Jeowa pʉwʉrʉbara kãga jõma aripe oita

1. ¿Kʼãrẽ bedʼea zromata ũdusi Josébara akʉza kʼãrẽta osi iyara?

EWARI aba Jacob warra yi trʉ̃ Joséra, bedʼea zromata ũdusi. Iyi nokʼo Potifar kimaba iyaʼa jarasi: «Mʉ̃me ãba kʼãĩna». Mamina Josébara ũrĩ ẽ basi yi bedʼeata. Maʉ̃ kʼarea idi ewade ẽbẽra abaʉba widiseabʉ kʼãrẽa iyara ũrĩ ẽ basi yuwẽrãba jaradara. Potifarʼra deda neẽbasi, adewara Joséra ãyi dedara, ãyi nezokʼabasi, maʉ̃ba naʉ̃ wẽrãbara mejãcha zʉbʉriabiseabasi Joséba ĩjã ẽ basi bʉrʉ iyi bedʼeata. Mawũãsidu Josébara ũrĩ ẽ basi naʉ̃ wẽrãba jarabʉra iyiʉ̃me kʼãĩmarẽã. ¿Kʼãrẽa? Iya jarabʉ: «¿Mʉ̃ra sãwũã maʉ̃ nãã nekayirua oipe akʉza Daizeze nãã nekayirua zromata oipe?» (Gén. 39:7-12).

2. ¿Josébara sãwũã kʼawuabasi Daizezebara kãga ẽãta ãĩ bʼaira?

² Moisés Ley ãĩ babe ẽã jarabʉra, bʉsida José nekʼãrẽ berabarida 200 poaga berabarida tẽãbʉrʉ. Mamina, ¿sãwũã kʼawuabasi Josébara ãĩ bʼaira Daizezebara bia akʉbʉ ẽãta? (Éx. 20:14). Mawũãsidu Josébara biʼia ũdukʼawuabasi sãwũã krĩchabʉta Jeowaba ãĩ bʼai ʉ̃rʉra. Bari jaraita, Josébara bia kʼawuabasi Jeowabara osita yumakẽrãta yuwẽrãʉ̃me ãbapanamarẽã. Adewara Josébara ũrĩsibaibara sãwũã Jeowaba kʼarebasita yi payora Sarara iyi wawa odaibaside, abarika Jeowabara kʼarebasita Isaac kima Rebecasida (Gén. 2:24; 12:14-20; 20:2-7; 26:6-11). Joséba naʉ̃ ʉ̃rʉ bia krĩchaiba, iya kʼawuasi Daizezeitara saʉ̃ta biabʉta akʉza saʉ̃ta bia ẽãta. Iya Jeowata mejãcha kãgabʉ baera okĩrãbasi Jeowaba iya omarẽãbʉta.

3. ¿Kʼãrẽta kʼawuadai naʉ̃ artikulodera?

³ ¿Bʉara kãgaka aripe obʼaira? Mawũãbaibara. Mamina dayirã jõmaʉ̃ta nemitia omia baera jʉra kʼawuapanʉ ẽ bʉrʉ, naʉ̃ drʉadebemaba krĩchabʉ kĩrãkʼa krĩchaseabʉ akʉza oseabʉ (Is. 5:20; Rom. 12:2). Atia akʉdayi, ¿kʼãrẽta jarakĩrãbʉta aripe oibaraba? akʉza ¿sãwũã kʼarebabʉta maʉ̃ oiba? Maʉ̃ tẽã akʉdaya kĩrã ũbea, sãwũã dayirãbara audre kãgaseabʉta Jeowaba zokʼabʉra.

¿KʼÃRẼTA JARAKĨRÃBɄ ARIPE OIBARA?

4. ¿Ẽbẽra mejãchaʉba sãwũã krĩchapanʉ aripe oi ʉ̃rʉra?

⁴ Ẽbẽraba krĩchabʉrʉde abaʉba jõma aripe obʉ ʉ̃rʉ, krĩchapanʉ naʉ̃ ẽbẽrabara ʉ̃ta krĩchabʉta, wuabema ʉ̃rʉ mitia bedʼeabʉta akʉza iyabʉrʉ kʼawuabʉta wuabemaraira. Mamina, Daizezebara jipa kãga ẽ ẽbẽra mawũãchura. Jesu nama Egorode basidera, ẽbẽrarã Daizeze ĩjãbʉa apanʉrãra kʼẽãsi. Ãyi leyde jaradiapanasi baera saʉ̃ta biata akʉza saʉ̃ta bia ẽãta (Ecl. 7:16; Luc. 16:15). Ẽbẽra abaʉba obʉbʉrʉ Jeowaba zokʼabʉta, maʉ̃bara krĩcha ẽ bayi iyara wuabemaraira ʉ̃ta kʼawuabʉta.

5. ¿Daizeze Bedʼeaba jarabʉdebara kʼãrẽta jarakĩrãbʉ aripe oibara? Ʉ̃kʉrʉ yizata jara ũrĩbira.

⁵ Aripe oira yibia. Naʉ̃bara jarakĩrãbʉ oibarata Jeowaba jarabʉta aripebʉta. Daizeze Bedʼeade, bedʼea «justisia» jarabʉbara, naʉ̃bara jarakĩrãbʉ Daizezeba kãgabʉde bʼaita akʉza aripe oita. Bari jaraita, Jeowabara zokʼasi yi nẽdobarirãra ãyara pesa biata erbamarẽã (Deut. 25:15). Kristiano abaʉba Daizeze nãã aripe okĩrãbʉbʉrʉ, iya nekʼãrẽ nẽdobʉde wãrĩnuta jarabaibara akʉza daucha oibara. Ẽbẽraba aripe oita kãgabʉbʉrʉ, iyara jʉra ẽbẽra abaʉba bia edada ẽ bʉrʉ awururata. Ẽbẽra abaʉba kãgabʉrʉ aripe oita iya Jeowa sobiabita, nãã krĩchayi iya nekʼãrẽ oi naweda, Jeowaba sãwũã krĩchabʉta maʉ̃ ʉ̃rʉ (Col. 1:10).

6. ¿Kʼãrẽa wãrĩnu ĩjãseapanʉ Jeowabara kʼawuabʉta kʼãrẽta bigata akʉza kʼãrẽta zeri ẽãta? (Isaías 55:8, 9).

⁶ Daizeze Bedʼeabara jarabʉ aripe oira Daizezedeba zebʉta (Jer. 50:7). Nekʼãrẽ jõmabʉra Jeowaba parãsi baera, iyabʉrʉ jaraseabʉ kʼãrẽta bigata akʉza kʼãrẽta zeri ẽãta. Mamina dayirãra nemitia omia baera kʼawua ẽ, kʼãrẽta bigabʉta akʉza kʼãrẽta zeri ẽãta. Mamina Jeowara nekʼãrẽ nemitia oka baera iya kʼawuabʉ kʼãrẽta bigata akʉza kʼãrẽta zeri ẽãta (Prov. 14:12; akʉra Isaías 55:8, 9). Mawũãmina, Jeowaba dayirãta iyi kĩrãkʼa parãsi baera, dayirãbara oseapanʉ Jeowaba jarabʉta saʉ̃ta aripeta (Gén. 1:27). Dayirãba Jeowa mejãcha kãgabʉba, zarea obibʉ iyide kĩrãkʼa oita (Efes. 5:1).

7. ¿Kʼãrẽa nesidapanʉ nekʼãrẽ omarẽã jarabʉ erbaita? Yizata jara ũrĩbira.

⁷ ¿Sãwũã kʼarebabʉ dayirãba Jeowaba zokʼabʉ oita yi saʉ̃ta bigata akʉza saʉ̃ta zeri ẽãta? Krĩchara naʉ̃ta, banko aba abakaʉba jarara plata sõbe balebʉta, mawũãra bedʼea abarika zeda ẽ bayi, ẽbẽrabara kʼawua ẽ bayi wãrĩnu plata sõbe balebʉta, mawũã odara bia wã ẽ bayi. Adewara medikoraba akʉza enpermeraraba ãya jarapanʉne aripe oda ẽ bʉrʉ beaseapanʉ yi kayabʉta. Maʉ̃ kʼarea yibia erbaita nekʼãrẽ omarẽã jarabʉra akʉza maʉ̃ne aripe oita. Abarika Jeowaba dayirãba nekʼãrẽ omarẽã zokʼabʉbara kʼarebabʉ dayirãta.

8. ¿Kʼãrẽ nebiata jʉ̃ãpanʉ yi nekʼãrẽ aripe oita kãgapanʉrabara?

⁸ Jeowabara nebiata diabʉ yi zarea opanʉra iya zokʼabʉde bʼaita. Iya jarabʉ: «Ẽbẽra biaratrʉ duanañi maʉ̃ drʉadera akʉza ewari jõmaʉ̃nẽ bayi maʉ̃ ʉ̃rʉra» (Sal. 37:29). Mawũãra ẽbẽrarãra ãba sobiapanañi akʉza aduʼa panañi ãya opanʉbʉrʉ Jeowaba zokʼabʉta. Jeowabara kãgabʉ bʉta mawũã bamarẽã akʉza dayirã aba abakaʉba kʼawuabʉbaibara kʼãrẽa kãgabʉta aripe obʉra. ¿Sãwũã dayirãbara audre kãgaseabʉ aripe obʼaira? Akʉdaya nekʼãrẽ ũbea, dayirãba kʼãrẽta oseabʉta.

KʼÃRẼTA OSEAPANɄ JEOWABA ZOKʼABɄ AUDRE KÃGAITA

9. ¿Kʼãrẽba kʼarebai audre kãgaita aripe obʉra?

⁹ Nããra: Kãgara yi ẽbẽra nekʼãrẽ omarẽã jarabʉra. Dayirãba aripe obʉ kãgaira, nesidapanʉ Jeowata mejãcha kãgaita, iya jarabʉ baera kʼãrẽta bigata akʉza kʼãrẽta zeri ẽãta dayirãita. Dayirãba Jeowa audre kãga wãne, naʉ̃ba kʼarebayi iya zokʼabʉde bʼaita. Bari jaraita, Adán Evaʉ̃meba Jeowata kãgapanasibʉrʉ ũrĩkasida Jeowaba zokʼabʉta (Gén. 3:1-6, 16-19).

10. ¿Kʼãrẽta osi Abrahánbara Jeowaba sãwũã krĩchabʉ kʼawuaita?

¹⁰ Dayirãbara Adán akʉza Evaʉ̃meba kayirua oda kĩrãkʼara oamapanʉ. Dayirãba iyabaʉ nemitia oẽ baira, Jeowa ʉ̃rʉ audre kʼawua wãibara akʉza akʉibara iya nekʼãrẽ nebia erbʉta, adewara zarea odaibara kʼawuaita iya sãwũã krĩchabʉta. Dayirãba naʉ̃ta odara, dayirãba kãgabʉra audre wari wãñi. Akʉdaya Abrahán berabaridata. Iyara Jeowara mejãcha kãgabasi akʉza iya ũrĩ e basimina Jeowaba iyaʼa kʼãrẽta omarẽã jarabʉta, maʉ̃ kʼarea iyi ʉ̃rʉ wã ẽ basi. Awuarabʉrʉ zarea osi Jeowa audre ũdukʼawuaita. Abrahánba kʼawuaside Daizezeba Sodoma Gomorra makenaitanʉmʉta iyira perabasi, Daizeze aripe obʉba ẽbẽrarã biarainʉ makenai kʼarea. Abrahánbara krĩcha ẽ basi Jeowaba mawũã oira, maʉ̃ kʼarea iya Jeowa widida ʉ̃rʉ widibasi. Jeowaba panʉsi iyi bedʼeata, mawũã kʼawuasi Abrahánbara Jeowabara akʉbʉta ẽbẽra sota akʉza ẽbẽra abaʉba nekayirua oda kʼarea, ẽbẽra jõmaʉ̃ta makena ẽãta (Gén. 18:20-32).

11. ¿Sãwũã ũdubisi Abrahánbara Jeowa mejãcha kãgabʉta akʉza iyide ĩjãbʉta?

¹¹ Abrahánta Jeowaʉ̃me Sodoma akʉza Gomorra ʉ̃rʉ bedʼeadaba biode kʼarebasi iyira. Naʉ̃ba audre kãgabisi yi Zeze Jeowata akʉza wawia ũdubisi. Maʉ̃ tẽã Abrabánbara bedʼea zromata ũdusi, naʉ̃nera iyitara zareabasi iya Jeowa ĩjãbʉ ũdubita. Jeowaba jarasi Abrahán iyi warra Isaacta sakripisiode diamarẽã. Mamina naʉ̃nera Abrahánbara biʼia ũdukʼawuabasi Jeowara, maʉ̃ kʼarea nekʼãrẽ widi ẽ basi, awuarabʉrʉ aripe osi Jeowaba zokʼadata. Krĩchara Abrahánʼitara kʼãrẽaba pʉbasi maʉ̃ta oita. Mamina Abrahánbara biʼia krĩchasibaibara iya Jeowa ʉ̃rʉ kʼawuadata. Abrahánbara bia kʼawuabasi Jeowabara ewari jõmaʉ̃nẽ kãga ũdubibʉta akʉza maʉ̃ kʼarea iyara aña oẽ baibasita. Pabloba jarada kĩrãkʼa Abrahánbara kʼawuabasibaibara Jeowabara iyi warra Isaacʼra jẽda piradrʉbita (Heb. 11:17-19). Adewara Jeowabara jarasi Abrahánʼa, Isaacdeba ẽbẽrarã mejãcha zeibasita, mamina naʉ̃nera Isaacʼra wũãwũã neẽbasi. Abrahánbara mejãcha kãgabasi Jeowara akʉza kʼawuabasi yi Zeze Jeowabara jõma aripe oita. Iyitara zarebasimina, iya ĩjãbʉba kʼarebasi jõma aripe oita Jeowaba zokʼadara (Gén. 22:1-12).

12. ¿Sãwũã Abrahánʼne kĩrãkʼa oseapanʉ? (Salmo 73:28).

¹² ¿Sãwũã Abrahánʼne kĩrãkʼa oseapanʉ? Dayirãbara Jeowata audre ũdukʼawuaita nesidapanʉ. Mawũã opanʉbʉrʉ iyi kʼawabayi akʉza audre kãgadayi Jeowara (akʉra Salmo 73:28). Adewara krĩchadayi Jeowaba krĩchabʉ kĩrãkʼa (Heb. 5:14). Naʉ̃ba kʼarebayi awuru ẽbẽraba daya jarabʉdade nemitiata omarẽã maʉ̃ta oẽ baita. Mia kʼãrẽsida krĩchada ẽ bayi Jeowaba kãgabʉ oẽ baita, adewara iyi sopʉabibʉta, mawũã iyi neũdukʼawua adua ẽ baita. Adewara, ¿sãwũã ũdubiseabʉ aripe obʉta kãgabʉta?

13. ¿Kʼãrẽta oibara audre aripe oita? (Proverbios 15:9).

¹³ Yi ũmeta: Zarea ora ewariza audre kãgaita aripe obʉra. Dayirãba ewariza kãgaseabʉ aripe obʉra. Abarika dayi kakua ejersisio obʉ kĩrãkʼa teitea erbaita, maʉ̃ kĩrãkʼa zarea odaibara Daizezeba zokʼabʉ audre kãgadaita. Jeowabara kʼawuabʉ iya zokʼabʉra dayirãba oseabʉta, adewara jʉ̃ã ẽ dayirãba obe ẽãidu wueta oita (Sal. 103:14). Jeowabara kãga yi zarea obʉra aripe oita (akʉra Proverbios 15:9). Dayirãba krĩchapanʉbʉrʉ Jeowaita audre trajaita zarea oibara maʉ̃ oita, abarikabʉ dayirãba kãgapanʉbʉrʉ aripe oita, zarea odaibara mawũã oita. Jeowabara kʼarebayi dayirãba audre aripe owãmarẽã (Sal. 84:5, 7).

14. ¿Kʼãrẽ «trʉ̃ãne jʉ̃bari aripe» obʉdebemara akʉza kʼãrẽa nesidapanʉ?

¹⁴ Jeowaba dayirã kĩrãbebibʉ iya zokʼabʉ aripe oira zare ẽãta (1 Juan 5:3). Awuarabʉrʉ dayirãta ewari jõmaʉ̃nẽ kʼarebabʉ. Pablobara jarasi bʉta nekʼãrẽ yõbari Daizeze Bedʼeadebemata (Efes. 6:14-18). ¿Kʼãrẽba kʼarebabʉ gorogorora sora? Naʉ̃ra «trʉ̃ãne jʉ̃bari aripe» obʉdebemaba. Trʉ̃ãne jʉ̃baribara gorogorora sota kʼarebabari kĩrãkʼa, abarika Jeowaba zokʼabʉbara kʼarebaseabʉ dayirã sodebʉta. Maʉ̃ kʼarea zarea odaibara ewari jõmaʉ̃nẽ aripe oita (Prov. 4:23).

15. ¿Bʉara sãwũã jʉ̃seabʉ trʉ̃ãne jʉ̃bari aripe obʉdebemara?

¹⁵ ¿Sãwũã jʉ̃seapanʉ trʉ̃ãne jʉ̃bari aripe obʉdebemara? Bʉa naʉ̃ra ũdubiseabʉ jʉ̃bʉta, bʉa krĩchabʉra Jeowaba kãgabʉde obʉrʉde. Bʉa krĩchabʉde kʼãrẽ ʉ̃rʉ bedʼeaita, kʼãrẽ musika ũrĩta, kʼãrẽta jemeneita akʉza kʼãrẽ libro leita, bʉyikʉza naʉ̃ta widira: «¿Kʼãrẽta eda bʉei mʉ̃ sodera? ¿Naʉ̃ra Jeowabara bia akʉbʉka? ¿Naʉ̃bara nemitiata obibʉka? ¿Yõkĩrãbibʉka? Mawũã ẽ bʉrʉ, ¿audre nebiata erbaita krĩchabibʉka? akʉza ¿mʉ̃yitrʉ jʉ̃zaba krĩchabibʉka?» (Filip. 4:8). Bʉa nekʼãrẽ jidabʉde Jeowaba kãgabʉde obʉbʉrʉ, mawũãra bʉ sora bia akʉyi.

16, 17. ¿Sãwũã kʼarebabʉ Isaías 48:18bara dayirãba ĩjãita ewari jõmaʉ̃nẽ oita Jeowaba zokʼabʉra?

¹⁶ ¿Bʉra krĩcha obʉka krĩchabʉ baera ewari jõmaʉ̃nẽ aripe oẽãta Jeowaba zokʼabʉta? Krĩchara Jeowaba yiza zokʼadata Isaías 48:18de (akʉra). Jeowabara jarabʉ dayirãba aripe obʉra pusa imatʉbʉ kĩrãkʼa bʼaita. Krĩchara bʉta playade pusa maraza zaʉzaʉbari akʉ edaunʉmʉta, ¿maʉ̃ne krĩchaika maʉ̃ pusa zaʉzaʉbarira ewari abaʉde piki totoita? Mawũã ẽ, bʉa kʼawuabʉ baera maʉ̃ pusa maraza mawũã kiʉbʉta poaga bio bata.

¹⁷ Bʉa aripe obʉra pusa imatʉbʉ kĩrãkʼabayi, ¿sãwũã? Bʉa nekʼãrẽ jidai naweda krĩchara Jeowaba kʼãrẽta bʉa omarẽã kãgabʉta, mõbe maʉ̃ta ora. Bʉita Daizezeba zokʼabʉ oira zaremina, bʉ Zeze Jeowara bʉ kʼawabayi kʼarebaita, bʉta zarea bamarẽã akʉza teitea bamarẽã iya zokʼabʉ aripe oita (Is. 40:29-31).

18. ¿Kʼãrẽa dayirãbara jarabe ẽ baibara wuabemaraba obʉra aripebʉta mawũã ẽ bʉrʉ aripebʉ ẽãta?

¹⁸ Yi ũbeata: Jeowa idʉaribira wuabemaba obʉra iya kʼawua jaramarẽã. Dayirãta zarea opanʉbʉrʉ Jeowaba zokʼabʉ aripe oita, akʉ ẽ baibara daya obʉta awuru ẽbẽraba obʉme. Adewara krĩcha ẽ baibara daya audre bia obʉta wuabemaraira. Dayirãbara kʼawua jarabe ẽ wuabema ẽbẽrabara wãrĩnu aripe opanʉ kʼawuaita Jeowaba zokʼabʉra. Kĩrãbedaibara Jeowatrʉ naʉ̃ drʉa juezta (Gén. 18:25). Jeowabara dayirã dia ẽ wuabema ẽbẽrarãta kʼawua odamarẽã. Maʉ̃ kʼarea Jesuba jarasi: «Zhãrãta kʼawua orãũdua, Daizezeba marã maʉ̃ kʼarea kʼawua oẽ bamarẽã» (Mat. 7:1).b

19. ¿Josébara sãwũã ũdubisi ĩjãbʉta Jeowabʉrʉ kʼawua oseabasita?

¹⁹ Akʉdadrʉ José berabaridata. Iyara kʼawua oẽ basi iyi neida odapeadara. Ewari aba José mebẽrãbara poda kʼãrãpe adewara nẽdo bʉesida awuru nezokʼa bamarẽã akʉza yi zezeʼa jarasida Joséra beisita. Maʉ̃ta poaga bio berabarida tẽã, Joséra yi mebẽrãbawara ãba yi jʉresida. Mamina naʉ̃nera iyira yi zromabasi, maʉ̃ kʼarea José mebẽrãbara krĩchasida iyi zʉbʉria oda kʼarea iya abarika oita. Maʉ̃ba José mebẽrãbara jarasida iyaʼa kĩrãduamarẽã ãya odata. Mamina Joséba jarasi: «Peraraidua. ¿Mʉ̃ra Daizezeka?» (Gén. 37:18-20, 27, 28, 31-35; 50:15-21). Josébara kʼawuabasi Jeowabʉrʉ kʼawua oibarata iyi mebẽrãra.

20, 21. ¿Kʼãrẽta oibara daya wuabemaraira aripe obʉta krĩcha ẽ baita?

²⁰ Abarika Joséde kĩrãkʼa dayirãbara idʉaribibara Jeowaba kʼawua omarẽã. Bari jaraita, dayirãbara mesera kʼawua jarabe ẽ ẽbẽra abaʉba kʼarea mawũã onʉmʉta. Dayirãbara ũdu ẽ ẽbẽra soba sãwũã krĩchabʉra, Jeowabʉrʉ kʼawuabʉ sãwũãbʉra (Prov. 16:2). Jeowabara mejãcha kãga badu kulturadebemata akʉza badu pʉwʉrʉdebemata. Maʉ̃ kʼarea iya jarabʉ kãgadamarẽã badu ẽbẽrarãta (2 Cor. 6:13). Maʉ̃ kʼarea zarea odadrʉ dayirã mebẽrã jõmaʉ̃ta kãgaita, mawũã ãya obʉta kʼawua jaranʉma ẽ baita.

²¹ Adewara dayirãbara kʼawua jaranʉmabe ẽ baibara ẽbẽrarã Daizeze ode zeda ẽãrata (1 Tim. 2:3, 4). Bʉa naʉ̃ta jaraika bʉ mebẽã Daizeze ode bʉ ẽ ʉ̃rʉ: «Naʉ̃ra jipa Daizeze odera ba ẽ bayi». Mawũã jara ẽ bayi, mawũã ora bʉa jõma aripe obʉta ũdubiyi akʉza wuabemaraira bʉa audre ʉ̃ta krĩchabʉta ũdubiyi. Jeowabara jʉ̃ãbʉ «idʼibai baridu maẽ zhãrã jõmaʉ̃ã jara bʼʉa kʼazhiruara ãmape izhita pẽwãnamarẽã» (Hech. 17:30). Kĩrãbedaibara Jeowabara bia akʉ ẽãta yi ẽbẽrarã wuabemaira audre bia obʉta krĩchabʉra.

22. ¿Kʼãrẽa dayirãra zarea opanaibara kãgaita aripe obʉta?

²² Dayirãta zarea opanʉbʉrʉ kãgaita Jeowaba aripe obʉ zokʼabʉta, dayirãta sobiabayi akʉza yiza bia bayi wuabemaraita. Mawũã dayirãta kãgadamarẽã akʉza Jeowata. Ewariza zarea oibara audre bia oita (Mat. 5:6). Dayirãbara ĩjãnaibara Jeowabara akʉbʉta dayirã zarea obʉta aripe oita. Naʉ̃ drʉade ẽbẽrarã mejãchaʉba nekayirua opanʉmina dayirãra aduʼapanʉ. Kĩrãbedadrʉ Jeowabara kãgata yi jõma aripe obʉra (Sal. 146:8).