¿Sãwũã jaradianʉmʉ Daizeze Bedʼea bia ʉ̃rʉra?

Aranʉ Daizezebara iyi Nokʼodeba jõbiyi bedʼea zroma ẽbẽrarã jõmaʉ̃ba ũdupanʉra, ¿sãwũã ẽbẽrarã jara ẽ baipe maʉ̃ bedʼea biara? Jesubara kãgabasi ẽbẽra jõmaʉ̃ʼa naʉ̃ bedʼea biata jaradamarẽã (Mateo 28:19, 20). ¿Kʼãrẽta opanʉ Jeowa ʉ̃rʉ Kʼawuabipanʉrãbara Jesuba zokʼada ũrĩta?

1. ¿Idi ewadera sãwũã aripe berabarinʉmʉ Mateo 24:14ba jarabʉra?

Jesuba jarasi: «Bedʼea biata Daizezeta Nokʼodʼebemata jaradʼaya ẽjũã jõmaʉ̃ maẽ» (Mateo 24:14). Dai Jeowa ʉ̃rʉ Kʼawuabipanʉrãbara jaradiakĩrã naʉ̃ bedʼea bia ʉ̃rʉ. Naʉ̃ bedʼea biata jarakapanʉ naʉ̃ drʉa jõmaʉ̃nẽ 1.000 audre bedʼea awuara awuaraka. Mejãcha zarea odaibara maʉ̃ daucha jõma aribaeita. Maʉ̃ra oda ẽ bakasi Jeowa kʼareba neẽãra.

2. ¿Kʼãrẽta opanʉ ẽbẽrarã jaradia wãita?

Jaradiapanʉ ẽbẽrarã bʉmae. Idi dayirãbida kristianora nããbemaraba opanana kĩrãkʼa jaradiapanʉ «deza deza» (Hechos 5:42). Mawũã ẽbẽrarã bioʉʼa jaradiapanʉ poagaza. Mamina ẽbẽrarã mejãchaʉta ãyi deda bʉ ẽ baera jaradiade wãpanʉ ẽbẽrarã bʉmae. Jʉrʉpanʉ ẽbẽrarãta Jeowa ʉ̃rʉ jaradiaita akʉza iya kʼãrẽ nebia okĩrãbʉ ʉ̃rʉ bedʼeaita.

3. ¿Kʼãiraba jaradiaibara bedʼea biara?

Kristianora wãrĩnuarabara jõmaʉ̃ʼa jarakaibara bedʼea biara. Daiba maʉ̃ bedʼea jarakaira ijaramia kĩrãkʼa akʉ ẽ. Jaradia wãpanʉ daya oseabʉde ẽbẽrarãta bebʉdepanʉ baera (akʉra 1 Timoteo 4:16). Maʉ̃ oira, mia kʼaiba plata dia ẽ, Daizeze Bedʼeaba jarabʉ: «Bari jaradiasida baera, bari jaradiaidua» (Mateo 10:7, 8). Ʉ̃kʉrʉba ũrĩkĩrã ẽ mina, jaradiapanʉ Daizeze Bedʼeara, mawũã Jeowaba kãgabʉta opanʉ baera akʉza sobiabibʉ baera.

AUDRE BIʼIA KʼAWUADADRɄ

4. Zarea opanʉ ẽbẽrarã jõmaʉ̃ʼa jaradiaita

BIDEO: Jĩga bʉidu jʉrʉ panʉ ẽbẽrarã Daizeze Bedʼea jara diaita (7:33)

• Jeowa ʉ̃rʉ Kʼawuabipanʉrãba jaradiabʉdebara, ¿bʉara saʉ̃ta audre kãga?

Akʉra Mateo 22:39 akʉza Romanos 10:13-15, mõbe naʉ̃ta panʉidua:

• Dayirãba jaradiabʉdeba, ¿sãwũã ũdubibʉ ẽbẽrarã kãgapanʉta?

• ¿Jeowabara sãwũã akʉbʉ bedʼea bia jarakapanʉrãra? (Akʉra nejʉacha zake 15).

5. Daizezeʉ̃me trajapanʉ

Nekʼãrẽ mejãcha berabaribʉba, ũdubibʉ Jeowaba wãrĩnu kʼarebabʉta. Bari jaradaita, akʉdaya kʼãrẽ berabaridata Nueva Zelandade. Jeowa ʉ̃rʉ Kʼawuabipanʉrã iyi trʉ̃ Paulba, deza deza jaradiabasi, maʉ̃ tẽã ũdusi ẽbẽra wẽrãta aba, maʉ̃ ewaride diapeda Daizeze trʉ̃ta jarabasi iyi ẽbẽra wẽrã yiwidʼibaside akʉza widisi ẽbẽra aba iyita akʉ zemarẽã. Paulba jarabʉ: «Ũmadaʉ ũbea berabarida tẽã, mʉ̃ra iyi deidu jaradia wãsi».

Akʉra 1 Corintios 3:9, mõbe naʉ̃ta panʉidua:

• ¿Sãwũã ũdubibʉ Nueva Zelandade berabaridaba wãrĩnu Jeowabara kʼarebabʉta jaradia wãbʉde?

Akʉra Hechos 1:8, mõbe naʉ̃ta panʉidua:

• ¿Kʼãrẽa nesidapanʉ Jeowa kʼarebata jaradia wãita?

¿Kʼawuabasika?

Semanaza ãba yi jʉrebʉrʉde, jaradiapanʉ sãwũã audre bia jaradia wãita. Bʉta ãba yi jʉrebarimae jʉ̃ẽbʉbʉrʉ, ¿bʉara kʼãrẽta krĩchabʉ daiʼa kʼãwũã jaradiapanʉ ʉ̃rʉ?

6. Ũrĩpanʉ Daizezeba zokʼadata jaradia wãi ʉ̃rʉ

Siglo nããbemanera Jesu kʼaidu panʉrabara nejʉrata erpanasi, maʉ̃rabara nekʼãrẽ baduta opanasi jaradia ẽ marẽã. Kristianora nããbemarara arare bedʼeasi «nokʼo nãã» «idu jaradiabimarẽã» (Filipenses 1:7). Idi ewade Jeowa ʉ̃rʉ Kʼawuabipanʉrãbara abarika opanʉ.a

BIDEO: Arare bedʼeapanʉ nokʼo nãã idu jaradiabimarẽã (2:28)

Akʉra Hechos 5:27-42, mõbe naʉ̃ta panʉidua:

• ¿Kʼãrẽa iduaribida ẽ jaradiaira? (Akʉra nejʉacha zakerata 29, 38 akʉza 39).

KĨRÃBEITA

Jesubara zokʼasi iyi kʼaidu panʉra jaradia wãmarẽã bedʼea biata drʉaza. Jeowabara kʼarebabʉ iyi ode panʉrarã maʉ̃ aripe oita.

Panʉnadrʉ

• ¿Sãwũã naʉ̃ drʉa jõmaʉ̃nẽ jaradiapanʉ bedʼea biara?

• ¿Sãwũã jaradiabʉdeba ũdubipanʉ ẽbẽrarã kãgapanʉta?

• Bʉmara, ¿jaradia wãpanʉba dayirãra sobiabiseabʉka?

JɄRɄDA AUDRE KʼAWUAITA

Akʉra sãwũã Jeowa ʉ̃rʉ Kʼawuabipanʉrãba pʉwʉrʉ zromane jaradiapanʉta.

Jaradiapanʉ Parísde Daizeze Bedʼea ʉ̃rʉ ẽbẽrarã kabananʉmʉmae (5:11)

Jeowa ʉ̃rʉ Kʼawuabipanʉrãbara, ¿sãwũã yõba zʉbʉriadara kʼarebabʉ?

Jaradiapanʉ Daizeze Bedʼea ʉ̃rʉ ẽbẽrarã yõba jʉ̃ẽbida awuru drʉaeda (5:59)

Ũrĩda wẽrã aba sãwũã iya ẽbẽrarã jaradiabʉba iyira sobiabibʉta.

Mʉ̃ra sobiabʉ naʉ̃ ota jidasi baera (6:29)

Akʉra sãwũã Jeowa ʉ̃rʉ Kʼawuabipanʉrãta nokʼorabawara bedʼeabʉba kʼarebabʉ jaradia wãita.

«Daizeze Bedʼea jaradiapanʉrãra wãpanʉ nokʼo nãã» (El Reino de Dios ya está gobernando, capítulo 13)