Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2025 Watch Tower Bible and Tract Society of Pennsylvania
5-11 MAYOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 12
Zarea trajabʉbʉrʉ nebiata ũduyi
w16.06 30 parr. 6
Bʉ nebia aba diamante audre yibiata
Edaʉde Jeowa ode panʉrãitara zare trajo bia ũduita mawũã plata mejãcha ganaita ãyi mebẽrãba nesidabʉ diaita. Mawũãsidu mebẽrãbara jʉrʉda ẽ badu trajota mawũã ãya nesidabʉ erbaita, awurabʉrʉ ãya trajo erbʉde zarea opanʉ zarea trajaita akʉza ãyi trajora biʼia odaita. Mawũã obʉdeba ũdubipanʉ ãyabida Jeowade kĩrãkʼa nebia erbʉta ũdubipanʉta, maʉ̃ra nebiaranebemara bʉ yara sewa ẽ baita. Naʉ̃ra jipade yibia nekʼãrẽ baduira(Prov. 12:24; Efe. 4:28).
w15 1/2 5 parr. 4-6
Sãwũã sobiabaseabʉ daya trajo obʉ kʼarea
Naʉ̃ ʉ̃rʉ krĩchaira jipade yibia bʉa maʉ̃ opanʉ obʉrʉba kʼarebaseabʉ baera audre sobiade oita bʉa trajo obʉta. Wãrĩnu bʼaira Jesúsba jarasi audre sobiabʉta «daya biabʉde dayaʼa diapanʉira» (Hech. 20:35). Daya trajo obʉdera bari kʼarebabʉ ẽ dayi zokʼabʉtrʉ mia daya trajabʉdebara awuru ẽbẽrarã neta jʉ̃ẽpanʉratrʉ kʼarebanʉmʉ ẽ, maʉ̃ awuara daya trajo obʉdebara kʼarebabʉ dayi mebẽrãta akʉza awuru mebẽrã kʼareba nesidapanʉrãta.
Dayirã mebẽrãta. Yibarirata zarea opanʉbʉrʉ ãyi mebẽrãba nesidabʉ jõma diaita naʉ̃neba nekʼãrẽ ũmene kʼarebapanʉ. Nããra, kʼarebapanʉ ãyi wũãwũãraba nekʼãrẽ nesidapanʉta erbamarẽã. Bari jaraita yikota, wuata akʉza deta. Naʉ̃ra ãyara biʼia opanʉ Jeowaba jarabʉ kĩrãkʼa. Jeowabara jarabʉ yibarirabara diaibarata ãyi wũãwũãraba nesidabʉra (1 Timoteo 5:8). Yi ũmera, yibarirata zarea trajapanʉbʉrʉ kʼarebapanʉ ãyi wũãwũãrabida abarika odamarẽã. Shaneba jarabʉ: «Mʉ̃ zezebara yiza biata ũdubibasi, zarea trajabasi. Iyara iyi trajora biʼia obasi akʉza ewari biobayeda mejãcha trajasi. Mʉ̃ zezera bakʉrʉba nekʼãrẽ parãbʉde trajabasi. Mʉ̃ara iyideba kʼawuasi nekʼãrẽ bakʉrʉde okʼawuaita. Mawũã ẽbẽrarãba nesidabʉta parã diaita».
Yi audre nekʼãrẽ nesidabʉrata. Pabloba jarasi Jeowa ode panʉrãra zarea trajadaibarata. Mamina ¿kʼãrẽa? Iya naʉ̃ta jarasi: «Mawũã iya erbʉba awuruba nesidabʉ kʼarebaita» (Efesios 4:28). Dayirãta zarea trajapanʉbʉrʉ dayirã mebẽrãba nesidabʉ diaita erbaseabʉ yi audre kʼãrẽ neẽãbʉrasida kʼarebaita (Proverbios 3:27). Wãrĩnu bʼaira zarea trajapanʉbʉrʉ ũduseapanʉ sãwũã wãrĩnu sobiabʉta daya awurura diabʉrʉde.
Jʉrʉda nekʼãrẽ biʼiabʉta Daizezedebemata
ijwyp artikulo 95 parr. 10, 11
¿Mʉ̃a bedʼea zroma ũdubʉrʉdera zarea obʉka maʉ̃ba yi edebi ẽ baita?
● Badu bedʼea zroma yi edebirãra. Yibia dayirãba kʼawuaita saʉ̃ bedʼea zromata audre yizromata akʉza saʉ̃ta yizroma ẽãta. Daizeze Bedʼeaba jarabʉ yi ẽbẽra bia krĩcha ẽãra badu kʼarea kĩrʉdogota, mamina ẽbẽra bia krĩchabʉra badu kʼarea mesera kĩrʉ ẽ (Proverbios 12:16). Idaribi ẽ baibara nekʼãrẽ badu zebʉrʉba mawũã ẽ bʉrʉ nekʼãrẽ awururaba jarabʉrʉba dayita zʉbʉriabimarẽã.
«Mʉ̃meãba estudiapanʉrãra badu kʼarea mejãcha krĩcha zroma opanasi. Ãyara ãyi sãwũã bʉ ʉ̃rʉ internetne bʉabʉrʉdera yi neũdukʼawuarabida jarapanasi wãrĩnu, maʉ̃ra jipade yizromata. Maʉ̃ba ãyitara zare basi tẽãbai ãya bedʼea zroma ũdubʉra wiña bʉmina yizroma kĩrãkʼa ũdu ẽ baira» (Joanne).
12-18 MAYOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 13
Sewabirara ẽbẽra kayiruara bia wã kʼarea
it-2 186, 187
Ĩbira
Edaʉde nekʼãrẽ awuruta jarakĩrãbʉ. Daizeze Bedʼeabara edaʉde zokʼabʉ bedʼea ĩbirata jaraũrĩbita kʼãrẽba kʼarebabʉta ẽbẽra aba ode wãita. Naʉ̃ ĩbiradeba Provebiode jara ũrĩbibʉ sãwũã awuara bʉta ẽbẽra biata yi ẽbẽra kayiruaʉ̃me. Nama jarabʉ yi ẽbẽra biara ʉ̃nara audre ʉ̃naita mamina yi ẽbẽra kayiruara ʉ̃nara audre ki wãita (Pr 13:9). Ẽbẽrarã biara ʉ̃nara ewariza audre ʉ̃na wã mamina jarabʉ ẽbẽra kayiruara ĩbira ʉ̃nara ki wãita, maʉ̃ba jarakĩrãbʉ ãyi bia wã kĩrãkʼa bʉmina wãrĩnu bʼaira Jeowaba ãyira parĩgʉade babiyi. Maʉ̃ba bia wã ẽ bayi ãyira. Abarika berabariyi jari ẽbẽra yi yibarira ʉ̃rʉ imitia bedʼeabʉsida. (Pr 20:20).
Proverbios 24:20 ba jarabʉ kĩrãkʼa ẽbẽra abaʉ ĩbira kibʉbara jarakĩrãbʉ maʉ̃ ẽbẽrabara tẽã kʼãrẽ bia ũduira neẽãta.
w12 15/7 12 parr. 3
Daizeze kʼawua jidabibʉa yiwidʼidadrʉ
3 Diaruba ẽbẽrarã nemitia okʼãrãta sewasibʉrʉ akʉza angelera mejãchaʉta sewasibʉrʉ maʉ̃ba ũdubibʉ iyara dayirãsida sewaseabʉta. Diaruba ẽbẽrarã sewaira ãyaʼa ĩjãbikĩrãbʉ Jeowaba nekʼãrẽ omarẽã zokʼabʉra jipade zareata akʉza Jeowaba jarabʉ oira yibia ẽãta, maʉ̃ba sobiabi ẽ baera awuarabʉrʉ masẽbibʉ baera (1 Juan 5:3). Maʉ̃ba ẽbẽrarã mawũã krĩchabʉbawara aukara ãba panʉbʉrʉ dayirãsida mawũã krĩcha zeseabʉ. Mebẽã wẽrã aba Jeowaba kãga ẽãne miaerkʼãĩnaba 24 poaga bʉba naʉ̃ta jarasi: «Neũdukʼawuara zeri ẽãbawara ãba bʉba mʉ̃sida ãyi kĩrãkʼa krĩchabisi. Audre mʉ̃ara wawiaibasi ãya jarabʉde awuara jaraira». Wãrĩnu bʼaira dayirãnebema jõmaʉta mawũã berabaribari dayirã neũdukʼawuaraba jarabʉa edaʉde yi edebikĩrãbʉ..
w04 15/7 31 parr. 6
Ẽbẽra bia krĩchabʉbara nekʼãrẽ oinãã bia kʼawuakʼãrãpe obʉ
Ẽbẽra abaʉba nekʼãrẽta bia krĩchape obʉbʉrʉ maʉ̃ ẽbẽrabara nebiata ũduyi. Salomónba jarabʉ ẽbẽra kʼẽrẽpa bʉ nekʼobʉrʉdera maʉ̃ ẽbẽrarã jãwuañĩena nekʼoita, mamina yi ẽbẽra kayiruara jarrabaita (Proverbios 13:25). Jeowabara nekʼãrẽ badude kʼawuabʉ kʼãrẽta audre yibiata dayirãita. Bari jaraita dayirã mebẽrãbawara ãba bʉde, awururabawara ãba bʉde, jaradia wãbʉrʉde akʉza dayirã kʼẽãbʉdade. Dayirãba bia krĩchapanʉbʉrʉ Jeowaba iyi bedʼeadeba ũrãgʼa diabʉta aripe oũdubidayi. Mawũã opanʉbʉrʉ wãrĩnu sobiapanañi.
Jʉrʉda nekʼãrẽ biʼiabʉta Daizezedebemata
it-1 122 parr. 2
Kãga
Edaʉde kãgara aña ũdubiseabʉ. Kãga wãrĩnuara ũdubira jʉrʉibara Jeowa jaure zareata akʉza iyi bedʼeaba jarabʉde oũdubibara. Bari jaradaita zeze abaʉba yi wũãwũã kãga ũdubibʉ, mamina iya kãga ũdubibʉra wiña wiñane ʉ̃ta wãseabʉ, mawũã ẽ bʉrʉ iya yi wũãwũã so zʉbʉria akʉbʉ kʼarea nekʼãrẽ aña oseabʉ. Bari jaraita diaseabʉ yi wũwũãʼa yi wũãwũãba nekʼãrẽ badu widibʉta, mawũã ẽ bʉrʉ yi wũãwũã nekʼãre aña obʉrʉdera krĩchabʉ yi wũãwũã kãgabʉbara kʼẽã ẽ baita akʉza u ẽ baita (Pr 22:15). Mamina mawũã obʉrʉdera kãga wãrĩnu arata ũdubibʉ ẽ awuarabʉrʉ krĩchabibʉ iyi mebẽrãtrʉ audre yibiata mawũãbʉrʉdera ũdubibʉ iyi ʉ̃rʉbʉrʉ krĩchabʉta awuru ʉ̃rʉ krĩcha ẽãta. Daizeze Bedʼeaba jarabʉ ẽbẽra mawũãbʉbara kãga ũdubibʉ ẽãta awuarabʉrʉ jʉrata ũdubibʉta. Mawũã obʉba kʼareba ẽ baera yi wũãwũã bia wãmarẽã (Pr 13:24; 23:13, 14).
19-25 MAYOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 14
Neida berabaribʉrʉde biʼia krĩchara kʼãrẽ oita
Daizezeʼa biga diaibara dayi bebʉbari
10 Edaʉde dayirãbara obeda ẽ, dayirãta neida berabari ẽ marẽã. Bari jaraita, drʉade neida berabaribʉrʉde, kaya zroma zebʉrʉde akʉza yõta zebʉrʉde. Mawũãbʉrʉdera dayirãra jʉra kʼawuapanaibara bia panaita akʉza bei ẽ baita. Bari jaraita, ũrĩnaibara nokʼoraba zokʼabʉta, ãya jaradara dayibʉmaeba wãmarẽã maʉ̃ra ũrĩbara akʉza nekʼãrẽ jõma nokʼoraba jarabʉrʉta ũrĩbara (Rom. 13:1, 5-7). Drʉade neida berabari nãã dayirãbara nekʼãrẽ okʼawuapanaibara, mawũã kʼawuadaita sãwũã ẽdrʉita, adewara ũrĩnaibara nokʼoraba jarabʉta. Bari jaraita, erbaibara baniata, yiko mesera ãrĩ ẽãta akʉza remediorata.
11 ¿Kʼãrẽta odaibara dayibʉmae kaya zromata wua wãbʉrʉ? Ũrĩnaibara nokʼoraba zokʼabʉta. Bari jaraita, juwa sʉgʉibara, tapaboka jʉ̃ĩbara wuabemaraneba jĩga baibara, adewara kuarentena oibara. Dayirãba jõma ũrĩpanʉbʉrʉ dayirã zokʼabʉta, ũdubidayi dayi bebʉra kãgata.
12 Drʉade neida berabaribʉrʉdera dayi neũdukʼawuaba, dayi de kʼawabʉba, mawũã ẽ bʉrʉ notisiade sewa nebʉrata jaraseapʉ maʉ̃ ʉ̃rʉ, maʉ̃raba jarapanʉ jõma ũrĩkaude, dayirãbara ũrĩnaibara nokʼoraba zokʼabʉta (akʉra Proverbios 14:15). Zõrãrã Burubiaba akʉza sukursalʼraba, dayirã kongregasione ãba yi jʉre bʼai ʉ̃rʉ jarai naweda, mawũã ẽ bʉrʉ Daizeze Bedʼea sãwũã jaradia wãi ʉ̃rʉ jarai naweda, nãã ãya biʼia kʼawuabʉ dayirãʼa sewa nebʉra jara ẽ baita (Heb. 13:17). Dayirãba opanʉbʉrʉ ãya zokʼabʉde dayita bia wãñi akʉza kʼarebayi wuabemarasida bia wãmarẽã adewara kʼarebayi wuabema ẽbẽraba bia krĩchadamarẽã Daizeze pʉwʉrʉ ʉ̃rʉ (1 Ped. 2:12).
Sadoc kĩrãkʼa zowaĩnĩgʉa bara
11 Mebẽrã neida berabaribʉrʉde dayirãʼa jaradara maʉ̃ra mebẽrãta kʼarebamarẽã dayirãbara, ¿sãwũã ũdubidai Sadoc kĩrãkʼa zowaĩnĩgʉa panʉta? Nããra, dayirãʼa nekʼãrẽ omarẽã jarapanʉta aripe odadrʉ. Maʉ̃ mawũã berabaribʉrʉdera dayirãbara nesidayi Betelba omarẽã jarabʉta aripe odaita, mawũã mebẽrãbawara ãba panaita (Heb. 13:17). Zõrãrã diapanʉ kartata ãya kʼawuamarẽã kʼãrẽta oibarata drʉade neida berabari nãã akʉza berabaribʉrʉde, zõrãrãbara naʉ̃ta badua akʉpanaibara (1 Cor. 14:33, 40). Yi ũmeta, zowaĩnĩgʉa bʉta ũdubidaibara mamina jʉra kʼawuapanaibara (Prov. 22:3). Nekʼãrẽ oi nãã biʼia krĩchara adewara jʉra kʼawuabara. Yi ũbeata, ĩjãnadrʉ Jeowa ʉ̃rʉ. Jeowabara krĩchabʉ dayirã aba abakaʉ ʉ̃rʉ akʉza iyara kãgabʉ dayirãra aduʼa panamarẽã, maʉ̃ kʼarea iya kʼarebabʉ dayirãba awuru mebẽrãta kʼarebabʉrʉde neida berabari ẽ marẽã.
Jʉrʉda nekʼãrẽ biʼiabʉta Daizezedebemata
it-1 423
Krĩcha bia zokʼa kʼawuaita
Ẽbẽra abaʉba iyi krĩchata bia zokʼabʉbʉrʉ maʉ̃ ẽbẽrarã awururaba jʉraseabʉ. Proverbios 14:17 dera maʉ̃ta jarakĩrãbasibaibara, jaraside yumakẽrã krĩcha bia zokʼabʉra jʉradaita. Ẽbẽrarã ãyi krĩcha bia zokʼã ẽãrabara kãgada ẽ jari ẽbẽrarã ãyi krĩcha bia zokʼabʉra. Adewara abarika berabaribʉ ẽbẽrarã Jeowaba kãgabʉde okĩrãpanʉrãsida. Ãyara ãyi krĩchata bia zokʼa kʼawuapanʉ maʉ̃ba jʉrade ãyira. Jesúsba jarasi iyi kʼaidubemarãra naʉ̃ drʉadebemara ẽãta, maʉ̃ kʼarea ẽbẽrarãbara jʉradaibasita ãyira (Jn 15:19). Mamina naʉ̃ bedʼeabara adewara awuruta jarakĩrãbasi bedʼea Proverbios 14:17 de krĩcha bia zokʼa kʼawuai abʉbara adewara jarakĩrãbasi krĩchata bia zokʼaita nemita oita. Maʉ̃ba adewara jaraseapanʉ naʉ̃ testobara jarakĩrãbʉta ẽbera abaʉba iyi krĩchata bia zokʼabʉta nemitia oita, maʉ̃ba jʉrapanʉ.
26 MAYODEBA-1 JUNIO ENA
BEDʼEA BIA DAIZEZE BEDʼEADE ŨDUDATA PROVERBIOS 15
Kʼarebara wuabemara sobia bamarẽã
w10 15/11 31 parr. 16
Kʼẽrẽpa baita krĩchadadrʉ
16 Jobʼbara jõmaʉ̃ta bia edabasi (Job 31:31, 32). Dayirãra Jobde kĩrãkʼa plata mejãcha erbʉ ẽ mina iyide kĩrãkʼa oseapanʉ wuabemarata (Rom. 12:13). Dayirãba ẽbẽra aba dayirã deda jʉ̃ẽmarẽã trʉ̃bʉrʉdera kʼãrẽa nekʼãrẽ zromata oibara ẽ iyaʼa diaita. Kĩrãbedaibara Daizeze Bedʼeaba jarabʉta audre yibiata nekʼãrẽ wiña kʼoita, nekʼãrẽ mejãcha balebʉta edakʼãrãpe kʼoita mamina yi jʉrapanaita (Prov. 15:17). Wãrĩnu bʼaira dayirãba nekʼãrẽ mejãcha balebʉ ẽãta edakʼãrãpe ãbaʉba kʼobʉbʉrʉ, maʉ̃ta audre yibia bia berabaribʉ baera wuabemarabawara nekʼãrẽ zroma ẽ mina.
w18.04 23, 24 parr. 16-18
Idi ewade audre dayirãi yiya so zarea diadaibara
16 Dayirãta peramia bʉrʉ mawũã ẽ bʉrʉ mejãcha bedamia ẽ bʉrʉ krĩchaseabʉ dayirãbara wuabemarãra so zarea diabe ẽãta. Wãrĩnu baera maʉ̃ra mawũã ẽ zare ẽ awʉba so zarea diaita bari jaradaita dayirãba mebẽã aba saluda burude zarea oseapanʉ ipidaita iyisida dayirã ipida ẽ bʉrʉ. Mawũã bʉ baibara bedʼea zromata erbʉ baera mawũã ẽ bʉrʉ nesidabʉ baera kʼãĩ ʉme bedʼeaita, maʉ̃ba mʉ mebẽã bari ũrĩ bʉrʉba kʼarebaseabʉ iyisida bia sentita. Santiago 1:19.
17 Akʉdaya sãwũã berabarisita mebẽã Henryʼta, iyira mejãcha sopʉabasi yi mebẽrã nebemanera bioʉta Jeowadeba jĩga wãsi baera, mawũãne eda wãsi iyi zezeta, zezera nããra zõrãrã kongregasionnebema basi, akʉza wawiade basi mejãchade iyira. Mebẽã zõrãrã kongregasion akʉbariba iya so zarea diaita edesi kape dobadama mõbe ũrĩsi iya kʼãrẽta jarabʉta iyi sãwũã sentibʉ ʉ̃rʉ. Maʉ̃ne Henriba kʼawuabasi iya yi mebẽrã kʼarebaira Jeowa jẽda ma zemarẽã iya bʉrʉ ũdubidaibara basita kʼẽrẽpabʉta Jeowa ode. Adewara iyira mejãcha kʼarebasi Salmo 46ba; Sofonías 3:17ba; y Marcos 10:29.30.
18 Kʼãrẽta kʼawuapanʉ dayirãba nãã nebʉradeba jõmaʉ̃ba so zarea diaseabʉta dayi kʼareba nedidabʉa. Nokʼo Salomoba jarasi: «Ẽbẽraba diadamarẽã diasidabʉde bedʼea biara jarara maʉ̃ba mejãcha kʼarebabʉta, adewara jarasi dayi kĩrã sobiabʉba kʼarebabʉta awʉrasida sobia bita, adewara bedʼea bia jarabʉrʉdera kʼarebabʉ bʉrʉ zarea baita.» (Prov. 15:23, 30, ftn.) Dayirãba ẽbẽra aba sopʉabʉta ũdudara kʼãrẽta oseabʉ iya leseabʉ karta jarakabʉba jarabʉta mawũã ẽ bʉrʉ ũdubiseabʉ dayirã pagina internene kartara bʉ ʉ̃rʉa. Adewara Pabloba jarada kĩrãkʼa mebẽrãbawara abaʉba trãsea panʉ ãbaʉ̃ba trã burude kʼarebabʉ dayirã bia sentita (Col. 3:16; Hechos 16:25).
Jʉrʉda nekʼãrẽ biʼiabʉta Daizezedebemata
ijwbq articulo 39 parr. 3
¿Sãwũã kʼarebabʉ naʉ̃ testobara medikoba tratamiento diabʉ jidai nãã?
2. Daizeze Bedʼeaba jarabʉ mejãchaʉba ũrãgʼa bʉ bʉrʉ nebiata ũduita maʉ̃ neba kʼawuaseapanʉ yibiata mediko bio widita kʼãrẽta oseabʉ bʉta kayaburude. Bʉ mejãcha kayaburude kʼawuaita kʼãrẽta oseabʉta (Proverbios 15:22).
2-8 JUNIOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 16
Bedʼea ũbea bʉba kʼarebayi krĩcha bia jidaita
w14 15/1 19 parr. 11, 12
Warrara krĩcha biata jida kʼawuara
11 Wãrĩnu baera dayirã sobia bʼaira Jeowaba zokʼabʉta obʉde bʉrʉ sobia bayi (Prov. 16:20). Baruc, Jeremías secretarioba, maʉ̃ta kĩrãduasi. Iya krĩcha zesi Jeowaba zokʼabʉta obʉdera sobiabʉ ẽãta maʉ̃ kʼarea Jeowaba jarasi: «Bʉara nekʼãrẽ bia zromara erbʉ bʉita bʉrʉ. Maʉ̃ra wua jʉrʉrara. Mʉ̃ara ẽbẽrarã jõmaʉ̃ta zʉbʉriabi baera mamina wã bʉra beibi ẽ bayi». . (Jer. 45:3, 5). Bʉara kʼãrẽta krĩchabʉ. Kʼãrẽta audre yibia basi Barucitara iyi kʉzaita audre nebia jʉrʉita mawũã ẽ bʉrʉ iyi Jeowa ode kʼẽrẽpa bʉ kʼãrẽa Jerusalén debemara makena burude ẽdrʉbita (Santiago. 1:12).
12 Mebẽã Ramiro jaraũrĩbibʉ iyi kʼãrẽaba sobiabʉta awʉra kʼarebabʉde. Iya jarabʉ: «Mʉ̃ra pʉwʉrʉ zake Andes debema. Mʉ̃ mebẽrãra platata mejãcha ne ẽ. Maʉ̃ba mʉ̃ mebẽã aba jarasi mʉ̃a iya kʼareba pagaita unibersidata, maʉ̃ra mʉ̃itara jipade yibia basi. Mamina mawũã jarasidera mʉ̃ra dããraba bʉrʉ kʼoedata, adewara mebẽã abaʉ̃ba ãmʉ̃a jarasi iyira jʉ̃ẽ marẽã Daizeze bedʼea jaradiaita maʉ̃ra pʉwʉ̃rʉ̃ zakede basi. Mʉ̃ra mainʉ wãsi mõbe mama kʼawuasi bʉda tuita. Akʉza mama bʉda tʉbʉde trajabasi. Tẽã mʉ̃ra wãsi kongregasion zake mamabema ma, mama ẽbẽra bedʼeata bedʼeapanasi. Maʉ̃ra jaradia jʉ̃drʉsi. Mʉ̃a ũdubʉrʉ ẽbẽra ara ãyi bedʼeade jaradiabʉba sãwũã kʼarebabʉta ãya bida Jeowata kãga zemarẽã. Maʉ̃ ũduira mʉ̃ra mejãcha sobiabibʉ. Mʉ̃ra Jeowaita ewari jõmaʉ̃ne 10 poaga ba. Maʉ̃ne ũdubʉrʉ wãrĩnu sobiabibʉta».
w13 15/9 17 parr. 1-3
Namadaira awuara panʉga
Dayirã sãwũã wa jʉ̃bʉra dayirãba kʼãrẽ kobora. Akʉza dayirã sãwũã obʉra mawũã panʉ dayirãta mawũã dapʉẽsida baera mawũã ẽ bʉrʉ ẽbẽrarã dayirã audu bʉ kʼarea.
2 Mawũã doba mawũã panʉ ẽ dayirãra mamina bʉ nekʼãrẽ dayirã bebʉde audre yibiata dayirãba kʼãrẽ kʼoi ʉ̃rʉ krĩchaira adewara dayirã sãwũã wua jõbʉ ʉ̃rʉ krĩchaira. Bari jaraita dayirã wiña bʉeda jaradiasida saʉ̃ta bigata akʉza saʉ̃ta zeri ẽãta, akʉza dayirãba kʼãrẽta oẽ bʼaibarata. Maʉ̃ra yi kayirua baera mamina edaʉde dayi sãwũã krĩchabʉra awuara bʉ ẽbẽra aba abakaʉde. Akʉza edaʉde dayirãbara nekʼãrẽra oseabʉ dayi krĩchaba kʼãrẽ jarabʉdeba. Daizeze Bedʼeabara jarabʉ edaʉde ẽbẽraba kʼawua ẽãta Daizeze Bedʼeaba kʼãrẽta omarẽã jarabʉra mawũãsidu ãyara leiba jarabʉde panʉ ãyi krĩchaba maʉ̃ta omarẽã jarabʉ baera (Rom. 2:14). Mamina maʉ̃ba jarakĩrãbʉka Daizeze Bedʼeade kʼãrẽta oibara, mawũã ẽ bʉrʉ kʼãrẽta oibara jarabʉta neẽ bʉrʉ ẽbẽrarã dayirã audu bʉba obʉ kĩrãkʼa oibarata.
3 Daizeze Bedʼeade jaraũrĩbibʉ kʼãrẽa dayirãbara mawũã obe ẽãta. Nããra Daizeze Bedʼeaba jaraũrĩbibʉ edaʉde dayirã ma biga diakĩrãbʉ baera dayirãra oaña edeseabʉta (Prov. 16:25). Dayirãra nemitia omia baera, maʉ̃ba dayirãba nekʼãrẽ obʉrʉdera jõma aripe oẽ wiña edaʉde aña obʉ (Prov. 28:26; Jer. 10:23). Yi ũmera, naʉ drʉara Diaruba zokʼabʉ iya ẽbẽrarã jarabʉ kʼãrẽta bigata akʉza kʼãrẽta zeri ẽãta (2 Cor. 4:4; 1 Juan 5:19). Maʉ̃ba dayirãta Jeowa dabʉ na bia bau bakĩrãpanʉ bʉrʉ akʉza iya dayirã nemitiata diamarẽã kãgabʉbʉrʉ ũrĩnaibara Romanos 12:2ba ũrãgʼa diabʉta.
Jʉrʉda nekʼãrẽ biʼiabʉta Daizezedebemata
it-1 707 parr. 4
Kʼẽãi
Ũrĩta mawũã ẽ bʉrʉ ũrĩ ẽ baita. Ẽbẽra kayiruarabara, ũdubipanʉ Jeowa ũrãgʼa biara jipade kãga ẽãta Jeowaba jarabʉde oda ẽ baera (Sl 50:16, 17; Prov 1:7). Naʉ̃ra ẽbẽrarãba nemitia bʉ baera tẽã baira ãyira mejãcha zʉbʉriabʉ, maʉ̃ba kʼẽãbʉ kĩrãkʼabʉ ãyira, maʉ̃ kʼãrẽa Proverbios 16:22de jarabʉ yibia krĩchaẽrãrã tẽã ãya kʼãrẽ ũdubʉba kʼẽãbʉ kĩrãkʼabʉta (Pr 16:22). Naʉ̃ra ẽbẽrarã bia krĩcha ẽã kʼãrẽ obʉrãra ãya obʉ kʼarea tẽã kʼãrẽ bia ne ẽ baseabʉ ãya oda kʼãrẽa sopʉa baseabʉ, kayaseabʉ, akʉza warraena beiseabʉ. (Jer 2:30; 5:3; 7:28; 17:23; 32:33; Os 7:12-16; 10:10; Sof 3:2).
9-15 JUNIOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 17
Sãwũã aduʼa baseabʉ juwa jidapanʉne
g 9/14 11 parr. 2
Kʼãrẽta oseabʉ kĩrã kiki kʼawua ẽ baita
Bʉyikʉza bia akʉra sãwũã bʉta. Daizeze Bedʼeabara jarabʉ ʉ̃kʉrʉ ẽbẽrarã mesera kĩrʉbʉta (Proverbios 29:22). Bʉta mawũã bʉbʉrʉ bʉyikʉza widira naʉ̃ta mʉ̃ra mesera kĩrʉbʉka Kĩrʉ kiki kʼawuaga. Nekʼãrẽ wika kĩrʉta yi zroma babibʉka. Daizeze Bedʼeabara jarabʉ daya nekʼãrẽ ʉ̃rʉ badu jarabʉbʉrʉ dayi neundukawuadeba jĩgababiseabʉta (Proverbios 17:9; Eclesiastés 7:9). Juwa jidapanʉra bida naʉ̃ta berabariseabʉ. Bʉa kʼawuara nekʼãrẽ badu kʼarea kĩrʉ kiki kʼawuata zarea ora bʉ kima jʉrakʼawuabʉta ũdubita.
w08 1/5 11 parr. 1, 2
Sãwũã araoi juwa jidabʉde bedʼea zroma erbʉra
1. Jʉrʉda kʼãrẽ ewaride bedʼeaita bedʼea zroma ʉ̃rʉ. Kʼãrẽ oira ewari jõma ewari barabʉ. Ewari chupea baita akʉza ewari bʉ bedʼeaita (Eclesiastés 3:1, 7). Ʉ̃kʉrʉra bedʼea abarika ze ẽãnera mejãcha yi keikeatopo, mamina maʉ̃ra edebiraidua. Awuara bʉrʉ bʉ kimaʉ̃me bedʼeara kʼãrẽ ewaride maʉ ʉ̃rʉ bedʼeaita. Mejãcha kĩrʉtopo nã maʉ̃ta ora. Bʉ kimaʉ̃me bia baira Daizeze Bedʼeaba ũrãgʼa bia diabʉta ora, nama jarabʉ bʉ kimaʉ̃me keikeatopodera dotapanʉmʉta ewai kĩrãkʼabʉ, maʉ̃ba berabari nã wãra aña.
Bʉ ewari bedʼeaita. Bedʼea zromara chirua kayirua kĩrãkʼa bʉ, dayirãba akʉda ẽ bʉrʉ mesera wari wãñi. Maʉ̃ba bedʼea zromara erbʉbʉrʉ krĩcharãra maʉ̃ra yi doba ara oita. Bʉta bʉ kimaʉ̃me keikeipanʉta eda bedʼeadogo obʉrʉ, bʉ kima ibiade akʉza iya wawia ũdubira, mõbe jarada sõbede maʉ̃ ʉ̃rʉ bedʼeaita. Mamina ewari bio berabaribirãra maʉ̃ bedʼea zroma ʉ̃rʉ bedʼeaita. Maraba maʉ̃ta odara Daizeze Bedʼeaba ũrãgʼa diabʉde odayi Efesios 4:26ba jarabʉ maʉ̃ta: «ũmadaʉ baebirãra bʉ kĩrʉbʉeda». Adewara bʉa jaradara aripe oibara.
Jʉrʉda nekʼãrẽ biʼiabʉta Daizezedebemata
it-2 545 parr. 4
Dabʉ
Proverbios 17:24ba jarabʉ yi ẽbẽra bia krĩcha ẽã dabʉra naʉ drʉade badu wã. Naʉ̃ bedʼeabara jarakĩrãbʉ mawũã bʉ ẽbẽrabara badu mae dakita bʉta, akʉza mawũã kʼawua ẽãta kʼãrẽta oita. Adewara nekʼãrẽ badu ʉ̃rʉ krĩchabʉ mamina krĩcha ẽ iya krĩchada ʉ̃rʉ.
16-22 JUNIOBAYEDA
BEDʼEA BIA DAIZEZE BEDʼEADE ŨDUDATA PROVERBS 18
So zarea diara yi kayapanʉra
Buru bia wãrĩnuarabara trʉ̃nʉmʉ
17 Bia krĩchara bedʼeai nãã. Jʉra kʼawua panʉ ẽ bʉrʉ, dayirã sãwũã bedʼeabʉdeba awururata sopʉabiseabʉ. Daizeze Bedʼeaba jarabʉ: «Biʼia krĩcha ẽã bedʼeabʉba kõbʉ espadade kĩrãkʼa, mamina buru bia bedʼeabara bebibʉ» (Prov. 12:18). Awururaba nekʼãrẽ aña oda kʼarea imitia bedʼeada ẽ bʉrʉ kʼarebayi wuabemarabawara aduʼa bʼaita (Prov. 20:19). Dayirãba kãgapanʉbʉrʉ dayirã awurume bedʼeabʉrʉde aduʼa bʼaita akʉza ãyi sopʉabi ẽ baita, Daizeze Bedʼeata ewariza akʉibara akʉza maʉ̃ ʉ̃rʉ krĩchaibara (Luc. 6:45). Dayirãba Daizeze Bedʼeade akʉbʉta krĩchabʉbʉrʉ, naʉ̃ba kʼarebayi dayirã awururaʉ̃me bedʼeabʉrʉde so zarea diaita (Prov. 18:4).
mrt artikulo 19 recuadro
Kʼãrẽta oi bʉa jʉ̃ã ẽ badara atia kayadogo bʉrʉ
Kĩrãkita ũrĩra. Bʉ neũdukʼawuata iya awuba iyi bedʼeata ũrĩmarẽã nesidabʉdera kĩrãkita ũrĩra iyi bedʼeara. Bʉ neũdukʼawuaraba iyi bedʼeabʉra bʉa jõma panʉita nesida ẽ bari iyara kãgabʉ baera bʉa ũrĩ marẽã. Adewara iya jarabʉ kʼarea daʉperarãra akʉza jarara iyara aña onʉmʉta, akʉza bʉa krĩcharãra kʼawuabʉde yi sãwũã sentinʉmʉta audre bʉa kʼawuabʉbʉrʉ iyi kʼareba kayanʉmʉta (Proverbios 11:2).
Bedʼea biata jarara. Edaʉde dayirãbara kʼawua ẽ kʼãrẽ jaraita, mamina jaraseabʉ dayi neũdukʼawua kʼawuabʉta iyi kʼarene sãwũã berabarinʉmʉta. Maʉ̃ta audre yibia iya kʼãrẽ jara ẽ kaude. Bʉa kʼawua e bʉrʉ kʼãrẽ jaraita bʉa jaraseabʉ soiduba iya mʉ̃a kʼawua ẽ kʼãrẽ jaraita, mamina bʉa bʉra kãgabʉ. Adewara naʉ̃ bedʼeata jara ẽ baibara bʉra audre mitia bakasi. Bari bʉrʉ maʉ̃ kayata erbʉ bʉara.
Adewara biga bayi bʉa kʼawuaita bʉ neũdukʼawuara kʼãrẽba kayabʉta. Mawũã obʉrʉ kʼarea obʉ bʉ neũdukʼawuara biga diayi, adewara bʉa kʼawuabayi sãwũã ũrãgʼa diasebʉta iya (Proverbios 18:13). Mamina jʉrakʼawuabara iya ũrãgʼata widi ẽ bʉrʉ ũrãgʼa dia ẽ baita. Kristo ewari
Jarada bʉa kʼareba kĩrãbʉta. Dayi neũdukʼawuaba kʼãrẽta nesidabʉta kʼawuabʉta krĩchai kaude, iya widibara sãwũã kʼarebaseabʉta. Mamina kĩrãbedaibara, dayi neũdukʼawuarabara edaʉde jara ẽãta iya kʼãrẽta nesidabʉta adewara naʉ̃ne kʼarebamarẽã jara ẽ, iya krĩchabʉ baera yãrãba abaita kãga ẽãta. Maʉ̃ nera iya jaraseabʉ kʼarebaseabʉta de imaita, nekʼãrẽ iya nesidabʉ edaita, mawũã ẽ bʉrʉ nekʼãrẽ awurude (Gálatas 6:2).
Mapaẽrãra. Edaʉde bʉ neũdukʼawuarabara maraba oita krĩchadara oẽ bayi maʉ̃ta ne ẽ bʉrʉ bʉme bedʼea amayi. Maʉneba jʉrakʼawuabʉta ũdubira akʉza zarea ora ũrĩta iyi sãwũã berabarinʉmʉta adewara akʉibara iya kʼãrẽne nesidabʉta diaita (Proverbios 18:24).
wp23.1 14, 15
Sãwũã kʼarebaseabʉ ẽbẽrarã iyi krĩchaba mitia bʉra
So zarea diara yi krĩcha opanʉrãra (1 TESALONISENSES 5:14).
Bʉ neũdukʼawuaraba krĩchabʉ, bʉ baibara iyira zeri ẽãta jõma bia oẽãta. Maʉ̃ba ũdubigadaʉba krĩchabʉta akʉza jarara iyi kãgata mawũã jarabʉrʉba bʉa iya so zarea diaseabʉ bia kʼawua ẽ mina kʼãrẽ bedʼeata jarai iya.
«Neũdukʼawuarabara ewari jõmaʉ̃nẽ kãgabʉ» (PROVERBIOS 17:17).
Jarada bʉa kʼãrẽta jarabʉta krĩchai kaude bʉ neũdukʼawua aba kʼãrẽ nesidabʉta bʉa kʼawuabʉta widira iya. Bʉ neũdukʼawuata perabʉbʉrʉ bʉa jaraita kʼarebamarẽã, iya kʼãrẽta nesidabʉta, iya naʉ̃ta jaraseabʉ bʉara, iyi me wãita, ode, maʉ̃ta ne ẽ bʉrʉ neda wãita. Adewara iyide imaita akʉza wuabema nekʼãrẽ oita iyiʉ̃me (Gálatas 6:2).
Jʉ̃ãkʼawuabʉta ũdubira (1 TESANOLISENSES 5:14).
Bʉ neũdukʼawuaraʉ̃me ewari jõmaʉ̃nẽ bedʼea kĩrãbʉ erbaibara. Mawũã oburudera bʉ neũdukʼawua ũdubira iyi bʉme bedʼeakĩrãbʉdera iyita krĩchaseabʉta bʉa ũrĩ baera iyi bedʼeara. Iyira kayabʉ baera edaʉde iya jaraseabʉ bedʼea bʉ ma abʉta maʉ̃ba bʉta sopʉaseabʉ. Maʉ̃ta ne e bʉrʉ marata nekʼãrẽ oibarata oẽ bayi. Adewara kĩrʉseabʉ wãita ne ẽ bʉrʉ (Proverbios 18:24).
Jʉrʉda nekʼãrẽ biʼiabʉta Daizezedebemata
it-2 1063
Suerte
Nawedara ẽbẽrabara suerte opanasi maʉ̃ra ãyi wuade bʉe kʼãrãpe bakuru zaketa maʉ̃ta ne ẽ bʉrʉ mõgara zaketa eda bʉepanasi. Mõbe puerapanasi, mõgara zaketa maʉ̃ta ne ẽ bʉrʉ bakuru zake jidabʉrʉba ũdubibasi saʉ̃ta ãyi suertera. Maʉ̃ nã Daizeze bedʼea yiwidʼibasi kʼareba jida diamarẽã. Maʉ̃ta ne ẽ bʉrʉ ãyi yiwidi ẽ bʉsida kʼawuapanasi Daizezeba kʼarebasita ãya mawũã obʉrʉdeba.
Kʼãrẽa sokʼapanasi. Proverbios 16:33de jarabʉ nawedara suerte opanasita kʼawuaita Jeowaba kʼãrẽta krĩchabʉta ãya jarabʉ ʉ̃rʉ. Wãrĩnu baera Israeldera maʉ̃ suertera opanasi ẽbẽrarã ãyirai bedʼea abarika ze ẽãne mawũã kʼawuaita saʉ̃ba jarabʉta Jeowaba krĩchabʉde bʉta. Proverbios 18:18ba jarabʉ suerte obʉba kʼarebabʉta yõ taʉita. Mamina naʉ̃ suertera zokʼapana ẽ basi jemene burudera mia apuesta obʉrʉde maʉ̃nera ne ẽ basi baera kʼaiba plata ganabʉta mia plata aduabʉta.
23-29 JUNIOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 19
¿Bʉra mebẽrã neũdukʼawua bia bakĩrãbʉka?
¿Kʼãrẽta oibara dayirãi audre yiya kãgaita?
16 Akʉra mebẽrãba kʼãrẽ nebia erbʉtrʉ, akʉrãra ãya kʼãrẽ kayirua obʉta. Krĩchara naʉ̃ yizata, krĩchara bʉ ãba yi jʉrebʉta mebẽrãbawara, bʉra ãyibawara sobiabʉ, bia berabaribʉ bʉa. Mamina ãba yi jʉre berabarida tẽã potota sakapanʉ ũbea, bʉa maʉ̃ potora akʉbʉrʉde ũduyi abaʉde mebẽã aba ipida ẽ basita, ¿kʼãrẽta oi bʉa maʉ̃ne? Maʉ̃ potora bʉa borra bʉeyi ¿kʼãrẽa? Erbʉ baera awuru potota mara jõma ipida ʉ̃tʉ zebʉta.
17 Mamina yi poto bia kedadara dayirãbara wuagapanʉ tẽã maʉ̃ poto akʉbʉrʉde kĩrãbeita mebẽrãbawara sãwũã bia berabaridata. Abarika berabaribʉ mebẽrãʉ̃me, dayirãbara ãyibawara bia berabarida ewarira kĩrãbepanʉ, mamina ãya dayirãta kĩrʉbibʉrʉdera maʉ̃ ewarira ãĩ bʉebʉ daya poto mitia kedada borra bʉebʉ kĩrãkʼa (Prov. 19:11; Efes. 4:32). Mawũẽra mebẽrãba kayirua odara dayirãbara kĩrãduaseapanʉ, kĩrãbepanʉ baera maʉ̃ mebẽãʉ̃me kʼãrẽ ewaride audre bia berabaridata.
Bʉ kãgara audre wari wãbira
10 Dayirãbida jʉrʉpanʉ sãwũã mebẽrã kongregasionebemara kãga ũdubidaita (Heb. 13:16). Nãgʉ zroma berabarida tẽã Annaba yi kimaʉ̃meba, akʉ jʉ̃ẽsida mebẽrã Jeowa ʉ̃rʉ Kʼawuabipanʉrãta. Maʉ̃ne ãya ũdusi maʉ̃ra de joabʉta pʉãdrʉba ãrĩnata, maʉ̃ba ãyi wuara jaigʉabasi. Annaba jarabʉ: «Maʉ̃ba daibara ãyi wua jida kʼãrãpe tõsi, mõbe beda kʼãrãpe jẽda ãyaʼa diasi. Maʉ̃ra daitara kʼãrẽ ẽ kĩrãkʼabasimina, kʼarebasi ãyi neũdukʼawua bʼaita idibasidu». Mawũã Annaba iyi kimaʉ̃meba mebẽrã kãga ũdubidaba, kʼarebasi wuabemaraba nesidabʉ diaita (1 Juan 3:17, 18).
11 Dayirãba wuabemara bia edabʉde akʉza kãga ũdubibʉde, ãya ũdubʉ dayirãba sãwũã zarea obʉta Jeowaba krĩchabʉ kĩrãkʼa akʉza obʉ kĩrãkʼa obʉta, adewara ãya maʉ̃ kʼarea mejãcha biga diaseabʉ. Khanhba ewariza biode kĩrãbebʉ kʼaiba iyi kʼarebadapeadata. Iya jarabʉ: «Mʉ̃ara jĩpa biga diakĩrãbʉ jari mebẽrã mʉ̃ deidu eda jʉ̃ẽnara Daizeze Bedʼea jaradia wãita akʉza maʉ̃ tẽã nekobibasi baera, adewara deda kʼãrẽ neida berabari ẽã edebasi baera. Idi mʉ̃a kʼawuabʉrʉ ãyara sãwũã mejãcha zarea obasita maʉ̃ oita, adewara maʉ̃ra osida kãgaba». Mamina ʉ̃kʉrʉba biga diada ẽ bayi ãyita mawũã obʉ kʼareara. Maʉ̃ta jarabʉ Khanhba iyi kʼarebada ʉ̃rʉ: «Ãya mawũã oda kʼarea nebiata diakĩrãbʉ, mamina Jeowaba kʼawuachu ãyi samachura. Jeowa yiwidʼibʉ ãyaʼa nebiata diamarẽã». Khanhba jarabʉra wãrĩnu, Jeowabara akʉbʉ dayirãba kʼãrẽ nebia obʉra wikakirumina, maʉ̃ra iyara jĩpa nebia zroma kĩrãkʼa akʉbʉ akʉza Jeowaba jẽda diayi (akʉra Proverbios 19:17).
Yiya ũdubidadrʉ kãga jõkata
6 Ẽbẽra abaʉta iyabaʉ empresade traja kikibaribʉrʉ maʉ̃ ẽbẽrarã jaraseapanʉ kʼẽrẽpabʉta. Mama kikibarimina iyara ũdukabaibara mia abaʉta maʉ̃ra yibariranebemara. Edaʉde krĩcha abarikabʉ ẽ baibara empresaba omarẽã zokʼabʉta. Mamara soiduba trajabʉ ẽ awuarabʉrʉ nesidabʉ baera. Iyira mama trajabayi ẽdrʉyeda mawũã ẽ bʉrʉ awuru trabajo biabʉta ũduyeda.
7 Nabema parrapodera akʉsida ẽbẽra empresade trajabʉra kʼẽrẽpabʉta, mamina maʉ̃ra awuarachu kãga jõkaira, ũdubibʉ baera ne awuara obʉ kʼarea. Nããra Daizeze ode badarabara, ¿kʼãrẽa ũdubisida kãga jõkara? Ãyara osida ẽ oibara baera, awuarabʉrʉ ãyi soiduba osida. Akʉdayi David yizata, iyara iyi soiduba kãga jõkata ũdubisi iyi neũdukʼawua Jonatánʼa, Jonatán zezebara beakĩrãbasimina Davidʼra. Poaga bio berabarida tẽã Jonatán beidadeba, Davidbara kãga jõkata ũdubisi Jonatán warraʼa, Mefibóset (1 Sam. 20:9, 14, 15; 2 Sam. 4:4; 8:15; 9:1, 6, 7).
Jʉrʉda nekʼãrẽ biʼiabʉta Daizezedebemata
it-1 545
Ũrãgʼata, mia ũrãgʼabari
Krĩcha biara jõma Jeowadeba zebʉ, maʉ̃ba ũrãgʼa diabʉrʉde bia ũrãgʼaira yibiabayi krĩchaita Jeowaba kʼãrẽta jarabʉta, ũrãgʼa diabʉrʉde Jeowaba jarabʉde dia ẽ bʉrʉ, maʉ̃ ũrãgʼara ũrãgʼa bia ẽ (Pr 19:21; 21:30).
30 JUNIONEBA-6 JULIO EDA
BEDʼEA BIA DAIZEZE BEDʼEADE ŨDUDATA PROVERBIOS 20
Yi bedʼeapanʉraba kʼãrẽta oseabʉ bia jidaita
¿Sãwũã yi bedʼea panaseabʉ Jeowaba kãgabʉde?
3 Yiya bedʼeapanʉnera maʉ̃ba mejãcha sobiabibʉ. Yumakẽrãta yuwẽrãʉ̃me yi bedʼea jʉ̃drʉbʉrʉdera yi krĩchara baibara juwa jidaita, naʉ̃ra jemene ẽ baera. Yi bedʼeapanʉ juwa jidai ewaridera jarapanʉ yiya kãgapanaita ewari jõmaʉ̃nẽ akʉza ãyirai wawia ũdubidaita, mamina ãya maʉ̃ jarai nãã biʼia krĩchaibara (akʉra Proverbios 20:25). Yiya bedʼeabʉba kʼarebayi audre yi ũdukʼawuadaita, mawũã kʼawuaita juwa jidaita mawũã ẽ bʉrʉ juwa jida ẽãta. Ãya krĩchasibʉrʉ juwa jida ẽ baita maʉ̃ba jarakĩrãkʉ ẽ ãya kayirua osita, mawũã yi bedʼeapanʉba kʼarebasi baera kʼawuaita juwa jidaita mawũã ẽ bʉrʉ juwa jida ẽãta.
4 Mebẽrã dobapanʉraba kĩrãbeibara naʉ̃ta, juwa jidakĩrãbʉ ẽ bʉrʉ, kʼãrẽa mebẽã abaʉ̃me yi bedʼea jʉ̃drʉita ne ẽ. Mamina dayirã jõmaʉ̃ba kĩrãbedaibara ẽbẽra ũme yi bedʼeapanʉnera kʼãrẽ kʼarea yi bedʼeapanʉta. Bari jaraita, ʉ̃kʉrʉba krĩchapanʉ ẽbẽra ũme yi bedʼeapanʉnera juwa jidadaita bedʼeapanʉta mamina, ¿yi doba bʉara maʉ̃bara sãwũã krĩchabibʉ? Mebẽã wẽrã dobabʉ Melissaba Estados Unidosdebemaba jarabʉ: «Ẽbẽra ũme yi bedʼeapanʉta ũdubʉdadera wuabema mebẽrãbara krĩchapanʉ maʉ̃rãra juwa jidaibarata, maʉ̃ kʼarea ãyi yi bedʼeapanʉta taʉbidaita krĩcha ẽ wuabemaraba sãwũã krĩchai kʼarea, ãyi bia wã ẽ mina. Maʉ̃ba ʉ̃kʉrʉbara jipa krĩchabʉ kʼaiʉ̃me bedʼea jʉ̃drʉ ẽ baita ãyi ʉ̃rʉ neida bedʼeada ẽ marẽã».
Sãwũã ũduseabʉ kima biara
8 ¿Kʼãrẽta oseabʉ bʉa maʉ̃ ẽbẽra jĩgaʉba ũdukʼawuaira? Ãba yi jʉrebarima wãbʉrʉde mawũã ẽ bʉrʉ mebẽrã kongregasionebemarabawara ãbabʉde, maʉ̃ ẽbẽraba nekʼãrẽ obʉdeba bʉa kʼawuaseabʉ iyi Jeowaʉ̃me sãwũã bʉta, iyi sode iya kʼãrẽ nebia erbʉta, adewara iyi sãwũãchʉta. Maʉ̃ awuara, bʉa ũdu kʼawuaseabʉ maʉ̃ ẽbẽra neũdukʼawuara saʉ̃rasida akʉza ãyi kʼãrẽ ʉ̃rʉ bedʼabʉta (Luc. 6:45). Bʉa ẽbẽra ũdukʼawuakĩrãbʉbara, ¿nekʼãrẽ bʉa okĩrãta abarika okĩrãbʉka? Zõrãrã iyi kongregasionebema widiseabʉ iyi ʉ̃rʉ, mawũã ẽ bʉrʉ mebẽã maʉ̃ ẽbẽra biʼia ũdukʼawuabʉa widiseabʉ (Prov. 20:18). Adewara widiseabʉ iya kʼãrẽ nebia erbʉta akʉza wuabemaraba iyi sãwũã akʉbʉta (Rut 2:11). Mamina bʉa maʉ̃ ẽbẽra jĩgaʉba ũdukʼawuanʉmʉnera, zarea ora ewari jõmaʉ̃nẽ iyi kʼawuachʉa ẽ bʼaita mawũã ẽ bʉrʉ iyi ʉ̃rʉ jõma widinʉmaita maʉ̃bara mitia sentibiseabʉ baera maʉ̃ ẽbẽrata.
¿Sãwũã yi bedʼea panaseabʉ Jeowaba kãgabʉde?
7 ¿Bʉara sãwũã kʼawuaseabʉ bʉme bedʼeabʉba sãwũã krĩchabʉra? Mara bedʼeabʉdadera wãrĩnuta jaraibara adewara ũrĩbara ababemaba kʼãrẽta jarabʉta akʉza bedʼeata widiseabʉ, adewara jaraibara mayi ũmeba mayi sode sãwũã krĩchabʉta (Prov. 20:5; Sant. 1:19). Adewara mayi ũmeba nekʼãrẽ oseapanʉ ãbaʉba akʉza maʉ̃ne bedʼeaseapanʉ maraba kʼawuakĩrãbʉ ʉ̃rʉ, bari jaraita, ewara eda ãba wãseapanʉ ẽbẽrarã biobʉmae nekode mawũã ẽ bʉrʉ bari ode bedʼea wãita adewara ãbaʉba Daizeze bedʼea jaradia wãseapanʉ. Adewara bʉa iyi sãwũã bʉra kʼawuaseabʉ mara mebẽrãbawara ãbabʉde akʉza mara neũdukʼawuarabawara ãbabʉde. Marabara nekĩrã bio ãbaʉba oseapanʉ, mawũã kʼawuaita sãwũãbʉta akʉza wuabemarabawara ãba baseabʉ, kʼawuaita wuabemara aba abaka sãwũã edabʉta. Akʉdaya Albert, Países Bajosdebemaba kʼãrẽta osita iyi Aliciaʉ̃me yi bedʼea jʉ̃drʉside, iya jarabʉ: «Daibara ãbaʉba nekʼãrẽ opanasi mawũã audre bia ũdukʼawuaita ababema sãwũãbʉta bari jaraita, ãba neopanasi. Dai mawũã ãbapanʉne ũdupanasi ababemaba kʼãrẽ nebia erbʉta akʉza kʼãrẽta aña obʉta».
8 Adewara marabara ãbaʉba kʼawuaseabʉ nekʼãrẽ Daizeze Bedʼeadebema ʉ̃rʉ. Marata juwa jidaita krĩchabʉbʉrʉ maʉ̃ba kʼarebayi juwa jidabʉrʉde ewari jʉrʉdamarẽã semanaza Daizeze Bedʼea ʉ̃rʉ kʼawuaita, mawũã marabara ũdubidayi audre yibiata Jeowa neũdukʼawua bia bʼaita (Ecl. 4:12). Marata waidide juwa jida ẽ nara yumakẽrãra waidide yuwẽrã buru ẽ, mamina kʼãwũãena ãbaʉba Daizeze Bedʼeata kʼawuapanʉbʉrʉ naʉ̃ba kʼarebayi kʼawuaita aba abaka kʼãrẽãba neũdukʼawua biata Jeowaʉ̃me. Max akʉza Laysaʉ̃mera Estados Unidosdebemara, ãya jara ũrĩbipanʉ Daizeze Bedʼea ãbaʉba akʉiba sãwũã kʼarebasita. Maxba jarabʉ: «Ʉ̃rabʉrʉ yi bedʼeai ʉ̃rʉ, juwa jidai ʉ̃rʉ akʉza mebẽrãbawara sãwũã bʼai ʉ̃rʉ bedʼeaira zarea baseabʉ, mamina dai kʼãwũã ʉ̃rabʉrʉ yi bedʼea jʉ̃drʉsidade dayirã kartarane maʉ̃ ʉ̃rʉ kʼawuaiba mejãcha kʼarebasi audre biʼia bedʼeaita maʉ̃ ʉ̃rʉ».
Jʉrʉda nekʼãrẽ biʼiabʉta Daizezedebemata
lv 168 parr. 15
Jeowa ode panʉrabara ãyi jõmaʉ̃ba ũdubidaibara nenẽãpanʉta, Jeowa ode panʉrabawarabʉde akʉza awuru ẽbẽrarã Daizeze odebʉ ẽãraʉ̃mebida. Pablode kĩrãkʼa dayirãbara kãgapanʉ ewari jõmaʉ̃nẽ nekʼãrẽ badude neneẽãbʉta ũdubita (Heb. 13: 18). Jeowaitara jipade yibia dayirãba nekʼãrẽ nedobʉrʉde wãrĩnuta jaraita, krĩcha ẽã maʉ̃ ẽbẽra dayirã kʼawabemata mawũã ẽ bʉ ẽãta. Maʉ̃ba Proverbiosdera jara ũrĩbibasi mejãcha jara ũrĩbibasi ẽbẽrarãba pesodeba sãwũã sãwũã sewabʉ ʉ̃rʉ (Prov. 11: 1; 16: 11; 20: 10, 23). Nawedara pesara zokʼa panasi ne edaita mawũã ẽ ne nedoita. Ẽbẽrarã ne nedobarirabara mejãchade sewabasi awuru ẽbẽrarã maʉ̃ pesadeba mamina Jeowabara jipade jʉra mawũã sewakuaira, maʉ̃ba dayirãta Jeowa kãgade bakĩrãpanʉbʉrʉ jʉrʉ ẽ baibara maʉ̃ oita.