Kʼãrẽta oseabʉ awuru kongregasionma wãbʉrʉde aduʼa bʼaita

Kõbe Nicolasba akʉza Célineʼʉ̃meba awuara jarapanʉ maʉ̃ ʉ̃rʉra. Betel Franciadebemaba jarasi awuru kongregasionʼena wãnamarẽã. Ãya jarapanʉ: «Nawedara daira mejãcha sobiapanasi, mamina tẽã daiba jẽda krĩchapanasi neũdukʼawua nãã erbadata, ʉ̃rabʉrʉ maʉ̃ kongregasione ũdukʼawuanʉmasi baera mebẽrãta».a Mawũẽra, ¿kʼãrẽba kʼarebaseabʉ awuru kongregasionʼena wãbʉrʉde aduʼa bʼaita? ¿Wuabema mebẽrãbara bʉra sãwũã kʼarebaseabʉ? akʉza ¿bʉara sãwũã so zarea diaseabʉ wuabemara akʉza ãya bʉa?

NEKʼÃRẼ KIMAREBA KʼAREBAYI ADUʼA BʼAITA

1. Ĩjãra Jeowa ʉ̃rʉ (Sal. 37:5). Kazumira Japónʼnebema, iyira 20 poagabasi iyabaʉ kongregasione, maʉ̃ta awuru kongregasionʼena wãibarabasi yi kimata awuru drʉaeda zokʼa bʉesida baera iyi trajo kʼarea. ¿Sãwũã ũdubisi iyara Jeowa ʉ̃rʉ ĩjãbʉta? Iya jarabʉ: «Jeowaʼa soidʉba yiwidʼisi, jarasi mʉ̃ sãwũã sentibʉta, dobabʉta akʉza perabʉta. Aramaʉ̃ta Jeowabara mʉ̃a zarea nesidabʉta diasi».

¿Kʼãrẽba kʼarebai audre Jeowa ʉ̃rʉ ĩjãita? Chiruabara baniata akʉza egorota nesidabʉ bia pãwãrãita, abarika dayirãba ĩjãbʉ audre zarea erbaira audre kʼawuadaibara Jeowa ʉ̃rʉ. Nicolas, dayirãba nãã jarabadara, bia krĩchasi kʼãrẽta osita Abrahánba, Jesúsba akʉza Pabloba, kʼawuasi naʉ̃rabara nekʼãrẽ mejãcha osita Jeowaba kãgabʉ oita, naʉ̃ba kʼarebasi iya ĩjãita Jeowabara iyira kʼarebaita. Bʉa ewarita erbʉbʉrʉ Daizeze Bedʼea bʉyidobaʉba kʼawuaita naʉ̃ba kʼarebayi bʉa bedʼea zroma erbʉ awuantaita akʉza naʉ̃ba kʼarebayi bʉa nebia kʼawuaita, mawũã mebẽrã bʉ kongregasionebema kʼarebaita.

2. Akʉrãra kʼãrẽne awuara chʉta naʉ̃ kongregasionta nããbema kongre­gasionʼʉ̃me (Ecl. 7:10). Jules Benínʼneba Estados Unidosʼeda wãsidera jʉrʉibarabasi sãwũã aduʼa bʼaita awuru kulturade. Iya jarabʉ: «Mʉ̃a ẽbẽrarã ũdubʉrʉa mʉ̃ sãwũã sentibʉta jõma jaraita nesidabʉ kĩrãkʼa basi». Mamina mawũã oiba iyita bia sentibi ẽ basi baera jʉrʉ ẽ basi mebẽrãbawara bedʼeaita. Mamina iya jarabʉ mebẽrã ũdu kʼawua wãne ãyi ʉ̃rʉ aña krĩchabadara awuara krĩchasita. Mawũẽra zarea ora krĩcha ẽ baita naʉ̃ kongregasionta kʼãrẽne awuara bʉta nããbema kongregasionʼʉ̃mera. Mebẽã wẽrã Anne-Liseba jarabʉ: «Mʉ̃ra wãsi awuru kongregasionʼena nekʼãrẽ yiwidita kʼawuaita, mawũã wã ẽ basi mʉ̃ nãã kongregasione chuada kĩrãkʼa abarika bʉta ũdui kʼarea».

Adewara zõrãrãsida zarea oibara akʉ ẽ baita kʼãrẽne awuara bʉta nããbema kongregasionta idibema kongregasionʼʉ̃me. Mamina bʉa ũdura bʉ kongregasion yiwidide mebẽrãba nekʼãrẽ wiña awuara obʉta kĩrãbera naʉ̃bara jarakĩrãbʉ ẽãta ewari jõmaʉ̃nẽ aña obʉta. Maʉ̃ba biga bayi bʉa biʼia ũdu kʼawuaita kʼãrẽta sãwũã berabarinʉmʉta ãyaʼa nekʼãrẽ jarai naweda (Ecl. 3:​1, 7b). Mawũẽra audre biga bayi dayi yizaba ãyaʼa jaradiaita daya krĩchabʉta ãya omarẽã jarai kaude (2 Cor. 1:24).

3. Bʉ kongregasione nekʼãrẽta mejãcha obara (Filip. 1:27). Dayi dedaʉba awuru drʉaeda wãbʉrʉdera nekʼãrẽ mejãcha oibara, maʉ̃ba ewari neẽ baseabʉ. Mamina biga bayi dayi jʉ̃ẽbʉrʉde aramaʉ̃ta ãba yi jʉrebarieda wãita mawũã mebẽrãbawara bʼaita. Mebẽrã bʉ kongregasion yiwididebemarabara nesidapanʉ bʉ badua ũdupanaita, mawũã bʉ kʼawa bʼaita akʉza kʼawuadaita ãya bʉ sãwũã kʼarebaita. Mebẽã Lucindabara kau ũme erbʉ, ãyira wãsi Sudáfricaeda. Iya jarabʉ: «Mʉ̃ neũdukʼawuaraba jarasida mʉ̃ mainʉ jʉ̃ẽbʉrʉdera wãña jʉrʉmarẽã mebẽrã mamabemarata akʉza mebẽrãʉ̃me Daizeze Bedʼeata jaradia wãmarẽã, adewara ãba yi jʉrebarieda wãmarẽã. Adewara daibara jarasida mebẽrãʼa dai deda ãba jʉreseabʉta Daizeze Bedʼea mamaʉ̃ba jaradia wãita».

Zarea ora mebẽrã kongregasionebemaba nekʼãrẽ jõma obʉta bʉabida abarika oita. Naʉ̃ba kʼarebayi bʉa ĩjãbʉta audre zarea erbaita adewara kʼarebaseabʉ ãyisida zarea bamarẽã. Anne-Lise zõrãrãba kʼarebasida zarea omarẽã mebẽrã iyi kongregasion yiwididebemaʉ̃me jaradia wãita. Mawũã oda kʼareara, ¿kʼãrẽ nebiata ũdusi? Iya jarabʉ: «Mʉ̃a kʼawuasi maʉ̃ oibara mʉ̃ra kʼarebaita mʉ̃ kongregasion yiwidide aduʼa bʼaita». Adewara bʉyiareba jarara ãba yi jʉrebari deta jareita akʉza akʉita, naʉ̃ba ũdubiyi mebẽrã bʉra aduʼa bʉta maʉ̃ kongregasionera. Bʉ jʉ̃ẽbʉrʉde bʉa maʉ̃ta waña ora mebẽrãra bʉbawara aduʼa bayi akʉza bʉa akʉyi ãyira bʉ mebẽrã kĩrãkʼa.

4. Neũdu­kʼawuara yiwidita jʉrʉra (2 Cor. 6:​11-13). Mebẽrãba ũdura bʉa ãyi ʉ̃rʉ krĩchabʉta mawũãra ãyira bʉ neũdukʼawua baseabʉ. Maʉ̃ba zarea ora ãba yi jʉrebarima ãza jʉ̃ẽ ẽ baita, mawũã ãyibawara bedʼeaita, adewara ãba yi jʉre berabarida tẽã jʉrʉda mebẽrã sãwũã audre ũdukʼawuaita. Zarea ora mebẽrã trʉ̃ta kĩrãbeita akʉza mia bedʼeaseabʉbʉrʉ adewara bia edabʉbʉrʉ maʉ̃ba kʼarebayi mebẽrãra bʉ kʼawa bamarẽã akʉza bʉ neũdukʼawua bia bayi.

Mejãcha krĩcha oẽ baibara mebẽrã kongregasionebemaba bʉ sãwũã edai kʼarea, awuarabʉrʉ bʉyi bʉ kĩrãkʼa bʼaibara mebẽrãba bʉta bia ũdukʼawuadamarẽã. Awuarabʉrʉ ora Lucindade kĩrãkʼa, iya jarabʉ: «Atiara daibara neũdukʼawua biata erbʉ, mebẽrãta dai deda trʉ̃sida baera».

MAYIRAI BIA EDAIDUA

Ʉ̃kʉrʉ mebẽrãitara mejãcha zarea bʉ ãya kongregasion ũdukama jʉ̃ẽira. Mawũẽra ¿kʼãrẽta oseabʉ maʉ̃ra mebẽrã ʉ̃ra zebʉrʉrata aduʼa babita? Apostol Pabloba jarada kĩrãkʼa oibara: «Mara yiya bia edaidua Kristoba dayirã bia edada kĩrãkʼa» (Rom. 15:7). Zõrãrãbara Jesúsde kĩrãkʼa mebẽrã ʉ̃ra zebʉrʉra bia edaibara (akʉra rekuadro «Kʼãrẽba kʼarebai dayi wãnama bia bʼaita»). Mamina wũãwũãraba akʉza dayirãba nekʼãrẽ jõma odaibara mebẽrã ʉ̃ra zebʉrʉ bia edadaita, mawũã ãyi aduʼa bamarẽã.

Wuabemara bia edaibara jarakĩrãbʉ ãyita trʉ̃ita dayi deda zemarẽã. Mamina maʉ̃ awuara kʼarebaibara ãya nesidabʉde. Bari jaraita, mebẽã wẽrã abaʉba mebẽã wẽrã ʉ̃rabʉrʉ zebʉrʉa jaradiasi iyi pʉwʉrʉ sãwũã bʉta, jaradiasi kʼãrẽ ode wãibarata, kʼãrẽ bus jidaibarata akʉza kʼãrẽ karru jidaibarata. Maʉ̃ba kʼarebasi maʉ̃ mebẽã wẽrã zedara aduʼa bʼaita maʉ̃ pʉwʉrʉde.

NEKʼÃRẼ AUDRE OSEABɄ JEOWA KʼAWA BʼAITA

Ibana wũãwũã zakeitara zarea bʉ iyi de amaeita akʉza perabʉ wãbari wãita, mamina iyi wãbaridogodera maʉ̃ perabira taʉdogo akʉza ʉ̃tʉ wãbari adogo. Abarikabʉ bʉta bʉ dedaʉba awuru kongregasionʼena wãita, mawũã oira perabʉ. Mamina maʉ̃ perabita taʉbira akʉza wãra, naʉ̃ba kʼarebayi audre oita Jeowaita. Nicolasba akʉza Célineʉ̃meba naʉ̃ta jarabʉ: «Awuru kongregasionʼena wãira arigʉ yibia. Bari jaraita, awuru pʉwʉrʉde bʼaita akʉza awuru kultura kʼawuaita daiba awuru nebiata oũdubibarabasi». Jean-Charlesba jara ũrĩbibʉ kʼãrẽ nebiata ũdusita ãyita awuru kongregasionʼena wãbʉrʉba. Jarabʉ: «Dai kʼãwũã awuru kongregasionʼena wãbʉrʉba kʼarebabʉrʉ dai wũãwũãra audre Jeowa kʼawa bamarẽã akʉza kʼawuadamarẽã Daizeze Bedʼeadebema sãwũã oita, audre ẽãne mʉ̃ kauara asinasionta diasida kongregasione akʉza mʉ̃ warrara nejaradiabari babisida wabida buru kʼoe nãã».

¿Mamina, kʼãrẽta oseabʉ bʉta awuru kongregasionʼena wãbe ẽ bʉrʉ mainʉ kʼarebaita? Bʉara akʉseabʉ bʉ kongregasionʼra kongregasion yiwidi kĩrãkʼa, mõbe bʉa oũdubiseabʉ naʉ̃ artikulode ũrãgʼa diabʉrata. Audre Jeowa ʉ̃rʉ ĩjãbʉta ũdubira. Maʉ̃ba wãra mebẽrãbawara Daizeze Bedʼea jaradiade akʉza jʉrʉda neũdukʼawua yiwidita, mawũã ẽ bʉrʉ bʉa ũdukʼawuabʉ neũdukʼawua bia bara. Bʉa kʼarebaseabʉ mebẽrã yi ʉ̃rabʉrʉ zedarata ãya nekʼãrẽ kʼarebadamarẽã nesidabʉde, mawũã ẽ bʉrʉ awuru mebẽrã kʼareba nesidabʉta. Dayirã kristianorãra jõmaʉ̃ba ũdukaʉde wuabemara kãga ũdubibʉ baera, maʉ̃ba dayirãba wuabemarata kʼarebapanʉbʉrʉ naʉ̃ba kʼarebayi dayirãta Jeowa kʼawa panamarẽã (Juan 13:35). Bʉa maʉ̃ta obʉbʉrʉ kʼawuabara Jeowabara bʉa nekʼãrẽ obʉra bia akʉbʉta (Heb. 13:16).

Mebẽrã mejãchaʉba ãya bedʼea zroma erbʉmina wãpanʉ awuru kongregasionʼena mainʉ kʼarebaita, bʉabida ãyide kĩrãkʼa oseabʉ. Anne-Liseba jarabʉ: «Mʉ̃ awuru kongregasionʼena wãbʉrʉba biode kʼarebasi nekʼãrẽ awuru audre ojʉ̃drʉita». Kazumiba jarabʉ iya kʼãrẽ nebia ũdusita awuru kongregasionʼena wãside. Iya jarabʉ: «Bʉara audre ũduseabʉ Jeowaba sãwũã kʼarebabʉta bʉa nãã ũdubadaira». Julesba jarabʉ: «Mʉ̃ kongregasione neũdukʼawua ũdudaba kʼarebasi mʉ̃ aduʼa bʼaita, maʉ̃ba mʉ̃ita biode zareabʉ naʉ̃ kongregasioneba wãita krĩchaira».