Jeowaba jarabʉ naʉ̃ drʉara ẽjũã kĩrãwãreã babita

1. ¿Kʼãrẽta jara ũrĩbikĩrãbasi Isaíasbara israelitara?

PROPETA Isaíasba jarasi Jeowara Daizeze wãrĩnuaradebemata, bedʼea wãrĩnubara jarakĩrãbʉ «amén» (Is. 65:16). Aménbara jarakĩrãbʉ mawũã, mawũã ẽ bʉrʉ wãrĩnu berabarita. Daizeze Bedʼeade Jeowa akʉza Jesu ʉ̃rʉ bedʼeabʉde bedʼea amén jarabʉrʉdera, jarakĩrãbʉ maʉ̃ra wãrĩnuta. Isaíasba israelitara jaradaba ũdubisi: Jeowaba nei oya abʉ ʉ̃rʉra ĩjãseapanʉta. Jeowaba maʉ̃ta ũdubi zebʉrʉ iya nekʼãrẽ oya abʉ aripe berabaribibʉrʉde.

2. ¿Kʼãrẽa ĩjãseapanʉ Jeowaba ʉ̃ra zeide nebia weya abʉ ʉ̃rʉra akʉza kʼãrẽ bedʼeata panʉnai naʉ̃ artikulodera?

² ¿Dayirãbida abarika ĩjãseapanʉka Jeowaba aranʉ bʼai dayirãita nebia weya abʉ ʉ̃rʉ? Pablobida jarasi dayirãbara ĩjãseapanʉta Jeowaba nebia weya abʉ ʉ̃rʉra, iya naʉ̃ra jarasi Isaíasba bedʼea jarada 800 poaga berabarida tẽã. Pabloba jarasi «Daizezera sewa nebʉra jarabe ẽ» (Heb. 6:18). Do dabʉ baniata jaigʉa ẽãbʉbʉrʉ dayirãbara kʼawuapanʉ mamaʉ̃bara drʉ ẽ baita bania konoata, abarika Jeowara Daizeze wãrĩnuara baera dayirãbara kʼawuapanʉ iyara sewa nebʉrʉra jara ẽ baita. Maʉ̃ba dayirãbara ĩjãseapanʉ Jeowaba kʼãrẽ jarabʉra, maʉ̃rane edabʉ iya dayirãita nebia weya abʉta. Naʉ̃ artikulode panʉnañi naʉ̃ra bedʼearata, ¿kʼãrẽ nebiata diaya abʉ Jeowaba dayirã? ¿Kʼãrẽta ozebʉrʉ iya dayirãba ĩjãmarẽã iya diaya abʉra wãrĩnuta?

¿KʼÃRẼ NEBIATA DIAYA ABɄ JEOWABARA DAYIRÃ?

3. (1) ¿Jeowa ʉ̃rʉ Kʼawuabipanʉrãbara kʼãrẽ nebiata audre jʉ̃ãpanʉ? (Apocalipsis 21:​3, 4). (2) Dayirãba maʉ̃ ʉ̃rʉ jaradiabʉrʉde, ¿ẽbẽra mejãchaʉba kʼãrẽta jarapanʉ?

³ Dayirãba atia kʼawuadaira jipade yibia Jeowa ʉ̃rʉ Kʼawuabipanʉrã jõmaʉ̃raita (akʉra Apocalipsis 21:​3, 4). Jeowaba jarabʉ dayirãra wua bei ẽ baita, sopʉa ẽ baita akʉza pʉa ũduda ẽ baita, dayirãnebemara mejãchaʉba ẽbẽrarã ẽjũã bia ʉ̃rʉ jaradiabʉrʉdera, naʉ̃ testota jara ũrĩbipanʉ. Dayirãba maʉ̃ ʉ̃rʉ jara ũrĩbibʉrʉdera ẽbẽra mejãchaʉba jarapanʉ: «Maʉ̃ra bia ũrĩbʉ, mamina wãrĩnu bʼaira aripe berabari ẽ maʉ̃ra».

4. (1) ¿Kʼãrẽta berabarita kʼawuasi Jeowaba? (2) Iya nebia diaya ada awuara, ¿kʼãrẽta jarasi Jeowabara?

⁴ Jeowaba Juanʼa bʉbiside ẽjũã biade dayirã sãwũã bʼai ʉ̃rʉ, maʉ̃ra bʉbisi kʼawuabasi baera dayirãba ẽbẽrarã jaradiabʉrʉdera maʉ̃ ʉ̃rʉ jara ũrĩbita, adewara Jeowaba kʼawuabasi idi ewadera ẽbẽrarãitara zarebaibasita maʉ̃ nebia ʉ̃rʉ ĩjãira (Is. 42:9; 60:2; 2 Cor. 4:​3, 4). Mawũẽra, ¿sãwũã kʼarebaseapanʉ wuabemara ẽbẽrarãbida wãrĩnu ĩjãnamarẽã Apocalipsis 21:​3, 4​ba jarabʉra wãrĩnu berabarita? Jeowabara bari jara ẽ basi iya naʉ̃ nebiata diaita, awuarabʉrʉ nei jarasi mawũã dayirãba audre ĩjãmarẽã iyi ʉ̃rʉ, ¿kʼãrẽta jarasi?

JEOWABA JARABɄ IYA OYA ABɄRA ARIPE BERABARIBITA

5. ¿Kʼãrẽ kʼarea ĩjãseapanʉ Jeowaba wãrĩnu weita ẽjũã biara akʉza saʉ̃ra bersikuloraba jarabʉ maʉ̃ ʉ̃rʉ?

⁵ Naʉ̃ra bersikuloraba kʼarebayi dayirãba wãrĩnu ĩjãmarẽã Jeowaba ẽjũã biade nebia weyi abʉ ʉ̃rʉ. Jarabʉ: «Bʉguede jewedabʉba mawũãsi: ‹Akʉra, mʉ̃ara nekʼãrẽ jõma yiwidi babinʉmʉ›. Adewara jarasi: ‹Bʉra naʉ̃ bedʼearata, kʼẽrẽpabʉ baera akʉza wãrĩnu baera›. Iya mʉ̃aʼa jarasi: ‹Maʉ̃ra wãrĩnu berabarisi. Mʉ̃ra Alfa akʉza yi Omega, yi jʉ̃drʉdata akʉza yi jõbibʉta›» (Apoc. 21:​5, 6​a).

6. ¿Kʼãrẽa Apocalipsis 21:​5, 6​ba jarabʉbara audre ĩjãbibʉ Jeowaba nebia weya abʉ ʉ̃rʉ?

⁶ ¿Naʉ̃ testobara kʼãrẽa ĩjãbibʉ Jeowaba nebia weya abʉ ʉ̃rʉra? Naʉ̃ yizaba kʼarebayi maʉ̃ bia ũrĩta. Dayi notaria eda wãbʉrʉde karta pirmaita maʉ̃ra obʉ ũdubita wãrĩnu oita mama eda jarabʉta. Abarika Jeowaba Apocalipsis 21:​3, 4​de jarabʉ kʼãrẽ nebiata diaita akʉza bersikulo 5 akʉza 6de jarabʉra notariade karta pirmana kĩrãkʼabʉ, ũdubibʉ baera Jeowabara wãrĩnu oita iya jarabʉra. Atia audre kʼawuadayi maʉ̃ra bersikulora ʉ̃rʉ.

7. Bersikulo 5 jʉ̃drʉdogodera, ¿kʼãrẽta jarabʉ akʉza kʼãrẽa yibia maʉ̃ra?

⁷ Yi bersikulo 5 jʉ̃drʉdogode naʉ̃ bedʼeata jarabʉ: «Bʉguede jewedabʉba mawũãsi» (Apoc. 21:5​a). Naʉ̃ bedʼeara jipade yibia, ¿kʼãrẽa? Apocalipsis librodera Jeowara bedʼeama ũbea bedʼeasi baera, yi bersikulo 5de jaradara maʉ̃ranebema ababasi. Naʉ̃ bedʼeara angelba jara ẽ basi, mia Jesuba iyi ʉ̃tʉ jʉ̃ẽbʉrʉde jara ẽ basi, naʉ̃ra Jeowabʉrʉ jarasi. Naʉ̃ testoba kʼarebabʉ dayirãba ĩjãita Jeowara sewa nebʉrʉ oẽãta (Tito 1:2). Dayirãbara ĩjãseapanʉ Apocalipsis 21:​5, 6​ba jarabʉra wãrĩnu berabarita.

«AKɄRA, MɄ̃ARA NEKʼÃRẼ JÕMA YIWIDI BABINɄMɄ»

8. ¿Jeowaba kʼãrẽ bedʼeata jarabʉ mawũã ũdubita iya nekʼãrẽ oya abʉra aripe berabarita? (Isaías 46:10).

⁸ Atia akʉdayi kʼãrẽta jarakĩrãbʉta bedʼea «akʉra» (Apoc. 21:5). Naʉ̃ bedʼea «akʉra» mejãcha zokʼabʉ Apocalipsis librode, naʉ̃ bedʼeara griegodeba zebʉ, libro abaʉba jarabʉ naʉ̃ bedʼea akʉrara zokʼapanʉta yi karta lebʉba audre kʼawuakĩrãmarẽã maʉ̃are kʼãrẽta zeita. Jeowaba bedʼea «akʉra» jarada tẽã, ¿kʼãrẽta jarasi? Naʉ̃ta jarasi: «Mʉ̃ara nekʼãrẽ jõma yiwidi babinʉmʉ», Jeowaba naʉ̃ra nekʼãrẽ awuara oira, ʉ̃ra zeidebʉrʉ oyi, mamina iya biʼia kʼawuabʉ baera maʉ̃ra wãrĩnu aripe oita, maʉ̃ba iya bedʼea jarabʉra wãrĩnu atia berabarinʉmʉ kĩrãkʼa jarabʉ (akʉra Isaías 46:10).

9. (1) ¿Kʼãreta jarakĩrãbʉ bedʼea «nekʼãrẽ jõma yiwidi [babinʉmʉbara]»? (2) ¿Kʼãrẽta berabari bajã akʉza drʉa idi ewadebʉra?

⁹ Jeowaba Apocalipsis 21:5de jarasi: «Mʉ̃ara nekʼãrẽ jõma yiwidi babinʉmʉ». ¿Kʼãrẽta jarakĩrãbʉ naʉ̃ba? Naʉ̃ bersikuloba jarakĩrãbʉ Jeowaba nei ãĩ bʉeita mawũã nekʼãrẽ yiwidita nʉmʉita. ¿Kʼãrẽta ãĩ bʉei Jeowabara? Apocalipsis 21:1​ba panʉbʉ maʉ̃ta, jarabʉ: «Nããbema bajãra akʉza nããbema drʉara neẽbasi». Maʉ̃ nããbema bajãbara jarakĩrãbʉ nokʼora Diaruba zokʼabʉrata (Mat. 4:​8, 9; 1 Juan 5:19). Edaʉde Daizeze Bedʼeaba drʉa jarabʉrʉdera jarakĩrãbʉ ẽbẽrarãta (Gén. 11:1; Sal. 96:1). Maʉ̃ kʼarea jaraseapanʉ nããbema drʉa jarabʉbara jarakĩrãbʉta ẽbẽrarã kayiruara nama egorode pananata. Daizeze Bedʼeabara bari jara ẽ Jeowabara nekʼãrẽ ara oita, awuarabʉrʉ jarabʉ bʉeita bãja yiwidita akʉza drʉa yiwidita, maʉ̃ba jarakĩrãbʉ Nokʼo yiwidita bʉeita ẽbẽrarã kʼẽrẽpapanʉrata zokʼamarẽã.

10. ¿Kʼãrẽta yiwidi babi Jeowabara?

¹⁰ ¿Jeowabara nekʼãrẽ jõma sãwũã yiwidi babiyi? (Apoc. 21:5). Jeowabara naʉ̃ ẽjũãra neneẽã babiyi akʉza ẽbẽrarãra kayirua okabayi. Isaíasba jarada kĩrãkʼa naʉ̃ drʉara ẽjũã kĩrãwãreãbayi jardin Edén bada kĩrãkʼa. Jeowabara yi wãbe ẽãbʉta, daʉberreabʉta akʉza ũrĩ ẽã bʉrãra bebiyi, adewara yi beidarasida jẽda piradrʉbiyi (Is. 25:8; 35:​1-7).

«BɄRA NAɄ̃ BEDʼEARATA, KʼẼRẼPABɄ BAERA AKɄZA WÃRĨNU BAERA [ . . . ] MAɄ̃RA WÃRĨNU BERABARISI»

11. ¿Kʼãrẽta omarẽã jarasi Jeowaba Juanʼa akʉza kʼãrẽa?

¹¹ ¿Adewara kʼãrẽta jarasi Jeowaba dayirãba iya weya abʉ ʉ̃rʉ ĩjãmarẽã? Iya Juanʼa jarasi: «Bʉra naʉ̃ bedʼearata, kʼẽrẽpabʉ baera akʉza wãrĩnu baera» (Apoc. 21:5). Jeowabara bari jara ẽ basi maʉ̃ta bʉmarẽã, awuarabʉrʉ jarasi kʼãrẽa omarẽã maʉ̃ta, jarasi: «Kʼẽrẽpabʉ baera akʉza wãrĩnu baera». Dayirãra mejãcha sobiapanʉ Juanba naʉ̃ta bʉsi baera, mawũã nesidabʉ baera Jeowaba ẽjũã bia weya abʉ ʉ̃rʉ akʉza maʉ̃ ʉ̃rʉ krĩchaseapanʉ baera.

12. ¿Jeowabara kʼãrẽa jaraseabasi: «Maʉ̃ra wãrĩnu berabarisi»?

¹² ¿Kʼãrẽta jarasi Jeowaba tẽã? «Maʉ̃ra wãrĩnu berabarisi» (Apoc. 21:6). Jeowaba naʉ̃ bedʼea jarasidera maʉ̃ ewaride aripe berabarisi kĩrãkʼa jarasi. Iya maʉ̃ jaradara yibiabasi, ũdubibʉ baera iya nekʼãrẽ oita krĩchabʉra aripe oita, nekʼãrẽ baduba oẽ baita iya maʉ̃ta oẽ marẽã. Tẽã Jeowaba nei jarabʉ mawũã ũdubita iya nekʼãrẽ oita krĩchabʉra wãrĩnu aripe berabarita, ¿kʼãrẽta jarasi?

«MɄ̃RA ALFA AKɄZA YI OMEGA»

13. ¿Kʼãrẽa Jeowaba jarasi: «Mʉ̃ra Alfa akʉza yi Omega»?

¹³ Dayirãba nãã jarada kĩrãkʼa Apocalipsis librodera Jeowara bedʼeama ũbea bedʼeasi (Apoc. 1:8; 21:​5, 6; 22:13). Iyi mawũã bedʼeama ũbea bedʼeaside naʉ̃ta jarasi: «Mʉ̃ra Alfa akʉza yi Omega». Alfa akʉza Omegara griego abesedario, yi letra nããbemara Alfaʼa akʉza yi jõdogoarebʉra Omegaʼa. Naʉ̃neba Jeowaba ũdubibʉ iya nekʼãrẽ ojʉ̃drʉbʉrʉdera maʉ̃ra maobʉta.

14. (1) ¿Sõbede Alfa basi Jeowara akʉza sõbede Omega bayi? (2) ¿Kʼãrẽta jarabʉ Génesis 2:​1-3 bayeda?

¹⁴ Jeowaba Adánta akʉza Evaʉ̃me parãside jarasi iya kʼãrẽta kãgabasita ẽbẽrarãita akʉza naʉ̃ ẽjũãita. Daizeze Bedʼeaba jarabʉ: «Daizezebara jarasi: ‹Todamarẽã naʉ̃ drʉa jõma ẽbẽrarãba birayeda akʉza trajamarẽã›» (Gén. 1:28). Jeowaba jaraside iya kʼãrẽta kãgabʉta ẽbẽrarãita akʉza naʉ̃ ẽjũãita, maʉ̃ne iya oita krĩchabʉta ojʉ̃drʉbʉrʉ kĩrãkʼabasi (Alfa). Jeowaba oita krĩchabʉ aripe berabaribʉrʉdera Adán akʉza Eva wũãwũãraba naʉ̃ ẽjũã birabʉdade akʉza ẽjũã kĩrãwãreã babibʉrʉdera, Jeowaba iya oita krĩchabʉta maobʉrʉ kĩrãkʼabayi (Omega). Naʉ̃ drʉadebʉta akʉza bajãnebʉta jõma parãna tẽã Jeowaba nei jarasi mawũã dayirãba ĩjãnamarẽã iya oita jarabʉra aripe oita. Iya bedʼea jaradara ũdupanʉ Génesis 2:​1-3 bayedade (akʉra). Jeowabara yi ewari sietera neneẽã babisi. Maʉ̃bara, ¿kʼãrẽta jarakĩrãbʉ? Jarakĩrãbʉ Jeowaba ẽbẽrarãita akʉza naʉ̃ ẽjũãita nekʼãrẽ oita krĩchabʉra aripe oita. Maʉ̃ra aripe berabariyi ewari siete jõbodode.

15. ¿Kʼãrẽa krĩchaseabasi Diarubara iyara oseabasita Jeowaba oita krĩchabʉ aripe berabari ẽ marẽã?

¹⁵ Adánba Evaʉ̃meba Jeowaba jarada ũrĩ ẽ bada tẽãra, ãyira kayirua omiabasi akʉza ãyi wũãwũãrasi kayirua omia babisida (Rom. 5:12). Maʉ̃ kʼarea krĩchaseapanʉ Jeowaba naʉ̃ drʉa ẽbẽrarãba biramarẽã kãgabadara, Diaruba iduaribi ẽ basita, ¿wãrĩnu iduaribi ẽ baibasika Diaruba maʉ̃ta berabarimarẽã? Diarubara krĩchasibaibara Jeowaba iya kʼãrẽ oita krĩchabʉra obe ẽ baita. Krĩchasibaibara Jeowaba iya oita krĩchabʉ oira, Adánta Evaʉ̃me beaibarabasita akʉza awuru ẽbẽrarãta parãibarata. Mamina Jeowaba maʉ̃ta osibʉrʉ Diarubara jaraseabasi iyira sewa nebʉrʉ omiata, ¿kʼãrẽã? Génesis 1:28​de Jeowaba jarasi baera Adán akʉza Evadeba zebʉrʉra wũãwũãraba biraibasita naʉ̃ drʉara.

16. ¿Kʼãrẽa Diaruba jaraseabasi Jeowaba oau ẽãta iya oita krĩchabʉra?

¹⁶ Adewara, ¿Jeowaba kʼãrẽta oita krĩchaseabasi Diarubara? Diaruba krĩchaseabasi naʉ̃ drʉara biraita, mamina ẽbẽra kayirua omiaraba akʉza ãyira ewari jõmaʉ̃nẽ kayirua omiabaibasita (Ecl. 7:20; Rom. 3:23). Maʉ̃ta mawũã berabarisibʉrʉ Diarubara krĩchaseabasi Jeowabara oau ẽãta iya oita krĩchabʉra, ¿kʼãrẽa? Jeowabara kãgabasi baera naʉ̃ drʉara jõma biramarẽã ẽbẽrarã kayiruara okaraba, mamina ẽbẽra kayirua omiaraba birabasibʉrʉ aripe berabari ẽ baibasi.

17. (1) ¿Kʼãrẽta osi Jeowaba ara oita Diaruba akʉza Adán Evaʉ̃meba aña odata? (2) ¿Kʼãrẽ nebiata ũdui iya mawũã odadeba? (Akʉra potota).

¹⁷ Jeowaba jʉrʉsi sãwũã aripe oita iya kʼãrẽta oita krĩchabʉra. Diaruba, Adánba akʉza Evaʉ̃meba iyi bedʼea ũrĩ ẽ basimina (Sal. 92:5). Jeowabara iduaribisi Adánba Evaʉ̃meba wũãwũã todamarẽã, mawũã iya jarada aripe berabarimarẽã. Iyira sewa nebʉrʉ omia ẽ, maʉ̃ba Jeowaba nei oya abʉbʉrʉ, maʉ̃ra wãrĩnu oyi. Iyara ẽbẽra aba zokʼasi mawũã Adán akʉza Evadeba zeda wũãwũãrata ẽdrʉbita akʉza mawũã aripe berabarimarẽã iya kʼãrẽ oita krĩchabʉra (Gén. 3:15; 22:18). Naʉ̃ ẽbẽrabara iyi bebʉta diaibasi ẽbẽrarã ẽdrʉbita. Diarubara jʉ̃ã ẽ basi Jeowaba maʉ̃ oira, ¿kʼãrẽa mawũã jʉ̃ã ẽ basi? Diarura ẽbẽra kayirua baera iyira kãga neẽ, mamina Jeowabara dayirãra kãga baera, ẽbẽra aba zokʼa bʉesi dayirã bari beimarẽã (Mat. 20:28; Juan 3:16). Jeowaba maʉ̃ ẽbẽra dayirãbari beimarẽã zokʼadadebara, ¿kʼãrẽta berabari? Jesuba zokʼabʉta 1.000 poaga berabarida tẽãra Adán akʉza Evadeba zedarãra ẽjũã kĩrãwãreãnẽ panañi akʉza kayirua okabayi Jeowaba krĩchabada kĩrãkʼa. Maʉ̃ta berabaribʉrʉdera Jeowaba «Omega» abʉrʉ kĩrãkʼa bayi.

¿SÃWŨÃ WÃRĨNU ĨJÃSEAPANɄ JEOWABA ẼJŨÃ BIA WEYA ABɄRA?

18. ¿Kʼãrẽ bedʼea ũbea jarabʉ Jeowaba dayirãba ĩjãmarẽã iya oita krĩchabʉra? (Akʉra rekuadro «Bedʼea ũbea Jeowaba nekʼãrẽ weya abʉ wãrĩnu ĩjãita»).

¹⁸ Naʉ̃ artikulode kʼawuasida dayirãba kʼãrẽa ĩjãpanʉta Jeowaba ẽjũã bia weya abʉra, atia kʼawuadayi ¿kʼãrẽta oseapanʉta wuabema ẽbẽrarãbida ĩjãmarẽã maʉ̃ ẽjũã bia weya abʉ ʉ̃rʉ? Nããra, Jeowabʉrʉ jarasi baera naʉ̃ta oita. Apocalipsis libroba jarabʉ: «Mõbe bʉguede jewedabʉba mawũãsi: ‹Akʉra, mʉ̃ara nekʼãrẽ jõma yiwidi babinʉmʉ›». Jeowara buru bia baera akʉza zareabarabʉ baera, adewara iyara okĩrãbʉ baera wãrinu oyi iya oita jarabʉra. Yi ũmeta, Jeowabara biʼia kʼawuabʉ baera iya kʼãrẽ oita krĩchabʉra aripe oita, maʉ̃ba iya jaraseabʉ maʉ̃ra yi berabarima kĩrãkʼa. Maʉ̃ kʼarea iya jarasi: «Bʉra naʉ̃ bedʼearata, kʼẽrẽpabʉ baera akʉza wãrĩnu baera […]. Maʉ̃ra wãrĩnu berabarisi». Yi ũbeata, Jeowaba nei ojʉ̃drʉbʉrʉdera maʉ̃ra obʉ maoyeda, maʉ̃ kʼarea iya jarabʉ: «Mʉ̃ra Alfa akʉza yi Omega». Jeowaba ũdubiyi Diarura sewa nebʉrʉ omiata akʉza oau ẽãta Jeowaba iya kʼãrẽta oita krĩchabʉra aripe berabari ẽ marẽã.

19. Ẽbẽrarãba ẽjũã bia zei ʉ̃rʉ ĩjã ẽ bʉrʉ, ¿bʉara kʼãrẽta oseabʉ?

¹⁹ Kĩrãbera bʉa ẽbẽrarã jaradiabʉrʉde Jeowaba nebia weya abʉ ʉ̃rʉ, naʉ̃ba kʼarebaita bʉabida audre ĩjãmarẽã Jeowaba nebia weya abʉ ʉ̃rʉ. Maʉ̃ba bʉa ẽbẽra abaʉʼa Apocalipsis 21:4 le ũrĩbibʉrʉde iya jarara ĩjã ẽãta maʉ̃ wãrĩnu berabarita, le ũrĩbira Apocalipsis 21:​5, 6​ta. Mõbe iyaʼa jara ũrĩbira Jeowaba kama bedʼea jarabʉra aripe berabarita iya karta pirmana kĩrãkʼabʉ baera (Is. 65:16).