Reperensia Karta nekʼawuabari Bʼaita Kristianora kĩrãkʼa akʉza Trajaita Daizezeita
© 2025 Watch Tower Bible and Tract Society of Pennsylvania
1-7 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA PROVERBIOS 29
Bʉ drʉade Daizeze Bedʼeaba jarabʉ ẽãne opanʉa yi edebirãra akʉza ãya ĩjãbʉta ĩj̈ãrãra
w18.02 30 parr. 2
Sobia baita: Nebia Daizezedeba zebʉta
Dayirãta ewariza zarea opanʉbʉrʉ Jeowaba kãgabʉta oita mawũãra audre sobia panañi (Sal. 35:27; 112:1). ¿Kʼãrẽa mawũã jarapanʉ? Daizezebara dayirãra parãsi baera iyia kãgabʉta odamarẽã, Daizeze Bedʼeaba naʉ̃ta jarabʉ: «Wawiara Daizeze wãrĩnuarãra akʉza iya zokʼabʉta ora, ẽbẽra jõmaʉ̃ba maʉ̃ta opanaibara» (Ecl. 12:13). Maʉ̃ba dayirãba Jeowaba kãgabʉta opanʉbʉrʉ dayirãra sobiapanañi.
w19.04 17 parr. 13
Wãrĩnuta jara ũrĩbidadrʉ bei ʉ̃rʉ
13 Dayirãba bia kʼawuada ẽ bʉrʉ ẽbẽrarãba nekʼãrẽ obʉdebemata Jeowaba saʉ̃ta kãgata akʉza saʉ̃ta kãga ẽãta soiduba wididaibara Jeowa krĩchabiata diamarẽã (akʉra Santiago 1:5). Maʉ̃are dayirã kartarane maʉ̃ ʉ̃rʉ bedʼeabʉta audre jʉrʉseabʉ adewara daya nesidabʉrʉ kʼarebata widiseabʉ zõrãrã kongregasionebemara, naʉ̃ra zõrãrãbara dayara jara ẽ bayi kʼãrẽta oibarata awuarabʉrʉ ãya Daizeze Bedʼeadeba jara ũrĩbidayi kʼãrẽta krĩchabʉta Jeowaba. Dayirãba naʉ̃ta opanʉbʉrʉ mawũãra kʼawuapanañi saʉ̃ta bigata akʉza saʉ̃ta zeri ẽãta (Heb. 5:14).
w18.11 11 parr. 12
«Mʉ̃ra bakĩrãbʉ bʉa jarabʉrʉde»
12 Nekʼãrẽ Daizeze Bedʼeaba omarẽã jarabʉ ẽãta. Edaude dayirã mebẽrãba, dayirãʉ̃me ãba estudiapanʉraba, mawũã ẽ bʉrʉ dayirãʉ̃me ãba trajapanʉraba jaraseapanʉ piestara Jeowaba kãga ẽãma wãnamarẽã, ¿maʉ̃nera dayirãbara kʼãrẽta oseapanʉ? Nããra dayirãbara biʼia kʼawuapanaibara kʼãrẽa kãga ẽãta Jeowaba maʉ̃ piestara adewara yibia jẽda akʉita dayirã kartaraba kʼãrẽta jarabʉta maʉ̃ piestara ʉ̃rʉ akʉza bʉara kʼawuabaibara Daizeze Bedʼeaba sama jarabʉta maʉ̃ piesta oira biga ẽãta kĩrãbei baera kʼãrẽa wã ẽãta bʉra mama, bʉa maʉ̃ta obʉbʉrʉ kʼawuabayi bʉara Jeowaba kãgata onʉmʉta (Efes. 5:10). Adewara bʉa ĩjãbʉbʉrʉ Jeowa ʉ̃rʉ akʉza iyi bedʼea ʉ̃rʉ mawũãra perã ẽ bayi wuabemaraba kʼãrẽ jarai kʼãrẽa (Prov. 29:25).
Jʉrʉda nekʼãrẽ biʼiabʉta Daizezedebemata
w17.10 9 parr. 11
Dayirãba obʉdeba ũdubidadrʉ wãrĩnu kãga ũdubipanʉta
11 Wãrĩnu soiduba ibia bedʼeadaibara mebẽrã ʉ̃rʉ. Dayirãbara ewari jõmaʉ̃nẽ jʉrʉdaibara mebẽrã sãwũã ibia bedʼeaita, ¿kʼãrẽa? Daizeze Bedʼeaba jarabʉ baera «wuabemara kʼarebai kʼarea bedʼea bia bedʼeaidua» (Efes. 4:29). Mamina jʉra kʼawuapanaibara dayirãba awurura bedʼeabʉrʉde bari ʉ̃rʉba jara ẽ baita adewara wuabemara ibia bedʼea ẽ baibara bari daya nesidabʉta diadamarẽã adewara dayirãba maʉ̃ ẽbẽrata wãrĩnu bia akʉbʉ ẽ bʉrʉ kʼãrẽa iya sewida jaraira neẽ (Prov. 29:5). Dayirãba ẽbẽra abaʉʼa iyi kĩrãbita ibia bedʼeara mamina tẽã wuabemara iyi ʉ̃rʉ imitia bedʼeara mawũãra daya iya jarabʉra bari ʉ̃rʉba jarabʉ kĩrãkʼa bayi. Apostol Pabloba yiza biata diasi sãwũã kãga wãrĩnuarata ũdubi ʉ̃rʉ. Ewari aba iya kristianora Corintodebemara bedʼea biata jarasi ãya nebiata opanʉ kʼarea (1 Cor. 11:2). Mamina ãya ũrãgʼa diaibaradera ũrãgʼasi akʉza jara ũrĩbisi ibiade akʉza ẽza jara ũrĩbisi ãya kʼãrẽta aña opanʉta (1 Cor. 11:20-22). Dayirãbida mebẽrã ũrãgata diaibarabʉrʉ ũrãgʼa diaseapanʉ abarika Pabloba obada kĩrãkʼa.
8-14 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA PROVERBIOS 30
Nekʼãrẽ neẽã babirãra mia nemejãcha erbabirãra
w18.01 24, 25 parr. 10-12
¿Kʼãrẽ kãgaiba wãrĩnu sobiabibʉ dayirãra?
10 Wãrĩnubaira dayirãnebema jõmaʉ̃ba nesida platara, plata erbʉba kʼarebaseabʉ baera daya nesidabʉ erbaita (Ecl. 7:12). Mamina, ¿daya nekʼãrẽ mejãcha erbʉ ẽ bʉrʉ sobia baseabʉka? Mawũã (akʉra Eclesiastés 5:12). Akʉdaya yiza aba, Daizeze Bedʼeaba jarabʉ Jaqué warra Agurba Daizezeʼa widisita iyira nekʼãrẽ neẽã babiẽ marẽã mia nemejãcha dia ẽ marẽã, ¿kʼãrẽa mawũã widisi iya? Iya jara ũrĩbisi kʼawuabasi baera iyita kʼãrẽ neẽ bidabʉrʉ nezrʉgaseabʉta akʉza maʉ̃ra Jeowabara kãga ẽãta adewara iya jara ũrĩbisi iya nekʼãrẽ biata mejãcha erbʉbʉrʉ mawũãra Daizeze Jeowata kĩrãduaseabʉta (Prov. 30:8, 9).
11 Ẽbẽrarã plata aukara kãgapanʉrabara Jeowara sobiabida ẽ bayi. Jesúsba jarasi: «Miõba zhãrã ũme aribʼae nʉma bʼe ẽã. Manebʉrʉ abʼa jurape abʼa kʉãgʼaya, o abʼa zhi zromane edape abʼa zhi zroma ẽãne edaya. Aramaʉ̃ kĩrãkʼa Daizezedʼebema aribʼae ẽã platadʼebemata aribʼae nʉmʉbara». Maʉ̃ nãã Jesúsba naʉ̃ta jarasibasi: «Ne biata tʉrãũdua naʉ̃ druadʼe, namarã zhi muĩba ãrĩbaria, ne uyezoa jõ bʼʉa, namarã nezrʉgamiãrãta edʼa wãpe zrʉgabada. Maʉ̃ba awuarabʉrʉ Daizezeba krĩñata obʉdaba ne biara ʉ̃tre tʉudua, maĩnurã zhi muĩba ãrĩ ẽã, miã ne uyezoa jõ ẽã, maĩnurã nezrʉgamiãrã edʼa wãpe zrʉgadʼa ẽã» (Mat. 6:19, 20, 24).
12 Mebẽrã mejãchaʉba jida zebʉrʉ plata aukara jʉrʉ ẽ baita naʉ̃ba ãyita mejãcha sobiabibʉ, mamina bari sobiabibʉ ẽ kʼarebabʉ ãya ewarita erpanamarẽã Jeowade oita. Mebẽã Jack, Estados Unidosdebemaba de zromata erbasi akʉza drʉata mamina iya yi nãã edebari bʼaita maʉ̃ jõma nedobʉesi iya naʉ̃ta jara ũrĩbibʉ: «Mʉ̃itara jipade zarebasi dai de biʼiakĩru nedobʉeira akʉza dai drʉasida mamina mʉ̃a ũdubasi mʉ̃ trajodeba deda zebʉrʉdera krĩcha ozebasita bedʼea zroma trajodebʉ kʼarea, maʉ̃ra mawũã berabaribasi poaga biobayeda, mamina mʉ̃a ũdubasi mʉ̃ kima, prekursorara deda zebʉrʉdera sobia zebasita, iya naʉ̃ta jarabasi: ‹Mʉ̃ zokʼabʉra jipade ẽbẽra bia›. Atiara mʉ̃ara mʉ̃ kimaʉ̃meba prekursoradota obʉ, atia dai ũmeba ãbaʉba opanʉ Jeowadeta».
w17.05 26 parr. 15-17
«¿Bʉa mʉrã audre kʉãgʼakʼa naʉ̃rãne kʼãñabara?»
15 Idi ewadera ẽbẽrarã mejãchaʉba nekʼãrẽ yiwidi ʉ̃tʉ zenʉmʉta erbakĩrãpanʉ akʉza selular yiwidita, telebisor yiwidita mawũã ẽ bʉrʉ nekʼãrẽ awuru yiwidita, dayirã kristianoraba kʼawuadara maʉ̃ra nekʼãrẽ biata audre kãgapanʉta nekʼãrẽ Daizezedebemaira naʉ̃ Daizeze Bedʼeaba jarabʉ ʉ̃rʉ krĩchadaibara: «Kʼaʉbaidua nebia mejãcha erbaideba». ¿Kʼãrẽa yibia maʉ̃neba jʉra kʼawuabaira?
16 Jesúsba naʉ̃ta jarasi: «Miõba zhãrã ũme aribʼae nʉma bʼe ẽã. Manebʉrʉ abʼa jurape abʼa kʉãgʼaya, o abʼa zhi zromane edape abʼa zhi zroma ẽãne edaya» adewara iya jarasi dayirãba Jeowade obʉ daucha nekʼãrẽ bia mejãcha erbaisi jʉrʉ be ẽãta (Mat. 6:24). Dayirãra nemitia omia baera jʉra kʼawuapanaibara dayi yaraba omarẽã kãgabʉta oẽ baita adewara jaraita nekʼãrẽ mejãcha jʉrʉita (Efes. 2:3).
17 Ẽbẽrarã mejãchaʉba kʼawuada ẽ Daizezeitara kʼãrẽta audre yibiata (akʉra 1 Corintios 2:14). Maʉ̃ba ãyitara jipade zare kʼawuaita saʉ̃ta audre bigata akʉza saʉ̃ta zeri ẽãta (Heb. 5.11-14). Maʉ̃ba ãyara jʉ̃zaba jʉrʉpanʉ nekʼãrẽ bia mejãcha erbaita (Ecl. 5:10). Mamina dayirãbara kʼawuapanʉ kʼãrẽta oseabʉta nekʼãrẽ mejãcha erbaya yi ede bi ẽ baita, Daizeze Bedʼeata ewariza akʉibara (1 ped. 2:2). Adewara Jesúsde kĩrãkʼa odaibara, iyara krĩchabasi Daizeze Bedʼeaba kʼãrẽ jarabʉ ʉ̃rʉ mawũã kayirua yi edebi ẽ baita, abarika dayirãba Daizeze Bedʼea ʉ̃rʉ krĩchapanʉbʉrʉ zarea odayi nekʼãrẽ mejãcha erba ẽ baita (Mat. 4:8-10). Dayirãba naʉ̃ta jõma odara ũdubidayi Jesúsʼa iyira nekʼãrẽ baduira audre kãgapanʉta.
w11 1/6 10 parr. 3
Bʉya ganabʉdeba sãwũã bia baseabʉ
Nãã platata wagara, tẽã ne edara. Naʉ̃ ũrãgʼara dããrabadeba jara zebʉda, mamina jipade yibia kʼarebabʉ baera dayirãba debe oẽ baita adewara kʼarebabʉ dayirãba nekʼãrẽta interesbara eda ẽ baita mawũã obʉrʉdera dayara plata mejãcha pagaibara baera, adewara Daizeze Bedʼeaba dayirã yiza biata diabʉ bisumaraneba, bisumarabara ũdubipanʉ ãyira buru biata, waidi kue zeẽ nãã yiko wagapanʉ baera maʉ̃ ewari zebʉrʉde erpanaita (Proverbs 6:6-8; 30:24, 25).
Jeowa de karpade panadrʉ ewari jõmaʉ̃nẽ
18 Jipade yibia dayikʉza krĩchaita plata sãwũã akʉbʉ ʉ̃rʉ, maʉ̃itara dayikʉza widiseabʉ: «¿Mʉ̃ara ewari jõmaʉ̃nẽ krĩchanʉmʉka plata ʉ̃rʉ akʉza kʼãrẽta edai ʉ̃rʉ? ¿Mʉ̃aʼa plata prestabʉdadera atia paga ẽ ka krĩchabʉ baera maʉ̃ ẽbẽrabara plata mejãcha erbʉta akʉza nesida ẽãta? ¿Mʉ̃a platata erbʉ baera krĩchabʉka mʉ̃ra wuabemaraira audre yi zromata? ¿Mʉ̃itara zareabʉka wuabemara nekʼãrẽ diakĩrãira? ¿Mebẽrãba platata mejãcha erbʉ kʼarea krĩchabʉka ãyara platata audre kãgata Jeowaira? ¿Mʉ̃ra yi plata erbʉrabawarabʉrʉ bakĩrãbʉka?». Dayirãta Jeowa de karpadeba ãĩ wãmabʉbʉrʉ jipade yibia bayi maʉ̃ ʉ̃rʉ krĩchaita. Mawũẽra dayirãta Jeowa de karpade ewari jõmaʉ̃nẽ bakĩrãpanʉbʉrʉ zarea odaibara platata aukʼara kãgada ẽ baita. Mawũã opanʉbʉrʉ Jeowaba dayirãra doba amae ẽ bayi (akʉra Hebreos 13:5).
Jʉrʉda nekʼãrẽ biʼiabʉta Daizezedebemata
w09 15/4 17 parr. 11-13
Nekʼãrẽ parãnaba ũdubibʉ Jeowara buru biata
11 Nedʉwʉrʉ zake damanʼra ewari jõmaʉ̃nẽ jʉra kʼawuabʉ awuru nedʉwʉrʉra iyi kokĩrãpanʉraba makoda ẽ marẽã, iyi jʉra kʼawua bʼaira zare ẽ iyara jĩga ũdubʉ baera akʉza iyira zobea kʼawabʉ, maʉ̃ba iyi koita topodera mama mĩrʉbʉ.
12 ¿Kʼãrẽta kʼawuapanʉ dayirãba iyideba? Dayirãbida naena kʼawuapanaibara kʼãrẽ kayiruata bʉta naʉ̃ drʉa Diaruba zokʼabʉde, mawũãtrʉ kʼawuadai baera kʼãrẽneba jʉra kʼawuabaibarata, apostol Pedrobida naʉ̃ta jarasi kristianora: «Bia krĩchaidua mõbe ʉrʉma beaidua. Mara nejʉra Diarura mara audu leon kĩrãkʼa wãbari mara abaʉdebema jidaita» (1 Ped. 5:8). Jesús nama egorode basidera jʉra kʼawuabasi Dairuba kayirua obikĩrãbʉa yi edebi ẽ baita, mawũã Jeoware kʼãrẽpa bʼaita (Mat. 4:1-11).
13 Dayirã mawũa jʉra kʼawua bʼaira Jeowa yi kʼarebabidaibara maʉ̃itara Daizeze Bedʼeata ewariza akʉdaibara akʉza ãba yi jʉrebarieda badua wãpanaibara (Luc 4:4; Heb. 10:24, 25). Dayirãra daman kĩrãkʼa panaibara, damanʼra mesera bei ẽ baita yi wuabemarabawara ãbabʉ, dayirãsida mebẽrãneba jĩga wãna ẽ baibara ãyi kʼawapanaibara mawũã yiya kʼarebadaita (Rom. 1:12).
15-21 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA PROVERBIOS 31
Papa abaʉba yi wũãwũã ũrãgʼa diadadeba kʼãrẽta kʼawuaseapanʉ
w11 1/2 19 parr. 7, 8
Mara wũãwũã jaradiaidua nebia ãyi kʼarebaseabʉta
Jõma jaraidua. Mara wũãwũã ũrãgʼa diabʉdadera jara ũrĩbidua mia erkʼãĩra Jeowaba diadata mawũã panamarẽã, maʉ̃ra kayirua ẽãta (Proverbios 5:18, 19; El Cantar de los Cantares 1:2). Mamina jara ũrĩbidua mia erkʼãĩbʉrʉde kʼãrẽ zʉbʉriata ũduseabʉta. Bari jaraita, kaya kayiruaba barita mawũã ẽ bʉrʉ ãyi warraraena biogoita, mamina kĩrãbedaibara mara wũãwũãra mia erkʼãĩ ʉ̃rʉ bari kʼãrẽba zʉbʉriaseabʉ ʉ̃rʉ jara ũrĩbibʉbʉrʉ naʉ̃bara ãya aña krĩchabiseabʉta mia erkʼãĩ ʉ̃rʉ, Daizeze Bedʼeaba mia erkʼãĩ ʉ̃rʉ kʼãrẽ jarabʉta krĩchada ẽ bayi ãya. Akʉdaya Corrinaba kʼãrẽta jarabʉta iyira Franciadebema, iya jarabʉ: «Mʉ̃ yibariraba mʉ̃a badua ũrãgʼapanasi Jeowaba kãga ẽãne mia erkʼãĩ ʉ̃rʉ maʉ̃ba mʉ̃ara krĩcha zesi mia erkʼãĩra kayiruata».
Mawũẽra mara wũãwũãra mia erkʼãĩ ʉ̃rʉ wãrĩnuta jaradiara. Nadia, papa Méxicodebemaba naʉ̃ta jarabʉ: «Mʉ̃a kãga zebʉrʉ mʉ̃ wũãwũãraba bia ũrĩnamarẽã mia erkʼãĩra bigata maʉ̃ra Daizezeba nebia diadata juwa jidapanʉita, mʉ̃a kãgabʉ ãya ũrĩnamarẽã mia erkʼãĩbʉbara dayi sobiabibʉta mawũã ẽ bʉrʉ zʉbʉriabibʉta ãya kʼawua jidabʉdeba maʉ̃ta ũduseabʉta».
ijwhf artikulo 4 parr. 11-13
¿Sãwũã bedʼeaita wũãwũãrabawara itua doi ʉ̃rʉ?
Bʉyareba bedʼeara naʉ̃ ʉ̃rʉ. Zeze abaʉba yi trʉ̃ Mark, Gran Bretañanebemaba kʼãwũã jarabʉ: «Warrarabara bia kʼawuada ẽ itua ʉ̃rʉra, ewari aba mʉ̃a mʉ̃ wũãwũã 8 poagabʉa widisi iyima bigabʉ kʼawuaita itua doita mawũã ẽ bʉrʉ biga ẽãta, maʉ̃ kʼawuaita mʉ̃a ewaraeda edesi mawũã iyiʉ̃me aduʼa bedʼeaita, maʉ̃ba kʼarebasi mʉ̃ wũãwũã mʉ̃me aduʼa bedʼeaita».
Naʉ̃ ʉ̃rʉ badua jarabaibara ãya biʼia ũrĩnamarẽã adewara wũãwũãrara poaga awuarabʉ baera jʉrʉibara kʼaiʼa jaradiaita itua doi ʉ̃rʉ, ode sãwũã wãi ʉ̃rʉ, Jeowaba mia erkʼãĩ ʉ̃rʉ sãwũã krĩchabʉ ʉ̃rʉ adewara wuabemara ãya kʼawuaibara ʉ̃rʉ.
Yiza biata diara. Warrarara esponja kĩrãkʼabʉ ãya akʉbʉdeba nekʼãrẽ mejãcha kʼawuabʉ. Mejãcha estudiabʉba jarabʉ warrarabara yibarirane kĩrãkʼa opanʉta, maʉ̃ba yibari abaʉba iyi mejãcha bedʼea zroma erbʉ kʼarea ituadobʉbʉrʉ warrarabara krĩchayi bedʼea zroma ara oira itua doibarata, naʉ̃ba jaradiabʉ ituadobʉrʉdera jʉra kʼawua doibarata mawũã wũãwũãra yiza bia diata.
g17.6 9 parr. 5
Kʼarebara bʉ wũãwũãrara eda krĩchabamarẽã
Jaradiara bʉ wũãwũara wuabemara nekʼãrẽ dia kʼawuamarẽã. Ũdubira bʉ wũãwũãra dayirã audre sobiabʉta daya wuabemara diabʉde dayaʼa nekʼãrẽ diapanʉira (Hechos 20:35). Bari jaraita, bʉ wũãwũãʉ̃meba kartade bʉra ẽbẽrarã kʼareba nesidapanʉra trʉ̃ta bari jaraita, ne eda wãita, edade jʉ̃ẽita, mawũã ẽ bʉrʉ nekʼãrẽ ara oita waepanʉta. Tẽã jʉ̃neane bʉ wũãwũãʉ̃meba akʉ wãra maʉ̃ra ẽbẽrarãta mawũã ũdubita bʉra kʼãrẽãba sobiabʉta maʉ̃ra kʼarebabʉde, mawũã bʉ yizadeba jaradiayi bʉ wũãwũãra eda krĩchabaira bigata (Texto bíblico clave: Lucas 6:38).
Jʉrʉda nekʼãrẽ biʼiabʉta Daizezedebemata
Mebẽrã wẽrãra: marabara krĩchaseapanʉ sãwũã audre kristiana bia bʼaita
12 Kĩrãkita ũrĩ kʼawuara akʉza ibiade bedʼea kʼawuara. Kristianoraitara jipade yibia maʉ̃ oira, Santiagoba naʉ̃ ũrãgʼata diasi: «Kĩrãkita ũrĩbara, kʼawua ẽã bedʼeabe ẽ» (Sant. 1:19). Bʉa kĩrãkita ũrĩbʉbʉrʉ wuabemaraba jarabʉta ũdubiyi wuabemara ʉ̃rʉ krĩchabʉta akʉza so zʉbʉria akʉbʉta (1 Ped. 3:8). Bʉa bia ũrĩ ẽ bʉrʉ wuabema sãwũã sentibʉta, biʼia krĩchara iyaʼa kʼãrẽta widita akʉza biʼia krĩchara bʉa kʼãrẽ jarai nãã (Prov. 15:28). Bʉyikʉza widira: «¿Wãrĩnuka mʉ̃a iyaʼa jaraira akʉza naʉ̃ba kʼarebaika iyira? ¿Mʉ̃a jarabʉbara wawiata ũdubibʉka akʉza ibiade jarabʉka?». Kʼawuara mebẽrã wẽrãra kĩrãkita ũrĩbʉdeba akʉza i biʼia bedʼeabʉraneba (akʉra Proverbios 31:26).
22-28 SEPTIEMBREBAYEDA
BEDʼEA BIA DAIZEZE BEDʼEADE ŨDUDATA ECLESIASTÉS 1, 2
Yi audre warrarapanʉra jaradiadaibara
Bia akʉdadrʉ warrara zareara
15 Pablobida ũdubisi iya diakĩrãta iya nekʼãrẽ erbʉra. Jarasi Timoteoʼa iyita kopayamarẽã jĩgara jaradia wãita, mõbe jaradiasi sãwũã Daizeze Bedʼea jaradiaibarata (Hech. 16:1-3). Mawũẽ iyara Daizeze Bedʼeara biʼia jaradia kʼawuasi Pablodeba (1 Cor. 4:17). Timoteobara wuabemara nejaradiasi Pabloba iyaʼa jaradiabadadeba.
16 Idira mebẽrã zõnapanʉrãra Pablo kĩrãkʼa perada ẽ mebẽrã warrara jaradiaita, odamarẽã ãya nããra obadata kongregasione. Bari jaraita mebẽã Shigeobara, parrapo 9de jarabʉba, iya mejãcha jaradia zebʉrʉ Mebẽrã Betel akʉbaridebema audre warraraʼa. Iya maʉ̃ta osi Daizeze Nokʼodebemata audre oi kʼarea iyibʉ pʉwʉrʉde. Maʉ̃ kʼarea iya yi nãã edebari mebẽrã Betel akʉbaridebema idubʉsidera, basi mebẽã biʼia oseabʉta maʉ̃ trajota iya obadara. Shigeobara mebẽrã warrara jaradia zebʉrʉ iya 45 poagade nekʼawua zebʉrʉta Mebẽrã Betel akʉbaride. Mebẽrã Shigeo kĩrãkʼa panʉra nebiatapanʉ Jeowa pʉwʉrʉdera.
Jʉrʉda nekʼãrẽ biʼiabʉta Daizezedebemata
Daizeze Bedʼeaba trajo ʉ̃rʉ jarabʉta akʉza plata ʉ̃rʉ
Daizezebara kãgabʉ dayi trajabʉmae sobiabamarẽã. Daizeze Bedʼeabara jarabʉ: «Ẽbẽrarã sobiabibʉ [...] iyi trajabʉdeba nekʼãrẽ bia» ũdudamarẽã (Eclesiastés 2:24). Jeowara mejãcha trajakĩrã, maʉ̃ba dayirã zarea trajapanʉne Jeowade kĩrãkʼa opanʉ, maʉ̃ba sobiabibʉ iyita akʉza dayirãsida sobiapanʉ.
29 SEPTIEMBREDEBA–5 OCTUBRE EDA
BEDʼEA BIA DAIZEZE BEDʼEADE ŨDUDATA ECLESIASTÉS 3, 4
Juwa jidapanʉra audre yiya kãgapanaidua akʉza audre Jeowa kʼawapanaidua
ijwhf artikulo 10 parr. 2-8
¿Sãwũã bia zokʼaseabʉ tenologiata?
● Tenologiata bia zokʼara juwa jidapanʉrata mejãcha kʼarebabʉ. Bari jaraita, juwa jidapanʉrata ãbapanʉ ẽ bʉrʉ zokʼaseabʉ selularta maʉ̃ne mensaje diabʉeita.
«Kʼãrẽ yibia daya mensaje diabʉedaita jarabʉta, kʼãrẽãba kãgabʉta mawũã ẽ bʉrʉ mejãcha krĩchabʉta dayi ʉ̃rʉ» (Jonathan).
● Tenologiata bia zokʼa ẽ bʉrʉ juwa jidapanʉrãra bia wã ẽ. Bari jaraita, ʉ̃kʉrʉbara ẽwari jõmaʉ̃nẽ zokʼapanʉ ãyi teleponota mawũã ẽ bʉrʉ tableta, maʉ̃ba ewari neẽ yi kimaʉ̃me ãba bʼaita akʉza bedʼeaita.
«Mʉ̃a selularta aukara akʉba ẽ basibʉrʉ mʉ̃ kimara mʉ̃me audre bedʼeakasi» (Julissa).
● Ʉ̃kʉrʉ ẽbẽrarãba jarapanʉ selularta mawũã ẽ bʉrʉ tableta zokʼabʉ daʉcha bedʼeaseabʉta yi kimaʉ̃me mamina sosiologa Sherry Turkleba, jarabʉ mawũã obʉra «El mito de la multitarea», maʉ̃ kʼarea ẽbẽrarã mejãchaʉba krĩchapanʉ nekʼãrẽ jʉ̃zaba oibara ẽãta maʉ̃ onʉmʉ awuara nekʼãrẽ mejãcha oseabʉta akʉza maʉ̃ oira mejãchade yibiata, mamina mawũã ẽ. Mamina sosiologaba jarabʉ daya nekʼãrẽ aba onʉmʉne wua eda nekʼãrẽta oibarabʉrʉ bia oẽãta.
«Mʉ̃ra mʉ̃ kimaʉ̃me bedʼeakĩrã mamina mʉ̃me bedʼeabʉrʉde iya selularta jiraedadogodera mʉ̃ra wua iyiʉ̃me bedʼea ẽ mʉ̃a ũdubibʉ baera iyaba sobiabʉta mʉ̃me bedʼebʉ kĩrãkʼa» (Sarah).
Naʉ̃ta kʼawuasida: Tenologia sãwũã zokʼabʉdeba kʼarebaseabʉ juwa jidapanʉrata mawũã ẽ bʉrʉ zʉbʉriabiseabʉ.
Jeowa tʉbʉ pʉreara ariya pʉrea erbara
12 ¿Juwa jidapanʉrabara sãwũã oseapanʉ Áquilaba akʉza Priscilaʉ̃meba oda kĩrãkʼa? Krĩchaidʉa bʉa akʉza bʉ kimaʉ̃meba nekʼãrẽ mejãcha oseapanʉta. ¿Maraba nekʼãrẽ opanʉra ãbaʉba oseapanʉka? Bari jaradaita, Áquilaba Priscilaʉ̃mebara ãbaʉba Daizeze Bedʼeata jaradiapanasi, ¿marabara maʉ̃rane kĩrãkʼa abarika oseapanʉka? Akʉza Áquilara Priscilaʉ̃mera ãyira ãba trajapanasi, ¿marata iyabaʉ trajota erpanʉ ẽ bʉrʉ deda ãba trajaseapanʉka? (Ecl. 4:9). Yiya kʼarebapanʉbʉrʉ nekʼãrẽ obʉde, mawũãra audre ãba babibʉ akʉza audre bedʼeapanʉ. Lindata akʉza Roberʼʉ̃mera 50 poaga audre ba ãyi juwa jidadata, iya jarabʉ: «Daira ewarita neẽ nekʼãrẽ jemeneine ãba berabarita, mʉ̃ kimaʉ̃meba netata sʉgʉbʉrʉde akʉza dai ũmeba chirua ponapanʉne, mʉ̃ra sobiabʉ maʉ̃ta ãbaʉba opanʉ baera adewara dai kãgara audre wari wã».
13 Dayi deda ãbachuba jarakĩrãkʉ ẽ wãrĩnu ãbabʉta. Wẽrã aba Brasildebemaba jarasi: «Idi ewade kʼãrẽ mejãcha oibaraba krĩchaseapanʉ deda ãbabʉ baera ãbapanʉta, mamina kʼawuasi mawũã ẽãta, deda ãbabʉba ãbabʉta jarakĩrãbʉ ẽ, awuarabʉrʉ mʉ̃ kimaʼa diaibara iya nesidabʉ ewarita». Akʉra mebẽã Brunoba akʉza Taysba sãwũã ewari jʉrʉbʉta ãyi ãba bʼaita, iya jarabʉ: «Dai ãbapanʉnera daiba dai selularʼra jãpe bʉepanʉ, mawũã audre ãba ewari berabarita».
14 Mamina, ¿kʼãrẽta oseabʉ yi juwa jidapanʉrata ãbabʉde sobiapanʉ ẽ bʉrʉ? Adewara, ¿kʼãrẽta berabariseabʉ mara ũmeba nekʼãrẽ awuara okĩrãbʉrʉ, mawũã ẽ bʉrʉ ãba bakĩrã ẽ bʉrʉ? ¿Kʼãrẽta osepanʉ? Krĩchaidua yiza nãã bedʼeada ʉ̃rʉ, nããra bedʼeasida tʉbʉra waña pʉrea toto ẽ, awuarabʉrʉ wiña wiñane jẽrã wãibara, mawũã pʉrea wãmarẽã. Maʉ̃ kĩrãkʼa mayi ũmena ewari jʉrʉidua aba bʼaita wiña wiñane akʉza oidua mayi ũmeba nekʼãrẽ kãgapanʉta, oraidua mayi ũmena bedʼeakabibʉta (Sant. 3:18). Maʉ̃ba maraba nekʼãrẽ ãbaʉba wiña wiñane owãne mayirai audre yi kãga wãnañi.
Jeowa tʉbʉ pʉreara ariya pʉrea erbara
3 «Jah tʉbʉ pʉrea» pʉrea erbaira, yi juwa jidapanʉrata yumakẽrãta yuwẽrãʉ̃mera zarea odaibara Jeowa audre kãga wãnaita. Mara juwa jidapanʉrãra, ¿sãwũã kʼarebai Jeowa audre kãgaita? Yumakẽrãba Jeowa mejãcha kãgabʉ ũdubibʉde, aripe opanʉ Jeowaba zokʼabʉta, maʉ̃ba kʼarebayi ãyi bedʼea zroma ũdubʉrʉde ara oita, bedʼeaka ẽ baita akʉza ãyi kima kãga ũdubibʉ jõ ẽ baita (akʉra Eclesiastés 4:12). Yi ẽbẽra Jeowa nãã bʉebʉra, zarea obʉ Jeowade kĩrãkʼa oita, ne diakĩrã dia bʼaita, jʉ̃ã bʼaita akʉza kĩrãdua kʼawuaita iyi ʉ̃rʉ nemitia obʉdade (Efes. 4:32–5:1). Juwa jidapanʉraba naʉ̃ nebiata oũdubipanʉbʉrʉ audre yiya kãga wãnañi. Mebẽã wẽrã yi trʉ̃ Lena juwa jidadata 25 poaga audre ba, iya jarabʉ: «Ẽbẽra Jeowade nããra bʉebʉbara iyaʼa wawia ũdubita akʉza kãgaira zare ẽ».
Jʉrʉda nekʼãrẽ biʼiabʉta Daizezedebemata
Jeowaʼa biga diapanʉ dayirãba nemitia odata kĩrãduabʉ baera
4 Dayirã dobaʉbara jõma jẽda ũdu ẽ Adánba Evaʉ̃meba aduadara (akʉra Salmo 49:7-9). Kʼareba neẽãra dayirãra jipa beikasi akʉza jẽda bʼaita krĩcha ẽ bakasi, nedʉwʉrʉ kĩrãkʼa (Ecl. 3:19; 2 Ped. 2:12).
6-12 OCTUBREBAYEDA
BEDʼEA BIA DAIZEZE BEDʼEADE ŨDUDATA ECLESIASTÉS 5, 6
Daizezeara wãrĩnu wawia ũdubipanʉ
w08 15/8 15, 16 parr. 17, 18
Jeowa ʉ̃rʉ ibia bedʼeabidadrʉ kʼẽrẽpapanʉneba
17 Jeowa yiwidʼibʉdera kʼẽrẽpabʉta ũdubibara Eclesiastés 5:1ne naʉ̃ta jarabʉ: «Jʉra kʼawuabara Daizeze wãrĩnuara dema yiwidʼi wãne». Moisésba akʉza Josuéba Daizezeʼa wawiabʉta ũdubira ãya jĩrʉne jʉ̃badata wẽãibarabasi tʉgaita Jeowa chumae (Éxo. 3:5; Jos. 5:15). Akʉza saserdotera israelitarabara kalsonsiyo lino omata jʉ̃ibarabasi mawũã ãyi ãkadabʉta anaita (Éxo. 28:42, 43). Adewara saserdote mebẽrãra Daizezeba zokʼabʉde baibarabasi akʉza saserdoterabʉde baibarabasi ãyira.
18 Dayirãba kʼawuatabeda kĩrãkʼa, Jeowa wawia ũdubibara Jeowa yiwidʼibʉrʉdera iyiʉ̃me kʼẽrẽpa bʼaibara mamina maʉ̃ awuara wuabema ẽbẽrarãbida wawia ũdubibara mawũã ãya dayirã wawia ũdubiyi. Mamina i abaʉba jara ẽ bayi maʉ̃ra wãrĩnu soiduba ũdubibara, maʉ̃ta akʉbʉ baera Jeowabara (1 Sam. 16:7; Pro. 21:2). Dayirãba naʉ̃ nebiata erbʉbʉrʉ, naʉ̃ba kʼarebayi dayi sãwũã bʼaita wuabemara sãwũã edadaita akʉza kʼawuaita dayi ʉ̃rʉ sãwũã krĩchabʉta, mawũẽra ewari jõmaʉ̃nẽ ũdubibayi naʉ̃ ʉ̃rʉ kʼãrẽ obʉdeba akʉza kʼãrẽ jarabʉdeba, apostol Pabloba naʉ̃ ũrãgʼata diasi 2 Cor. 6:3, 4de: «Mia kʼãrẽta opanʉ ẽ kʼai baebita, mawũã ũduda ẽ marẽã wabida waebʉta jaradiabʉrʉde, awuarabʉrʉ dayirãba nejõma opanʉneba ũdubipanʉ Daizeze nezokʼata» mawũẽra dayirã sãwũã panʉneba, wua sãwũã jʉ̃panʉneba akʉza dayirã kʼẽrẽpapanʉneba ũdubibʉ naʉ̃ bedʼeaba zokʼabʉta opanʉta adewara Daizeze Bedʼeaba jarabʉ: «Daizezeba jaradiabʉra biʼia ũdudamarẽã» (Tito 2:10).
w09 15/11 11 parr. 21
Daizeze Bedʼea estudiabʉba kʼarebayi audre bia yiwidʼita
21 Jesúsra soiduba yiwidʼibasi Daizeze Jeowara. Bari jaraita, Lazaro jẽda piradrʉbi nããra iyira kʼãwũã yiwidʼisi, Jesúsbara ʉ̃ta akʉ kʼãrãpe jarasi: «Zeze, mʉ̃a bʉa biga diaya mʉ̃a widibʉra bʉa ũrĩbʉ baera» (Juan 11:41, 42). ¿Bʉsida Jeowara soiduba yiwidʼibʉka? Jesúsba sãwũã yiwidʼita jaradiadade, ũdubikĩrãbasi iyitara Daizeze trʉ̃ neneẽã erbaira yibiata, Daizeze Nokʼota zemarẽã kãgabasita akʉza jõmaʉ̃ba odamarẽã kãgabasita Jeowaba zokʼabʉra (Mat. 6:9, 10). Kõbe bʉyikʉza krĩchara, bʉ yiwidʼibʉdera sãwũã obʉ. ¿Bʉ yiwidʼibʉba ũdubibʉka kãgabʉta Daizeze Nokʼota zemarẽã, Daizeze trʉ̃ta neneẽã bamarẽã akʉza iya kãgabʉta jõmaʉ̃ba odamarẽã?
Bʉ bebʉ Jeowaʼa diaya awabʉka
5 ¿Kʼãrẽta jarakĩrãbʉ dayirãba dayi bebʉ Jeowaʼa diaira? Jarakĩrãbʉ Daizezeʼa yiwidʼita maʉ̃ne jaraita dayi bebʉra ewari jõmaʉ̃nẽ iya kãgabʉde erbaita akʉza Jeowaba kãgabʉtrʉ nããra oita. Naʉ̃ba jarakĩrãbʉ dayirãba kãgaita Daizezera dayi so jõmainʉba, dayi krĩcha jõmainʉba, kakua jõmainʉba akʉza dayi zarea jõmainʉba (Mar. 12:30). Bʉ bebʉ Jeowaʼa diaira, maʉ̃ra miõba kʼawuabe ẽ, maʉ̃ra kʼawuabʉ Jeowaba akʉza bʉa. Mamina bʉ buru kʼoebʉrʉdera ẽbẽra jõmaʉ̃ba ũdupanʉ, maʉ̃ba ũdubibʉ bʉ bebʉra Jeowa diasita. Bʉ bebʉ Jeowaʼa diaira jipade yibia akʉza Jeowaba kãgabʉ bʉa jarada kĩrãkʼa omarẽã (Ecl. 5:4, 5).
Jʉrʉda nekʼãrẽ biʼiabʉta Daizezedebemata
Bʉa o ẽ bada kʼarea zʉbʉriabibʉdade, ¿kʼãrẽta oi?
JESÚSBA yiza abaʉde nebʉrasi sãwũã pẽdra abaʉba juez abaʉa widibasita kʼarebamarẽã awururaba iya oẽ bada kʼarea zʉbʉriabipanʉ baera. Jesús kʼaidubemarabara maʉ̃ yizara biʼia ũrĩsidabaibara, ãyi ewaridera ãyara badua ũdubasi baera ãya kʼãrẽ oẽ bada kʼarea awururaba zʉbʉriabibʉta (Luc. 18:1-5). Dayirãba kʼawuapanʉ maʉ̃ yizadebema pẽdrara sãwũã sentibasita, idi ewade dayirãbida badua ũdupanʉ baera maʉ̃ta
2 Idi ewadera ẽbẽrarãbara kãga ũdubida ẽ naʉ̃ drʉa jõmaʉ̃mae, ʉ̃kʉrʉbara awurura ãyi ʉ̃rʉ sãwũãbʉ kʼarea bia edada ẽ adewara ãya erbʉde wũẽta erbakĩrãpanʉ, maʉ̃ kʼarea dayirãbara kʼawuapanʉ edaʉde zʉbʉria odaita dayirãra (Ecl. 5:8). Mamina dayirãitara audre pʉ mebẽrãba dayirãba oẽ bada kʼarea zʉbʉriabibʉdade, ãyira nemitia omia baera edaʉde nekʼãrẽ aña opanʉ, mamina dayirãbara kʼawuaseapanʉ kʼãrẽta oita dayirãba oẽ bada kʼarea awururaba zʉbʉriabibʉrʉde kʼawuabʉrʉde Jesúsba akʉza awuru ẽbẽrarãba kʼãrẽta osidata ãyi abarika zʉbʉriabisidade. Wãrĩnubaira dayirãra zarea opanʉ dayirã nejʉraraba dayirãba oẽ bada kʼarea zʉbʉriabibʉrʉde mejãcha kĩrʉ ẽ baita, maʉ̃ba audre biga dayirã mebẽrãba dayirãba oẽ bada kʼarea zʉbʉriabibʉrʉde kĩrʉ ẽ baita, mamina Jeowaba ũdubʉrʉde dayirãba oẽ bada kʼarea awuru ẽbẽrarãba zʉbʉriabinʉmʉta mawũã ẽ bʉrʉ mebẽrãba, ¿maʉ̃nera iyara kʼãrẽta sentibʉ? ¿Iyara krĩchabʉka dayirã ʉ̃rʉ?
13-19 OCTUBREBAYEDA
BEDʼEA BIA DAIZEZE BEDʼEADE ŨDUDATA ECLESIASTÉS 7, 8
Yi mebẽrã beida so zarea diadaibara
Kʼãrẽta kʼawuapanʉ Jesu jẽgadadeba
9 Bʉa kʼarebaseabʉ yi mebẽrã beida kʼarea zʉbʉriabʉra. Jesura mawũã bari jẽga ẽ basi María akʉza Martaʉ̃me, awuarabʉrʉ biʼia ũrĩsi adewara bedʼea biata jarasi ãyaʼa so zarea diaita. Dayirãbida abarika kʼarebaseabʉ yi mebẽã beida kʼarea zʉbʉriabʉta. Mebẽã Dan, Australiadebemaba naʉ̃ta jarasi: «Mʉ̃ kima beisidera, mebẽrã kongregasionebemaba mʉ̃ta akʉsida, mʉ̃ jẽgabasidera ãya mitia akʉ ẽ basi, awuarabʉrʉ bedʼea biata jarasida mʉ̃a so zarea diaita. Adewara mʉ̃ kʼãrẽ oamabʉde mebẽrãba kʼarebabasi, mʉ̃ karro zʉgʉita, ne edaita akʉza neoita. Adewara mʉ̃me ãba yiwidʼipanasi, ãyira mʉ̃ zʉbʉriabʉde mʉ̃ mebẽã ara kĩrãkʼabasi» (Prov. 17:17).
w19.06 23 parr. 15
Kʼarebadadrʉ dayirã mebẽrãba bedʼea zromata awuatadamarẽã
15 William yi kima beidata dããraba, iya naʉ̃ta jarabʉ: «Mʉ̃a kãga mebẽrãba jaradamarẽã mʉ̃ kimaba kʼãrẽ bia obadata, naʉ̃ba ũdubibʉ ãyara wãrĩnu kãgabasita mʉ̃ kimara ãya mawũã opanʉba mʉ̃ta mejãchade kʼarebabʉ, mʉ̃ara wãrĩnu mejãcha kãgabasi mʉ̃ kimara» Biancaba kʼãwũã jara ũrĩbibʉ: «Mʉ̃aʼa mejãcha so zarea diabʉ wuabemarata mʉ̃me yiwidʼibʉrʉde akʉza mʉ̃a le ũrĩbibʉrʉde testo aba mawũã ẽ bʉrʉ ũme adewara mʉ̃ara kãga mʉ̃ kima ʉ̃rʉ ibia bedʼeadamarẽã akʉza mʉ̃ta mʉ̃ kima ʉ̃rʉ bedʼeabʉrʉde ãya ũrĩnamarẽã».
w17.07 16 parr. 16
«Jẽgaidua yi jẽgabʉbawara»
16 Biode yibia yi zʉbʉriabʉra ʉ̃rʉ yiwidʼita akʉza ãyibawara yiwidʼira mamina edaʉde dayirãba mawũã oira wiña zareabʉ ãyibawara jẽgaseabʉ baera akʉza dayisida soborekeaseabʉ baera mamina ãyibawara yiwidʼibʉba kʼarebaseabʉ ãyi sopʉabʉta bia sentimarẽã. Daleneba kʼãwũã jarabʉ: «Edaʉde mebẽrãta zepanʉ mʉ̃a sozarea diadaita, maʉ̃ne mʉ̃a ãya jarabʉ mʉ̃bari yiwidʼidamarẽã mamina ãyi yiwidʼi jʉ̃drʉbʉrʉdera wiña zareabʉ bedʼea jʉ̃drʉita maʉ̃ba nemi idu bedʼeabʉ, mamina wiña wiñane nemi zarea bedʼeabʉ mawũã soiduba yiwidʼipanʉ, ãya Jeowa sãwũã mejãcha ĩjãbʉta ũdubipanʉba akʉza mʉ̃aʼa mejãcha kãga ũdubipanʉba mʉ̃a ĩjãbʉta audre zarea babibʉ».
w17.07 16 parr. 17-19
«Jẽgaidua yi jẽgabʉbawara»
17 Ẽbẽra aba abaka awuarabʉ, maʉ̃ba ãyi mebẽrã beibʉrʉdera ãyi sopʉabʉra ʉ̃kʉrʉdera mesera taʉbʉ ʉ̃kʉrʉdeta mesera taʉ ẽ. Ãyi mebẽrã beibʉrʉdera ãyi kʼawabʉ ãyi neũdukʼawuarata ãyi mebẽrãta maʉ̃ ewaridebida dayirãbara kʼarebaseabʉ mamina maʉ̃ awa kʼareba ẽ baibara, kʼarebaibara wuabemara jedekodebida ãyi sopʉabʉta taʉyeda, maʉ̃ kʼarea Daizeze Bedʼeaba jarabʉ Proverbios 17:17de: «Neũdukʼawuarabara ewari jõmaʉ̃nẽ kãgabʉ akʉza bedʼea zroma zebʉrʉde mebẽãʼara kĩrãkʼabʉ» mawũẽrã dayirãra zarea odaibara ẽbẽrarã so zarea diaita ãyi sopʉabʉta bia sentiyeda (akʉra 1 Tesalonisenses 3:7).
18 Kĩrãbedadrʉ yi mebẽrã beidabara maʉ̃ra badu ewaride jẽda kĩrãbeseabʉta. Bari jaraita, ãyi juwa jida ewarideba, trãbi ũrĩnaneba, poto akʉdadeba, nekʼãrẽ opanʉneba mawũã ẽ bʉrʉ nekʼãrẽ ũbʉrʉdeba akʉza kʼãrẽ biabʉ ũrĩnaneba mawũã ẽ bʉrʉ kĩrãbeseabʉ jẽda poagade ãya kʼãrẽ obadadeba. Mebẽrã yi kima beidaitara, mejãcha zareabaseabʉ nekʼãrẽ iyi dobaʉba oita, bari jaita asambleaeda wãita mawũã ẽ bʉrʉ Jesús beida jẽda kĩrãbede wãita. Mebẽã aba yi kima beidaba naʉ̃ta jarabʉ: «Mʉ̃a kʼawuabasi dai juwa jidada ewarita jẽda kĩrãbeita zebʉrʉdera mʉ̃itara mejãcha zare bʼaibasita, maʉ̃ra mawũã berabarisi, mamina mebẽrãba akʉza mʉ̃ neũdukʼawuaraba nekʼãrẽta osida mʉ̃bawara ãba bʼaita mawũã mʉ̃ta abapai senti ẽ marẽã».
19 Kĩrãbedaibara ẽbẽra yi kima beidara, dayirãbara badu ewaride so zarea diaseabʉta, Juniaba naʉ̃ta jarabʉ: «Mebẽrãba mʉ̃ta badua kʼarebabʉdera mʉ̃ãʼa mejãcha so zarea diabʉ ãya jʉ̃ãna ẽ baera mʉ̃ kimaʉ̃me juwa jidada ewarita jẽda kĩrãbebʉde ãba bʼaita». Wãrĩnu dayirãbara yi mebẽrã beida kʼarea mejãcha sopʉabʉra taʉbida ẽ mamina nekʼãrẽ mejãcha oseabʉ ãyaʼa so zarea diaita (1 Juan 3:18). Adewara Gabyba naʉ̃ta jarabʉ: «Mʉ̃a Jeowa mejãcha biga diabʉ mʉ̃ta zõrãrãba mejãchade kʼarebasida baera akʉza ãya mʉ̃ra doba amae ẽ basi mʉ̃ mejãcha zʉbʉriabʉdera, ãya sentibisida Jeowara ewari jõmaʉ̃nẽ mʉ̃ kʼawabʉta».
Jʉrʉda nekʼãrẽ biʼiabʉta Daizezedebemata
«Mawũãtrʉ jõmaʉ̃ba kʼawuadayi marara mʉ̃ kʼaidubemarata»
18 Edaʉde dayirãbara ara okĩrãbʉ mebẽã abaʉba dayimabʉ ẽã odata, mamina bigabayi dayikʉza widita: «¿Mʉ̃a kʼawuabʉka jõma kʼãrẽ berabaridara? (Prov. 18:13). ¿Iyara mawũã oamabasika? (Ecl. 7:20). ¿Mʉ̃abida iyide kĩrãkʼa abarika obarika? (Ecl. 7:21, 22). ¿Iyiʉ̃me bedʼeara wuabʉrʉ wãbika bedʼea zromara?» (akʉra Proverbios 26:20). Dayirãba nama widibʉ ʉ̃rʉ bia krĩchadara idu berabaribiseabʉ bedʼea zromara, mawũã kãgabʉta ũdubidaita.
20-26 OCTUBREBAYEDA
BEDʼEA BIA DAIZEZE BEDʼEADE ŨDUDATA ECLESIASTÉS 9, 10
Sãwũã krĩchaibara mʉ̃a bedʼea zroma erbʉ ʉ̃rʉra
Jeowaba kʼarebabʉ bia wãmarẽã
4 Daizeze Bedʼeabara jarabʉ: «Jõmaʉ̃ta edaʉde ewari kayirua erpanʉ» (Ecl. 9:11). Edaʉde dayirãbara ũdupanʉ bedʼea zroma jõmaʉ̃ba ũdupanʉta (1 Cor. 10:13). Mawũã ẽ bʉrʉ zʉbʉriapanʉ dayirãra Jesu kʼaidubema baera. Bari jaraita dayirã pẽwãpanʉ, dayirã ʉ̃rʉ ipidapanʉ (2 Tim. 3:12). Dayirãra badu bedʼea zroma erpanʉbʉsida Jeowaba kʼarebaseabʉ bia wãmarẽã. ¿Sãwũã kʼarebasi Jeowabara Joséra?
w19.09 4 parr. 10
Jeowabara mejãcha kãga iyi odepanʉra edabʉta krĩchapanʉra
10 Eda krĩchabʉta ũdubibʉbara mejãchade kʼarebabʉ bedʼea zroma ũdubʉrʉde. Dayirãbara idi ewadera ũdupanʉ mebẽrãba aripe obʉta akʉza aripe oẽãta, nokʼo Salomónba mawũã ũdubasi. Akʉbasi ẽbẽra nezokʼara wãbʉta kabayode mamina nokʼora wũãwũãrara jĩrʉne wãbʉta wuabemara nezokʼara daʉcha (Ecl. 10:7). Naʉ̃ba jarakĩrãbʉ yi nekʼãrẽ okʼawuabʉara iya diaibarata diada ẽãta, mamina yi nekʼãrẽ obe ẽãra edaʉde yi zroma kĩrãkʼa akʉpanʉta, mamina Salomónbara kʼawuasi dayibʉde bʼaibarata akʉza jʉrʉ ẽ baibarata nekʼãrẽ daya erbʉ ẽãra (Ecl. 6:9). Dayita edabʉta ũdubibʉbʉrʉ dayibʉde bayi akʉza jʉrʉ ẽ bayi daya nekʼãrẽ erbʉ ẽãra, zare ẽ bayi sobia bʼaita daya nekʼãrẽ erbʉdeba.
w11 15/10 8 parr. 1, 2
Ewari jʉrʉda adʼua sobia jemene bʼaita
DAIZEZE Bedʼeabara jarabʉ Jeowabara ẽbẽrarãra bari bamarẽã parã ẽ basita awuarabʉrʉ kãgabʉta sobia panamarẽã. Bari jaraita, Salmo 104:14, 15de jarabʉ iyara egorodeba yikota diabʉta akʉza «binota ẽbẽrarã so sobiabibʉta, nẽdragata kĩrãdarra sobiabibʉta akʉza panta ẽbẽrarã so sobiabibʉta», mawũẽra Daizeze Jeowabara yikota diabʉ mejãcha dayirãba maʉ̃ta kodamarẽã mawũẽra diabʉ binota dayi sota sobiabamarẽã (Ecl. 9:7; 10:19). Mawũẽra Jeowabara wãrĩnu kãgabʉ ẽbẽrarãra mejãchade sobiabamarẽã (Hech. 14:16, 17).
2 Daizeze odepanʉrata ewari jʉrʉbʉbʉrʉ aduʼa jemene bʼaita maʉ̃ kʼarea krĩcha zroma oda ẽ baibara awuarabʉrʉ ãya ibana zakerata akʉza neponorata akʉdara naʉ̃ba biode kʼarebayi mejãcha sobia bʼaita (Mat. 6:26, 28; Sal. 8:3, 4). Wãrĩnubaira Daizeze Jeowaba parãsi dayirãra sobiabamarẽã akʉza biabamarẽã (Ecl. 3:12, 13). Mawũẽra biga bayi dayirã enaʉ̃bʉde nekʼãrẽ oita dayi sobiabibʉta mamina maʉ̃ daʉcha Jeowa nãã bigabʉta oita.
Jʉrʉda nekʼãrẽ biʼiabʉta Daizezedebemata
¿Beida tẽãra jaurede zokʼaibidaka?
Jesuba jarasi beidarãra kʼãĩnʉmʉ kĩrãkʼabʉta. Ẽbẽra abaʉta kʼãĩara kʼãĩnʉmʉnera, kʼawua ẽ iyi audu kʼãrẽ berabarinʉmʉta. ¿Kʼãrẽne abarikabʉ beidata kʼãĩnʉmʉmera? Ẽbẽra kʼãĩbʉrʉdera kʼãrẽ senti ẽ, dayi beibʉrʉde maʉ̃ kĩrãkʼabʉ, pʉa neẽ, zʉbʉria ẽ akʉza nekʼãrẽ awuara berabari ẽ. Daizeze Bedʼeaba jarabʉ «beidabara mia kʼãrẽsida krĩcha ẽ» (akʉra Eclesiastés 9:5).
27 OCTUBREDEBA–2 NOVIEMBRE EDA
BEDʼEA BIA DAIZEZE BEDʼEADE ŨDUDATA ECLESIASTÉS 11, 12
Sobiabara akʉza nekʼãrẽ ora mejãcha kaya ẽ baita
Nekʼãrẽ parãbʉdeba bʉ wũãwũãra Jeowa ʉ̃rʉ jaradiara
16 Jeowaba nekʼãrẽ parãnabara kʼarebaseabʉ mebẽrãra aduʼa bʼaita, sobiapanaita, adewara naʉ̃ba oseabʉ mebẽrãra audre ãbapanamarẽã. Daizeze Bedʼeabara jarabʉ: «Kʼãrẽ oira jõma ewari barabʉ» «ewari ipidaita» akʉza ewari bʉ pinadrʉita (Ecl. 3:1, 4, nota). Jeowaba nekʼãrẽ jõma parãnanebemara ʉ̃kʉrʉta kĩrãwãreã parãsi, dayirãta mama wã kʼãrãpe jemenepanamarẽã akʉza maʉ̃ akʉbʉdeba sobiapanamarẽã. Ʉ̃kʉrʉ mebẽrãra ãba wãkĩrã katumaena, ode ãba wãkĩrã, pusa akʉ wãkĩrã, mawũã ẽ bʉrʉ doeda wãkĩrã, ʉ̃kʉrʉ wũãwũãra parkeda wãkĩrã, ʉ̃kʉrʉba nedʉwʉrʉ zakerata akʉkĩrã, ʉ̃kʉrʉra doeda kuide wãkĩrã. Jeowaba parãnara kĩrãtanabʉ baera daya kãgabʉma wãseabʉ. Mama jʉ̃ẽ kʼãrãpe jemeneita akʉza akʉita Jeowaba sãwũã bia parãnata.
Daizezeʼa biga diaibara dayi bebʉbari
6 Daizeze Bedʼeadera jara ẽ mina kʼãrẽ koibara ʉ̃rʉ akʉza kʼãrẽ doibara ʉ̃rʉ dayi zroga bʼaita, jarabʉ Daizeze Jeowaba kʼãrẽta krĩchabʉta maʉ̃ ʉ̃rʉ. Bari jaraita, dayirãʼa ũrãgʼa diabʉ nekʼãrẽta oda ẽ marẽã dayi kakua ãrĩbibʉta (Ecl. 11:10). Akʉza jarabʉ aukʼara neko ẽ marẽã adewara aukʼara itua do ẽ marẽã (Prov. 23:20). Jeowabara kãgabʉ dayirã kakuara bia zokʼadamarẽã, kʼawuabʉde sainʉ nekoseabʉta akʉza sainʉ nekʼãrẽ doseabʉta (1 Cor. 6:12; 9:25).
7 Dayi bebʉ akʉira bia krĩchaibara dayirãba nekʼãrẽ kobʉ ʉ̃rʉ (Sal. 119:99, 100; akʉra Proverbios 2:11).Bari jaraita, dayirãba ũdubibʉ bia krĩchabʉta, yiko dayirã kayabibʉta wua ko ẽãne, adewara dayi bebʉ kãgabʉta ũdubipanʉ bia kʼãĩpanʉne, ejersisio opanʉne, dayirã kakua neneẽã erbʉde akʉza dayirã deta jaigʉa erbʉ ẽãne.
Daizeze Bedʼeaba jarabʉde odadrʉ
2 ¿Kʼãrẽa sobiabaseapanʉ Jeowa ode panʉrãra? Ãyira mejãcha sobiapanʉ Daizeze Bedʼeata ewariza lepanʉ baera akʉza mama jarabʉta oũdubipanʉ baera (akʉra Santiago 1:22-25).
3 Dayirãba Daizeze Bedʼeaba jarabʉde oũdubipanʉbʉrʉ, naʉ̃ba kʼarebabʉ Jeowata sobiabita. Jeowata sobiabipanʉta kʼawuapanʉ baera dayirãsida sobiapanʉ (Ecl. 12:13). Adewara Daizeze Bedʼeaba jarabʉde oũdubipanʉbʉrʉ, naʉ̃ba kʼarebabʉ dayirã mebẽrãbawara audre bia panaita akʉza mebẽrã kongregasionebemarabawara audre neũdukʼawua bia bʼaita. Bʉsida mawũã berabaribaribaibara. Adewara dayirãba Daizeze Bedʼeaba jarabʉde oũdubipanʉbʉrʉ naʉ̃bara mejãcha kʼarebabʉ bedʼea zroma ẽbẽrarã Daizeze ode bʉ ẽãraba ũdubʉta ũdu ẽ baita. Naʉ̃ra nokʼo Davidba jarada kĩrãkʼabʉ. Iyi trãbide Jeowa ley ʉ̃rʉ, Jeowaba sãwũã zokʼabʉ ʉ̃rʉ akʉza Jeowaba sãwũã kʼawua obʉ ʉ̃rʉ bedʼeaside, iya jarasi yi maʉ̃ta wuagabʉbara nebia zromata erbaita (Sal. 19:7-11).
Jʉrʉda nekʼãrẽ biʼiabʉta Daizezedebemata
Nekʼãrẽ parãbʉdeba bʉ wũãwũãra Jeowa ʉ̃rʉ jaradiara
6 ¿Yibarirabara mejãcha estudiaibaraka nedʉwʉrʉ ʉ̃rʉ ãyi wũãwũãra jaradiai naweda? Mawũã mejãcha estudiaira nesida ẽ, Jesubara mejãcha jara ũrĩbi ẽ basi semira sãwũãbʉ ʉ̃rʉ, nepono liriora sãwũãbʉ ʉ̃rʉ. Edaʉde biga nekʼãrẽ parãna sãwũãbʉ ʉ̃rʉ bedʼeaita mamina audre bigabayi widita, mawũã ẽ bʉrʉ wiña bedʼeaita wũãwũãraba audre bia ũrĩmarẽã. Krĩchara Christopherba jaradata: «Mʉ̃ papa nekʼãrẽ parãna ʉ̃rʉ bedʼeabʉrʉdera, mejãcha bedʼea ba ẽ basi, iya jarabasi: ‹Akʉra jari katuma zromata, ¿kaʉ̃ra yi zroma ẽka? Jeowasida yi zromabaibara›, mawũã ẽ bʉrʉ pusa akʉbarabʉde jarabasi: ‹Kaʉ̃ pusa marazara kʼãrẽba zarea barabʉ, Jeowasida kʼãwũã zareabʉbaibara›». Christopherba jarabʉ: «Mʉ̃ papabara zokʼa ba ẽ basi yiza daya ũrĩta zareabʉta, naʉ̃ba kʼarebasi daiba Jeowa ʉ̃rʉ audre kʼawuaita».