Wãrĩnu ode panadrʉ

1. ¿Sãwũã kʼarebabʉ awurua jaraita sãwũã Jeowa ʉ̃rʉ Kʼawuabibarira basita?

«¿SÃWŨÃ ũdukʼawuasi wãrĩnuarãra?». Naʉ̃ kʼãwũã widibʉra dayirãba edaʉde panʉbaribaibara, naʉ̃ widira opanʉ baera mebẽrã ũdukʼawuakĩrãpanʉne. Dayirãbara kʼawuakĩrãpanʉ mebẽrãba Jeowa sãwũã ũdukʼawuadata akʉza dayirãra sobiapanʉ ãyaʼa jara ũrĩbibʉrʉde kʼãrẽa Jeowa ode panʉta (Rom. 1:11). Naʉ̃ ʉ̃rʉ bedʼeaira mejãchade biga kĩrãbebi baera kʼãrẽa yibiata Jeowa ʉ̃rʉ Kʼawuabipanʉrã bʼaita akʉza zarea diabʉ Jeowaba kãgabʉde bʼaita, mawũã iya dayirãta bia akʉmarẽã (3 Juan 4).

2. ¿Kʼãrẽta kʼawuadayi naʉ̃ artikulodera?

² Naʉ̃ artikulode kʼawuadayi dayirãba kʼãrẽa kãgata Jeowa ode bʼaita. Mawũẽra kʼawuadaya dayirãba sãwũã kãga ũdubibarata naʉ̃ nebia kʼarea akʉza maʉ̃ ʉ̃rʉ kʼawuaiba kʼarebayi dayirãba Jeowaʼa biga diaita iyi pʉwʉrʉeda wesi baera (Juan 6:44). Adewara zarea diayi awurua jaradiaita wãrĩnu ʉ̃rʉ.

DAYIRÃBARA KʼÃRẼA KÃGA «WÃRĨNURA»

3. ¿Kʼãrẽa kãgapanʉ wãrĩnuarãra?

³ Dayirãba kãga wãrĩnura, ¿kʼãrẽa? Jeowata kãgapanʉ baera akʉza wãrĩnura Jeowadeba zebʉ baera. Iyi Bedʼeadeba kʼawuaseapanʉ, Jeowara mejãcha zarea barabʉta akʉza iyira Zeze biata, dayirã ʉ̃rʉ krĩchabʉ baera (1 Ped. 5:7). Dayirãba kʼawuapanʉ dayirã Daizezebara «so zʉbʉria akʉbʉ akʉza nebia obʉ, kĩrʉmia ẽ akʉza kãga jõka mejãcha erbʉ akʉza wãrĩnuara» (Éx. 34:6). Jeowabara kãga aripe oita (Is. 61:8). Dayirã zʉbʉriabʉta ũdubʉrʉdera, Jeowara mejãcha sopʉabʉ, maʉ̃ kʼarea jõbikĩrãbʉ zʉbʉriara (Jer. 29:11). Kʼãrẽ yibia maʉ̃ra, maʉ̃ba dayirãbara Jeowara mejãcha kãgapanʉ.

4, 5. ¿Kʼãrẽa Pablobara jarasi nebia dayirãba jʉ̃ãbʉra nekʼãrẽ zʉgʉa jãba ʉ̃rʉ bʉ kĩrãkʼabʉta?

⁴ Adewara, ¿kʼãrẽ kʼarea kãgapanʉ wãrĩnura? Wãrĩnu ʉ̃rʉ kʼawuaiba mejãcha kʼarebabʉ baera. Bari jaraita, wãrĩnu ʉ̃rʉ kʼawuaiba nebiata jʉ̃ãbibʉ. Maʉ̃ nebia jʉ̃ãira kʼãrẽa yibiata ũdubita, Pablobara naʉ̃ra bʉsi: «Dayirãba jʉ̃ãpanʉra, wãrĩnu akʉza teiteabʉ, maʉ̃ra nekʼãrẽ zʉgʉaba jãba aña wã ẽ baita kʼarebabʉ kĩrãkʼabʉ dayirã bebʉta» (Heb. 6:19). Nekʼãrẽ zʉgʉaba jãba aña wã ẽ baita kʼarebabʉ kĩrãkʼa, dayirãba nebia Daizeze Bedʼeade kʼawuabʉba kʼarebayi dayirã aduʼa bʼaita bedʼea zroma ũdubʉrʉde.

⁵ Pabloba naʉ̃ jarasidera, bedʼeasi nebia ʉ̃ta wãiraba jʉ̃ãbʉ ʉ̃rʉ. Mamina naʉ̃ bedʼeara yibia ẽbẽrarã egoro biade bakĩrãpanʉraitabida (Juan 3:16). Ewari jõmaʉ̃nẽ bʼai ʉ̃rʉ kʼawuabʉba kʼarebabʉ dayirã mejãcha sobia bʼaita.

6, 7. ¿Sãwũã kʼarebasi Yvonnera wãrĩnuta kʼawuaita nekʼãrẽ ʉ̃ra zei ʉ̃rʉ?

⁶ Kʼawuadayi mebẽã Yvonne nebʉrata. Iyira Jeowa ode wari ẽ basi, maʉ̃ba mejãcha perabasi bei kʼarea. Iya kĩrãbesi bedʼea iya ledata, naʉ̃ bedʼeabara jarabasi: «Badu ewaride jõmaʉ̃ta beiyi». Iya jarasi: «Mʉ̃a maʉ̃ leda kʼarea mʉ̃ra kʼãĩ ẽ basi akʉza mejãcha krĩchasi ʉ̃ra zei ʉ̃rʉ. Mʉ̃a krĩchasi: ‹Ʉ̃ra zeidera nebiata zeibaibara. ¿Mʉ̃ra kʼãrẽabʉ namara?›. Mʉ̃ra bei amabasi».

⁷ Iyi warida tẽã, Yvonnebara ũdukʼawuasi ʉ̃kʉrʉ ẽbẽrarã Jeowa ʉ̃rʉ Kʼawuabipanʉrãta. Iya tẽã jarasi naʉ̃ta: «Mʉ̃a ĩjãsi ewari jõmaʉ̃nẽ ẽjũã kĩrãwãreãnẽ baseabasita». Mebẽã Yvonnera, ¿sãwũã kʼarebasi wãrĩnu ʉ̃rʉ kʼawuaiba? Iya jarasi: «Wua krĩcha zroma oẽ basi nekʼãrẽ ʉ̃rabʉrʉ zei kʼarea akʉza bei kʼarea». Yvonneʼita wãrĩnu ʉ̃rʉ kʼawuaira mejãcha yibia, maʉ̃ba iya awurura nebia ʉ̃rabʉrʉ zei ʉ̃rʉ jaradiabʉrʉdera mejãcha sobiabʉ (1 Tim. 4:16).

8, 9. (1) Jesuba nebʉra jaradadera ¿yumakẽrãbara sãwũã ũdubisi mejãcha kãgabasita iya oro ũdudara? (2) ¿Bʉara sãwũã akʉbʉ wãrĩnura?

⁸ Wãrĩnu Daizeze Bedʼeadebemanerabʉ, bedʼea bia Daizeze Nokʼo ʉ̃rʉ. Jesuba jarasi wãrĩnu Daizeze Nokʼo ʉ̃rʉra nebia zroma kĩrãkʼabʉta. Mateo 13:44de Jesuba jarasi: «Daizezeta Nokʼodʼebemane bʼaira orota egorodʼe merã bʼadʼa kĩrãkʼa bʼʉa, ũmakĩrãba ũdupe wakusa merãsia. Mobe maʉ̃ kʼarea sobia wãpe izha ne erubʼʉra jõma nendope edasia maʉ̃ druara». Naʉ̃ yumakẽrãbara orota jʉrʉnʉma ẽ basimina iya ũdubʉrʉdera zarea osi maʉ̃ oro erbaita. Iyara nẽdosi nekʼãrẽ iya jõma erbadata, ¿kʼãrẽa? Kʼawuabasi baera iya ũdudara audre yibiabasita.

⁹ ¿Bʉara maʉ̃ yumakẽrãne kĩrãkʼa wãrĩnura nekʼãrẽ bia kĩrãkʼa akʉbʉka? Mawũã, dayirãba kʼawuapanʉ Jeowaba kãgabʉ oita akʉza egoro bia zebʉrʉde iyi Nokʼo juwa edre bʼaira, audre yibiata nekʼãrẽ awuruira. Dayirã Jeowa neũdukʼawua bʼaira zarea oibaramina, naʉ̃ra mejãchade yibia. Jeowaba kãgabʉ oiba mejãcha sobiabibʉ (Col. 1:10).

10, 11. ¿Kʼãrẽa Michaelbara iyi sãwũã badata awuara osi?

¹⁰ Dayirãnebema mejãchaʉba amaebʉrʉ nekʼãrẽ dayirãba kãgabadata mawũã Jeowata sobiabita. Ʉ̃kʉrubara idubʉsida ãya trajo bia erbadata. Zarea osida platata aukʼara jʉrʉ ẽ baita akʉza ãya nekʼãrẽ sãwũã obadara awuara osida. Naʉ̃ta osi Michaelba. Iyira Jeowa ʉ̃rʉ Kʼawuabipanʉrã ẽ basi, iyi warraraenara yõ kʼawuabasi. Iya jarabʉ: «Mʉ̃itara audre yibiabasi ejersisio oita, edaʉde krĩchabasi mia abaʉta mʉ̃ kĩrãkʼa zareabarabʉ ẽãta». Mamina iya Daizeze Bedʼea kʼawua jʉ̃drʉsidera, kʼawuasi Jeowabara kãga ẽãta yõra (Sal. 11:5). Iya naʉ̃ta jarabʉ juwa jidapanʉra iyaʼa jaradiapanana ʉ̃rʉ: «Ãya mʉ̃ara jarada ẽ basi idubʉmarẽã mʉ̃a kʼãrẽ obadara, awuarabʉrʉ wãrĩnuta jaradiasida Daizeze Bedʼea ʉ̃rʉ».

¹¹ Michaelba Jeowa ʉ̃rʉ audre kʼawua wãne, audre kãga wãsi. Jeowaba iyi pʉwʉrʉ sãwũã biʼia akʉbʉba iyi so tõbarisi. Tẽãne Michaelbara kʼawuasi ne awuara oibarabasita. Iya jarasi: «Mʉ̃a kʼawuabasi mʉ̃a nãã obada idubʉira audre zarebasita, mamina mʉ̃a kʼawuabasi mʉ̃a naʉ̃ta idubʉra Jeowara mejãcha sobiabaibasita, mamina mʉ̃a kʼawuabasi zarea oita Jeowaba kãgabʉ oita audre yibiata». Michaelbara wãrĩnuta kʼawuasidera mejãcha kãgasi, maʉ̃ kʼarea idubʉsi iya nãã obadara (Sant. 1:25).

12, 13. ¿Sãwũã wãrĩnu Daizeze Bedʼeadebemaba kʼarebasi Mayliʼra?

¹² Daizeze Bedʼeara jarapanʉ ĩbira kĩrãkʼabʉta. Mawũã ũdubita wãrĩnura yibiata (Sal. 119:105; Efes. 5:8). Mayliʼra Azerbaiyánʼnebema, iya jarabʉ iyitara yibiata Daizeze Bedʼeara, iyita kʼarebabʉ baera. Iyi yibarirabara religion awuara erpanasi, yi papara judiabasi akʉza yi zezera musulmanbasi. Mayliba jarabʉ: «Mʉ̃a kʼawuabʉ Daizezera bʉta, mamina mejãcha widibʉ naʉ̃ra bedʼearata: ‹¿Kʼãrẽa parãsi Jeowabara ẽbẽrarãra? ¿Kʼãrẽa ẽbẽrarã zokʼaibʉde zʉbʉriabʉ daucha, beida tẽã bida zʉbʉriaibara tʉbʉde?›. Ʉ̃kʉrʉ ẽbẽrarãba jarapanʉ, dayi sãwũã berabaribʉra Daizezeba mawũã obʉta, maʉ̃ kʼarea mʉ̃yikʉza naʉ̃ta widibasi: ‹¿Daizezebara ẽbẽrarãra iya zokʼa baera zʉbʉriabibʉrʉdera, sobiabʉka?›».

¹³ Maylibara iya widibada ʉ̃rʉ kʼawuakĩrãbasi baera, tẽãne Daizeze Bedʼeata kʼawua jʉ̃drʉsi Jeowa ʉ̃rʉ Kʼawuabipanʉrãbawara akʉza buru kʼoesi. Iya jarabʉ: «Daizeze Bedʼeade kʼãrẽ jarabʉba kʼarebasi sobia bʼaita akʉza Daizeze Bedʼeaba biʼia jara ũrĩbibʉba kʼarebasi mʉ̃ aduʼa bʼaita». Mayliʼne kĩrãkʼa dayirã jõmaʉ̃ba Daizeze ʉ̃rʉ ibia bedʼeabiseapanʉ Jeowaba iyi pʉwʉrʉeda webʉ baera mawũã wãrĩnuta jaradiaita (1 Ped. 2:9).

14. ¿Kʼãrẽta oibara wãrĩnuta audre kãga wãita? (Akʉra rekuadro «Akʉza wãrĩnu Daizeze Bedʼeadebʉra naʉ̃ra kĩrãkʼabʉ»).

¹⁴ Naʉ̃ra yizara jõmaʉ̃ba ũdubibʉ, kʼãrẽa yibiata wãrĩnura. Zarea ora bʉyidoba Daizeze Bedʼea kʼawuaita, mawũã kʼawuai baera kʼãrẽa kãgabʉta wãrĩnura. Bʉa wãrĩnu audre kãgabʉrʉba, kʼarebayi jʉrʉita maʉ̃ kãga sãwũã ũdubita.

SÃWŨÃ ŨDUBIPANɄ WÃRĨNUTA KÃGAPANɄTA

15. ¿Sãwũã ũdubiseapanʉ dayirãba wãrĩnuta kãgapanʉta?

¹⁵ Wãrĩnuta kãgapanʉta ũdubira Daizeze Bedʼeata ewariza akʉibara akʉza kartara Daizeze Bedʼeadebemata. Dayirã Daizeze ode dããrabamina, zarea oibara audre kʼawua wãita wãrĩnu ʉ̃rʉ. Naʉ̃ kartadebema ingle bedʼeadebʉba yi nããrabemane jarasi: «Idi ewadera sewa nebʉrʉta mejãcha ũdubʉ baera, zarea baseabʉ kʼawuaita saʉ̃ta wãrĩnuta. Dayirãba wãrĩnu ũduira ʉrʉmabaibara. Zarea oibara wãrĩnuta kʼawua wãita». Estudiaira edaʉde zarea baseabʉ, mamina zarea oibara audre kʼawuaita.

16. Bʉa Daizeze Bedʼea akʉbʉrʉdera, ¿kʼãrẽta obʉ naʉ̃ ʉ̃rʉ audre biʼia kʼawuaita? (Proverbios 2:4-6).

¹⁶ Edaʉde dayirãitara zare leita akʉza estudiaita. Jeowaba dayirã jarabʉ jʉrʉdamarẽã wãrĩnu ʉ̃rʉ audre biʼia kʼawua wãita (akʉra Proverbios 2:4-6). Dayirãta zarea opanʉbʉrʉ bia wãñi. Mebẽã aba yi trʉ̃ Coreyba jarabʉ iya Daizeze Bedʼea lebʉrʉde ũdura nejʉacha zake aba iya kãgabʉta, maʉ̃ ʉ̃rʉ audre kʼawuabʉ. Iya jarabʉ: «Daizeze Bedʼea lebʉrʉde, akʉbʉ notarata akʉza awurura testo maʉ̃ kĩrãkʼa bedʼeabʉta, adewara jʉrʉbʉ kartarane maʉ̃ testo ʉ̃rʉ audre biʼia jara ũrĩbʉta. Mʉ̃a maʉ̃ta obʉrʉdera audre kʼawuabʉ». Dayirãba Daizeze Bedʼea akʉbʉrʉde naʉ̃ne kĩrãkʼa opanʉbʉrʉ, ũdubidayi wãrĩnuta kãgapanʉta. Ewari jʉrʉpanʉ baera akʉza zarea opanʉ baera audre kʼawuaita (Sal. 1:1-3).

17. ¿Kʼãrẽta oibara dayirãba Daizeze Bedʼea akʉbʉrʉdera? (Santiago 1:25).

¹⁷ Dayirãba Daizeze Bedʼea akʉbʉrʉdera bari leibara ẽ awuarabʉrʉ oibara mama jarabʉta. Maʉ̃ta opanʉbʉrʉ sobiapanañi (akʉra Santiago 1:25). ¿Sãwũã kʼawuapanʉ dayirãba wãrĩnu opanʉta Daizeze Bedʼeaba zokʼabʉta? Mebẽã abaʉba jarabʉ, dayikʉzaʉba akʉibarata kʼãrẽta audre bia oibarata mawũã ẽ bʉrʉ kʼãrẽta awuara oibarata. Apostol Pabloba jarasi: «Mamina dayirãba nekʼãrẽ mejãcha obʉmina, maʉ̃ta audre bia owãibara» (Filip. 3:16).

18. ¿Kʼãrẽa zarea oibara Daizeze Bedʼeaba jarabʉde bʼaita?

¹⁸ ¿Kʼãrẽ nebiata ũduseapanʉ dayirãba Daizeze Bedʼeaba jarabʉta opanʉbʉrʉ? Dayirãra bia wãñi akʉza Jeowata sobiabidayi, adewara mebẽrãbawara biapanañi (Prov. 27:11; 3 Juan 4). Maʉ̃ba dayirãbara wãrĩnuta kãgaibara akʉza Daizeze Bedʼeaba jarabʉde bʼaibara.