Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2025 Watch Tower Bible and Tract Society of Pennsylvania
7-13 JULIOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 21
Ũrãgʼa biata juwa jidapanʉraita
w03 15/10 4 parr. 5
¿Kʼãrẽta oseabʉ nekʼãrẽ jidai nãã?
Proverbios 21:5ba naʉ̃ta ũrãgʼabʉ: «Yi trajamiaba iya krĩchada oita, wãrĩnu bia oyi; mamina jari yi mesera obʉra, nekʼãrẽ neẽãbeyi». Naʉ̃ba ũdubibʉ daya nekʼãrẽ oita jidaita mesera jidadogobʉrʉ edaʉde bia wã ẽ baita. Bari jaradaita warrarabara ãya ẽbẽra aba kãgai nããra biʼia krĩchadaibara maʉ̃ ẽbẽraʉ̃me ãba bakĩrãbʉ kʼawuaita wãrĩnu. Bia krĩcha ẽ bʉrʉ berabariyi William Congreve dramaturgo abaʉba siglo 18debemaba jaradata. Iya jarasi: «Yi mesera juwa jidabʉra ewari erbayi jẽda krĩchaita iya oda kʼarea».
g 7/08 7 parr. 2
¿Sãwũã sobia baseapanʉ juwa jidapanʉrãra?
Edabʉta ũdubira. Daizeze Bedʼeade jarabʉ nekʼãrẽ obʉrʉdera oẽ baibarata maʉ̃ta dayita ʉ̃tabʉta ũdubita awuarabʉrʉ krĩchaibarata dayirãba nekʼãrẽ obʉrʉdera wuabemaraba dayide audre bia obʉta (Filipenses 2:3). Mejãcha berabaribʉ juwa jidapanʉraba bedʼea zroma ũdubʉrʉdera ãyirai yi kʼarebai kaude maʉ̃ bedʼea zroma ãbaʉba sãwũã ara oita jʉrʉi kaude krĩchapanʉ nekʼãrẽra berabarisita yi ababemaba bia oẽ basi baera. Mamina yibia edabʉta ũdubita mawũã jʉrʉi kaude bʉa jarakʉtrʉ iyita.
w06 15/9 28 parr. 13
«Sobiabara bʉ kima warraraena mia kʼãĩnaʉ̃me»
13 Juwa jidapanʉrata ãyirai bia edapanʉ ẽ bʉrʉ kĩrʉseapanʉ. Ãyita mawũã kĩrʉpanʉbʉrʉ audre zare bayi ãyi bedʼea zroma ara oira. Bari jaradaita ãya kʼawua ẽãne ãyirai kĩrʉ bedʼea bedʼeapanʉ, mõbe ãyirai badua mawũãpanʉ baera mawũã kʼawaseapanʉ. Mamina mawũãpanʉbʉrʉ ewari berabari wãne bia wã ẽ bayi (Proverbios 12:18). Daizeze Bedʼeaba naʉ̃ ũrãgʼata diabʉ yuwẽrãra. Daizeze Bedʼeade jarabʉ audre yibiata drʉa ibʉawabʉmae abapai baita yuwẽrã imitia bedʼeabʉme akʉza bedʼeakamiaʉ̃me ãba bʼaira (Proverbios 21:19). Bʉta yuwẽrãbʉrʉ akʉza bʉa krĩchabʉbʉrʉ mawũã berabaribʉta bʉyikʉza widira: «¿Mʉ̃a obʉba krĩchabibʉka mʉ̃ kimaʼa wua mʉ̃me ãba ba ẽ baita?». Bʉ akʉza ũrãgʼa yumakẽrãraita. Daizeze Bedʼeade naʉ̃ta jarabʉ: «Yumakẽrã kima barabebara kãgabaibara yi kimara, akʉza iyiʉ̃me kĩrʉrãra» (Colosenses 3:19). Yumakẽrã, bʉara bʉyikʉza widiseabʉ: «¿Mʉ̃a mʉ̃ kima ʉ̃rʉ krĩchabʉta ũdubi ẽ kʼarea iyara krĩchabʉka awuruta jʉrʉ wãita iyi ʉ̃rʉ krĩchamarẽã?». Naʉ̃ jõmaʉ̃neba edaʉde krĩchaseabʉ awuru kimata jʉrʉita yibiata. Mamina mawũã berabari ẽ marẽãra audre yibia abedaeda wãrĩnuta jaraita mayirai.
Jʉrʉda nekʼãrẽ biʼiabʉta Daizezedebemata
w05 15/1 17 parr. 9
Daizeze Nokʼo ʉ̃rʉ jaradata aripe berabarisi
9 Daizeze Bedʼeadera cabayobara ũdubibʉ yõta (Proverbios 21:31). Akʉza Apocalipsis 6:2de naʉ̃ta jarabʉ: «Akʉza ũdusi kabayo torrota. Iyi ʉ̃rʉ baribʉbara abasi enedrʉmata. Iyaʼa diasida koronata, iyira jõmaʉ̃ra ʉ̃tabasi, mawũãbayi jõma iyi juwa edre bʉeyeda». Naʉ̃ba ũdubibʉ Jesúsʼra atiara kabayo ʉ̃rʉ baribʉta akʉza iyira Nokʼo zromata mejãcha zareata barabʉta. Mawũã nãã burru ʉ̃rʉ barida kĩrãkʼa bʉ ẽãta atiara.
14-20 JULIOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 22
Bʉ ũrãgʼa biata wũãwũãra bia dapʉẽita
w20.10 27 parr. 7
¿Bʉ wũãwũãrãra Jeowaba kãgabʉde bʼaika waribʉrʉdera?
7 Bʉta zezebʉrʉ akʉza papabʉrʉ bʉyikʉza naʉ̃ta widira: «¿Jaradiabʉka mʉ̃ wũãwũãra kʼãrẽa yibiata zarea trajaita? (Ecl. 3:12, 13). «¿Nekʼãrẽ jõma obʉka Jeowaba kãgabʉta omarẽã akʉza neida berabari ẽ marẽã?» (Prov. 22:3). Wãrĩnubaira bʉ wũãwũãra ewari jõmaʉ̃nẽ kʼarebabe ẽ, mamina wiña wiñane Daizeze Bedʼeadeba jaradiaseabʉ kʼãrẽta oibarata ãya bedʼea zroma ũdubʉrʉde (akʉra Proverbios 2:1-6). Bari jaraita, bʉ mebẽrãnebemaba Daizeze ode bʉta idubʉra ũdubira bʉ wũãwũãra Daizeze Bedʼeadeba kʼãrẽa yibiata Daizeze ode kʼẽrẽpa bʼaita (Sal. 31:23). Mawũã ẽ bʉrʉ bʉ mebẽrãnebemata beira bʉ wũãwũãra testota ũdubira kʼarebaita mejãcha sopʉada ẽ marẽã akʉza aduʼa panamarẽã (2 Cor. 1:3, 4; 2 Tim. 3:16).
w19 12/26 parr. 17-19
Yibarira mara wũãwũã jaradiaidua Jeowata kãgamarẽã
17 Yi zake tomainʉba bʉ wũãwũãra Daizeze Bedʼeadeba jaradiara. Maʉ̃ta oira yibia (Prov. 22:6). Mawũã osi Eunice Timoteo papaba akʉza Loida yi payõdraba. Ãyara Timoteoʼa yi zake tomaenaʉba Daizeze Jeowa ʉ̃rʉ jaradiasi (2 Tim. 1:5; 3:15). Ãya maʉ̃ta osida baera kʼarebasida Timoteoba apostol Pablota kopayamarẽã Daizeze Bedʼea jaradiaita.
18 Jean-Claude akʉza Peaceʉ̃mera Costa de Marfildebema. Ãyara 6 wũãwũãra erpanʉ, ãyara Eunice akʉza Loidaba oda kĩrãkʼa osi. Ãyi wũãwũãra jaradiasi Daizeze Jeowata kãgamarẽã akʉza Jeowadeta omarẽã. Ãyara naʉ̃ta jarapanʉ: «Yi zake tomainʉba mʉ̃ wũãwũãra Daizeze Bedʼeata jaradiasida» (Deut. 6:6, 7).
19 Daizeze Bedʼeabara jarabʉ yibarirabara ãyi wũãwũãra jarada ʉ̃rʉ jaradiaibarata. Maʉ̃ oira ewarita jʉrʉibara ãyi wũãwũãraʉ̃me ãba bʼaita. Edaʉde yibarirabara ãyi wũãwũãra iyabaʉ bedʼea jaraira maseseabʉ, mamina kĩrãbeibara bʉ wũãwũãra jarada ʉ̃rʉ jaradiabʉbʉrʉ kʼarebaita Daizeze Bedʼea ʉ̃rʉ audre ĩjãita akʉza Daizeze Bedʼeaba jõma jarabʉta omarẽã.
w06 1/4 9 parr. 4
Yibarira yiza biata diaidua mara wũãwũãra
Wũãwũãrãra wũãwũãra baera ewari jõmaʉnẽ jeme bakĩrãpanʉ mamina edaʉde ʉ̃kʉrʉ wũãwũãrabara jipa ũrĩkĩrã ẽ yibarira bedʼeara (Génesis 8:21). Daizeze Bedʼeade ũrãgʼata diabʉ yibariraʼa ãyi wũãwũãraba ũrĩkĩrã ẽãne kʼãrẽta oibarata, jarabʉ ũrĩkĩrã ẽ bʉrʉ uibarata ãyi wũãwũãrãra, mawũã ũrĩnamarẽã. (Proverbios 22:15.) Ʉ̃kʉrʉ ẽbẽrarãba krĩchapanʉ idi ewadera u ẽ baibarata wũãwũãrãra, maʉ̃ra poi kĩrãkʼa bʉ baera. Adewara nawedabʉrʉ mawũã upanasi baera. Mamina Daizeze Bedʼeade ui jarabʉbara jarakĩrãbʉ yibariraba yi wũãwũãrara edaʉde uibarata mamina aukʼara po ẽ baibarata, awuarabʉrʉ kãgata ũdubibarata akʉza ibiade oibarata ũdubita kãgapanʉta ãyi wũãwũãrara bia wãmarẽã ewari jõmaʉ̃nẽ (Hebreos 12:7-11). Wãrĩnubaira Daizeze Bedʼeadebida jarabʉ yãra zʉbʉriabi ẽ baibarata mia po ẽ baibarata.
Jʉrʉda nekʼãrẽ biʼiabʉta Daizezedebemata
Jeowaita nekʼãrẽ oseabʉ kʼarea sobiapanʉdru
11 Dayirãsida audre sobia baseapanʉ nekʼãrẽ Jeowaita obʉrʉta audre biʼia oita krĩchara. Bari jaradaita, audre zarea odaibara Daizeze Bedʼea jaradia wãita, nekʼãrẽ Daizezedebemata audre oita (Hech. 18:5; Heb. 10:24, 25). Adewara audre zarea odaibara ãba yi jʉrebarima wãi nãã biʼia preparaita komentariorata mebẽrã so zarea diaita. Adewara dayirã ãba yi jʉrebarimae nekʼãrẽ omarẽã jarasidabʉrʉ audre zarea oibara maʉ̃ta biʼia estudiaita. Maʉ̃ awuara kongregasione nekʼãrẽ omarẽã jaradara zarea odaibara maʉ̃ta ãya jaradade oita akʉza ũdubidaita dayi ʉ̃rʉ ĩjãseabʉta. Krĩchada ẽ baibara bʉta nekʼãrẽ ʉ̃kʉrʉ kʼãrẽ ẽ kĩrãkʼa bʉta akʉza maʉ̃ba kʼãrẽa maʉ̃ ʉ̃rʉ mejãcha krĩchaira nesida ẽãta. Jipade yibia maʉ̃ jõmaʉ̃nẽ nekʼãrẽ audre bia owãita (Prov. 22:29). Mawũã opanʉbʉrʉ naʉ̃ba kʼarebayi dayirã audre Jeowa kʼawa bʼaita akʉza audre sobia panaita (Gál. 6:4). Adewara dayirãba ũdudara awuru mebẽãʼa diasidata nekʼãrẽ omarẽã daya kãgabʉta maʉ̃ kʼarea kĩrʉ ẽ bayi awuarabʉrʉ sobia baseabayi iyaʼa maʉ̃ta diasida baera (Rom. 12:15; Gál. 5:26).
21-27 JULIOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 23
Bʉ ũrãgʼa biata itua doi ʉ̃rʉ
w04 1/12 19 parr. 5, 6
Ituara jʉra kʼawua doibara
5 Edaʉde ʉ̃kʉrʉ ẽbẽrarãra mejãcha itua donʉmʉmina beinʉme ẽ, maʉ̃ba ãya krĩcha zeseabʉ mejãcha doseabʉta. Mamina, ¿bigaka kʼawũã krĩchaira? Wãrĩnubaira naʉ̃ra ẽbẽrarãba mawũã krĩchabʉdera ãyikʉza yi sewanʉmʉ (Jeremías 17:9). Ãya mawũã krĩchabʉdeba wiña wiñane itua domia ba zeseabʉ baera akʉza krĩcha zeseabʉ baera itua ne ẽãra ãyira babe ẽãta (Tito 2:3).
6 Jesúsba naʉ̃ ũrãgʼata diasi dayirãʼa: «Mayikʉza kĩrãkita panaidua, mayi soba krĩchabʉde panaraidua, aukʼara nekopanaraidua akʉza ituaba bei panaraidua, naʉ̃ ẽjũãnẽbʉta krĩcha panaraidua, mawũãra mʉ̃ra atiaude mara ʉ̃rʉ ze ẽ baya jari ewaridera» (Lucas 21:34, 35 TNM). Naʉ̃ba ũdubibʉ dayi sõbe itua dobʉrʉde kĩrãburgadogo kʼawuaira beinʉmai bara ẽãta akʉza dayirã Jeowadeba jĩga wãta kʼawuaira beinʉmaibara ẽãta. Jʉra kʼawuabʉ ẽ bʉrʉ itua wiña ewari za dobʉdeba jĩga wãseabʉ Jeowadeba. Dayikʉza krĩchaseabʉ naʉ̃ta, mawũã beinʉmʉne Jeowa ewarita zera, ¿kʼãrẽta sãwũã berabari?
it-1 367, 368
Beinʉmeita
Daizeze Bedʼeade oẽ marẽã jarabʉta. Daizeze Bedʼeade jarabʉ ituata beinʉmeñena dobʉrʉdera maʉ̃ra biga ẽãta. Abarika jarasi Proverbios bʉdabida. Iyara jara ũrĩbisi kʼãrẽta berabaribʉta itua dobʉrʉde. Iya jarada kĩrãkʼa abarika jarapanʉ sientipikorabida. Proverbiosde iya jara ũrĩbisi ẽbẽra itua dobʉra zʉbʉria bedʼeabʉta, yõbʉta, krĩcha obʉta, mia abaʉba poda ẽãne pobʉta akʉza iyi dabʉbara nekʼãrẽ berabarinʉmʉ ẽãta ũdubʉta. Naʉ̃ra wãrĩnu, ẽbẽra aba itua dobʉrʉdera bia krĩcha ẽ, iya bia krĩcha ẽ baera iya oita krĩcha ẽ badata obʉ, iya jara ẽ baibadata jarabʉ, nekʼãrẽ aripe berabarinʉmʉ ẽãta ũdudogo akʉza iyi sode nekʼãrẽ mera erbadaidu jõmaʉ̃ʼa jarakabʉ akʉza yõbʉ ẽbẽrarã wuabemaraʉ̃me. (Pr 23:29-33; Os 4:11; Mt 15:18, 19.)
Adewara Proverbiosde jarabʉ ẽbẽra beinʉmʉra pusa ẽzadra tabʉ kĩrãkʼabʉ, jogaseabʉ biʼia akʉ ẽ baera iyi audu kʼãrẽ berabarinʉmʉta. Abarika ẽbẽra aba jogabodoba sentibʉ kĩrãkʼa ẽbẽra beinʉmʉbara akʉ ẽ iyi audu kʼãrẽta berabarinʉmʉta akʉza biʼia krĩcha ẽ. Adewara jarabʉ barkode ʉ̃tʉ jirabʉ kĩrãkʼabʉta iyira neida berabariseabʉ, yõbʉ nekʼãrẽ badu kʼarea, ẽbẽra beinʉmʉbara kʼawua ẽ iyira kʼaiba podata, mia senti ẽ iyara, kʼãrẽ berabaridata kʼawua ẽ. Akʉza jarabʉ ẽbẽra beinʉmʉnera kʼãĩbʉta iyi biʼia kĩrãbayeda mamina urumabʉrʉdera akʉza itua dode wãbʉ itua domia baera. Ẽbẽra itua domiara kʼãrẽ neẽ beseabʉ akʉza trajo ũdu ẽ bayi iyi trajota biʼia oẽ baera. (Pr 23:20, 21, 34, 35.)
Jʉrʉda nekʼãrẽ biʼiabʉta Daizezedebemata
w04 1/11 31 parr. 2
Lepanʉraba widibʉta
Ẽbẽra ĩjãra kakua obʉbara jarakĩrãbʉ ẽ naʉ̃ ẽbẽrarã nekomiata, edaʉde ʉ̃kʉrʉ ẽbẽra ĩjãra kakua obʉra mawũã bʉ kayabʉ baera mawũã ẽ bʉrʉ iyi mebẽrãta mawũãbʉ baera. Ĩjãra kakua obʉbara jarakĩrãbʉ iyi kakuade dragata aukʼara erbʉ baera mawũã bʉta maʉ̃ba iyi kakuade dajada ũdubʉ kʼãrẽãba kakua ochuta. Ẽbẽra nekomiabara jarakĩrãbʉ jãwãsidu krĩña mejãcha nekobʉta. Maʉ̃ kʼarea iyara ewari jõmaʉ̃nẽ yiko ʉ̃rʉ krĩchabʉ. Edaʉde ẽbẽra nekomiara ĩjãra kakua obʉ ẽ, ʉ̃kʉrʉra nekomiamina plakeabʉ. Wãrĩnubaira ʉ̃kʉrʉ drʉadera kakua obaira mitia ũdu ẽ mawũã ẽ bʉrʉ plakiabaisida mitia ũdu ẽ.
28 JULIODEBA-3 AGOSTO EDA
BEDʼEA BIA DAIZEZE BEDʼEADE ŨDUDATA PROVERBIOS 24
Zareabara bedʼea zroma zei nãã
it-2 648 parr 8
Pẽwãpanʉne
Kristianorãbara kʼawuapanʉ ãya bedʼea zroma erbʉta awuantapanʉbʉrʉ nebiata ũdudaita, maʉ̃ra ãyara biʼia akʉpanʉ Jesúsba jarasi naʉ̃ta maʉ̃ nebia ʉ̃rʉ: «Sobiapanʉ nebia obʉ kʼarea pẽwãpanʉra, Daizeze Nokʼora ãyide baera». (Mat 5:10. TNM) Dayirãba audre kʼawuapanʉbʉrʉ ẽbẽrarã jẽda piradrʉi ʉ̃rʉ akʉza Jeowata audre ũdukʼawuadara naʉ̃ba kʼarebayi dayirã bebʉ bebʉde bʉmina Jeoware kʼẽrẽpa panaita. Adewara dayirãba audre kʼawuadara Jeowaba dayirã ẽdrʉbiya yi warra diada ʉ̃rʉ, naʉ̃ba kʼarebayi dayirã zʉbʉria jirpanʉmina maʉ̃ kʼarea pera ẽ baita. (Heb 2:14, 15.) Kristianora krĩchade kʼãrẽ edabʉba kʼarebabʉ ãya bedʼea zroma erpanʉmina, ãyi pẽwãpanʉmina Jeoware kʼẽrẽpa bʼaita. Pabloba naʉ̃ta jarasi: «Kristo Jesuba krĩchabada kĩrãkʼa krĩchaidua [. . .] ũrĩbasi iyi beisidu, mawũã iyi zʉbʉria beisidu bakurude». (Flp. 2:5-8.) «Jesubara awuantasi iyira beibasimina bakurude, iya kʼawuabasi baera mawũã zʉbʉriada tẽã jʉ̃nea sobia bʼaibasita». (Heb 12:2; adewara akʉra 2Cor 12:10; 2Te 1:4; 1Pe 2:21-23.)
w09 15/12 18 parr. 12, 13
Bedʼea zroma ũdupanʉmina sobiapanadru
12 Daizeze Bedʼeaba naʉ̃ta jarabʉ: «Bʉta sopʉabʉbʉrʉ bedʼea zromabʉde, zareata waekʉayi» (Pro. 24:10). Adewara Daizeze Bedʼeade jarabʉ dayi sopʉabʉdera dayi sobiara taʉdogota (Pro. 15:13). Ʉ̃kʉrʉ mebẽrãbara ãyi sopʉabʉrʉdera Daizeze Bedʼea akʉbadara akʉza maʉ̃ ʉ̃rʉ krĩchabadara idubʉpanʉ. Adewara naʉ̃ra mebẽrãra ãyi nãã yiwidʼibada kĩrãkʼa yiwidʼida ẽ. Akʉza sopʉabʉ baera mebẽrãneba jĩga wãpanʉ mamina yibia ẽ dayirã sopʉabʉde ewari biobayeda mawũãbaira, naʉ̃bara Jeowadeba jĩga wãbiseabʉ baera (Pro. 18:1, 14).
13 Dayirãbara bedʼea zroma erbʉmina ewari jõmaʉ̃nẽ krĩcha biata erbaibara naʉ̃ba kʼarebabʉ kʼawuaita kʼãrẽta oseabʉta audre sobia bʼaita. Davidba bʉsi: «Daizeze bʉa kãgabʉ oira mʉ̃itara arigʉ yibia» (Sal. 40:8). Maʉ̃ba Daizeze Jeowaba jaradiabʉ dayirãba iyi bedʼea ʉ̃rʉ nrʉemaza kʼawuabʉrʉdera mawũãtrʉ sobiabaseabʉ (Sal. 1:1, 2; Sant. 1:25). Adewara dayirãbara ãba yi jʉrebʉma wãbʉrʉdera akʉza Daizeze Bedʼea lebʉrʉdera bedʼea biata kʼawuasebʉ dayirãʼa so zarea diabʉta akʉza sobiabibʉta (Pro. 12:25; 16:24). Maʉ̃ba dayirã ʉ̃rʉ bedʼea zroma zebʉrʉdera Daizezedebema amaeita krĩcha ẽ baibara. Maʉ̃bʉrʉ kʼarebaseabʉ sobia panaita bedʼea zroma erbʉmina.
w20.12 15
Lepanʉraba widipanʉta
Proverbios 24:16de jarabʉ: «Ẽbẽra biara siete bese baebʉmina akʉza jẽda piradrʉseabʉ». ¿Naʉ̃bara jarakĩrãbʉka ẽbẽra abaʉba nemitia oda ʉ̃rʉ obʉmina tẽã Daizezeba kĩrãduaita iyi nemitiara?
Naʉ̃ta jarakĩrãbʉ ẽ, awuarabʉrʉ naʉ̃ bersikulodera jara ũrĩbibʉ jari ẽbẽra baeda ʉ̃rʉ baebʉta mamina iya bedʼea zroma ũdubʉ kʼarea krĩcha obʉ baera. Akʉza jarabʉ jẽda piradrʉbʉta, maʉ̃ba jarakĩrãbʉ bedʼea zroma erbʉmina zarea erbʉta maʉ̃ bedʼea zroma awuantaita.
Mawũẽra dayirãbara kʼawuapanʉ Proverbios 24:16dera jarakĩrãkʉ ẽãta nemitia obʉ kʼarea baebʉta, awuarabʉrʉ jarakĩrãbʉta bedʼea zroma ũduda ʉ̃rʉ ũdubʉ kʼarea baebʉta. Wãrĩnubaira ẽbẽra biabara bedʼea zroma mejãcha ũdubʉ naʉ̃ drʉa kʼãwũã mitiabʉdera. Bari jaradaita ũdubʉ bedʼea zroma iyi kayabʉ kʼarea mawuã ẽ bʉrʉ pẽwãpanʉ kʼarea nokʼoraba. Mamina ẽbẽra biabara kʼawuabʉ iyira Jeowaba kʼarebaita, Jeowaba ũdubita sãwũã ẽdrʉita maʉ̃ bedʼea zromaneba akʉza zarea diaita maʉ̃ awuantaita. Ẽbẽrarã Daizeze ode bʉbara nekʼãrẽ obʉra jõma bia obʉ, ¿kʼãrẽa mawũã obʉ? Daizeze Bedʼeaba jara ũrĩbibʉ kʼãrẽa, jarabʉ: «Jeowabara jidabʉ jõma yi baebodobʉra akʉza piradrʉbibʉ jõma yi mejãcha krĩcha zroma obʉra» (Sal. 41:1-3; 145:14-19).
Jʉrʉda nekʼãrẽ biʼiabʉta Daizezedebemata
w09 15/10 12 parr. 5-7
Lepanʉraba widipanʉta
Nawedara yumakẽrã abaʉta kima barakĩrãbasibʉrʉ akʉza wũãwũã barakĩrãbasibʉrʉ iyara biʼia krĩchaibarabasi yi mebẽrãba nesidabʉta diaseabʉ kʼawuaita akʉza bia akʉseabʉ kʼawuaita ãyita. Akʉza iyi neusida erbaibarabasi.
Daizeze Bedʼeade jarabʉ yumakẽrã juwa jidabʉbara yi mebẽrãba nesidabʉra jõma diaibarata akʉza kʼarebaibarata yi mebẽrãnebemarãra audre Jeowa kʼawa panamarẽã. Adewara kʼarebaibara ãyi aduʼa panamarẽã. Ãya naʉ̃ta oẽ bʉrʉ Daizeze Bedʼeaba jarabʉ ãyira audre ẽbẽra kayiruata yi Daizeze ʉ̃rʉ ĩjã ẽ bʉira (1 Tim. 5:8). Mawũẽra yumakẽrã juwa jidakĩrãbʉbara Jeowaba iyaʼa kʼãrẽ omarẽã jarabʉta oya awabaibara, iyi kayaenara trajaibara akʉza diaibara yi mebẽrãba kʼãrẽ jõma nesidabʉta. Iyikʉza widiseabʉ naʉ̃ta: ¿Mʉ̃ta kimabarara mawũã ẽ bʉrʉ wũãwũãbarara diaseabaika ãya jõma nesidabʉra? ¿Mʉ̃ mebẽrã barabʉrʉdera mʉ̃ara kʼarebaseabʉka ãyira audre Jeowa kʼawa panamarẽã? ¿Jeowa ʉ̃rʉ ãbaʉba kʼawuabʉrʉdera biʼia jaradiaseabʉka? Daizeze Bedʼeade jarabʉ yumakẽrã juwa jidabʉba naʉ̃ oira jipade yibiata (Deu. 6:6-8; Efes. 6:4).
Naʉ̃ jõmaʉ̃ba ũdubibʉ yumakẽrã juwa jidabʉbara biʼia krĩchaibarata Proverbios 24:27de bedʼea bia jaradiabʉ ʉ̃rʉ. Mamina yuwẽrãbida iyikʉza krĩchaibara kima barabʉrʉde jõma oseabʉ kʼawuaita yi kimaba nesidabʉ diaita akʉza papa bia baseabʉ kʼawuaita. Adewara ẽbẽrarã juwa jidapanʉrabida wũãwũã baraita krĩchapanʉbʉrʉ ãyikʉza krĩchaibara ãyi wũãwũãba nesidabʉ jõma diaseabʉ kʼawuaita (Luc. 14:28). Jipade yibia Daizezeba naʉ̃ ʉ̃rʉ ũrãgʼa diabʉta ũrĩta, kʼarebabʉ baera bedʼea zroma mejãcha ũdu ẽ baita akʉza bʉ mebẽrãbawara sobia bʼaita.
4-10 AGOSTOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 25
Bʉ ũragʼa biata dayi sãwũã bedʼeaita
w15 15/12 19 parr. 6, 7
Kĩrãmera biʼia zokʼadaibara
6 Proverbios 25:11de jara ũrĩbibʉ kʼãrẽãba yibiata dayirãba kʼawuabaita sõbede bedʼeaita. Nama jarabʉ: «Manzana oro omata epedeko plata oma ʉ̃rʉbʉ kĩrãkʼa, abarikabʉ bedʼea kĩrãwãreã nesidade jarabʉrʉde». Manzana oro omara biʼiakiru akʉza mejãcha balebʉ maʉ̃ra, mamina maʉ̃ mazana oro omata epedeko plata oma ʉ̃rʉ bʉbʉrʉ audre bia kirayi akʉza audre balebayi. Naʉ̃ kĩrãkʼa dayirãba kʼãrẽ jarabʉdeba ẽbẽra aba kʼarebakĩrãpanʉbʉrʉ bari bedʼea bia awa jara ẽ baibara krĩchaibara sõbede audre bigata jaraita maʉ̃ bedʼeata.
7 Krĩchadaya naʉ̃ta, marzode poaga 2011de drʉa ʉreta zesi akʉza tsunamita Japónʼne, maʉ̃ba ẽbẽrarã 15 mil beasi. Maʉ̃ drʉade panasi mebẽrã Jeowa ode panʉrata ãyira maʉ̃ba mejãcha zʉbʉriasida akʉza ẽbẽrarã ãyi de kʼawa panʉrasida. Mebẽrãba jʉrʉsida Daizeze Bedʼeadeba sãwũã kʼarebaita naʉ̃ra ẽbẽrarã ãyi mebẽrã beida kʼarea zʉbʉriapanʉrata. Mamina mamabema ẽbẽrarã mejãchaʉba ĩjãpanasi religion budista ʉ̃rʉ akʉza mejãchaʉba wiña kʼawuapanasi Daizeze Bedʼea ʉ̃rʉ, maʉ̃ba mebẽrãba kʼawuasida biga ẽ basita tsunami tẽã jẽda piradrʉi ʉ̃rʉ jara ũrĩbita maʉ̃ra ẽbẽrarã. Maʉ̃ba maʉ̃ ʉ̃rʉ bedʼeai kaude krĩchasida ãya jarabʉdeba sãwũã so zarea diaita maʉ̃ra ẽbẽrarã akʉza jara ũrĩbisida Daizeze Bedʼeadeba kʼãrẽa ẽbẽra biarãra kʼawua zʉbʉriade berabaripanʉta. Naʉ̃ba ũdubibʉ dayirãba kʼãrẽ jarai nããra jipade yibiata biʼia krĩchaita sõbede jaraita maʉ̃ta. Dayirãta biʼia krĩcha ẽ bedʼeadogobʉrʉ kʼarebada ẽ bayi ẽbẽrarã dayirã kʼareba nesidabʉra (akʉra Proverbios 15:23).
w15 15/12 21 parr. 15, 16
Kĩrãmera biʼia zokʼadaibara
15 Biga dayirãba biʼia krĩcha kʼãrãpe bedʼea jaraira, mamina audre yibia dayirãba sãwũã jaraita maʉ̃ bedʼea wuabemara. Jesúsba Nazaretʼde sinagogade jaradiabasidera ẽbẽrarãbara kĩrãmiga akʉbasi iyira iyi sãwũã bedʼeabada kʼarea. Maʉ̃ba ẽbẽrarã soidu jʉ̃ẽsi akʉza ũrĩkĩrãne ũrĩsida iyi bedʼeara (Luc. 4:22). Adewara Jesúsba ũduside ẽbẽrarã mejãcha zarea obʉta iyi bedʼea ũrĩta maʉ̃ kʼarea iya so borekea akʉ kʼãrãpe nemejãcha jaradiasi naʉ̃ra ẽbẽrarã (Mar. 6:34). Akʉza Jesús nejʉraraba iyi ʉ̃rʉ imitia bedʼeasidadera Jesúsbara kĩrʉpanʉ ẽ basi ãyi bedʼeara (1 Ped. 2:23 ). Dayirãbida abarika Jesúsde kĩrãkʼa oseapanʉ, ¿sãwũã? Bedʼeabʉrʉde ibiade bedʼeadaibara mawũã odara ẽbẽra soidu jʉ̃ẽñi (Prov. 25:15). Adewara krĩchadaibara ẽbẽrarã sãwũã sentibita daya jarabʉdeba akʉza dayirã ʉ̃rʉ imitia bedʼeabʉrʉdera kĩrʉpanʉ ẽ baibara.
16 Dayirã mebẽrãʉ̃me ibiade bedʼeaita akʉza dayi bedʼeabʉdeba ãyi sopʉabi ẽ baira biode zareabʉ, ¿kʼãrẽa? Dayirãba krĩchaseabʉ dayirã mebẽrã baera daya kãgata jaraseabʉta akʉza ãya kʼãrẽ jara ẽ baita. Mamina Jesúsba dayirã yiza biata amaesi. Bari jaraita Jesúsʼra iyi kʼaidubemarabawara ãbabasi, neũdukʼawua biabasi, mawũãsidu ãyaʼa imitia bedʼea ẽ basi ãya nekʼãrẽ aña obʉrʉdera. ¿Sãwũã kʼawuapanʉ maʉ̃ta? Iyi kʼaidubemara yõbaside kʼaita yi ʉ̃ta bʼaita maʉ̃nera Jesúsbara ibiade jaradiasi akʉza wũãwũã zakedeba jaradiasi sãwũã eda krĩchabaibarata (Mar. 9:33-37). Zõrãrãbara Jesúsde kĩrãkʼa oseabʉ wuabemara ũrãgʼa diabʉrʉdera ibiade jaradiaseabʉ (Gál. 6:1).
w95 1/4 17 parr. 8
Sãwũã dayirãi yi kãgapanʉta ũdubidai akʉza Daizezedeta jaradiakĩrãne jaradiadai
8 Dayirãi yi kʼarebaseapanʉ daya obʉdeba Daizeze Bedʼea jaradiakĩrãne jaradiabaita. Bari jaraita, Jesúsbara kãgabasi Daizeze Bedʼea jaradiaira maʉ̃ kʼarea wuabemara ẽbẽrarãbida iyide kĩrãkʼa abarika odamarẽã kãgabasi. Adewara iyitara audre yibia basi Daizeze Bedʼea jaradiabaira, maʉ̃ kʼarea iya jarasi Daizeze Bedʼea jaradiaira yiko kĩrãkʼa bʉta iyita. (Juan 4:34; Romanos 11:13.) Mawũã Daizeze Bedʼea jaradiakĩrãbaira yibia wuabemaraita, kõbe ¿bʉra sãwũã akʉpanʉ wuabemerabara? Daizeze Bedʼea jaradiakĩrãta, ¿akʉpanʉka? Mebẽrãʉ̃me Daizeze Bedʼea jaradia wãbʉrʉdera jara ũrĩbira bʉ sãwũã bia wãta Daizeze Bedʼea jaradiabʉde, mamina jʉra kʼawuabara ũdubi ẽ baita bʉabʉrʉ jõma bia owãta akʉza wuabemara Daizeze Bedʼea jaradia wãita trʉ̃bʉrʉde krĩchara sãwũã kʼarebaita ãya Daizeze Jeowa ʉ̃rʉ jaradiabʉta sobiade odamarẽã (Proverbios 25:25).
Jʉrʉda nekʼãrẽ biʼiabʉta Daizezedebemata
it-1 149
Mesera kĩrʉ ẽãta
Ẽbẽra mesera kĩrʉ ẽãbara ũdubibʉ ĩjãbʉta Daizeze ʉ̃rʉ adewara badu bedʼea zroma kʼarea, kʼãrẽ oita kʼawua ẽ toto ẽ maʉ̃ʼa yi edebi ẽ, kõbe ẽbẽra mesera kĩrʉbʉbara ũdubibʉ ĩjã ẽãta Daizeze ʉ̃rʉ akʉza badu bedʼea zroma kʼarea kʼawua ẽ bʉ kʼãrẽ oita maʉ̃ʼa yi edebibʉ. Maʉ̃ kʼarea Daizeze Bedʼeaba Proverbios 25:28de mawũã bʉ ẽbẽra ʉ̃rʉ jarabʉ: «Pʉwʉrʉ ãrĩnapeada muraya neẽbʉ kĩrãkʼa, mawũãbʉ yumakẽrã iyi kĩrʉbia yi edebibʉra». Ẽbẽra mawũã bʉra badu krĩcha mitia zebʉa yi edebiseabʉ mawũã nemitia oseabʉ.
11-17 AGOSTOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 26
Jĩgapanadrʉ ẽbẽra bia krĩchabʉ ẽãnebara
it-2 249 parr. 1
Kue
Bʉ kueidata akʉza poagata. Pʉwʉrʉ Israeldera ũdupanʉ kueidata akʉza poagata maʉ̃ra iyi zei ewaride aripe zebʉ. (Naʉ̃ testoʉ̃me akʉra Sl. 32:4; Can 2:11, nota.) Maʉ̃ pʉwʉrʉdera abril ẽzadraʉba octubre ẽzadrabayeda mejãcha kue ze ẽ. Maʉ̃ba maʉ̃ ewaridebʉrʉ neupanʉ, maʉ̃ kʼarea. Proverbios 26:1ba jarabʉ: «Niebeta poagaʉ̃me ãba babe ẽ kĩrãkʼa mia kueta ne ubada ewuaride ze ẽ kĩrãkʼa, maʉ̃ kirãkʼa ẽbẽra bia krĩcha ẽãra wawia ũdubi ẽ baibara». (Naʉ̃ testoʉ̃me akʉra 1Sa 12:17-19) Kue idadera mejãcha kʉrãza akʉza mejãcha kue zebʉ baera ẽbẽrarãra ãĩ bʉ ẽ. (Esd 10:9, 13.) Maʉ̃ kʼarea biode nesidapanʉ deta sama mĩrʉita. (Isa. 4:6; 25:4; 32:2; Job 24:8.)
w87 1/10 19 parr. 12
Ẽbẽra ũrãgʼa ũrĩbʉra bia wã
12 Ʉ̃kʉrʉ ẽbẽrarã bia krĩchabʉ ẽãra nesidabʉ audre bia kẽãnamarẽã maʉ̃ kʼarea Daizeze Bedʼeabara jarabʉ kabayobara nesidabʉta rejuta akʉza burrubara nesidabʉta prenota adewara yi ẽbẽra bia krĩchabʉ ẽãra bakuruba ẽkarrama deguebibarata. (Proverbios 26:3.) Edaude Jeowabara israelitarãra idu zʉbʉriabibasi ãya nemitiata opanasi baera akʉza ũrĩ ẽ basi Jeowaba zokʼabʉta akʉza iya wawia ũdubi ẽ basi, mamina ãyi Jeowa zʉbʉria bedʼeabʉrʉdera, Jeowabara ãyira kʼarebabasi akʉza ẽdrʉbibasi. (Salmo 107:11-13.) Maminabʉ ẽbẽra ũkʉrʉ bia krĩchabʉ ẽãbara ũrĩ ẽãta iya kẽãna ʉ̃rʉ badua kẽãpanʉ bedʼeara maʉ̃ba iyara jipa ũrĩ ẽ adewara bia wã ẽ. (Proverbios 29:1.)
it-1 502 parr. 4
Nʉ̃kadru wãbʉ
Ũrãgʼa biata. Nokʼo Salomónbara jarasi, bʉa jʉrʉbʉbʉrʉ ẽbẽra bia krĩchabʉ ẽãta bʉme trajamarẽã bʉyikʉza jĩrʉ tʉbʉ kĩrãkʼabʉta, ¿kʼãrẽa? Maʉ̃ ẽbẽraʉ̃me trajara, bʉa oita krĩchabʉra maʉ̃bara bia oẽ baera maʉ̃ba bʉa kʼãrẽ oita bʉra bia wã ẽ bayi. (Pr 26:6.)
Jʉrʉda nekʼãrẽ biʼiabʉta Daizezedebemata
it-2 1143 parr. 4
Ẽbẽra bia krĩchabʉ ẽãta
Proverbios 26:4, 5de jarabʉ, ẽbẽra bia krĩchabʉ ẽ bedʼeata daucha panʉrãra. Naʉ̃ bedʼeabara jarakĩrãbʉ ẽbẽra bia krĩchabʉ ẽãba jarabʉta bʉabida jẽda iyabaʉ bedʼeaba panʉita iyide kĩrãkʼa, naʉ̃ba jarakĩrãbʉ naʉ̃ ẽbẽraba jarakʉ kĩrãkʼa iyaba panʉra iyi kĩrãkʼa krĩchanʉmʉta. Kõbe yi wĩkakiru 5de jarabʉ ẽbẽra bia krĩchabʉ ẽ bedʼeata daucha panʉra, naʉ̃bara jarakĩrãbʉ ẽbẽra mawũãbʉ bedʼeata kĩrãkita ũrĩbarata mawũã tẽã ũdubita iya jarabʉra aripe jaranʉmʉ ẽãta.
18-24 AGOSTOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 27
Sãwũã kʼarebabʉ neũdukʼawuaʼara erbaibara
w19.09 5 parr. 12
Jeowabara kãga iyi ode panʉra eda krĩchabʉta ũdubipanʉra
12 Ẽbẽra eda krĩchabʉbara iyaʼa ũrãgʼa diabʉdadera biga diabʉ. Krĩchaidua naʉ̃ yizata, krĩchara bʉ ãba yi jʉrebaridebʉde, mebẽã abaʉba bʉta jãpe trʉ̃ ẽda kʼãrãpe bʉa jarabʉta bʉ kidade yikota abʉta. Mawũã jarabʉrʉdera bʉra perayi mamina iyaʼa biga diayi maʉ̃ta jarasi baera. Maʉ̃ kĩrãkʼa mebẽã abaʉba dayirã ũrãgʼa diabʉdadera ũrĩbara iyi bedʼeara daya ũrãgʼa nesidabʉde diasi baera adewara akʉda ẽ baibara dayirã nejʉra kĩrãkʼa awuarabʉrʉ akʉibara dayi neũdukʼawuara kĩrãkʼa maʉ̃bara wãrĩnu kãgabʉ baera (akʉra Proverbios 27:5, 6; Gal. 4:16).
it-2 1185 parr. 6
Dayi de kʼawabʉta, dayi neũdukʼawuarata
Proverbios librode ũrãgʼa biata jarabʉ, jarabʉ dayi neũdukʼawuaʉ̃me kʼẽrẽpa bʼaibarata akʉza ĩjãibarata iyi ʉ̃rʉ adewara kʼareba nesidabʉdera kʼarebaibarata akʉza jarabʉ dayi neũdukʼawuara idubʉibarata adewara dayi Zeze neũdukʼawuasida, audre bigata ẽbẽra dayi de kʼawabʉta dayi mebẽãra jĩgabʉira (Pr 27:10). Naʉ̃ba jarakĩrãbʉ dayirã mebẽrã neũdukʼawuara audre kãgaibarata akʉza dayirãba kʼareba nesidabʉdera iyita jʉrʉseabʉta dayirã mebẽãʼaraira, dayirã mebẽãʼarara edaude jĩgabʉ baera kʼareba bẽẽ mamina dayi neũkʼawuarabara mesera kʼarebaseabʉ arakaita bʉ baera.
Warrara, ¿sãwũã bakĩrãpanʉ marara?
7 Jehoás yizadeba dayirãba kʼawuapanʉ jʉrʉibarata neũdukʼawua biarata, neũdukʼawuara Jeowa kãgapanʉrãta akʉza sobiabikĩrãpanʉrata. Dayirãba neũdukʼawua jʉrʉbʉrʉdera bari jʉrʉ ẽ baibara ẽbẽrarã dayirã dauchabemata. Kĩrãbeidua Jehoásʼra audre warrarabasi iyi neũdukʼawua Jehoiadáira. Bʉa neũdukʼawua jʉrʉbʉrʉde naʉ̃ta widira: «¿Kʼarebapanʉka mʉ̃a Jeowata audre ĩjãmarẽã? ¿Kʼarebapanʉka Jeowaba kãgabʉde bʼaita? ¿Jeowaba kʼãrẽ nebia erbʉ ʉ̃rʉ bedʼeapanʉka? ¿Daizezeba kʼãrẽ zokʼabʉa wawia ũdubipanʉka? ¿Mʉ̃a ũrĩkĩrãbʉtrʉ jara ũrĩbipanʉka, mawũã ẽ bʉrʉ mʉ̃a nei aña obʉrʉdera ũrãgʼa diapanʉka?» (Prov. 27:5, 6, 17). Bʉ neũdukʼawuaraba Jeowata kãga ẽ bʉrʉ bʉa maʉ̃rãra nesida ẽ, mamina ãya Jeowata kãgapanʉbʉrʉ ãyi kʼawa bara. Naʉ̃ra jipade yibiabayi bʉitara (Prov. 13:20).
Jʉrʉda nekʼãrẽ biʼiabʉta Daizezedebemata
w06 15/9 19 parr. 12
Bedʼea audre yibiata Proverbios librodebemata
27:21. Ibia bedʼeabʉbara ũdubibʉ dayi sãwũãbʉta. Dayi ʉ̃rʉ ibia bedʼeabʉdade krĩchabʉbʉrʉ Jeowa kʼarebadeba nekʼãrẽ bia obʉta naʉ̃ba kʼarebayi audre okĩrãita Jeowaba zokʼabʉta mawũã ũdubiyi eda krĩchabʉta mamina krĩchabʉbʉrʉ dayabʉrʉ jõma kʼawuabʉta wuabemaraira mawũãra ũdubiyi eda krĩchabʉ ẽãta.
25-31 AGOSTOBAYEDA
BEDʼEA BIA DAIZEZE BEDʼEADE ŨDUDATA PROVERBIOS 28
¿Kʼãrẽne awuarabʉ ẽbẽra aripe obʉta ẽbẽra kayiruaʉ̃me?
w93 15/5 26 parr. 2
¿Jeowaba zokʼabʉta jõma obʉka?
«LEON kĩrãkʼapanʉ yi aripe opanʉrãra». (Proverbios 28:1.) Naʉ̃ba jara kĩrãbʉ Daizeze Bedʼeaba jarabʉde panʉta maʉ̃ ʉ̃rʉ ĩjãpanʉ baera. Daizeze ʉ̃rʉ ĩjãpanʉ adewara ãyi bebʉde berabaribʉrʉdera zarea opanʉ kʼẽrẽpa bʼaita Jeowa ode.
it-1 820 parr. 3
Bia krĩchaita
Daizezedeba jĩga wãbʉta. Ẽbẽrã nebia obadaba nemitiata oita krĩchabʉrʉdera iya maʉ̃ra ũdubibʉ iya nekʼãrẽ oita jidabʉrʉde Jeowa kʼarebata jʉrʉ ẽãne. (Job 34:27.) Adewara naʉ̃ ẽbẽrabara bia krĩcha ẽ iya kʼãrẽta oita bʉra awuarabʉrʉ iyi soba jarabʉa yi edebibʉ. (Sl 36:1-4.) Akʉza iya Daizeze ode bʉ abʉmina nekʼãrẽ naʉ̃ drʉadebemaba omarẽã jarabʉta nããra bʉebʉ Daizezeta nããra bʉei kaude. (Isa 29:13, 14.) Adewara iyimara Daizezera kʼãrẽ ẽ kĩrãkʼabʉ. (Pr 10:23.) Naʉ̃ ẽbẽrabara jipa yi kayiruata ozebʉ akʉza jĩpa krĩcha bia neẽ iyira, maʉ̃ba krĩcha zebʉ iya kayirua onʉmʉra Daizezebara ũdu ẽãta. (Sl 94:4-10; Isa 29:15, 16; Jer 10:21.) Adewara Daizeze Bedʼeaba jarabʉ naʉ̃ ẽbẽrabara iya kʼãrẽ obʉdeba ũdubibʉta iyimara Daizezera neẽãta. (Sl 14:1-3.) Adewara naʉ̃ ẽbẽraba nekʼãrẽ Daizeze Bedʼeadebemata iyi krĩchade erbʉ ẽ baera nekʼãrẽ jidaibaradera bia krĩcha ze ẽ saʉ̃ta wãrĩnu yibiata iyita akʉza saʉ̃ta seri ẽãta, awuarabʉrʉ badua jidabʉ (Pr 28:5.)
it-1 1244 parr. 4
Kʼẽrẽpa bara
Dayi Jeowa ode kʼẽrẽpa bʼaira, dobaʉba obe ẽ. Ĩjãibara Jeowa ʉ̃rʉ akʉza iya wãrĩnu kʼarebaita. (Sl. 25:21.) Jeowaba jarabʉ iyira jõʉ̃drʉbari kĩrãkʼa bʉta akʉza torre kĩrãkʼa. ¿Sãwũã obʉ maʉ̃ra? Iyara akʉbʉ iyi ode panʉrãra, kʼarebabʉ kʼẽrẽpa panamarẽã iyi ode. (Pr 2:6-8; 10:29; Sl 41:12.) Ẽbẽra mawũã bʉbara audrera jʉrʉbʉ Jeowaba iyita bia akʉmarẽã. Maʉ̃ba kʼarebabʉ iyi kʼẽrẽpabʉta idubʉ ẽ baita. (Sl 26:1-3; Pr 11:5; 28:18.) Wãrĩnubaira Jobʼba jarada kĩrãkʼa naʉ̃ drʉara Diaruba zokʼabʉ baera Jeowa ode kʼẽrẽpapanʉrãra zʉbʉriapanʉ akʉza beipanʉ, mamina Jeowaba jarabʉ iyara naʉ̃ra ẽbẽrarãra kĩrãdua ẽãta. Maʉ̃ba ẽjũã kĩrãwarẽã zebʉrʉde nebiata mejãcha diayi ãyaʼa. (Job 9:20-22; Sl 37:18, 19, 37; 84:11; Pr 28:10.) Job yizadeba kʼawuapanʉ audre yibiata Jeoware kʼẽrẽpa bʼaita plata mejãcha erbaira wãrĩnubaira yi plata mejãcha erbuara wawia ũdubida ẽ baera akʉza bia akuda ẽ baera. (Pr 19:1; 28:6.) Wũãwũãraba zeze mawũã kʼẽrẽpabʉta erpanʉbʉrʉ naʉ̃ra wũãwũãrãra sobiapanʉ (Pr 20:7), Yi zezeba mawũã yiza biata diabʉ baera wuabemabida ãyaʼa abarika wawiata ũdubidayi.
Jʉrʉda nekʼãrẽ biʼiabʉta Daizezedebemata
w01 1/12 11 parr. 2
Sãwũã dayikʉza bia akʉibara kʼẽrẽpa bʼaita
Mejãcha iyikʉza ĩjãita. Ẽbẽra mejãchaʉta soba beibʉra, beibʉ iyikʉza mejãcha biabʉta krĩchabʉ baera, maʉ̃ba krĩchabʉ medikoeda wãira nesida ẽãta. Abarika berabaribʉ kristiano Daizeze odebʉta dããrabata, krĩchabʉ iyira neida berabari ẽãta maʉ̃ kʼarea jʉrʉ ẽ sãwũã audre Daizeze de oita akʉza iyikʉza akʉ ẽ kʼãrẽne ara oibarata akʉza ara o ẽãta. Maʉ̃ kʼãrẽa bigabayi ũrĩta apostol Pabloba ũrãgʼa diadata dayikʉza ĩjãbai ʉ̃rʉ, iya naʉ̃ta jarasi: «Yi ẽbẽra kĩrãkita edaʉnʉmʉta krĩchabʉra, jʉra kʼawuabaibara bae ẽ baita» (1 Corintios 10:12). Mawũẽra dayirã jõmaʉ̃ta nemitia omia baera bigabayi dayikʉza akʉita kʼãrẽta sãwũã ara oibarata mawũã Daizeze ode kʼẽrẽpa bʼaita (Proverbios 28:14).