Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2024 Watch Tower Bible and Tract Society of Pennsylvania
6-12 ENEROBAYEDA
BEDʼEA BIA DAIZEZE BEDʼEADE ŨDUDATA SALMOS 127-134
Yibarirabara bia akʉibara Jeowaba nebia diadara, wũãwũãrata
Jeowaba dayirãʼa nekʼãrẽ omarẽã diabʉra bia akʉibara
9 Jeowaba idaribisi ẽbẽrarãba wũãwũãta todamarẽã akʉza jaradiadamarẽã iyita kãgadamarẽã akʉza iyi ʉ̃rʉ. Jipade yi biabayi mara yibariraba maʉ̃ kʼarea wũãwũãrãra biʼia akʉita, wãrĩnubaira Jeowabara angelera nekʼãrẽ mejãcha oita diasi mamina ãyara dia ẽ basi wũãwũã toira, waya ẽbẽrarãra iyara diasi wũãwũãra tomarẽã akʉza bia dapʉẽnamarẽã maʉ̃ kʼarea Jeowaʼa biga diadaibara iya maʉ̃ nebiata diasi baera, maʉ̃ kʼarea yibarirabara nekʼãrẽ jõma oibara Jeowa ʉ̃rʉ jaradiaita ãyi wũãwũãra (Efes. 6:4; Deut. 6:5-7; Sal. 127:3). Jeowabara nekʼãrẽ mejãcha diabʉ yibarira wũãwũãrata bia dapʉẽmarẽã bari jaraita, kartarata, bideorata, trãbirata akʉza artikulorata.
w19.12 26 parr. 20
Yibarira mara wũãwũãra jaradiaidua Jeowata kãgadamarẽã
20 Biʼia ũdukʼawuara bʉ wũãwũãrata. Salmo 127de jarabʉ wũãwũãra enedrʉma kĩrãkʼabʉta (akʉra Salmo 127:4). Enedrʉmararãra jõma abarikabʉ ẽ ʉ̃kʉrʉ wiñakede, ʉ̃kʉrʉ yizromachu akʉza nekʼãrẽ awuru oma. Abarika wũawũãrasida jõmaʉ̃ta abarikachu ẽ, aba abaka awuarapanʉ, maʉ̃ kʼarea yibarirabara akʉdaibara ãyi wũãwũãra sãwũã jaradiaita, wiñakirubʉrʉ jaradiaibara nekʼãrẽ wiñabʉdebema, nekʼãrẽ wũawũãraiatabemata ãya nesidabʉde kʼarebaita, yi zromabʉrʉ nesida jaradiaita nekʼãrẽ yizromaba kʼawuaibarata. Krĩchada naʉ̃rai mebẽrã ʉ̃rʉ, ãya jarabʉ: «Daiba dai wũãwũãrabawara Daizeze Bedʼea ʉ̃rʉ kʼawuabʉrʉdera ãyi aba abakaʉ̃me kʼawuabasi ãbaʉba opana ẽ basi». Yi mebẽrã buruba kʼawua jaraseabʉ ãyi mebẽrãne maʉ̃ta oibara kʼawuaita mawũa ẽ bʉrʉ maʉ̃ oira nesida ẽ kʼawuaita.
Jʉrʉda nekʼãrẽ biʼiabʉta Daizezedebemata
it-1 543
Chirua Daizeze Bedʼeade jarabʉta
Salmistaba jarasi wũãwũãrãra olibo bakuru tutunuminabari kĩrãkʼabʉta (Sal. 128:1-3). Olibo bakuru juwata jãpe ubʉrʉdera pãwãrabʉ awuru bakuru olibodeta adewara olibo bakuru zõrãbʉta tʉnʉbʉrʉdera naʉ̃rãra mejãcha waribʉrʉba kʼarebabʉ yi bakuru olibode zarea bʼaita akʉza bei ẽ marẽã, maʉ̃ olibo bakuru tʉnʉbʉ kĩrãkʼabʉ wũãwũãrata ãyi zeze audu kʼarebapanʉ ãyi mebẽrãbawara sobia bʼaita.
13-19 ENEROBAYEDA
BEDʼEA BIA DAIZEZE BEDʼEADE ŨDUDATA SALMOS 135-137
Jeowara audre yi zroma wuabema Daizeze zeri ẽãira
it-2 675 parr. 4, 5
Nekʼãrẽbʉba ũdubibʉ yi maʉ̃ odara mejãcha zareabarabʉta
Jeowaba nekʼãrẽ parãna iya kãgade zokʼabʉba ũdubibʉ iyira Daizezearata. Jeowaba naʉ̃ drʉade nekʼãrẽ parãnaba akʉza iya sãwũã parãnaba ũdubibʉ iyira mejãcha zarea barabʉta, mamina Jeowaba bari maʉ̃trʉ oẽ basi, iya nekʼãrẽ audre osi ũdubita religion zeri ẽãraba jarabʉta sewidata akʉza iyi trʉ̃ neneẽã erbaita.
Jeowabara iyi zareata zokʼabʉ iya krĩchabʉ jõma aripe oita iya kãgabʉ ewaride akʉza iya kãgade. Bari jaraita, Jeowabara kuera mawũa ẽ bʉrʉ iya nekʼãrẽ ʉ̃rʉ parãnara iya kãgade zokʼabʉ, iya mejãcha zemarẽã kagãbʉbʉrʉ mejãcha zebibare mawũã ẽ bʉrʉ wiña zebibare adewara krĩcha ẽ poagata mawũã ẽ bʉrʉ doidata, iyara jõma iya kãgade zokʼa erbʉ iya krĩchabʉta aripe oita (Éx. 9:24; 34:10; 1Sa. 12:16-18).
¿Kʼãrẽta jarakĩrãkʉ dayirãitara Jeowaba kãga jõka erbʉra?
16 Dayirã Jeowa edre mĩrʉbʉdera bia sentipanʉ. Mamina edaʉde krĩcha opanʉ akʉza mejãcha sopʉapanʉ. Mawũã nʉmʉnera, ¿Jeowabara sãwũã kʼarebai dayirãra? (Akʉra Salmo 136:23). Yi juwarãra dayirã edre bʉeyi akʉza sobiade kʼarebayi jẽda piradrʉmarẽã (Sal. 28:9; 94:18). Maʉ̃ba sãwũã kʼarebabʉ: Dayirãba kʼawuapanʉne Jeowaba ewari jõmaʉ̃nẽ kʼarebabʉta, kĩrãbebibʉ ũme erpanʉta nebia. Nããra, krĩcha ẽã samabemata dayirãbara erpanʉ sama aduʼa mĩrʉnaita. Yi ũmera, dayirã Zeze ʉ̃tʉbemaitara dayirãra yibiatapanʉ.
Jʉrʉda nekʼãrẽ biʼiabʉta Daizezedebemata
w97 1/1 5 parr. 2
¿Kʼãrẽa jõmaʉ̃ta Daizeze ʉ̃rʉ ibia bedʼeaibara?
Dayirãba krĩchabʉrʉde ẽjũã bia zebʉrʉde neẽ baita zʉbʉriata, neẽ baita kʼai ẽbẽraba nekʼãrẽ audre erbʉta wuabemaraira adewara mia abaʉta kaya ẽ baita akʉza beisida neẽ baita, nekʼãrẽ mitia naʉ̃ drʉadebʉta jõma wua neẽ bai ʉ̃rʉ krĩchabʉrʉdera naʉ̃ba kʼarebabʉ dayirãba Jeowa ʉ̃rʉ ibia bedʼea marẽã (Is. 33:24, Apoc. 21:3, 4, Sal. 72:16).
20-26 ENEROBAYEDA
BEDʼEA BIA DAIZEZE BEDʼEADE ŨDUDATA SALMOS 138-139
Perabia yi edebirãra
w19.01 10 parr. 10
Jeowa ʉ̃rʉ ibia bedʼeadrʉ kongregasione
10 Ãba yi jurebarimae juwa ʉ̃ta waidera, ¿bʉra mejãcha peradoga? Mawũã berabaribʉrʉ krĩcha orarã, bʉta abapai mawũã berabaribʉ ẽ wãrĩnubaira mejãchaʉta mawũã peradogo juwa ʉ̃ta waidera, mamina bigabayi bʉyikʉza krĩchaita, ¿kʼãrẽba mawũã krĩchabibʉta? Mamina bigabayi bʉyikʉza widita, ¿kʼãrẽa mawũã peradogota? ¿Peradogoka juwa ʉ̃ta wãdogode kʼãrẽ jaita jipa kĩrãduatotoi kʼarea, mawũã ẽ bʉrʉ aña jarai kʼarea? Adewara ¿krĩchabʉka wuabemaraba kʼãrẽ jarabʉra audre yibiata bʉa jarabʉira? Wãrĩnubaira mawũã perabaira kayirua ẽ Jeowabara kãga ẽbẽrarã eda krĩchabʉra akʉza krĩchabʉta wuabemarara iyira audre ʉ̃tabʉta (Sal. 138:6; Fil. 2:3). Mamina Jeowabara kãgabʉ bʉa bida kʼãrẽ obʉdeba iyi ʉ̃rʉ ibia bedʼeabimarẽã akʉza mebẽrã ãba yi jurebʉrʉde so zarea diamarẽã (1 Tes. 5:11). Jeowabara bʉra mejãcha kãga adewara iya kʼarebayi bʉa nesidabʉde.
Mayirai yi zarea diaidua ãba yi jʉrebarimae
7 Adewara marara kʼarebaseabʉ akʉza jẽda akʉbʉrʉde awuru karta Jarakabʉ ʉ̃tʉ zebidade. Bari jaradaita, nãã biʼia estudiara (Prov. 21:5). Bʉta bia estudiabʉbʉrʉ kʼawuabayi komentario diabʉrʉde kʼãrẽ jaraita, adewara komentario diabʉrʉde mejãcha bedʼearãra (Prov. 15:23; 17:27). Bʉ bedʼeabʉrʉdera wiña bedʼeaseabʉ, maʉ̃ba jaraseabʉ bedʼea ũme mawũã ẽ bʉrʉ aba, maʉ̃ba kʼarebayi bʉra. Dayita mejãcha bedʼeabʉbʉrʉ mebẽrãbara ũrĩna ẽ bayi mejãcha, mamina wika bedʼeabʉbʉrʉ audre ũrĩnañi. Bʉ mawũã wika bedʼeabʉba akʉza bʉ bedʼeadebʉ jarabʉba, ũdubibʉ bʉra wãrĩnu estudiasita akʉza ũrĩsita.
Jʉrʉda nekʼãrẽ biʼiabʉta Daizezedebemata
it-2 635 parr. 7
Nemitia kĩrãduaita
Ẽbẽra abaʉba dayima ẽã bʉta obʉrʉdera Jeowabara kãgabʉ dayirãba maʉ̃ba aña odara kĩrãduadamarẽã (Luc. 17:3, 4; Efes. 4:32; Col. 3:13). Adewara dayirãba iya aña odata kĩrãduara Jeowabida kĩrãduayi dayirãba nemitia obʉra, Jeowabara ẽbẽra aba kongregasiondeba ãĩ wãbʉrʉdera maʉ̃ ẽbẽrata jẽda krĩchara Jeowabara kĩrãduabʉ iyi nemitiara (1Cor 5:13; 2Cor. 2:6-11). Mamina ẽbẽra abaʉba nemitiata krĩrĩña obʉbʉrʉ akʉza maʉ̃ kʼarea jẽda krĩcha ẽ bʉrʉ naʉ̃ ẽbẽrarã Jeowa nejʉra kĩrãkʼabʉ maʉ̃ kʼarea Jeowabara widi ẽ maʉ̃ ẽbẽra nemitiara dayirãba kĩrãduamarẽã (Heb 10:26-31; Sal 139:21, 22).
27 ENERODEBA-2 FEBRERO EDA
BEDʼEA BIA DAIZEZE BEDʼEADE ŨDUDATA
¿Bʉ yiwidʼidade tẽã kʼãrẽta oi?
«Biʼia ũrĩrã buru biaba bedʼea jarabʉra»
13 Akʉdadrʉ Jeowaba ũrãgʼa diabʉrʉde dayirãʼa kãga ũdubibʉta. Jeowabara nebiata kãgabʉ dayirãitara (Prov. 4:20-22). Jeowaba dayirã ũrãgʼa diabʉrʉdera Daizeze Bedʼeadeba, kartaraneba mawũã ẽ bʉrʉ mebẽrã kongregasionebemaneba mawũã ũdubibʉ dayirã kãgabʉta akʉza «iyara dayirãra kʼẽãbʉ bia bamarẽã» (Heb. 12:9, 10).
14 Biʼia ũrĩda kʼãrẽta jarakĩrãbʉta krĩcharara sãwũã jaradiadata. Dayirã jõmaʉ̃ba ũrãgʼa diabʉrʉdera ibiade jaradiaibara (Gál. 6:1). *Mamina edaʉde awuruba dayirãʼa ũrãgʼa diasibʉrʉ, krĩchaseapanʉ ũrãgʼara ũrĩkĩrã ẽãta ibiade bedʼea ẽ basi baera. Krĩchaibara kʼãrẽta jaradiakĩrãpanasita krĩcha ẽ baibara dayirãʼa sãwũã bedʼeada ʉ̃rʉ, mawũã oira dayikʉza widiseapanʉ: Mʉ̃a kãga ẽ basimina mʉ̃a sãwũã jaradiadata, ¿kʼãrẽta kʼawuaseabʉ maʉ̃ ũrãgʼadeba? Dayirãba krĩchabʉbʉrʉ yi ẽbẽra daya ũrãgʼa diabʉra nemitia omiata, zare bayi ũrĩta iyi ũrãgʼara, mamina dãyirata buru bia bʉrʉ akʉdayi kʼãrẽta kʼawuaseabʉta iya ũrãgʼa diabʉdeba iyi nemitia omiamina (Prov. 15:31).
w10 15/3 32 parr. 4
Bedʼea zroma erbʉmina dayi sora neneẽa erbaseabʉ
Wãrĩnu dayirãba bedʼea zroma erbʉrʉdera mejãcha krĩcha obʉ, mamina yibiabayi nokʼo Davidʼde kĩrãkʼa oita, David zʉbʉriade berabarisidera, ¿kʼãrẽba kʼarebasi? Iyara jẽda kĩrãbesi Jeowaba nãã iyita mawũã ẽ bʉrʉ awuru ẽbẽrarã Jeowa odepanʉra sãwũã kʼarebadata (Sal. 143:4, 5). Abarika dayirãba bedʼea zroma ũdubʉrʉde jẽda kĩrãbedara naweda Jeowaba dayirã sãwũã kʼarebadata naʉ̃ba so zarea diayi bedʼea zroma jõma ũdupanʉne.
w15 15/3 32 parr. 2
¿Idi basidu ũduseabʉka ẽbẽrarã Daizeze odebʉʼʉ̃mebʉrʉ juwa jidabʉta?
Edaude dayirãbara kãgabʉ Jeowaba dayi bedʼeata mesera panʉmarẽã nokʼo Davidba kãgabada kĩrakʼa, mamina jʉ̃ã kʼawuabʉta ũdubibara, Daizeze Bedʼeata akʉibara akʉza maʉ̃ ʉ̃rʉ krĩchaibara, mawũã opanʉbʉrʉ biʼia kʼawuadayi Jeowaba kʼãrẽta omarẽa kãgabʉta dayirãba akʉza kʼawuadayi iya nawedabema ẽbẽrarã sãwũã biʼia akʉdata. Mawũã opanʉba kʼarebayi iyi ʉ̃rʉ audre ĩjãita akʉza nekʼãrẽ iyima ẽã bʉta oẽ baita.
Jʉrʉda nekʼãrẽ biʼiabʉta Daizezedebemata
it-2 682
Beneno
Yiza. Daizeze Bedʼeaba jarabʉ ẽbẽra abaʉba awuru ʉ̃rʉ imitia bedʼea bʉrʉdera naʉ̃ra dama beneno kĩrãkʼa bʉta, maʉ̃ ẽbẽra ʉ̃rʉ aña krĩchabibʉ baera wuabemara (Sal. 58:3, 4). Dayirã kĩrãmeta zokʼapanʉbʉrʉ sewida jaraita, awuru ʉ̃rʉ imitia bedʼeaita mawũã ẽ bʉrʉ nekʼãrẽ awuru mitia jaraya maʉ̃nera naʉ̃ra beneno kĩrãkʼabʉ (Sal. 140:3; Rom. 3:13, Sant. 3:8).
3-9 FEBREROBAYEDA
BEDʼEA BIA DAIZEZE BEDʼEADE ŨDUDATA SALMOS 144-146
«Pʉwʉrʉra sobiapanʉ kʼawuapanʉ baera ãyi Zezera Jeowata»
w18.04 32 parr. 3, 4
Lepanʉraba widipanʉta
Salmo 144 yi 12 bayeda ũdupanʉ kʼẽrẽpanʉraba kʼãrẽ nebia ũdudaita 12. Yi wiñakiru 15de kʼawuapanʉ pʉwʉrʉ aba sobia bʼaira, maʉ̃ pʉwʉrʉbara Daizeze Jeowabʉrʉ yiwidʼibarata.
Salmo 144de ũdubibʉ Davidba kʼãrẽaba ĩjãbasita Jeowaba iyi pʉwʉrʉ Israel ãyi nejʉrãraneba ẽdrʉbibʉrʉdera mejãcha nebiata diaibasita akʉza ãyira audre bia panaibasita. Maʉ̃ta aripe berabarisi Salomón nokʼo baside, maʉ̃nera Jeowa pʉwʉrʉra aduʼa basi akʉza mejãchade bia basi ãyira. Maʉ̃ba ũdubisi Jesúsba zokʼabʉrʉdera sãwũã panaita.
Dayirãba jʉ̃ãbʉra zarea erbaibara
16 Dayirãba ewari jõmaʉ̃nẽ bʼaita jʉ̃ãbʉra Daizezeba nebia diada. Dayirãba jʉ̃ãpanʉ nebia zeita akʉza ĩjãpanʉ maʉ̃ra aripe berabarita. Dayirãba nebia jʉ̃ãbʉra, nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ, so zarea diabʉ baera bedʼea zroma awuantaita, pẽwãbʉdade awuantaita akʉza beidebida. Adewara dayirãba nebia jʉ̃ãbʉra kasko kĩrãkʼabʉ, kʼarebabʉ baera dayirã krĩchata, mawũã krĩcha kayirua ãĩ bʉeita akʉza nebiata krĩchaita. Maʉ̃ nebia Daizeze Bedʼeadebʉba, kʼarebabʉ dayirã Daizeze kʼawa bʼaita akʉza kʼawuaita iya dayirãra mejãcha kãgata. Dayirãba nebia jʉ̃ãbʉ zarea ĩjãbʉba kʼarebayi nebia mejãcha ũduita.
17 Pabloba naʉ̃ta jarasi romanoraʼa: «Sobiaidua ʉ̃ra zei jʉ̃ãpanʉ kʼarea» (Rom. 12:12). Pablora sobiabasi, kʼawuabasi baera iyita kʼẽrẽpabasibʉrʉ ʉ̃ta wãseabasita. Dayirãsida sobia baseapanʉ nebia jʉ̃ãpanʉ kʼarea, kʼawuapanʉ baera Jeowaba aripe oita iya oya adara. Salmistaba jarasi: «Sobiabʉ [...] yi Daizeze Jeowa ʉ̃rʉ jʉ̃ãpanʉra [...] iyira ewari jõmaʉ̃nẽ kʼẽrẽpabʉ» (Sal. 146:5, 6).
w18.01 26 parr. 19, 20
¿Kʼãrẽ kãgaba wãrĩnu sobiabibʉ dayirãra?
19 Idi ewadera ẽbẽrarã naʉ̃ drʉadebemara audre so kayirua wã. Ãyikʉzabʉrʉ krĩchabʉ mejãcha plata erbai ʉ̃rʉ, adewara ãya kãgatrʉ okĩrãbʉ, ewariza audre krĩchabʉ ãyara. Maʉ̃ra ẽbẽrarã wãrĩnu sobiapanʉ ẽ, mamina Daizeze Bedʼeaba jarabʉ kʼairatrʉ wãrĩnu sobia bʼaita. Salmistaba naʉ̃ta jarasi: «Sobiabʉ yi Jacob Daizeze kʼareba erbʉra, yi Daizeze Jeowa ʉ̃rʉ jʉ̃ãpanʉra» (Sal. 146:5).
20 Jeowa ode panʉrabara Jeowara mejãcha kãgapanʉ. Poagaza ũdupanʉ ẽbẽrarã mejãchaʉba ũdukʼawuapanʉta iyita akʉza mejãcha kãgapanʉta. Naʉ̃ba ũdubibʉ atiara wãrĩnu Jeowa nokʼoba zokʼanʉmʉta akʉza aranʉbai maʉ̃ nokʼobara nebia dayirãbara krĩcha ẽãta weita dayirãita. Jeowaba zokʼabʉta obʉta kʼawuapanʉ baera naʉ̃ba wãrĩnu sobiabibʉ. Naʉ̃ sobiara atiara jõtoto ẽ, ewari jõmaʉ̃nẽ mawũã bayi.
Jʉrʉda nekʼãrẽ biʼiabʉta Daizezedebemata
it-1 142 parr. 8
Nedʉwʉrʉra
Daizeze Bedʼeaba jarabʉ nedʉwʉrʉrãra bia akʉibarata. Jeowabara jarabʉ naʉ̃ra nedʉwʉrʉrãra iya akʉbʉta ãya nesidabʉta diabʉta (Prov. 12:10; Sal. 145:15, 16). Moisés leyba jarabasi nedʉwʉrʉrãra dedabemara bia akʉibarata. Ẽbẽra abaʉba nedʉwʉrʉta aduadata ũdusibʉrʉ jẽda diabaribarabasi iyi yibariʼa, mawũã ẽ bʉrʉ ũdusibʉrʉ nedʉwʉrʉ aba zʉgʉaba kabari tabʉta kʼarebaibarabasi maʉ̃ zʉgʉa ãĩ bʉebʉta (Ex. 23:4, 5). Akʉza aukʼara trajabi ẽ baibarabasi nedʉwʉrʉrãra (Deut. 22:10; 25:4). Sabado ewaridera israelitarãra traja ẽ basi, ãyi nedʉwʉrʉrasida trajabida ẽ basi ãyi dera (Ex. 20:10; 23:12; Deut. 5:14). Mamina basibʉrʉ nedʉwʉrʉra dayi neida oseabʉta maʉ̃ra beibarabasi mawũã ẽ bʉrʉ yi yibariba biʼia akʉibarabasi (Gén. 9:5; Ex. 21:28, 29).
10-16 FEBREROBAYEDA
BEDʼEA BIA DAIZEZE BEDʼEADE ŨDUDATA SALMOS 147-150
Nekʼãrẽ mejãcha kʼarea Jeowa ʉ̃rʉ ibia bedʼeaita erpanʉ
w17.07 18 parr. 5, 6
¿Kʼãrẽa jaradaibara Jeowa ʉ̃rʉ ibia bedʼeamarẽã?
5 Nawedara Jeowabara Israel pʉwʉrʉ jõmaʉ̃ʼa so zarea diabasi, maʉ̃ awuara israelitara aba abaka so zarea diabasi. Idi ewadebida abarika obʉ iyara. Salmo 147:3ba jarabʉ: «Yi sopʉa panʉrãra aduʼa babibʉ akʉza ãyi pʉata bebibʉ». Dayirã kayabʉdera, mawũã ẽ bʉrʉ sopʉabʉdera ĩjãsea panʉ Jeowaba wãrĩnu kʼarebaita dayirãra akʉza iya dayirã zarea diaita badu bedʼea zroma ũdubʉ awuantaita (Sal. 34:18; Is. 57:15; Sant. 1:5).
6 Salmistaba jarasi Jeowabara chĩdaurãra aba abaka trʉ̃ga erbʉta akʉza jʉacha erbʉta (Sal 147:4). Wãrĩnu bʼaira maʉ̃ oira zare chĩdaura mejãchabʉ baera. Maʉ̃ba Jeowabʉrʉ abapaiba jʉachaseabʉ akʉza trʉ̃ diaseabʉ chĩdaura aba abakaʉʼa (1 Cor. 15:41). ¿Kʼãrẽta jaradiabʉ naʉ̃ba? Jeowaba chĩdaura aba abaka sama bʉta kʼawuabʉ kĩrãkʼa abarika iyara kʼawuabʉ dayirã aba abaka sama bʉta, sãwũã sentibʉra akʉza kʼãrẽta nesidabʉta.
w17.07 18 parr. 7
¿Kʼãrẽa jaradaibara Jeowa ʉ̃rʉ ibia bedʼeamarẽã?
7 Jeowabara kʼawuabʉ dayirã aba abakaʉba kʼãrẽ bedʼea zroma ũdubʉra akʉza wãrĩnu bʼaira iyira zarea barabʉ dayirãba kʼãrẽta nesidabʉrʉde kʼarebaita (akʉra Salmo 147:5). Edaʉde daya krĩchaseabʉ daya bedʼea zroma ũdubʉ kʼarea wua kʼãrẽ obe ẽãta, neẽãta sãwũã ẽdrʉita maʉ̃neba, mamina kĩrãbedaibara Jeowaba kʼawuabʉta dayirãba sainʉ oseabʉta akʉza iya kʼawuachuta dayirãra egoro omata (Sal. 103:14). Dayirãra nemitia omia baera badua nemitia obʉ, badua nekʼãrẽ aña obʉ. Adewara dayirãba, nekʼãrẽ aña krĩchada kʼarea, nekʼãrẽ aña oda kʼarea jẽda krĩchaseabʉ, maʉ̃ kʼarea sopʉabaseabʉ. Mamina kʼawuapanaibara Jeowabara biʼia kʼawuabʉta dayirãba kʼãrẽ bedʼea zroma ũdubʉra. Iyira maʉ̃ne berabarikamina iyara biʼia kʼawuabʉ sãwũã sentibʉra dayirã (Is. 40:28).
w17.07 21 parr. 18
¿Kʼãrẽa jaradaibara Jeowa ʉ̃rʉ ibia bedʼeamarẽã?
18 Salmistabara jarasi Jeowaba israelitara diasita nekʼãrẽ bia awuru pʉwʉrʉa dia ẽ badata, ¿saʉ̃ta? Iyi bedʼeata akʉza iyi leyta (akʉra Salmo 147:19, 20). Idi ewade dayirãbida diasi nekʼãrẽ bia awurura dia ẽ badata, ¿saʉ̃ta? Iyi trʉ̃ ʉ̃rʉ kʼawuabita awurura. Adewara dayirãbara ũdukʼawuapanʉ Daizezeta akʉza iyi Bedʼeata, maʉ̃ kʼarea iya dayirã maʉ̃ta dayirãta diabʉ kʼarebaira iyi neũdukʼawua baseapanʉ. Maʉ̃ba mejãchade biga diadaibara iyaʼa. Salmo 147 bʉda kĩrãkʼa dayirãbida erbʉ kʼãrẽ kʼarea Jeowa ʉ̃rʉ ibia bedʼeaira. Adewara kãgapanʉ wuabemarabida abarika iyi trʉ̃ ʉ̃rʉ ibia bedʼeadamarẽã.
Jʉrʉda nekʼãrẽ biʼiabʉta Daizezedebemata
Jeowabara erbʉ ewari iya krĩchabʉ aripe berabaribira
Poagaza israelitarabara ũdupanasi ibana cigüeñara febrerodeba mayobayeda wãbari wãbʉta awuru drʉaeda. Jeowabara jarasi israelitara cigüeñabara kʼawuabʉta kʼãrẽ ewaride wãibarata awuru drʉaeda (Jer. 8:7). Jeowaba naʉ̃ra ibanara kʼawuabida kĩrãkʼa kʼãrẽ ewaride awuru drʉaeda wãibarata, Jeowabida kʼawuabʉ kʼãrẽ ewaride kʼawua oita ẽbẽrarã. Dayirãba kʼawuabʉrʉde ibanaraba kʼawuabʉta kʼãrẽ ewaride drʉa jãpe wãibarata, naʉ̃ba Jeowa ʉ̃rʉ ĩjãbibʉ iyara kʼawuabʉta kʼãrẽ ewari zeita ẽbẽrarã kayiruarãra makenaita (Hab. 2:3).
17-23 FEBREROBAYEDA
BEDʼEA BIA DAIZEZE BEDʼEADE ŨDUDATA PROVERBIOS 1
Warrara, ¿marabara kʼai bedʼeata ũrĩ?
w17.11 29 parr. 16, 17
Idaribi ẽ baibara nekʼãrẽ baduba aduabimarẽã bia jʉ̃ãbʉta
16 Edaʉde bʉa krĩchabaribaibara bʉ yibarirabara biʼia kʼawua ẽãta bʉ sãwũã sentibʉra, ãyara aukʼara kĩrʉbʉta. Adewara mawũã krĩchabʉba bʉaʼa krĩchabiseabʉ Jeowaba ode bʼaira zeri ẽãta. Mamina bʉa Jeowa ota idubʉra kʼawuayi bʉ yibariraba bʉ kãgabʉ kĩrãkʼara akʉza kongregasionebemaraba kãgabʉ kĩrãkʼara mia abaʉ ẽbẽraba kãga ẽãta.
17 Bʉ yibariraba kʼẽãira jipade yibia (Heb. 12:8). Edaʉde dayaʼa ũrãgʼa diabʉrʉdera dayara ũrĩkĩrãkʉ maʉ̃ra. Mamina ũrĩamabʉ dayaʼa sãwũã jarakʉanʉta. Jipade yibia bayi edaʉde krĩchaita ãya kʼãrẽ ũrãgʼa diabʉ ʉ̃rʉ sãwũã jarabʉta krĩchaikʼaude. Adewara ũdubita aduʼabʉta akʉza zarea oita kĩrʉ ẽ baita ãya sãwũã jarabʉ kʼarea. Daizeze Bedʼeaba jarabʉ yi krĩcha bia erbʉra aduʼabʉta, mesera kĩrʉ ẽãta (Prov. 17:27; 1:8). Akʉza bʉ yibarita Jeowa ode bʉbʉrʉ, ãya Jeowata kãgabʉbʉrʉ, maʉ̃ra jipade yibia bʉitara ãya kʼarebaseabʉ baera bʉabida ũdumarẽã Jeowaba aranʉbai nebia diaya abʉta.
w05 15/2 19, 20 parr. 11, 12
Zarea oibara ewari jõmaʉ̃nẽ Jeowaba kãgabʉde bʼaita
11 Zarea oibara audre Jeowaba kãgabʉta oita akʉza ẽbẽrarãba kãgabʉta oẽ baita. Idi ewadera jõmaʉ̃ba erbakĩrãbʉ neũdukʼawuarata. Maʉ̃ba jʉrʉbʉ sãwũã ãyibawara ãba bʼaita, nekʼãrẽ oita ãya bia akʉdamarẽã. Mamina kĩrãbedaibara edaʉde maʉ̃ra neũdukʼawuarabara kʼareba ẽ baita daya nebiata omarẽã, awuarabʉrʉ ãyira dayiʉ̃me bakĩrãbʉ ãya okĩrãbʉta oita (Proverbios 1:11-19). Jeowa ode bʉba kayirua onʉmʉnera wuabemara jara ẽ iyira Jeowa ode bʉta (Salmo 26:4). Maʉ̃ba Pabloba ũrãgʼaside jarasi ẽbẽrarã naʉ̃ drʉadebemaba obʉ kĩrãkʼa oda ẽ baibara. (Romanos 12:2). Jeowaba dayirã zarea diaseabʉ maʉ̃ kayirua yi edebi ẽ baita (Hebreos 13:6).
12 Awuru ẽbẽrarãba Jeowaba kãga ẽãta omarẽã bʉdera dayirãbara kĩrãbedaibara audre yibiata Jeoware kʼẽrẽpa bʼaita ẽbẽrarãba jarabʉta ũrĩkʼaude. Éxodo 23:2 de jarabʉ: «Ẽbẽrarã naʉ̃ drʉadebʉ kĩrãkʼa orãra». Ewari aba israelitaraba krĩchasida Jeowabara ãyira bia akʉ ẽãta maʉ̃nera Calebʼbara ũdubisi maʉ̃ra ẽbẽraba jarabʉare bʉ ẽãta iyira, awuarabʉrʉ ũdubisi ĩjãbʉta Jeowabara iyi pʉwʉrʉra wãrĩnu bia akʉseabʉta. Maʉ̃neba nebiata ũdusi Calebʼbara (Números 13:30; Josué 14:6-11). Idi ewade dayirãbida iyide kĩrãkʼa oseabʉ, ẽbẽrarãba jarabʉ yi edebi ẽãne akʉza audre neũdukʼawua babʉrʉde.
Jʉrʉda nekʼãrẽ biʼiabʉta Daizezedebemata
it-2 1142
Krĩcha neẽ
Daizeze Bedʼeade krĩcha neẽã bʉbara jarakĩrãkʉ ẽ ẽbẽra aba iyi buru morro kayabʉta mawũã ẽ bʉrʉ nekʼãrẽ oibarade bia obe ẽ chuta, awuarabʉrʉ audrera jarakĩrãbʉ ẽbẽra nekʼãrẽ oi nãã bia krĩcha ẽãta. Adewara jõma iya kãgabʉde obʉta Daizezeba jarabʉ ẽãne.
24 FEBRERODEBA-2 MARZO EDA
BEDʼEA BIA DAIZEZE BEDʼEADE ŨDUDATA PROVERBIOS 2
Kʼãrẽã estudiakĩrãne estudiaibara
Wãrĩnu ode panadrʉ
16 Edaʉde dayirãitara zare leita akʉza estudiaita. Jeowaba dayirã jarabʉ jʉrʉdamarẽã wãrĩnu ʉ̃rʉ audre biʼia kʼawua wãita (akʉra Proverbios 2:4-6). Dayirãta zarea opanʉbʉrʉ bia wãñi. Mebẽã aba yi trʉ̃ Coreyba jarabʉ iya Daizeze Bedʼea lebʉrʉde ũdura nejʉacha zake aba iya kãgabʉta, maʉ̃ ʉ̃rʉ audre kʼawuabʉ. Iya jarabʉ: «Daizeze Bedʼea lebʉrʉde, akʉbʉ notarata akʉza awurura testo maʉ̃ kĩrãkʼa bedʼeabʉta, adewara jʉrʉbʉ kartarane maʉ̃ testo ʉ̃rʉ audre biʼia jara ũrĩbʉta. Mʉ̃a maʉ̃ta obʉrʉdera audre kʼawuabʉ». Dayirãba Daizeze Bedʼea akʉbʉrʉde naʉ̃ne kĩrãkʼa opanʉbʉrʉ, ũdubidayi wãrĩnuta kãgapanʉta. Ewari jʉrʉpanʉ baera akʉza zarea opanʉ baera audre kʼawuaita (Sal. 1:1-3).
Buru bia wãrĩnuarabara trʉ̃nʉmʉ
3 Buru biabara jarakĩrãbʉ bia zokʼaita dayirãba kʼawuabʉta krĩcha bia jidaita. Mamina maʉ̃ awa ẽ. Daizeze Bedʼeaba jarabʉ: «Jeowaʼa wawia ũdubibʉdeba zebʉ buru biara, Neneẽãbʉ ʉ̃rʉ kʼawuaiba ũrĩ kʼawuabibʉ» (Prov. 9:10). Maʉ̃ba dayirãba nekʼãrẽ jidai naweda krĩchaibara Jeowaba krĩchabʉ kĩrãkʼa, kʼawuaita Jeowaba sãwũã krĩchabʉta dayirãba oitabʉ ʉ̃rʉ. Naʉ̃ta oseabʉ Daizeze Bedʼea estudiabʉrʉde akʉza dayirã kartarata. Mawũã opanʉnera ũdubipanʉ dayirãra buru biata (Prov. 2:5-7).
4 Jeowabʉrʉ wãrĩnu diaseabʉ buru biara (Rom. 16:27). Nããra, nekʼãrẽ jõmabʉra Jeowaba parãsi baera, iyara biʼia ũdukʼawuabʉ iya parãnara (Sal. 104:24). Ũmeta, Jeowaba nekʼãrẽ jõma obʉba ũdubibʉ iyira buru biata. (Rom. 11:33). Ũbeata, Jeowaba ũrãgʼa diabʉbara kʼarebabʉ yi ẽbẽrarã maʉ̃ bedʼea ũrĩbʉrãra (Prov. 2:10-12). Dayirãta buru bia bakĩrãpanʉbʉrʉ, Daizeze Bedʼeade nãã kʼawuadata ĩjãibara akʉza iduaribibara naʉ̃ba kʼawua jaramarẽã sãwũã krĩchaita akʉza kʼãrẽta oita.
w16.09 23 parr. 2, 3
Warrara bʉa ĩjãbʉra zarea erbara
2 Edaʉde ẽbẽrarãba kãgabʉ bʉa ãyi krĩchabʉ kĩrãkʼa krĩchamarẽã. Maʉ̃nera, ¿bʉara kʼãrẽta oi? Biga bayi bʉ jʉra kʼawuabamarẽã, mawũã bʉa ĩjãbʉta adua ẽ bʼaita. Maʉ̃itara bʉa zokʼaseabʉ Jeowaba bʉaʼa nebia diadata. Bʉyikʉzaʉba krĩchaita kʼãrẽta jidakĩrãbʉta, Maʉ̃ba kʼarebayi naʉ̃ drʉade bʉa yi edebi ẽ bʼaita (akʉra Proverbios 2:10-12).
3 Bʉa ĩjãbʉ zarea erbaita audre kʼawuaibara Jeowa ʉ̃rʉ (1 Tim. 2:4). Maʉ̃itara yibia bayi Daizeze Bedʼea lebʉrʉde akʉza dayirã kartara akʉbʉrʉde bari ʉ̃rʉ akʉ ẽ baita awuarabʉrʉ biʼia krĩchaita maʉ̃ba kʼãrẽta jaradiakĩrãbʉta (Mat. 13:23).
Jʉrʉda nekʼãrẽ biʼiabʉta Daizezedebemata
it-1 1244 parr. 4
Kʼẽrẽpa bara
Dayi Jeowa ode kʼẽrẽpa bʼaira, dobaʉba obe ẽ. Ĩjãibara Jeowa ʉ̃rʉ akʉza iya wãrĩnu kʼarebaita (Sal. 25:21). Jeowaba jarabʉ iyira jõʉ̃drʉbari kĩrãkʼa bʉta akʉza torre kĩrãkʼa. ¿Sãwũã obʉ maʉ̃ra? Iyara akʉbʉ iyi ode panʉrãra, kʼarebabʉ kʼẽrẽpa panamarẽã iyi ode (Prov. 2:6-8; 10:29; Sal. 41:12). Ẽbẽra mawũã bʉbara audre krĩchabʉ iyira Jeowaba kãgabʉde baita. Ẽbẽra mawũã bʉbara audrera jʉrʉbʉ Jeowaba iyita bia akʉmarẽã. Maʉ̃ba kʼarebabʉ iyi kʼẽrẽpabʉta idubʉ ẽ baita (Sal. 26:1-3; Prov. 11:5; 28:18). Wãrĩnubaira naʉ̃ drʉara Diaruba zokʼabʉ baera Jeowa ode kʼẽrẽpapanʉrãra zʉbʉriapanʉ akʉza beipanʉ, mamina Jeowaba jarabʉ iyara naʉ̃ra ẽbẽrarãra kĩrãdua ẽãta. Maʉ̃ba ẽjũã kĩrãwarẽã zebʉrʉde nebiata mejãcha diayi ãyaʼa (Job. 9:20-22; Sal. 37:18, 19, 37; 84:11; Prov. 28:10).