Mʉ̃ra Jeowa idu yi jaradiabibʉ

BLACK COUNTRYDEBA ẼBẼRA BIA ÁFRICADEBEMAMA

Mʉ̃ra tosida poaga 1935de Darlaston (Inglaterrade), pʉwʉrʉ Black Countrydebemamae, naʉ̃ bedʼeabara jarakĩrãbʉ pʉwʉrʉ paimata. Naʉ̃ pʉwʉrʉra mawũã trʉ̃gasida, empresata mejãchabasi baera akʉza nãrĩ paimarata ʉ̃tʉ zebasi baera. Mʉ̃ poaga kimarebaside mʉ̃ yibarirabara Daizeze Bedʼeata kʼawua jʉ̃drʉsida Jeowa ʉ̃rʉ Kʼawuabipanʉrãbawara. Maʉ̃ta mʉ̃ 15 poaga babodode mʉ̃a kʼawuasi naʉ̃ta religion wãrĩnuarata, mawũã mʉ̃ra 16 poaga babʉrʉde buru kʼoesi poaga 1952de.

Maʉ̃ tẽã mʉ̃ra traja jʉ̃drʉsi empresa zroma nekʼãrẽ karruraita obʉde. Aramaʉ̃ne mʉ̃a jaradia jʉ̃drʉsida ãyi empresa sekretario bamarẽã. Maʉ̃ra mʉ̃ara mejãcha kãgabasi.

Ewari aba kongregasionʼra akʉbari zõrãrãba mʉ̃aʼa widisi jaradiaseabʉ kʼawuaita Ãba yi jʉrebarimae Daizeze Bedʼeadebema libro akʉita. Maʉ̃ra jaradiaibasi maʉ̃ semanane kongregasion Willenhallde. Mʉ̃ara kʼawua ẽ basi kʼãrẽta oita. Maʉ̃nera mʉ̃ra ãba yi jʉrebasi kongregasion ũmene, semananera wãbasi kongregasion Bromsgrovema naʉ̃ra mʉ̃ trajo kʼawabasi baera, maʉ̃ra mʉ̃ dedaʉba 32 kilometrobasi. Kõbe semana jõna tẽãra mʉ̃ra wãbasi mʉ̃ yibarirabawara kongregasion Willenhallma.

Mʉ̃a Jeowa organizasionta kʼarebakĩrãbasi baera, ĩjãsi kongregasionʼra akʉbari zõrãrãba jaradata, mʉ̃a maʉ̃ oira idubʉibarabasimina mʉ̃a trajo mejãcha kãgabadata. Maʉ̃ ewaride Jeowa yi jaradiabisi baera mʉ̃ara nekʼãrẽ biata mejãcha ũdusi. Mʉ̃ara nãã nekʼãrẽ bia erbadata, kʼãrẽa jẽda krĩchanʉmaira neẽ basi.

Mʉ̃ kongregasion Bromsgrovema jʉ̃ẽsidera mʉ̃a ũdukʼawuasi mebẽã wẽrã Anneta. Naʉ̃ mebẽã wẽrãbara jĩpa obasi Daizezedebemata. Maʉ̃ta daira juwa jidasida 1957de. Mamaʉ̃ba ʉ̃ta daira yi nãã edebari 70 ora diabaribasida, maʉ̃are yi nãã edebari 130 ora diabaribasi, tẽã mʉ̃ra kongregasionʼra akʉbari zõrãrãbasi adewara trʉ̃sida Betelde trajadamarẽã. Mʉ̃ra mejãcha sobia zebʉrʉ mʉ̃ kima Anneʉ̃me.

Maʉ̃ta poaga 1966de daira trʉ̃sida eskuela Galaadʼeda yi klase 42ma. Maʉ̃nera daira mejãcha sobiapanasi. Mawũẽra maʉ̃ eskueladeba dai ẽdrʉda tẽã zokʼa bʉesida pʉwʉrʉ Malauieda. Maʉ̃ pʉwʉrʉra ẽbẽra mejãchaʉba trʉ̃gapanʉ ẽbẽra bia Áfricadebema. Ãyara ẽbẽra jõmaʉ̃ta bia edapanʉ baera. Mamina daira mama dããraba ẽ basi daiba krĩchapanana kĩrãkʼa.

MALAUIDE KʼÃRẼ BEDʼEA ZROMA ŨDUDATA

Daira Malauimara jʉ̃ẽsida 1 febrero poaga 1967de. Maʉ̃ tẽã daiʼa mama bedʼeapanʉ bedʼeata, jaradiasida jedeko ababayeda, maʉ̃are daira superintendente distrito babisida. Daira wãpanasi karru badumae edebʉde. Daiba krĩchapanasi maʉ̃ karrubara doeda edeita, mamina do nãbʉadera wãbe ẽ basi, awuarabʉrʉ berabariseabasi do istabʉdebʉrʉ. Daira ode wãne edaʉde kʼãĩpanasi de egoro omane. Maʉ̃ dera joabasi kiduaba. Maʉ̃ta kue zebʉrʉdera edaʉde kue zarrabasi. Maʉ̃ kʼarea lonaba ara joatrʉpanasi kueta eda ze ẽ marẽã. Daitara nããrãra zareabasimina daira sobiapanasi.

Maʉ̃ne daiba ũdusida abrilde bedʼea zroma jʉ̃drʉibasita. Mʉ̃a ũrĩsi radiode nokʼo Malaui yi trʉ̃ Hastings Bandaba jarabʉta Jeowa ʉ̃rʉ Kʼawuabipanʉrãra politikade edabʉta akʉza impuesto pagakĩrã ẽãta, mamina maʉ̃ra jipa sewidabasi. Ãyara jʉra jĩrpanasi Jeowa ʉ̃rʉ Kʼawũabipanʉrãra kʼaiare bʉ ẽ baera. Adewara kãgapanasi edadamarẽã tarjetata, mawũã ũdubita ãyiare bʼaita. Maʉ̃ta oda ẽ basi baera Jeowa ʉ̃rʉ Kʼawuabipanʉrãba, ãyira mejãcha kĩrʉpanasi.

Maʉ̃ta septiembrede ʉ̃ta, nokʼo Malauibara jarasi Jeowa ʉ̃rʉ Kʼawuabipanʉrãbara bedʼea zromata obarabʉta badumae. Maʉ̃ kʼarea akʉza jarasida Jeowa ʉ̃rʉ Kʼawuabipanʉrãra wua jaradiabida ẽ marẽã Daizeze Bedʼeara. Maʉ̃ra mawũã ojʉ̃drʉsi 20 octubre poaga 1967de. Maʉ̃ audre ẽãne jʉ̃ẽsida jenenerata akʉza ẽbẽrarã yi maʉ̃ drʉadebema ẽ ãĩ jʉrekʉabarita. Wua ewabida ẽ basi sukursalta akʉza mebẽrã mamabema drʉadebema ẽãra ãĩ jʉrekʉadaita naʉ̃ drʉadeba.

Maʉ̃ne daita jidasida mõbe edesida karselʼeda mawũã ewari ũbea berabarisi. Maʉ̃ tẽã edesida pʉwʉrʉ Mauricioma, maʉ̃ra zokʼabasi Inglaterraba. Mamina mamabema nokʼobara kãga ẽ basi daiba Daizeze Bedʼea jaradiaira, maʉ̃ kʼarea Jeowa organizasionba daira zokʼa bʉesi Rodesiaeda (maʉ̃ra idi ewadera trʉ̃gapanʉ Zimbabue). Dai mama jʉ̃ẽbʉrʉdera, jenene kayirua abaʉba jʉ̃ãnʉmasi. Maʉ̃ba idu eda wãbi ẽ basi. Mõbe iya jarasi daiʼa: «Marãra jʉretasida Malauideba akʉza Mauriciodera Daizeze Bedʼeata idu jaradiabida ẽ basi akʉza namapanʉ marata bia wãi baera». Maʉ̃ kʼarea mʉ̃ kima Annera mejãcha jẽgasi, daimara mia kʼaiba dai kãgabʉ ẽ kĩrãkʼabasi. Maʉ̃ ewaridera mʉ̃ra jẽda wãkĩrãbasi Inglaterrama, mamina mamabema nokʼobara iduaribisi daita ũnadrʉmarẽã sukursal mamabemane. Mamina nrʉema daita ãyi karselʼidu jʉ̃ẽbasibʉrʉ. Daira mapaepanasi, mawũãsidu daibara jõma Jeowa juwade amaesi. Nrʉema kewarade daiba krĩcha ẽ badata berabarisi, daiʼa jarasida Zimbabuede panamarẽã drʉa jãpeba zeda kĩrãkʼa. Mʉ̃a kĩrãdua ẽ bayi maʉ̃ ewaride mʉ̃ sãwũã sentibadara mʉ̃ta Jeowa idu yi jaradiabibʉ baera mʉ̃a biʼia kʼawuabasi Jeowaba mʉ̃ta kʼarebabʉta.

TRAJO YIWIDITA DIASIDA: ZIMBABUEDEBA TRAJASIDA DAIZEZEITA MALAUIʼIDU

Sukursal Zimbabuede mʉ̃ra trajabisida Departamento Serbisiode, mamaʉ̃ba akʉmarẽã Malauita akʉza Mozambiqueta kʼãrẽ berabaribʉta. Mebẽrã Malauidebemabara mejãcha awuantapanasi ãyi pẽwãbarabʉta. Mʉ̃ra trajabasi kongregasionʼra akʉbari zõrãrã Malauidebemaba bedʼea dia bʉepanʉta tradusibʉde. Ewari aba diamasibasidu trajasi. Mʉ̃a tradusibasi mebẽrãba karta dia bʉedata. Maʉ̃ne mʉ̃a kʼawuasi mebẽrã kʼãrẽaba zʉbʉrianʉmʉta, maʉ̃ kʼarea mʉ̃ra mejãcha jẽgasi.a Mamina sobiabasi ãyira kʼẽrẽpabasi baera Jeowaʉ̃me, ĩjãbʉta ũdubipanasi baera akʉza awuantapanasi baera (2 Cor. 6:4, 5).

Daibara nekʼãrẽ jõma obasi mebẽrã Malauide panʉraba Daizezedebemata jõma erbamarẽã akʉza mebẽrã Mozambiqueʼeda yõ kʼarea mĩrʉ wãnabida erpanamarẽã. Chichewa bedʼeade tradusipanʉrata, wãsida Zimbabuema, mama mebẽã abaʉba drʉa diadama. Naʉ̃ mebẽãbara nekʼãrẽ biata mejãcha osi. Iyara deta parã diasi akʉza aramaʉ̃ne opisinata odiasi yi tradusipanʉrata mama panamarẽã. Mawũã ãya Malauita kartara tradusipanʉta idʉbʉda ẽ marẽã.

Daibara nekʼãrẽ jõma osida kongregasion akʉbari zõrãrãta wãnamarẽã Zimbabueʼeda poagaza, asamblea sirkuitoeda chichewa bedʼeade ũrĩta. Mama kongregasion akʉbari zõrãrãra diapanasi asamblea boskejota. Ãyi Malauima jẽda zebʉrʉde, mebẽrã jara ũrĩbipanasi ãya ũrĩnapeadata. Mebẽrã kongregasion akʉbari zõrãrãra poagaza jʉ̃ẽpanasi Zimbabueʼeda, mawũẽra naʉ̃ poaga abaʉde daiba osida Escuela Ministerio del Reinota, mawũã naʉ̃ra zõrãrã so zarea diaita ãya zarea obʉ kʼarea.

Febrero 1975de, mʉ̃a akʉ jʉ̃ẽsi mebẽrã Malauidebemata yõ kʼarea wãnata Mozambiqueʼeda, mama ãyira panasi de ãyaʼa kʼareba diapanʉmae. Naʉ̃ra mebẽrãrarã Jeowa organizasionʼʉ̃me daucha wãbasi adewara ãyi kongregasione zõrãrãta bio trʉ̃gakʉasida. Mamara mebẽrã zõrãrã yiwidibara jõma ara oerpanasi Daizezedebema oita, jʉrʉsida diskurso diaita, testo ewarizadebema ũrĩbidaita, Jarakabʉ kʼawuadaita akʉza asamblea odaisida erpanasi. Mama mebẽrã pananamaera jõma daucha oerpanasi asambleade obari kĩrãkʼa, basi de imabarita, yi nekʼãrẽ aduada akʉbarita, yiko diabarita. Mebẽrãbara Jeowa kʼarebadeba nekʼãrẽ biata mejãcha osida, mʉ̃a maʉ̃ ũdubʉrʉba mʉ̃ra mejãcha so zarea ẽdrʉsi mamaʉ̃ba.

Poaga 70ra jõbodoarera sukursal Zambiadebemaba akʉ besi Malauira. Mamina, mʉ̃ara mejãcha krĩchabasi mebẽrã Malauidebemara akʉza mʉ̃a kʼawuabʉ ãyabida daita mejãcha krĩchabasita. Mʉ̃ra mebẽrã Betel akʉbari Zimbabuedebemabasi baera edaʉde ãba yi jʉrebasi mebẽrã sentral mundialdebemabawara akʉza mebẽrã Malauidebema akʉza Sudáfricadebema adewara Zambiadebema akʉpanʉrabawara. Ewari jõmaʉ̃nẽ jõmaʉ̃ba iyabaʉta widipanasi: «¿Kʼãrẽta wua oseapanʉ mebẽrã Malauidebema kʼarebaita?».

Wiña wiñane Malauide mebẽrã pẽwãpanarãra idubʉ wãsida, maʉ̃ba ʉ̃kʉrʉ mebẽrã mĩrʉ wãnara jẽda wãseabasi ãyi drʉaeda. Yi Malauide pananara nãã zʉbʉriabada kĩrãkʼa zʉbʉriada ẽ basi adewara pʉwʉrʉra Malaui kʼawuapanʉrabida idu jaradiabi wãsida akʉza Mozambiquebida abarika osi 1991ne. Mamina dayikʉza widipanasi: «¿Sõbede jipa iduaribidaiba Jeowa ʉ̃rʉ Kʼawuabipanʉrã Malauidebemaba jaradiadamarẽã?».

JẼDA WÃSIDA MALAUIMA

1993de nokʼo Malauidebemabara iduaribisida jaradiaita. Maʉ̃ tẽã, mebẽã abaʉba awuru drʉaeda zokʼa bʉepanʉ jaradiaita maʉ̃ba mʉ̃aʼa widisi: «¿Malauieda jẽda wãika bʉra?». Maʉ̃nera mʉ̃ra 59 poagabasi baera, mʉ̃a iya panʉsi: «Wã ẽ mʉ̃ra zõnabasi baera». Mamina, iyabaʉ ewaride Zõrãrã Burubiaba zokʼa bʉesida kartata daita, mama jarabasi jẽda wãmarẽã Malauieda.

Daibara mejãcha kãgabasi Zimbabuede bʼaira, neũdukʼawuarata mejãcha erbasi baera, maʉ̃ba mejãcha zareabasi mamaʉ̃ba wãira. Zõrãrã Burubiarabara dai ʉ̃rʉ mejãcha krĩchabasi baera, jarasida daita Zimbabuede bakĩrãbasibʉrʉ baseabasita. Daitara zare ẽ bakasi jidaita daiba kãgabʉma wãira. Mamina mʉ̃a krĩchasi Abrahán akʉza Sara yiza ʉ̃rʉ, ãyira zõnabasimina idubʉsida ãyi drʉata mawũã Daizezeba kãgabʉma wãita (Gén. 12:1-5).

Maʉ̃ba krĩchasida Jeowa organizasionʼa yi edebita, 1 febrero 1995de jẽda wãsida Malauima, dai mainʉ jʉ̃ẽbada 28 poaga bada tẽã. Jidasida mebẽrã ũme akʉza mʉ̃ta Betel akʉbari bamarẽã, tẽã daiba jʉrʉsida maʉ̃ drʉade Daizeze Bedʼea sãwũã jaradiaita.

JEOWABA WARIBIBɄ

Arigʉ yibiabasi ũduita Jeowaba sãwũã mesera waribisita iyi ʉ̃rʉ jaradia wãita. 1993deba 1998 bayedara ẽbẽra mejãchaʉba jaradia jʉ̃drʉsida Daizeze Bedʼeata, nããra 30 mil ẽbẽrarãbasi jaradiapanʉrata, mamina maʉ̃ tẽã warisi 42 mil ẽbẽrarã jaradiapanʉrama.b Trajota mejãchabasi baera Zõrãrã Burubiarabara iduaribisida sukursalta parãnamarẽã. Maʉ̃ tẽã edasida drʉata 12 etareabʉta Lilongüede, maʉ̃ne mʉ̃a jarasida akʉmarẽã maʉ̃ de parãnʉmʉta.

Mayo 2001ne, mebẽã Guy Pierceba, Zõrãrã Burubiadebemaba, diasi diskursota aba maʉ̃ de maparã berabarida kʼarea. Jeowa ʉ̃rʉ Kʼawuabipanʉrã 2 mil audre jʉ̃ẽsida maʉ̃ diskurso ũrĩta. Maʉ̃ranebema mejãchaʉra 40 poaga audrebasi buru koedata, ãyi pẽwãpanasidera naʉ̃ra mebẽrãbara mejãcha awuantasida ãyi mejãcha zʉbʉria obarabʉta. Ãya nekʼãrẽ bia mejãcha erba ẽ basimina, Daizeze kʼawa biapanasi, ãya Betel akʉ jʉ̃ẽsidera mejãcha sobiapanasi. Maʉ̃ba mejãcha trãsida. Mʉ̃a maʉ̃ ũdudaba mejãcha sobiasi, ãyi yiza biadeba ũdupanʉ Jeowabara nebiata diabʉta iyiare kʼẽrẽpapanʉrãra.

Sukursal jõma oda tẽã, mʉ̃ra zokʼasida wãmarẽã Daizeze de maparãbʉrʉde diskurso diaita. Kongregasion Malauidebemabara Daizeze dera parãseabasi, Daizeze organizasionba erbʉ baera kʼareba diabarita pʉwʉrʉra plata mejãcha neẽãta Daizeze de parãita. Nããrãra kongregasionʼrãra ãba yi jʉrebasi de zakede, naʉ̃ dera eukalipto bakuruba parãbasi akʉza ãyi jewedabarira egoro omabasi. Atiara mebẽrãbara okĩrã opanʉ ladriyota, mawũã ãba yi jʉrebari de maʉ̃ba parãita. Mamina ãyira jewedabari egoro omane jewedakĩrãpanasi, ãya jarapanasi baera «jewedabari egoro omanera ẽbẽra audre arabʉ».

Adewara mʉ̃ra mejãcha sobiabʉ ũdubʉ baera Jeowaba sãwũã kʼarebabʉta ẽbẽrarã iyi ode audre bia panamarẽã. Audrera sobiabasi ũdubʉrʉde mebẽrã kʉ̃rãra Áfricadebemaba sãwũã mesera kʼawuabasita organizasionba ãya jaradiabʉta. Ãya mawũã jaradiapanʉba nekʼãrẽ mejãcha oseapanasi Betelde akʉza ãyi kongregasionʼrane. Akʉza kongregasionʼra akʉbari zõrãrã maʉ̃ pʉwʉrʉdebemabara so zarea diabasi kongregasionʼrata. Maʉ̃ranebemara mejãchaʉta juwa jidape panasi. Mamina ãyara Jeowa audre diakĩrãpanasi baera krĩchasida toda ẽ baita, ãyi komunidade akʉza ãyi mebẽrãbida tomarẽã jarapanʉmina.

MɄ̃RA SOBIABɄ MɄ̃A OZEBɄRɄ KʼAREA

Mʉ̃ Áfricadebʉta 52 poaga bada tẽã kaya besi. Mebẽrã Betel akʉbariraba jarasida Zõrãrã Burubiara daita zokʼadamarẽã sukursal Gran Bretañanebemaʼma. Dai badamaeba wãira mejãchade pʉbasi daitara, mamina mebẽrã sukursal Gran Bretañanebemabara biʼia akʉpanʉ daira zõna bapanʉmina.

Mʉ̃a biʼia kʼawuabʉrʉ Jeowa idu yi jaradiabira audre yibiata. Mʉ̃yikʉzaʉba krĩchasibʉrʉ kʼãrẽta oita, kʼawua ẽ bakasi mʉ̃ trajoba sainʉ erjʉ̃ẽita. Jeowabara ewari jõmaʉ̃nẽ kʼawuabasi mʉ̃a kʼãrẽta nesidabʉta o biade wãita (Prov. 3:5, 6). Mʉ̃ kʉ̃rãbasiedara mejãchade kʼawuakĩrãbasi sãwũãbasita empresa zromane trajaita. Mamina Jeowa organizasionba mʉ̃a diasi nekãrẽ mʉ̃a obʉde mejãcha sobiabibʉta. Daizezeita trajaiba mʉ̃ra mejãcha sobiabibʉ.