YI 20

Jeowabara sãwũã zokʼabʉ iyi kongregasionʼra Jesudeba

Kartarata

Jeowabara kãga jõma daucha erbaita (1 Corintios 14:33). Maʉ̃ kʼarea iyi pʉwʉrʉsida ãba daucha bʼaibara. ¿Sãwũã obʉ Jeowabara iyi kongregasion bia daucha bamarẽã? ¿Dayirãbara kʼãrẽta oibara maʉ̃ jõma daucha bamarẽãra?

1. ¿Kʼaita kongregasion buru?

«Jesura kongregasion buru» (Efesios 5:23). Jesubara kʼarebanʉmʉ nama naʉ̃ drʉade Jeowa pʉwʉrʉba jõma obʉta. Jesubara jʉrʉsi «nezokʼara jipabʉrata akʉza biʼia krĩchabʉrata», maʉ̃ra ẽbẽrarãra wiñapanʉ, iyabaʉta jarapanʉ Zõrãrã Burubia ãba yi jʉrepanʉ (akʉra Mateo 24:45-47). Jesu kʼaidubemane kĩrãkʼa akʉza zõrãrãra Jerusalén siglo nããbemane kĩrãkʼa, naʉ̃ra Zõrãrã Burubia ãba yi jʉrepanʉbara kongregasion naʉ̃ drʉade jõmabʉta akʉpanʉ (Hechos 15:2). Mamina naʉ̃ra yumakẽrãra Jeowa organizasion buru ẽ. Ãyara jʉrʉpanʉ Jeowa kʼarebata akʉza ũrĩpanʉ iyi bedʼeaba jarabʉta, adewara opanʉ Jesuba zokʼabʉta.

2. ¿Kʼãrẽta obʉ zõrãrã kongregasionebemabara?

Zõrãrã kongregasionebemabara biʼia zokʼa kʼawuabʉ Daizeze Bedʼeara, kongregasionebemata zowaĩnĩgʉa diabʉ, adewara kʼarebabʉ. Naʉ̃ra zõrãrãbara mia kʼãrẽsida plata widida ẽ ãya obʉ kʼarea, awuarabʉrʉ opanʉ Daizeze Bedʼeaba jarabʉ kĩrãkʼa: «Okĩrã oidua, mia jʉrʉraidua plata ũduita, awuarabʉrʉ zarea trajaidua» (1 Pedro 5:1, 2). Kongregasionerabʉ zõrãrã kʼarebabarita maʉ̃rasida tẽãne zõrãrã baseabʉ.

Zõrãrã Burubia ãba yi jʉrepanʉbara jidabʉ ʉ̃kʉrʉ zõrãrã kongregasionebemata, maʉ̃rata kongregasion akʉbari zõrãrã bamarẽã. Naʉ̃rabara kongregasionza akʉ jʉ̃ẽpanʉ zowaĩnĩgʉa diaita akʉza jaradiaita. Adewara kongregasione jidabʉ zõrãrã bamarẽã akʉza zõrãrã kʼarebabari bamarẽã (1 Timoteo 3:1-10, 12; Tito 1:5-9).

3. ¿Kʼãrẽta opanʉ Jeowa ʉ̃rʉ Kʼawuabipanʉrã aba abaka?

Jõma kongregasionba «ibia bedʼeaibara Daizeze Jeowa trʉ̃ ʉ̃rʉ» ãba yi jʉrebʉde. Adewara ãyi aba abakaʉba Daizeze Bedʼea jaradiaseabʉde (akʉra Salmo 148:12, 13).

AUDRE BIʼIA KʼAWUADADRɄ

Akʉdayi sãwũã zokʼabʉta Jesuba akʉza zõrãrã kongregasionebemaba sãwũã iyide kĩrãkʼa opanʉta. Adewara dayirãba sãwũã kʼarebaseabʉta Jesuta akʉza zõrãrã kongregasionebemata.

4. Jesura Nokʼo bia

Jesubara naʉ̃ bedʼea biata jarabʉ dayirãʼa. Akʉra Mateo 11:28-30, mõbe naʉ̃ta panʉidua:

Naʉ̃ testodera, ¿sãwũãchu Jesura? Akʉza, ¿ẽbẽrarã sãwũã sentimarẽã kãgabʉ?

Zõrãrã kongregasionebemabara, ¿sãwũã Jesude kĩrãkʼa opanʉ? Akʉra BIDEOTA.

BIDEO: Drʉa ure Nepalde baeside zõrãrãba kʼarebasida (4:56)

Daizeze Bedʼeabara biʼia jara ũrĩbibʉ sãwũã kʼarebaseabʉta zõrãrã kongregasionebemabara.

Akʉra Isaías 32:2 akʉza 1 Pedro 5:1-3, mõbe naʉ̃ta panʉidua:

Jesubara kʼarebasi wuabemara aduʼa panamarẽã akʉza zõrãrã kongregasionebemasida zarea opanʉ abarika oita. ¿Bʉara sãwũã krĩchabʉ naʉ̃ ʉ̃rʉra?
Adewara, ¿kʼãrẽne zõrãrãbara Jesude kĩrãkʼa opanʉ?

5. Zõrãrãbara ãyi yizadeba wuabemara jaradiabʉ

¿Kʼãrẽta krĩchamarẽã kãgabʉ Jesubara zõrãrã kongregasionebemaba ãya obʉ ʉ̃rʉ? Akʉra BIDEOTA.

BIDEO: Zõrãrãbara nãã edebʉ (7:39)

Jesubara bia jara ũrĩbisi mebẽrã kongregasion akʉbʉra sãwũã baibarata. Akʉra Mateo 23:8-12, mõbe naʉ̃ta panʉidua:

¿Kʼasiabʉ Daizeze Bedʼeabara zõrãrã sãwũã bʼaibara ʉ̃rʉ? Bʉmara, ¿nokʼora religionʼrabara Daizeze Bedʼeaba zokʼabʉde obʉka?

A. Potorata: Zõrãrã aba zarea obʉ audre Jeowa neũdukʼawua baita akʉza iyi mebẽrãta kʼarebabʉ abarika odamarẽã. 1. Daizezeʼa yiwidʼibʉ Daizeze Bedʼea akʉi naweda. 2. Daizeze Bedʼeata jaradianʉmʉ iyi kau warrarabʉʼa yi kimaʉ̃meba.

B. Iyabaʉ zõrãrãba yi kimaʉ̃meba, kongregasionebema wẽrã kayabʉta hospitalde akʉ jʉ̃ẽsida.

Zõrãrã Jeowaʉ̃me kʼẽrẽpabʉ akʉza kʼarebabʉ ãyi mebẽrãsida kʼẽrẽpa baita.
Zõrãrãba akʉbʉ jõma kongregasionebemata.
Zõrãrãbara jaradiabʉ ewariza.
Zõrãrãbara jaradiabarira, adewara kʼarebabʉ nekʼãrẽ jareita akʉza nekʼãrẽ awuara oita.

6. Dayirãbara kʼarebaseabʉ zõrãrã kongregasionebemara

Daizeze Bedʼeaba jarabʉ kʼãrẽa kʼarebadaibarata zõrãrã kongregasionebemara. Akʉra Hebreos 13:17, mõbe naʉ̃ta panʉidua:

¿Kʼãrẽa Daizeze Bedʼeaba jarabʉ ũrĩnaibarata yi nãã panʉra bedʼeara? ¿Bʉmara naʉ̃ra yibiaka? ¿Kʼãrẽa mawũã krĩchabʉ?

Akʉra Lucas 16:10, mõbe naʉ̃ta panʉidua:

¿Kʼãrẽa dayirãbara zõrãrãra kʼarebadaibara dayita nekʼãrẽ zroma ẽ mina?

Ʉ̃KɄRɄBA KRĨCHAPANɄTA: «Nesida ẽ religion erbaita».

Bʉmara, ¿kʼãrẽa yibia kongregasione ãba ze kʼãrãpe Daizeze ʉ̃rʉ ibia bedʼeaita?

KĨRÃBEITA

Jesura kongregasion buru. Zõrãrã kongregasionebemara iyi juwa edre bʉ akʉza dayirãbara soiduba kʼarebabʉ ãya akʉbʉ baera, adewara ãyi yizadeba jaradiabʉ baera.