Bia akʉra bʉa Daizezeʼa yiwidʼibʉra

1. ¿Dayirãbara sãwũã akʉibara dayi yiwidʼi bʼaira?

DAYIRÃITARA yibia bajã parãna akʉza Egoro parãna kʼawa bʼaita yiwidʼibʉdeba. Krĩchara naʉ̃ta, dayirã sãwũãbʉra jõma jaraseapanʉ Jeowaʼa, jaraseabʉ badu ewaride akʉza badumae, adewara badu bedʼeade. Dayirãra Jeowa yiwidʼiseabʉ ospitaldebʉde akʉza karseldebʉde, ĩjãpanʉ baera iya ũrĩta dayirã yiwidʼira. Dayirãbara biga diaibara Jeowa naʉ̃ nebia kʼarea.

2. ¿Sãwũã ũdubisi nokʼo Davidbara biʼia akʉbʉta Daizezeʼa yiwidʼibʉra?

² Nokʼo Davidbara bia akʉbasi Daizezeʼa yiwidʼibʉra. Iya Jeowa trãsi: «Mʉ̃ yiwidʼibʉra insienso kĩrãkʼa akʉra» (Sal. 141:1, 2). David ewaridera insienso Jeowa yiwidʼita saserdoteraba zokʼabadara biʼia yi oma bʼaibarabasi (Éx. 30:34, 35). Davidba insienso ʉ̃rʉ bedʼeasidera jarakĩrãbasibaibara Jeowa yiwidʼibʉrʉdera biʼia krĩchaibarabasita kʼãrẽta jaraita. Abarika insienso biʼia obada kĩrãkʼa. Dayirãbida abarika okĩrãpanʉ, kãgapanʉ dayirã Jeowa yiwidʼibʉrʉde dayirãba jarabʉba sobiamarẽã.

3. ¿Dayirã Jeowa yiwidʼibʉrʉdera kʼãrẽta ũdubibara akʉza kʼãrẽa?

³ Jeowa yiwidʼibʉdadera wawia ũdubidaibara. Krĩchara Isaías, Daniel, Ezequiel akʉza Juanba ũduda ʉ̃rʉ. Ãya ũdudara awuarabasimina abaʉde abarikabasi. Ũdubibasi Jeowara Nokʼo biata. Isaíasba «ũdusi Jeowara ʉ̃tʉ bʉguede jewadabʉta» (Is. 6:1-3). Ezequielba ũdusi Jeowara iyi karru ʉ̃rʉ jewedabʉta akʉza iyi audura ʉ̃nabasi euma kĩrãkʼa (Ezeq. 1:26-28). Danielba ũdusi zõrãrã ewaridebemata wua torro jʉ̃bʉta akʉza iyi bʉguedeba pʉreata ʉ̃tʉ zebʉta (Dan. 7:9, 10). Juanba ũdusi Jeowara jewedabʉta bʉgue ʉ̃rʉ. Iyi audura euma biʼiakiruba purrabasi (Apoc. 4:2-4). Dayirãba krĩchabʉrʉde Jeowaba kʼãrẽaba zarea erbʉta naʉ̃ba kĩrãbebibʉ dayirãba iyaʼa yiwidʼibʉrʉdera wawia ũdubibarata. Mamina, ¿dayirã yiwidʼibʉrʉdera kʼãrẽta jaraibara?

«MARARA KʼÃWŨÃ YIWIDʼIDUA»

4. Jesuba jaradiasi sãwũã yiwidʼibarata, ¿dayirãbara kʼãrẽta kʼawuapanʉ iya bedʼea nãã jaradadebara? (Mateo 6:9, 10).

⁴ (Akʉra Mateo 6:9, 10). Katumane bedʼea bia jaraside Jesuba iyi kʼaidubemara jaradiasi sãwũã yiwidʼibarata Jeowaba kãgabʉde. Maʉ̃are jarasi «kʼãwũã yiwidʼidua». Nããrãra Jesubara jaradiasi yiwidʼibʉrʉdera Jeowaba kʼãrẽ oita krĩchabʉ ʉ̃rʉ yiwidʼimarẽã: Daizeze trʉ̃ neneẽã erbai ʉ̃rʉ akʉza Daizeze Nokʼo zebimarẽã, mawũã ẽbẽra kayiruara makenaita. Adewara Daizezeba ʉ̃ra zeide nebia wekĩrãbʉ ʉ̃rʉ ẽbẽrarãita akʉza naʉ̃ ẽjũãita. Dayirãba yiwidʼibʉrʉde naʉ̃ ʉ̃rʉ wididara ũdubidayi dayirãitara wãrĩnu yibiata Daizezeba oita krĩchabʉra.

5. ¿Bigaka yiwidʼita daya nesidabʉ ʉ̃rʉ?

⁵ Tẽã Jesuba jaradiasi yibiata yiwidʼita dayirãba nesidabʉ ʉ̃rʉ. Dayirãba widiseapanʉ yiko idibema diamarẽã, dayirã kayirua kĩrãduamarẽã akʉza eda baebi ẽ marẽã kayirua oi krĩchabʉde adewara Diaru juwadeba ẽdrʉbimarẽã (Mat. 6:11-13). Dayirãba Jeowa yiwidʼibʉrʉde naʉ̃ ʉ̃rʉ widibʉrʉdera, ũdubipanʉ iyi kʼareba nesidapanʉta akʉza iya kãgabʉta okĩrãpanʉta.

6. ¿Jesuba yiwidʼiside widida awa widibaraka? Jara ũrĩbira.

⁶ Jesuba kãga ẽ basi iyi kʼaidubemaraba yiwidʼibʉrʉdera iya jarada bedʼeata abarika jaradamarẽã. Iyi yiwidʼisidera nekʼãrẽ bio ʉ̃rʉ bedʼeasi akʉza iyi kʼãrẽba krĩcha zroma obibʉ ʉ̃rʉ bedʼeasi (Mat. 26:39, 42; Juan 17:1-26). Dayirãbida yiwidʼibʉrʉdera jaraseabʉ nekʼãrẽ dayirã krĩcha zroma obibʉta akʉza dayirã nekʼãrẽ jidai nããra widibara diamarẽã buru biata akʉza biʼia ũrĩbimarẽã (Sal. 119:33, 34). Dayirã nekʼãrẽ omarẽã jaradata zareabʉbʉrʉ, widiseabʉ Jeowa buru bia diamarẽã akʉza kʼawuabimarẽã kʼãrẽta oita (Prov. 2:6). Yibarirãra yiwidʼiseabʉ yi wũãwũãra kʼarea, yi wũãwũãrãra yiwidʼiseabʉ ãyi yibarira kʼarea, dayirã jõmaʉ̃ta yiwidʼiseapanʉ dayirã nekʼawuabari kʼarea. Mamina Jeowaʼa yiwidʼibʉrʉdera bari kʼareba awa widibara ẽ.

7. ¿Dayirã yiwidʼibʉrʉdera kʼãrẽa Jeowaba nebia erbʉ ʉ̃rʉ bedʼeaibara?

⁷ Jeowa yiwidʼibʉrʉdera iya nebia erbʉ ʉ̃rʉ bedʼeaibara. Salmo bʉdaba jarasi Jeowaʼa: «Ẽbẽra bia akʉza kĩrãduabʉ dai kayiruara». Akʉza jarabʉ: «Daizeze so zʉbʉria akʉbʉ akʉza nebia obʉ, kĩrʉmia ẽ akʉza kãga jõka mejãcha erbʉ akʉza wãrĩnuara» (Sal. 86:5, 15). Jeowa sãwũãbʉ kʼarea akʉza iya kʼãrẽ obʉ kʼarea dayirãra ibia bedʼeaibara iyi ʉ̃rʉ.

8. ¿Kʼãrẽ kʼarea biga diaseabʉ Jeowaʼa? (Salmo 104:12-15, 24).

⁸ Dayirãba Jeowa ʉ̃rʉ ibia bedʼeabʉ awuara biga diaibara iya dayirã nekʼãrẽ biata diabʉ kʼãrẽ baera, bari jaraita biga diaseapanʉ Jeowaʼa nepono akʉza yiko nekĩrãtana diabʉ kʼarea, adewara dayirã neũdukʼawua bia diabʉ kʼarea. Daizezebara jõma naʉ̃ta dayirã diabʉ kʼãrẽ dayirãta sobiapanamarẽã (akʉra Salmo 104:12-15, 24). Adewara biga diaibara iya dayirã jaradiabʉ kʼarea sãwũã dayirãba ĩjãbʉ audre zarea erbaita akʉza iya dayirã nebia diaya abʉ kʼarea.

9. ¿Kʼãrẽba kʼarebaseabʉ Jeowa biga diaita kĩrãdua ẽ baita? (1 Tesalonicenses 5:17, 18).

⁹ Edaʉde dayirãba kĩrãduaseabʉ Jeowaʼa biga diaita mamina, ¿kʼãrẽba kʼarebaseabʉ kĩrãdua ẽ baita iyaʼa biga diaita? Kartade bʉseabʉ bʉa Jeowaʼa nejõma widi zebʉrʉta, maʉ̃are akʉseabʉ maʉ̃ranebema Jeowaba saʉ̃ta panʉbʉrʉta. Mawũã ũdubʉrʉde Jeowaba saʉ̃ta panʉnata biga diaseabʉ maʉ̃ kʼarea (akʉra 1 Tesalonicenses 5:17, 18). Krĩchara naʉ̃ta: awuruba dayirã biga diabʉrʉdera dayirãra sobiapanʉ, abarika Jeowasida sobiabʉ dayirãba iyaʼa biga diabʉrʉde (Col. 3:15). Mamina nekʼãrẽ awuru kʼarea bida biga diaseapanʉ Jeowara.

BIGA DIARA JEOWAʼA IYI WARRA AUDRE KÃGABɄ KʼAREA

10. ¿Kʼãrẽa biga diadaibara Jeowaʼa Jesuta nama Egoroeda zokʼada kʼarea? (1 Pedro 2:21).

¹⁰ (Akʉra 1 Pedro 2:21). Dayirãbara biga diaseapanʉ Jeowa yi warrata zokʼasi baera dayirã iyi ʉ̃rʉ jaradiamarẽã. Dayirãba Jesu ʉ̃rʉ kʼawuabʉrʉdera nekʼãrẽ mejãcha kʼawuapanʉ Jeowa ʉ̃rʉ akʉza iya kʼãrẽta kãgabʉta dayirãba odamarẽã iyi sobiabita. Dayirãba wãrĩnu ĩjãpanʉbʉrʉ Jesu dayirã kʼarea beisita, Jeowa neũdukʼawuabayi akʉza iyiʉ̃me biabayi (Rom. 5:1).

11. ¿Kʼãrẽa yiwidʼipanʉ Jesu trʉ̃neba?

¹¹ Biga diaibara Jeowa iduaribibʉ kʼãrẽ baera yi warradeba yiwidʼita. Dayirã yiwidʼibʉra Jeowabara ũrĩbʉ akʉza panʉbʉ dayirãba yiwidʼidara yi warra Jesu trʉ̃neba. Jesuba jarasi: «Jõma kʼãrẽ mʉ Zezea widʼibʉdata mʉneba widʼibʉdara mʉã aribʼaeya, aramaʉ̃ne mʉ Zezeta zhi zromata ũdukʼawadʼamarẽã mʉ zhi Warradʼeba» (Juan 14:13, 14).

12. ¿Adewara kʼãrẽ kʼarea biga diaibara Jeowaʼa, iyi Warra dayirã bari beimarẽã zokʼada kʼarea?

¹² Jeowaba kĩrãduabʉ dayirã kayiruara Jesuta dayirã kʼarea beisi baera. Daizeze Bedʼeade jarabʉ Jesura sumo saserdote kĩrãkʼa bʉta akʉza jarabʉ «iyira jewedadogoa Daizeze Nokʼo juwuarare ʉ̃tʉ bajãne» (Heb. 8:1). Jesura dayirã «kʼareba Daizeze kʼawabʉta» (1 Juan 2:1). Sumo saserdote Jeowaba dayirã diadabara kʼawuabʉ dayirã sãwũãbʉra akʉza sãwũã sentipanʉra maʉ̃ kʼarea biga diaibara Jeowaʼa, adewara Jesura dayirã bari bedʼeabʉ (Rom. 8:34; Heb. 4:15). Dayirãra Jeowa yiwidʼiseapanʉ yi warrata dayirã bari beida kʼarea. Bʉmabida neẽ dayirãba sãwũã biga diabʉ ũdubita Jeowaʼa, iya iyi Warra dayirã bari beimarẽã zokʼada kʼarea.

YIWIDʼIRA MEBẼRÃRA BARI

13. Diamasi iyi bei nããra, ¿sãwũã ũdubisi Jesubara kãgabʉta iyi kʼaidubemarãra?

¹³ Diamasi iyi bei nãã, Jesura yiwidʼisi Jeowaʼa iyi kʼaidubemara kʼarea, mõbe widisi kʼarebamarẽã Diaru juwadeba (Juan 17:15). Naʉ̃ba ũdubisi Jesuba kʼãrẽaba kãgabasita iyi kʼaidubemarata. Iyi mejãcha zʉbʉriaita kʼawuabasimina ãyi ʉ̃rʉ krĩchabasi.

14. ¿Sãwũã ũdubipanʉ dayirã mebẽrã kãgapanʉta?

¹⁴ Dayirãba Jesude kĩrãkʼa obʉ ũdubira, bari widibara ẽ dayirãba nesidabʉ awa, awuarabʉrʉ yiwidʼibara dayirã mebẽrã baribida. Mawũã opanʉbʉrʉ ũdubipanʉ Jesuba zokʼadata ũrĩpanʉta wuabemara kãga ũdubita akʉza ũdubipanʉ Jeowaʼa dayirã mebẽrã kãgapanʉta (Juan 13:34). Dayirã mebẽrã ʉ̃rʉ yiwidʼibʉrʉdera ãyita kʼarebabʉ kĩrãkʼabʉ. Daizeze Bedʼeaba jarabʉ «ẽbẽra jipabʉta yiwidʼira, Daizezeʉ̃mebʉbʉrʉ, zarea mejãcha erbʉ» (Sant. 5:16).

15. ¿Kʼãrẽa mebẽrãbara nesidapanʉ ãyi bari yiwidʼidamarẽã?

¹⁵ Dayirã mebẽrãbara nesidapanʉ ãyi kʼarea yiwidʼita ãyara bedʼea zromata ũdupanʉ baera. Jeowa widiseapanʉ ãyita kʼarebamarẽã awuantaita kaya ũdubʉrʉde, naʉ̃ drʉade neida berabaribʉrʉde, yõta akʉza ãyi pẽwãbʉdade, mawũã ẽ bʉrʉ nekʼãrẽ awuru bedʼea zroma ũdubʉrʉde. Adewara mebẽrã awurura kʼarebaya zarea trajapanʉra ʉ̃rʉ bida yiwidʼiseapanʉ. Bʉa ũdukʼawuabʉbaibara mebẽã aba bedʼea zroma ũdunʉmʉta, ¿kʼãrẽa bʉ yiwidʼibʉrʉde iyi trʉ̃ta jara ẽ? Dayirãba mebẽrã wãrĩnu kãgabʉ ũdubipanʉ Jeowa yiwidʼibʉde ãyita kʼarebamarẽã bedʼea zroma awuantaita.

16. ¿Kʼãrẽa yiwidʼidaibara dayirã nãã edepanʉra kʼarea?

¹⁶ Dayirã nãã edepanʉra ʉ̃rʉ yiwidʼibʉrʉdera sobiapanʉ ãyira. Akʉza dayirã yiwidʼiba kʼarebabʉ ãyita. Pabloba kʼawuabasi iya nesidabasita mebẽrãta iyi bari yiwidʼimarẽã. Iya bʉsi: «Mʉ̃ kʼareabida yiwidʼidua, mʉ̃ bedʼeabʉrʉde zowaĩnĩgʉa kʼãrãpe biʼia jaramarẽã mia kʼaiba kʼawua ẽãta bedʼea biadebemata» (Efes. 6:19). Idi ewadebida mejãchabʉ mebẽrã dayirã nãã edepanʉra zarea trajapanʉta. Dayirãba ãyi kãgabʉra ũdubipanʉ Jeowaʼa jarapanʉne kʼarebamarẽã ãyi trajo obʉde.

AWURURA DAIDU DAIZEZEʼA YIWIDʼIBɄRɄDE

17, 18. ¿Sõbede dayirã jaraseapanʉ awurura daidu yiwidʼimarẽã akʉza kʼãrẽ ʉ̃rʉ krĩchaibara maʉ̃ta jarabʉdadera?

¹⁷ Edaʉde dayirã jaraseapanʉ awuru bari yiwidʼimarẽã. Bari jaraita mebẽã abaʉba Daizeze Bedʼea jaradiabʉde, widiseabʉ iyi kopayabʉa yiwidʼimarẽã iyi nekʼawuabari bari. Naʉ̃ mebẽãbara yi nekʼawuabarira biʼia ũdukʼawuabʉ ẽ baera, jaraseabʉ Daizeze Bedʼea jara berabarida tẽãbʉrʉ yiwidʼita. Mawũã iya biʼia kʼawuaita maʉ̃ nekʼawuabariba kʼãrẽ nesidabʉta mõbe maʉ̃ ʉ̃rʉ yiwidʼita.

¹⁸ Edaʉde mebẽã abaʉʼa jaraseapanʉ ãba yi jʉrebʉrʉde mawũã ẽ bʉrʉ Daizeze Bedʼea jaradia wãita ãba yi jʉrebʉrʉde, yiwidʼimarẽã wuabemara daidu. Mebẽã mawũã yiwidʼibʉbara kĩrãbeibara kʼẽã ẽ baibarata akʉza bedʼea jara ẽ baibarata yiwidʼibʉrʉdera. Ãba yi jʉrepanʉitara jidasida 5 minuto trãita akʉza yiwidʼita, maʉ̃ kʼarea mebẽã ãba yi jʉreita yiwidʼibʉrʉdera, mejãcha bedʼea ẽ baibara (Mat. 6:7).

YIWIDʼI BʼAIRA YIBIABAIBARA BɄITARA

19. ¿Kʼãrẽba kʼarebayi Daizeze ewari zebʉrʉdera kĩrãkita panaita?

¹⁹ yiwidʼi bʼaira yibiabaibara dayirãita Daizeze ewari zeita arakʼaita ba baera. Naʉ̃ ʉ̃rʉ Jesuba jarasi: «Mawũã kĩrãkita panaidua, badu ũmadaʉde yiwidʼi beaidua, mawũã ẽdrʉdaita panaidua nebio mejãcha bʉsawadera. Mawũãra kʼãrẽa peradai neẽãbaya mʉ̃ Yumakẽrã Warra kĩrãbitara» (Luc. 21:36). Dayirãta nrʉemaza yiwidʼipanʉbʉrʉ kʼarebayi ʉ̃rʉma bʼaita, mawũã Daizeze ewari zebʉrʉdeba ẽdrʉita.

20. ¿Dayirã yiwidʼira sãwũã insienso kĩrãkʼa baseabʉ Jeowaitara?

²⁰ ¿Kʼãrẽta kʼawuasida? Kʼawuasida Daizezeʼa yiwidʼibʉra bia akʉibarata. Dayirã yiwidʼibʉrʉdera nããra wididaibara Jeowaba oita krĩchabʉ ʉ̃rʉ. Akʉza biga diaibara Jeowaʼa iyi Warra kʼarea akʉza iyi Nokʼo kʼarea. Adewara yiwidʼidaibara dayirã mebẽrã kʼarea. Jeowabara kãgabʉ dayirãba nesidabʉ kʼareabida yiwidʼidamarẽã akʉza wididamarẽã dayirãba ĩjãbʉ zarea erbaita. Dayirãba bia krĩchapanʉbʉrʉ Jeowa yiwidʼi nãã, ũdubidayi dayirãba biʼia akʉpanʉta Daizezeʼa yiwidʼibʉra akʉza dayirã bedʼeara insienso kĩrãkʼabayi (Prov. 15:8).