʉ̃me kʼẽrẽpa bamarẽã?

¹¹ Ʉ̃kʉrʉbara ãyi bebʉra Jeowaʼa diaseabʉ akʉza buru kʼoeseabʉ, mamina ãyira krĩcha obʉ maʉ̃ oi kʼarea. Ʉ̃kʉrʉra krĩcha opanʉ ãyi bebʉ Jeowaʼa diada tẽã akʉza buru kʼoeda tẽã kayirua okãrãpe Jeowa pʉwʉrʉdeba ãĩ wãi kʼarea. Bʉta maʉ̃ kʼarea perabʉbʉrʉ kĩrãbera Jeowabara diaita bʉa nekʼãrẽ nesidabʉta mawũã iya kãgabʉde bamarẽã akʉza iyita sobiabimarẽã (Col. 1:10). Iya bʉaʼa diaseabʉ maʉ̃ zareara, iya ũdubi zebʉrʉ maʉ̃ra wuabemara kʼarebabʉdeba (1 Cor. 10:13). Maʉ̃ kʼarea Jeowa organizasione bʉra mejãchaʉta ãĩ wã ẽ, Jeowaba kʼarebabʉ baera iyi pʉwʉrʉdebemara kʼẽrẽpa bʼaita.

12. ¿Kʼãrẽta oibara yi kayirua yi edebi ẽ baita?

¹² Ẽbẽra jõmaʉ̃ta kayirua omiara, maʉ̃ba zare nebia oira (Sant. 1:14). Maʉ̃ kʼarea bʉyikʉzaʉba jidaibara nebiata oita mawũã ẽ bʉrʉ yi kayiruata oita. Ʉ̃kʉrʉ ẽbẽrarãba jarapanʉ daya nekayirua ʉ̃rʉ krĩcha zebʉrʉdera maʉ̃ʼa yi edebibarata, mamina maʉ̃ra mawũã ẽ, dayara nebia oita jidaseabʉ baera. Adewara bʉa nekʼãrẽ oseabʉ mawũã yi kayirua yi edebi ẽ baita. Ewariza yiwidʼiseabʉ Jeowaʼa, Daizeze Bedʼeata bʉyidobaʉba akʉbara, ãba yi jʉrebarima wãbara akʉza bʉa ĩjãbʉ ʉ̃rʉ awurura jaradiara. Bʉa naʉ̃ta obʉbʉrʉ naʉ̃ba kʼarebayi bʉ Jeoware kʼẽrẽpa bʼaita akʉza kĩrãduarãra Jeowabara bʉra kʼarebaita (Gál. 5:16).

13. ¿Kʼãrẽ yiza biata diasi Josébara?

¹³ Bʉa naena krĩchabʉbʉrʉ yi kayirua oita zebʉrʉde kʼãrẽta oita, naʉ̃ba kʼarebayi kayirua okĩrã zebʉrʉde oẽ baita. Daizeze Bedʼeade jara ũrĩbibʉ ʉ̃kʉrʉ ẽbẽrarãba maʉ̃ta osidata, ãyira kayirua omiara basimina. Bari jaraita, Potifar kimaba Joséʼa iyiʉ̃me ãba kʼãĩmarẽã jarada ʉ̃rʉ jarasidera, Josébara oẽ basi maʉ̃ra naena kʼawuabasi baera kʼãrẽta oita. Joséba yuwẽrãʼa jarasi: «¿Mʉ̃ra sãwũã maʉ̃ nãã nekayirua oipe akʉza Daizeze nãã nekayirua zromata oipe» (Gén. 39:​8-10). Maʉ̃ yuwẽrãba iyiʉ̃me ãba kʼãĩmarẽã jarai nãã, Josébara kʼawuabasi kʼãrẽta oita. Maʉ̃ba kʼarebasi maʉ̃ kayirua yi edebi ẽ baita akʉza Jeowaʉ̃me kʼẽrẽpa bʼaita.

14. ¿Kʼãrẽba kʼarebai yi kayirua yi edebi ẽ baita?

¹⁴ ¿Sãwũã Joséde kĩrãkʼa oseapanʉ yi kayirua oẽ baita akʉza Jeowaʉ̃me kʼẽrẽpa bʼaita? Kʼãwũãena krĩchara nemitia oita zebʉrʉde kʼãrẽta oita, Jeowaba nekʼãrẽ jʉrata oita krĩchara, waña krĩchaibara maʉ̃ta oẽ baita akʉza mia kʼãrẽsi krĩcharãra maʉ̃ra ʉ̃rʉra (Sal. 97:10; 119:165). Bʉa naʉ̃ta obʉbʉrʉ naʉ̃ba kʼarebayi kayirua oẽ baita naena kʼawuabʉ baera kʼãrẽta oita.

15. ¿Ẽbẽra abaʉba sãwũã ũdubibʉ iyara Jeowara soiduba jʉrʉbʉta? (Hebreos 11:6).

¹⁵ Bʉa kʼawuabʉ bʉra wãrĩnuarade edabʉta akʉza Jeowaba kãgabʉta okĩrãbʉta bʉ soiduba, mamina perabʉbaibara bʉ bebʉ Jeowaʼa diaita akʉza buru kʼoeita. Bʉara Davidʼde kĩrãkʼa Jeowaʼa naʉ̃ta jaraseabʉ: «Daizeze mʉ̃ta biʼia akʉra akʉza biʼia kʼawuara mʉ̃ sode kʼãrẽtabʉta. Biʼia akʉra mʉ̃ta akʉza bia kʼawuara mʉ̃ kʼãrẽba krĩcha obibʉta. Akʉra mʉ̃ne, yi kayirua bʉ kʼawuaita akʉza o ewari jõmaʉ̃nẽbʉare edera» (Sal. 139:​23, 24). Jeowabara nebiata diabʉ iyi jʉrʉpanʉrãra. Bʉa bʉ bebʉta iyaʼa diaita akʉza buru kʼoeita zarea obʉbʉrʉ, naʉ̃ba ũdubibʉ bʉara iyita jʉrʉbʉta (akʉra Hebreos 11:6).

JEOWA KʼAWA BʼAITA JɄRɄBADA

16, 17. ¿Jeowabara sãwũã iyima weseabʉ yibarira Jeowa odepanʉra wũãwũãrãra? (Juan 6:44).

¹⁶ Jesubara jarasi iyi kʼaidubemarãra Jeowaba iyima webʉta (akʉra Juan 6:44). Krĩchara maʉ̃ bedʼeara kʼãrẽa yibiata bʉita. Jeowaba akʉbʉ ẽbẽra aba abakaʉba kʼãrẽ nebiata erbʉta ãyi sode, mawũã iyi pʉwʉrʉeda webʉ akʉza iyitara ẽbẽra aba abakaʉta nebia zroma kĩrãkʼabʉ (Deut. 7:6 nota). Bʉsida Jeowaba biʼia akʉbʉ.

¹⁷ Bʉ yibariraba bʉ warrarabʉeda Daizeze ʉ̃rʉ jaradiasibʉrʉ, bʉara krĩchaseabʉ Daizezedera obʉta bʉ yibarira kʼarea. Mamina Daizeze Bedʼeaba naʉ̃ta jarabʉ: «Daizeze kʼaita bʼaidua, mawũãra iyira mara kʼaita baya» (Sant. 4:8; 1 Crón. 28:9). Bʉa Jeowata bʉyiareba orrabʉbʉrʉ mawũãra, iyira bʉ k’awabayi. Jeowaba ẽbẽra aba abaka orrabʉ. Maʉ̃ba warrarabʉeda bʉ yibariraba Daizeze ʉ̃rʉ jaradiasidamina bʉyiareba Jeowata orrabʉbʉrʉ iyira bʉ kʼawabayi Santiago 4:8ba jarabʉ kĩrãkʼa (naʉ̃ testoʉ̃me akʉra 2 Tesalonicenses 2:13).

18. ¿Kʼãrẽta kʼawuadayi wuarebema artikulodera? (Salmo 40:8).

¹⁸ Bʉa bʉ bebʉ Jeowaʼa diabʉrʉde akʉza buru kʼoebʉrʉdera ũdubibʉ Jesuba oda kĩrãkʼa obʉta. Jesura iyi biadeba yi Zezeidu jʉ̃ẽsi, mawũã yi Zezeba jarabʉta oita (akʉra Salmo 40:8; Heb. 10:7). Yi wuarebema artikulode akʉdayi kʼãrẽba kʼarebaita Jeowaʉ̃me kʼẽrẽpa bʼaita buru kʼoeda tẽã.