Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2024 Watch Tower Bible and Tract Society of Pennsylvania
3-9 MARZOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 3
Jeowa ʉ̃rʉ ĩjãbʉta ũdubira
ijwbv articulo 14 parr. 4, 5
Proverbios 3:5, 6: «Bʉa biʼia ũdukʼawuabʉta ĩjãrãra»
«Wãrĩnu soiduba ĩjãra Jeowata». Dayirãba nekʼãrẽ obʉde jõma Jeowaba kãgabʉde opanʉbʉrʉ mawũãra ũdubipanʉ Jeowa ʉ̃rʉ ĩjãpanʉta. Dayirãbara soiduba ĩjãbʉ Jeowa ʉ̃rʉ. Daizeze Bedʼeade bedʼea sobara jarakĩrãbʉ ẽbẽra wãrĩnu sãwũãchuta akʉza kʼãrẽta krĩchabʉta. Maʉ̃ba dayirãba soiduba Jeowa ʉ̃rʉ ĩj̈ãbʉrʉdera bari ewarade ĩjãpanʉ ẽ iyi ʉ̃rʉ awuarabʉrʉ iyi ʉ̃rʉ ĩjãpanʉ kʼawuapanʉ baera iyabʉrʉ kʼawuabʉ dayirãita kʼãrẽta audre yibiata (Romanos 12:1).
Wãrĩnu soiduba ĩjãra Jeowata. Dayirãra nemitia omia baera nekʼãrẽ oita jida burude dayima bʉde obʉbʉrʉ bia wã bayi. Edaʉde berabariseabʉ dayirãba nekʼãrẽ oita jida dogota dayima bʉde, maʉ̃ra abeda edara bia wã kĩrãkʼabʉ, mamina maʉ̃ neba aña jidasi baera tẽã jʉ̃neane bedʼea zromata ũduseabʉ (Proverbios 14:12; Jeremías 17:9). Maʉ̃ba dayirãbara mejãcha nesidapanʉ Jeowa kʼarebata iyi ʉ̃rʉ ĩjãita Jeowara bʉrʉ bia maʉ̃ba Jeowabara kʼawuabʉ dayirãita kʼãrẽta audre yibiata (Isaías 55:8, 9). Dayirãba iyi kʼarebara jʉrʉpanʉbʉrʉ nebiata ũdudayi (Salmo 1:1-3; Proverbios 2:6-9; 16:20).
ijwbv articulo 14 parr. 6, 7
Proverbios 3:5, 6: «Bʉa biʼia ũdukʼawuabʉta ĩjãrãra»
«Bʉ wãsimae krĩchabara iya jarabʉta». Dayirã bebʉde nekʼãrẽ oburudera ewari jõmaʉ̃nẽ Jeowa kʼarebata jʉrʉibara. Adewara dayirãba nei oita krĩchabʉbʉrʉ maʉ̃nebida jʉrʉibara Jeowaba kʼãrẽta krĩchabʉta maʉ̃ ʉ̃rʉ, mamina sãwũã oseabʉ maʉ̃ra Jeowa yiwidʼidaibara akʉza iya Daizeze Bedʼeade ũrãgʼa diabʉta ũrĩbara (Salmo 25:4; 2 Timoteo 3:16, 17).
«Iya bʉra jipa wãbibi». Daizezebara kʼarebabʉta dayirãta iya zokʼabʉde panamarẽã akʉza jaradiabʉ sãwũã oibarata (Proverbios 11:5). Maʉ̃ba dayirãba iya zokʼabʉde obʉbʉrʉ mejãcha ũdu ẽ bayi bedʼea zromata akʉza sobiapanañi (Salmo 19:7, 8; Isaías 48:17, 18).
be 76 parr. 4
Audre kʼawua wara
Nekʼãrẽ berabaribʉba daya krĩchaseabʉ jõma kʼawuabʉta. ¿kʼãrẽa sãwũã berabarira? mamina Daizeze Bedʼeaba jarabʉ Proverbios 3:7de jʉra kʼawua bamarẽã mawũã krĩcha ẽ baita. Ẽbẽra Daizezeba zokʼabʉta obʉbara kʼawuabʉ iyi bia wãira ũrĩbarata Jeowaba zokʼabʉta. Mawũẽra ẽbẽra ewariza ne kʼawua bʉbara iya ũdubʉmina ewariza kʼãrẽta sãwũã oibarata akʉza kʼawuabʉmina jʉrʉbʉ Jeowa kʼarebata kʼawuabʉ baera Jeowa bʉrʉ jõma bia edeita, akʉza iyikʉza ĩjã ẽ maʉ̃ba.
Jʉrʉda nekʼãrẽ biʼiabʉta Daizezedebemata
w06 15/9 17 parr. 7
Bedʼea audre yibiata Proverbios debemata
Okama biʼiakiruta dayi drʉane abʉ kĩrãkʼa jõmaʉ̃ba ũdudamarẽã maʉ̃ kĩrãkʼa kãga jõkata akʉza kʼẽrẽpa baita jõmaʉ̃a ũdubibara. Adewara dayi sode bʉa bʼaibara jarakĩrãbʉ maʉ̃ nebiata oũdubibarata dayide edabʉ kĩrãkʼa.
10-16 MARZOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 4
«Audre bia akʉra bʉ sota»
w19.01 15 parr. 4
¿Sãwũã akʉseabʉ bʉ sora?
Proverbios 4:23de, jarabʉ so ʉ̃rʉ naʉ̃ba jarakĩrãbʉ daya kʼãrẽta krĩchabʉta, sãwũã sentibʉta, kʼãrẽta oita krĩchabʉta, jarakĩrãbʉ ẽ daya aĩ kʼãrẽne sãwũã chʉta, awuarabʉrʉ dayide kʼãrẽ sãwũãbʉta (Akʉra Salmo 51:6 ).
w19.01 17 parr.10, 11
¿Sãwũã akʉseabʉ sora?
10 Dayirã so bia akʉira, nekʼãrẽ berabari nãã dayirãbara bia kʼawuabʉbaibara kʼãrẽta kayiruata akʉza kʼãrẽta biata mawũã neida berabaribʉrʉde kʼawuadayi kʼãrẽta sãwũã oita. Daizeze Bedʼeade Proverbios 4:23de jarabʉ Salomón ewaridera, basi ãyi pʉwʉrʉ mae nejʉrata zeburude jara barita pʉwʉrʉ akʉbaribara bia akʉibara basi pʉwʉrʉra murodeba ãya ũdubʉdade nejʉrarata ʉrʉta jarapanasi ʉrʉma marẽã. Naʉ̃ba dayirãba biʼia ũrĩbibʉ kʼãrẽta sãwũã oibarata Diaruba dayirã krĩchata ãrĩ ẽ marẽã.
11 Nawedara pʉwʉrʉ akʉbarirara ãba trajabasi puerta serrabariraʉ̃me (2 Sam. 18:24-26). Mawũã trajapanʉba kʼarebabasi nejʉrarata ze bʉrʉdera puertara serra bamarẽã (Neh. 7:1-3). Maʉ̃ kĩrãkʼa Diaruba dayirã nemitia obikĩrãbʉrʉdera dayi krĩcha Daizeze Bedʼeadeba krĩcha bia erbʉba «daya jarabʉ kĩrãkʼa bayi jʉra kʼawuaibara». Maʉ̃ nera dayirãbara ũrĩbara dayi krĩchaba jarabʉta. Mawũã obʉrʉba ũrĩ ẽ bayi Diaruba daya omarẽã jarabʉta.
w19.01 18 parr. 14
¿Sãwũã akʉseabʉ bʉ sora?
14 Salomón ewaridera pʉwʉrʉ akʉpanʉrabara puertara serra basi nejʉrarata eda zeda ẽ marẽã mamina ãyara ewa panasi yikota eda erjʉ̃ẽ marẽã. Maʉ̃ta ne ẽ bʉrʉ jarrababa obisia basi baera, maʉ̃ kĩrãkʼa dayirã so bia akʉira bari mejãcha krĩchanʉmʉ ẽ bʼaibara nemitia wa krĩcha ẽ baita, maʉ̃ awuara akʉibara Jeowaba kʼãrẽta jaradiabʉta. Mawũã Jeowaba jaradiabʉta dayirã soidu jʉ̃ẽmarẽã.
w12 1/5 32 parr. 2
«Audre bia akʉra bʉ sota».
¿Kʼãrẽa akʉdaibara dayirã sora? Jeowaba nokʼo Salomónneba naʉ̃ta jarasi «Audre bia akʉra bʉ sota, maʉ̃ba erbʉ baera dayirã bebʉra» (Proverbios 4:23) Dayirã sode sãwũã wã krĩchabʉba dayi sãwũã bʉba kʼarebayi ẽjũã kĩrãwãreãnẽ zebʉrʉde eda baita akʉza idi ewadebida bia baita wãrĩnubairaJeowabara dayi sode sãwũã krĩchabʉta akʉbʉ baera (1 Samuel 16:7). Maʉ̃ba dayirã sode sãwũã krĩchabʉdeba kʼawuaseapanʉ Jeowaba kʼãrẽta krĩchabʉta dayirã ʉ̃rʉ. Dayirã sode bia krĩchabʉbʉrʉ Jeowabara dayirãra bia akʉyi, mamina dayi sode mitia krĩchabʉbʉrʉ akʉza nekʼãrẽ aña obʉbʉrʉ mawũãra Jeowabara bia akʉ ẽ bayi (1 Pedro 3:4).
Jʉrʉda nekʼãrẽ biʼiabʉta Daizezedebemata
Kristiano Jeowa kʼawa bʼaira mesera mawũã wa toto ẽ
4 Proverbios 4:18de jarabʉ, kristianota Jeowa kʼawa bakĩrãpanʉbʉrʉ kĩrãkita akʉibara Daizeze Bedʼeaba jarabʉta akʉza mama ũrãgʼa diabʉta oũdubibara. Iya adewara Jeowa organizasion jarabʉta ũrĩ bʼaibara mawũã obʉbʉrʉ wiña wiñane ũdubi wãñi iyira Jesús kĩrãkʼa bʉta akʉza audre ũdukʼawua wãñi Jeowara. Jeowaba trʉ̃ bʉ iyi deda zemarẽã mʉ̃ kartadera ãyi ũme bayi mʉ̃ra ãyi Daizeze bayi.
17-23 MARZOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 5
Jʉra kʼawuaibara Jeowaba kãga ẽãne mia erkʼãĩ ẽ bʼaita.
w00 15/7 29 parr. 1
¿Naʉ drʉa mitiade dayirãra kʼẽrẽpa baseabʉka?
Proverbiosde jara ũrĩbibʉ ẽbẽrawẽrã odebemaba ikʉa bedʼeabʉba, akʉza ibia bedʼeabʉba nemitiade baeibibʉta. ¿Sãwũã berabaribʉ? maʉ̃ra yiza abaʉdeba akʉdaya. Yuwẽrã aba Amyʼra secretariade trajabʉ iyira 27 poagabʉ iya jarabʉ: «Mʉ̃ trajabʉ mae chʉ yumakẽrã aba iya mʉ̃a ibia bedʼea bʉ, akʉza bia akʉbʉ mʉ̃ra. Wãrĩnubaira mʉ̃ara mejãcha kãga awuruba mʉ̃ ʉ̃rʉ krĩcha marẽã mʉ̃ta akʉdamarẽã. Mamina mʉ̃a bia kʼawuabʉ naʉ̃ yumakẽrãbara mʉ̃ra kãga bʉ ẽãta iyira audrera mʉ̃ ũme ãba erkʼãĩ kĩrãbʉ. Maʉ̃ba iyaʼa sewabi ẽ mʉ̃ra». Naʉ̃ba ũdubibʉ ẽbẽra aba ikʉa bedʼea bʉbʉrʉ dayi mãra maʉ̃ra kĩrãwãreãbʉ kĩrãkʼa bʉ. Maʉ̃ba dayirãba bia krĩchada ẽ bʉrʉ maʉ̃ ẽbẽraba kʼãrẽta kãgabʉta mawũãra maʉ̃ ẽbẽra ãyi sewabiseabʉ. Maʉ̃ kʼarea Jeowaba dayirã diabʉ krĩchata mawũã dayirã krĩchata zokʼamarẽã kʼawuaita kʼãrẽta kãgakʉta wãrĩnu maʉ̃ ẽbẽraba mawũã yi sewa bi ẽ baita.
w00 7/15 29 parr. 2
Jeowaba kãga ẽãne mia erkʼãĩra jipade zare. Jeowaba kãga ẽãne mia erkʼãĩ burudera mejãcha zʉbʉriabʉ chirua zoa ajenjo dobari kĩrãkʼa bʉ akʉza pʉ espadaba kʼõbari kĩrãkʼa, ¿kʼãrẽa? Jeowaba kãga ẽãne mia erkʼãĩ burudera bʉa kãga ẽ bʉ biogo mama basimina biogoyi mawũã ẽ bʉrʉ kaya mitiata jidaseabʉ. Adewara juwa jidabʉta yi kima neba ãĩ ba burudera naʉ̃bara mejãcha zʉbʉriabibʉ yi kimara. Akʉza yi kimara mama sopʉa bʉra mesera taʉ ẽ ewari mejãcha berabarisidu sopʉa bayi. Maʉ̃ba ãĩba burudera mejãchade zʉbʉriata ũdubʉ.
w00 15/7 29 parr. 5
Dayirãra jĩga panaibara ẽbẽrarã kayirua opanʉneba. ũrĩ ẽ bʼaibara musika mitia bedʼea chʉta, akʉza akʉ ẽ bʼaibara nekʼãrẽ kayiruata adewara ẽbẽrarã ãkadabeta akʉ ẽ bʼaibara (Proverbios 6:27; 1 Corintios 15:33; Efesios 5:3-5). Akʉza jʉra kʼawua bʼaibara dayirã sãwũã wua jõbʉ kʼarea adewara adua bedʼea ẽ baera (1 Timoteo 4:8; 1 Pedro 3:3, 4).
Jʉrʉda nekʼãrẽ biʼiabʉta Daizezedebemata
¿Naʉ̃ drʉa mitiade dayirãra kʼẽrẽpa baseabʉka?
1. ¿Jeowabara kʼãrẽta krĩchabʉ mia erkʼãĩ ʉ̃rʉra?
Jeowaba diasi mia erkʼãĩra, iyara kãgabasi baera juwua jidapanʉrata ãba kʼãĩmarẽã akʉza sobiapanamarẽã, maʉ̃ba yi juwua jidapanʉrabara wũãwũã erbaseabʉ akʉza yiya kãga ũdubiseapanʉ, maʉ̃ kʼarea Daizeze Bedʼeaba jarabʉ: «Sobiabara bʉ kima warraraena mia kʼãĩnaʉ̃me» (Proverbios 5:18, 19). Jeowabara kãgabʉ juwua jidapanʉrãra ãĩba ẽ bamarẽã (akʉra Hebreos 13:4).
24-30 MARZOBAYEDA
BEDʼEA BIA DAIZEZE BEDʼEADE ŨDADATA PROVERBIOS 6
¿Kʼãrẽta kʼawuaseapanʉ bisumaneba?
it-1 1175, 1176
Bisuma
Krĩcha neẽmina dobaʉba obʉ. Bisumara krĩcha neẽ mamina Daizezeba diabʉ kʼarea ãya obʉra ba marẽã mawũã. Daizeze Bedʼeabara jarabʉ bisumabara kue idadera yikora ãba jʉrepebʉ poaga berabari burude mejãcha zʉbʉria ẽ bʼaita (Pr 6:8). Bari jaradaita Palestinanera bʉ bisumanta, maʉ̃ bara poagadera mejãcha jʉrepebʉ yikota, mawũã kue bidade jarrababa zʉbʉria ẽ baita. Akʉza maʉ̃ bisumara mejãcha bʉ yiko mejãcha bʉ mae neta mejãcha bʉ mae. Adewara kue idadera ãya yiko wuaga erbʉra surrabʉsi baera ãĩ ede panʉ bisiama peita jõma akʉza ãya yiko wuaga erbʉta yi netata pawara bʉsidera ãya kidaba tʉpanare wari ẽ marẽã. Mawũẽra naʉ̃ bisumabara adewara dayirãbara kʼawuaseabʉ sãwũã bʉta bisumara ¿kʼãrẽa? Ãyira mainʉ ota o wã baera akʉza ãya nekʼãrẽ jʉrʉpe wãta ode tabaso bʉ baera.
Yiza biata diabʉ. Dayirãba awuru kʼawuadara bisuma ʉ̃rʉ naʉ̃ba nekʼãrẽ mejãcha jaradiayi dayirãra Proverbios 6:6de jarabʉ: «Plojo wãra bisuma akʉde, akʉra iyi sãwũãbʉta maʉ̃neba krĩcha bia jidara». Akʉza bisumara ʉ̃rʉ kʼawuapanʉ nekʼãrẽ obʉta neida berabari nãã, adewara bisumarara trajamia akʉza ãya nekʼãrẽ oita krĩcha obʉbʉrʉ maʉ̃ jõma ari bayeda aukarada ẽ sãwũã opanʉ ãya maʉ̃ra bari jaraita edebʉ ãyi deda nekʼãrẽ ãyitara sʉgʉabʉta nekʼãrẽ ãyima mejãcha sʉgʉabʉta abʉba mapae burudera idubʉda ẽ maʉ̃ kʼarea awuara bʉrʉ mejãcha zarea obʉ nekʼãrẽ mejãcha berabari bʉrʉ bʉsida ãyi deidu erkʼãĩta adewara bisumabara ãyi dera neneẽã erbʉ, akʉza ãyidebemata pae bʉta ũdudara mawũã ẽ bʉrʉ obʉta maʉ̃ta kʼãrẽ wã bʉ.
w00 15/9 26 parr. 3, 4
Zarea oibara bʉ ʉ̃rʉ imitia bedʼea ẽ baita
Zarea trajadaibara akʉza ewariza krĩchada daibara dayirãba trabajo obʉra audre bia odaita. Maʉ̃ra yãrãba akʉnʉmʉ ẽ bʉsida, mawũãra dayikʉza nebiata ũduyi. Audre trabajo bia oseabʉ eskuelade, daizeze trajabari mae, akʉza Daizezeta nekʼãrẽ ũdubʉde audre bia oseabʉ. Mawũã odara abarika bisumaba iyi zarea obʉ kʼarea nekʼãrẽ oita tẽã iya bia bʉ kʼarea, abarika Daizeze Jeowabida kãgabʉ dayirãba nebiata ũdudamarẽã mawũã zarea trabaja bʉ kʼarea (Eclesiastés 3:13, 22; 5:18). Mawũã zarea trabajapanʉ bʉrʉ dayirã krĩchara aduʼa erpanañi akʉza sobia panañi (Eclesiastés 5:12).
Salomónba bedʼea ũme widisi plojoa iyi ʉrʉmabita: «Plojo, ¿kʼai sõbe bayeda kama kãĩ tabei bʉra? ¿Sõbede urumai bʉra?» Akʉza Salomónba plojo kĩrãkʼa bedʼeabʉde naʉ̃ta jarasi «wiña kʼãĩ tayi, wiña enaʉ tayi, nama juwa kʼare ũtabari bayi, mawũã obʉbʉrʉ bʉ kʼarena eda beira nezrʉgamia kĩrãkʼa zeyi, akʉza yumakẽrã yõñi aba bʉ kĩrãkʼa zeyi» (Proverbios 6:9-11). Plojo kʼãĩ bʉ edara iya nekʼãrẽ bia erbʉra iya kʼawuaena mesera aduaseabʉ, nezrʉgamiaraba zrʉga kĩrãkʼa bayi, akʉza mejãcha zʉbʉriabiseabʉ yumakẽrã yõna awabʉta zʉbʉriabibari kĩrãkʼa. Maʉ̃ ẽbẽra plojoba iya pega erbʉta bʉ erbʉ ẽ bʉrʉ maʉ̃ra mesera chirua kayiruaba birayi (Proverbios 24:30, 31). Ẽbẽra plojo bara negosiota erbʉbʉrʉ maʉ̃ra audre ẽãne bia wã ẽ bayi, ¿kʼai sõbe bayeda ẽbẽra maʉ̃ plojo trajo diabʉbara awuantaita? ¿ẽbẽra plojora escueladera bia wãipe iyira?
Jʉrʉda nekʼãrẽ biʼiabʉta Daizezedebemata
w00 15/9 27 parr. 4
Zarea oibara bʉ ʉ̃rʉ imitia bedʼea ẽ baita
Proverbiosde nekʼãrẽra jara ũrĩbibʉbara jarakĩrãbʉ nekʼãrẽ kayiruata naʉ̃ drʉade bʉta jõma. Bari jaradaita dabʉ kayirua akʉibara akʉza dayi sode kʼãrẽ mitia oita krĩchabʉbara jarakĩrãbʉ kayiruara dayi krĩchadeba zebʉta adewara kĩrãneba sewida jarabʉbara, akʉza awuru ʉ̃rʉ sewida jaraibara jarakĩrãbʉ baldu kayirua dayi dedaʉba zebʉta. Akʉza ẽbẽra bia daibara adewara jirʉba nemitiata wãibara jarakĩrãbʉ baldu kayirua oita. Wãrĩnu baera Jeowabara jipade jʉra jari ẽbẽrarã ãba aduʼa abʉta kriña yõ bi bʉ ẽbẽrarã naʉ̃ testo proverbiode jarabʉ bʉta nekʼãrẽ seis akʉza nekʼãrẽ siete Jeowaba kãga ẽãta. Maʉ̃bara jarakĩrãkʉ ẽ bari maʉ̃ trʉ kãga ẽãta Jeowaba awuara bʉrʉ bʉta maʉ̃ne ʉ̃ta kayiruara kʼãrẽa ẽbẽrarãbara ewariza audre kayiruata owã baera.
31 MARZODEBA-6 ABRIL EDA
BEDʼEA BIA DAIZEZE BEDʼEADE ŨDADATA PROVERBIOS 7
Jʉra kʼawuaibara nemitia oẽ baita
w00 15/11 29 parr. 5
«Mʉ̃a jarabʉta ũrĩra mawũã ewari jõmaʉ̃nẽ ba marẽã»
Nokʼo Salomónba iyi deda erbasi bentana aba jʉrra jʉrrabʉta,iya diamasiare mamaʉ̃ba akʉnʉmasi kora aba bia krĩchai wã ẽ bʉta. Naʉ̃ kũrabara wãbasi ẽbẽrarã ode bemara bʉ ode iyara maʉ̃ biʼia kʼawuabasi mawũãsidu yuwẽrã ode bemara chude kʼawa denʉ ma wãsi. ¿Kʼai basi maʉ̃ yuwẽrãra? akʉza ¿kʼãrẽta kãgabasi maʉ̃ yuwẽrãbara?
w00 15/11 29 parr. 5
«Mʉ̃a jarabʉta ũrĩra mawũã ewari jõmaʉ̃nẽ bamarẽã»
Maʉ̃ yuwẽrã kʉ̃ra ikʉa bedʼeabasi. Wãrĩnu baera iyara biʼia kʼawua basi kʼãrẽta kãgabʉta maʉ̃ kʉraʉ̃me. Maʉ̃ kʼarea iya jarasi iyira sakripisio o jʉ̃ẽsita akʉza iya kʼãrẽ jõma aribaesita. Mawũã ũdubita iyira wãrĩnu Daizeze kʼawa bʉta. Nawedara sakripisio templode dia burudera dia panasi chichita arinata akʉza aseitea, adewara binota (Leviticos 19:5, 6; 22:21; Números 15:8-10). Naʉ̃ wẽrãba kʉ̃raba jarasidera kʼawuabi kĩrãkʼa basi iyi dedara basita kʼãrẽ kʼoita akʉza kʼãrẽ doita. ¿Sãwũã kʼawuapanʉ? Nawedara sakripisio nekʼãrẽ diadara yi sakripisio odaba kʼoseabasi, maʉ̃ba ũdubibʉ naʉ̃ yuwẽrãbara kãga basita kʉ̃raʉ̃me bia berabarita akʉza maʉ̃ yuwẽrãba jarasi iyira kʉ̃raʉ̃me yi ũdude wã basita mamina Daizeze Bedʼea ʉ̃rʉ mejãcha estudiabʉba maʉ̃ta jarasi: «Wãrĩnu naʉ̃ yuwẽrãbara ẽbẽra aba jʉrʉ wã basi mamina wãrĩnu jʉrʉ wã basi kama kʉ̃rata maʉ̃ bedʼea ĩjãira jipade krĩcha ne chʉ kĩrãkʼa baibarabasi».
Adewara naʉ̃ yuwẽrãbara kʉ̃rara nekʼãrẽ biodeba sewasi, nããra iyi dabʉdeba ¿sãwũã? Iyi sãwũã wua jʉ̃ bʉdeba, yi ũmeta, kʉ̃ra ibiʼia bedʼeabasi iyira, yi ũbeata, tõbarideba ¿sãwũã osi maʉ̃ra? Iyara kʉ̃rara bʉrasi kimarera iyi i deba iyara kʉ̃rara nĩgasi yi juesomanera, naʉ̃ yuwẽrãbara kʉ̃rara sewasi kĩbʉdeba, iyara iyi kʼãĩ barira biʼia ara onʉmʉsi egipto debema lino waba naʉ̃ warabara kolorerata kĩrãtana erba basi, adewara mirra, aloe akʉza kanela keraba tãpoe nʉmʉsi (Proverbios 7:16, 17).
Naʉ̃ yuwẽrãbara kʉ̃rara iyi dera wa marẽã trʉ̃ basi, mamina bari ãba nekoita trʉ̃gasi ẽ iya jarada deba ũdubikĩrãbasi audrera kãga bʉta iyi ʉme ãba kʼãĩta ba marẽã. Maʉ̃ba kʉ̃raitara maʉ̃ yuwẽrãba jaranʉ bedʼea ĩjã ẽ baera zare basi awuara bʉrʉ maʉ̃ra jipade yibia basi. Kʉ̃raba iyi bedʼea audre ĩjãna marẽãra yuwẽrãrabara jarasi yi kimara deda ne ẽãta jĩga wãsita akʉza atia ze ẽãta (Proverbios 7:18-20). Maʉ̃ jaradadeba yuwẽrãbara kʉ̃rara sewasi (Proverbios 7:21). Naʉ̃ kʉ̃raba yuwẽrãba jarabʉ bʉ bedʼeata ĩjã ẽ baera José kĩrãʼka baibara basi (Génesis 39:9, 12). Mamina wãrĩnu mawũã basika naʉ̃ra?
w00 15/11 31 parr. 2
«Mʉ̃a jarabʉta ũrĩra mawũã ewari jõmaʉ̃nẽ bamarẽã»
Naʉ̃ yuwẽrãba jarabʉa yi edebi da ẽ baira kʉ̃raitara jipade zare basi, iyira maʉ̃ yuwẽrã kʼaidʉ wãsi toro beadaba eda edebari kĩrãkʼa. Yumakẽrã abaʉta kastigadaya kadena mae joʉ̃bʉdadera maʉ̃ yumakẽrãra ẽdrʉbe ẽ mamaʉ̃bara maʉ̃ kĩrãkʼa naʉ̃ kʉ̃rasida maʉ̃ kayirua odeba ẽdrʉ be ẽ basi iya kʼawuaena enẽdrʉmaba tei ma drʉ jirabaʉ ze bari kĩrãkʼa berabarikasi, ¿sãwũã? Kaya kayiruata jidaseabasi maʉ̃ yuwẽrãʉ̃me ãba kʼãĩ bʉdeba akʉza Jeowadeba ãĩ basi. Maʉ̃ba ibana zake trampade eda baebari kĩrãkʼa bae basi, maʉ̃ba ẽdrʉ be ẽ basi iyira.
Jʉrʉda nekʼãrẽ biʼia bʉta Daizezedebemata
w00 15/11 29 parr. 1
«Mʉ̃a jarabʉta ũrĩra mawũã ewari jõmaʉ̃nẽ bamarẽã»
Dayi juwara dayaʼa daʉ kawa erbʉ akʉza jipade mejãcha nesidara dayirãbara juwara naʉ̃ ẽãra kʼare obe ẽ baera (Proverbios 7:3.) Maʉ̃ kĩrãkʼa dayirãbara mawũã ẽ bʉrʉ iyi dayirãba Daizeze Bedʼeadeba ũrãgʼa jaradiadara baldʉa kĩrãme erbaibara daʉ kʼawua erbaibara aramaʉ̃ta, adewara maʉ̃ta dayirã sode bʉ erbaibara ¿sãwũã? Dayirã sãwũã obʉdeba ũdudaibara Jeowaba kãgabʉde panʉta.
7-13 ABRILBAYEDA
BEDʼEA BIA DAIZEZE BEDʼEADE ŨDADATA PROVERBIOS 8
Ũrĩbara Jesúsba jarabʉta
cf 130 parr. 7
«Kãga mʉ̃ zezera»
7 Bersikulo 22de bʉrʉ biaba jarabʉ iyira Jeowaba parãsita nekʼãrẽ jõma ma oi nããra iyi trʉ̃ nããbedara parãsita. Naʉ̃ bedʼeadeba kʼawuapanʉ maʉ̃ bʉrʉ biara maʉ̃ bʉrʉ bia jarabʉdera Jeowa ʉ̃rʉ bedʼea kʉ ẽãta awuara bʉrʉ Jesús ʉ̃rʉ ¿sãwũẽra? Jeowara kʼaiba parãi neẽ iyira kikibari mia kʼaiba parã ẽ basi iyira. Adewara iyara nesida ẽ kʼaiba iya bʉrʉ bia diaira, bʉrʉ biara iyideba zebʉ baera (Salmo 90:2). Mamina Jesúsʼra nekʼãrẽ jõma parãi na Jeowaba nããra parãsi (Colosenses 1:15). Naʉ̃ drʉade bʉta akʉza nekʼãrẽra ʉ̃tʉbʉta parãena Jeowaba parãsi Jesúsʼra maʉ̃ta jarabʉ Proverbiosde, adewara Jesúsʼra Jeowa bari bedʼeabʉ maʉ̃ba iyi bedʼeabʉrʉdera Jeowa bʉrʉ biata ũdubibʉ iyara (Juan 1:1).
cf 131 parr. 8, 9
«Kãga mʉ̃ zezera»
8 ¿Jesús nama egorode zei nããra ʉ̃tʉra kʼãrẽta obasi iyira? Bersikulo 30 jara ũrĩbibʉ Jesúsʼra yi zeze kʼawa ãba traja basita, kʼãrẽta jarakĩrãbʉ maʉ̃ba Colosenses 1:16 jarabʉ: «Daizezeba iyideba nekʼãrẽ jõma osi bajãta akʉza naʉ̃ ẽjũãta [...] Daizezebara jõma iyideba akʉza jõma iyitara». Nama ũdubibʉ nekʼãrẽ jõma naʉ̃ drʉade bʉra Jesús kʼareba parãsita ʉ̃tʉra parãsi angelerata akʉza nekʼãrẽ mejãcha nama egorode nẽwʉrʉrata, chirʉarata akʉza dayirã ẽbẽrarãta parãsi. Naʉ̃ba ũdubibʉ Jeowabara yi wuarraʉ̃mera ãba trajapanasita Jeowaba krĩchasi sãwũã oita nekʼãrẽ naʉ̃ drʉade bʉ jõma maʉ̃ta Jesúsba kʼarebapanasi. Maʉ̃ba dayirãba naʉ̃ drʉade nekʼãrẽ kĩrãwãrẽa biakiruta ũduburudera bika diapanʉ Jeowa (Salmo 19:1). Mamina kĩrãbepanʉ adewara kĩrãbepanʉ Jesúsʼra yi zezeʉ̃mera aba sobiade trajapanʉta.
9 Ẽbẽrarã nama egorodebemarata ãba trajabʉrʉdera ãyitara zare ãyirai bia panaira mamina mawũã berabari ẽ basi Jeowata Jesúsʼʉ̃mera, Jeúsʼra mejãcha sobia basi yi Zezeʉ̃me poaga biobayeda ãba trajasidera (Proverbios 8:30). Mõbemata, Jeowara Jesúsʼʉ̃mera sobiade ãba traja panasi maʉ̃ awuara Jesúsbara yi Zezeba nebia erbʉta audre ũdubi wãsi, maʉ̃ba ãyirai yiya mejãcha kãgapanasi ãyira.
w09 15/4 31 parr. 14
Jesúsʼra, David akʉza Salomón yi zroma iya obʉra bia akʉdaibara
14 Basi ẽbẽra aba buru biata, Salomónta mamina audre burubia basi Jesústa. Mamina Jesúsba jarasi iyi audre buru biata Salomónʼira (Mat. 12:42). Jesúsbara jarasi baera dayirã ewari jõmaʉ̃nẽ bʼai ʉ̃rʉ bemata (Juan 6:68). Bari jaraita, Jesúsba katumane bedʼea bia jaradade jarasi ʉ̃kʉrʉ bedʼea Proverbios librodebʉta. Salomónʼra bedʼeasi Jeowaba zokʼabʉta obʉdera mejãcha sobiabʉta (Pro. 3:13; 8:32, 33; 14:21; 16:20). Mamina Jesúsbara jarasi audre sobiabʉta dayirãba opanʉne Jeowadeta, iya jarasi naʉ̃ta: «Sobiapanʉ Daizezedebema audre kʼawuakĩrãpanʉta, maʉ̃rata eda bʼai baera Daizeze Nokʼode» (Mat. 5:3). Mawũẽra Daizeze Bedʼearadebemaba zokʼabʉta opanʉrãra Jeowa kʼawa maʉba dayi bebʉta diabʉ baera (Sal. 36:9; Pro. 22:11; Mat. 5:8). Adewara Jesúsʼra Daizeze Nokʼobai baera Jeowabara iyaʼa buru biata diabʉ kʼare (1 Cor. 1:24, 30). (Isa. 11:2).
Jʉrʉda nekʼãrẽ biʼiabʉta Daizezedebemata
g 5/14 16
Buru biabara trʉbʉ, ¿bʉa ũrĩseabʉka?
▪ «The World Book Encyclopedia» (Enciclopedia mundial) jarabʉ Daizeze Bedʼeara bedʼea awuara awuaraka mejãcha tradusi zebʉdata akʉza mejãcha dedekabʉdata. Bedʼea awuara awuaraka tradusibʉta 2.600 audrebʉta adewara mejãchaʉ̃ba erbaseabʉta Daizeze Bedʼeara.
▪ Adewara buru bia bara wãrĩnu trʉbʉ kĩrãkʼabʉ, maʉ̃ta jarabʉ Mateo 24:14de «Akʉza bedʼea bia Daizeze Nokʼo ʉ̃rʉra jaradiadayi naʉ̃ drʉa jõmaʉ̃nẽ ẽbẽrarãba kʼawuadamarẽã pʉwʉrʉra jõmaʉ̃nẽ, maʉ̃ tẽã zeyi jõĩta».
14-20 ABRILBAYEDA
BEDʼEA BIA DAIZEZE BEDʼEADE ŨDUDATA PROVERBIOS 9
Buru bia bara, yãrã kʼarea ipidarãra
¿kʼãrẽba kʼarebai dayirãba ũrãgʼa ũrĩta?
4 Ẽbẽra abaʉba dayirã ũrãgʼa diabʉrʉde akʉza jarabʉrʉde kʼãrẽnẽ awuara oibarata, edaʉde zare ũrĩta iya jarabʉra, ¿kʼãrẽa? Kʼawuapanʉ dayirãra kayirua omiarata, mamina awuru ẽbẽraba dayirãʼa jarara kʼãrẽ kayirua obʉta kãga ẽ dayirãbara (akʉra Eclesiastés 7:9). Dayirãba krĩchaseapanʉ awuara oira nesida ẽãta mawũã ẽ bʉrʉ krĩchaseapanʉ yi ẽbẽra dayirã ũrãgʼa diadabara ibia bedʼea ẽ basita maʉ̃ kʼarea ũrĩkĩrã ẽ. Adewara dayirã imitia bedʼeaseapanʉ yi ẽbẽra dayirã ũrãgʼa diada kʼarea akʉza krĩchaseapanʉ iyita nemitia omiabʉrʉ, ¿sãwũã ũrãgʼai mʉ̃ra? Dayirãra nemitia omia baera edaʉde dayirãʼa ũrãgʼa diabʉrʉta kãga ẽ baera ũrĩkĩrã ẽ, mawũã ẽ bʉrʉ jʉrʉpanʉ awuru ẽbẽrata daya ũrãgʼa diamarẽã daya ũrĩkĩrãbʉta.
¿kʼãrẽba kʼarebai dayirãba ũrãgʼa ũrĩta?
12 ¿Kʼãrẽba kʼarebai dayirãba ũrãgʼa ũrĩta? Dayirãta eda krĩchabʉta ũdubipanʉbʉrʉ naʉ̃ba kʼarebayi adewara kĩrãbepanʉbʉrʉ dayirãra nemitia omiata. Kĩrãbedadrʉ Job yizata iyara aña krĩchabasi mamina tẽã iya krĩchabadara awuara krĩchasi, maʉ̃ kʼarea Jeowabara nebia diasi iya ũdubisi baera eda krĩchabʉta. Elihú warrara basimina, Jobʼbara ũrĩsi Elihú ũrãgʼata, mawũã eda krĩchabʉta ũdubisi (Job 32:6, 7). Edaʉde dayirãbara krĩchapanʉ ũrãgʼara nesida ẽãta, mawũa ẽ bʉrʉ daya ũrãgʼa diabʉra dayirãraira audre warrarata, maʉ̃ kʼarea ũrĩkĩrã ẽ. Mamina dayirãta edabʉta krĩchabʉbʉrʉ naʉ̃ba kʼarebayi ũrãgʼa ũrĩta. Mebẽã Canádadebemaba jarabʉ: «Dayikʉzara akʉ ẽ wuabemaba dayi akʉbʉ kĩrãkʼara, maʉ̃ kʼarea awuruba daya ũrãgʼa diada ẽãra zare bayi dayi ara oita». Dayirã jõmaʉ̃ba nesidapanʉ ũrãgʼara nebia erbaita dayi sode, naʉ̃ba kʼarebayi dayirã nejaradiabari bia bʼaita (akʉra Salmo 141: 5).
13 Akʉdadrʉ Jeowaba ũrãgʼa diabʉrʉde dayirãʼa kãga ũdubibʉta. Jeowabara nebiata kãgabʉ dayirãitara (Prov. 4:20-22). Jeowaba dayirã ũrãgʼa diabʉrʉdera Daizeze Bedʼeadeba, kartaraneba mawũã ẽ bʉrʉ mebẽrã kongregasionebemaneba mawũã ũdubibʉ dayirã kãgabʉta akʉza «iyara dayirãra kʼẽãbʉ bia bamarẽã» (Heb. 12:9, 10).
14 Biʼia ũrĩda kʼãrẽta jarakĩrãbʉta krĩcharara sãwũã jaradiadata. Dayirã jõmaʉ̃ba ũrãgʼa diabʉrʉdera ibiade jaradiaibara (Gál. 6:1). Mamina edaʉde awuruba dayirãʼa ũrãgʼa diasibʉrʉ, krĩchaseapanʉ ũrãgʼara ũrĩkĩrã ẽãta ibiade bedʼea ẽ basi baera. Krĩchaibara kʼãrẽta jaradiakĩrãpanasita krĩcha ẽ baibara dayirãʼa sãwũã bedʼeada ʉ̃rʉ, mawũã oira dayikʉza widiseapanʉ: Mʉ̃a kãga ẽ basimina mʉ̃a sãwũã jaradiadata, ¿kʼãrẽta kʼawuaseabʉ maʉ̃ ũrãgʼadeba? Dayirãba krĩchabʉbʉrʉ yi ẽbẽra daya ũrãgʼa diabʉra nemitia omiata, zare bayi ũrĩta iyi ũrãgʼara, mamina dãyirata buru bia bʉrʉ akʉdayi kʼãrẽta kʼawuaseabʉta iya ũrãgʼa diabʉdeba iyi nemitia omiamina (Prov. 15:31).
w01 15/5 30 parr. 1, 2
Krĩcha biata erbʉbʉrʉ mawũãra ewari jõmaʉ̃nẽ bayi
Krĩcha bia barabʉbara iyaʼa ũrãgʼa diabʉdadera ũrĩbʉ maʉ̃ ũrãgʼara, mamina jipa awuarabʉ ẽbẽra ipidamiara jipa ũrĩkĩrã ẽ iyara. Salomón ẽbẽra krĩchabarabʉa ũrãgʼa diabʉrʉdera naʉ̃ ẽbẽrabara iyaʼa ũrãgʼa diabʉ ẽbẽrarã audre kãgabʉta akʉza audre krĩcha bia bara wãta (Proverbios 9:8b, 9a). Krĩcha bia barabʉbara kʼawuabʉ iyaʼa ũrãgʼa diabʉdadera maʉ̃bara iyira perabiseabʉta mawũãsidu ũrĩbʉ kʼawuabʉ baera maʉ̃neba nebiata ũduseabʉta (Hebreos 12:11). Iyara ũrãgʼa diabʉrʉra iyita pʉbaimina iya kʼawuabʉ audre yibiata ũrĩta naʉ̃ba audre krĩchaba biata diai baera iyaʼa maʉ̃ba kĩrʉ ẽ.
Salomónba jarasi ẽbẽra nekʼãrẽ daucha obʉa, jaradiabʉdadera naʉ̃ ẽbẽrabara audre kʼawua wãta (Proverbios 9:9b). Maʉ̃ba dayirãba krĩcha bia erbʉmina zarea odaibara ewariza audre kʼawua wãita. Dayirãba ũdubʉrʉde ẽbẽra zõrãbʉta Daizeze odeba ãĩ wãnata akʉza Jeowaba kãgabʉdebʉta maʉ̃nera mejãcha sobia panʉ. Maʉ̃ba dayirãbida idubʉda ẽ baibara Daizeze bedʼea ʉ̃rʉ kʼawuabʉta awuarabʉrʉ ewariza audre kʼawuakĩrã bʼaibara maʉ̃ ʉ̃rʉ.
w01 15/5 30 parr. 5
Krĩcha biata erbʉbʉrʉ mawũãra ewari jõmaʉ̃nẽ bayi
Bʉa krĩcha bia erbaita jʉrʉbʉrʉ, maʉ̃neba nebiata ũduseabʉ, bʉdechu nebia jʉrʉira, Salomónba jarasi krĩcha bia jʉrʉbʉbʉrʉ mawũãra bia wãita mamina krĩcha bia erbaita jʉrʉ ẽ bʉrʉ bia wã ẽ bayi (Proverbios 9:12). Maʉ̃ kʼarea audre yibia jʉrʉita ewariza audre buru bia bʼaita (Proverbios 2:2).
Jʉrʉda nekʼãrẽ biʼiabʉta Daizezedebemata
w06 15/9 17 parr. 5
Bedʼea audre yibiata Proverbios debemata
9:17 ¿Kʼãrẽta jarakĩrãbʉ bania zrʉgadapeadabara akʉza kʼãrẽa «kũabʉ»? Daizeze Bedʼeaba jarabʉ ẽbẽra juwa jidapanʉrata ãba kʼãĩbʉrʉdera, maʉ̃ra bania pozode kʉ̃raza ʉ̃bidabari kĩrãkʼabʉta, maʉ̃ba bia drʉgama ababʉrʉdera naʉ̃bara jarakĩrãbʉ Jeowaba kãga ẽãne mia erkʼãĩta (Proverbios 5:15-17). Ẽbẽra abaʉba krĩchaseabʉ iya nemitia chuwẽã obʉta mia abaʉba kʼawua ẽ bʉrʉ maʉ̃nera sobia baseabʉta maʉ̃ba bania kũa kĩrãkʼa ũdubʉ.
21-27 DE ABRILBAYEDA
BEDʼEA BIA DAIZEZE BEDʼEADE ŨDUDATA PROVERBIOS 10
¿Sãwũã wãrĩnu sobia baseabʉ dayirãra?
w01 15/7 25 parr. 1-3
Nebiara yi nekʼãrẽ daucha obʉita
Nekʼãrẽ daucha obʉbara awuru nebiata ũdubʉ, Daizeze Bedʼeaba Proverbios 10:4 akʉza 5de jarabʉ, yi trajamane trajabʉra nekʼãrẽ bia neẽ yi mamina yi zokʼade trajabʉra maʉ̃bara nebia mejãcha ũduyi. Wũãwũã krĩcha barabʉbara ne u jurepebʉ jʉrepei bara ewaride, mamina yi krĩcha neẽã kʼãĩbʉ nejʉrepei bara ewaridera.
Salomónbara jarasi ne u jʉrepei bara ewaridera kʼãrẽa ewari aduaira neẽãta awuarabʉrʉ zokʼea trajaibarata akʉza nekʼãrẽ jõma oibarata mesera jʉrepeita maʉ̃ra ne uta.
Jesúsba iyi kʼaidubemara jarasi, ne u mejãcha jʉrepeita mamina ẽbẽrarã mejãcha ne ẽãta maʉ̃ ne u jʉrepeira, maʉ̃ kʼare wididamarẽã Jeowa audre zokʼamarẽã yi ne u jʉrepe barirata. Jesúsba nʉ̃ bedʼea jarasidera jarakĩrãkʉa ẽ basi wãrĩnu ne uara jʉrepeita, awuarabʉrʉ iyi bedʼeanʉmasi ẽbẽrarã ãba jʉrei ʉ̃rʉ (Mateo 9:35-38). Mamina idi ewadera mejãchabʉ ẽbẽrarã Jeowa ʉ̃rʉ kʼawuakĩrãpanʉrata (Juan 4:35.) Jeowa panʉrabara maʉ̃ba yiwidʼibʉrʉde Jeowa widipanʉ audre iyi oeda zebimarẽã ẽbẽrarãta mawũã ẽbẽrarã iyi ʉ̃rʉ̃ kʼawuakĩrãpanʉta audre jʉrʉ wãita mamina ãya mawũã widibʉrʉdera bari mamapai amae ẽ awuarabʉrʉ ãya wididade opanʉ maitara zarea opanʉ jaradia wãita akʉza ẽbẽrarã bioʉta Daizeze ʉ̃rʉ kʼawuabita (Mateo 28:19, 20). Dayirãba zarea opanʉbʉrʉ ewariza audre jaradia wãita ẽbẽrarã akʉza Jeowa ʉ̃rʉ audre kʼawuabita mawũã sobia panañi.
w01 15/9 24, 25
Nekʼãrẽ daucha obadrʉ
Salomónba jarasi, plata mejãcha erbʉbara krĩchabʉta iya nekʼãrẽ bia erbʉba zarea diabʉta iyaʼa adewara ẽbẽra nekʼãrẽ neẽãbʉbara krĩchabʉta iyira zʉbʉriadebʉta. Mamina ẽbẽra abaʉba nekʼãrẽ daucha obʉbʉrʉ naʉ̃ba iyira kʼarebabʉ ewari jõmaʉ̃ne bʼaita adewara ẽbẽra abaʉta ẽbẽra kayiruabʉrʉ naʉ̃ ẽbẽraba nekʼãrẽ badu obʉrʉdera ewari jõmaʉ̃ne oyi nemitiata (Proverbios 10:15, 16).
Nawedara aba pʉwʉrʉ aba zareabara, naʉ̃bara murorata erbaibarabasi, maʉ̃ba kʼarebabasi neida berabari ẽ baita. Abarikabʉ plata erbaisida, plata erbaibara ʉ̃kʉrʉ nekʼãrãne kʼarebaseabʉ dayirã mamina jipa nekʼãrẽ neẽãbʉbʉrʉ bedʼea zroma zebʉrʉdera maʉ̃bara zʉbʉria biseabʉ (Eclesiastés 7:12). Nokʼo Salomónbara jarasi ũrĩbisi kʼãrẽta berabariseabʉta plata mejãcha erbʉta akʉza yi kʼãrẽ neẽãbʉta, jarasi yi plata mejãcha erbʉbara krĩchabʉta iyi bedʼea zromara ora oita maʉ̃ plataba akʉza iyira neida berabari ẽ baita plata mejãcha erbʉ baera (Proverbios 18:11). Mamina yi kʼãrẽ neẽãbʉ bʉbara krĩchabʉ iyira kʼãrẽ neẽãbʉ baera kʼãrẽ nebia jʉ̃ã ẽãta, wãrĩnubaira naʉ̃ra ẽbẽrarã ũmeba Jeowa dabʉ nããra biapanʉ ẽ, ãyi ũmenaʉba mia abaʉba biata oẽ.
Ẽbẽra nekʼãrẽ daucha obʉba iya plata mejãcha erbʉta nekʼãrẽ neẽãbʉta ewari jõmaʉ̃nẽ jʉrʉbʉ aripe oita maʉ̃ba ewari jõmaʉ̃nẽ babibʉ baera, ¿sãwũã obʉ? Iyira sobiabʉ iya nekʼãrẽ erbʉba, iyi plata mejãcha erchuta mawũẽbʉrʉ nekʼãrẽ neẽãta maʉ̃ba sobiabʉ akʉza audrera jʉrʉbʉ sãwũã audre Daizeze kʼawabaita, ẽbẽra nekʼãrẽ aripe obʉra sobiabʉ atia akʉza ẽjũã kĩrãwarẽanẽbida sobia bayi ewari jõmaʉ̃nẽ (Job 42:10-13). Ẽbẽra kʼayiruabara plata mejãcha erbʉmina nebita oẽbayi, iya iyi platara zokʼa ẽ bayi nekʼãrẽ Daizezedebemaba oita audre Jeowa kʼawabaita awuarabʉrʉ zokʼabayi nekʼãrẽ mitia oita maʉ̃ba bia wã ẽ bayi
it-1 309
Nebiata
Jeowaba nebia diabʉ ẽbẽrarã. «Daizeze nebiaba mejãcha nekʼãrẽ nebiata ũdubibʉ akʉza iyideba nekʼãrẽ pʉara we ẽ» (Pr 10:22.) Jeowabara nebiata diabʉ iyi nãã bia panʉrãra, Jeowabara maʉ̃rãra bia akʉbʉ, jaradiabʉ akʉza kʼãrẽbabʉ bia wãnamarẽã adewara ãya nesidabʉta diabʉ. Mamina naʉ̃ra ẽbẽrarã mawũã Jeowaba kãgabʉde kʼareara tẽã jʉ̃ãnera zʉbʉriada ẽ bayi.
Jʉrʉda nekʼãrẽ biʼiabʉta Daizezedebemata
w06 15/5 30 parr. 18
Kʼãrẽ bia kʼẽrẽpa bʼaira
18 Jeowaba nebia diabʉ iyi ode panʉra maʉ̃ba kʼãrẽbabʉ audre wãmarẽã akʉza iya mawũã nebia diabʉdera pʉara ũdu ẽ (Proverbios 10:22). ¿Kʼãrẽã Jeowa ode kʼẽrẽpa panʉrabara bedʼea zroma ũdupanʉ? Maʉ̃ra bedʼea zromara ũdupanʉ nekʼãrẽ ũbea kʼarea. Aba, jõmaʉ̃ta nemitia omiara baera (Génesis 6:5; 8:21; Santiago 1:14, 15) Ũme, Diaruba akʉza demonioraba zʉbʉriabibʉ baera (Efesios 6:11, 12) Ũbea, naʉ̃ drʉara ewariza audre mitia wã baera (Juan 15:19). Jeowabara naʉ̃ra bedʼea zromarata idu berabaribibʉmina, Jeowa ẽ maʉ̃ zʉbʉria zebibʉra «jõma kʼãrẽ biara akʉza jõma nekʼãrẽ aripe bʉra ʉ̃tʉbemane, Zeze uruyachudeba zebʉ baera akʉza iya pãrĩgʉa erbʉra kĩrã awuara bari ẽ» (Santiago 1:17).
28 ABRILDEBA-4 MAYO EDA
BEDʼEA BIA DAIZEZE BEDʼEADE ŨDUDATA PROVERBIOS 11
Kʼãrẽ jararãra
w02 15/5 26 parr. 4
Kʼẽrẽpabʉba kʼarebabʉ nekʼãrẽ aripe oita
Proverbios 11:9de jarabʉ, ẽbẽra kayiruabara iya jarabʉdeba awururata zʉbʉriabibʉta, mamina nekʼãrẽ aripe obʉra iya kʼãrẽ obʉdeba ẽdrʉbʉta, wãrĩnu awuru ʉ̃rʉ sewida jaraiba akʉza wãrĩnu ẽãta awurura jarakaiba, imitia bedʼeaiba, abapai zʉbʉriabibʉ ẽ yi ẽbẽra maʉ̃ obʉtrʉ wuabemarasida zʉbʉriabibʉ mamina ẽbẽra abaʉba nekʼẽrã aripe obʉbʉrʉ naʉ̃bara jõma biabʉ, nekʼãrẽ oi nãã bia krĩchabʉ akʉza wuabemara ʉ̃rʉ krĩchabʉ jʉ̃ã ẽ wuabemaraba iya jarabʉde odamarẽã, naʉ̃ba kʼarebabʉ wuabemaraba iyi ʉ̃rʉ imitia jarabʉdade maʉ̃ra ũdubita iyira wãrĩnu sãwũã chuta.
w02 15/5 27 parr. 2, 3
Kʼẽrẽpabʉba kʼarebabʉ nekʼãrẽ aripe oita
Ẽbẽrarã nekʼãrẽ daucha opanʉrabara kʼarebapanʉ ãyi komunidade jõmaʉ̃ta aduʼa panamarẽã akʉza bia panamarẽã adewara kʼarepanʉ yi komunidasida audre bia wãmarẽã akʉza maʉ̃ ʉ̃rʉ ibia bedʼeadamarẽã, mamina yi awuru sewida jarabʉra ikayirua bedʼeabʉra maʉ̃rabara kĩrʉbibare komunidadebemarata akʉza kʼareba ẽ komunidadebemata sobia panamarẽã adewara mejãcha bedʼea zromata wepanʉ maʉ̃ba ãyi komunidadera biapanʉ ẽ akʉza mia maʉ̃ ʉ̃rʉbida ibia bedʼeada ẽ.
Maʉ̃ kĩrãkʼabʉ Proverbios 11:11de jarabʉ, kongregasione bʉbʉrʉ mebẽrã Jeowa ode kʼẽrẽpanʉta naʉ̃rabara kʼarebaʉta kongregasione bemaraba audre odamarẽã Jeowaita adewara ibia bedʼeabʉta Jeowa ʉ̃rʉ, Jeowabara nebiata diabʉ mawũãbʉ kongregasionʼara akʉza mawũãbʉdera kongresionʼra audre ewaba wã, mawũãsidu edaude kongregasione ũdupanʉ ẽbẽrarã imitia bedʼeapanʉta sobia panʉ ẽãta mebẽrãba kʼãrẽ obʉ kʼarea, maʉ̃ba ijʉra bedʼea panʉ, sewa nebʉrʉta jarapanʉ ãya jarabʉra beneno kĩrãkʼabʉ (Hebreos 12:15). Naʉ̃ra ẽbẽrarãbara jaraseabʉ kongregasione jõmaʉ̃ta daucha okʉda ẽãta, zõrãrãbara nekʼãrẽ aña onʉmʉta bia edada ẽãta jõmaʉ̃ta mawũãbʉdeba yi jõbiseabʉ kongregasione bemarata, mamina dayirãra maʉ̃ra kĩrãkʼa ba ẽ bʼaibara awuarabʉrʉ zarea odaibara jari ẽbẽrarã Jeowa ode kʼẽrẽpabʉ kĩrãkʼa bʼaita mawũã opanʉbʉrʉ kʼarebayi kongresione aduʼa bʼaita akʉza sobia panaita.
w02 15/5 27 parr. 5
Kʼẽrẽpabʉba kʼarebabʉ nekʼãrẽ aripe oita
Ẽbẽra abaʉba nekʼãrẽ oi nãã bia krĩcha ẽ bʉrʉ kʼãrẽta berabariseabʉ ʉ̃rʉ naʉ̃ ẽbẽrabara awururata mejãcha zʉbʉriabiseabʉ. Iyira awurura ʉ̃rʉ imitia bedʼeabʉ, sewidata jarabʉ. Zõrãrãbara mawũãbʉ ẽbẽrarã mesera kʼẽãibara wuaberaba iyide daucha oẽ marẽã mamina ẽbẽra nekʼãrẽ oi nãã biʼia krĩchabʉbara kʼawuabʉ sõbe bedʼeaibara. Iyaʼa bedʼea jarasidabʉrʉ akʉza maʉ̃ta miõa jara ẽ marẽã jarasidabʉrʉ iyara maʉ̃ra jaraka ẽ awuarabʉrʉ merabʉ. Iyara kʼawuabʉ biʼia krĩcha ẽã bedʼea dogobʉrʉ kʼãrẽ bedʼea zromata ũduseabʉta, ẽbẽra kʼãrẽ berabari nãã bia krĩchabʉbara ũdubibʉ iyira kʼãrẽpabʉta adewara mawũã ẽbẽrarã mebẽrã kongregasionebemaraʉ̃me kʼẽrẽpabʉ akʉza wuabemara jaraka ẽ iya bedʼea jarada peadata mawũã wuaberata zʉbʉriabita mawũãbʉ ẽbẽrarã mejãchade kãgade kongregasionera.
Jʉrʉda nekʼãrẽ biʼiabʉta Daizezedebemata
g20.1 11, rekuadro
Sãwũã krĩcha zroma oẽ baita
AWURURAɄ̃ME ẼBẼRA BIA BʼAIBA KʼAREBABɄ KRĨCHA O Ẽ BAITA
¿Kʼãrẽta oseabʉ aukʼara krĩcha obʉa yi edebi ẽ baita? «Ẽbẽra biabara iyi ʉ̃rʉ nebiata zebibʉ mamina ẽbẽra kayiruabara iyi ʉ̃rʉ zʉbʉriata zebibʉ» (PROVERBIOS 11:17).
Doctor abaʉba jarasi «krĩcha obʉa yi edebi ẽ baira awururaʉ̃me ẽbẽra bia bʼaibarata». Dayirãta ẽbẽra biabʉrʉ naʉ̃ba kʼarebayi dayirã ẽbẽra biabaita akʉza sobia bʼaita mamina awururaʉ̃me ẽbẽra kayiruabʉrʉ mawũãra sobia ba ẽ bayi akʉza wuaberabida kãgada ẽ bayi.
Jesúsba jarasi, dayirãba awurura kãga ũdubira nãã dayikʉza nãã dayikʉza kãga ũdubibarata (Marcos 12:31). Mawũãẽra dayirã aukʼara krĩcha oẽ baira dayikʉza ʉ̃rʉ bia krĩchaibara bari jaraita, jʉ̃ã ẽ baibara daya oẽãsidu wẽta oita, dayikʉza ijʉra bedʼea ẽ baibara adewara krĩcha ẽ baibara nekʼãrẽ daya obʉra jõma aña obʉta.