Bʉa kʼarebaseabʉ bʉ mebẽrã sobia bamarẽã

Jeowabara kãgabʉ mebẽrãra sobiapanamarẽã (Sl 127:​3-5; Ec 9:9; 11:9). Mamina maʉ̃ sobiara aduaseabʉ bedʼea zromata naʉ̃ drʉade ũdupanʉ baera akʉza dayirã mebẽrãba aña opanʉ baera. Maʉ̃ kʼarea, ¿kʼãrẽta oseabʉ aba abakaʉba yi mebẽrã sobia bamarẽã?

Yumakẽrãba ũdubibara iyi kimatrʉ audre yibiata iyitara (1Pe 3:7). Yi kimaʉ̃me ewari berabaribara. Iyara jʉ̃ã ẽ baibara yi kimaba jõma aripe omarẽã akʉza biga diabʉ iya nejõma obʉ kʼarea, yi mebẽrãita adewara iyi kʼarea (Col 3:​15). Iyara ũdubibʉ kãgata akʉza ibia bedʼeabʉ iyi ʉ̃rʉ (Pr 31:28, 31).

Yuwẽrãbara jʉrʉbʉ yi kima sãwũã kʼarebaita (Pr 31:12). Iyara wawiata ũdubibʉ iyi kimara akʉza ãba trajabʉ (Col 3:​18). Iyira ibiade bedʼeabʉ yi kima akʉza iyi ʉ̃rʉ ibia bedʼeabʉ wuabemara (Pr 31:26).

Yibarirabara ewari jʉrʉbʉ yi wũãwũãrabawara ãba bʼaita (Dt 6:​6, 7). Jarabʉ ãyi wũãwũãra kãgabʉta (Mt 3:​17). Ãyi wũãwũãra kʼẽãbʉrʉdera opanʉ kãgade akʉza kʼawuabʉ sãwũã kʼẽãita (Ef 6:4).

Wũãwũãrabara wawiata ũdubibʉ akʉza ũrĩbʉ yibarira bedʼeara (Pr 23:22). Kʼawuabibʉ ãyi yibarira ãya kʼãrẽ krĩchabʉta akʉza sãwũã sentibʉta. Ũrĩpanʉ yibariraba ũrãgʼa diadata (Pr 19:20).

BIDEO JɄRɄDA MEBẼRÃBAWARA SÃWŨÃ SOBIA B’AITA ŨDUBIDA TẼÃ, PANɄRA NAɄ̃ WIDITA:

¿Kʼãrẽta osida aba abakaʉba ãyi mebẽrã sobiapanamarẽã?