ARTIKULO KʼAWUAITA 22
Ũrãgʼa biata dayirã bia wãmarẽã
«Jeowabʉrʉ buru bia dia baera» (PROV. 2:6).
TRÃBI 89 Jeowa bedʼeata ũrĩra ewari jõma baya
KʼÃRẼTA ŨDUDAITAa
1. ¿Dayirãbara kʼãrẽa nesidapanʉ buru biara?
BɄITA kʼãrẽta audre yibiata kʼawua jidakĩrãbʉbʉrʉ Jeowa widira buru biata diamarẽã (Sant.1:5). Nokʼo Salomónba bʉsi: «Buru biata audre yibia» (akʉra Proverbios 4:7). Mamina, iyira bedʼeasi buru bia Daizezedeba zebʉ ʉ̃rʉ (Prov.2:6). ¿Buru bia Daizezedeba zebʉbara kʼarebaseabʉka dayirãba bedʼea zroma ũdubʉrʉdera? Mawũã, naʉ̃ artikuloba ũdubiyi sãwũã.
2. ¿Dayirãta buru bia bakĩrãpanʉbʉrʉ kʼãrẽta odaibara?
2 Dayirãta buru bia bakĩrãpanʉbʉrʉ akʉibara kʼãrẽta jaradiapanʉta ẽbẽrarã buru biabadaraba. Nããra bedʼeadayi Salomón ʉ̃rʉ, Daizeze Bedʼeaba jarabʉ Jeowabara mejãcha buru bia diasita Salomónʼa (1 Rey. 4:29). Yi ũmeta bedʼeadayi Jesu ʉ̃rʉ, iyira audre buru biabasi ẽbẽrarã nama udadebemaraira (Mat. 12:42). Propesia iyi ʉ̃rʉ bedʼeabʉba jarabʉ, Jeowa jaure zareara iyi ʉ̃rʉ bayi. Jaure zarea krĩcha biadebemata akʉza buru biadebemata (Is. 11:2).
3. ¿Kʼãrẽta kʼawuadai naʉ̃ artikulodera?
3 Daizezeba buru biata diasi Jesuʼa akʉza Salomónʼa maʉ̃ba ãya dayirã ũrãgʼa biata diasida. Naʉ̃ artikulode kʼawuadayi ũrãgʼa ũbea, plata sãwũã akʉita, trajo sãwũã akʉita akʉza dayikʉza sãwũã akʉita.
¿SÃWŨÃ JɄRA KʼAWUA AKɄIBARA PLATARA?
4. ¿Jesuba Salomónʼʉ̃mebara platara abarika erpanasika?
4 Salomónbara platata mejãcha erbasi (1 Rey. 10:7, 14, 15). Mamina Jesubara nekʼãrẽ mejãcha erba ẽ basi, mia iyi deara neẽbasi (Mat. 8:20). Mawũãsidu, Jesuba Salomónʼʉ̃mebara jʉra kʼawua akʉpanasi platara ãyi buru biara Daizezedeba zebasi baera.
5. ¿Salomónbara sãwũã ũdubisi platara jʉra kʼawua akʉbasita?
5 Salomónbara jarasi platabara dayirãra kʼarebaseabʉta (Ecl. 7:12). Platabara kʼarebaseabʉ dayirãba nesidabʉ erbaita akʉza dayirãba kãgata erbaita. Salomónba plata mejãcha erbasimina, kʼawuasi bʉta nekʼãrẽ audre yibiata plataira. Bari jaraita, Salomónba jarasi audre yibiata wuabemaraba dayi biʼia akʉita, plata mejãcha erbaira (Prov. 22:1). Adewara ũdusi mejãcha ẽbẽrarã plata erbʉdebemara jõmaʉ̃ta badua sobiabʉ ẽãta (Ecl. 5:10, 12). Adewara ẽbẽrarã jarasi jʉra kʼawuapanamarẽã platata aukʼara krĩcha ẽ baita, platara idi erpanʉ baera mamina nunera neẽdogo baera (Prov. 23:4, 5).
Dayirãba nekʼãrẽ biata erbaita krĩchapanʉbʉrʉ naʉ̃ba iduaribi ẽ bayi nãã bʉeita Daizezedebemata. (Akʉra parrapo 6 akʉza 7).d
6. ¿Jesuba sãwũã ũdubisi platara jʉra kʼawua akʉbasita?
6 Jesubara kãgabasi nedoita akʉza nekoita, mawũãsidu iyara platara jʉra kʼawua akʉbasi (Luc. 19:2, 6, 7). Ewari aba Jesubara baniata bino bia babisi, mamina maʉ̃ binora mejãcha balebasi wuabema bino kĩrãkʼa ba ẽ basi baera (Juan 2:10, 11). Adewara iyi beisi ewaridebida iya wua jʉ̃badara mejãcha balebasi (Juan 19:23, 24). Mawũãsidu iyara platata mejãcha kãga ẽ basi. Iya jarasi iyi kʼaidubemaraʼa: «Miõba zhãrã ũme aribʼae nʉma bʼe ẽã. Aramaʉ̃ kĩrãkʼa Daizezedʼebema aribʼae ẽã platadʼebemata aribʼae nʉmʉbara» (Mat. 6:24). Jesubara jaradiasi dayirãba Daizeze Nokʼota nãã bʉepanʉbʉrʉ, Jeowaba diaita dayirãba nesidabʉra (akʉra Mateo 6:31-33).
7. ¿Kʼãrẽ nebiata ũdusi mebẽã abaʉba platata jʉra kʼawua akʉbasi baera?
7 Idi ewade mebẽrã mejãchaʉba nebiata ũdupanʉ Jeowaba plata sãwũã akʉi ʉ̃rʉ ũrãgʼa diadadeba. Akʉdadrʉ mebẽã Daniel yizata, iya jarabʉ: «Mʉ̃ kʉ̃rãbasiedara krĩchasi Daizezeba zokʼabʉta nãã bʉeita akʉza kʼawuabasi maʉ̃trʉ audre yibiata». Iya platata mejãcha jʉrʉ ẽ basi baera, ewari erbasi ẽbẽrarã nekʼãrẽ mitia drʉadebema berabaribʉrʉrata kʼarebaita akʉza Betelde trajaseabasi. Iya jarabʉ: «Mʉ̃a platata mejãcha jʉrʉsibʉrʉ neũdukʼawuara bia idi erbʉra ũdu ẽ bakasi. Maʉ̃ba mʉ̃ra mejãcha krĩcha zroma obʉ ẽ plata ũdu ẽ bada kʼarea, adewara Daizeze Nokʼo nãã bʉeibara mʉ̃ta mejãcha sobiabibʉ, mamina plata mejãcha jʉrʉibara sobiabi ẽ. Naʉ̃ drʉade plata mejãcha bʉra abarikabʉ ẽ Daizezeba nebia mʉ̃a dia zebʉrʉira». Naʉ̃ba ũdubibʉ Daizeze Nokʼota nãã bʉepanʉbʉrʉ akʉza platata mejãcha jʉrʉ ẽ bʉrʉ, nebiata audre ũdudaita.
¿SÃWŨÃ JɄRA KʼAWUA AKɄIBARA TRAJORA?
8. ¿Sãwũã kʼawuapanʉ Salomónbara jʉra kʼawua akʉbasita trajora?
8 Salomónba jarasi daya trajo jõma obʉrʉdera sobiabʉta, maʉ̃ra Daizezeba nebia diada kĩrãkʼabʉ (akʉra Eclesiastés 5:18, 19). Adewara bʉsi: «Badu trajo kʼarea mejãcha trajabʉbʉrʉ bia waña» (Prov. 14:23). Salomónbara maʉ̃ra biʼia kʼawuabasi iyisida trajasi baera, iyara pʉwʉrʉrata parãsi, deta akʉza ubata usi, maʉ̃ oira iyira mejãcha zarea trajaibarabasi (1 Rey. 9:19; Ecl. 2:4-6). Adewara iya maʉ̃ jõma osidera sobiabasi, mamina iya kʼawuabasi iyi audre sobiabaira ne awuruta oibarabasita. Maʉ̃ awuara, Salomónbara nekʼãrẽ bio osi Jeowaita. Bari jaraita, kʼareba parãsi Daizeze templota, maʉ̃ templora biʼianʉmesi, mõbe 7 poaga berabarisi maʉ̃ maparãira (1 Rey. 6:38; 9:1). Iya nekʼãrẽ mejãcha osimina kʼawuasi Jeowaita trajaita audre yibiata, maʉ̃ kʼarea iya bʉsi: «Naʉ̃ jõma ũrĩna tẽã, naʉ̃ta oibara: wawiara Daizeze wãrĩnuarãra akʉza iya zokʼabʉta ora» (Ecl. 12:13).
9. ¿Kʼãrẽta osi Jesubara trajo awa akʉ ẽ baita?
9 Jesu kʉ̃rãbasidera karpinteriade trajabasi (Mar. 6:3). Jesu mebẽrãra kabanabasi maʉ̃ba iyi yibarirãra sobiapanasibaibara Jesuba ãyita kʼarebabasi baera iyi trajabʉdeba. Iyira Daizeze warra baera jõma aripe obasibaibara, maʉ̃ba ẽbẽrarãbara iyita jʉrʉpanasibaibara iya mesata, jewedabarita mawũã ẽ bʉrʉ nekʼãrẽ bakuruba parãbarita odamarẽã. Iya maʉ̃ trajo obasidera sobiabasibaibara, mawũãsidu iya maʉ̃ trajo obʉ kʼarea idubʉ ẽ basi Jeowade oita, awuarabʉrʉ ewari jʉrʉsi Jeowade oita (Juan 7:15). Akʉza iya Daizeze Bedʼea jaradiabaside naʉ̃ta jarasi: «Trajarãra yiko mesera ãrĩbʉ kʼarea, awuarabʉrʉ trajara yiko ãrĩ ẽ kʼarea maʉ̃bara ewari jõmaʉ̃nẽ babiseabʉ» (Juan 6:27). Adewara iya jarasi katuma bedʼea bia jaradade: «Maʉ̃ba awuarabʉrʉ Daizezeba krĩñata obʉdaba ne biara ʉ̃tre tʉudua» (Mat. 6:20).
¿Kʼãrẽta oibara trajo jʉra kʼawua akʉita akʉza maʉ̃ daucha oita Daizezedebemata? (Akʉra parrapo 10 akʉza 11).e
10. ¿Dayirãta biʼia trajapanʉbʉrʉ kʼãrẽta berabariseabʉ?
10 Jeowaba buru bia diabʉba kʼarebabʉ trajo jʉra kʼawua akʉita. Daizeze Bedʼeaba jarabʉ kristianorãra zarea trajaibarata akʉza biʼia trajaibarata (Efes. 4:28). Edaʉde dayi trajabʉmae nokʼoba ũdura dayi nezrʉga ẽãta akʉza nekʼãrẽ jõma biʼia obʉta, ãya jaraseapanʉ kãgata dayirã sãwũã trajabʉta. Maʉ̃ kʼarea dayirãba krĩchaseabʉ audre trajaita dayirã nokʼoraba biʼia krĩchamarẽã Jeowa ʉ̃rʉ Kʼawuabipanʉrã ʉ̃rʉ, mamina maʉ̃ awa odara ewari neẽ dayi mebẽrãbawara ãba bʼaita akʉza Daizezedebema oita, mawũã berabarira zarea oibara dayi krĩchata ara oita, mawũã trajo jʉra kʼawua akʉita.
11. ¿Kʼãrẽta kʼawuasi Williambara zõrãrã kongregasionebema yizadebara?
11 Akʉdadrʉ mebẽã Williamba sãwũã kʼawuasita trajo jʉra kʼawua akʉita. Ewari aba iyira trajasi mebẽã abaʉmae, naʉ̃ mebẽãra zõrãrã kongregasionebemabasi. Naʉ̃ zõrãrã kongregasionebema ʉ̃rʉ Williamba jarabʉ: «Iya mʉ̃aʼa yiza biata diasi, sãwũã jʉra kʼawua akʉ bʼai ʉ̃rʉ trajota. Iyira mejãcha trajabʉ akʉza iya trajo obʉra biʼia obʉ baera ẽbẽra mejãchaʉta iyidu jʉ̃ẽkĩrã, mamina iyi trajo jõbʉrʉdera idubʉebʉ iya trajo obʉra, mõbe naʉ̃ta jẽda krĩcha ẽ awuarabʉrʉ wãbʉ deda iyi mebẽrãbawara ãba bʼaita akʉza Daizezedebema oita. Mʉ̃a akʉbʉ iyira mejãcha sobiabʉta».b
¿SÃWŨÃ JɄRA KʼAWUA AKɄIBARA DAYITA?
12. ¿Salomónbara sãwũã ũdubisi iyikʉza jʉra kʼawua akʉbasita akʉza kʼarea aduasi maʉ̃ra?
12 Salomón Jeowaʼʉ̃me kʼẽrẽpa bʉedara iyi ʉ̃rʉ jʉra kʼawua akʉbasi. Warrarabasidera Salomónbara jʉrʉbasi Jeowa kʼarebata, iya kʼawuabasi baera iyi dobaʉbara aripe obe ẽãta (1 Rey. 3:7-9). Adewara iyi nokʼoba jʉ̃drʉsidera iya kʼawuabasi yãrã ʉ̃ta krĩchabaira zeri ẽ basita akʉza Salomónba bʉsi: «Ʉ̃tabʉta krĩchabʉra zebʉ dayi baei naweda akʉza dayitrʉ abapai krĩchabʉbʉrʉ bia wã ẽ» (Prov. 16:18). Mamina iyara jipa kĩrãduasi iya jaradara. Iyi nokʼobadata dããrabade yãrã ʉ̃tabʉta krĩcha jʉ̃drʉsi akʉza ũrĩkĩrã ẽ basi Daizezeba zokʼabʉta. Bari jaraita, leybara naʉ̃ta zokʼabasi nokʼoraita: «Kimata mejãcha erbabe ẽ baibara mawũã iyi sota ãrĩ ẽ marẽã» (Deut. 17:17). Salomónbara ũrĩ ẽ basi naʉ̃ leyta, iyara erbasi 700 kimara, maʉ̃ awuara 300 kima tẽãbemarata, naʉ̃ra kimara mejãchaʉbara Daizeze zeri ẽã yiwidʼipanasi (1 Rey. 11:1-3). Salomónbara krĩchasibaibara iya obʉra bia obʉta, mamina maʉ̃ba iyira Jeowadeba jĩgababisi, maʉ̃ kʼarea tẽãne bia wã ẽ basi (1 Rey. 11:9-13).
13. ¿Dayirãbara kʼãrẽta kʼawuapanʉ Jesudeba?
13 Jesubara ewari jõmaʉ̃nẽ iyikʉza jʉra kʼawua akʉsi adewara eda krĩchabʉta ũdubisi. Jesu ʉ̃tʉ basidera iyara nekʼãrẽ biata osi Jeowa kʼarebaita: «Daizezeba iyideba nekʼãrẽ jõma osi, bajãta, naʉ̃ ẽjũãta» (Col. 1:16). Jesu buru kʼoeside iya jõma jẽda kĩrãbesi kĩrãkʼabʉ iya kʼãrẽ odata ʉ̃tʉ yi Zezeʉ̃me baside (Mat. 3:16; Juan 17:5). Iya mawũã kĩrãbebʉrʉba yãrã ʉ̃tabʉta krĩcha ẽ basi adewara jarasi iyi kʼaidubemara iyi nama egoroeda zesidera «Ze ẽ basi iyita akʉdamarẽã, awuarabʉrʉ zesi wuabemara akʉita akʉza iyi bebʉ diaita wuabemara ẽdrʉbita» (Mat. 20:28). Akʉza jara ũrĩbisi iyi dobaʉbara nekʼãrẽra aripe obe ẽãta (Juan 5:19). Jesubara, ¿kʼãrẽ yiza biata diasi dayirã eda krĩchai ʉ̃rʉ? Dayirã jõmaʉ̃ba iyide kĩrãkʼa okĩrãpanʉ.
14. ¿Sãwũã kʼarebabʉ dayirãra Jesuba jaradabara dayikʉza jʉra kʼawua akʉita?
14 Jesubara jaradiasi iyi kʼaidubemara sãwũã ãyikʉza jʉra kʼawua akʉibara ʉ̃rʉ. Ewari aba Jesuba jarasi iyi kʼaidubemara: «Marãẽnabema mazhi budʼasidʼa jõma juacha nʉmʉkʼãrĩã» (Mat. 10:30). Edaʉde dayirãba dayi ʉ̃rʉ bia krĩcha ẽ, mawũã berabaribʉrʉdera Jesuba jaradaba kʼarebaseabʉ. Jesuba bedʼea jaradabara dayirãʼa kĩrãbebibʉ Jeowaba dayirã mejãcha kãgabʉta akʉza krĩchabʉta. Jeowaba krĩchabʉbʉrʉ dayirãra ẽjũã biade baseabʉta, dayirãbara jarabe ẽ mama babe ẽãta.
¿Kʼãrẽ nebiata aduaseabʉ jʉra kʼawua akʉ ẽ bʉrʉ dayikʉza? (Akʉra parrapo 15).f
15. (1) ¿Kʼãrẽ ũrãgʼata diasi karta Jarakabʉbara? (2) Poto parrapo 4bʉdera ¿dayikʉza audre krĩchabʉbʉrʉ kʼãrẽta aduaseabʉ?
15 Dããraba karta Jarakabʉba dayikʉza sãwũã jʉra kʼawua akʉibara ʉ̃rʉ jaradata: «Krĩcha ẽ baibara nekʼãrẽ daya obʉra audre yibiata wuabemaraneira, adewara wuabemaraira jipa zeri ẽãta krĩcha ẽ baibara. Awuarabʉrʉ dayikʉza jʉra kʼawua akʉibara, mawũã oira kʼawuaibara mʉ̃a kʼãrẽta oseabʉta akʉza kʼãrẽta obe ẽãta. Mebẽã wẽrã abaʉba jarasi: ‹Mʉ̃ra jipa ẽbẽra kayirua ẽ, mia jipa ẽbẽra bia ẽ naʉ̃ drʉadera, mʉ̃ra wuabema ẽbẽra kĩrãkʼa nebia erbʉ akʉza nemitia obari›».c Mawũẽra, kʼãrẽ yibia dayikʉza jʉra kʼawua akʉita.
16. ¿Kʼãrẽa Jeowabara dayirãʼa ũrãgʼa biata diabʉ?
16 Jeowabara dayirãʼa diabʉ ũrãgʼa bia iyi bedʼeadeba, dayirãta kãgabʉ baera akʉza kãgabʉ dayirã sobiabamarẽã (Is. 48:17, 18). Dayirãitara audre yibiabayi Daizezeba zokʼabʉta nãã bʉeita, naʉ̃ba dayirãra sobiabiyi. Idi ewadera ẽbẽrabara mejãcha kãga platata, ãyikʉza audre krĩchabʉ akʉza trajosida mejãcha kãga. Mamina dayirãba maʉ̃trʉ akʉpanʉbʉrʉ bedʼea zromata mejãcha ũdudayi, maʉ̃ kʼarea buru bia bara akʉza krĩchara Jeowa so sobiabita (Prov. 23:15).
TRÃBI 94 Agradecidos por la palabra de Dios
a Salomónʼra Jesuʼʉ̃mera mejãcha buru biarabasi akʉza ãyi buru biara Daizezedeba zebasi. Ãyi ũmeba diasida ũrãgʼa, kʼawuaita sãwũã jʉra kʼawua akʉi ʉ̃rʉ platata, trajota akʉza dayita. Naʉ̃ artikulode kʼawuadayi sãwũã kʼarebabʉta naʉ̃ra ũrãgʼaba akʉza sãwũã kʼarebabʉrʉta wuabema mebẽrãta naʉ̃ra ũrãgʼa ũrĩbʉrʉba.
b Akʉra artikulo «Cómo disfrutar del trabajo duro», La Atalaya 1 febrero 2015de.
c Akʉra artikulo «La Biblia nos ayuda a sentirnos satisfechos», La Atalaya 1 agosto 2005de.
d POTORABA ŨDUBIBɄTA: Juan akʉza Tomásʼʉ̃mera Jeowa ʉ̃rʉ Kʼawuabipanʉrã warrara akʉza iyabaʉ kongregasione panʉ. Juanbara biode akʉbʉ iyi karrota, mamina Tomásbara zokʼabʉ iyi karrora mebẽrã ãba yi jʉrebarima edeita akʉza Daizeze bedʼea jaradia wãita.
e POTORABA ŨDUBIBɄTA: Juanʼra mejãcha trajabʉ iyi trajabʉmae nokʼota sobiabita, iyi nokʼoba iyi trajadade wueta trajamarẽã jarabʉrʉdera mawũã obʉ. Iyabaʉ ewaride Tomásʼra zõrãrã kʼarebabari baera, zõrãrã kongregasionebemaʉ̃meba akʉ wãbʉ mebẽã abaʉta. Adewara Tomásbara jarasi iyi nokʼoʼa iyi traja berabarida tẽã wua trajota dia ẽ marẽã mawũã Daizezedebema oita.
f POTORABA ŨDUBIBɄTA: Juanbara iyitrʉ krĩchabʉ, mamina Tomásbara nãã bʉebʉ baera Daizezedebemata kʼareba ara obʉ Daizeze Nokʼo ʉ̃rʉ bedʼeabari deta, mama audre ũdukʼawuabʉ neũdukʼawuarata.