Warrara bʉ buru kʼoeda tẽã audre ora Jeowaita

1. ¿Kʼãrẽta ozebʉrʉ warrara mejãchaʉba?

POAGAZA warrarãra mejãcha buru kʼoepanʉ, ¿bʉsida buru kʼoesika? Mawũãbʉrʉ mebẽrã kongregasionebemata akʉza Jeowata, mejãcha sobiabʉ bʉ kʼarea (Prov. 27:11). Krĩchara bʉa kʼãrẽta ozebʉrʉta. Bari jaraita, bʉa Daizeze Bedʼeara nrʉemaza estudia zebʉrʉ, naʉ̃ba kʼarebasi bʉa audre ĩjãita naʉ̃ra Daizezedeta akʉza audre kãga zesi Jeowata, mawũã bʉa Jeowata mejãcha kãga zesi baera krĩchasi bʉ buru kʼoeita, kʼãrẽ yibia bʉa maʉ̃ta osi baera.

2. ¿Kʼãrẽta kʼawuadayi naʉ̃ artikulodera?

² Bʉ buru kʼoei nããra bedʼea zromata ũdusibaibara. Mamina tẽãne bida ũduyi. Diarubara nekʼãrẽ jõma oyi bʉa Jeowa kãgabʉta idubʉmarẽã (Efes. 4:14). ¿Kʼãrẽba kʼarebai bʉ Jeowaʉ̃me kʼẽrẽpa bʼaita? Zarea trajaibara Jeowaita akʉza zarea oibara Daizezedebemata audre bia oita (Heb. 6:1). Naʉ̃ artikulode kʼawuadayi bʉa sãwũã oseabʉta maʉ̃ra.

KʼÃRẼTA OIBARA DAIZEZEDEBEMATA AUDRE BIA OITA

3. ¿Kʼãrẽta oibara kristianora jõmaʉ̃ba ãyi buru kʼoeda tẽãra?

³ Yi buru kʼoebʉrʉrabara ũrĩnaibara Pabloba ũrãgʼa diadata kristianora Éfesodebemara. Iya ũrãgʼasi wari wãnamarẽã (Efes. 4:13). Pablobara jarasi kristiano abaʉba Daizezedebema audre owãra wũãwũã waribari kĩrãkʼabʉta. Yibarirãra mejãcha sobiabʉ ãyi wũãwũã zake kʼareara, mamina maʉ̃ra ewari jõmaʉ̃nẽ wũãwũã zake ẽ bayi, iyira wari wãi baera (1 Cor. 13:11). Kristianoraʉ̃me abarika berabaribʉ. Ãyi buru kʼoeda tẽãra zarea oibara Daizezedebemata audre bia owãita. Akʉdayi kʼãrẽba kʼarebaseabʉta maʉ̃ oita.

4. ¿Kʼãrẽ nebiaba kʼarebayi audre bia oita Daizezedebemara akʉza kʼãrẽa? (Filipenses 1:9).

⁴ Jeowara audre kãga wãra. Bʉara Jeowara kãgabʉ, mamina audre kãga wãseabʉ. ¿Sãwũã? Apostol Pabloba jaradiasi maʉ̃ra sãwũã oita Filipenses 1:9de (akʉra). Pablo yiwidʼiside jarasi pilipenseraba audre kãga wãmarẽã Jeowata. Naʉ̃ba jarakĩrãbʉ dayirãba Jeowa kãgabʉra, audre kãga wãseabʉta. Mawũã oira audre biʼia ũdukʼawuaibara Jeowata. Dayirãba audre ũdukʼawua wãne, audre kãgadayi akʉza akʉdayi iya kʼãrẽ nebia erbʉta, adewara mejãcha sobiabikĩrãnañi akʉza nekʼãrẽ nemitia oda ẽ bayi iyi sopʉabita. Zarea odayi kʼawuaita iya dayirãba kʼãrẽta omarẽã kãgabʉta akʉza nekʼãrẽ jõma odayi maʉ̃ta oũdubita.

5, 6. Adewara, ¿kʼãrẽta oibara Jeowa audre kãga wãita?

⁵ Adewara Jeowa ʉ̃rʉ audre biʼia kʼawuaira ũdukʼawuaibara Jesuba odata, iyara yi Zezede kĩrãkʼa osi baera (Heb. 1:3). Jesu ʉ̃rʉ bia ũdukʼawuaira, kʼawuaibara libro Evangeliora kimarebʉta. ¿Bʉara Daizeze Bedʼeara ewariza akʉbʉka? Mawũã ẽ bʉrʉ, naneba ʉ̃ta akʉ jʉ̃drʉseabʉ. Jesu ʉ̃rʉ lebʉrʉdera akʉra iyi sãwũã badata, ẽbẽrarãra iyi kʼawa bakĩrãdebasi adewara iya jirabaribasi wũãwũã zakerata (Mar. 10:13-16). Adewara iyi kʼaidubemarãra Jesu kʼawa bakĩrãdebasi akʉza jarabasi ãyi sãwũã sentipanʉta (Mat. 16:22). Jesura mawũã basi yi Zezede kĩrãkʼa obasi baera adewara dayirãra Jeowaʼa bedʼeaseabʉ. Dayirã yiwidʼibʉrʉde jaraseabʉ dayirã sãwũã sentibʉta akʉza iyara dayirã ʉ̃rʉ mitia krĩcha ẽ. Jeowabara dayirãra kʼãbãẽã kãgabʉ akʉza dayirã ʉ̃rʉ krĩchabʉ (1 Ped. 5:7).

⁶ Jesubara so borekea akʉsi ẽbẽrarãra. Mateoba jarabʉ: «Kabana ũdubʉrʉdera so zʉbʉria akʉbasi popanʉ kĩrãkʼa akʉbasi baera, maʉ̃ba obejarãra yi akʉbari neẽ kĩrãkʼabasi» (Mat. 9:36). ¿Jeowabara sãwũã akʉbasi ẽbẽrarãra? Jesuba panʉsi: «Aramaʉ̃ kĩrãkʼa marã Zeze ʉ̃tre bʼʉbara krĩña ẽã iabʼa aduaira za wĩka kedʼeta» (Mat. 18:14). Kʼãrẽaba sobiapanʉ dayirãba kʼawuasida baera naʉ̃ ʉ̃rʉ. Dayirãba Jesu ʉ̃rʉ audre kʼawua wãnara, Jeowa dayirãba kãgabʉta audre wari wãñi.

7. ¿Kʼãrẽa yibia bʉita mebẽrã Jeowaʉ̃me kʼẽrẽpapanʉbawara ãba bʼaita?

⁷ Adewara bʉa Jeowa kãgabʉra audre kãga wãseabʉ, bʉta ãbabʉbʉrʉ mebẽrã Jeowaʉ̃me kʼẽrẽpapanʉbawara. Akʉra ãyi sãwũã mejãcha sobiapanʉta adewara sopʉada ẽãta ãyi Jeowa odepanʉ kʼarea. Adewara jarada ãyaʼa jara ũrĩbimarẽã sãwũã berabari zebʉrʉta Daizeze ode akʉza ũrãgʼa widida bʉa krĩcha jidai naweda akʉza Daizeze Bedʼeaba jarabʉ ẽbẽra mejãchaʉba ũrãgʼa diabʉdera jõma bia wã (Prov. 11:14).

8. ¿Kʼãrẽta oibara bʉa bia kʼawua ẽ bʉrʉ kʼãrẽ ʉ̃rʉ ĩjãbʉta?

⁸ Biʼia kʼawuara bʉa kʼãrẽta ĩjãbʉta. Parrapo 2de kʼawuada kĩrãkʼa, Diarubara nekʼãrẽ jõma oyi bʉta Jeowa kʼawa ba ẽ marẽã akʉza bʉa ĩjãbʉta adʉamarẽã. Iya kãgabʉ krĩchamarẽã bʉa Daizeze Bedʼeade kʼawuadara sewidata. Bari jaraita, ewari abaʉde ẽbẽraba bʉa jarayi nekʼãrẽ jõmabʉra Jeowaba parã ẽ basita, awuarabʉrʉ iyidoba zesita. Naʉ̃bara imitia bedʼeabibʉ Jeowa ʉ̃rʉ, bʉ wũãwũã zake basiedara krĩcha ẽ basibaibara naʉ̃ ʉ̃rʉra, mamina bʉma waridu bʼaira bʉ propesoreraba kolegiode naʉ̃ ʉ̃rʉ jaradiapanʉbaibara, mamina ãyara biʼia jʉrʉda ẽ wãrĩnubʉ kʼawuaita nekʼãrẽ jõma parãnara. Kĩrãbera Proverbios 18:17ba jarabʉta: «Yi nãã bedʼeabʉra wãrĩnu bedʼeabʉ kĩrãkʼabʉ, mamina tẽã bedʼeabʉbara widipe kĩrãkita ũdubibʉ». ¿Kʼãrẽta jaradiabʉ naʉ̃ testobara? Bʉa kolegiode jõma jaradiapanʉta ĩjãi kaude, biʼia kʼawuara kʼãrẽta jaradiabʉta Daizeze Bedʼeaba. Jʉrʉda dayirã kartarane akʉza bedʼeara mebẽrã nãã nekʼãrẽ iyidoba zeda ĩjãbadabawara, ãyaʼa widida kʼãrẽba kʼarebasita ĩjãita nekʼãrẽ jõmabʉra Daizezeba parãnata. Mawũã widibʉba kʼarebaseabʉ kʼawuaita wãrĩnubʉta nekʼãrẽ jõma parãnara.

9. ¿Kʼãrẽta kʼawuabʉ Melissa berabaridadebara?

⁹ Mebẽã Melissara biode kʼarebasi kʼawuaiba nekʼãrẽ jõma parãna ʉ̃rʉ.b Iya jarabʉ: «Propesorera nekʼãrẽ iyidoba zeda ʉ̃rʉ bedʼeabʉrʉdera ĩjãbibʉ wãrĩnu mawũã zesita. Mʉ̃ra perabasi maʉ̃ ʉ̃rʉ bedʼeabʉ bia kʼawuaita, krĩchabasi baera mʉ̃a ĩjãbʉta aduaseabʉta. Mamina, tẽãne kʼawuasi Jeowabara kãgabʉta biʼia kʼawuamarẽã dayirãba kʼãrẽta ĩjãbʉta. Maʉ̃ kʼarea zarea osi naʉ̃ libro ʉ̃rʉ kʼawuaita ¿Existe un Creador que se interese por nosotros? akʉza naʉ̃ra kartarata ¿Es la vida obra de un Creador? adewara El origen de la vida. Cinco cuestiones dignas de análisis. Mʉ̃a maʉ̃ta estudiaita nesidabasi. Bia ẽ sentibʉ mʉ̃a nãã mawũã oẽ basi baera».

10, 11. ¿Kʼãrẽba kʼarebayi nekayirua oẽ baita? (1 Tesalonicenses 4:3, 4).

¹⁰ Zarea ora nekayirua oẽ baita. Bʉ warraraenara mia erkʼãĩta mejãcha krĩchanʉmʉ adewara awuruba bʉa jaradayi mia erkʼãĩmarẽã. Diarubara kãgabʉ bʉa nemitiata omarẽã. Mamina, ¿kʼãrẽba kʼarebaseabʉ mawũã oẽ baita? (Akʉra 1 Tesalonicenses 4:3, 4). Bʉ Jeowaʼa yiwidʼibʉrʉdera jarada bʉ sãwũã sentibʉta akʉza widida bʉta kʼarebamarẽã maʉ̃ nemitia oẽ baita (Mat. 6:13). Kĩrãbera Jeowabara bʉta kʼarebakĩrãbʉta mawũã bʉ kʼẽãita bʉ ẽãta (Sal. 103:13, 14). Daizeze Bedʼeabara bʉta kʼarebaseabʉ. Melissara zarea osi nemitia ʉ̃rʉ krĩcha ẽ baita. Iya jarabʉ: «Mʉ̃ra biode kʼarebasi Daizeze Bedʼea ewariza lebʉba, naʉ̃ba mʉ̃a kĩrãbebibasi baera mʉ̃ bebʉra Jeowadeta akʉza kʼarebasi mʉ̃a nemitia oẽ baita» (Sal. 119:9).

¹¹ Bʉara kʼãrẽa bʉyidobaʉba awuantanʉmaita nesida ẽ krĩcha mitia zebʉra. Bʉ yibarira jaraseabʉ bʉ sãwũã berabarinʉmʉta mawũã oita zareabʉmina, yibia bʉ yibarirabawara naʉ̃ ʉ̃rʉ bedʼeaita. Melissaba jarasi: «Mʉ̃ra Jeowaʼa yiwidʼisi so zarea diamarẽã mʉ̃ zezeʉ̃me bedʼeaita, mʉ̃ sãwũã berabarinʉmʉ ʉ̃rʉ. Maʉ̃ tẽã iyiʉ̃me bedʼeasi mawũã aduʼa biabesi, kʼawuabasi Jeowara mʉ̃ kʼarea sobiabasita».

12. ¿Kʼãrẽta oseabʉ bʉa krĩcha bia jidaita?

¹² Yi jaradiabira wãrĩnu Daizeze Bedʼearadebema. Bʉ wari wãne bʉ yibarirabara iduaribiyi bʉya kãgabʉta jidamarẽã, mamina bʉra wabida warrara baera, bʉ nekʼãrẽ bʉa jõma kʼawua ẽãta. Mamina ¿bʉa kʼãrẽta oseabʉ nemitia oẽ baita mawũã Jeowadeba jĩga ba ẽ baita? (Prov. 22:3). Mebẽã wẽrã yi trʉ̃ Kariba jarabʉ kʼãrẽba kʼarebasita iya krĩcha bia jida kʼawuaita. Iya kʼawuasi mebẽrã Daizezedebema sãwũã oita bia kʼawuabʉbara, nesida ẽãta ãya jaradaita kʼãrẽta oibarata. Kariba jarabʉ: «Mʉ̃aʼa omarẽã jarabʉda awapai oi kaude, krĩchaibarabasi Jeowaba sãwũã krĩchabʉta». Bʉa Daizeze Bedʼea lebʉrʉde bʉyikʉza widira: «¿Kʼãrẽta jaradiabʉ naʉ̃ nebʉrabara Jeowa sãwũã krĩcha bʉ ʉ̃rʉ? ¿Nama bʉka wãrĩnu Daizeze Bedʼearadebemaba mʉ̃ta kʼarebaseabʉta? Mʉ̃a nama jarabʉta obʉbʉrʉ ¿kʼãrẽ nebiata ũduyi?» (Sal. 19:7; Is. 48:17, 18). Daizeze Bedʼea lepe akʉza maʉ̃ ʉ̃rʉ krĩchabʉbʉrʉ zare ẽ bayi oita Jeowaba kãgabʉta, bʉa audre kʼawua wãne Daizeze Bedʼeaba jarabʉta, kʼawuayi kʼãrẽta krĩchabʉta Jeowaba. Mawũã nesida ẽ bayi bʉa jaradamarẽã kʼãrẽta oseabʉta akʉza kʼãrẽta obe ẽãta.

13. ¿Sãwũã kʼarebaseabʉ neũdukʼawua bia erbaibara? (Proverbios 13:20).

¹³ Jʉrʉda neũdukʼawuara Jeowa kãgabʉta. Atia parrapo 7de kʼawuada kĩrãkʼa, neũdukʼawua biabara kʼarebaseabʉ biʼia kʼawuamarẽã Daizezedebema sãwũã oita (akʉra Proverbios 13:20). Akʉra mebẽã wẽrã Sara sãwũã berabaridata. Iyi nãã sobia bada kĩrãkʼa sobia ba ẽ basi, mamina, ¿kʼãrẽba kʼarebasi iyi sobia bʼaita? Saraba jarabʉ: «Mʉ̃a neũdukʼawua nesidabʉde ũdusi. Mebẽã wẽrãʉ̃me ãba yi jʉrepanasi semanaza karta Jarakabʉ estudiaita, adewara ababema mebẽãba kʼarebasi ãba yi jʉrebʉde juwa ʉ̃ta wã kʼãrãpe bedʼeaita. Mʉ̃ neũdukʼawuaraba kʼarebasi mʉ̃yidobaʉba Daizeze Bedʼea kʼawuaita, adewara soiduba Jeowaʼa yiwidʼita, mawũã wiña wiñane audre Jeowa neũdukʼawua biabasi akʉza jẽda sobiabasi».

14. ¿Julienbara sãwũã neũdukʼawua biata ũdusi?

¹⁴ ¿Sama ũduseabʉ neũdukʼawua biara? Mebẽã aba yi trʉ̃ Julien, iyira zõrãrã kongregasionebema. Iya naʉ̃ta jarabʉ: «Mʉ̃ warrara basiedara mʉ̃a ũdusi neũdukʼawua biata Daizeze Bedʼea jaradiabʉde, ãya mʉ̃a ũdubisi baera sobia baseabʉta Daizeze Bedʼea jaradiabʉde. Aramaʉ̃ta krĩchasi audre trajaita Jeowaita, adewara kʼawuasi neũdukʼawuara mʉ̃yi kĩrãkʼabʉta jʉrʉbasi baera neũdukʼawuara bio erbabe ẽ basita. Adewara mʉ̃ Betelma wãside mʉ̃a ũdusi neũdukʼawuara biata, maʉ̃raneba kʼawuasi mʉ̃ ewari sãwũã zokʼa kʼawuaita, naʉ̃ba kʼarebasi mʉ̃ audre Jeowa neũdukʼawua bia bʼaita».

15. ¿Kʼãrẽ ũrãgʼata diasi Pablobara Timoteoʼa? (2 Timoteo 2:20-22).

¹⁵ ¿Kʼãrẽta oibara bʉa ũdura bʉ kongregasione neũdukʼawua bia ẽãta? Pablobara kʼawuabasi ʉ̃kʉrʉ mebẽrã kongregasionebemabara ãya obʉdeba akʉza jarabʉdeba ũdubibʉta Jeowaba kãgabʉde bʉ ẽãta. Maʉ̃ kʼarea Timoteoʼa jarasi maʉ̃raneba jĩga bamarẽã (akʉra 2 Timoteo 2:20-22). Jeowa neũdukʼawua bʼaira arigʉ yibia, maʉ̃ kʼarea dayirãbara erba ẽ baibara neũdukʼawua Jeowadeba jĩga wãbibʉta (Sal. 26:4).

DAIZEZEITA KʼÃRẼ OITA KRĨCHABɄBARA KʼAREBAYI AUDRE JEOWA KʼAWA BʼAITA

16. ¿Kʼãrẽta oita krĩchaibara Jeowaita?

¹⁶ Krĩchara kʼãrẽta audre oseabʉta Jeowaita. Bʉa naʉ̃ta obʉbʉrʉ bʉa ĩjãbʉra audre zareabayi akʉza kristiano biabayi (Efes. 3:16). Bari jaraita, bʉyidobaʉba audre kʼawuaseabʉ Daizeze Bedʼeata akʉza ewariza Daizeze Bedʼeata leseabʉ (Sal. 1:2, 3). Adewara Jeowaʼa soiduba badua yiwidʼi baseabʉ. Jʉra kʼawuabaibara jemenebʉde bʉ ewarira sãwũã zokʼabʉ kʼawuaita akʉza akʉibara kʼãrẽta jemenebʉta (Efes. 5:15, 16). Jeowara mejãcha sobiabʉ ũdubʉrʉde bʉ zarea obʉta iya kãgabʉ oita.

17. ¿Wuabema kʼarebaibara bʉra sãwũã kʼarebaseabʉ?

¹⁷ Wuabema kʼarebabʉrʉdera ũdubibʉ biʼia kʼawuabʉta Daizezedebema sãwũã oita. Jesuba jarasi: «Audre sobiabʉ daya diabʉde dayaʼa diapanʉira» (Hech. 20:35). Bʉa zokʼabʉbʉrʉ bʉ ewarita akʉza bʉ zareata awuru kʼarebaita mawũãra sobiabayi. Bari jaraita, bʉa kʼarebaseabʉ mebẽrã zõnababʉta akʉza kayabʉta ãya nekʼãrẽ nesidabʉ edabʉde. Maʉ̃ta neẽbʉrʉ, kʼarebaseabʉ ãya zokʼa kʼawuamarẽã selularta. Bʉta yumakẽrã buru kʼoemabʉrʉ, zarea oseabʉ zõrãrã kʼarebabari bʼaita, mawũã mebẽrã kʼarebaita (Filip. 2:4). Akʉza kãgata ũdubiseabʉ wuabema ẽbẽrarã Daizeze Bedʼea jaradia wãbʉrʉde (Mat. 9:36, 37). Bʉta ewarita erbʉbʉrʉ krĩchaseabʉ ewari jõmaʉ̃nẽ trajaita Jeowaita.

18. ¿Sãwũã kʼarebabʉ Daizezeita ewari jõmaʉ̃nẽ trajaiba Jeowa kʼawa bʼaita?

¹⁸ Ewari jõmaʉ̃nẽ Daizezeita trajaibara kʼarebaseabʉ Jeowa kʼawa bʼaita. Yi nãã edebari bʼaibara kʼarebaseabʉ Nejaradiabari de Daizeze Bedʼea jaradiabarima wãita, adewara Betelma wãita akʉza kʼarebaseabʉ Daizeze de parãita. Akʉra mebẽã wẽrã Kaitlyn, yi nãã edebariba jaradata: «Mebẽrã Daizeze odebʉ dããrababawara Daizeze Bedʼea jaradiaiba, kʼarebasi audre Jeowa kʼawa bʼaita. Ãyi yizaba kʼarebasi mʉ̃aʼa, Daizeze Bedʼea audre biʼia kʼawuaita akʉza nejaradiabari bia bʼaita».

19. ¿Kʼãrẽ nebiata ũduyi zarea obʉbʉrʉ audre oita Daizezedebemata?

¹⁹ Zarea obʉbʉrʉ Daizezedebemata audre oita, Jeowaba nebiata mejãcha diayi. Bʉ ewarita akʉza bʉ zareata bari ewarade adua ẽ bayi (1 Juan 2:17). Zʉbʉria ẽ bayi bʉa nekayiruata oẽ basi baera, awuarabʉrʉ sobiabayi akʉza bia wãñi (Prov. 16:3). Bʉ yiza biaba kʼarebayi zõrãrãta akʉza warrarata bʉ kongregasione (1 Tim. 4:12). Adewara sobiabayi, bʉta Jeowaʉ̃me aduʼabʉ baera akʉza iyi neũdukʼawua baera (Prov. 23:15, 16).