ARTIKULO KʼAWUAITA 7
Daizeze Bedʼea lebʉrʉde nebiata ũdura
«¿Bʉara kʼãrẽta lebari?» (LUC. 10:26).
TRÃBI 97 Nuestra vida depende de la palabra de Dios
KʼÃRẼTA ŨDUDAITAa
1. ¿Sãwũã kʼawuapanʉ Jesuitara Daizeze Bedʼeara audre yibiabasita?
¿BɄMARA sãwũã jaradiabasiba Jesubara? Jesubara Daizeze Bedʼeadeba jaradiabasi akʉza maʉ̃ra burude kʼawua kʼãrãpe jaradiabasi. Jesuba iyi buru kʼoeside bedʼea jaradata akʉza iyi bei nãã bedʼea jaradara Daizeze Bedʼeade eda jarabʉta jarasib (Deut. 8:3; Sal. 31:5; Luc. 4:4; 23:46). Jesu buru kʼoedadeba iyi beiyedara poaga ũbea berabarisi, maʉ̃nebida Jesubara Daizeze Bedʼeata le ũrĩbibasi akʉza jaradiabasi maʉ̃ba kʼãrẽta jaradiakĩrãbʉta (Mat. 5:17, 18, 21, 22, 27, 28; Luc. 4:16-20).
Jesubara ũdubisi Daizeze Bedʼeara mejãcha kãgabʉta maʉ̃ kʼarea iya jõma odara Daizeze Bedʼeadebʉta osi (akʉra parrapo 2).
2. ¿Kʼãrẽba kʼarebasi Jesuba Daizeze Bedʼea bia ũdukʼawuaita iyi wũãwũã basieda? (Akʉra poto yi nããrabema).
2 Jesuba Daizeze Bedʼea jaradiai naweda, Daizeze Bedʼea lepe akʉza maʉ̃ ʉ̃rʉ bia krĩchabasi, adewara iyi deda yi papa Maríata akʉza Joséʉ̃me badua bedʼeabasi ãya nekʼãrẽ obʉeda Daizeze Bedʼea ʉ̃rʉc (Deut. 6:6, 7). Jesura sabadoza yi mebẽrãbawara sinagogaeda wãbasibaibara (Luc. 4:16). Iyi sinagogade basiedara biʼia ũrĩbasibaibara Daizeze Bedʼea le ũrĩbipanʉta akʉza maʉ̃ tẽã iyikʉza le kʼawuasibaibara Daizeze Bedʼeara. Jesubara biʼia ũdukʼawuasi Daizeze Bedʼeara, maʉ̃ kʼarea iyara mejãcha kãgasi adewara aripe osi mama eda jarabʉta. Bari jaraita, kĩrãbeidua Jesu 12 poagabaside iya kʼãrẽ odata. Iyi templobaside Daizeze Bedʼea bia kʼawuabʉraba iyita kĩrãmiga akʉsida, iya Daizeze Bedʼea sãwũã jaradiabadadeba akʉza sãwũã panʉbadadeba (Luc. 2:46, 47, 52).
3. ¿Kʼãrẽta kʼawuadai naʉ̃ artikulodera?
3 Dayirãba Daizeze Bedʼeata badua lepanʉbʉrʉ biʼia ũdukʼawuadayi akʉza kãga zedayi. ¿Sãwũã Daizeze Bedʼea lepe akʉza nebiata ũduseabʉ maʉ̃neba? Jesu ewaribasidera basi ẽbẽrarã Daizeze Bedʼea ʉ̃rʉ bia kʼawuabʉta, bari jaraita eskribarata, saduseorata akʉza pariseorata. Ãya Daizeze Bedʼea lebasimina bia ũrĩ ẽ basi kʼãrẽta jaradiakĩrãbʉta. Maʉ̃ kʼarea Jesubara ãyaʼa ũrãgʼata diasi, maʉ̃ ũrãgʼara idi ewadebida dayirãita yibia. Jesubara jara ũrĩbisi naʉ̃ra ẽbẽrarãba Daizeze Bedʼeara bia ũrĩna ẽ basita nekʼãrẽ ũbea kʼarea. Jesuba ãyaʼa maʉ̃ne ũbeade ũrãgʼa diadaba dayirãta kʼarebaseabʉ naʉ̃ne: nããra, ũrĩta daya lebʉta. Ũme, ũduita nekʼãrẽ bia Daizeze Bedʼeadebemata. Ũbea, Daizeze Bedʼea idu jaradiabita.
LERA ŨRĨNE
4. ¿Kʼãrẽta jaradiabʉ Lucas 10:25-29 bayeda Daizeze Bedʼea le bʼai ʉ̃rʉ?
4 Dayirãba Daizeze Bedʼea lebʉrʉra biʼia ũrĩnaibara, maʉ̃ta neẽbʉrʉ kʼarebabe ẽ bayi. Bari jaraita, krĩchara Jesu sãwũã bedʼeasita ẽbẽra Daizeze ley ʉ̃rʉ bia kʼawuabʉme (akʉra Lucas 10:25-29). Naʉ̃ ẽbẽraba widisi Jesuʼa kʼãrẽta sãwũã oibarata ewari jõmaʉ̃nẽ bʼaita, aramaʉ̃ta Jesubara panʉsi Daizeze Bedʼeadeba, iya jarasi: «¿Kʼãrẽta bʉchu Leydera? ¿Bʉara kʼãrẽta lebari?». Naʉ̃ ẽbẽrabara aripe panʉsi iya Daizeze Bedʼeade eda jarabʉta jaraside, kãgaibarata Jeowata akʉza wuabemarata (Lev. 19:18; Deut. 6:5). Mamina naʉ̃ ẽbẽrabara tẽã Jesuʼa widisi: «¿Kʼaipe mʉ̃ yãrãra?». Naʉ̃ba ũdubibʉ naʉ̃ ẽbẽrabara bia ũrĩ ẽ basita Daizeze Bedʼeaba jarabʉra, maʉ̃ kʼarea kʼarebabe ẽ basi Daizeze Bedʼeabara.
Dayirãba lebʉta ũrĩ kʼawuaseabʉ
5. ¿Sãwũã kʼarebaseabʉ yiwidʼiba, pikãga leiba, Daizeze Bedʼea bia ũrĩta?
5 Dayirãba Daizeze Bedʼea lebʉta audre bia ũrĩra, kʼawuaibara sãwũã oita. Naʉ̃ne kʼawuadayi ũrãgʼa maʉ̃ ʉ̃rʉ sãwũã oibarata. Daizeze Bedʼea lei nãã Jeowaʼa yiwidʼira akʉza Jeowaʼa widira iyi jaure zareata diamarẽã, mawũã Daizeze Bedʼeaba jarabʉta bia ũrĩta. Maʉ̃are pikãga lera, maʉ̃ba kʼarebayi bia ũrĩta daya lebʉta, adewara bigabayi Daizeze Bedʼea nemi jĩgʉa leita akʉza Daizeze Bedʼea grawama daucha leita, naʉ̃ba kʼarebayi audre biʼia ũrĩta Daizeze Bedʼeaba jaradiabʉta. Mawũã odara audre dayi burude beyi akʉza dayi sode (Jos. 1:8). Daizeze Bedʼea leda tẽãbida yiwidʼira Jeowaʼa biga diaita akʉza widira kʼarebamarẽã Daizeze Bedʼeade eda jarabʉ kĩrãkʼa oita.
¿Kʼãrẽa bʉbʉbara kʼarebabʉ ũrĩta akʉza jẽda kĩrãbeita? (Akʉra parrapo 6).
6. ¿Kʼãrẽne kʼarebabʉ Daizeze Bedʼea lebʉrʉde widita akʉza bʉibara? (Akʉra potota).
6 Adewara ũrãgʼa ũmebʉ dayirãba Daizeze Bedʼea lebʉrʉde sãwũã audre bia ũrĩta. Nããra Daizeze Bedʼea lenʉmʉne bʉyikʉza widira, bari jaraita, ¿kʼaira ʉ̃rʉ audre bedʼeabʉ?, ¿kʼaiʼa bedʼeabʉ?, ¿sama mawũã berabarisi?, ¿kʼãrẽta jarasi? Mawũã widibʉba kʼarebayi kʼawuaita kʼãrẽ ʉ̃rʉ bedʼeabʉta, adewara dayirãba Daizeze Bedʼea lebʉrʉde nekʼãrẽ bʉbʉba kʼarebayi jẽda kĩrãbeita daya ledata, naʉ̃ba jẽda kĩrãbebibʉ daya ledata akʉza bia ũrĩbibʉ. Bʉseabʉ bʉa bedʼea widibʉta, bʉa ũdudata akʉza bʉa sãwũã krĩchabʉta, adewara sãwũã oũdubiseabʉta. Mawũã bʉbʉba kʼarebayi kʼawuaita Daizeze Bedʼeaba jarabʉra bʉita bʉta.
7. ¿Kʼãrẽ nebiata nesidapanʉ lebʉdadera akʉza kʼãrẽa? (Mateo 24:15).
7 Jesubara jaradiasi dayirãba Daizeze Bedʼeade jarabʉta bia ũrĩnaira naʉ̃ nebiata erbaibarata, discernimientota (akʉra Mateo 24:15). ¿Kʼãrẽta jarakĩrãbʉ discernimientobara? Naʉ̃ bedʼeabara jarakĩrãbʉ kʼawuaita saʉ̃ta bigata akʉza saʉ̃ta zeri ẽãta. Mawũã naʉ̃ba kʼarebaseabʉ bia ũrĩta Daizeze Bedʼeaba jõma jarabʉ ẽ mina. Adewara Jesuba jarada kĩrãkʼa naʉ̃ nebiabara kʼarebayi kʼawuaita propesiara sõbede aripe berabarinʉmʉta. Adewara nesidapanʉ naʉ̃ nebiata Daizeze Bedʼea yi kʼarebabita, mawũã dayirã bia wãita.
8. ¿Sãwũã kʼawuaseapanʉ saʉ̃ta yibiata akʉza saʉ̃ta zeri ẽãta lebʉrʉdera?
8 Jeowabara iyi kʼaidubemara jaradiabʉ sãwũã kʼawuaita saʉ̃ta yibiata akʉza saʉ̃ta zeri ẽãta, mawũẽra badua yiwidʼibara Jeowaʼa akʉza widida naʉ̃ nebiata diamarẽã (Prov. 2:6). ¿Sãwũã bʉa widibʉde abarika oseabʉ? Jʉra kʼawua akʉra Daizeze Bedʼeata, kʼawuaita bʉa sãwũã lebʉta abarikabʉ kʼawuaita bʉa kʼawuabʉme. Bʉra kʼarebaseabʉ akʉbʉde kartara Daizeze Bedʼea audre bia ũrĩbibʉta. Bari jaraita, Guía de estudio para los Testigos de Jehová. Naʉ̃ kartabara kʼarebayi bʉa biʼia ũrĩta testo abaʉba kʼãrẽta jaradiabʉta akʉza bʉa sãwũã oũdubibarata mama jarabʉra (Heb. 5:14). Bʉa Daizeze Bedʼea lebʉrʉde zarea ora kʼawuaita saʉ̃ta yibiata akʉza saʉ̃ta zeri ẽãta, mawũãra bia kʼawuayi Daizeze Bedʼeaba jaradiabʉra.
LERA ŨDUITA NEKʼÃRẼ BIA DAIZEZE BEDʼEADEBEMATA
9. ¿Kʼãrẽ wãrĩnu Daizeze Bedʼeade edabʉta ĩjãna ẽ basi saduseorabara?
9 Saduseorabara Daizeze Bedʼeade nããra librora juesomabʉra ũdukʼawuapanasi, mamina ĩjãna ẽ basi Daizeze Bedʼeaba wãrĩnuta jaradiabʉta. Bari jaraita, ewari abaʉde saduseorabara kʼawuakĩrãbasi Jesuba sãwũã panʉita ẽbẽrarã jẽda piradrʉi ʉ̃rʉ, maʉ̃ kʼarea Jesubara panʉsi ãyi bedʼeara naʉ̃ta jaraside: «¿Marãbara Moisé librodʼera ledʼakʼa kĩrãkʼa bʼeta Daizezebara ʉrʉta nʉmʉ maẽba Moiséa mawũãsi ẽka?: ¿Mʉrã Abraham Zhibaria, Isaac Zhibaria, Jacobo Zhibaria asi ẽka?» (Mar. 12:18, 26). Jesuba mawũã jarabadaba ũdubisi saduseoraba Daizeze Bedʼeade naʉ̃ ʉ̃rʉ bio leberabarisimina, ĩjãna ẽ basi Daizeze Bedʼeaba jaradiabʉta ẽbẽrarã jẽda piradrʉi ʉ̃rʉ (Mar. 12:27; Luc. 20:38).d
10. ¿Daizeze Bedʼea lebʉrʉdera kʼãrẽta bia akʉibara?
10 ¿Kʼãrẽta kʼawuapanʉ? Kʼawuapanʉ dayirãba Daizeze Bedʼea lebʉrʉdera biʼia akʉibarata kʼawuaita testo aba abakaʉba kʼãrẽta jaradiabʉta. Daizeze Bedʼea lebʉrʉdera bari ũrĩkĩrapanʉ ẽ yi mesera ũrĩbʉta, awuarabʉrʉ yi zareabʉsida kʼawuakĩrãpanʉ akʉza ũduseabʉ Daizeze Bedʼearadebemata, maʉ̃ ũduira zarea odaibara oro jʉrʉi kĩrãkʼa.
11. 2 Timoteo 3:16, 17de jarabʉdera, ¿sãwũã ũduseabʉ Daizeze Bedʼeade nekʼãrẽ biabʉra?
11 ¿Sãwũã ũduseabʉ nekʼãrẽ bia Daizeze Bedʼeadebʉra Daizeze Bedʼea lebʉrʉde? Krĩchara 2 Timoteo 3:16, 17de jarabʉta (akʉra). Daizeze Bedʼeara yibia (1) jaradiaita, (2) kayirua obʉ kẽãita, (3) aña obe jipa oita, (4) kʼẽrẽpa jipa babita. Naʉ̃ nebia kimarera dayirãbara ũduyi testo dayirãba ũdukʼawuabʉde akʉza ũdukʼawua ẽãnebida. Krĩchara sãwũã Daizeze Bedʼeade eda nebʉrabʉba jaradiabʉta Jeowa ʉ̃rʉ akʉza iya krĩchabʉ ʉ̃rʉ. Krĩchara Daizeze Bedʼea lenʉmʉne yibiata kayirua obʉde kẽãita, mawũã oita krĩchara bʉya lebʉ ʉ̃rʉ naʉ̃ba sãwũã kʼarebaita nebia oita akʉza nekayirua oẽ baita. Mawũã dayirãra Jeowaʉ̃me kʼẽrẽpa baseabʉ. Krĩchara sãwũã naʉ̃ testoba aña obe jipa oita. Bari jaraita, ¿sãwũã zokʼaseabʉ naʉ̃ testora ẽbẽrarãba aña krĩchabʉde jara ũrĩbita? Krĩchara sãwũã naʉ̃ testoba kʼẽrẽpa babibʉta mawũã Jeowa kĩrãkʼa krĩchaita. Daizeze Bedʼea lebʉrʉde krĩchara, naʉ̃ne kʼãrẽ bia kimarebʉ ʉ̃rʉ, mawũãra ũduyi nekʼãrẽ bia Daizeze Bedʼeadebʉta.
DAIZEZE BEDʼEA LEBɄDE MAɄ̃ʼA YI JARADIABIRA
12. ¿Kʼãrẽa Jesubara widisi pariseoraʼa «¿Marãbara ledʼakʼa kĩrãkʼa duanu ẽka?»?
12 Jesubara widisi pariseoraʼa «¿Marãbara ledʼakʼa kĩrãkʼa duanu ẽka?». Mawũã widisi ũdubita ãyara aña krĩchabasita Daizeze Bedʼea ʉ̃rʉ (Mat. 12:1-7).e Maʉ̃ ewaridera pariseorabara Jesu kʼaidubemara ʉ̃rʉ jarasida ãyara sabado leyʼra wawiada ẽãta. Jesuba yi bedʼea panʉita zokʼasi yiza ũme Daizeze Bedʼeadebemata akʉza testo aba zokʼasi Oseasdebemata, mawũã ũdubita ãyara bia ũrĩ ẽ basita sabado ley diadara akʉza so zʉbʉria akʉda ẽãta. ¿Kʼãrẽa naʉ̃ra ẽbẽrarãbara iduaribi ẽ basi Daizeze Bedʼea idu jaradiabita? Ãya krĩchapanasi baera Daizeze Bedʼeaba zokʼabʉra ũrĩ ẽ baibarata, mawũã krĩchapanʉba Daizeze Bedʼea lebʉra ãyara bia ũrĩna ẽ basi (Mat. 23:23; Juan 5:39, 40).
13. ¿Kʼãrẽ nebiata ũdubibara Daizeze Bedʼea lebʉrʉde aña krĩcha ẽ baita?
13 Jesuba pariseoraʼa bedʼea jaradadeba, dayirãbara kʼawuapanʉ Daizeze Bedʼea lebʉrʉdera kʼawuakĩrã leibarata, pariseorane kĩrãkʼa oda ẽ baibara awuarabʉrʉ Daizeze Bedʼea yi jaradiabibara. Dayirãta urumʉ̃rʉãpanʉbʉrʉ iduaribidayi Daizeze Bedʼeaba jaradiabʉra dayi soidu jʉ̃ẽmarẽã (Sant. 1:21). Dayirãta imitia bedʼeada ẽ bʉrʉ Daizeze Bedʼea ʉ̃rʉ akʉza eda krĩchabʉta ũdubidara, mawũãra ũdubidayi so zʉbʉria akʉbʉta, so borekeabʉta akʉza kãga ũdubibʉta.
¿Sãwũã kʼawuapanʉ Daizeze Bedʼea yi jaradiabipanʉta? (Akʉra parrapo 14).f
14. ¿Kʼãrẽta wididaibara Daizeze Bedʼea jaradiabibʉ kʼawuaita? (Akʉra potorata).
14 Dayirãba awuru ẽbẽrarã sãwũã edapanʉneba ũdubibʉ Daizeze Bedʼea yi jaradiabipanʉta. Pariseorabara iduaribida ẽ basi Daizeze Bedʼeara ãyi soidu jʉ̃ẽnamarẽã, maʉ̃ kʼarea ãyara aña krĩchasida wuabema ẽbẽrarã ʉ̃rʉ (Mat. 12:7). Abarika dayirãba wuabema ẽbẽrarã sãwũã erpanʉneba ũdubiseabʉ Daizeze Bedʼea yi jaradiabipanʉ kʼawuaita. Bari jaraita, ¿jarapanʉka wuabemaba nebia obʉ ʉ̃rʉ? Mawũã ẽ bʉrʉ, ¿audre jarapanʉka ãya nemitia obʉta? ¿Dayirãbara wuabemarãra so zʉbʉria akʉbʉka? Mawũã ẽ bʉrʉ, ¿kĩrãdua ẽka ãya nemitia obʉta? Dayirãba naʉ̃ bedʼea panʉbʉrʉde kʼawuadayi Daizeze Bedʼea yi jaradiabibʉ kʼawuaita dayi krĩchade, dayi sode akʉza daya obʉde (1 Tim. 4:12, 15; Heb. 4:12).
DAIZEZE BEDʼEA LEBɄBA SOBIABIBɄ
15. ¿Sãwũã sentibasi Jesura Daizeze Bedʼea kʼareara?
15 Jesubara Daizeze Bedʼeara mejãcha kãgabasi. Jesu nama egoroeda zei naweda Daizeze Bedʼeabara maʉ̃ta jarasi iyi ʉ̃rʉ, mawũã jarabʉ Salmo 40:8de: «Bʉa kãgabʉta obʉrʉde, Daizeze, mʉ̃a kãgabʉrʉa akʉza bʉ leyʼra mʉ̃ sode edabʉa». Maʉ̃ kʼarea iyira mejãcha sobiabasi akʉza bia wãsi Jeowaba zokʼabʉ obʉde. Dayirãsida mejãcha sobia baseapanʉ zarea opanʉbʉrʉ Daizeze Bedʼeata dayi soidu jʉ̃ẽbita (Sal. 1:1-3).
16. ¿Kʼãrẽta oibara Daizeze Bedʼea bia leita akʉza maʉ̃ne nebia ũduita? (Akʉra rekuadro «Jesu bedʼeabara kʼarebaseabʉ audre ũrĩta Daizeze Bedʼeaba jarabʉta»).
16 Odadrʉ Jesude kĩrãkʼa. Daizeze Bedʼea idu yi jaradiabidadrʉ dayirãbara audre ũrĩseabʉ Daizeze Bedʼeaba jarabʉra yiwidʼipanʉne, pikãga lebʉde, dayikʉza widibʉde akʉza bʉpanʉne. Daizeze Bedʼea lebʉrʉdera dayirã kartaraneba kʼarebaseabʉ kʼawuaita saʉ̃ta yibiata akʉza saʉ̃ta zeri ẽãta. Dayirãba Daizeze Bedʼea audre bia zokʼaira, bia estudiadaibara testo aba daya audre bia ũrĩ ẽãta, mawũã odara ũdudayi Daizeze Bedʼeade nekʼãrẽ bia erbʉta. Dayirãba Daizeze Bedʼea lepanʉne aña krĩchada ẽ bʉrʉ akʉza soiduba lepanʉbʉrʉ, mawũãra yi kʼarebabidayi, dayirãta zarea opanʉbʉrʉ atia kʼawuada kĩrãkʼa oita, mawũãra audre kʼawuadayi Daizeze Bedʼea ʉ̃rʉ akʉza Jeowa kʼawapanañi (Sal. 119:17, 18; Sant. 4:8).
TRÃBI 95 La luz brilla más cada día
a Jõma Jeowa ode panʉrãra zarea opanʉ ewariza Daizeze Bedʼea ledaita. Ẽbẽra mejãchaʉba lepanʉ Daizeze Bedʼeara, mawũãsidu ãya ũrĩ ẽ mama kʼaseabʉta. Abarika berabarisi ʉ̃kʉrʉ ẽbẽrarã Jesu ewaride pananasida, Jesubara naʉ̃ra ẽbẽrarãba sãwũã lebʉ kʼarea ũrãgʼata diasi. Maʉ̃ ũrãgʼaba idi ewade dayirãsida kʼarebaseabʉ Daizeze Bedʼea le kʼãrãpe kʼawuaita eda kʼãrẽta sãwũã jarabʉta.
b Jesu buru kʼoeda tẽã akʉza Daizeze jaure zarea iyi ʉ̃rʉ zeda tẽã, Jesubara jõma kĩrãbesi iyi ʉ̃tʉ sãwũã badata (Mat. 3:16).
c Maríabara bia ũdukʼawuabasi Daizeze Bedʼeara akʉza edaʉde mama eda jarabʉde jarabasi (Luc. 1:46-55). Maríata Joséʉ̃mera plata mejãcha neẽbasi Daizeze Bedʼeadebema kopia odata edadaita, mawũẽra ãyara biʼia ũrĩpanasibaibara sinagogade Daizeze Bedʼea lepanʉta, mawũã tẽã juneane maʉ̃ta jẽda kĩrãbeita.
d Audre kʼawuaita akʉra artikulo «Acérquese a Dios: ‘Él es el Dios [...] de los vivosʼ», La Atalaya 1 febrero, 2013de.
e Mateo 19:4-6 bayeda Jesuba pariseora widisi: «¿Marabara lebada ẽka?». Ãya biode lesidamina Daizezeba ẽbẽrarã sãwũã parãna ʉ̃rʉ, ãyara abarika krĩcha ẽ basi Daizezeba juwa jidai ʉ̃rʉ krĩchabʉ kĩrãkʼa.
f POTORABA ŨDUBIBɄTA: Daizeze Nokʼo ʉ̃rʉ bedʼeabari deda mebẽã aba bideo ũdubibariba aña osi, mamina ãba yi jʉre berabarida tẽãra jõmaʉ̃ba biga diapanʉ iyaʼa, akʉda ẽ iya aña odata.