Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2023 Watch Tower Bible and Tract Society of Pennsylvania
4-10 MARZOBAYEDA
BEDʼEA BIA DAIZEZE BEDʼEADE ŨDUDATA | SALMOS 16, 17
«Bʉra Jeowa, mʉ̃ nebiarãra bʉdeba zebʉ»
w18.12 26 parr. 11
Warrara marara sobia baseapanʉ
NEŨDUKʼAWUA BIARATA JɄRɄDRɄ
11 (Akʉra Salmo 16:3). Davidbara kʼawuabasi sãwũã ũduita neũdukʼawua biarãra. Iyira ẽbẽrarã Jeowa kãgapanʉrabawara ãba bakĩrãbasi. Iya jarabʉ naʉ̃ra ẽbẽrarãra kayirua neẽãpanasita. Awuru Salmistabida Davidʼde kĩrãkʼa biʼia jʉrʉbasi saʉ̃ta iyi neũdukʼawua bʼaita. Iya jarasi: «Mʉ̃ra yi bʉaʼa wawia ũdubipanʉra akʉza bʉaʼa jarabʉ opanʉra neũdukʼawua» (Sal. 119:63). Dayirãra ẽbẽrarã Jeowaba kãgabʉ opanʉra neũdukʼawua baseabʉ. Ãyita dayirã nããbemabʉsida, mawũã ẽ bʉrʉ tẽãbemabʉsida.
w14 15/2 29 parr. 3
Akʉidua Jeowa kʼãrẽaba ẽbẽra biata
Davidba jarasi: «Mʉ̃ara Jeowata diasida akʉza iyira mʉ kopa. Mʉ̃ bebʉra bʉ juwadebʉ. Mʉ̃ara diasida ẽjũã bia kiruta» (Sal. 16:5, 6). Davidʼra sobiabasi Jeowaba iyita bia akʉbʉ baera akʉza Jeowaba kãgabʉta obasi baera. David kĩrãkʼa dayirãbida bedʼea zroma mejãcha ũdupanʉ, mamina nebiata mejãcha erpanʉ. Maʉ̃ kʼarea sobiapanaibara Jeowaba kãgabʉ obʉde.
w08 15/2 3 parr. 2, 3
Ewari jõmaʉ̃nẽ Jeowaba kãgabʉta nããra bʉera
2 Dayirãbara nemejãcha kʼawuaseapanʉ Daizeze Bedʼeade nebʉrarabʉdeba, Abrahán nebʉradeba, Saradeba, Moisésdeba, Rutdeba, Davidʼdeba, Esterdeba, Pablodeba akʉza awurura nebʉradeba. Dayirãba naʉ̃ra nebʉra ʉ̃rʉ krĩchapanʉbʉrʉ odayi Salmistaba jarabʉ kĩrãkʼa: «Jeowara ewari jõmaʉ̃nẽ mʉ̃ nãã bʉ kʼãrẽ. Iyira mʉ̃ kʼawabʉa akʉza mʉ̃ urebi ẽã» (Sal. 16:8). ¿Kʼãrẽta jarakĩrãbʉ naʉ̃ testobara?
3 Gorogorobara iyi espadara juwarare erbasi. Maʉ̃ba iyi juwararera neida berabariseabasi iyi joudrʉbarira juwaʼãkarebʉrʉ erbasi baera. Mamina awuru gorogorota iyi juwararebasibʉrʉ naʉ̃ba kʼarebaseabasi neida berabari ẽ marẽã. Abarika dayirãba Jeowata dayirã nãã bʉebʉbʉrʉ akʉza iya kagabʉta nãã opanʉbʉrʉ, iyara ewari jõmaʉ̃nẽ kʼarebayi.
Jʉrʉda nekʼãrẽ biʼiabʉta Daizezedebemata
it-2 491
Dabʉ jã
Ebreo bedʼeade dabʉ jã jaraita zokʼabʉ bedʼea ʼi·schóhn (Dt 32:10; Pr 7:2) akʉza zokʼabʉ bedʼea ʽá·yin, dabʉ jã ʉ̃rʉ bedʼeaita. Lamentaciones 2:18ba akʉza Salmo 17:8ba jara ũrĩbibʉ dabʉ jã ʉ̃rʉ.
Dayirã dabʉde nei eidogodera, mawũã ẽ bʉrʉ daʉ ikarata eidogodera, naʉ̃bara dayi dabʉra kayirukʉbida. Maʉ̃ kʼarea biʼia akʉibara dayi dabʉra. Dayirã dabʉta biʼia akʉda ẽ bʉrʉ akʉza neida berabarira, naʉ̃ba daʉberre amaeseabʉ dayirã. Maʉ̃ kʼarea Daizeze Bedʼeadera zokʼabʉ bedʼea dabʉ jãta ũdubita nekʼãrẽ biʼia akʉibara ʉ̃rʉ. (Pr 7:2.) Jeowaba Israel pʉwʉrʉ sãwũã biʼia akʉda ũdubita, Deuteronomio 32:10dera jara ũrĩbibʉ Jeowabara iyi pʉwʉrʉra biʼia akʉsita iyi dabʉ jã biʼia akʉbʉ kĩrãkʼa. Davidʼra Jeowaʼa yiwidʼibasi Jeowaba iyi dabʉ jã akʉbʉ kĩrãkʼa akʉmarẽã iyisida. (Sl 17:8.) Iyi nejʉraraba iyi pẽwãbʉrʉdera Davidba kãgabasi Jeowaba iyira mesera kʼarebamarẽã. (Naʉ̃ testoʉ̃me akʉra Zac 2:8, naʉ̃ testode zokʼasi bedʼea ebrea ba·váth ʽaʹyin; akʉra OJO.)
11-17 MARZOBAYEDA
BEDʼEA BIA DAIZEZE BEDʼEADE ŨDUDATA | SALMO 18
«Jeowara [ . . . ], mʉ̃ ẽdrʉbibari»
w09 1/5 14 parr. 4, 5
¿Kʼawuakĩrãbʉka Daizeze Bedʼeaba yiza jara ũrĩbibʉba kʼãrẽ jarakĩrabʉta?
Daizeze Bedʼeaba edaʉde jarabʉ Jeowara mõgara zroma kĩrãkʼabʉta, mawũã ẽ bʉrʉ muro kĩrãkʼabʉta (2 Samuel 23:3; Salmo 18:2; Deuteronomio 32:4). ¿Kʼãrẽne abarikabʉ ãyira? Mõgara zromara jipa zareabʉ, abarika Jeowasi mejãcha zarea barabʉ baera iya dayirãra bia akʉseabʉ.
5 Salmo libroba jara ũrĩbibʉ Jeowara nekʼãrẽ awuru kĩrãkʼabʉta. Bari jaraita, Salmo 84:11de jarabʉ Jeowara bisia kĩrãkʼa akʉza joudrʉbari kĩrãkʼabʉta. Iyideba zebʉ baera ʉ̃nata akʉza dayirã bebʉta. Salmo 121:5ba jarabʉ Jeowara dayirã mĩrʉbarita. Abarika bisianʉmʉnera dayirãbara jʉrʉbʉ sama mĩrʉita. Maʉ̃ kĩrãkʼa dayirã bedʼea zromara bisia kĩrãkʼabʉ akʉza Jeowata dayirã mĩrʉbari, iya akʉbʉ baera (Isaías 51:16; Salmo 17:8; 36:7).
it-2 1216 parr. 6
Nemi
Jeowabara ũrĩbʉ iyi odepanʉra bedʼeara. Dayirãba Jeowaba kãgabʉta soiduba opanʉbʉrʉ ĩjãseapanʉ iyaʼa dayirãba widibʉra ũrĩbʉta kʼãrẽ ẽ kʼãrẽ bedʼeade bedʼeabʉta. Dayirã nemi jĩgʉa bedʼea ẽ mina iyara ũrĩbʉ dayirãba jarabʉra. Iyara biʼia kʼawuabʉ baera dayirã so sãwũãbʉta. (Sl 66:19; 86:6; 116:1; 1Sa 1:13; Ne 2:4.) Ẽbẽrarãba bedʼea zroma ũdubʉ kʼarea iyaʼa yiwidʼibʉrʉdera Jeowabara ũrĩbʉ akʉza kʼawuabʉ ẽbẽra kayiruaraba iyi odepanʉra pẽwãpanʉne kʼãrẽ krĩchabʉsida. (Gé 21:17; Sl 55:18, 19; 69:33; 94:9-11; Jer 23:25.)
Kʼãrẽta oseabʉ krĩcha zroma obʉa yi edebi ẽ baita
2. Krĩchara. Dayirãba bedʼea zroma ũduside Jeowaba sãwũã kʼarebada ʉ̃rʉ krĩchaibara. Naʉ̃ba zarea diabʉ akʉza kʼarebabʉ Jeowa ʉ̃rʉ audre ĩjãmarẽã (Sal. 18:17-19). Zõrãrã aba yi trʉ̃ Joshuaba jarabʉ: «Mʉ̃ara kartade bʉbʉ Jeowaba mʉ̃ yiwidʼi sãwũã panʉbʉta. Naʉ̃ba mʉ̃aʼa kĩrãbebibʉ Jeowaba sãwũã mʉ̃aʼa nesidabʉ ewaride panʉsita mʉ̃a iyaʼa wididara». Dayirãba krĩchapanʉbʉrʉ Jeowaba dayirã sãwũã kʼareba zebʉrʉ ʉ̃rʉ, naʉ̃ba kʼarebabʉ aukʼara krĩcha zroma obʉa yi edebi ẽ baita.
Jʉrʉda nekʼãrẽ biʼiabʉta Daizezedebemata
it-2 773 parr. 2
Kerubin
Ʉ̃kʉrʉ pʉwʉrʉra Israel audu badaraba jarapanasi maʉ̃ra kerubinʼrãra nedʉwʉrʉ kĩrãkʼabasita. Mamina judiorabara jarapanasi (Daizeze Bedʼeabara maʉ̃ ʉ̃rʉra kʼãrẽ jara ũrĩbi ẽ) naʉ̃ra angelera ẽbẽra kĩrãkʼabʉta akʉza ãyira kĩrãwãreãbasita akʉza Jeowaba Moisésʼa kerubinʼra parã jarasidera maʉ̃ra kĩrãkʼa parãsida. (Éx 25:9.) Pabloba jarasi naʉ̃ra kerubinʼrãra kĩrãwãreãbasita. (Heb 9:5.) Maʉ̃ra kerubinʼra ũdubʉba, maʉ̃ba jarakĩrãbasi Jeowara mamabʉta: «Mʉ̃ra tapa ʉ̃rʉneba bʉme bedʼeayi. Kama kerubine ũme bʉdeba arka Testimonio ʉ̃rʉ mamaʉ̃ba mʉ̃a jarayi mʉ̃a bedʼea zokʼaita». (Éx 25:22; Nú 7:89.) Maʉ̃ba jarapanʉ Jeowara kerubinʼra ʉ̃rʉ jewedabʉta. (1Sa 4:4; 2Sa 6:2; 2Re 19:15; 1Cr 13:6; Sl 80:1; 99:1; Isa 37:16.) Kerubinʼra edaʉde zokʼapanasi jaraita Jeowa karru ʉ̃rʉ. (1Cr 28:18.) Adewara kerubin ibara kʼarebabasi mesera wãita akʉza neida berabari ẽ baita. Davidba ũdubita Jeowaba iyi sãwũã mesera kʼarebasita jarasi Jeowara kerubin ʉ̃rʉ a zesita. (2Sa 22:11; Sl 18:10.)
18-24 MARZOBAYEDA
BEDʼEA BIA DAIZEZE BEDʼEADE ŨDUDATA | SALMOS 19-21
«Bajãba Daizeze ʉ̃rʉ ibia bedʼeabʉ»
w04 1/1 8 parr. 1, 2
Jõmaʉ̃ba Jeowa ʉ̃rʉ ibia bedʼeaidua
DAVIDʼRA, Jesé warrabasi. Iyira obeja akʉbasi Belén kʼawa. Davidba obejara akʉbasidera diamasi ʉ̃ta akʉbasibaibara chĩdaurata. Iyara maʉ̃ ʉ̃rʉ krĩchabasibaibara Jeowaba Salmo 19 bʉbiside (Salmo 19:1, 4).
2 Bajãra bedʼea ẽ mina ewariza Jeowa ʉ̃rʉ ibia bedʼeabʉ. Nekʼãrẽ parãnabʉba Jeowa ʉ̃rʉ ibia bedʼeabibʉ. Maʉ̃ba jarabʉ ẽbẽrarãbida Jeowa ʉ̃rʉ ibia bedʼeaibarata ãyira bedʼeaseabʉ baera. Salmista abaʉba jarasi Jeowa odepanʉrabara naʉ̃ta oibarata: «Ũdubidua Jeowa iyi trʉ̃ra yi zromabʉta, maʉ̃ta ũdubibara baera» (Salmo 96:7, 8). Yi Jeowa kʼawapanʉrabara maʉ̃ta okĩrãpanʉ.
w04 1/6 11 parr. 8-10
Nekʼãrẽ parãnabʉba Daizeze ʉ̃rʉ ibia bedʼeabibʉ
8 Salmo 19:4-6 bayeda Davidba jara ũrĩbibʉ Jeowaba nekʼãrẽ biʼiabʉ parãna ʉ̃rʉ. Nama iyira bedʼeabʉ bajã ʉ̃rʉ. Bajãnera bʉ bisiata.
9 Bisiara audre yi zroma planetara iyi audubʉira. Bisiara mejãcha jʉ̃wʉrʉabʉ, mamina dayirã drʉaidu zebʉrʉdera wiña jʉ̃wʉrʉabʉ. Maʉ̃ba kʼarebabʉ dayirã zokʼaipanaita.
10 Salmistaba bisia ʉ̃rʉ bedʼeaita naʉ̃ yizata zokʼasi, jarasi bisiara yumakẽrã mejãcha zarea barabʉ kĩrãkʼabʉta, naʉ̃ yumakẽrãra jĩrʉne wẽbabʉ naʉ̃ drʉa jõma mapurrayeda diapedaʉda kiuyeda. Bisia diapeda ʉ̃tʉ zebʉrʉdera naʉ̃ yumakẽrã juwa jida wãita kĩrãwãreã yobʉ kĩrãkʼabʉ akʉza bisia baebʉrʉdera naʉ̃ yumakẽrã iyi de karpade eda kʼãĩ wãbari kĩrãkʼabʉ. Davidbara kʼawuabasi iyi kʉrãzabʉde bisiaba sãwũã jʉ̃wʉrʉabibʉta (Génesis 31:40).
g95 8/11 7 parr. 2
Jeowaba kʼãrẽ nebia odara ẽbẽrarãbara akʉda ẽ
Dayirãba biʼia akʉpanʉbʉrʉ naʉ̃ drʉade kʼãrẽbʉta, audre ũdu kʼawuadayi dayirã parãnata. Ewari aba Jesuba iyi kʼaidubemara jarasi neponora Galilea audubʉta biʼia akʉdamarẽã, iya jarasi: «Krĩchaudua nepono meã nʉmeta sãwũã wari bʼeta. Trajadʼa ẽã, miã wua kʼasudʼa ẽã. Mʉã marãã jaraya, rey Salomón kĩrãwãrẽã zho bʼasimina kĩrãwãrẽã zho bʼa ẽbasia nepono abʼaʉdʼebema kĩrãkʼabidʼa». (Mateo 6:28, 29.) Naʉ̃ra nepono ʉ̃rʉ krĩchaiba dayirã kʼawuabibʉ Jeowaba wãrĩnu krĩchabʉta ẽbẽrarã ʉ̃rʉbida.
Jʉrʉda nekʼãrẽ biʼiabʉta Daizezedebemata
Bʉa idubʉseabʉ «nãã kayirua jʉ̃badara»
Wãrĩnu ĩjãra Jeowaba dayirã omarẽã zokʼabʉra audre yibiata. Ẽbẽra Jeowaba zokʼabʉ obʉra sobiabʉ akʉza iyikʉza wawia ũdubibʉ. Maʉ̃ba Jeowaba zokʼabʉra yibia dayirãita (Sal. 19:7-11). Mamina yi ẽbẽra Jeowaba zokʼabʉ oẽãra zʉbʉriabʉ nemitiata obʉ baera. Akʉdaya kʼãrẽta jarasita Elieba Daizeze Bedʼea ũrĩ ẽ ʉ̃rʉ. Yibarirãra Jeowa ʉ̃rʉ Kʼawuabipanʉrãbasi, maʉ̃ba wiñayiruiduba Daizeze ʉ̃rʉ kʼawuabasi iyara. Maʉ̃ta iyi kʉ̃ra bachuidade, nemitiata ojʉ̃drʉsi, nezrʉga jʉ̃drʉsi, chirua kayirua bʉratʉmata do jʉ̃drʉsi akʉza wẽrãrasida erkʼãĩbasi akʉza mejãcha kĩrʉmiabasi adewara badumae yõ jʉ̃drʉsi. Iya jarabʉ: «Mʉ̃ yibariraba mʉ̃a oẽ marẽã jaradiadara, mʉ̃a jõma osi». Mamina Eliebara kĩrãdua ẽ basi yibariraba jaradiadara. Jẽda Daizeze ʉ̃rʉ kʼawuasi, zarea osi iya nemitia obada idubʉita akʉza buru kʼoesi poaga 2000de. ¿Kʼãrẽne kʼarebasi Daizezeba zokʼabʉ obʉbara? Aduʼa bʼaita akʉza Daizeze kʼawa bʼaita. Naʉ̃ba jaradiabʉ ẽbẽraba Jeowaba zokʼabʉta oẽ bʉrʉ zʉbʉria ũduita, mamina mawũãsidu Jeowaba ãyira kʼarebakĩrãbʉ awuara bamarẽã.
25-31 MARZOBAYEDA
BEDʼEA BIA DAIZEZE BEDʼEADE ŨDUDATA | SALMO 22
Jesu beida sãwũã berabari ʉ̃rʉ jaradapeadata
w11 15/8 15 parr. 16
Ũdusida dayirã ẽdrʉbibarita
16 Dayirã ẽdrʉbibarira Daizezeba doba amaebʉrʉ kĩrãkʼabasi (akʉra Salmo 22:1). Propesiarane jarada kĩrãkʼa, 3 kewarare Jesuba nemi jĩgʉa mawũãsi: «Eloi, Eloi, ¿lama sabactani?», ¿Kʼãrẽta jarakĩrãbasi naʉ̃ bedʼeabara? Naʉ̃ra bedʼeabara jarakĩrãbasi naʉ̃ta: «Mʉ Zhibari, mʉ Zhibari, ¿mʉrã kʼãrẽã kenabʼaribʉrʉ?» (Mar. 15:34). Jesuba naʉ̃ bedʼea jarasidera ũdubikĩrã ba ẽ basi iyara Daizeze ʉ̃rʉra wua ĩjã ẽ basita. Awuarabʉrʉ Jeowabara iduaribisi Jesura iyi nejʉraraba pẽwãnamarẽã, mawũã ũdubimarẽã iyira waidide kʼẽrẽpabʉta. Jesuba maʉ̃ bedʼea jaraside aripe berabarisi Salmo 22:1ba jarabʉta.
w11 15/8 15 parr. 13
Ũdusida dayirã ẽdrʉbibarita
13 Davidba jarasi dayirã ẽdrʉbibari ʉ̃rʉra imitia bedʼeadaibasita (akʉra Salmo 22:7, 8). Jesu bakurude ajirabʉeda iyi ʉ̃rʉ imitia bedʼeasida. Mateoba jarabʉ: «Iyi kʼawa berabaripanʉrãra iyi ʉ̃rʉ i jʉra bedʼeapanasi akʉza ãyi burura jĩãwepanasi adewara jarasida: ‹Bʉa jarasi Daizeze templora tega bʉeibasita akʉza ewari ũbeade jẽda ara parãibasita. Bʉta wãrĩnu Daizeze warrabʉrʉ u baera kaʉ̃ bakurudebara›. Abarika saserdote nokʼorasida, eskribarasida akʉza zõrãrãsida iyi kʼarea ipida jʉ̃drʉsida akʉza jarasida: ‹Wuabemarãra ẽdrʉbisia iyara, mamina iyikʉzara ẽdrʉbe ẽ. Iyira Isarel nokʼo, u baera kaʉ̃ bakurudeba mawũãtrʉ ĩjãnañi iyi ʉ̃rʉ. Daizeze ʉ̃rʉ ĩjãsi iyara, Daizezeba kãgabʉbʉrʉ kʼarebayi, iya jarasi baera «Mʉ̃ra Daizeze warra»›» (Mat. 27:39-43). Jesu mawũã zʉbʉria berabarisimina, kʼẽrẽpabʉta ũdubisi, dayirãbida iyide kĩrãkʼa oseapanʉ.
w11 15/8 15 parr. 14
Ũdusida dayirã ẽdrʉbibarita
14 Dayirã ẽdrʉbibari ʉ̃rʉ suerte odaibasi. Salmistaba bʉside jarasi Jesu wua ʉ̃rʉ suerte odaibasita (Sal. 22:18). Naʉ̃ta aripe berabarisi gorogorora Romanebemaraba Jesu ʉ̃tʉ bakurude birachida tẽã, ãyirai suerte osidade kʼawuaita kʼaiba jidaita Jesu wuata. (Mat. 27:35; akʉra Juan 19:23, 24.)
Jʉrʉda nekʼãrẽ biʼiabʉta Daizezedebemata
w06 1/11 29 parr. 7
Dayirã ãba yi jʉrebʉra biʼia akʉibara
7 Dayirãba nekʼãrẽ obʉdeba ũdubiseapanʉ wawiapanʉta ãba yi jʉrepanʉra. Bari jaraita dayirãra ãba yi jʉrebarima ãza jʉ̃ẽ ẽ baibara, mawũã ãba yi jʉre jʉ̃drʉbʉrʉde ãbaʉba trãita. Dayirã trãbʉrʉdera kʼẽrẽpa trãibara. Pablobara bedʼea Salmo 22de bʉta zokʼasi Jesu ʉ̃rʉ naʉ̃ta jaraita: «Mʉ̃a mebẽrã deidu bʉ trʉ̃ta jaraya akʉza kongregasione eda bʉ ʉ̃rʉ ibia bedʼeaya» (Hebreos 2:12). Mebẽã yi nãã bedʼeabarita bedʼea jʉ̃drʉi nãã, dayirãra jewedabaibara akʉza trã jʉ̃drʉbʉrʉdera bia krĩchaibara maʉ̃ trãbiba kʼãrẽ jarabʉ ʉ̃rʉ. Dayirã trãbʉrʉdera Salmista sentida kĩrãkʼa sentibara: «Ibia bedʼeaidua Jeowa ʉ̃rʉ, ibia bedʼeayi Jeowa ʉ̃rʉ mʉ soiduba, ẽberãra nebia obʉbawara akʉza jõmaʉ̃ra deidu» (Salmo 111:1).
w03 1/9 20 parr. 1
Jeowa ʉ̃rʉ ibia bedʼeara kongregasione bʉde
Nawedaedaʉba akʉza idibasidubʉ mebẽrãba sãwũã Jeowa ʉ̃rʉ ibia bedʼeabiseabʉta kongregasionebʉde. Maʉ̃ra oseapanʉ kongregasione bedʼea widibʉta panʉbʉde. Bʉa mawũã obʉdeba mebẽrãta mejãcha kʼarebaseabʉ. Bʉa komentario diabʉrʉde jara ũrĩbibʉbʉrʉ bedʼea zromara sãwũã awuanta zebʉrʉta, maʉ̃ba kʼarebaseabʉ mebẽrãba audre okĩrãnamarẽã Daizezeba kãgabʉta. Adewara bʉa Daizeze Bedʼeaba jarabʉta jara ũrĩbibʉbʉrʉ, mawũã ẽ bʉrʉ bʉa naweda estudiadata jara ũrĩbibʉbʉrʉ, naʉ̃ba kʼarebayi mebẽrãrabida abarika okĩrãnamarẽã bʉre kĩrãkʼa.
1-7 ABRILBAYEDA
BEDʼEA BIA DAIZEZE BEDʼEADE ŨDUDATA | SALMOS 23-25
«Jeowara obeja akʉbari»
w11 1/5 31 parr. 3
«Jeowara obeja akʉbari»
Jeowabara iyi pʉwʉrʉʼa jaradiabʉ. Obejarãra ãyi akʉbari neẽãra o aduaseabʉ. Abarika dayirãbida nesidapanʉ kʼarebata mawũã o biade wãita (Jeremías 10:23). Davidba jara ũrĩbisi Jeowabara iyi pʉwʉrʉra chirua pãwãra tabʉidu edebʉ kĩrãkʼabʉta akʉza enaʉ̃ita edebʉ kĩrãkʼabʉ do kʼawa (bersíkulora 2, 3). Maʉ̃ba ũdubibʉ dayirãbara ĩjãseapanʉta Jeowa ʉ̃rʉ. Daizeze jaure zarea yi edebibʉbʉrʉ akʉza Daizeze Bedʼeaba jarabʉde obʉbʉrʉ, mawũãra aduʼapanañi akʉza biapanañi.
w11 1/5 31 parr. 4
«Jeowara obeja akʉbari»
Jeowabara akʉbʉ iyi pʉwʉrʉra. Obejaraba ãyi akʉbarita neẽbʉrʉ, ãyira pera sentibʉ, doba sentipanʉ. Jeowabara jarabʉ dayirãra pera ẽ baibarata, mia bedʼea zroma ũdubʉrʉdebida pera ẽ baibara (bersikulo 4). Jeowabara biʼia akʉbʉ iyi odepanʉrãra akʉza ewari jõmaʉ̃nẽ kʼarebakĩrãbʉ ãyita. Jeowaba iyi odepanʉra buru biata diabʉ akʉza zareata diabʉ ãya nesidabʉde. Mawũã bedʼea zromata awuantamarẽã (Filipenses 4:13; Santiago 1:2-5).
w11 1/5 31 parr. 5
«Jeowara obeja akʉbari»
Jeowabara iyi obejara yiko diabʉ. Obejarabara ãyi akʉbarira nesida mawũã yiko erbaita. Abarika dayirãsida Jeowa kʼawa bʼaira nesida iyi kʼarebata (Mateo 5:3). Jipade yibia Jeowabara diakĩrãne diabʉ baera nekʼãrẽ dayirãba nesidabʉta (bersikulo 5). Daizeze Bedʼeata akʉza kartara Daizeze Bedʼeadebemara jipade yibia, naʉ̃ba kʼarebabʉ baera audre kʼawuaita Jeowaba kʼãrẽta kãgabʉta dayirãita.
Jʉrʉda nekʼãrẽ biʼiabʉta Daizezedebemata
w11 15/2 24 parr. 1-3
Soidʉba kãgara kʼẽrẽpa bʼaita
IYI BEDʼEADEBA akʉza iyi jaure zareadeba, Jeowaba jaradiabʉ saʉ̃ ota jipabʉta (Sal. 23:3). Mamina dayirãra kayirua omia baera, o jãpe wãpanʉ. Kʼẽrẽpa bʼaira zarea oibara. ¿Kʼãrẽba kʼarebaseabʉ mawũã kʼẽrẽpa bʼaita? Jesude kĩrãkʼa nekʼãrẽ aripe okĩrãbaibara (akʉra Salmo 45:7).
2 ¿Saʉ̃ o jipa bʼaidebemara? Naʉ̃ ode Jeowaba jaradiabʉ dayirãba kʼãrẽta oibarata. Bedʼea kʼẽrẽpa bʼaira griego bedʼeadera jarakĩrãbʉ ewari jõmaʉ̃nẽ nekʼãrẽ aripe oita akʉza oita Jeowaba zokʼabʉ kĩrãkʼa. Kʼẽrẽpa bʼaira Jeowadeba zebʉ baera dayirãbara iyi kʼarebata jʉrʉibara mawũã iya jaradiamarẽã kʼãrẽ ode wãita (Jer. 50:7).
3 Dayirãta soiduba zarea opanʉbʉrʉ Jeowaba kãgabʉta aripe oita mawũãra iyira sobiabayi (Deu. 32:4). Dayirãba maʉ̃ra oseapanʉ zarea opanʉne Jeowa ʉ̃rʉ kʼawuaita iyi bedʼeadeba. Jeowa ʉ̃rʉ audre kʼawuabʉbʉrʉ audre kãga wãnañi iya zokʼabʉta (Sant. 4:8). Dayirãba nekʼãrẽ jidai nãã, biʼia krĩchaibara Daizeze Bedʼeaba kʼãrẽta jarabʉta maʉ̃ ʉ̃rʉ.
8-14 ABRILBAYEDA
BEDʼEA BIA DAIZEZE BEDʼEADE ŨDUDATA | SALMOS 26-28
¿Kʼãrẽta osi Davidbara Jeowaʉ̃me audre kʼẽrẽpa bʼaita?
w04 1/12 14 parr. 8, 9
O jipabʉde wãra
8 Davidba Jeowaʼa widisi iyi sota akʉmarẽã akʉza iyi kotruarata (Salmo 26:2). Dayirã kotruara dayirã kakuadera eidubʉ. Daizeze Bedʼeaba kotrua jarabʉrʉdera zokʼabʉ jaraita dayirã sãwũã krĩchabʉta akʉza dayirã sãwũã sentibʉta. Sobara jarakĩrãbʉ dayirã sãwũãbʉta, dayirãba nekʼãrẽ obʉ kʼãrẽa mawũã obʉta, sãwũã sentibʉta akʉza sãwũã krĩchabʉta. Davidba Jeowaʼa widiside iyita biʼia akʉmarẽã, jarakĩrãbasi akʉmarẽã iyi sãwũã krĩchabʉta akʉza sãwũã sentibʉta.
9 Davidba Jeowaʼa widisi iyi sota akʉza iyi kotruarata neneẽã babimarẽã. ¿Jeowaba sãwũã obʉ maʉ̃ra? Davidba jarasi Jeowabara iyaʼa ũrãgʼa diabasita (Salmo 16:7). Maʉ̃ba jarakĩrãbʉ Davidbara iduaribisita Jeowaba ũrãgʼa diabʉba iyi sãwũã krĩchabʉta akʉza iyi sãwũã sentibʉta awuara babimarẽã. Dayirãsida abarika berabariseabʉ iduaribidara Jeowaba iyi bedʼeadeba akʉza iyi organizasioneba ũrãgʼa diabʉta, dayirã soidu jʉ̃ẽmarẽã. Dayirãta ewariza Jeowaʼa yiwidʼipanʉbʉrʉ akʉza iyaʼa widipanʉbʉrʉ kʼarebamarẽã dayirãra neneẽã baita, naʉ̃ba kʼarebayi o jipabʉde bʼaita.
w04 1/12 15 parr. 12, 13
O jipabʉde wãra
12 Davidba jarasi kʼãrẽba kʼarebasita kʼẽrẽpa biata, iya jarasi: «Mʉ̃ra jeweda ẽ ẽbẽra wãrĩnu bedʼeabʉ ẽ ʉ̃mera akʉza wãrĩnu iyi sãwũãbʉta ũdubi ẽãʉ̃mera. Jʉra ẽbẽra kayiruarabawara aba bʼaira akʉza yi kayirua opanʉrabawara ãbabʉ ẽ» (Salmo 26:4, 5). Davidʼra bari jeweda ẽ basi ẽ ẽbẽra kayiruarabawarara, awuarabʉrʉ iyara jʉrabasi maʉ̃rabawara ãba bʼaira.
13 ¿Dayirãbara sãwũã Davide kĩrãkʼa opanʉ? Dayirãra ẽbẽra kayiruarabawara ãbapanʉ ẽ telebisorde, mawũã ẽ bʉrʉ internetʼne nekʼãrẽ kayirua akʉ ẽãne. Naʉ̃rãra ẽbẽra kayiruara kĩrãkʼabʉ baera. Akʉza dayirãra ãbapanʉ ẽ jari ẽbẽrarã ẽbẽra bia kĩkãkʼa panʉrabawarara, ãyira dayirã neũdukʼawua bakĩrãbʉ baera dayirã zʉbʉria oita. Dayirãra ãba bakĩrãbʉ ẽ ẽbẽrarã Daizeze odepanʉ ẽãrabawarara, maʉ̃rane edabʉ apostatarata. Ãyara kãgabʉ dayirãra Jeowadeba jĩga bamarẽã. Dayirãra jʉra kʼawuapanaibara dayirã kongregasionera bʉ baera ʉ̃kʉrʉ ẽbẽrarã kayirua opanʉrata. Jaysonba erbasi neũdukʼawua mawũã chuta. Iya jarabʉ: «Ãyidebema abaʉba mʉ̃aʼa jarasi kʼãrẽ ẽ dayirãba atia kʼãrẽ obʉrʉra, ẽjũã bia zebʉrʉdera dayirãra yi beima bʼai baera. Maʉ̃ba kʼawua ẽ bayi kʼãrẽ nebiata aduasira». Jaysonʼra wua ãba ba ẽ basi maʉ̃ra ẽbẽrarãbawarara. Apostol Pabloba naʉ̃ta jarasi: «Idu yi kʉ̃rʉ̃gabiraidua. Ẽbẽra kayiruabara edebʉ dayirã nebia aduabita». (1 Corintios 15:33.) Jipade yibia ẽbẽra kayiruabawara ãba ba ẽ baira.
w04 1/12 16 parr. 17, 18
O jipabʉde wãra
17 Jeowa pʉwʉrʉ Israelbara iyaʼa yiwidʼipanasi tabernakulode. Mama sakripisiota opanasi iyaʼa. Davidba jarasi iyara mejãcha kãgabasita Jeowadera (Salmo 26:8).
18 ¿Bʉra ãba yi jʉrebarima wãkĩrãka? Ãba yi jʉrebari de bʉchumaebemara yibia. Mama bʉa Jeowa ʉ̃rʉ kʼawuaseabʉ baera. Adewara poagaza opanʉ asamblearata, nama kĩrãbepanʉ Jeowaba dayirã kʼãrẽta omarẽã zokʼabʉta. Dayirãba Jeowaba nekʼãrẽ omarẽã zokʼabʉta kãgabʉbʉrʉ, mawũãra ãba yi jʉrebarima wãkĩrãpanañi akʉza mama jarabʉta kĩrãkita ũrĩnañi (Salmo 119:167). Kʼãrẽ yibia dayirã mebẽrãbawara ãba bʼaira, ãyara dayirãta kãgabʉ baera akʉza kʼarebabʉ baera Jeowaʉ̃me kʼẽrẽpa bʼaita. (Hebreos 10:24, 25.)
Jʉrʉda nekʼãrẽ biʼiabʉta Daizezedebemata
w06 15/7 28 parr. 15
Jeowabara kʼarebabʉ yi sopʉabʉra
15 Davidba naʉ̃ta jarasi: «Mʉ̃ yibariraba amaeimina, Jeowaba mʉ̃ra akʉyi» (Salmo 27:10). Kʼãrẽaba yibia kʼawuaita Jeowaba dayirã kʼãrẽaba kãgabʉra audre yi zromata yibariraba yi wũãwũãra kãgabʉira. Bʉ yibariraba amaebʉrʉdera pʉ, mamina Jeowabara bʉra ewari jõmaʉ̃nẽ akʉyi (Romanos 8:38, 39). Kĩrãbera Jeowabara iyima webʉta iya kãgaratrʉ (Juan 3:16; 6:44). Kʼãrẽ ẽ ẽbẽrarãba bʉ sãwũã edasidara, Jeowabara bʉra kãga.
15-21 ABRILBAYEDA
BEDʼEA BIA DAIZEZE BEDʼEADE ŨDUDATA | SALMOS 29-31
Jeowabara iya kãgata ũdubibʉ dayirã kʼẽãbʉdeba
it-2 872 parr. 8
Kĩrã
Bedʼea akʉ ẽãra jarakĩrãbʉ kĩrã bio, kʼãrẽ sãwũã berabarinʉmʉne. Maʉ̃ba jarakĩrãbʉ Jeowaba kʼareba ẽãta akʉza bia akʉ ẽãta. Maʉ̃ta berabariseabʉ ẽbẽraba Jeowa bedʼea ũrĩ ẽãne, mawũã ẽ bʉrʉ bioʉba ũrĩkĩrã ẽãne. Bari jaraita israelitaraba Jeowa bedʼea ũrĩna ẽ baside. (Job 34:29; Sl 30:5-8; Isa 54:8; 59:2.) Bedʼea akʉ ẽãba jarakĩrãbʉ akʉza, Jeowaba jʉ̃ãbʉta panʉita iya kãga ewaride. (Sl 13:1-3.) Davidba Jeowaʼa naʉ̃ta widisi: «Akʉrãra mʉ̃ nemitiata», iya maʉ̃neba jarakĩrãbasi Daizezeba iya kayirua odata kĩrãduamarẽã. (Sl 51:9; naʉ̃ testoʉ̃me akʉra Sl 10:11.)
w07 1/3 19 parr. 1
Sobiapanʉ Jeowata jʉ̃ãpanʉ baera
Jeowaba dayirã sãwũã kʼẽãbʉra neta pãwãrai kĩrãkʼabʉ. Netara pãwãbʉrʉdera maʉ̃ kuaramarẽãra ewari mejãcha jʉ̃ãibara. Abarika dayirãʼa Jeowaba kʼẽãbʉrʉdera, ewarita nesidapanʉ dayirãba nekʼãrẽ aña obʉta ara oita akʉza mawũã Jeowaba kãgabʉde oita. Daizeze Bedʼeaba naʉ̃ta jarabʉ Jeowaba dayirã sãwũã kʼẽãbʉ ʉ̃rʉ: «Mamina maʉ̃ tẽãra ũdubibʉ ne aripe oidebemata maʉ̃neba jaradiabʉrʉrãra» (Hebreos 12:11). Bari jaraita dayirãba nekʼãrẽ aña oda kʼarea kongregasione pribilegio aduabʉrʉde, Jeowa ʉ̃rʉ ĩjãpanʉta ũdubipanʉbʉrʉ, mawũãra mapaeda ẽ bayi. Maʉ̃ mawũã berabaribʉrʉdera Davidba jaradaba so zarea diaseabʉ. Iya jarasi Jeowaba dayirã kʼẽãbʉrʉdera maʉ̃ra atia berabaridogota, mamina iya dayirã kãga ũdubibʉra maʉ̃ra ewari jõmaʉ̃nẽbayi (Salmo 30:5). Dayirãba Jeowata jʉ̃ãpanʉbʉrʉ akʉza aripe opanʉbʉrʉ iya Daizeze Bedʼeadeba akʉza iyi organizasioneba jarabʉta, mawũãra sobiapanañi.
¿Kʼãrẽta jarakĩrãkʉ soiduba jẽda krĩchaita?
18 ¿Kʼãrẽta oibara wua Jeowa ʉ̃rʉ Kʼawuabari ẽãba ũdubita iyira wãrĩnu jẽda krĩchabʉta? Idubʉ ẽ baibara ãba yi jʉrebʉta, Daizeze Bedʼea akʉibara iyidobaʉba akʉza badua yiwidʼibaibara zõrãrãba ũrãgʼapanʉne. Akʉza zarea oibara nekayiruadeba jĩgara bʼaita akʉza jẽda oẽ baita. Iyita zarea ora jẽda Jeowa neũdukʼawua bʼaita biʼia kʼawuabayi Jeowaba kĩrãduaita iyi nemitiara adewara zõrãrãbara kʼarebaita jẽda kongregasionʼena zeita. Zõrãrãbara kʼawuapanʉ baera jõma abarikabʉ ẽãta, jõma abarika berabaribʉ ẽãta, maʉ̃ kʼarea mejãcha kĩrʉ kʼẽãna ẽ.
Jʉrʉda nekʼãrẽ biʼiabʉta Daizezedebemata
w06 15/5 19 parr. 13
Bedʼea audre yibiata Salmosdebemata
31:23. ¿Jeowaba kʼãrẽta oi ẽbẽra ʉ̃tabʉta krĩchabʉrãra? Jeowabara makenañi. Ẽbẽra biaba kayiruata obʉbʉrʉ mamina iya naʉ̃ta kriña õẽbʉrʉ, Jeowabara iyira kʼẽãñi maʉ̃ kʼarea. Ẽbera ʉ̃ta krĩchabʉba iya kayirua odata ara oẽ bʉrʉ Jeowabara iyira beayi (Proverbios 11:31; 1 Pedro 4:18).
22-28 ABRILBAYEDA
BEDʼEA BIA DAIZEZE BEDʼEADE ŨDUDATA | SALMOS 32, 33
¿Kayirua zroma obʉrʉdera kʼãrẽa jaraibara?
w93 15/3 9 parr. 7
Jeowaba so zʉbʉria akʉiba kʼarebabʉ mejãcha krĩcha zroma oẽ baita
7 Dayirãba kayirua zroma obʉrʉdera, zarea baseabʉ jaraita dayirãba kʼãrẽ kayirua odara. Maʉ̃ mawũãbʉrʉdera ¿kʼãrẽta berabariseabʉ? Davidba Salmo 32de jarasi: «Mʉ̃ chupeabaside nemitia oda kʼarea, mʉ̃ bʉwʉrʉra bagʉsi maʉ̃ne mejãcha krĩchabʉba. Ewari jõmaʉ̃nẽ bʉ juwa zʉgʉabʉta mʉ̃ ʉ̃rʉ basi baera. Mʉ̃ra zarea neẽã totosi, bisia mejãchabʉba bania põasã obari kĩrãkʼa» (bersikulo 3, 4). Iya kʼãrẽ kayirua odata jara ẽ basi baera, Davidʼra maʉ̃ba mapaesi. Aukʼara krĩcha zroma obʉba, Davidʼra zarea neẽãsi, maʉ̃ kʼarea iya jarasi iyira bakuru zroma bisia jʉ̃wʉrʉaba bagʉda kĩrãkʼabasita. Davidʼra iya nãã bada kĩrãkʼa sobia ba ẽ basi. Dayirãta maʉ̃ kĩrãkʼa berabarira, ¿kʼãrẽta odaibara?
cl 262 parr. 8
Daizezeba kĩrãduaya awabʉ dayirã nemitiara
8 Davidba jẽda krĩchabasi iya nemitia oda ʉ̃rʉ, mõbe naʉ̃ta jarasi: «Kõbebʉrʉ mʉ̃a bʉaʼa jarasi mʉ̃a nekayirua odara, mʉ̃ara mera ẽ basi [ . . . ]. Bʉara kĩrãduasi mʉ̃ nekayiruara akʉza mʉ̃ nemitiasida» (Salmo 32:5). Bedʼea kĩrãduaibara jarakĩrãbʉ jiraedaita mawũã ẽ bʉrʉ edeita. Naʉ̃ testode jarakĩrãbʉ David nemitiara Jeowaba jiraeda kʼãrãpe edesi kĩrãkʼa. Naʉ̃ba Davidʼra aduʼa babisibaibara (Salmo 32:3). Dayirãbida ĩjãseapanʉ dayirã nemitiara Jeowaba edeita Jesuta dayirãbari beisi baera (Mateo 20:28).
w01 1/6 30 parr. 1
Dayirãba nemitia oda jarabʉde, naʉ̃ba neneẽã babibʉ
Davidba iya nekayirua oda jõma jarada tẽãra, maʉ̃ba iyira wuara krĩcha oẽ basi maʉ̃ kʼareara. Iya Salmo bʉside ũdubisi iyira aduʼabʉta, adewara ũdubisi kʼẽrẽpabʉta iyira ewari jõmaʉ̃nẽ. Salmo 32:1ne iya jarasi: «Sobiabʉ yi ẽbẽra iyi nemitia kĩrãduabʉdadera». Dayi nemitia mejãchamina sobia baseabʉ daya nemitia odata jõma jarara. Ĩjãibara daya nekayirua odara Davidba oda kĩrãkʼa (2 Samuel 12:13). Iya jara ẽ basi iya nemitia odara awuruba mawũã obisita. Yi bersikulo 5de iya jarasi: «Kõbebʉrʉ mʉ̃a bʉaʼa jarasi mʉ̃a nekayirua odara, mʉ̃ara mera ẽ basi. Mʉ̃a jarasi: ‹Mʉ̃a nemitia odara Jeowaʼa jarayi›. Bʉara kĩrãduasi mʉ̃ nekayiruara akʉza mʉ̃ nemitiasida». Dayirãba kayirua odata jarabʉbʉrʉ, naʉ̃ba aduʼa babiyi akʉza maʉ̃ kʼarea nesida ẽ bayi krĩcha zroma oita dayirãba oda kʼarea.
Jʉrʉda nekʼãrẽ biʼiabʉta Daizezedebemata
¿Kʼãrẽta jarakĩrãkʉ dayirãitara Jeowaba kãga jõka erbʉra?
Daizeze kãga jõkabara kʼarebabʉ jĩgara ba ẽ baita Daizezedeba. David Jeowa yiwidʼiside iya jarasi: «Bʉra mʉ̃ mĩrʉbari, bedʼea zromaneba mʉ̃ra biʼia akʉbʉ, nemitiadeba ẽdrʉbi kʼãrãmape mʉ̃ta mejãcha sobiabiyi». Akʉza jarasi: «Yi ẽbẽra Jeowade ĩjãbʉrãra Jeowa kãga jõkaba purrebaribʉ kĩrãkʼa bʉ» (Sal. 32:7, 10). Nããrãra murobara kʼarebabasi neida berabari ẽ baita nemitiadeba yi maʉ̃ pʉwʉrʉde panʉrãra. Kãga jõka ũdubibʉra maʉ̃ muro kĩrãkʼabʉ, dayirã jĩgara ba ẽ baita Jeowadeba. Adewara Jeowabara iyima webibʉ iyi kãga jõkadeba (Jer. 31:3).
29 ABRILDEBA-5 MAYOEDA
BEDʼEA BIA DAIZEZE BEDʼEADE ŨDUDATA | SALMOS 34, 35
«Ewari jõmaʉ̃nẽ Jeowa ʉ̃rʉ ibia bedʼeara»
w07 1/3 22 parr. 11
Jeowa trʉ̃ta yi zroma babidadrʉ
11 «Ibia bedʼeabayi Jeowa ʉ̃rʉ ewari jõmaʉ̃nẽ; mʉ̃ ibara ewari jõmaʉ̃nẽ iyi ʉ̃rʉ ibia jarabayi». (Salmo 34:1.) David mĩrʉ wãsidera, ewari neẽbasi nekʼãrẽ bia mejãcha erbaira. Mawũãsidu iyitara audre yibiabasi Jeowa ʉ̃rʉ ibia bedʼeabita, kʼãrẽ yiza bia dayirãita. Dayirãba bedʼea zroma ũdupanʉmina, kolegiodepanʉne, mebẽrãbawara ãbabʉde, Daizeze Bedʼea jaradia wãbʉrʉde, dayirãbara ewari jõmaʉ̃nẽ Jeowa ʉ̃rʉ ibia bedʼeabidaibara. Dayirãba nekʼãrẽ mejãcha erbʉ Jeowa ʉ̃rʉ ibia bedʼeaira. Bari jaraita Jeowaba nekʼãrẽ parãna ʉ̃rʉ, iya iyi organizasioneba kʼãrẽ ozebʉrʉ ʉ̃rʉ, adewara dayirãra kayirua omiamina Jeowabara idi ewade dayirãta zokʼabʉ iya kãgabʉ omarẽã. Daizezeba nekʼãrẽ sãwũã obʉra jipa awuarabʉ ẽbẽrarãba sãwũã obʉira. Dayirãbara Davidʼde kĩrãkʼa kʼãwũã jaraseapanʉ: «Mejãcha bʉ daizezerãra, mamina kʼaita bʉ kĩrãkʼara neẽ Jeowa, neẽ bʉa parãna kĩrãkʼara». (Salmo 86:8.)
w07 1/3 22 parr. 13
Jeowa trʉ̃ta yi zroma babidadrʉ
13 Davidʼra soidʉba bedʼeabasi Jeowa ʉ̃rʉ. (Salmo 34:2.) Davidʼra aukʼara iyi ʉ̃rʉ ibia bedʼea ẽ basi. Bari jaraita, iyara jara ẽ basi sãwũã biʼia sewasita nokʼo Gadʼdebemata, awuarabʉrʉ jarasi Jeowaba sãwũã kʼarebasita iyita (Proverbios 21:1). Davidba Jeowa ʉ̃rʉ ibia bedʼeabasi baera, ẽbẽra biarabara Jeowata orrakĩrãpanasi. Jesubida abarika osi, Daizeze trʉ̃ ʉ̃rʉ ibia bedʼeabasi baera ẽbẽrarã eda krĩchapanʉrabara Jeowata orrakĩrãpanasi. Idi ewade ẽbẽrarã naʉ̃ drʉa jõmaʉ̃nẽbemata Jeowa organizasionʼena zebʉ akʉza ãyi burura Jesu (Colosenses 1:18). Daizeze odepanʉraba Daizeze ʉ̃rʉ ibia bedʼeabʉrʉde akʉza Daizeze Bedʼeaba jarabʉta jaradiabʉrʉdera, ẽbẽra biara sota tõbaribʉ. Daizeze jaure zareaba kʼarebabʉ maʉ̃ bedʼeata biʼia ũrĩmarẽã (Juan 6:44; Hechos 16:14).
w07 1/3 23 parr. 15
Jeowa trʉ̃ta yi zroma babidadrʉ
15 «Mʉ̃a Jeowa widisi akʉza iya panʉsi. Iyara mʉ̃ perabi jõma ãĩ bʉesi». (Salmo 34:4.) Naʉ̃ kʼãwũã berabaridara Davidʼitara jipa yibiabasi, maʉ̃ kʼarea iya jarabʉ Jeowaba iyira ẽdrʉbisita bedʼea zromaneba (Salmo 34:6). Dayirã mebẽrãbawara ãbabʉdera nebʉraseabʉ ãyaʼa Jeowaba dayirã sãwũã kʼareba zebʉrʉta bedʼea zroma ũdubʉrʉde. Naʉ̃ba kʼarebabʉ mebẽrãba ĩjãbʉta audre zarea erbamarẽã. Abarika Davidba jaradaba iyi kʼaidupanʉra so zarea diada kĩrãkʼa. David kʼaidubemarãra Daizezeta ũdupanʉ kĩrãkʼapanasi, maʉ̃ba ãyira perada ẽ basi (Sal 34:5). Nokʼo Saulba pẽwãnʉmasimina ãyira perada ẽ basi, ĩjãbasi baera ãyira Jeowaba kʼarebaita, maʉ̃ba ãyira sobiapanasi, maʉ̃ra ãyi kĩrãne ũdubasi. Idi ewade mebẽrã Daizeze odebʉ dããrabata akʉza yi ʉ̃rabʉrʉ jʉ̃drʉbʉrʉrabida Jeowa kʼarebata jʉrʉpanʉ. Akʉza ãya Jeowaba sãwũã kʼareba zebʉrʉta ũdubʉ baera, naʉ̃ba mejãcha sobiabibʉ akʉza audre kʼẽrẽpa bakĩrã babibʉ.
Jʉrʉda nekʼãrẽ biʼiabʉta Daizezedebemata
w11 15/8 pag. 14 parr. 9
Ũdusida dayirã ẽdrʉbibarita
Iyi ʉ̃rʉ sewa nebʉrʉta jaradaibasi. Nokʼo Davidba jarasi dayirã ẽdrʉbibari ʉ̃rʉ ẽbẽra kayiruaraba sewa nebʉrʉta jaradaibasita (Sal. 35:11). Maʉ̃ bedʼea aripe berabarisi. «sacerdoterã nokʼorãba nokʼorã wagʼaurãba jõmaʉ̃ba krĩcha jʉrʉsidʼa Jesú ʉ̃rʉ̃ zhãrã sewa nebʉrʉbidʼaita, aramaʉ̃ne chãbʼaridʼaita beadʼamarẽã» (Mat. 26:59). «Zhãrã bio Jesú ʉ̃rʉ̃ sewa nebʉrʉsidʼa, mawũãmina ãzhi bedʼeara abʼarika ẽbasia» (Mar. 14:56). Jesu nejʉrarãra iyira mejãcha kĩrʉpanasi baera, maʉ̃ kʼarea jʉrʉsida ʉ̃kʉrʉta sewa nebʉrʉ odamarẽã, mawũã Jesuta beadamarẽã.