Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2024 Watch Tower Bible and Tract Society of Pennsylvania
6-12 MAYOBAYEDA
BEDʼEA BIA DAIZEZE BEDʼEADE ŨDUDATA | SALMOS 36, 37
Ẽbẽra kayirua kʼarea kĩrʉrãra
w17.04 10 parr. 4
¿Kʼãrẽta neẽbai Daizeze Nokʼoba zokʼabʉrʉde?
4 ¿Ẽbẽra kayiruaraba obʉba sãwũã zʉbʉriabibʉ dayirãta? Apostol Pabloba jarasi naʉ̃ ewari jõbodoarera, ũdu wãnaibasita bedʼea zroma daya obe ẽãta. Adewara jarasi ẽbẽrarãra ewari za audre ẽbẽra kayiru bʼaibasita (2 Tim. 3:1-5, 13). Maʉ̃ bedʼeara idi ewadera aripe berabarinʉmʉ, mejãchaʉta zʉbʉriade berabaribari. Ʉ̃kʉrʉ ẽbẽrarãba pobʉ baera akʉza zʉbʉria obari baera. Mawũã ẽ bʉrʉ, ʉ̃kʉrʉbara zʉbʉria opanʉ yi kakua sãwũã bʉ kʼarea, yi paima baera, mawũã ẽ bʉrʉ yi torro baera. Adewara ʉ̃kʉrʉbara krĩchapanʉ ãya kayirua obʉra yibiata, maʉ̃ba mera ẽ. Akʉza ʉ̃kʉrʉbara wuabemara krĩchabikĩrãbʉ ãyara kʼarebakĩrãbʉta ẽbẽrarã, mamina wãrĩnu baera, ãyara zʉbʉria okĩrãbʉ. Dayirãta mawũã zʉbʉria oda ẽ mina wuabemara sãwũã zʉbʉria opanʉ ũdubʉba dayisida sopʉabibʉ. Dayirãba ũdubʉdade awuru ẽbẽrarãba wũãwũã zakerata, zõrãrãta, mawũã ẽ bʉrʉ ẽbẽrarã ãyikʉza kʼãrẽ obe ẽãbʉrata zʉbʉriabipanʉta, maʉ̃nera ¿sopʉa ẽka dayirãra? Bʉ ʉ̃kʉrʉ ẽbẽrarã jipade ẽbẽra kayiruata, maʉ̃rara nedʉwʉrʉ kĩrãkʼa panʉ, mawũã ẽ bʉrʉ angel kayiruara kĩrãkʼa (Sant. 3:15). Mamina Daizeze Bedʼeaba dayirãʼa nebiata jʉ̃ãbibʉ.
Dayi ʉ̃rʉ nekayiruara odata daya kĩrãduara, Jeowabara mawũãra nebiata diabʉ
10Dayita awuruʉ̃me kĩrʉ kiki kʼawuabʉrʉ dayikʉza zʉbʉriabʉ. Kĩrʉbira ne zʉgʉa kĩrãkʼabʉ, maʉ̃ kʼarea Jeowabara kãgabʉ maʉ̃ta idubʉdamarẽã (akʉra Efesios 4:31, 32). Mawũã sobia aduʼa panaita (Sal. 37:8). Dayirãta kĩrʉ kiki kʼawuabʉrʉ naʉ̃bara kayabiyi dayirã krĩchata akʉza dayirã kakuata (Prov. 14:30). Adewara dayita ẽbẽra abaʉ̃me kĩrʉ kiki kʼawuabʉrʉ naʉ̃bara zʉbʉriabi ẽ ababema ẽbẽrarã yi kayirua odara, naʉ̃ra beneno doi kĩrãkʼabʉ. Bʉa benenota dora ababema ẽbẽrarã kʼãrẽ berabari ẽ bayi, bʉtrʉ zʉbʉriayi. Maʉ̃ba dayirãba kĩrãduadara awuruba kayirua odata naʉ̃ra nebia kĩrãkʼabʉ dayirãita (Prov. 11:17). Maʉ̃ta odara aduʼa panañi akʉza Jeowaba zokʼabʉta opanañi.
w03 1/12 13 parr.20
Sobiara Jeowa kʼarea
20 Maʉ̃ ewaridera «ẽbẽra biarara panañi egorode» (Salmo 37:11a). ¿Kʼaira ẽbẽra biarara naʉ̃ testode «ẽbẽra bia» abʉra zebʉ bedʼea wuabemarai edabʉdeba? Mawũã, ẽbẽra biarabara jʉ̃apanʉ Jeowaba jõma aripe omarẽã ãyi zʉbʉriabʉdeba «ãyira ewari jõmaʉ̃nẽ jipa neneẽã panañi» (Salmo 37:11b.) Kʼãwũã wedaʉba ũdupanʉ nebiara, aduʼa panʉ baera Daizeze pʉwʉrʉde.
Jʉrʉda nekʼãrẽ biʼiabʉta Daizezedebemata
it-2 424 parr. 3
Katuma zroma
Teitea, ewari jõmaʉ̃nẽ, yi zroma. Katumara teiteabʉ akʉza ewari jõmaʉ̃nẽbʉ (Isa 54:10; Hab 3:6; naʉ̃ testoʉ̃me akʉra Sl 46:2.) Salmistaba bʉside Jeowaba aripe obʉra, Daizeze katuma kĩrãkʼabʉta, (Sl 36:6) jarakĩrã basibaibara Daizezeba aripe obʉra, kĩrã awuara oẽãta, mawũã ẽ bʉrʉ jarakĩrã basibaibara katuma ʉ̃tʉbʉ kĩrãkʼa, Daizezeba aripe obʉra ẽbẽrarãnaira audre bia obʉ. (Naʉ̃ testoʉ̃me akʉra Isa 55:8, 9.) Revelación 16:20 jarabʉ ũduda ẽ basi katumara. Naʉ̃ bedʼeaba kʼawuabibʉ naʉ̃ drʉade mejãcha yi zroma bʉsida ẽdrʉ ẽ baita Daizeze kĩrũbʉrʉdera. (Naʉ̃ testoʉ̃me akʉra Jer 4:23-26.)
13-19 MAYOBAYEDA
BEDʼEA BIA DAIZEZE BEDʼEADE ŨDUDATA | SALMOS 38, 39
Aukʼara krĩcha orãra bʉa oda kʼarea
w20.11 27 parr. 12, 13
Ewari jõmaʉ̃nẽ krĩchapanaibara nekʼãrẽ ʉ̃ra zei ʉ̃rʉ
12 (Akʉra 1 Juan 3:19, 20). Dayirã jõmaʉ̃ta ewari abaʉde nemitia oda kʼarea mejãcha krĩcha obari. Jeowa ʉ̃rʉ Kʼawuabibari bʼai nãã nemitia odaba, mawũã ẽ bʉrʉ buru kʼoeda tẽã kayirua oda kʼarea. Dayi mawũã krĩchaira kayirua ẽ (Rom. 3:23). Ewari jõmaʉ̃nẽ nebia okĩrãpanʉmina «jõmaʉ̃ta biode baebʉ» (Sant. 3:2; Rom. 7:21-23). Daya nemitia oda krĩchabʉrʉba so kayiruabibʉ, mamina maʉ̃ba kʼarebaseabʉ, ¿sãwũã? Kʼarebai baera daya nekʼãrẽ jõma aripe oita akʉza daya sãwũã audre bia oita daya nãã oda oẽ baita (Heb. 12:12, 13).
13 Edaʉde waidide krĩchabaseabʉ daya nemitia oda daya wua oẽmina akʉza Jeowa maʉ̃ kĩrãduasimina. Maʉ̃ ʉ̃rʉ aukʼara krĩchabʉba dayi zʉbʉriabiseabʉ. (Sal. 31:10; 38:3, 4). ¿Kʼãrẽa mawũã jarapanʉ? Akʉdaya mebẽã nebʉrata aba. Iya nemitia oda kʼarea sopʉabasi, maʉ̃ ʉ̃rʉ krĩchabʉ baera. Iya jarabʉ: «Mʉ̃a krĩchabasi zarea oẽbaita Jeowade audre oita, krĩchasi baera Jeowaba bia akʉ ẽãta». Dayirã bioʉta mawũã krĩchapanʉ baibara. Mamina biga ẽ bayi auʼkara krĩchaita daya nemitia odata. Dayirãta kʼãrẽta zeri ẽã krĩchara, mawũãra Diarura sobiayi Jeowaba mawũã akʉbʉ ẽ mina (Naʉ̃ testoʉ̃me akʉra 2 Corintios 2:5-7, 11).
w02 15/11 20 parr. 1, 2
¿Sãwũã bia zokʼaseabʉ dayirã ewarira Jeowaita?
DAYI bebʉra dããrabʉ ẽ. Davidba maʉ̃ ʉ̃rʉ krĩchasi maʉ̃ kʼarea iya jarasi Jeowaba kʼarebamarẽã iya jarabʉde bʼaita akʉza iyi ewari bia zokʼaita. Maʉ̃ kʼarea Jeowaba iyira nebiata diasi (Salmo 39:4, 5, 7).
Dayirã ewari bia zokʼakĩrãbʉ baera, maʉ̃ba nekʼãrẽ mejãcha obʉ ewaride. Maʉ̃ba mejãchade krĩcha obiseabʉ kʼawuabʉrʉ baera nekʼãrẽ mejãcha oibarata ewari wĩkade. Wãrĩnu baira dayirãra bakĩrãpanʉ David kĩrãkʼa, Jeowaba kãgabʉde bʼaita. Kʼawuapanʉ Jeowaba dayirãra akʉbʉta akʉza akʉbʉ dayirã aba abakaʉba kʼãrẽta obʉta. Job Daizeze ode kʼẽrẽpabadaba kʼawuasi Daizezebara iyiʉ̃me kʼẽrẽpabʉra ẽbẽrarã akʉbʉta akʉza kʼawuabʉta ãyi aba abakaʉba kʼãrẽ obʉta, maʉ̃ kʼarea Jobʼba iyikʉza krĩcha kʼãrãpe widisi, ¿Daizezeba iya nekʼãrẽ obʉ ʉ̃rʉ widi zera kʼãrẽta panʉi? (Job 31:4-6, 14). Dayirãba Jeowadeta nããra bʉepanʉbʉrʉ, iya zokʼabʉta obʉbʉrʉ akʉza dayi ewarita bia zokʼabʉbʉrʉ, mawũãra dayirã ewarira Jeowaba kãgabʉde zokʼayi.
Kʼãrẽta oibara jẽda Jeowa neũdukʼawua bʼaita
Ewariza bedʼeara Jeowaʉ̃me. Bʉ Zeze Jeowabara biʼia kʼawuabʉ bʉitara zareata iyiʉ̃me bedʼeaira bʉa nekayirua obada krĩchadeba (Rom. 8:26). Mawũãsidu badua jarada Jeowaʼa akʉza jarada bʉra iyiʉ̃me neũdukʼawua bakĩrãbʉta (Rom. 12:12). Andrejbara kĩrãbebʉ: «Mʉ̃ra mejãcha krĩcha obasi mʉ̃a nekayirua oda kʼarea. Mamina Jeowaʼa yiwidʼibʉrʉza mʉ̃ krĩchara aduʼabasi». Bʉa kʼawua ẽ bʉrʉ bʉ kʼãrẽ ʉ̃rʉ yiwidʼita, krĩchara David sãwũã yiwidʼidata iya jẽda krĩchanʉmaside nekayirua oda kʼarea, maʉ̃ra ũduseabʉ Salmos 51ne akʉza 65de.
Jʉrʉda nekʼãrẽ biʼiabʉta Daizezedebemata
Ũdubira bʉ ʉ̃rʉ ĩjãseabʉta
16 Dayi kakua jipa zokʼa kʼawuaibara kʼarebayi wuabemaraba dayirã ʉ̃rʉ ĩjãmarẽã. Naʉ̃ nebiaba kʼarebabʉ dayirãba jara ẽ baita awuruba dayirã bedʼea jaradata (akʉra Proverbios 10:19). Naʉ̃ nebiaba kʼarebayi jʉra kʼawua bʼaita internet zokʼabʉrʉde, mamina jʉra kʼawuapanʉ ẽ bʉrʉ internetʼne jaraseabʉ bedʼea jara ẽ baibadabʉsida. Dayirãba bedʼeata internetʼne bʉeidubaira ya kʼãrẽ obeda ẽ akʉza kʼawuada ẽ wuabemaraba sãwũã zokʼaita naʉ̃ bedʼeara. Adewara dayirã kakua jipa zokʼa kʼawuabʉba kʼarebayi dayirã nejʉraba dayirã mebẽrã ʉ̃rʉ widibʉdade jara ẽ baita. Maʉ̃ta berabariseabʉ pʉwʉrʉ Daizeze Bedʼea jaradiabida ẽ mae, jeneneraba dayirã mebẽrã ʉ̃rʉ widibʉdade jara ẽ baita. Maʉ̃ta mawũã berabaribʉrʉdera yibiabayi dayirã chupea bʼaita (Sal. 39:1). Dayirãba kãgapanʉbʉrʉ dayirã mebẽrãba, dayi neũdukʼawuaraba akʉza mebẽrã kongregasionebemaba dayirã ʉ̃rʉ ĩjãmarẽã, ũdubibara dayirãba biʼia zokʼa kʼawuabʉta dayirã kakuata.
20-26 MAYOBAYEDA
BEDʼEA BIA DAIZEZE BEDʼEADE ŨDUDATA | SALMOS 40, 41
¿Kʼãrẽa yibia wuabemara kʼarebaira?
w18.08 22 parr. 16-18
Wuabemara nekʼãrẽ diaiba dayita sobiabibʉ
16 Ẽbẽra abaʉba wuabemarata wãrĩnu kʼarebakĩrãbʉbʉrʉ, iyara jʉ̃ã ẽ wuabemaraba iyisida abarika kʼarebadamarẽã. Jesuba naʉ̃ta jarasi: «Maʉ̃ba bʉa zhikota obʉrʉdʼera trʉ̃rũã zuburia bʼeta, juwuata o jẽrũta dorrabʼari bʼeta, wã bʼe ẽã bʼeta, daʉbʼerrea bʼeta. Bʉra mawũãrã sobia bʼaya, ãzhara bʉra kʼãrẽ dia bʼedʼa ẽã» (Luc. 14:13, 14). Daizeze Bedʼeaba jarabʉ ẽbẽraba diakĩrã diabʉbʉrʉ naʉ̃bara nebiata ũduita akʉza jarabʉ sobiabʉta yi ẽbẽra zʉbʉriabʉra akʉbʉra (Prov. 22:9; Sal. 41:1). Mawũẽra dayirãba wuabemara nekʼãrẽ diakĩrã akʉza kʼarebakĩrã, maʉ̃ba dayita sobiabibʉ baera.
17 Pabloba jẽda jarasi Jesuba bedʼea jaradata, «audre sobiabʉ daya diabʉde dayaʼa diapanʉira». Naʉ̃ bedʼeabara iyara bari jarakĩrãba ẽ basi nekʼãrẽ bia awa diaibarata wuabemara, awuarabʉrʉ so zarea diaibarata, jaradiaibarata akʉza kʼarebaibarata ãyi kʼareba waebʉde (Hech. 20:31-35). Iya jaradadeba akʉza iya odadeba dayirãʼa jaradiasi wuabemara nekʼãrẽ diaira diaibarata dayirã ewarita, dayirã zareata akʉza krĩchaibarata ãyi ʉ̃rʉ, adewara kãgata ũdubibarata.
18 Ẽbẽrarã sãwũãbʉ ʉ̃rʉ estudiabʉraba ũdusida dayirãra audre sobiabʉta wuabemara nebia diabʉde. Adewara artikulo abaʉba jarasi ẽbẽra mejãchaʉba jarapanʉta ãyira audre sobiabʉta awuru ẽbẽrarã kʼarea nebia obʉrʉdebʉrʉ. Dayirã pãrãsidadera osida wuabemara kʼarebaita, maʉ̃ba dayirãba wuabemara kʼarebabʉrʉdera sobiapanʉ, dayirãba oibarata opanʉ baera. Adewara maʉ̃ ʉ̃rʉ bia kʼawuapanʉraba jarapanʉ, dayi mejãcha kaya ẽ baira akʉza sobia bʼaira wuabemarata kʼarebaibarata. Dayirãra maʉ̃ kʼarea kĩrãmigada ẽ kʼawuapanʉ baera Daizeze Bedʼeara Jeowaba odata akʉza iyira jipade ẽbẽra biata (2 Tim. 3:16, 17).
w15 15/12 24 parr. 7
Jeowaba bia akʉyi bʉra
7 Mamina dayirãta mejãcha kayapanʉbʉrʉ, Jeowaba so zarea diayi akʉza kʼarebayi. Iyara mawũã kʼarebasi ẽbẽrarã iyi ode kʼẽrẽpabadara nããbemarata. Davidba jarasi sobiabʉta yi ẽbẽra zʉbʉriabʉra kʼarebabʉra iyi zʉbʉriabʉrʉde Jeowaba ẽdrʉbi baera akʉza beibi ẽ baita (Sal. 41:1, 2). Maʉ̃ bedʼea jaradadebara ¿Davidbara jarakĩrãbasika ẽbẽra abaʉba wuabemara kʼarebabʉrʉdera maʉ̃ ẽbẽrarã wua bei ẽ baita? Mawũã ẽ. Awuarabʉrʉ iyara jarakĩrãbasi maʉ̃ ẽbẽrata kayara Daizezeba kʼarebaibasita akʉza bia akʉibasita (Sal. 41:3). Naʉ̃ba kʼarebabʉ dayirãba kʼawuaita Jeowabara kʼawuabʉta dayirãba kʼãrẽ bedʼea zroma ũdubʉta, adewara iyara kĩrãdua ẽãta dayirãra. Maʉ̃ daucha Jeowaba dayirã so zareata diabʉ akʉza krĩcha biata, mawũã kayabʉrʉde kʼawuamarẽã kʼãrẽta oita. Adewara iya dayirã pãrãsidera, osi dayirã kakuara iyidoba bemarẽã.
w17.09 12 parr. 17
Jeowade kĩrãkʼa so zʉbʉriata ũdubidadrʉ
17 Dayirãbara wuabemarara so zʉbʉria ũdubibʉ ẽ bari maʉ̃neba nebiata ũdubʉ baera. Awuarabʉrʉ opanʉ okĩrãpanʉ baera akʉza iyi ʉ̃rʉ ibia bedʼeabikĩrãbʉ baera, iyara kãgata ũdubibʉ akʉza so zʉbʉriata ũdubibʉ wuabemara (Prov. 14:31). Maʉ̃ kʼarea zarea odadrʉ dayirãba oseabʉta oita Jeowade kĩrãkʼa abarika, mawũã odara audre dayirã mebẽrã kʼawa bayi akʉza bia panañi dayirãbawara ãba bʉbawarabida (Gál. 6:10; 1 Juan 4:16).
Jʉrʉda nekʼãrẽ biʼiabʉta Daizezedebemata
it-2 46 parr. 7
Jeowa
Jõma nebʉra Daizeze Bedʼeadebʉbara jara ũrĩbibʉ sãwũã aranʉbai ũdubita Jeowabʉrʉ bia zokʼaseabʉta. Naʉ̃ba ũdubibʉ Jeowaba kʼãrẽta oita krĩchabʉta iyi trʉ̃ neneẽã erbaita. Daizeze trʉ̃ neneẽã bamarẽãra iyi trʉ̃ ʉ̃rʉ aña jarapanʉra ũdubibara maʉ̃ra sewidata. Mamina bari maʉ̃ awa ẽ, ẽbẽrarãba akʉza angeleraba ibia bedʼeaibara Jeowa trʉ̃ ʉ̃rʉ. Maʉ̃ba jarakĩrãbʉ bia kʼawuaibara Jeowabʉrʉ bia zokʼachʉta akʉza maʉ̃ʼa wawia ũdubibarata. Akʉza soiduba okĩrãpanaibara iya zokʼabʉta iyita kãgapanʉ baera. Salmo 40:5-10 de Davidba jaradaba ũdubibʉ iyara soiduba okĩrãbasita Jeowaba jarabʉta akʉza neneẽã bamarẽã basita Daizeze trʉ̃ta. (Akʉra apostol Pabloba sãwũã ũdubisita Salmone jarabʉra sãwũã aripe berabarisita Jesukristode nama Hebreos 10:5-10.)
27 MAYODEBA-2 JUNIOENA
BEDʼEA BIA DAIZEZE BEDʼEADE ŨDUDATA | SALMOS 42-44
Jeowaba dayirãʼa jaradiabʉ kĩrãkʼa ora
w06 1/6 9 parr. 4
Bedʼea audre yibiata Salmo libro ũmenebemata
42:4, 5, 11; 43:3-5. Ewari abaʉde dayirã jĩgabidara dayirã kongregasioneba kʼarebayi krĩchaita ãyibawara baside sãwũã sobia basita. Edaʉde maʉ̃ krĩchabʉrʉba dayi doba bʉta krĩchaseabʉ, mamina maʉ̃ ʉ̃rʉ krĩchabʉrʉba kʼarebayi kĩrãdua ẽ baita Jeowabʉrʉ kʼarebaseabʉta dayirã akʉza jʉ̃ãita Jeowaba sõbede kʼarebaita.
w12 15/1 15 parr. 2
Estudiabʉrʉde sãwũã audre okĩrãita akʉza audre kʼawuaita
1 YIWIDʼITA: Audre yibia nããra yiwidʼita (Sal. 42:8). Dayirãba Daizeze Bedʼea ʉ̃rʉ kʼawuabʉrʉdera iya kãgabʉta opanʉ. Maʉ̃ kʼarea wididaibara iyi jaure zareata, kʼarebamarẽã iya zokʼabʉta okĩrã bʼaita (Luc. 11:13). Barbara, misionerade bʉta dããrababa, naʉ̃ta jarasi: «Mʉ̃a Daizeze Bedʼea ʉ̃rʉ kʼawuai nãã akʉza lei nãã, yiwidʼibʉ. Mʉ̃a mawũã obʉrʉdera krĩchabʉ Jeowaba kʼarebabʉta mʉ̃ra akʉza iya bia akʉbʉta mʉ̃a kʼãrẽ obʉra». Yiwidʼiba kʼarebabʉ audre biʼia ẽza ũrĩta dayirãba kʼãrẽ kʼawuanʉmʉta akʉza dayirã soidu jʉ̃ẽmarẽã.
w16.09 5 parr. 11, 12
Zarea panadrʉ
11 Jeowabara dayirãra so zarea diabʉ ãba yi jʉrebarima wãbʉdeba, asambleadeba akʉza eskuelaraneba. Dayirã nekʼãrẽ kʼawuaraba kʼarebayi soiduba oita Jeowaba zokʼabʉta akʉza iyi kʼarea nekʼãrẽ audre oita. Adewara daya obʉta jõma bia oita (Sal. 119:32). Jeowaba dayirã nekʼãrẽ jaradiabʉdeba zarea diabʉ. ¿bʉara maʉ̃ra bia zokʼakĩrãbʉka?
12 Jeowaba kʼarebasi iyi ode panʉraba amalekitarata akʉza etioperata ãyi juwade baebimarẽã. Adewara Nehemíasʼa akʉza judioraʼa zarea diasi mawũã jẽda ara odamarẽã Jerusalénʼnebema murota. Abarika Jeowaba dayirã zareata diayi jaradia wãmarẽã krĩcha zroma opanʉmina, pẽwãpanʉmina akʉza ẽbẽrarãba mejãcha ũrĩkĩrãna ẽ mina (1 Ped. 5:10). Jeowabara dayirã bedʼea zromara mesera ãĩ bʉe ẽ akʉza mesera ara ota ẽ. Dayirãta zarea bakĩrãpanʉbʉrʉ nekʼãrẽ oibara, ¿kʼãrẽta oibara? Daizeze Bedʼeata ewari za akʉibara, ãba yi jʉrebarima wãi nãã estudiaibara akʉza semanaza wãbaibara ãba yi jʉrebarima. Adewara dayi dobaʉba Daizeze Bedʼeata kʼawuaibara akʉza mebẽrãbawaraʉbida. Maʉ̃ daucha Jeowaʼa kʼareba widibara. Jeowaba dayirã nekʼãrẽ diabʉ mawũã so zarea diaita, mamina zarea odaibara nekʼãrẽ awuru obʉ kʼarea maʉ̃ta aduabi ẽ baita. Dayirãba Jeowa kʼarea nekʼãrẽ obʉ ʉ̃rʉ krĩchabʉrʉde ũdudara waidide waebʉta Jeowa kʼarea nekʼãrẽ audre oita, mawũãra Jeowaʼa kʼareba wididadrʉ. Dayirãba ũdudayi Daizeze jaure zareaba kʼarebabʉta iya kãgabʉta oita akʉza okĩrã bʼaita (Filip. 2:13). ¿Dayirãbara kʼarebaseapanʉka awuru ẽbẽrarãra zarea panamarẽã?
Jʉrʉda nekʼãrẽ biʼiabʉta Daizezedebemata
it-1 470
Chakal
Daizeze Bedʼeade chakal ʉ̃rʉ bedʼeabʉrʉdera nekʼãrẽ bio ʉ̃rʉ jaraita zokʼapanʉ. Jobʼba iyi mejãcha zʉbʉrianʉmaside jarasi iyira chakal mebẽã kĩrãkʼa bʉta. (Job 30:29.) Ewari aba Daizeze pʉwʉrʉ nejʉraraba Daizeze pʉwʉrʉdebemarata ãyi juwa edre baebisi. Maʉ̃nera Salmistaba naʉ̃ta jarasi: «Bʉara daira birachibʉrʉ chakalʼra bʉmae». (Sl 44:19.) Chakalʼrãra jʉ̃ẽpanasi ẽbẽra yõne wãbʉrʉra beidara bʉidu. Salmistara maʉ̃ ʉ̃rʉ bedʼea basibaibara (Naʉ̃ testoʉ̃me akʉra Sl 68:23.) Poaga 607de, babilonioraba pʉwʉrʉ Jerusalénta purrasida, maʉ̃ba jarrabata mejãcha ũdusida pʉwʉrʉ Jerusalénʼnebemaraba akʉza maʉ̃ kʼarea ʉ̃kʉrʉ paparabara ãyi wũãwũãrata zʉbʉria osida. Maʉ̃ kʼarea Jeremíasbara jarasi chakalʼrabara ãyi wũãwũãrãra audre bia akʉbʉta ẽbẽra wẽrãra Jerusalénʼnebemaraba obadaira. (Lam 4:3, 10.)
3-9 JUNIOBAYEDA
BEDʼEA BIA DAIZEZE BEDʼEADE ŨDUDATA | SALMOS 45-47
Trãbi nokʼo juwa jidabʉ ʉ̃rʉnemebata
w14 15/2 9, 10 parr. 8, 9
Sobiadadru kordero juwa jidai kʼarea
8 (Akʉra Salmo 45:13, 14a.) Yi ẽbẽra wẽrã juwa jidaira kĩrãwãreã ũdubʉ. Revelación 21:2 de jara ũrĩbibʉ, maʉ̃ ẽbẽra wẽrã juwa jidaita bʉra pʉwʉrʉ kĩrãkʼa bʉta akʉza maʉ̃ra ʉ̃tʉbʉta. Naʉ̃ pʉwʉrʉ trʉ̃ra Nueva Jerusalén. Akʉza iyira biʼia yobʉ yi kima bai kʼarea. Adewara iyira uruyabʉ mõgara biʼi akiru uruyakidabari kĩrãkʼa (Rev. 21:10, 11). Naʉ̃ pʉwʉrʉ ʉ̃rʉ bedʼeaita Revelaciónʼne zokʼabʉ bedʼeara kĩrãwãreã bʉta (Rev. 21:18-21). Naʉ̃ ẽbẽra wẽrã juwa jidaira jipade kĩrãwãreãbʉ, mawũã bʉ ẽbẽra wẽrãtrʉ ʉ̃tʉ juwa jidaseabʉ.
9 Naʉ̃ ẽbẽra wẽrã juwa jidaita bʉra edepanʉ yi yumakẽrã iyiʉ̃me juwa jidaimaʼa. Maʉ̃ yumakẽrãra, Nokʼo Jeowaba jidada. Naʉ̃ nokʼoba kʼarebasi Daizeze Bedʼeadeba naʉ̃ yuwẽrãra neneẽã bamarẽã akʉza kʼãrẽ kayiruara neẽ bamarẽã (Efes. 5:26, 27). Adewara naʉ̃ yuwẽrãra biʼia wua jʉ̃baibara maʉ̃ ewarita. Iyira mawũã wua jʉ̃bʉ. Iyi wuamara nekʼãrẽ oro omata karabʉ akʉza nekʼãrẽ juwaba kadata kara abʉ. Jarapanʉ iyi wuara lino omata akʉza uruyabʉta adewara jaigua ẽã bʉta. Linobara jarakĩrãbʉ neneẽã panʉraba nebia opanʉta (Rev. 19:8).
Apocalipsisba jarabʉ bʉaʼa ʉ̃ra zeide kʼãrẽta ũduita
10 Ẽbẽrarãba iyi pʉwʉrʉ pẽwãbʉdadera, ¿kʼãrẽta oi Jeowabara? Iya jarabʉ: «Mʉ̃ra mejãcha kĩrʉñi» (Ezeq. 38:18, 21-23). Apocalipsis 19ba jara ũrĩbibʉ maʉ̃ tẽã kʼãrẽta berabarita. Jeowaba zokʼayi yi warra Jesuta dayirãbari yõmarẽã akʉza iyi nejʉrarata makenamarẽã. Mamina Jesura doba ba ẽ bayi, iyiʉ̃me bayi angelerata akʉza 144.000rata (Apoc. 17:14; 19:11-15). ¿Naʉ̃ yõ tẽãra kʼãrẽta berabari? Daizeze nejʉrarãra akʉza organizasionʼra Jeoware ba ẽ badarãra jõma makenañi (akʉra Apocalipsis 19:19-21).
11 ¿Sãwũã panai ẽbẽrarã kʼẽrẽpapanʉrãra Jesuba Daizeze nejʉrara makenana tẽãra? Ãyira mejãcha sobiayi (Apoc. 19:1-3). Akʉza ʉ̃tʉra Babilonia pʉwʉrʉ zroma jõna kʼarea sobiadaimina, audre sobiadayi Kordero boda kʼarea (Apoc. 19:6-9).
12 ¿Sõbede bʼai Kordero bodara? Daizeze yõ ewari zei nawedara 144.000ra ʉ̃tʉ ãba yi jʉreimina, Kordero bodara maʉ̃ ewaride berabari ẽ bayi (akʉra Apocalipsis 21:1, 2). Awuarabʉrʉ maʉ̃ bodara odayi Daizeze yõ ewari berabarida tẽã akʉza Daizeze nejʉrara jõma makenana tẽã (Sal. 45:3, 4, 13-17)
it-1 1061 parr. 5
Yõ
Yõ naʉ̃ drʉade bʉta jõbʉrʉdera ẽbẽrarã naʉ̃ egorode panʉrãra, mil poaga bayeda aduʼa panañi. Salmoba maʉ̃ ʉ̃rʉ naʉ̃ta jarabʉ «[Jeowaba] jõbiyi yõra naʉ̃ egorodera akʉza bʉetayi enedrʉmara, wãrĩnu bʉgʉzʉabiyi miazura, gorogorora karru yõbarita babʉedayi». Salmoba jarada bedʼeara aripe berabarisi, nãã Daizezeba iyi pʉwʉrʉ aduʼa babiside iyi nejʉraraba yõita nekʼãrẽ zokʼabʉta jõbiside, mawũã. Mamina Jesuba ẽbẽra kayiruara Armagedón ewaride jõbibʉrʉdera, naʉ̃ drʉa jõmaʉ̃mae wãrĩnu aduʼa panañi jõmãʉ̃ta (Sl 46:8-10.) Ẽbẽra biara ewari jõmaʉ̃nẽ bairabara kuchora azadon kĩrãkʼa babiyi akʉza miazʉra nekʼãrẽ ne jʉrepebari kĩrãkʼa bayi. Adewara wua yõ kʼawuada ẽ bayi. Maʉ̃ra mawũã berabariyi Jeowaba mawũã jarasi baera (Isa 2:4; Miq 4:3, 4.)
Jʉrʉda nekʼãrẽ biʼiabʉta Daizezedebemata
w17.04 11 parr. 9
¿Kʼãrẽta neẽ bai Daizeze Nokʼoba zokʼabʉrʉde?
9 Armagedón berabarida tẽãra, organizasion kayiruarãra neẽbayi. Mawũẽra, ¿kʼãrẽ organizasionta bai maʉ̃ ewarira? Daizeze Bedʼeaba jarabʉ: «Bayi bajã yiwidita, drʉa yiwidita, mama neneẽbayi iyi bedʼeaba jarabʉ kĩrãkʼa akʉza mama nekʼãrẽ aripe obayi» (2 Ped. 3:13). Bajã yiwidi ẽbara jarakĩrãbʉ nokʼora zeri ẽãta akʉza ẽjũã yiwidi ẽbara jarakĩrãbʉ ẽbẽrarã maʉ̃ra nokʼoraba zokʼabʉta. Maʉ̃ra barira bayi bajã yiwidita akʉza drʉa yiwidita. Bajã yiwidibara jarakĩrãbʉ nokʼo yiwidita. Naʉ̃ nokʼora Daizezeba nokʼo jidadata iyi, Jesuta akʉza 144,000rã iyiʉ̃meba zokʼairata. Drʉa yiwidibara jarakĩrãbʉ ẽbẽrarã Daizeze Nokʼoba zokʼabʉrata. Jesuba akʉza iyiʉ̃meba zokʼairabara nekʼãrẽ jõma odayi Jeowaba kãgabʉ kĩrãkʼa. Jeowabara kãga jõma daucha bamarẽã (1 Cor. 14:33). Maʉ̃ kʼarea naʉ̃ drʉa yiwididera nekʼãrẽ jõma daucha opanañi. Naʉ̃ ewaride ẽbẽrarã dayirã akʉirãra ẽbẽra biara bayi akʉza nekʼarẽ jõma odayi Jesuba adewara 144,000rãba jarabʉ kĩrãkʼa (Sal. 45:16). Jipade yibia bayi maʉ̃ ewaride bʼaira, organizasion kayiruarãta neẽ bai baera, awuarabʉrʉ organizasion aba pai bai baera akʉza maʉ̃ra jipade yibia bai baera.
10-16 JUNIOBAYEDA
BEDʼEA BIA DAIZEZE BEDʼEADE ŨDUDATA | SALMOS 48-50
Yibarira, kʼarebaidua mara wũãwũãraba audre ĩjãmarẽã Jeowa organizasion ʉ̃rʉ
Jʉrʉdadrʉ Jeowaba dayirã bia akʉmarẽã
11 Jeowaba bia akʉbʉ iyi bedʼea kʼawuabʉde akʉza dayirã wũãwũãraʼa jaradiabʉde iyi ʉ̃rʉ. Israelitarabara ewari za nekʼãrẽ badua obadara sabado za awuara opanasi audre Jeowa neũdukʼawua bʼaita (Éx. 31:16, 17). Maʉ̃ ewaridera israelitarabara ãyi wũãwũã jaradiapanasi Jeowa ʉ̃rʉ akʉza Jeowaba kʼãrẽ nebia odata. Idi ewadera dayirãsida ewari jʉrʉibara Daizeze Bedʼea leita iyi ʉ̃rʉ audre kʼawuaita, mawũã dayirãta bia akʉyi akʉza iyi kʼawa panañi (Sal. 73:28). Adewara dayirã mebẽrãbawara Daizeze Bedʼea estudiabʉde kʼarebaseapanʉ dayirã wũãwũãra Jeowa kʼawa bʼaita (akʉra Salmo 48:13).
w11 15/3 19 parr. 5-7
Erpanʉ kʼãrẽ kʼãrẽa sobia bʼaita
Salmistaba jarasi pʉwʉrʉ Jerusalénʼta akʉ jʉ̃ẽnamarẽã akʉza arakʼaitaʉba akʉdamarẽã, mawũã ũdudamarẽã kʼãrẽ nebiata bʉta mama. Akʉza ãyi wũãwũãra maʉ̃ ʉ̃rʉ jara ũrĩbidamarẽã (Sal. 48:12, 13.)
Krĩchadaya nokʼo wẽrã Sebadebema ʉ̃rʉ. Iya ũrĩside Salomónba sãwũã zokʼabʉ ʉ̃rʉ ĩjã ẽ basi. Mamina iyita mainʉ jʉ̃ẽbʉrʉde, ĩjãsi iya bedʼea jaradapeada ʉ̃rʉra ũdusi baera iyi dabʉba (2 Cró. 9:6). Naʉ̃ kʼawua berabaridaba ũdubibʉ nekʼãrẽ dayi dabʉba ũdubʉrʉdera audre dayi soidu jʉ̃ẽbʉta.
¿Bʉara kʼãrẽta oseabʉ bʉ wũãwũãraba ũdudamarẽã Jeowa organizasionba kʼãrẽ nebia ozebʉrʉta? Bʉ de kʼawa bʉbʉrʉ Betelta zarea ora maʉ̃ ũdu kʼawuade wãita. Akʉdaya Mandy akʉza Bethany sãwũã berabaridata. Ãyi bʉmaeba Betelidu jʉ̃ẽra jĩga basi, 1,500 kilometro wãibarabasi. Mawũãsidu ãyi warraraenara ãyi yibariraba zarea opanasi badua edeita Betel akʉde. Ãya naʉ̃ta jarapanʉ: «Daiba Betel ũdu kʼawuai nããra krĩchapanasi mamara bari Daizeze ʉ̃rʉ kʼawuapanʉta akʉza zõrãrã awa panʉta. Mamina dai mainʉ jʉ̃ẽbʉrʉde ũdusida bʉta warrara Jeowaita zarea trajapanʉta akʉza sobia panʉta. Adewara maʉ̃neba kʼawuasida Jeowa organizasionʼra jipade yi zromata akʉza daiba Betel akʉ jʉ̃ẽbʉrʉza, ũdupanasi maʉ̃ba sãwũã daiʼa zarea diabʉta». Mandyba akʉza Bethanyʼʉ̃meba ũdusida Jeowa organizasion sãwũãbʉta akʉza naʉ̃ba kʼarebasi ãya yi nãã edebarita ojʉ̃drʉmarẽã. Maʉ̃ tẽã ãyira trʉ̃sida Betelʼeda wãita ewari wiñabayeda.
w12 15/8 12 parr. 5
Ũdubidadrʉ Daizeze Nokʼo juwa edre bakĩrãpanʉta
5 Sãwũã berabari zebʉrʉ ʉ̃rʉ kʼawuara. Ẽbẽra abʉta awuru pʉwʉrʉeda wãkĩrãbʉbʉrʉ mamabema baya, iyara nãã kʼawuaibara maʉ̃ pʉwʉrʉ kʼãrẽne berabari zebʉrʉta. Abarika yi ẽbẽrarã Daizeze Nokʼo juwa edre bakĩrãpanʉrabara, zarea odaibara nekʼãrẽ jõma kʼawuaita maʉ̃ nokʼo sãwũãbʉ ʉ̃rʉ. Akʉdaya Israeldebemaraba kʼãrẽta opanasita. Corédeba zedarabara mejãcha kãgabasi pʉwʉrʉ Jerusalénʼra akʉza maʉ̃ pʉwʉrʉde Jeowaʼa sãwũã yiwidʼibadara. Maʉ̃ kʼarea ãyara awurura nebʉrakĩrãbasi maʉ̃ pʉwʉrʉ ʉ̃rʉ. Ãyara maʉ̃ pʉwʉrʉra kãgaba ẽ basi bari biʼia kiru baera, awuarabʉrʉ kãgabasi maʉ̃ pʉwʉrʉde kʼãrẽ obʉ kʼarea. Mamara Jeowaʼa yiwidʼipanasi akʉza Daizezeba Leyba diada ʉ̃rʉ jaradiapanasi, adewara Jeowara maʉ̃ pʉwʉrʉdebema nokʼo kĩrãkʼa basi (akʉra Salmo 48:1, 2, 9, 12, 13). ¿Bʉabida ãyide kĩrãkʼa audre kʼawuakĩrãbʉka akʉza wuabemara jara ũrĩbikĩrãbʉka Jeowa organizasion sãwũã zebʉrʉ ʉ̃rʉ? Bʉa Jeowa organizasion ʉ̃rʉ audre kʼawuabʉbʉrʉ akʉza akʉra Jeowaba sãwũã kʼareba zebʉrʉta iyi pʉwʉrʉta, mawũãra audre ĩjãñi Daizeze Nokʼo ʉ̃rʉ akʉza wuabemara audre jaradiakĩrãñi bedʼea bia Daizeze Nokʼo ʉ̃rʉ (Jer. 9:24; Luc. 4:43).
Jʉrʉda nekʼãrẽ biʼiabʉta Daizezedebemata
it-2 857 parr. 7
Nekʼãrẽ bia mejãcha erbaita
Israelitarãra bia panasi, ãyara erbasi kʼãrẽ koita akʉza kʼãrẽ doisida. (1Re 4:20; Ec 5:18, 19.) Akʉza ãya nekʼãrẽ bia erbʉba kʼarebabasi zʉbʉria ẽ baita nekʼãrẽ neẽ kʼarea. (Pr 10:15; Ec 7:12.) Wãrĩnu Jeowabara kãgabasi israelitaraba nebiata erbamarẽã ãyi zareata trajabʉdeba. (Naʉ̃ testoʉ̃me akʉra Pr 6:6-11; 20:13; 24:33, 34.) Adewara ãyaʼa jarasi jʉra kʼawua panamarẽã aukʼara nebia erbai ʉ̃rʉ ĩjãna ẽ baita. Awuarabʉrʉ kĩrãbedamarẽã ãyara nebia ũdubʉta Jeowaba diabʉ baera (Dt 8:7-17; Sl 49:6-9; Pr 11:4; 18:10, 11; Jer 9:23, 24.) Adewara ãyaʼa kĩrãbebisi nebia ãya erbʉra badu ewaride aduaseabasita. (Pr 23:4, 5.) Ãya nebia erbʉra Daizezeʼa diabe ẽ basi mawũã ẽbẽra aba beideda ẽdrʉbita. (Sl 49:6, 7.) Maʉ̃bara beida tẽãra kʼarebabe ẽ basi. (Sl 49:16, 17; Ec 5:15.) Akʉza ãyaʼa jarasi platata aukʼara jʉrʉbʉbʉrʉ naʉ̃bara kayiruata obiseabasita akʉza Jeowaba bia akʉ ẽ basita ãyira. (Pr 28:20; akʉra naʉ̃ testoʉ̃me Jer 5:26-28; 17:9-11.) Akʉza ãyaʼa jarasida wawia ũdubidamarẽã Jeowaʼa ãya nebia erbʉdeba. (Pr 3:9.)
17-23 JUNIOBAYEDA
BEDʼEA BIA DAIZEZE BEDʼEADE ŨDUDATA | SALMOS 51-53
¿Kʼãrẽta oseabʉ nekayirua zroma oẽ baita?
w19.01 15 parr. 4, 5
Audre bia akʉibara dayirã sora
4 Proverbios 4:23de zokʼabʉ bedʼea sota jara ũrĩbita dayirãne eda kʼãrẽta bʉta (akʉra Salmo 51:6). Sobara jarakĩrãbʉ dayirãba kʼãrẽ krĩchabʉta, dayirã sãwũãbʉta, dayirãba nekʼãrẽ kʼãrẽa obʉta akʉza dayirãba kʼãrẽta okĩrãbʉta. Bari jarakĩrãbʉ ẽ dayi sãwũã ũdupanʉta, awuarabʉrʉ jarakĩrãbʉ dayirã edabida sãwũãbʉta.
5 Dayirã eda sãwũãbʉ biʼia akʉira, abarikabʉ dayi sãwũã ũdupanʉta bia akʉbʉme. Bari jaraita dayirãta kaya ẽ bakĩrãbʉbʉrʉ zarea obʉ bia nekoita akʉza ejersisio badua oita. Abarika dayirãta audre Jeowa kʼawa bakĩrãpanʉbʉrʉ zarea oibara iyi ʉ̃rʉ kʼawuaita akʉza dayirãba kʼawua wãta aripe oũdubi wãita. Adewara wuabemara bedʼeaita dayirãba kʼawua wã ʉ̃rʉ (Rom. 10:8-10; Sant. 2:26). Dayirãra wuabemabara ũduseapanʉ kaya ẽã aduʼabʉ kĩrãkʼa bʉta, mamina wãrĩnubaira edara kayabaseabʉ. Abarika dayirãbara Jeowa kʼarea nekʼãrẽ mejãcha obʉ kʼarea krĩchaseapanʉ dayirãba ĩjãbʉra zarea erpanʉta, mamina wãrĩnubaira aña krĩchanʉmaseabʉ (1 Cor. 10:12; Sant. 1:14, 15). Kĩrãbedaibara Diarubara jʉrʉbʉta dayirã sãwũã aña krĩchabita.
w15 15/6 14 parr. 5, 6
Zarea ora yi kayirua yi edebi ẽ baita
5 Bʉ yi kayirua yi edebi ẽ baira, Jeowaʼa widira kʼarebamarẽã, iya kʼarebayi maʉ̃ʼa yi edebi ẽ baita. Bʉa iyita orrara iyisida bʉ kʼawa bayi. Jeowaba dia iyi jaure zareata mawũã bʉita zare ẽ bamarẽã yi kayirua yi edebi ẽ baita akʉza kʼãrẽ kayirua neẽbaita. Maʉ̃ kʼarea Jeowa jarara bʉara iya kãgabʉta oita krĩchabʉta (Sal. 19:14). Akʉza iyaʼa widira kʼarebamarẽã bʉa ũduita, kʼãrẽ krĩcha añabʉta erbʉta mawũã maʉ̃ba tẽã zʉbʉriabi ẽ marẽã (Sal. 139:23, 24). Adewara iyaʼa widida ʉ̃rʉ widira kʼarebamarẽã yi kayirua oita zebʉrʉde maʉ̃ʼa yi edebi ẽ baita (Mat. 6:13).
6 Edaʉde ẽbẽrarãra ãyi sãwũã dapʉẽna kʼarea, mawũã ẽ bʉrʉ ãyi nãã sãwũã bada kʼarea, zarea baseabʉ Jeowaba kãga ẽãta oẽã aira. Mawũãsidu ãya Jeowaʼa kʼareba widira, Jeowaba kʼarebayi ãya nebiata omarẽã. Bat-sebaʉ̃me ãĩ bada tẽã, Davidʼba Jeowaʼa naʉ̃ta widisi: «Ora mʉ̃ sode neneẽãbaita [...] akʉza bʉera mʉ̃ne eda nebia yiwidita, adewara nebia teitea bʼaita» (Sal. 51:10, 12). Wãrĩnu yi kayirua oẽ baira jipade zarea baseabʉ, mamina Jeowaba kʼarebaseabʉ dayirãba iya zokʼabʉta audre okĩrãmarẽã. Edaʉde zarea baseabʉ nebia ʉ̃rʉ krĩchaita dayi sode kayiruata erbʉ baera, mamina Jeowaba kʼarebaseabʉ daya nebia ʉ̃rʉ krĩchaita akʉza nebiata okĩrãbaita (Sal. 119:133).
Jʉrʉda nekʼãrẽ biʼiabʉta Daizezedebemata
it-1 716
Doeg
Iyira Edomnebema basi akʉza nokʼo Saúl obeja akʉbarirãnebema basi. (1Sa 21:7; 22:9.) Iyira israelitara Daizezeʼa yiwidʼibasi baibara. Iyira Nobde Jeowa kĩrãbita basi baibara (iya nei oyada kʼarea jaigʉabʉ baera mawũã ẽ bʉrʉ lepraba baribasi baera). Maʉ̃ne Doegba ũdusi sumo saserdote Ahimélecba Davidʼa diasita pan Daizezedebemata akʉza Goliat espadata. Tẽã Saúlba iyi nezokʼara jaraside ãyira iyi ʉ̃rʉ panʉta Davidʼare panʉ baera, Doegba Saúlʼa jara ũrĩbisi iya Nobde kʼãrẽ ũdudata. Aramaʉta maʉ̃ kʼawuai Saúlbara sumo saserdote Ahimélecta akʉza wuabemara saserdote Nobdebemarata trʉ̃si akʉza bedʼeata widisi, mõbe iyi nezokʼarata zokʼasi maʉ̃ra saserdoterata makenamarẽã. Mamina naʉ̃rabara oẽ basi maʉ̃ra, maʉ̃ kʼarea Saúlbara Doegta zokʼasi 85 saserdoterata makenamarẽã. Maʉ̃ kayirua oda tẽã, Doegbara Nobdebʉ jõma jõbisi, beasi warrarata, zõrãrãta akʉza nedʉwʉrata. (1Sa 22:6-20.)
Salmo 52de Davidba Doeg ʉ̃rʉ naʉ̃ta bʉsi: «Bʉ kĩrãmera kucho zake biʼia erabʉ kĩrãkʼabʉ, krĩchabʉ kʼãrẽ kayirua oita akʉza yãrãta sewabʉ. Bʉara mejãcha kãga yi kayiruata nebiaira, audre kãga sewa nebʉrʉ jaraita wãrĩnu jarai kaude. Akʉza mejãcha kãga jaraita bedʼea sopʉabibʉta, bʉra sewa nebʉrʉ omia». (Sl 52:2-4.)
24-30 JUNIOBAYEDA
BEDʼEA BIA DAIZEZE BEDʼEADE ŨDUDATA | SALMOS 54-56
Daizezera bʉarebʉ
w06 1/8 22 parr. 10, 11
Buru bia badadrʉ: wawia ũdubidadrʉ Daizezeʼa
10 Ewari aba Davidʼra mirʉ wãsi nokʼo Akisba zokʼabʉ pʉwʉrʉeda, pʉwʉrʉ Gatʼeda, Goliatʼra naʉ̃ pʉwʉrʉde tosida (1 Samuel 21:10-15). Maʉ̃ kʼarea nokʼo nezokʼarabara jarasida Davidʼra ãyi pʉwʉrʉ nejʉrata, ¿kʼãrẽta osi Davidʼba maʉ̃nera? Jeowaʼa yiwidʼisi soiduba (Salmo 56:1-4, 11-13). Maʉ̃neba ẽdrʉira Davidʼbara krĩña kĩrãnemabʉ kĩrãkʼa ũdubisi, mamina iya kʼawuabasi Jeowaba kʼarebasita iyi maʉ̃neba ẽdrʉira. Iya Jeowa ʉ̃rʉ ĩjãbʉba ũdubisi iyara Jeowara wãrĩnu wawiabʉta (Salmo 34:4-6, 9-11).
11 Davidʼde kĩrãkʼa dayirãbida ũdubiseapanʉ Jeowa wawia ũdubipanʉta. ¿Sãwũã? Dayirãba bedʼea zroma ũdubʉrʉde ĩjãseapanʉ Jeowaba kʼarebaita maʉ̃neba ẽdrʉbita. Davidʼba naʉ̃ta bʉsi: «Bʉ ora jõma Jeowa juwade amaera, ĩjãra iyita akʉza iya bʉta kʼarebayi» (Salmo 37:5). Davidbara Jeowaʼa kʼareba widisi iyi bedʼea zromaneba kʼarebamarẽã. Mamina iyira piki be ẽ basi, iyara jʉrʉsi kʼãrẽta oita maʉ̃ bedʼea zromaneba ẽdrʉita. Abarika dayirãbida jʉ̃ã ẽ baibara Jeowaba jõma omarẽã, awuarabʉrʉ jʉrʉibara sãwũã ẽdrʉita maʉ̃ bedʼea zromaneba. Mamina Davidbara kʼawuabasi iyidobaʉbara nekʼãrẽ jõma obe ẽãta, maʉ̃ kʼarea Jeowaʼa kʼareba widisi. Dayirãbida abarika oibara, nekʼãrẽ dayirãba oseabʉta oibara mamina maʉ̃ awuara jõma Jeowa juwade amaeibara. Mamina edaʉde bʉ ʉ̃kʉrʉ bedʼea zromara dayirã dobaʉbara nekʼãrẽ obe ẽãta maʉ̃ kʼarea Jeowa ʉ̃rʉ ĩjãibara. Mawũã opanʉbʉrʉ audre wawia ũdubidayi Jeowaʼa. Davidba bedʼea jaradaba dayirã mejãcha so zarea diabʉ. Iya naʉ̃ta jarasi: «Jeowa neũdukʼawuara bʼaira yi wawia ũdubipanʉrane» (Salmo 25:14).
cl 243 parr. 9
Mia nekʼãrẽneba Daizeze kãgadebara jĩgara ba ẽ bayi
9 Dayirãba bedʼea zroma awuantabʉra Jeowabara bia akʉbʉ maʉ̃ra (Mateo 24:13). Kĩrãbera Diarubara kãgabʉta dayirãra Jeoware ba ẽ marẽã. Maʉ̃ kʼarea bʉta Jeoware kʼẽrẽpa bʉbʉrʉ ũdubibʉ Diarura sewanebʉrʉ omiata (Proverbios 27:11). Mamina mawũã kʼẽrẽpa baira dayirãitara zareabʉ kayabʉ baera, plata neẽ baera akʉza neida berabaribʉ baera. Adewara dayirãba krĩchadata aripe berabari ẽãnera dayirãra sopʉa sentiseabʉ (Proverbios 13:12). Jeowabara dayirãra bia akʉbʉ mawũã bedʼea zromane berabaribʉidu iyiʉ̃me kʼẽrẽpabʉra. Maʉ̃ kʼarea nokʼo Davidbara Jeowaʼa jarasi iyi daʉbara jibadode tʉ erbamarẽã. Iya jarasi: «¿Bʉa maʉ̃ra bʉ librode bʉ erbʉ ẽ ka?» (Salmo 56:8). Jeowabara akʉbʉ dayirã kʼãrẽãba zʉbʉriabʉta iyiʉ̃me kʼẽrẽpa bai kʼarea. Maʉ̃ba iyara sobia kĩrãbebʉ dayirãba obʉra.
Jeowa kãgabara kʼarebabʉ perabia yi edebi ẽ baita
16 Diarubara kʼawuabʉ dayirãbara mejãcha kãgata dayi bebʉra, maʉ̃ kʼarea iya jarabʉ dayirãbara nekʼãrẽ baduta oita dayi bebʉ zokʼai erbaita adewara idubʉseabʉta Jeowa neũdukʼawua bʼaita (Job 2:4, 5). Mamina iya jipa aña krĩchabʉ, Diarura zarea barabʉ baera dayirã beaita, iyara maʉ̃ta zokʼabʉ dayirã daʉperaita akʉza Jeowadeba jĩga babita (Heb. 2:14, 15).Maʉ̃ kʼarea Diarubara edaʉde zokʼabʉ ʉ̃kʉrʉ ẽbẽrata, dayirã jaramarẽã dayirãba Daizeze ĩjãbʉta idubʉ ẽ bʉrʉ beadaita adewara dayirã mejãcha kayabʉdera Diarubara obʉ medikorata akʉza dayirã mebẽrã Jeowa odepanʉra ẽãta dayirã ʉ̃rʉ bamarẽã wata kẽgʉde bʉemarẽã. Mawũã ẽ bʉrʉ Diarubara dayirã kayabʉdera obʉ ʉ̃kʉrʉ ẽbẽraneba daya jaramarẽã, jʉrʉmarẽã sãwũã beita, maʉ̃ra Daizezeba kãgabʉde bʉ ẽ mina.
17 Dayirãnebemara mia kʼaita beiamapanʉ, mamina beidara kʼawuapanʉ Daizezebara iyi krĩchade erbaita akʉza dayirãra kãga bʼaita (akʉra Romanos 8:37-39). Jeowaitara iyi neũdukʼawua beibʉrʉdera iyi burude zokʼaibʉ kĩrãkʼabʉ (Luc. 20:37, 38). Maʉ̃ kʼarea Jeowabara ñabasea jẽda piradrʉbikĩrãbʉ (Job. 14:15). Jeowabara iyi warrata beibisi dayirã bari, mawũã dayirãta ewari jõmaʉ̃nẽ panamarẽã (Juan 3:16). Dayirãbara biʼia kʼawuapanʉ, Jeowabara kʼãrẽaba kãgabʉta akʉza akʉkĩrãbʉta dayirãra, maʉ̃ kʼarea kayabʉdera adewara pẽwãpanʉnera jĩgara wã ẽ iyideba, awuarabʉrʉ jʉrʉpanʉ iyi kʼarebata. Dayirã diamarẽã zowaĩnĩgʉata akʉza aduʼa babimarẽã. Maʉ̃ta osida Valeria akʉza yi kimaʉ̃meba (Sal. 41:3).
Jʉrʉda nekʼãrẽ biʼiabʉta Daizezedebemata
it-1 707, 708
Kʼawuaita kʼãrẽ berabarita, nããena jidaita kʼãrẽ berabarita
Judasba kʼãwũã sewadaba ũdubisi propesiaba jarabʉra aripe berabarisita akʉza Jeowaba Jesumeba kʼawuaseabʉta kʼãrẽta berabarita. (Sl 41:9; 55:12, 13; 109:8; Hch 1:16-20.) Mamina bia kʼawuada ẽ Daizezeba nãã kʼawuabasita, mawũã berabarita mawũã ẽ bʉrʉ iya jidasita Judasba mawũã sewamarẽã. Propesiadera jarasi Jesu neũdukʼawua abaʉba iyira sewaita mamina jara ẽ basi kʼaiba oita. Adewara Daizeze Bedʼeadera jara ẽ Daizezeba jidasita Judasba kʼãrẽ oibadara. Apostol Pabloba jarasi Daizezeba zokʼadata, nãã bia krĩchara awuru bari bedʼeai nãã akʉza ãya nekayirua obʉde edabararã, awuarabʉrʉ neneẽãbara. (1Ti 5:22; naʉ̃ testoʉ̃me akʉra 3:6.) Jesubara jʉra kʼawua jidasi iyi 12 apostolera bʉra. Maʉ̃ oinãã Jesura Jeowaʼa yiwidʼisi, maʉ̃nera yiwidʼi ũnãdrʉsi. (Lu 6:12-16.) Daizezeba jidasibʉrʉ Judasba mawũã sewamarẽã, mawũãra Jesuta kʼareba ẽ bakasi iya apostolera bia jidamarẽã adewara iya zokʼadara aña chʉakasi. Mawũãra Judasba kayirua odade edabʉ kĩrãkʼa bakasi.
Judas apostol bʼaita jidasidadera iyira ẽbẽra bia basi, wabida iyi sodera ũdubi ẽ basi sãwũã Jesu sewakĩrãbʉta. Maʉ̃ta ewari berabari wãne iduaribisi iyi sode kayirua krĩchamarẽã, mawũã Dairuba jarabʉta ũrĩsi Daizezeba jarabʉ ũrĩkaude. Adewara maʉ̃ba nezrʉgabisi akʉza yãrãta sewasi. (Heb 12:14, 15; Jn 13:2; Hch 1:24, 25; Snt 1:14, 15; akʉra JUDAS num. 4.) Mawũã kayiruata obʉ baera Jesubara ũdusi Judas sode kayirua oita krĩchabʉta, maʉ̃ba kʼawuasi iyi sewakĩrãbʉta. (Juan 13:10, 11.)