Pedro kĩrãkʼa mapaerãra

1. ¿Pedrora sãwũã sentisi Jesuba kʼarebaside beda mejãcha beaita?

PEDRORA ewari aba diamasi bedawuabasi, maʉ̃nera ãyara mia kʼãrẽsida beada ẽ basi. Maʉ̃ne Jesuba jarasi: «Nabuaedʼa wigui ededua, mobe mazhi atarraya doidʼu bʼaribueudua bʼeda beaita» (Luc. 5:4). Pedrobara ĩjã ẽ basi maʉ̃ne beda beaira, mamina iyara osi Jesuba jarada kĩrãkʼa, atarrayara do ibalbʉesi maʉ̃ne naʉ̃bara beda mejãcha jidasi baera atarrayara tʉbʉzasi. Pedroba akʉza iyiʉ̃me trajabʉraba maʉ̃ta ũdusidera kʼawuasida maʉ̃ra maʉ̃nera Jesuba miõba okata osita akʉza maʉ̃ kʼarea mejãcha kĩrãmigasida. Maʉ̃ne Pedroba jarasi: «Nokʼó, mʉ maẽbara ãĩ wãrũã, mʉrã kʼazhirua omiãta bʼʉa» (Luc. 5:​6-9). Pedrobara sentibasi iyira Jesu kʼawa babe ẽãta.

2. ¿Kʼãrẽa yibia Pedro yiza ʉ̃rʉ kʼawuaita?

² Pedrobara kʼawuabasi iyira kayirua omiata maʉ̃ra wãrĩnubasi. Daizeze Bedʼeaba jarabʉ iyara edaʉde jarasita akʉza osita nekayiruata. ¿Bʉra Pedro kĩrãkʼa sentibʉka? ¿Zarea obʉka nebia oita mamina maʉ̃ra edaʉde zareka bʉitara? Maʉ̃ta mawũãbʉrʉ Pedro yizaba kʼarebaseabʉ: Jeowabara Pedroba nekʼãrẽ kayirua odara Daizeze Bedʼeadeba ãĩ bʉeseabasi, mamina iyara iduaribisi naʉ̃ba dayirãta kʼarebamarẽã (2 Tim. 3:​16, 17). Dayirãba Pedro ʉ̃rʉ akʉza iya kʼãrẽ oda ʉ̃rʉ kʼawuabʉrʉdera, kʼawuapanʉ Jeowabara jʉ̃ã ẽãta dayirãba jõma aripe oita. Iyara kãgabʉ dayirãra mapae ẽ marẽã akʉza dayirã nekayirua omiamina kãgabʉ zarea odamarẽã maʉ̃ta oẽ baita.

3. ¿Kʼãrẽa mapaeda ẽ baibara?

³ ¿Kʼãrẽa yibia mapae ẽ baita? Dayirãba nei obʉrʉdera ewariza audre bia owã baera. Bari jaraita, ẽbẽra abaʉba pito za kʼawuabʉdera, edaʉde aña oseabʉ, mamina iya naʉ̃ta badua kʼawuabʉbʉrʉ ewariza audre bia owãñi, mawũãsidu iya naʉ̃ta biʼia okʼawuabʉrʉ tẽãbida badu ewaride aña oseabʉ, mamina iyira maʉ̃ kʼarea mapae ẽ, pito zabʉ. Dayirãʉ̃me abarika berabaribʉ, dayirãta zarea obʉbʉrʉ nekayirua oẽ baita edaʉde aña oseabʉ, mamina zarea odadrʉ ewari jõmaʉ̃nẽ nebia oita. Dayirã jõmaʉ̃ba obʉ baera kayirua dayirãba oama badata, mawũãsidu dayirãta mapae ẽ bʉrʉ Jeowaba kʼarebayi audre bia oita (1 Ped. 5:10). Akʉdaya Pedro yizata, iyira mapae ẽ basi. Jesubara so zʉbʉria akʉsi Pedrora iyi nemitia omiabasimina, naʉ̃ba kʼarebasi iya Jeowadeta okĩrã obamarẽã.

PEDROBA KʼÃRẼ BEDʼEA ZROMA ŨDUDATA AKɄZA KʼÃRẼ NEBIA ŨDUDATA

4. Lucas 5:​5-10 bayeda jarabʉdera, ¿kʼãrẽta krĩchabasi Pedrobara iyi ʉ̃rʉra, mamina kʼãrẽta jarabasi Jesuba iyi ʉ̃rʉ?

⁴ Daizeze Bedʼeabara jara ẽ kʼãrẽa Pedroba jarasita iyira nemitia omiata akʉza kʼawuada ẽ iyara kʼãrẽ nemitia ʉ̃rʉ krĩchabasita (akʉra Lucas 5:​5-10). Pedrobara kayirua osibaibara, Jesubara kʼawuabasi Pedrora perabasita. Pedroba krĩchabasi baera iyira zeri ẽãta akʉza Jesubara kʼawuabasi Pedrora kʼẽrẽpa baseabʉta, maʉ̃ kʼarea jarasi pera ẽ marẽã. Jesuba kʼãwũã Pedro ʉ̃rʉ ĩjãbadaba kʼarebasi iyi bebʉ awuara bamarẽã. Pedroba yi mebẽã Andrésʼʉ̃mebara amaesida ãyi trajora akʉza Jesu kʼaidubemarabasida, maʉ̃ba ãyara nebia mejãcha ũdusida (Mar. 1:​16-18).

5. ¿Kʼãrẽ nebiata ũdusi Pedrobara iyi ʉ̃rʉ aña krĩchabʉ kʼarea idubʉ ẽ basi baera Jesu kʼaidubema bʼaita?

⁵ Pedro Jesu kʼaidubemabasidera nebiata mejãcha ũdusi. Bari jaraita, iya ũdusi Jesuba jẽda piradrʉbisita beidarata, kayabʉrata bebisita akʉza angelera kayiruara ãĩ bʉesitab (Mat. 8:​14-17; Mar. 5:​37, 41, 42). Akʉza Pedrobara ũdusi Jesuba iyi nokʼo babʉrʉde kʼãrẽta oibasita, iya maʉ̃ ewarira kĩrãdua ẽ basi (Mar. 9:​1-8; 2 Ped. 1:​16-18). Pedrobara naʉ̃ nebiara ũdusi iyita Jesu kʼaidubemabasi baera, Pedrora mejãcha sobiabasibaibara iyi ʉ̃rʉ aña krĩchabʉta wua oẽ basi baera akʉza maʉ̃neba nebiata ũdusi baera.

6. ¿Pedroba iya nemitia obadara mesera idubʉ wãsika? Jara ũrĩbira.

⁶ Iya nebia ũdusimina akʉza ũrĩsimina, Pedrobara edaʉde nemitia obasi, akʉdaya ʉ̃kʉrʉ yizata. Jesuba jara ũrĩbiside iyi sãwũã zʉbʉria berabarita Daizeze Bedʼeaba jarabʉ kĩrãkʼa, Pedrobara kʼẽãsi Jesura (Mar. 8:​31-33). Edaʉde Jesu kʼaidubemarãra akʉza Pedrota bedʼeakapanasi ãyidebema saʉ̃ta audre yi zroma kʼarea (Mar. 9:​33, 34). Ewari aba diamasi Jesu bei nãã Pedrobara yumakẽrã abaʉ kʉwʉrʉta urapetatasi (Juan 18:10). Adewara maʉ̃ diamasi Pedrobara jarasi Jesura ũdukata, maʉ̃ta jarasi ũbeabayeda (Mar. 14:​66-72). Maʉ̃ kʼarea Pedrora mejãcha jẽgasi (Mat. 26:75).

7. ¿Jesu jẽda piradrʉda tẽã kʼãrẽta omarẽã jarasi Pedroʼara?

⁷ Jesubara Pedrora maʉ̃ kʼarea idubʉ ẽ basi, iyi jẽda piradrʉda tẽã Jesubara iduaribisi Pedroba iyaʼa ũdubimarẽã kʼãrẽaba kãgabʉta iyira. Jesubara jarasi Pedroʼa iyi odepanʉrata biʼia akʉmarẽã (Juan 21:​15-17). Pedrobara okĩrãbasi Jesuba omarẽã zokʼadara akʉza Jeowaba ẽbẽrarã ʉ̃ta wãita jidasidera iyira yi nããrabemarane edabasi.

8. ¿Pedrobara kʼãrẽ kayiruata osi Antioquíadera?

⁸ Jeowaba ʉ̃ta wãita jidada tẽãbida Pedrobara ũdubibarabasi zarea obʉta nemitia oẽ baita. Poaga 36de Kristo tẽã, Pedroba ũdusi Jeowaba Cornelio ʉ̃ta wãita jidasita, naʉ̃ba ũdubisi Jeowaitara jõmaʉ̃ta abarikabʉta akʉza iyara iduaribibʉta ẽbẽrarã judiora ẽãsida kristianora bamarẽã (Hech. 10:​34, 44, 45). Maʉ̃neba ʉ̃ta Pedrora ãba nekobasi ẽbẽrarã judiora ẽ bawara, iyara maʉ̃ra okabasi (Gál. 2:12). Ʉ̃kʉrʉ mebẽrã judiorabara bia akʉ ba ẽ basi mebẽrã judiora ẽ bawara ãba nekoira, maʉ̃ba mebẽrã mawũã krĩchapanʉta Antioquíaidu jʉ̃ẽsidera, Pedrora wua neko ẽ basi mebẽrã judiora ẽ bawarara. Iyara maʉ̃ra osibaibara mebẽrã judiora mawũã krĩchapanʉrata kĩrʉ ẽ marẽã. Pabloba maʉ̃ta ũdusidera kʼẽãsi Pedrora jõmaʉ̃ra kĩrãbita (Gál. 2:​13, 14). Mawũãsidu Pedrora mapae ẽ basi, ¿kʼãrẽba kʼarebasi?

¿KʼÃRẼBA KʼAREBASI PEDRO MAPAE Ẽ BAITA?

9. ¿Juan 6:​68, 69​ba sãwũã ũdubibʉ Pedrora kʼẽrẽpabasita?

⁹ Pedrora kʼẽrẽpabasi iyi mawũã nemitia obʉ kʼarea idubʉ ẽ basi Jesu kʼawabʉta. Pedrobara kʼẽrẽpabʉta ũdubisi Jesuba jara ũrĩbiside bedʼea ãya ũrĩ ẽãta (akʉra Juan 6:​68, 69). Ʉ̃kʉrʉbara maʉ̃ bedʼeata bia ũrĩ ẽ basi baera idubʉsida Jesu odebʉta, mamina Pedrobara mawũã oẽ basi, iya kʼawuabasi baera Jesuba jarabʉba ewari jõmaʉ̃nẽ babiseabʉta.

10. ¿Jesubara sãwũã ũdubisi Pedro ʉ̃rʉ ĩjãbʉta? (Akʉra potota).

¹⁰ Jesubara idubʉ ẽ basi Pedrora, iyara kʼawuabasi iyi kʼaidubemaraba akʉza Pedroba diamasi iyi bei nãã iyira idubʉdaibasita, mawũãsidu Jesubara kʼawuabasi Pedrora jẽda iyiʉ̃me kʼẽrẽpa bʼaita (Luc. 22:​31, 32). Jesubara kʼawuabasi ẽbẽrarãbara nebiata okĩrãbʉta, mamina ãyi kakuaba idubi ẽ basita (Mar. 14:38). Maʉ̃ kʼarea Pedroba jaraside iyi ũdukata, Jesubara krĩcha ẽ basi Pedrora zeri ẽãta, Jesu jẽda piradrʉda tẽã yi ũdubisi Pedroʼa, maʉ̃nera Pedrora dobabasibaibara (Mar. 16:7; Luc. 24:34; 1 Cor. 15:5). Maʉ̃ba mejãcha so zarea diasibaibara Pedroʼa.

11. ¿Jesubara sãwũã kʼawuabisi Pedroʼa iyira Jeowaba kʼarebaita?

¹¹ Jesubara Pedroʼa kʼawuabisi Jeowaba kʼarebaseabʉta iyira. Jesu jẽda piradrʉda tẽã Pedroʼa akʉza iyi kʼaidupanʉra bea diasi bedata mejãcha (Juan 21:​4-6). Jesuba mawũã odaba Pedroʼa kĩrãbebisi Jeowaba diaita nekʼãrẽ iya nesidabʉra akʉza Pedrobara kĩrãbesibaibara Jesuba naʉ̃ bedʼea jaradata: «Nããra jʉrʉidua Daizeze Nokʼota adewara iya aripe omarẽãbʉta, mawũãtrʉ maʉ̃ jõma diaya» (Mat. 6:33). Maʉ̃neba ʉ̃ta Pedrobara iyi trajota nããra bʉei kaude nããra bʉebasi Daizeze Nokʼota. Poaga 33de Pentecostés ewaride Pedrobara zowaĩnĩgʉa jaradiasi ẽbẽrarã mejãchaʉʼa, mawũã kʼarebasi mejãchaʉba wãrĩnuta ĩjãnamarẽã (Hech. 2:​14, 37-41). Maʉ̃ ewarideba ʉ̃ta iyara kʼarebasi ẽbẽrarã samaritanoraba akʉza judiora ẽãba Jesu ʉ̃rʉ ĩjãmarẽã (Hech. 8:​14-17; 10:​44-48). Pedrodeba Jeowabara kʼarebasi ẽbẽrarã pʉwʉrʉ awuara awuarakadebemata iyi kongregasionʼena zemarẽã.

¿KʼÃRẼTA KʼAWUAPANɄ?

12. ¿Dayirãta zarea opanʉbʉrʉ nekayirua oẽ baita Pedro yizabara sãwũã kʼarebabʉ?

¹² Jeowaba kʼarebayi dayirã mapae ẽ baita. Maʉ̃ oira edaʉde zarea baseabʉ dayirãta dããrababʉrʉ zarea obʉta nemitia oẽ baita. Edaʉde dayirãba krĩchaseabʉ dayirãba bedʼea zroma ũdubʉra audre zareabʉta Pedroba ũdudaira, mawũãsidu Jeowaba zarea diaseabʉ dayirã mapae ẽ baita (Sal. 94:​17-19). Bari jaraita, mebẽã aba Jeowa ʉ̃rʉ Kʼawuabipanʉrã bʼai nãã, poaga biobasi abari yumakẽrã kãgabʉta, mamina iyi Daizeze ode wãsidera maʉ̃ra jipa idubʉsi, mamina iyira edaʉde aña krĩchabasi, ¿kʼãrẽba kʼarebasi mapae ẽ baita? Iya jarabʉ: «Jeowabara dayirã so zarea diabʉ, iyi jaure zareadeba mʉ̃a kʼawuasi mʉ̃ra iyi ode kʼẽrẽpa baseabʉ. Jeowaba mʉ̃ra zokʼabʉ iya kãgabʉta omarẽã akʉza zarea diabʉ mʉ̃ nemitia omiamina».

13. Hechos 4:​13, 29, 31​ba jarabʉdera, ¿sãwũã Pedrode kĩrãkʼa oseapanʉ dayirãbara? (Akʉra potota).

¹³ Pedroba ẽbẽrarã wawiabʉ kʼarea nekayirua osi, mamina iya Jeowaʼa widibaside so zarea diamarẽã, Jeowabara zowaĩnĩgʉata diabasi iyaʼa (akʉra Hechos 4:​13, 29, 31). Dayirãbida zowaĩnĩgʉata ũdubiseapanʉ, akʉdaya Horst yizata, iyira basi Alemaniane naziraba zokʼabaside, maʉ̃ ewaridera ẽbẽrarãbara jarapanasi jaradamarẽã bedʼea Hitlerba dayirãra ẽdrʉbibʉ jarakĩrãbʉta. Horstba kʼawuabasimina maʉ̃ bedʼea jaraira kayiruata, iyara edaʉde jarabasi perabasi baera iyiʉ̃me ãba estudiabʉ kʼarea akʉza yi propesorera kʼarea. Mamina Horst yibarirãra iyiʉ̃me kĩrʉi kaude Jeowaʼa yiwidʼisida zowaĩnĩgʉa diamarẽã. Iyi yibarira kʼarebadeba akʉza Jeowa kʼarebadeba Horstʼra kʼẽrẽpabasi Jeoware, tẽã iya naʉ̃ta jarasi: «Jeowaba mʉ̃ra doba amae ẽ».c

14. ¿Zõrãrãbara sãwũã kʼarebaseapanʉ mebẽrã zarea neẽãpanʉra?

¹⁴ Jeowaba Jesuʉ̃mebara krĩcha ẽ dayirãra zeri ẽãta, Pedrobara bia jida kʼawuabʉta ũdubibarabasi iya Jesu ũduka ada tẽãra. Iya jidaibarabasi Jesu kʼaidu kʼẽrẽpa bʼaita mawũã ẽ bʉrʉ Jesu kʼaidubʉta idubʉita. Jesubara Jeowaʼa widisi kʼarebamarẽã Pedro mapae ẽ baita akʉza iya Pedroʼa jara ũrĩbisi Jeowa iya kʼãrẽ wididata, maʉ̃neba ʉ̃ta Pedrora zarea erbasi mebẽrã so zarea diaita (Luc. 22:​31, 32). Pedrora aduʼa sentisibaibara Jesuba jarada kʼarea, abarika dayirãba nei jidaibaradebida Jeowaba kʼarebayi zõrãrãneba dayirã iyiare kʼẽrẽpa bamarẽã (Efes. 4:​8, 11). Zõrãrã aba iyi trʉ̃ Pabloba mebẽrã so zarea diabʉ, iya jarabʉ ãyaʼa krĩchadamarẽã Jeowaba sãwũã iyi oeda wesita ãyira akʉza jarabʉ Jeowaba ãya kãga jõkata ũdubibʉ baera ãyira idubʉ ẽ baita. Mebẽãba jarabʉ: «Mebẽrã zarea neẽ panʉrata sãwũã Jeowa kʼarebadeba mapaeda ẽãta».

15. Pedro yizaba akʉza Horst yizaba, ¿sãwũã ũdubibʉ wãrĩnuta Mateo 6:33​ba jarabʉra?

¹⁵ Jeowabara Pedroʼa akʉza yi wuabemara Jesu kʼaidubemarãra kʼarebasi ãya nekʼãrẽ nesidabʉde, abarika idi ewadebida Jeowabara dayirãta kʼarebaseabʉ dayirãba nekʼãrẽ nesidabʉde (Mat. 6:33). Segunda Guerra Mundial berabarida tẽã, Horstʼra yi nãã edebariba jʉ̃drʉsi, mamina iyira nekʼãrẽ mejãcha neẽbasi baera krĩchabasi obe ẽãta yi nãã edebarira, iyira trajaibara baera mawũã iya nekʼãrẽ nesidabʉ erbaita. ¿Iyara kʼãrẽta osi? Iya krĩchasi Jeowadeta nããra bʉeita, maʉ̃ba kongregasionʼra akʉbari zõrãrãba akʉ jʉ̃ẽside maʉ̃ semana jõmaʉ̃nẽ jaradia wãsi, maʉ̃ semana jõna tẽã kongregasion akʉbari zõrãrãba Horstʼa diasi platata, mamina iyara jara ẽ basi kʼaiba diasita maʉ̃ platara. Maʉ̃ plataba kʼarebasi iya nekʼãrẽ nesidabʉ jõma erbaita jedeko biobayeda. Horstba kʼawuasi iya Jeowadeta nããra bʉebʉbʉrʉ Jeowabara diaita iya kʼãrẽ nesidabʉra, maʉ̃ba iya ewari jõmaʉ̃nẽ krĩchasi Jeowadeta nããra bʉeita (Mal. 3:10).

16. ¿Pedroba kartara bʉdaba sãwũã kʼarebabʉ dayirãta?

¹⁶ Pedrora mejãcha sobiasibaibara Jesuba iyita doba amae ẽ basi baera iya nãã widida kĩrãkʼa osi baera. Jesuba Pedroʼa jaradiasi sãwũã kʼẽrẽpa bʼaita akʉza yiza bia bʼaita wuabemara kristianora nãã. Jesuba Pedroʼa sãwũã jaradiadaba kʼarebabʉ dayirãta idi ewade. Pedroba kartara ũme bʉ dia bʉesi mebẽrã siglo nããradebema, maʉ̃rane edabasi ũrãgʼara Jesuba diadata. Wuarebema artikulode kʼawuadayi naʉ̃ra kartara ũme ʉ̃rʉ akʉza dayirãba sãwũã oũdubiseabʉta mama eda jarabʉta.