«Mayirai kʼarebaidua»

1. 1 Tesalonicenses 5:11de jarabʉbara, ¿kʼãrẽ trajota erbʉ dayirã jõmaʉ̃ba?

¿BɄ KONGREGASIONBARA kʼarebabarika Daizeze de yiwidi parãita, mawũã ẽ bʉrʉ ara oita? Mawũã berabarisibʉrʉ bʉra mejãcha sobiabasibaibara. Maʉ̃ kʼarea bʉa Jeowaʼa biga diabasibaibara akʉza sobiaba trãbe ẽ basibara. Daizeze de parãbʉrʉdera ibia bedʼeabisida Daizeze Jeowa ʉ̃rʉ. Mamina dayirãba audre ibia bedʼeabiseabʉ ẽbẽrarã Daizeze dema zebʉrʉta kʼarebapanʉne. Apostol Pabloba 1 Tesalonicenses 5:11 bʉsidera naʉ̃ra ʉ̃rʉ krĩcha kʼãrãpe bʉsi. Naʉ̃ artikulode naʉ̃ testo ʉ̃rʉ bedʼeayi (akʉra).

2. ¿Kʼãrẽta kʼawuadai naʉ̃ artikulodera?

² Pabloba mebẽrãta biʼia kʼareba kʼawuabasi baera, iyira yiza bia dayirãita. Apostol Pablobara krĩchabasi mebẽrã ʉ̃rʉ. Naʉ̃ artikulode kʼawuadayi iya sãwũã kʼarebasita mebẽrãra bedʼea zroma awuantaita, aduʼa bʼaita mebẽrãbawara, akʉza Jeowa sãwũã audre ĩjãita. Akʉdaya dayirãba sãwũã Pablode kĩrãkʼa oseabʉta mawũã kʼarebadaita mebẽrã idi ewade (1 Cor. 11:1).

PABLOBARA KʼAREBASI MEBẼRÃBA BEDʼEA ZROMA AWUANTAITA

3. ¿Kʼãrẽta osi Pablobara saʉ̃ta audre yibiata ũdubita?

³ Pablobara mejãcha kãgabasi mebẽrãra akʉza kʼawuabasi mebẽrã bedʼea zroma erbʉde ãyi sãwũã sentibʉta. Iyisida mawũã zʉbʉria berabarisi baera. Ewari aba Pablora plata neẽ besi, maʉ̃ kʼarea traja jʉ̃drʉsi mawũã iyita nekoita akʉza wuabemara kʼarebaita (Hech. 20:34). Akʉza iyi Corintoeda wãsidebida trajabasi iyi neũdukʼawua Áquila akʉza Priscilaʉ̃me, maʉ̃rabida karpa deta obasi. Mawũãsidʉ iyara sabadoza jaradiabasi griegora akʉza judiora. Mawũẽra Silasta akʉza Timoteota jʉ̃ẽsidera, Pablobara audre jaradiasi Daizeze Bedʼeata (Hech. 18:2-5). Pablora zarea trajabasi iya nesidabʉ ũduita, adewara zarea obasi Daizeze Bedʼea jaradiaita. Maʉ̃ kʼarea yiza biabasi mebẽrãita, adewara so zarea diaseabasi akʉza mebẽrã jarasi, yi mebẽrãba nesidabʉ ũduya mejãcha trajabʉ kʼarea, kĩrãduada ẽ marẽã Daizezedebema oita (Filip. 1:10).

4. ¿Sãwũã kʼarebasida Pabloba Timoteoʉ̃mebara mebẽrã pẽwãpanasidade awuantaita?

⁴ Tesalónicade kongregasion jʉ̃drʉdata dããraba ẽãne, mebẽrãra pẽwã jʉ̃drʉsida. Ẽbẽrarã mejãcha kĩrʉbʉba Pablota akʉza Silasʼʉ̃me ũduda ẽ basi baera, ʉ̃kʉrʉ mebẽrãta jidape «nokʼorã pʉwʉrʉdʼebema kĩrãbita» ededape nemi jĩgʉa jarasida: «Naʉ̃rãbara jõmaʉ̃ba aribʼaedʼa ẽã aribʼaemarẽã jara bʼʉra rey Césarba» (Hech. 17:6, 7). Mebẽrãra mejãcha perabasibaibara naʉ̃ra ẽbẽrarã mejãcha kĩrʉbʉ kʼarea. Naʉ̃ra mebẽrãbara idubʉseabasi Daizeze Bedʼea jaradiabʉta mawũã berabarinʉmʉ kʼarea, adewara Pablota Silasʼʉ̃me mamaʉ̃ba wãibarabasi baera. Pablobara kãga ẽ basi maʉ̃ kongregasionʼra kʼaiba akʉita neẽ bemarẽãra. Pabloba tesalonisensera naʉ̃ta kĩrãbebisi: «Akʉza daiba zokʼa bʉesida Timoteota iyira dayirã mebẽã [...] marata teitea bamarẽã akʉza maraʼa so zarea diamarẽã audre ĩjãita, mawũã mia kʼaita dugudugua ẽã marẽã naʉ̃ bedʼea zroma kʼarea» (1 Tes. 3:2, 3). Timoteosida pẽwãsidabaibara iyi pʉwʉrʉ Listrade. Iya mama ũdusi sãwũã Pabloba so zarea diasita mebẽrã akʉza Jeowaba kʼãrẽ odata. Maʉ̃ kʼarea Timoteobara jarasi mebẽrã ãyisida bia wãita (Hech. 14:8, 19-22; Heb. 12:2).

5. ¿Sãwũã kʼarebasi zõrãrã abaʉba Bryantʼra?

⁵ ¿Adewara Pablobara sãwũã so zarea diasi mebẽrãra? Pablota akʉza Bernabéʉ̃me jẽda wãside Listrama, Iconio akʉza Antioquíama jʉrʉsida ʉ̃kʉrʉ mebẽrãta, zõrãrã kongregasionebema bamarẽã (Hech. 14:21-23). Naʉ̃ra mebẽrãbara biode zowaĩnĩgʉa diasidabaibara mebẽrãʼa, idi mebẽrã zõrãrã kongregasionebemaba obʉ kĩrãkʼa. Akʉra mebẽã Bryantba jaradata: «Mʉ̃ 15 poagabaside mʉ̃ zezera wãsi mʉ̃ dedaʉba akʉza mʉ̃ papara wua Jeowa ʉ̃rʉ Kʼawuabipanʉrã ẽ basi, maʉ̃ kʼarea sopʉabasi akʉza abapaibʉta sentibasi». ¿Kʼãrẽba kʼarebasi Bryantʼra maʉ̃ bedʼea zroma awuantaita? Iya jarabʉ: «Tony, zõrãrã kongregasionebemata mʉ̃me bedʼeabasi ãba yi jʉre berabarida tẽã akʉza badu ewaride. Iya jara ũrĩbibasi mebẽrã mʉ̃ kĩrãkʼa zʉbʉria berabaribʉta akʉza mawũã berabaribʉmina ãyira sobiabʉta. Iya mʉ̃aʼa ũdubisi Salmo 27:10ta akʉza iya jara ũrĩbibasi Ezequías ʉ̃rʉ. Iyira kʼẽrẽpabasita iyi zeze yiza bia ẽ basimina». ¿Naʉ̃ba sãwũã kʼarebasi Bryantʼra? Iya jarabʉ: «Tonyba so zarea diadaba kʼarebasi ewari jõmaʉ̃nẽ trajaita Daizezeita». Zõrãrã, kʼarebaya awabaibara, Bryant kĩrãkʼa berabaribʉta so zarea diaita (Prov. 12:25).

6. ¿Pablobara sãwũã awuru mebẽrã nebʉradeba so zarea diasi mebẽrãʼa?

⁶ Pablobara kĩrãbebisi mebẽrã ãyi audura mejãchabʉta mebẽrãra akʉza ãyisida bedʼea zromane berabaribʉta, mamina Jeowaba kʼarebasi awuantaita (Heb. 12:1). Pablobara kʼawuabasi mebẽrã mawũã zʉbʉriabʉdebema yizaba, kʼarebaita mebẽrãra Daizezedebemata jʉ̃zaba omarẽã (Heb. 12:22). Idi ewade abarika berabaribʉ, jõmaʉ̃ta so zareapanʉ lepanʉne sãwũã Jeowaba kʼarebasita Gedeónta, Barac, David, Samuel akʉza wuabema ẽbẽrarãta (Heb. 11:32-35). Idi ewadebidabʉ mebẽrã yiza bia ũdubibʉrata. Sentral mundialma badua jʉ̃ẽbʉ kartarata, mama mebẽrãba jarabʉ sãwũã mebẽrã nebʉraba kʼarebabʉta ãya ĩjãbʉ audre zarea bʼaita.

PABLOBARA ŨDUBISI SÃWŨÃ ADUʼA BʼAITA MEBẼRÃBAWARA

7. ¿Kʼãrẽta kʼawuapanʉ Pabloba ũrãgʼa diadadeba Romanos 14:19-21 bayeda?

⁷ Dayirãba kʼarebapanʉ mebẽrãra daya jarabʉdeba akʉza obʉdeba kongregasione aduʼa bamarẽã. Iduaribida ẽ baibara dayirã awuara krĩchabʉdeba mebẽrãneba jĩga bʼaita akʉza ãya Daizeze Bedʼeade jarabʉta opanʉbʉrʉ ãyiʉ̃me bedʼea abarika zepanʉ. Akʉdaya awuru yizata, kongregasion Romanera basi judiorata akʉza ẽbẽrarã awuru pʉwʉrʉdebemata. Moisés Ley ãĩ bʉesidadera, neẽbasi ley kʼãrẽ yiko ʉ̃rʉ koita jarabʉra (Mar. 7:19). Maʉ̃neba ʉ̃ta ʉ̃kʉrʉ kristianora judiorabara krĩchabasi yiko jõma koseabʉta, mamina ʉ̃kʉrʉba krĩchabasi mawũã kobe ẽãta. Maʉ̃ kʼarea Pablobara jarasi aduʼa bʼaibarata mebẽrãbawara, iya jarasi: «Audre biga nezhara kʼo ẽbaita, miã vino do ẽbaita, miã kʼãrẽta o ẽbaita bĩ ẽã obʉrʉba bʼaebii kʼãñabara bʉ mebeata» (akʉra Romanos 14:19-21). Mawũã Pabloba ũdubisi awuara krĩchabaira yibia ẽ basita kongregasionʼitara. Adewara Pablobara awuara osi wuabemara baebi ẽ baita (1 Cor. 9:19-22). Dayirãbida kʼarebaseabʉ kongregasion aduʼa bamarẽã, jʉ̃ãna ẽ bʉrʉ wuabemaraba daya kãgabʉde odamarẽã.

8. ¿Kʼãrẽta osi Pablobara mebẽrã krĩcha abarika ze ẽ baside mawũã kongregasione aduʼa bʼaita?

⁸ Pablobara yiza biata diasi sãwũã aduʼa bʼaibara ʉ̃rʉ, mebẽrãbawara bedʼea abarika ze ẽãne. Ʉ̃kʉrʉ mebẽrã kongregasion siglo nããradebemabara krĩchapanasi mebẽrã judiora ẽãra sirkunsidadamarẽã, mawũã judioraba ãyi ʉ̃rʉ imitia bedʼeada ẽ marẽã (Gál. 6:12). Pablobara kãga ẽ basi ãyi mawũã bedʼeaka baramarẽãra akʉza jʉ̃ã ẽ basi iya kãgabʉta odamarẽã, awuarabʉrʉ kʼareba jʉrʉsi zõrãrã adewara apostolera Jerusalénʼnebema (Hech. 15:1, 2). Mawũã osi baera kʼarebasi mebẽrãra kongregasione aduʼa bamarẽã akʉza sobia bamarẽã (Hech. 15:30, 31).

9. ¿Sãwũã Pablode kĩrãkʼa oseapanʉ?

⁹ Bedʼea zromata zera dayirãbara jʉrʉibara zõrãrã kʼarebata, mawũã kongregasion aduʼa babita. Akʉza Daizeze Bedʼeaba jarabʉta kʼawuaira akʉibara dayirã kartarane, adewara dayirã organizasionba jarabʉta. Daya omarẽã kãgabʉta kãgai kaude zarea opanʉbʉrʉ Jeowa organizasionba zokʼabʉta aripe oita, mawũãra kongregasionʼra aduʼa babiyi.

10. ¿Pablobara adewara kʼãrẽta osi kongregasion aduʼa babita?

¹⁰ Kongregasione aduʼa bʼaita Pablora bedʼeasi mebẽrãba ãyi sode nebia erbʉ ʉ̃rʉ, mawũã bedʼea ẽ basi ãya nekʼãrẽ nemitia obʉ ʉ̃rʉ. Pabloba mebẽrã Romanebema karta bʉside yi jõbodoare, ʉ̃kʉrʉ mebẽrã trʉ̃ta bʉsi akʉza ãya kʼãrẽ odata. Dayirãbida abarika oseabʉ Pablode kĩrãkʼa mebẽrãba ãyi sode kʼãrẽ nebia erbʉ ʉ̃rʉ jarabʉde. Maʉ̃ta opanʉbʉrʉ ũdubidayi kʼãrẽa yibiata awuru mebẽrãʉ̃me ãba bʼaita, mawũã audre neũdukʼawua biabayi mebẽrãbawara akʉza audre kãgadayi mebẽrãta.

11. ¿Kʼãrẽta oibara mebẽãʉ̃me kʼaikʼaiabadata ara oda tẽã aduʼa bʼaita?

¹¹ Mebẽrãba bia kʼawuabʉmina Daizezedebema sãwũã bia oita, edaʉde yi kʼaikʼaiapanʉ. Mawũã berabarisi Pablota iyi neũdukʼawua Bernabéʉ̃me, ãyira jipa bedʼea abarika ze ẽ basi, Marcosta ãyi kʼaidu edei ʉ̃rʉ Daizeze Bedʼea jaradiaita, mawũã ãyira jipa yi kʼaikʼaiasida akʉza aba abaka wãsi ãya kãgabʉmae (Hech. 15:37-39). Maʉ̃ tẽã Pablo, Marcos akʉza Bernabéʉ̃mera ara osida ãyi bedʼea zromara, mawũã ãya ũdubisida audre yibiata kongregasion aduʼa babita (1 Cor. 9:6; Col. 4:10). Dayirãbida kongregasione mebẽrãʉ̃me bedʼea zroma erbʉta ara odaibara, adewara akʉbaibara ãyi sode kʼãrẽ nebia erbʉta, mawũã odara aduʼa panañi akʉza ãbabayi (Efes. 4:3).

PABLOBARA SO ZAREA DIASI MEBẼRÃBA JEOWATA AUDRE ĨJÃNAMARẼÃ

12. ¿Kʼãrẽ bedʼea zromata ũdubʉ dayirã mebẽrãbara?

¹² Dayirãbara dayirã mebẽrãra kʼarebaseabʉ so zarea diabʉrʉde ãya ĩjãbʉta audre ĩjã bamarẽã. Ʉ̃kʉrʉ mebẽrãra ãyi kʼarea ãyi mebẽrãta ipidapanʉ, ãyi kolegiodebida ãyi kʼarea ipidabʉ akʉza ãyi trajabʉdebida ãyi kʼarea ipidapanʉ. Ʉ̃kʉrʉra zʉbʉriabʉ ãyi kaya kʼarea, mawũã ẽ bʉrʉ ʉ̃kʉrʉra yõbʉ ãyi krĩcha kayirua yi edebi ẽ baita, mawũã ẽ bʉrʉ ʉ̃kʉrʉ mebẽrãba naʉ̃ ewari jõita jʉ̃ãbʉta dããraba mamina wabida ze ẽ. Mawũã berabaribʉ kʼarea mebẽrãitara zarea baseabʉ ãya ĩjãita. Kristianora siglo nããradebemabida naʉ̃ bedʼea zroma kĩrãkʼabʉta ũdusi. ¿Kʼãrẽta osi Pabloba mebẽrã so zarea diaita?

13. ¿Mebẽrãba ĩjãbʉ kʼarea ipidabʉdadera Pablobara sãwũã kʼarebasi?

¹³ Pablobara zokʼasi Daizeze Bedʼeata mebẽrãba ĩjãbʉ audre ĩjãbita. Bari jaraita, kristianora judioraitara zarebasibaibara ãya panʉita, ãyi mebẽrãba jarabʉdade religion judioraba ĩjãbʉra audre yibiata kristianoraba ĩjãbʉira. Pabloba ebreora karta bʉ dia bʉedaba mejãcha so zareabisi mebẽrãta (Heb. 1:5, 6; 2:2, 3; 9:24, 25). Mebẽrãbara zokʼaseabasi Pabloba karta dia bʉedata ãyi mebẽrã kristianora ẽã jara ũrĩbita, ãya ĩjãbʉra kʼarea ĩjãbʉta. Idi ewadebida dayirãbara kʼarebaseabʉ dayirã mebẽrã kʼarea ipidabʉrʉde zokʼabʉdade dayirã kartata, mawũã ãya jara ũrĩbimarẽã kʼãrẽa ĩjãbʉta. Dayirã warraraba nekʼãrẽ parãnata ĩjãbʉ kʼarea awuru ẽbẽrata ipidabʉbʉrʉ, dayirãbara kʼarebaseabʉ naʉ̃ra kartaraneba ¿Es la vida obra de un Creador? akʉza El origen de la vida. Cinco cuestiones dignas de análisis, ãya ũdubimarẽã kʼãrẽa wãrĩnu ĩjãbʉta bʉta yi nekʼãrẽ jõma parãna ʉ̃rʉ.

14. ¿Pablo Daizeze Bedʼea jaradiabʉba ewari neẽbasimina, kʼãrẽta osi mebẽrã kʼarebaita?

¹⁴ Pablobara mebẽrã so zarea diasi iya nekʼãrẽ bia oũdubibʉdeba (Heb. 10:24). Pablobara bari kʼareba ba ẽ basi iya nekʼãrẽ sãwũã jarabʉdeba, awuarabʉrʉ oũdubibasi. Bari jaraita, mebẽrã Judeadebema jarrababa mejãcha zʉbʉrianʉmasidera, Pablobara ãya nekʼãrẽ nesidabʉta edesi (Hech. 11:27-30). Pablora Daizeze Bedʼea jaradiaita mejãcha trajabasimina, ewari jʉrʉsi mebẽrãba kʼãrẽ nesidabʉ edeita (Gál. 2:10). Mawũã obʉdeba kʼarebasi Pablobara mebẽrãba ĩjãbʉta audre zarea ĩjãnamarẽã akʉza ũdubisi Jeowabara ãyira kãgabʉta. Idi ewadera dayirãbara kʼarebaseabʉ mebẽrãra dayi ewarita, dayi zareata, daya nekʼãrẽ okʼawuabʉdeba akʉza donasion diabʉdeba naʉ̃ drʉade neida berabaribʉrʉde, mawũã odara ãya ĩjãbʉta audre zarea opanʉ akʉza ĩjãnamarẽã Jeowabara ãyira doba amae ẽ baita.

15, 16. ¿Sãwũã edaseabʉ mebẽrã ãya ĩjãbʉta zareabʉ ẽãra?

¹⁵ Pablobara kʼarebasi mebẽrã ãya ĩjãbʉ zare ẽã erbadarata. Pablobara so borekea akʉsi ãyita akʉza ibiade bedʼeasi (Heb. 6:9; 10:39). Pabloba Hebreora karta dia bʉedade bedʼeabasi naʉ̃ bedʼeata «dayirã», naʉ̃ba ũdubibʉ iyabida ũrĩbarabasita wuabema ũrãgʼa diabʉra (Heb. 2:1, 3). Idi ewade dayirãbida Pablode kĩrãkʼa oibara, krĩcha ẽ baibara mebẽrãba Daizezeba zokʼabʉta obe ẽ bʉrʉ iyara kʼãrẽ obe ẽãta, awuarabʉrʉ kʼarebaibara akʉza wãrĩnu kãgabʉta ũdubibara. Dayirãba soiduba bedʼeabʉbʉrʉ akʉza ibiade obʉbʉrʉ ãyara ũrĩkĩrãñi dayirã ũrãgʼata, mawũã zowaĩnĩgʉa diayi ãyaʼa.

¹⁶ Pablobara kʼawuabisi mebẽrãʼa Jeowabara kĩrãdua ẽ basita ãya kʼãrẽ nebia odara (Heb. 10:32-34). Dayirãbida Pablode kĩrãkʼa oseapanʉ. Mebẽrã iya ĩjãbʉta zarea ĩjãbʉ ẽã widiseapanʉ sãwũã ũdukʼawuasita Jeowara akʉza kĩrãbemarẽã sãwũã Jeowaba iyi kʼareba zebʉrʉta. Dayirãbara iyaʼa kĩrãbebiseabʉ Jeowabara kĩrãdua ẽãta iya kʼãrẽ nebia odara, adewara Jeowabara amae ẽãta iyira (Heb. 6:10; 13:6). Ãyibawara mawũã bedʼeabʉba kʼarebaseabʉ ãya audre ĩjãmarẽã.

«MAYIRAI ZAREA DIAIDUA AUDRE ĨJÃITA»

17. ¿Kʼãrẽ nebiata audre bia okʼawua wãseabʉ dayirãbara?

¹⁷ De obariba ewariza audre bia okʼawua wã kĩrãkʼa, dayirãbida ewariza audre bia kʼareba kʼawua wãibara dayirã mebẽrãta. Dayirãbara kʼarebaseabʉ mebẽrãra ãyi bedʼea zroma berabaribʉde, jara ũrĩbibʉde sãwũã ʉ̃kʉrʉ mebẽrã ãyi kĩrãkʼa bedʼea zroma ũdusimina awuantadata. Mebẽãʉ̃me aduʼa bʼaira jʉrʉibara ãyi sode kʼãrẽ nebia erbʉta, adewara mebẽãʉ̃me bedʼea abarika ze ẽãnera jʉrʉibara sãwũã aduʼa bʼaita akʉza kʼaikʼaiada tẽãra, jʉrʉibara maʉ̃ bedʼea zroma ara oita. Adewara dayirãbara kʼarebaseabʉ mebẽrãra Daizeze Bedʼeade bedʼea biabʉdeba, kʼarebabʉde ãya nesidabʉde, adewara kʼarebabʉde mebẽrã ãya ĩjãbʉta zarea erbʉ ẽãne.

18. ¿Dayirãbara kʼãrẽta odaibara?

¹⁸ Mebẽrã Daizeze de kʼareba parãpanʉra mejãchade sobiabʉ. Dayirãsida mejãcha sobia baseabʉ kʼarebapanʉne mebẽrãba audre ĩjãmarẽã. De obariraba nekʼãrẽ obʉra jõ wãseabʉ, mamina dayirãba mebẽrã kʼarebabʉra naʉ̃ra ewari jõmaʉ̃nẽ baseabʉ. Maʉ̃ kʼarea zarea odaibara dayirãinʉ so zarea diaita akʉza yi kʼarebadaita (1Tes. 5:11).