ARTIKULO KʼAWUAITA 21
Apocalipsisba jarabʉ bʉaʼa ʉ̃ra zeide kʼãrẽta ũduita
«Amen, zera Nokʼo Jesu» (APOC. 22:20).
TRÃBI 142 Bedʼea zromata awuantayi Jeowa kʼarebadeba
KʼÃRẼTA ŨDUDAITAa
1. ¿Ẽbẽra jõmaʉ̃ba kʼãrẽta ũdubibara?
IDI ewade dayirã jõmaʉ̃ba ũdubibara kʼaiarebʉta, Jeoware mawũã ẽ bʉrʉ Diaruarebʉta. Naʉ̃nera ẽsadra babe ẽ, aba abakaʉba jida kʼawuaibara kʼãrẽta jidaita iya jidabʉrʉdeba ũdui baera ewari jõmaʉ̃nẽ bʼaita mawũã ẽ bʉrʉ beita (Mat. 25:31-33, 46). Zʉbʉria zroma zebʉrʉdera, Jeoware kʼẽrẽpapanʉrabara marka aba erbayi naʉ̃neba ẽdrʉyi (Apoc. 7:14, Ezeq. 9:4, 6). Yi ẽbẽra yi nedʉwʉrʉ mẽsia marka abʉra beiyi (Apoc. 14:9-11).
2. (1) ¿Hebreos 10:35-39bara dayirãba kʼãrẽta oibarata jarabʉ? (2) ¿Sãwũã kʼarebabʉ Apocalipsisba jarabʉbara?
2 (Akʉra Hebreos 10:35-39). Bʉa Jeoware bʼaita jidasibʉrʉ bia osi akʉza bʉa kʼarebakĩrãbʉbʉrʉ wuabemaraba bʉre kĩrãkʼa odamarẽã naʉ̃ra yibia, mawũã oira libro Apocalipsisba jarabʉba kʼarebayi, naʉ̃ba jara ũrĩbibʉ baera kʼãrẽta berabarita yi Jeowa Nokʼoarebʉ ẽãra akʉza jara ũrĩbibʉ yi Jeowa Nokʼoarebʉbara nebiata ũduita. Dayirãba naʉ̃ libroba jarabʉta biʼia akʉpanʉbʉrʉ naʉ̃ba kʼarebayi Daizeze Nokʼoare kʼẽrẽpa bʼaita. Adewara dayirãba kʼawuabʉdeba kʼarebaseabʉ wuabemarasida Jeoware kʼẽrẽpapanamarẽã.
3. ¿Kʼãrẽ bedʼeata panʉnai naʉ̃ artikulodera?
3 Naʉ̃ artikulode panʉnañi naʉ̃ra bedʼeata: ¿Kʼãrẽta berabari yi Jeoware kʼẽrẽpapanʉrãra? akʉza ¿kʼãrẽta berabari yi nedʉwʉrʉ mẽsia purru eskarlataʼare bʉrãra?
¿KʼÃRẼTA BERABARI YI JEOWARE KʼẼRẼPAPANɄRÃRA?
4. ¿Saʉ̃ grupota ũdubʉ Juanbara ʉ̃tʉ Jesu kʼawabʉta?
4 Juanba ũdubʉ grupo ũme Jeoware panʉrata, ãyira ewari jõmaʉ̃nẽ panañi akʉza nebiata ũdudayi. Yi grupo nããrabemanera 144.000 ẽbẽrarã panʉ (Apoc. 7:4). Ãyira nama egorodebema mamina ʉ̃ta wã Jesubawaraʉba zokʼaita, ãyi jõmaʉ̃ba zokʼabʉ naʉ̃ drʉa jõma (Apoc. 5:9, 10; 14:3, 4). Juanba ũdubʉ ãyira Jeowa katuma ʉ̃rʉbʉta (Apoc. 14:1).
5. ¿144.000debema wuabida nama egorode panʉra, aranʉ kʼãrẽta berabari?
5 Apostolera ewarideba idibasidu Jeowaba jida zebʉrʉ ẽbẽrarãta 144.000debema bamarẽã (Luc. 12:32; Rom. 8:17). Juanʼa kʼawuabisi ewari jõbodoarera ʉ̃kʉrʉ ʉ̃ta wãiranebemara zokʼai bʼaita nama egorode. Zʉbʉria zroma zei nãã Jeowaba jarayi naʉ̃ra ẽbẽrarã jʉ̃zaba iyideta (Apoc. 7:2, 3; 12:17). Mawũẽra zʉbʉria zroma berabarinʉmʉne, jari ẽbẽrarãra ʉ̃ta wãñi, mawũã ãba yi jʉreita 144.000debemata nããbada kʼãrãpe ʉ̃ta wãnabawara bʼaita. Ãyara Jesuʼʉ̃meba zokʼayi Daizeze Nokʼota (Mat. 24:31; Apoc. 5:9, 10).
6, 7. (1) ¿Ʉ̃ta wãira ũduda tẽãra kʼairata ũdusi Juanbara akʉza kʼairaba ãyira? (2) ¿Kʼãrẽa Apocalipsis 7ba jarabʉra yibia ʉ̃ta wãiraitara akʉza nama egorode bʼairaitara?
6 Ʉ̃ta wãira ũduda tẽã Juanba ũdubʉ ẽbẽra mejãcha, naʉ̃rãra mia kʼaiba jʉachabeda ẽ (Apoc 7:9, 10). ¿Kʼairaba ãyira? Juanʼa jarasida: «Naʉ̃ra zʉbʉriadeba ẽdrʉbʉrʉra, ãyi wua drazoara sʉgʉbʉda akʉza torro obʉda kordero waba» (Apoc. 7:14). Ẽbẽra mejãchabʉrãra zʉbʉria zromaneba ẽdrʉda tẽãra nama egorode panañi akʉza nebiata mejãcha ũdudayi (Sal. 37:9-11, 27-29; Prov. 2:21, 22; Apoc. 7:16, 17).
7 Mamina dayirã ʉ̃ta wãimina mawũã ẽ bʉrʉ nama egorode bʼaimina, yibiabayi krĩchaita dayirãsida panʉta Apocalipsis 7ba jara ũrĩbibʉ ewaride. Dayirã jõmaʉ̃ta mejãcha sobiapanañi Daizeze Nokʼoare bʼaita jidasida baera. ¿Kʼãrẽta jara ũrĩbibʉ Apocalipsisbara zʉbʉria zroma ʉ̃rʉra? (Mat. 24:21).
¿KʼÃRẼTA BERABARI YI DAIZEZE NEJɄRARÃRA?
8. ¿Kʼãrẽta berabaribara zʉbʉria zromata jʉ̃drʉmarẽãra akʉza kʼãrẽta odai ẽbẽrarã Jeoware panʉra ẽãbara?
8 Artikulo berabaridade ũdusida, aranʉbai nokʼora naʉ̃ drʉa jõmaʉ̃nẽbemaba pẽwãnaita Babilonia pʉwʉrʉ zromata, naʉ̃ba jarakĩrãbʉ religion zeri ẽãra naʉ̃ drʉa jõmaʉ̃nẽbemata (Apoc. 17:16, 17). Naʉ̃ berabaribʉrʉdera jʉ̃drʉyi ewari zʉbʉria zromata. ¿Naʉ̃ba jarakĩrãbʉka ẽbẽra mejãchaʉba Daizezeta jʉrʉita? Mawũã ẽ. Apocalipsis 6ba jarabʉ naʉ̃ta berabaribʉrʉdera ẽbẽrarã Jeowarebʉ ẽãra katumaena mĩrʉ wãita. Naʉ̃ba jarakĩrãbʉ ãyara ne nẽdobarira naʉ̃ drʉadebema akʉza nokʼora naʉ̃ drʉadebema kʼarebata jʉrʉita. Maʉ̃ kʼarea ãyira Jeowarepanʉ ẽ baera Daizezebara iyi nejʉra kĩrãkʼa akʉyi (Luc. 11:23; Apoc. 6:15-17).
9. ¿Kʼãrẽa Jeowa pʉwʉrʉra awuarabayi zʉbʉria zroma berabaribʉrʉdera akʉza Daizeze nejʉraraba kʼãrẽta oi maʉ̃ kʼarea?
9 Zʉbʉria zroma berabarinʉmʉnera ẽbẽra mejãchaʉta nokʼoare panañi. Mamina Jeowa ʉ̃rʉ Kʼawuabipanʉrãra awuara panañi. Maʉ̃ra ẽbẽra jõmaʉ̃ba ũduyi ãyira Jeoware kʼẽrẽpapanʉta (Apoc. 13:14-17). Maʉ̃ba Daizeze nejʉrara mejãcha kĩrʉñi. Daizeze Bedʼeaba jarabʉ Gog de Magogbara nekayirua zromata oita, naʉ̃ba jarakĩrãbʉ pʉwʉrʉra ãba yi jʉreita Daizeze pʉwʉrʉ naʉ̃ drʉa jõmaʉ̃nẽbema pẽwãita (Ezeq. 38:14-16).
10. Apocalipsis 19:19-21ne jarabʉdebara, ¿ẽbẽrarãba iyi pʉwʉrʉ pẽwãbʉdadera kʼãrẽta oi Jeowabara?
10 Ẽbẽrarãba iyi pʉwʉrʉ pẽwãbʉdadera, ¿kʼãrẽta oi Jeowabara? Iya jarabʉ: «Mʉ̃ra mejãcha kĩrʉñi» (Ezeq. 38:18, 21-23). Apocalipsis 19ba jara ũrĩbibʉ maʉ̃ tẽã kʼãrẽta berabarita. Jeowaba zokʼayi yi warra Jesuta dayirãbari yõmarẽã akʉza iyi nejʉrarata makenamarẽã. Mamina Jesura doba ba ẽ bayi, iyiʉ̃me bayi angelerata akʉza 144.000rata (Apoc. 17:14; 19:11-15). ¿Naʉ̃ yõ tẽãra kʼãrẽta berabari? Daizeze nejʉrarãra akʉza organizasionʼra Jeoware ba ẽ badarãra jõma makenañi (akʉra Apocalipsis 19:19-21).
¿KʼÃRẼTA BERABARI YÕ TẼÃRA?
11. ¿Ʉ̃tʉra kʼãrẽ kʼarea audre sobiapanʉ?
11 ¿Sãwũã panai ẽbẽrarã kʼẽrẽpapanʉrãra Jesuba Daizeze nejʉrara makenana tẽãra? Ãyira mejãcha sobiayi (Apoc. 19:1-3). Akʉza ʉ̃tʉra Babilonia pʉwʉrʉ zroma jõna kʼarea sobiadaimina, audre sobiadayi Kordero boda kʼarea (Apoc. 19:6-9).
12. ¿Sõbede bʼai Kordero bodara? (Apoc. 21:1, 2).
12 ¿Sõbede bʼai Kordero bodara? Daizeze yõ ewari zei nawedara 144.000ra ʉ̃tʉ ãba yi jʉreimina, Kordero bodara maʉ̃ ewaride berabari ẽ bayi (akʉra Apocalipsis 21:1, 2). Awuarabʉrʉ maʉ̃ bodara odayi Daizeze yõ ewari berabarida tẽã akʉza Daizeze nejʉrara jõma makenana tẽã (Sal. 45:3, 4, 13-17).
13. ¿Kʼãrẽta jarakĩrãbʉ Kordero bodabara?
13 ¿Kʼãrẽta jarakĩrãbʉ Kordero bodabara? Bodaba jarakĩrãbʉ yuwẽrã aba yumakẽrã abaʉ̃me juwa jidabʉta. Kordero bodabara jarakĩrãbʉ Jesuta akʉza 144.000rata ãba bʼaita, maʉ̃ mawũã berabaribʉrʉdera ãyara naʉ̃ drʉata 1.000 poagabayeda zokʼa jʉ̃drʉyi (Apoc. 20:6).
¿KʼÃRẼTA BERABARI Ʉ̃RA ZEIDE?
Apocalipsis kapitulo 21ba jara ũrĩbibʉ pʉwʉrʉ Nueva Jerusalénʼra ʉ̃tʉba bae uruta, Daizeze maeba. Jesuba poaga 1.000 bayeda zokʼabʉrʉdera nebiata mejãcha weyi ẽbẽrarã iyi bedʼea ũrĩbʉraitara (Akʉra parrapo 14-16).
14, 15. ¿Apocalipsis 21nera kʼãrẽ kĩrãkʼa bʉa abʉ 144.000rãra?
14 Apocalipsis 21ne bedʼeabʉ pʉwʉrʉ bia kiru ʉ̃rʉ, yi trʉ̃ra Nueva Jerusalén, maʉ̃bara ũdubikĩrãbʉ 144.000rata (Apoc. 21:2, 9). Naʉ̃ pʉwʉrʉra de jĩrʉ 12bʉ ʉ̃rʉ bʉ, Iyi de jĩrʉra mõgarara, mõbe maʉ̃ra mõgara aba abakaʉba abʉ Jesu 12 kʼaidubemara trʉ̃ta. Maʉ̃ba Juanʼra mejãcha sobiasi iyi trʉ̃ta mõgara abaʉde ũdusi baera (Apoc. 21:10-14; Efes. 2:20).
15 Naʉ̃ pʉwʉrʉra jipa awuarabʉ wuabema pʉwʉrʉira. Iyi ora oro oma baera akʉza naʉ̃ pʉwʉrʉbara puertata 12 abʉ. Maʉ̃ra puerta aba abakaʉba perla aba abʉ, adewara yi muroba akʉza yi de jĩrʉbara mõgara biʼia kiruta abʉ. Maʉ̃ daucha naʉ̃ pʉwʉrʉ drazoara akʉza yi jedeara dauchabasi (Apoc. 21:15-21). Mamina Juanba ũdubʉ naʉ̃ pʉwʉrʉdera nei waebʉta, ¿kʼãrẽba maʉ̃ra? Iya jarabʉ: «Mʉ̃a maʉ̃ pʉwʉrʉdera templora ũdu ẽ basi, Jeowata akʉza Jesuta yi templora baera. Naʉ̃ pʉwʉrʉbara nesida ẽ ũmadaʉba akʉza jedekoba iyi ʉ̃rʉ ʉ̃naita, Daizezeba ʉ̃na erbʉ baera akʉza Korderota yi ĩbira baera» (Apoc. 21:22, 23). Apocalipsisba jarabʉ Jeowata akʉza Jesuta yi templota, maʉ̃ba ũdubikĩrãbʉ 144.000rãra Jeowaʉ̃me ãba panaita (Heb. 7:27; Apoc. 22:3, 4).
Doba akʉza bakuruba nebiata jarakĩrãbʉ, ¿kʼairaba ũdui maʉ̃ra nebiara? (Akʉra parrapo 16 akʉza 17).
16. ¿Jesuba 144.000rabawaraʉba zokʼabʉrʉdera kʼãrẽ nebiata ũdui ẽbẽrarãbara?
16 Ʉ̃ta wãirãra mejãcha sobiapanʉ naʉ̃ pʉwʉrʉ ʉ̃rʉ krĩchabʉrʉde, mamina nama egorode panairasida sobiadaibara maʉ̃ ʉ̃rʉ krĩchabʉrʉdera. Juanba ũdubʉ naʉ̃ pʉwʉrʉdebʉta dota akʉza yi do kʼawarabʉta bakururata, adewara naʉ̃ra bakurubara kiduata abʉ ẽbẽrarã bebikʉaita. Maʉ̃ba jarakĩrãbʉ Jesuba akʉza 144.000rabawaraʉba poaga 1.000 bayeda zokʼabʉrʉdera dayirãba nebia mejãcha ũdudaita (Apoc. 22:1, 2). Ẽbẽrarã maʉ̃ ewaride nama egorode panʉrabara ũduyi maʉ̃ nebiara, adewara wiña wiñane ãyi kakuata akʉza ãyi krĩchata jõma daucha bayi. Ẽbẽrarãra wua kaya ẽ bai baera akʉza wua bei ẽ bai baera, adewara sopʉaba jẽga ẽ bai baera (Apoc. 21:3-5).
17. ¿Jesuba 144.000rabawaraʉba zokʼabʉrʉdera kʼairaba ũdui ãya nebia diabʉrʉra? (Apoc. 20:11-13).
17 ¿Kʼairaba ũdui naʉ̃ra nebiara? Ẽbẽrarã Daizeze yõ ewaride beida ẽ badaraba akʉza wũãwũãra ẽjũã biade tobʉrʉraba. Adewara Apocalipsis 20ba jarabʉdebara ẽbẽrarã beidara jẽda piradrʉbʉrʉraba (akʉra Apocalipsis 20:11-13). ¿Kʼairata jẽda piradrʉi? Ẽbẽrarã yi nebia obeadarata. Naʉ̃ba jarakĩrãbʉ ẽbẽrarã ãyi beinaena kʼẽrẽpabadarata akʉza ẽbẽrarã bia ẽã oberata. Naʉ̃bara jarakĩrãbʉ ẽbẽrarã Daizeze ũdukʼawua ẽ badata ãyi beinaena (Hech. 24:15; Juan 5:28, 29). ¿Jesuba 144.000rabawaraʉba zokʼabʉrʉdera beidarata jõma jẽda piradrʉika? Mawũã ẽ. Piradrʉ ẽ bayi yi ẽbẽrarã Daizeze ʉ̃rʉ ũrĩnata mõbe maʉ̃ta oda ẽ badarata. Ãya odadeba ũdubisida baera drʉa kĩrãwãreãnẽ bakĩrã ẽ basita (Mat. 25:46; 2 Tes. 1:9; Apoc. 17:8; 20:15).
¿1.000 POAGA BERABARIDA TẼÃRA KʼÃRẼTA BERABARI?
18. ¿1.000 poaga jõbodoarera sãwũã bʼai ẽbẽrarãra?
18 Poaga 1.000 berabarida tẽãra ẽbẽra naʉ̃ drʉa jõmaʉ̃nẽbemata kayirua okabayi akʉza ãyi kakuasida jõma biʼia bayi. Mia abaʉta zʉbʉria ẽ bayi Adánba nemitia oda kʼarea (Rom. 5:12). Maʉ̃ba jaraseapanʉ 1.000 poaga jõbodoarera ẽbẽrarã nama egorodera jipa bia panaita. Ãyira kayirua oka bʼai baera akʉza ãyi kakuasida bia bʼai baera (Apoc. 20:5).
19. ¿Diaru uria daʉkʉrenʉmʉneba ẽdrʉbʉrʉdera kʼãrẽta oibara dayirã aba abakaʉba?
19 Dayirãba kʼawuapanʉ Jesura kayirua okabasita, iyira Jeoware kʼẽrẽpabasita Diaruba kayirua obikĩrãbasimina. 1.000 poaga berabarida tẽãra dayirãra kayirua okabayi akʉza Diarubara kayirua obikĩrãbayi. Maʉ̃nera, ¿kʼãrẽta oi dayirãbara?, ¿kʼẽrẽpa bʼaika Jesu kĩrãkʼa? 1.000 poaga jõbodoarera Diarura uria daʉkʉrenʉmʉneba ẽdrʉyi, maʉ̃nera dayirã aba abakaʉba jidaibara kʼãrẽta oita, iyi bedʼeata ũrĩta mawũã ẽ bʉrʉ Jesude kĩrãkʼa oita (Apoc. 20:7). Yi ẽbẽra kʼẽrẽpapanʉrãra ewari jõmaʉ̃nẽ panañi (Rom. 8:21). Mamina yi Diaruare panʉrãra jipa beiyi Diaru akʉza yi kʼaidubemara kĩrãkʼa (Apoc. 20:8-10).
20. Libro Apocalipsis ʉ̃rʉ kʼawuada tẽãra, ¿sãwũã sentibʉ bʉra?
20 ¿Libro Apocalipsis ʉ̃rʉ kʼawuada tẽãra sãwũã sentibʉ bʉra? ¿Sobiabʉka bʉabida ũdui baera maʉ̃ propesia aripe berabarinʉmʉta? ¿Kʼarebakĩrãbʉka wuabemarasida Daizeze pʉwʉrʉde bamarẽã? (Apoc. 22:17). Apocalipsis libro akʉdadeba mejãcha sobiapanʉ, kʼawuasida baera aranʉbai kʼãrẽ berabari ʉ̃rʉ, maʉ̃ kʼarea Juanba bedʼea jarada kĩrãkʼa jarakĩrãpanʉ: «Amen, zera Nokʼo Jesu» (Apoc. 22:20).
TRÃBI 27 La revelación de los hijos de Dios
a Naʉ̃ artikulode kʼawuadayi ẽbẽrarã kʼẽrẽpapanʉrabara ʉ̃ra zeide nebia ũduita, mamina yi Jeowa nejʉrarãra bia wã ẽ baita.