Jeowaba akʉbʉ iyi pʉwʉrʉ sãwũãbʉra

1. ¿Jesubara kʼarea widisi Jeowaʼa iyi kʼaidubemara akʉmarẽã?

DIAMASI iyi bei nãã Jesuba yi Zezeʼa widisi akʉmarẽã iyi kʼaidubemarata (Juan 17:15, 20). Jeowabara akʉ zebʉrʉ iyi pʉwʉrʉra, mamina Jesuba kʼawuabasi Diarubara audre zʉbʉria oita iyi kʼaidubemarãra, maʉ̃ kʼarea nesidadaibasita Jeowa kʼarebata.

2. Salmo 33:18-20 bayeda jarabʉdebara, ¿kʼãrẽa pera ẽ baibara bedʼea zroma ũdubʉrʉ kʼarea?

² Ẽbẽrarã Diaruba zokʼabʉbara mejãcha zʉbʉriabibʉ Jeowa pʉwʉrʉra, maʉ̃ra bedʼea zroma ũdubʉba zarea baseabʉ dayirã Jeoware kʼẽrẽpa bʼaita. Mamina naʉ̃ artikulode kʼawuadayi kʼãrẽa pera ẽ baibarata. Jeowaba ũdubʉ dayirãba kʼãrẽ bedʼea zroma ũdubʉra maʉ̃ba kʼarebakĩrãbʉ dayirãta. Naʉ̃ artikulode kʼawuadayi nebʉra ũme Daizeze Bedʼeadebemata, nama kʼawuayi «Jeowa dabʉbara akʉbʉ iyi wawiapanʉrata» (akʉra Salmo 33:18-20).

DOBA SENTIPANɄNE

3. ¿Kʼãrẽ berabaribʉrʉde doba sentiseapanʉ dayirãra?

³ Mebẽrã kongregasionebema mejãchabʉmina edaʉde doba sentiseapanʉ. Bari jaraita, warrarãra doba sentiseabʉ ãyi kolegiode ãya ĩjãbʉ ʉ̃rʉ jara ũrĩbibarade, mawũã ẽ bʉrʉ awuru kongregasionʼena wãbʉrʉde. Edaʉde dayirãra krĩcha zroma opanʉ akʉza krĩchapanʉ dayirãba obʉra bia oẽãta, mawũãbʉrʉdera krĩchapanʉ kʼaiba kʼarebai neẽãta. Adewara edaʉde jara ẽ dayirãba sentibʉra krĩchapanʉ baera wuabemarabara ũrĩ ẽ baita dayirã sãwũã sentibʉra akʉza krĩchapanʉ wuabemarabara krĩcha ẽãta dayirã ʉ̃rʉ. Dayirã doba sentibʉba krĩcha zroma obiseabʉ. Mamina Jeowabara kãga ẽ dayirã mawũã senti bʼaira. Mamina, ¿sãwũã kʼawuapanʉ maʉ̃ra?

4. ¿Kʼãrẽa jarasi propeta Elíasbara iyitrʉ abapaibidata?

⁴ Akʉdaya propeta Elías yizata, iyira 40 ewari audre mĩrʉ wãsi Jezabelba beaya asi baera (1 Rey. 19:1-9). Iyi mõgara zobeade dobabaside Jeowaʼa jarasi, mʉ̃trʉ abapaibida (1 Rey. 19:10). Mamina maʉ̃ra mawũã ẽ basi, Abdíasba propetara 100 ẽdrʉbisi baera Jezabel juwadeba (1 Rey. 18:7, 13). Mawũẽra, ¿Elíasʼra kʼãrẽa doba sentibasi? Krĩchabasibaibara Abdíasba propetara ẽdrʉbidara jõma makenasidata. Mawũã ẽ bʉrʉ iyira doba sentibasibaibara katuma Carmelode kʼãrẽ berabarida tẽã, israelitarãra Jeoware kʼẽrẽpa ba ẽ basi baera. Akʉza krĩchasibaibara mia abaʉba kʼawua ẽãta iyira beaita barabʉta, adewara iyira miõba krĩcha ẽãta. Daizeze Bedʼeaba maʉ̃ ʉ̃rʉ mejãcha jara ẽ mina, kʼawuaseapanʉ Jeowaba kʼawuabasita iyi sãwũã berabarinʉmʉra akʉza kʼawuabasi sãwũã kʼarebaita.

5. ¿Kʼãrẽta osi Jeowabara Elíasʼa ũdubita iyira doba ba ẽ basita?

⁵ Jeowaba nemejãcha osi Elías kʼarebaita. Bari jaraita, jarasi jaramarẽã iyi sãwũã sentibʉta. Widida ũme widisi: «¿Kʼãrẽta obʉ Elías bʉra namara?» (1 Rey. 19:9, 13). Akʉza Elíasba jarasidera Jeowabara kĩrãkita ũrĩsi iya jaradara. Maʉ̃ tẽã Jeowaba panʉsi Elías bedʼeara, mõbe ũdubisi iyi kʼãrẽaba zarea barabʉta, adewara kʼawuabisi Israeldera waididebʉta ẽbẽrarã Jeoware kʼẽrẽpapanʉrata (1 Rey. 19:11, 12, 18). Akʉza Elíasʼra so aduʼa besibaibara Jeowaʼa iyi sãwũã sentibʉ jõma jarada tẽãra. Adewara Jeowaba trajota diasi Elíasʼra, Hazaelta jidamarẽã Siria nokʼo bʼaita, Jehúta Israel nokʼo bʼaita akʉza Eliseota propeta bʼaita (1 Rey. 19:15, 16). Naʉ̃ trajo diabʉrʉba Jeowaba kʼarebasi iya nebia ʉ̃rʉ krĩchamarẽã, adewara kʼarebabari biata diasi, maʉ̃ra Eliseobasi. ¿Kʼãrẽta odaibara doba sentipanʉbʉrʉ akʉza Jeowa kʼarebata nesidapanʉbʉrʉ?

6. ¿Kʼãrẽta jaraseapanʉ Jeowaʼa dayirãta doba sentipanʉbʉrʉ? (Salmo 62:8).

⁶ Jeowaba kãgabʉ dayirãra iyaʼa yiwidʼidamarẽã akʉza jara ũrĩbidamarẽã dayirã sãwũã sentipanʉ, mõbe kʼawuabibʉ iya ũrĩbʉta dayirã yiwidʼira (1 Tes. 5:17). Iyi kʼaidubemara iyaʼa yiwidʼibʉrʉdera, Jeowabara ũrĩkĩrãbʉ (Prov. 15:8). ¿Kʼãrẽta jaraseapanʉ Jeowaʼa dayirã doba sentibʉrʉdera? Elíasde kĩrãkʼa jaraseapanʉ dayirã sãwũã sentipanʉta (akʉra Salmo 62:8). Adewara jaraseapanʉ dayirã kʼãrẽba krĩcha zroma obibʉta akʉza widiseapanʉ kʼarebamarẽã kʼawuaita kʼãrẽta oibarata. Bari jaraita, bʉta warrarabʉrʉ ¿kʼãrẽta oseabʉ doba sentibʉbʉrʉ akʉza perabʉbʉrʉ kolegiode Jeowa ʉ̃rʉ bedʼeaita? Widiseabʉ zowaĩnĩgʉata diamarẽã akʉza buru biata, mawũã bia jara ũrĩbita bʉa kʼãrẽta ĩjãbʉ ʉ̃rʉ (Luc. 21:14, 15). ¿Kʼãrẽta oseabʉ krĩchabʉbʉrʉ bʉa obʉra bia oẽãta? Jeowaʼa widiseabʉ kʼarebamarẽã mebẽrã Daizezedebema sãwũã oi bia kʼawuabʉba ũrãgʼa bia diamarẽã, widibara Jeowaʼa kʼarebamarẽã maʉ̃ mebẽãba daya jarabʉrʉta biʼia ũrĩmarẽã. Mejãcha krĩcha zroma oẽ bayi Jeowaʼa yiwidʼibʉrʉde jarapanʉbʉrʉ dayirã sãwũã sentipanʉta akʉza akʉpanʉbʉrʉ Jeowaba sõbede panʉbʉta dayirã yiwidʼita, adewara mebẽrã yi kʼarebabipanʉbʉrʉ.

7. ¿Bʉa kʼãrẽta kʼawuabʉ Mauricio berabaridadebara?

⁷ Jeowaba dayirãʼa diabʉ trajo biata omarẽã akʉza biʼia akʉbʉ dayirãba kongregasione obʉta adewara jaradiabʉta (Sal. 110:3). Dayirãba nekʼãrẽ mejãcha opanʉbʉrʉ Jeowaita doba sentida ẽ bayi. ¿Kʼãrẽa? Akʉdaya mebẽã Mauricio sãwũã berabaridata.b Iyi buru kʼoeda audre ẽãne yi neũdukʼawuadebema abaʉta wiña wiñane jĩga wãsi Jeowadeba. Iya jarasi: «Mʉ̃ neũdukʼawua Jeowadeba jĩga wã kʼarea mʉ̃yikʉza krĩchasi, mʉ̃sida Jeowaʉ̃me kʼẽrẽpa baseabʉ kʼawuaita. Mʉ̃ra doba sentibasi akʉza krĩchabasi mia kʼaiba kʼawua ẽãta mʉ̃ sãwũã sentibʉra». ¿Kʼãrẽba kʼarebasi kʼẽrẽpa bʼaita? Iya jarabʉ: «Mʉ̃a Daizeze bedʼea audre jaradiaiba kʼarebasi mʉ̃ ʉ̃rʉ krĩcha ẽ baita akʉza mʉ̃ sãwũã sentibʉ ʉ̃rʉ mejãcha krĩcha ẽ baita. Mebẽrãbawaraʉba Daizeze bedʼea jaradiabʉba, mʉ̃ra sobiabasi maʉ̃ba wua doba senti ẽ basi». Mebẽrãbawaraʉba deza deza jaradia ẽ mina ãyi bawaraʉba telepononeba akʉza kartadeba jaradiapanʉbʉrʉ sobiapanañi. Adewara, ¿kʼãrẽba kʼarebasi Mauriciora? Iya jarabʉ: «Kongregasione audre trajasi adewara mʉ̃a diskurso omarẽã jarabʉdadera zarea obasi maʉ̃ta audre biʼia oita, maʉ̃ta mʉ̃a omarẽã jaradapeadaba kʼarebasi mʉ̃a krĩchaita, Jeowaba akʉza mebẽrãbara mʉ̃ta krĩchapanʉta».

BEDʼEA ZROMA KʼAREA SOPɄA SENTIBɄDE

8. ¿Sãwũã sentiseapanʉ dayirãra bedʼea zroma ũdubʉrʉdera?

⁸ Jõmaʉ̃ba kʼawuapanʉ naʉ̃ ewari jõbodoarera bedʼea zroma ũdudaita (2 Tim. 3:1). Mamina maʉ̃ bedʼea zromara zeyi dayirãba jʉ̃ã ẽãne. Bari jaraita, plata neẽ daya nesidabʉ edaita akʉza medikoba jaraseabʉ dayirã kaya zroma erbʉta, mawũã ẽ bʉrʉ atiaʉde dayi mebẽrãnebemata beiseabʉ. Mawũã berabaribʉrʉdera dayirãra sopʉabʉbaibara, mamina audre sopʉadayi maʉ̃ra bedʼea zromara zeda ʉ̃rʉ zenʉmʉne. Mamina kĩrãbedaibara Jeowabara kʼawuabʉta dayirã sãwũã berabarinʉmʉra akʉza kʼarebakĩrãbʉta.

9. ¿Kʼãrẽ bedʼea zromata ũdusi Jobʼbara?

⁹ Akʉdaya Jeowaba sãwũã kʼarebasita Jobta. Iyara bedʼea zromata ũduda ʉ̃rʉ ũdusi. Ewari abaʉde Jobʼbara jõma aduasi iyi nedʉwʉrʉrãra akʉza iyi nezokʼarasi jõma beisi, adewara iyi wũãwũãrasi jõma beisi (Job 1:13-19). Maʉ̃ tẽã iyi waidide sopʉabʉeda mejãcha kayasi (Job 2:7). Iyira mejãcha sopʉabasi baera naʉ̃ta jarasi: «Mʉ̃ bebʉra mʉ̃a igara akʉza wua bakĩrã ẽ» (Job 7:16).

10. ¿Kʼãrẽta osi Jeowabara Jobʼba bedʼea zroma awuantamarẽãra? (Akʉra poto yi nããrabemata).

¹⁰ Jeowabara kʼawuabasi Job sãwũã berabarinʉmʉra akʉza Jeowabara Jobʼra mejãcha kãga baera jõma diasi iya nesidabʉta mawũã iyiʉ̃me kʼẽrẽpa bamarẽã. Jeowara bedʼeasi Jobʼʉ̃me akʉza kʼawuabisi iyira buru biata adewara iya nekʼãrẽ jõma parãnara kãgade akʉbʉta. Akʉza bedʼeasi nedʉwʉrʉ zromara ʉ̃rʉ (Job 38:1, 2; 39:9, 13, 19, 27; 40:15; 41:1, 2). Adewara zokʼasi Elihúta maʉ̃ba Jobta so zarea diamarẽã. Elihúbara kĩrãbebisi Jobʼa Jeowabara nebiata diabʉta yi iyiare kʼẽrẽpabʉara. Jeowabara kãgabasi Elihúba ũrãgʼata diamarẽã Jobʼa. Elihúba kʼarebasi Jobʼra iyikʉza krĩcha ẽ marẽã akʉza kĩrãbebisi Jeowabara nekʼãrẽ jõma parãsi baera iyira audre yi zromata (Job 37:14). Adewara Jeowaba jarasi Jobʼa iyi neũdukʼawuara ũbeabari yiwidʼimarẽã, ãyara nemitiata osida baera (Job 42:8-10). Idi ewadera, ¿Jeowaba sãwũã kʼarebabʉ dayirãba bedʼea zroma ũdubʉrʉdera?

11. ¿Sãwũã kʼarebabʉ Daizeze Bedʼeabara dayirãba bedʼea zroma ũdubʉrʉde?

¹¹ Jeowa Jobʼʉ̃me bedʼeada kĩrãkʼa bedʼea ẽ idi ewadera dayirãʉ̃me, mamina bedʼeabʉ iyi bedʼeadeba (Rom. 15:4). Jeowabara dayirã sora aduʼa babibʉ nebia jʉ̃ãbibʉdeba. Atia akʉdayi ʉ̃kʉrʉ testora dayirãʼa so zarea diabʉta bedʼea zroma ũdubʉrʉde, Daizeze Bedʼeade Jeowaba jarabʉ mia abaʉ bedʼea zromaba dayirãra «jĩgara bʉ ẽ bayi Daizeze kãgadebara» (Rom. 8:38, 39). Adewara jarabʉ Jeowabara ũrĩbʉta yi iyaʼa yiwidʼibʉ bedʼeara (Sal. 145:18). Jeowaba jarabʉ dayirãba iyita ĩjãnara, badu bedʼea zromata awuantaita akʉza bedʼea zroma ũdubʉmina sobia bʼaita (1 Cor. 10:13; Sant. 1:2, 12). Adewara Daizeze Bedʼeabara jarabʉ idi dayirãba bedʼea zroma ũdubʉra ewari jõmaʉ̃nẽ ba ẽ baita (2 Cor. 4:16-18). Jeowaba jarabʉ taʉbita nekʼãrẽ dayirã zʉbʉriabibʉra, Diaruta akʉza iyi kʼaidubemarata (Sal. 37:10). ¿Kʼawuabʉka testorata burude, mawũã bedʼea zroma awuantaita?

12. ¿Kʼãrẽta odaibara Jeowaba dayirã iyi bedʼeadeba kʼareba diabʉ biʼia zokʼaita?

¹² Jeowaba kãgabʉ dayirãba Daizeze Bedʼeata ewariza akʉmarẽã akʉza maʉ̃ ʉ̃rʉ krĩchamarẽã. Dayirãba kʼawua wãta oũdubipanʉbʉrʉ, dayirãba ĩjãbʉra audre wari wãñi akʉza iyi neũdukʼawuabayi. Naʉ̃ba kʼarebayi dayirãba bedʼea zroma awuantaita. Iyi bedʼeata ĩjãpanʉbʉrʉ Jeowaba diayi iyi jaure zareata, maʉ̃ jaure zareaba kʼarebayi dayirãba badu bedʼea zromata awuantaita (2 Cor. 4:7-10).

13. ¿Sãwũã kʼarebabʉ nezokʼara jipabʉra akʉza bia krĩchabʉraba Daizeze Bedʼeadebema dayirã diabʉba, awuantaita bedʼea zromata?

¹³ Jeowa kʼarebadeba nezokʼara jipabʉra akʉza bia krĩchabʉrabara dayirã diabʉ kartarata, bideorata akʉza trãbirata, mawũã dayirãba ĩjãbʉ zarea bamarẽã (Mat. 24:45). Ãya nekʼãrẽ dayirãba nesidabʉde diabʉra biʼia zokʼa kʼawuaibara. Mebẽã wẽrã Estados Unidosdebemaba jarasi sãwũã nezokʼara jipabʉraba iya nebia diabʉra iyitara jipa yibiabasita. Iya jarasi: «Mʉ̃ Jeowa odebʉta 40 poaga bade bedʼea zroma mejãcha ũdu zebʉrʉ». Naʉ̃ mebẽãbara mejãcha ũdusi bedʼea zromata. Iyi zezõnara karruba beasi, iyi yibarirãra kaya zromaba beisi, adewara iyisida kanserba jidama ũme jidasi. ¿Kʼãrẽba kʼarebasi iyira naʉ̃ bedʼea zroma awuantaita? Iya jarabʉ: «Jeowaba mejãcha akʉ zebʉrʉ, nezokʼa jipabʉra akʉza bia krĩchabʉraba kʼareba zebʉrʉ bedʼea zroma awuantaita, maʉ̃ kʼarea Jobde kĩrãkʼa naʉ̃ta jaraseabʉ: ‹Mʉ̃ bei ẽ nããra iyiʉ̃me kʼẽrẽpa bayi mʉ̃ra›» (Job 27:5).

14. ¿Sãwũã zokʼabʉ Jeowabara mebẽrãra dayirãba bedʼea zroma ũdubʉrʉde kʼarebaita? (1 Tesalonicenses 4:9).

¹⁴ Jeowaba jaradiabʉ iyi pʉwʉrʉʼa ãyira yiya kʼarebadamarẽã akʉza so zarea diadamarẽã bedʼea zroma ũdubʉrʉde (2 Cor. 1:3, 4; akʉra 1 Tesalonicenses 4:9). Dayirã mebẽrãra Elihú kĩrãkʼapanʉ, ãyara kʼarebakĩrãpanʉ baera dayirã Jeowaʉ̃me kʼẽrẽpa bʼaita bedʼea zroma ũdubʉrʉde (Hech. 14:22). Mebẽã Dianeba ũdusi sãwũã mebẽrãba kʼarebasidata. Iyi kima kayasidera mebẽrã kongregasionebemaba kʼarebasida iyita Jeowa kʼawa bamarẽã. Iya jarabʉ: «Maʉ̃ mawũã berabaridara mʉ̃itara zarebasi, mamina sentisi Jeowaba sãwũã mʉ̃aʼa zarea diasita akʉza iyi kãga ũdubisita. Kongregasionba mejãcha kʼarebasi daira, diasida daiba nesidabʉta mawũã bedʼea zroma awuantaita. Dai akʉde jʉ̃ẽsida, trʉ̃sida, bʉrasida akʉza karrude edesida Daizeze bedʼea jaradiaita adewara ãba yi jʉrebarima edesida». Mejãcha sobiapanʉ mebẽrã kãga ũdubipanʉrata erpanʉ baera kongregasione.

JEOWAʼA BIGA DIAPANɄ DAYIRÃTA KÃGADE AKɄBɄ BAERA

15. ¿Kʼãrẽa kʼawuapanʉ dayirãbara bedʼea zroma zebʉrʉdera awuantaseapanʉta?

¹⁵ Dayirã jõmaʉ̃ba bedʼea zroma ũdupanʉ mamina dobapanʉ ẽ, Jeowara zeze bia kĩrãkʼabʉ baera dayirãta akʉbʉ. Dayirãba Jeowaʼa kʼareba widibʉrʉdera, iyara ũrĩkĩrãbʉ akʉza kʼarebakĩrãbʉ (Is. 43:2). Dayirãba biʼia kʼawuapanʉ badu bedʼea zroma zebʉrʉra awuantaseapanʉta, Jeowaba dayirã nekʼãrẽ diabʉdeba: iduaribibʉ dayirãta iyaʼa yiwidʼidamarẽã akʉza diabʉ iyi bedʼeata nekʼãrẽ iyi ʉ̃rʉ kʼawuaita, adewara mebẽrãta.

16. ¿Kʼãrẽta odaibara Jeowaba akʉ bamarẽãra?

¹⁶ Mejãcha sobiapanʉ dayirã Zeze Jeowaba dayirãta bia akʉbʉ baera. «Iyara dayirã sota sobiabibʉ» (Sal. 33:21). ¿Sãwũã ũdubiseapanʉ Jeowaʼa biga diapanʉta dayirã bia akʉbʉ kʼarea? Iya kʼareba diabʉta dayirãba bia zokʼabʉrʉde. Jeowaba dayirãta bia akʉ bamarẽã kãgapanʉbʉrʉ zarea odaibara iya zokʼabʉta oita, mawũã opanʉbʉrʉ iya akʉbayi ewari jõmaʉ̃nẽ (1 Ped. 3:12).