1-3. (1) ¿Kʼãrẽ ʉ̃rʉ krĩchabada ẽbẽra beibʉrʉdera? (2) ¿Kʼãrẽta jaradiapanʉ ʉ̃kʉrʉ religionbara?

DAIZEZE Bedʼeabara jarabʉ: «Beira wuara neẽbayi» (Apocalipsis 21:4). Yi 5de kʼawuasida Jesu dayirãbari beisita, maʉ̃neba dayirãra ewari jõmaʉ̃nẽ baseapanʉ. Mamina idi ewadera dayirãra beipanʉ (Eclesiastés 9:5). Maʉ̃ kʼarea dayirãbara krĩchaseapanʉ naʉ̃ta, «¿samadogo dayirã beibʉrʉdera?».

² Dayirãbara biʼia kʼawuaibara maʉ̃ ʉ̃rʉ. Bari jaraita, dayirã mebẽrãta beibʉrʉdera akʉza neũdukʼawuata, dayirãba krĩchaseabʉ naʉ̃ta: «¿Samabʉba? ¿Zʉbʉrianʉmʉka? ¿Dayirãra akʉbʉka? ¿Sõbede zeiba?».

³ Ʉ̃kʉrʉ religionbara aña jaradiapanʉ dayi beida ʉ̃rʉ. Ãya jarapanʉ ẽbẽra biabʉrʉ ʉ̃ta wãita, ẽbẽra kayiruarabasibʉrʉ tʉbʉde bawãita. Ʉ̃kʉrʉba jarapanʉ dayi beidogodera jaurede bidata akʉza yi mebẽrã beidabawara ãba yi ũdukuadata. Adewara ʉ̃kʉrʉba jarapanʉ beidara nedʉwʉrʉde aribadogota.

4. ¿Kʼaseabʉ ʉ̃kʉrʉ religionbara beida ʉ̃rʉra?

⁴ Religionraba kĩrã bio jaradiapanʉ beida ʉ̃rʉ, mamina jõmaʉ̃ba iyabaʉta krĩchapanʉ. Dayi beibʉrʉdera jaurede zokʼai bidata. ¿Maʉ̃ra mawũãka?

¿SAMADOGO DAYIRÃ BEIBɄRɄDERA?

5, 6. ¿Samadogo dayirã beibʉrʉdera?

⁵ Jeowabara biʼia kʼawuabʉ dayirã beibʉrʉdera samadogota. Iya jaradiabʉ iyi Bedʼeade dayirã beibʉrʉdera jõma taʉdogota. Dayirã beibʉrʉdera, ũdu ẽ, ũrĩ ẽ, mia krĩcha ẽ. Dayirãba krĩchabadara akʉza kĩrãbebadara jõma taʉdogo. Dayi kakuara jaure neẽ.a

⁶ Salomonbara bʉsi: «Beidabara mia kʼãrẽsida krĩcha ẽ». Maʉ̃ba kãga ẽ adewara yãrã jʉra ẽ mama jõma taʉdogo. Akʉza Salomonba jarasi: «Jõma bʉ juwaba kʼãrẽ oseabʉra ora bʉ zareaba, neẽ trajaira, mia krĩchaita, mia kʼawuita, mia buru biata, egoro zobeade bʉ wãmara» (akʉra Eclesiastés 9:5, 6, 10). Daizeze Bedʼeaba Seol jarabʉrʉdera, maʉ̃bara jarakĩrãbʉ ẽ mainʉ wãseabʉta, awuarabʉrʉ Seolbara jarakĩrãbʉ beidarata enaʉ̃bʉta, Daizeze Bedʼeaba jarabʉ Salmo 146:4de, ẽbẽra abaʉta beisibʉrʉ, iyi krĩchara jõma taʉdogota.

JESUBA JARADATA BEIDA Ʉ̃RɄ

7. ¿Kʼãrẽta jarasi Jesubara beida ʉ̃rʉra?

⁷ Iyi neũdukʼawua Lazaro beiside, Jesubara jarasi iyi kʼaidubemara: «Dazhirã bawara zhibiara Lázaro kʼãĩ nʉmʉã, mawũãmina mʉrã wãña ʉ̃rʉ̃mane». ¿Kʼãrẽa jarasi kʼãĩnʉmʉta? Tẽãne iya jarasi, Lazarora beisita (Juan 11:11-14). Jesubara dayirã beidogora kʼãĩara kʼãĩbʉ kĩrãkʼa akʉbasi, iya jara ẽ basi Lazarora ʉ̃ta wãsita, mia iyi mebẽrã beidabawara yi ũdusidata akʉza jara ẽ basi Lazarora tʉbʉde zʉbʉria osidata, mia nedʉwʉrʉde aribasita. Awuarabʉrʉ jarasi kʼãĩara kʼãĩnʉmʉ kĩrãkʼabasita. Daizeze Bedʼeaba jarabʉ, Jesu kʼaidubema Estebanra kʼãĩsita (Hechos 7:60). Adewara apostol Pablobida jarasi, ʉ̃kʉrʉ kristianorãra kʼãĩsidata, maʉ̃ba jarakĩrãbʉ beisidata (1 Corintios 15:6).

8. ¿Dayirãbara sãwũã kʼawuapanʉ Daizezebara parã ẽ basita beipanamarẽã?

⁸ ¿Daizezebara dayirãra parãsika beipanamarẽã? Mawũã ẽ. Jeowabara dayirãra parãsi ewari jõmaʉ̃nẽpanamarẽã akʉza kayakata, adewara osi ewari jõmaʉ̃nẽ bʼaita krĩchapanamarẽã (Eclesiastés 3:11). Mia abaʉ yibariraba kãga ẽ yi wũãwũã kayakʉaira akʉza beita. Maʉ̃ kĩrãkʼa Jeowabida kãga ẽ dayirã kayakʉaira akʉza beinʉmaira. Mamina dayirãta ewari jõmaʉ̃nẽ bʼaita osibʉrʉ, ¿kʼãrẽa bei wã?

¿KʼÃRẼA BEIPANɄPE?

9. ¿Daizezeba Adan Ebaʼa jaradara zarebasika?

⁹ Ẽjũã kĩrãwareãnẽ Jeowaba jarasi Adanʼa: «Neta drʉa kĩrawãrẽanẽbʉra jõma koseabʉta jãwuañena. Mamina neta, nebia nemitia kʼãwũãbibʉra, maʉ̃ra kobe ẽã asi, maʉ̃ kobʉrʉ ewaridera beibaribaya asi» (Génesis 2:9, 16, 17). Maʉ̃ bedʼea ũrĩra zare ẽ basi, adewara Jeowaba parãna baera jaradiabasi saʉ̃ta yibiata akʉza saʉ̃ta kayiruata. Maʉ̃ba Adanba Ebaʉ̃meba Jeowa bedʼeata ũrĩsidabʉrʉ, wawiabʉta ũdubikasida adewara biga diakasida ãyaʼa nekʼãrẽ jõma diasi baera.

10, 11. (1) ¿Sãwũã sewasi Diarubara Adan Ebaʉ̃mera? (2) ¿Kʼãrẽa mawũã oda ẽ baibarabasi?

¹⁰ Mamina Adan Ebaʉ̃mebara ũrĩna ẽ basi Daizeze Bedʼeata. Diaruba (Ãtomĩa) jarasi: «¿Wãrĩnuka Daizezeba jaradara mara, neta ko ẽ bamarẽã ẽjũã kĩrãwãreãnẽ jõmabʉra?». Aramaʉ̃ta, yuwẽrãba jarasi damaʼa: «Neta ẽjũã kĩrãwãreãnẽbʉra koseapanʉ. Mamina ẽjũã kĩrãwãreã ẽzadra bakurude netabʉra, Daizezeba jarasi, maʉ̃nebemara kobe ẽ, mia kʼãrẽsida tõbaribe ẽ bei ẽ marẽã» (Génesis 3:1-3).

¹¹ Aramaʉ̃ta Diaruba jarasi Ebaʼa: «Wãrĩnubaira bʉra bei ẽ baya. Daizezebara kaʉbʉ maʉ̃ kobʉrʉ ewaridera daʉ ogadrʉtotoita akʉza Daizeze kĩrãkʼa bʼaita, ũdukʼawuaita saʉ̃ta yibiata akʉza saʉ̃ta yibia ẽãta» (Génesis 3:4-6). Diarubara kãgabasi Ebaba krĩchamarẽã, iyima bʉta yibiata akʉza yibia ẽãta. Adewara Diaruba Ebaʼa jarasi maʉ̃ neta kora bei ẽ baita, mawũã sewasi. Maʉ̃ tẽã yi kimaʉ̃me daʉcha zebʉrʉde diasi komarẽã. Adan Ebaʉ̃mebara biʼia kʼawuabasi Jeowaba maʉ̃ neta ko ẽ marẽã jaradara. Mamina ũrĩna ẽ basi mawũã ũdubisida Jeowa wawiabʉ ẽãta, Jeowaba zokʼadara zare ẽ basi akʉza aripebasi.

12. ¿Kʼãrẽa sobia ẽ basi Jeowara?

¹² Jeowara sobia ẽ basi Adanba akʉza Ebaʉ̃meba oda kʼarea iyira ãyi Zezebasi baera, mamina ãya wawiada ẽ basi. Krĩchara bʉa wũãwũã dapʉenʉmʉta. Mamina ãyi zõnababʉrʉde ũrĩkĩrãna ẽ bayi bʉ bedʼeara, ãya kãgabʉta okĩrãpanañi. Bʉmabida pʉbayi mawũã berabarira.

13. ¿Kʼãrẽa Jeowabara jarasi Adanra egorobaita?

¹³ Adanba akʉza Ebaʉ̃meba ũrĩ ẽ basi baera ewari jõmaʉ̃nẽ bʼaibadara aduasida. Jeowaba jarasi Adanʼa: «Egoro oma baera akʉza egorobaya» (akʉra Génesis 3:19). Maʉ̃ba jarabasi Jeowabara jẽda egorobaita, naʉ̃ drʉade neẽ bada kĩrãkʼa, iyi beiside jõma taʉsi (Génesis 2:7).

14. ¿Kʼãrẽa beipanʉpe?

¹⁴ Adanba akʉza Ebaʉ̃meba ũrĩsidabʉrʉ Daizeze Bedʼeata, idi basidu ãyira zokʼaipanakasi. Mamina ãya ũrĩna ẽ basi baera zokʼaipanape beisida. Nemitiara kaya kayirua kĩrãkʼabʉ, maʉ̃ra dayirã yibari Adanba Ebaʉ̃meba amaesi. Maʉ̃ kʼarea jõmaʉ̃ta beipanʉ (Romanos 5:12). Jeowabara kãga ẽ dayirã bei wãnaira. Daizeze Bedʼeaba jarabʉ dayirã nejʉrata bei bʼaira (1 Corintios 15:26).

BEIDA Ʉ̃RɄ WÃRĨNU KʼAWUAIBA ẼDRɄBIBɄ

15. ¿Kʼãrẽ sewadeba ẽdrʉi beida ʉ̃rʉ biʼia kʼawuara?

¹⁵ Ʉ̃kʉrʉ religionbara jaradiabʉ beidara zokʼaibʉta akʉza dayirãba kʼarebaseabʉta. Maʉ̃ba ẽbẽra abaʉta beisibʉrʉ, yi mebẽrãbara nokʼo religionra plata diabʉ, ãyibari yiwidʼimarẽã akʉza kʉlto omarẽã. Mamina Daizeze Bedʼeabara jaradiabʉ beidara zʉbʉria ẽãta, adewara kʼareba ẽãta, dayiʉ̃me bedʼea ẽãta akʉza neida oẽãta. Maʉ̃ kʼarea perarãra. Dayirãba biʼia kʼawuara beida samadogota, maʉ̃ba yi sewabida ẽ bayi.

16. ¿Kʼãrẽ sewata jaradiabʉ ʉ̃kʉrʉ religionbara?

¹⁶ Diarubara religion zeri ẽãneba sewabʉ, dayirãʼa krĩchabibʉ beidara zokʼaibʉta. Ʉ̃kʉrʉ religionbara jaradiabʉ ẽbẽrarã jaure barabʉta, maʉ̃ba beidara zokʼaibʉta. ¿Mawũã jaradiabadaka bʉ religionbara? Mawũã ẽ bʉrʉ ¿Daizeze Bedʼeade jarabʉta jaradiabʉka? Diarubara mawũã sewanʉmʉ ẽbẽrarã Daizeze bedʼea ĩjã ẽ wãnamarẽã akʉza orrada ẽ marẽã.

17. ¿Kʼãrẽta jaradiapanʉ religionrabara ẽbẽra kayiruata beisibʉrʉ?

¹⁷ Religionraba aña jaradiapanʉba, Jeowa ʉ̃rʉ i kayirua bedʼeapanʉ. Ãya jaradiapanʉ ẽbẽra kayirua beibʉrʉdera tʉbʉde eda wãita. Mamina maʉ̃ra wãrĩnu ẽ, Jeowabara ẽbẽrarã zʉbʉria oẽ (akʉra 1 Juan 4:8). Bʉa sãwũã krĩchaiba yibari abaʉba yi wũãwũãta tʉbʉ pʉreade juwa ba u jirbʉta ũdʉra. Bʉmabida bʉa krĩchayi maʉ̃ yibarira jipa ẽbẽrã kayiruata. Mawũã krĩchamarẽãbʉ Diarʉbara Jeowa ʉ̃rʉ.

18. ¿Kʼãrẽa dayirãra beida kʼarea perabe ẽ?

¹⁸ Ʉ̃kʉrʉ religionbara jaradiabʉ beidarãra jaurede zokʼaibidata. Maʉ̃ kʼarea jarapanʉ dayirãbara wawiaibarata, ãyi kʼarea peraibarata mejãcha zareabarachu baera akʉza dayirã nejʉrata. Ẽbẽra mejãchaʉba maʉ̃ta wãrĩnu ĩjãpanʉ baera, perapanʉ maʉ̃ra kʼarea akʉza ãyaʼa yiwidʼibʉ Jeowaʼa yiwidʼikʼaʉde. Mamina kĩrãbeibara dayirãbara beidabara neida oẽãta. Maʉ̃ba dayirãra perabe ẽ. Awuarabʉrʉ Jeowatrʉ abapai kãgadaibara dayirã parãna baera (Apocalipsis 4:11).

19. ¿Kʼãrẽne kʼarebabʉ beida ʉ̃rʉ biʼia kʼawuaibara?

¹⁹ Dayirãba biʼia kʼawuara beida samadogota, maʉ̃ba yi sewabida ẽ bayi ʉ̃kʉrʉ religionra. Adewara kʼarebayi dayirãba ũduita Jeowaba nebia ʉ̃rabʉrʉ weita.

20. ¿Kʼãrẽta panʉnai yi 7dera?

²⁰ Ewari aba ẽbẽra bia Daizeze odebʉba yi trʉ̃ Jobʼa, widisi Daizezeʼa: «Ẽbẽra abaʉta beira ¿jẽda piradrʉseabʉka?» (Job 14:14). Yi 7de kʼawuadaya kʼaseapanʉbʉta Daizeze Bedʼeaba maʉ̃ ʉ̃rʉ.

1-3. (1) ¿Kʼãrẽneba dayirã karseldebʉ kĩrãkʼabʉ? (2) ¿Kʼãrẽta oi Jeowabara dayirã ẽdrʉbita?

KRĨCHARA bʉ kʼãrẽ oẽã zromane, jeneneraba jidadayi karselde eda bʉedaita, mamaʉ̃ba ẽdrʉ ẽ bayi bʉyi beiyeda. Maʉ̃ kʼarea bʉa krĩchayi mama edabʉde beita akʉza nãã bada kĩrãkʼa bia ba ẽ baita. Bʉa krĩchayi kʼaiba kʼarebai neẽãta, mamina ẽbẽra abaʉba jarayi, bʉta kʼarebakĩrãbʉta akʉza nekʼãrẽ jõma oita bʉ ẽdrʉbita. ¿Bʉra sobia ẽ baika maʉ̃ kʼareara?

² Dayirã jõmaʉ̃ta karseldebʉ kĩrãkʼabʉ, kʼaiba ẽdrʉbi neẽ baera, maʉ̃ kĩrãkʼabʉ dayi beibʉta, maʉ̃nebara mia kʼaita ẽdrʉ beda ẽ. Mawũẽra, ¿kʼaiba kʼarebaseabʉ dayirãra? Jeowaba. Iyira zareabarabʉ baera akʉza jara zebʉrʉ dayirãʼa «beibʉra wuara neẽbayi jipa jõbiyi» (1 Corintios 15:26).

³ Dayirã jõmaʉ̃ta sobiabayi beikata bʼai baera. Mamina Jeowabara bei awa jõbi ẽ bayi. Maʉ̃ adewara beidarãra jẽda piradrʉbiyi. Jeowaba karseldeba ẽdrʉbibʉrʉ kĩrãkʼa. Jeowabara jarabʉ beidarãra jẽda bʼabita, mawũã jarabʉ iyi Bedʼeade (Isaías 26:19). Maʉ̃ra Daizeze Bedʼeabara jarabʉ jẽda piradrʉita. Krĩchara kʼãrẽaba bigabaita naʉ̃ra bʉita.

DAYA KÃGABɄ BEIBɄRɄDE

4. (1) ¿Kʼãrẽba kʼarebaseabʉ mejãcha krĩcha zroma oẽbaita dayirã mebẽrã beibʉrʉdera? (2) ¿Kʼairabasi Jesu neũdukʼawuarãra?

⁴ Dayi mebẽrã akʉza neũdukʼawua beibʉrʉdera, maʉ̃ kʼareara arigʉ so pʉabʉ. Bia ẽ panʉ jẽda piradrʉbidaʉ ẽ baera. Mamina Daizeze Bedʼeade jarabʉba sobiabibʉ dayirãra (akʉra 2 Corintios 1:3, 4). Akʉdaya sãwũã Jeowaba Jesuʉ̃meba kãgapanʉta dayirã mebẽrãta akʉza neũdukʼawuarata jẽda piradrʉmarẽã. Jesu nama egorode basidera audre ẽãne akʉ jʉ̃ẽbasi Lazarora akʉza yi mebẽrãta, Martata, Mariata. Ãyira neũdukʼawuarabasi. Daizeze Bedʼeaba jarabʉ: «Martara, Maríara, Lázarora Jesúsbara kʉãgʼa basia» (Juan 11:3-5). Mamina Lazarora beisi.

5, 6. (1) ¿Kʼãrẽta osi Jesubara Lazaro mebẽrã jẽganʉmʉ ũdusidera? (2) ¿Kʼãrẽta jaradiabʉ dayirãʼa Jesu so pʉadadeba?

⁵ Lazaro beida tẽã, Jesura wãsi Martama akʉza Mariama ãyi mejãcha krĩcha zroma oda ẽ marẽã. Martaba kʼawuaside Jesu ãyi pʉwʉrʉ kʼawabata, aramaʉ̃ta wãsi Jesuʉ̃me yi daʉcha zeita, Jesu ũdubʉrʉde mejãcha sobiasi maʉ̃ tẽã Martabara Jesuʼa jarasi: «Nokʼó, bʉta nama bʼasibʉrʉ mʉ nawewaura beu ẽbakʼausia». Martabara krĩchabasi Jesubara kʼarebaʉ ẽãta. Jesuba Mariata akʉza yi neũdukʼawuarata yi mebẽrãta jẽganʉmʉ ũduside, so borekea kʼãrãpe jẽgasi (Juan 11:21, 33, 35). Dayi mebẽrã beibʉrʉde dayi mejãcha so pʉa teibabari kĩrãkʼa sentisi Jesubara.

⁶ Jesuba maʉ̃ pʉa sentidaba, maʉ̃neba dayirã kʼawuabibʉ iya akʉza yi Zezeʉ̃meba kãga ẽãta beira (Juan 14:9). Adewara Jeowara zareabarabʉ dayirã kʼãwũã bei wã jõbira. Akʉza aranʉbai jõma aripe oyi.

«LÁZARO ÃĨ ZERUA»

7, 8. (1) ¿Kʼãrẽa Martabara kãga ẽ basi mõgara zroma ãĩ bʉeira? (2) ¿Kʼãrẽ nebiata osi Jesubara?

⁷ Jesura wãsi Lazaro wagabʉidu. Mamina ararera mõgara zromaba anabasi. Maʉ̃ kʼarea Jesuba jarasi: «Mongʼara ãĩ edaudua». Martabara kãga ẽ basi maʉ̃ mõgara ãĩ bʉedamarẽãra, Lazaro beida ewari kimarebasi baera (Juan 11:39). Iya kʼawua ẽ basi Jesuba Lazaro sãwũã oita.

⁸ Mõgara ãĩ bʉeda tẽã, Jesuba nemi jĩgua mawũãsi: «Lázaro ãĩ zerua» Marta akʉza Mariaʉ̃me ãba kʉanasi baera jõma ũdusida: «Mawũãĩ beudʼara ãĩ zesia, juwuata jẽrũta bʉra chubʼasia wuaba» (Juan 11:43, 44). Mawũã Lazarora akʉza jẽda zokʼaibasi, maʉ̃ba yi mebẽrãbawara akʉza yi neũdukʼawuarabawara ãba baseabasi. Maʉ̃ba jõmaʉ̃ba bedʼeaseabasi adewara tõbariseabasi. Kʼãrẽaba sobiapanasi, Jesuba jẽda piradrʉbisi baera Lazarora.

«WŨẼRÃ ZAKE, MɄÃ BɄAA JARAYA PIRADRɄRUA»

9, 10. (1) Jesuara, ¿kʼaiba zarea diasi beidara jẽda piradrʉbimarẽãra? (2) ¿Kʼãrẽne kʼarebabʉ dayirãra jẽda piradrʉibara?

⁹ Jesuara, ¿kʼaiba zarea diasi beidara jẽda piradrʉbimarẽãra? Jesuba Lazaro jẽda piradrʉbi naweda Jeowaʼa yiwidʼisi. Mawũẽra Jeowabʉrʉ diasi maʉ̃ zarea ẽbẽra jẽda piradrʉbimarẽãra (akʉra Juan 11:41, 42). Lazarotrʉ abapai jẽda piradrʉbi ẽ basi.a Daizeze Bedʼeabara jarabʉ wẽrã zake poaga 12 kirʉta mejãcha kayabasita, yi zezera Jairobasi akʉza maʉ̃trʉ abapai erbasi. Maʉ̃ kʼarea Jairobara nekʼãrẽ jõma osi Jesuba yi kaʉ bebimarẽã. Jairo Jesuʉ̃me bedʼeabʉde yumakẽrã zedaba jarasi: «Bʉ kʼaura beudogʼoa, ¿mawũẽ kʼãrẽã miãsẽã bedʼea nʉmaĩpe Miã Ũrãgʼabaria?». Aramaʉ̃ta Jesuba jarasi: «Sopuarãrũã, awuarabʉrʉ soidʼu kʼobʼadua». Mawũã kʼãrãpe wãsida Jairo dedaʼa. Jesu Jairo de kʼawa babʉrʉde, ũdusi ẽbẽrarã jẽganʉmʉta aramaʉ̃ta iya mawũãsi: «¿Kʼãrẽã kʼãwũã bʼʉgadrʉ jẽga duanu? Wũẽrã zakera beu ẽã, awuarabʉrʉ kʼãĩ bʼʉa». Yibarirabara kʼãrẽa mawũã jarabʉra kʼawuada ẽ basi. Maʉ̃ tẽã Jesuba jarasi yi edabarabʉraʼa ãĩ wãnamarẽã, mõbe eda edesi wẽrã zake yibariawa yi kaʉ zake beidaidu. Mama jʉ̃ẽ kʼãrãpe wẽrã zakeʼa jarasi: «Wũẽrã zake, mʉã bʉaa jaraya piradrʉrua». Krĩchara yibarira kʼãrẽaba sobiasidata ãyi kaʉ jẽda piradrʉbʉrʉ ũdusidade. Jesubara jẽda piradrʉbisi wẽrã zakera (Marcos 5:22-24, 35-42). Jairoba yi kimaʉ̃meba yi kaʉ ũdubʉrʉza jẽda kĩrãbepanasibaibara Jeowaba sãwũã kʼarebasita Jesudeba.

¹⁰ Nããra Jesuba ẽbẽra jẽda piradrʉbikʉadara jõma jẽda beikʉasida baera. Mamina maʉ̃ba karebabʉ, dayirãba wãrĩnu ĩjãita beidara jẽda bʼaita. Adewara Jeowaba dayirãʼa jarabʉ iya jõma jẽda piradrʉbikĩrãbʉta. Maʉ̃ra wãrĩnu oyi Jeowaba.

¿KʼÃRẼTA KʼAWUAPANɄ NÃÃENA JẼDA PIRADRɄDADEBARA?

11. ¿Sãwũã jarabʉ Eclesiastés 9:5dera beida ʉ̃rʉ?

¹¹ Daizeze Bedʼeabara jarabʉ: «Beidabara mia kʼãrẽsida krĩcha ẽ» (Eclesiastés 9:5). Mawũã berabarisi Lazarora, iyi joʉbʉedara kʼawua ẽ basi kʼãrẽta sãwũã berabarinʉmʉta ãĩra. Jesuba jarada kĩrãkʼa, Lazarora kʼãĩnʉmʉ kĩrãkʼabasita (Juan 11:11).

12. ¿Sãwũã kʼawuapanʉ Lazaro wãrĩnu jẽda piradrʉsita?

¹² Ẽbẽra jõmaʉ̃ba ũdusida Lazaro jẽda piradrʉdara. Jesu nejʉrarabida kʼawuabasi maʉ̃ mawũã odara. Lazaro jẽda piradrʉdara mia kʼaiba jara ẽ baibarabasi sewidata, jẽda zokʼaibasi baera (Juan 11:47). Maʉ̃ kʼarea ẽbẽra jõmaʉ̃ba akʉ jʉ̃ẽsida Lazarora adewara kʼawuasida Jesura Daizeze nezokʼata. Mamina Jesu nejʉrarabara maʉ̃ra kãga ẽ basi, maʉ̃ kʼarea krĩchasida sãwũã beidaita Jesuta akʉza Lazarota (Juan 11:53; 12:9-11).

13. ¿Kʼãrẽa wãrĩnu ĩjãnaibara Jeowaba jẽda piradrʉbita?

¹³ Nekʼãrẽ jõmabʉra Jeowaba oda. Maʉ̃ba iyira mejãcha zareabarabʉ beidara jẽda piradrʉbira. Jesuba jarasi: «Beudʼapeadʼata jou nʉmebara ũrĩnaña mʉ nemirã» (Juan 5:28). Maʉ̃bara kʼawuabibʉ jõma Jeowa krĩchadebʉ ẽbẽrarãra jẽda piradrʉbita. Mamina dayi badade jẽda piradrʉbira, kĩrãbeibara jõma dayi sãwũãbadata. ¿Jeowabara jõma kĩrãbeseabʉka maʉ̃ra? Krĩchara naʉ̃ta: ʉ̃tʉra mejãchabʉ chĩdaura, Daizeze Bedʼeabara jarabʉ, Daizezebara maʉ̃ra chĩdau trʉ̃ aba abaka kʼawuabʉta (akʉra Isaías 40:26). Jeowaba mawũã jõma kĩrãbebʉbʉrʉ chĩdau trʉ̃ aba abaka, Jeowaba jẽda piradrʉbibʉrʉdera kĩrãbeyi dayirã sãwũãbadara.

14, 15. ¿Kʼãrẽta widisi Jobʼara Jeowaʼa?

¹⁴ Ẽbẽra bia Daizeze odebʉba yi trʉ̃ Jobʼa ĩjãbasi jẽda piradrʉira. Maʉ̃ kʼarea widisi Jeowaʼa: «Ẽbẽra abaʉta beira ¿jẽda piradrʉseabʉka?». Akʉza Jeowaʼa jarasi: «Bʉa trʉña, aramaʉ̃ta mʉa panʉña. Iya odara mejãcha kãgayi». Naʉ̃ba jaradiabʉ dayirã Jeowabara ẽbẽrarã beida jẽda piradrʉbikĩrãbʉta (Job 14:13-15).

¹⁵ ¿Dayi jẽda piradrʉi ʉ̃rʉ krĩchabʉrʉdera, kʼãrẽta krĩchabari? Dayirã mejãcha sobiabibʉ Jeowaba beidara jẽda piradrʉbi baera. Mamina bʉa krĩchaseabʉ: ¿Sãwũã oiba mʉ̃ mebẽrãra akʉza mʉ̃ neũdukʼawuara beidara? ¿Maʉ̃rarã jẽda piradrʉika? Kʼawuadaya Daizeze Bedʼeade, kʼairata jẽda piradrʉita jarabʉta akʉza sama bʼaita.

«ŨRĨNAÑA MɄ NEMIRÃ MAWŨÃ PIRADRɄDʼAYA»

16. ¿Sãwũã bʼai ẽbẽrarã jẽda piradrʉbʉdararã naʉ̃ drʉadera?

¹⁶ Nabema ẽbẽra beida jẽda piradrʉsidadera ãyira yi mebẽrãbawara, neũdukʼawuarabawara yi ũdusida naʉ̃ drʉade. Ʉ̃ra ẽbẽra jẽda piradrʉira maʉ̃ kĩrãkʼa mawũã berabariyi, mamina naʉ̃nera audre yibiabayi. ¿Kʼãrẽa? Nããra, yi ẽbẽra jẽda piradrʉbʉrʉra ewari jõmaʉ̃nẽ bʼai baera naʉ̃ drʉade. Yi ũmeta, idibʉira awuarabayi naʉ̃ drʉara, neẽbayi yõta, nemitiata, kayata.

17. ¿Kʼairata jẽda piradrʉi?

¹⁷ ¿Kʼairata jẽda piradrʉi? Jesuba jarasi: «Beudʼapeadʼata jou nʉmebara ũrĩnaña mʉ nemirã mawũã piradrʉdʼaya» (Juan 5:28, 29). Adewara Daizeze Bedʼeaba Apocalipsis 20:13de jarabʉ: «Pusabara jẽda diasi beidapeadara akʉza beiba akʉza bewãrãdeba (Hades) jẽda diasi beida peadara». Daizeze Bedʼeaba Hades jarabʉdera jarakĩrãbʉ beidarata enaʉ̃bʉta akʉza jarabʉ ẽbẽrarã mejãcha beidara jẽda bʼaita. Adewara apostol Pablobida jarasi: «Beudʼapeadʼara piradrʉbigaita» Daizeze bedʼea ũrĩbadarata akʉza ũrikabadata (akʉra Hechos 24:15). ¿Kʼãrẽta jarakĩrãbʉ maʉ̃bara?

18. ¿Kʼaira yi Daizeze bedʼea ũrĩbadara?

¹⁸ ¿Kʼaira yi Daizeze bedʼea ũrĩbadara? Maʉ̃rarã Jeowa ode kʼẽrẽpabadara Jesu nama egoro eda zei naweda. Maʉ̃nebemara, Noe, Abraan, Sara, Moise, Rut akʉza Ester. Maʉ̃ra jõma jẽda piradrʉyi nama egorode bʼaita. Hebreos kapitulo 11de, bedʼeabʉ naʉ̃ra yumakẽrã ʉ̃rʉ akʉza yuwẽrã ʉ̃rʉ. ¿Mamina sãwũãi ẽbẽra Daizeze ode kʼẽrẽpabʉ bei wãra? Maʉ̃rasida kʼẽrẽpapanʉ baera jẽda piradrʉdayi.

19. (1) ¿Kʼaira yi Daizeze bedʼea ũrikabadara? (2) ¿Kʼãrẽ nebiata diai Jeowabara iyi ũdukʼawua ẽ beidara?

¹⁹ ¿Kʼaira yi Daizeze bedʼea ũrikabadara? Maʉ̃ra ẽbẽrarã mejãchabʉ. Ãya Jeowa ʉ̃rʉ mia kʼãrẽsida kʼawua ẽ basida, ãyi beisimina Jeowabara kĩrãdua ẽ maʉ̃rãra. Maʉ̃ kʼarea Jeowabara jẽda piradrʉbiyi iyi ũdukʼawuadamarẽã akʉza iya kãgabʉ odamarẽã.

20. ¿Kʼairata jẽda piradrʉ ẽ bai?

²⁰ ¿Beidara jõma jẽda piradrʉika? Mawũã ẽ. Jesubara jarasi jõma ẽbẽrarã jẽda ba ẽ bʼaita (Lucas 12:5; akʉra nota 19de). ¿Kʼairata jẽda piradrʉ ẽ bai? Yi ẽbẽra kayirua Daizezeba jarabʉ oi krĩcha ẽãta. Jeowabʉrʉ kʼawuabʉ saʉ̃ta piradrʉbita akʉza saʉ̃ta piradrʉbi ẽãta, iyitrʉ dayirã jõmaʉ̃ra buru baera. Adewara yi warra Jesuʼa diasi zareata iya kʼawua omarẽã saʉ̃ta piradrʉbita akʉza saʉ̃ta piradrʉbi ẽãta (Hechos 10:42).

Ʉ̃KɄRɄ ẼBẼRARÃ JẼDA PIRADRɄYI Ʉ̃TɄ BʼAITA

21, 22. (1) ¿Kʼãrẽ kakuata jidadai yi ʉ̃ta wãibara? (2) ¿Kʼai ẽbẽrata nãã piradrʉbisi ʉ̃tʉ jaurede bʼaita?

²¹ Daizeze Bedʼeabara jarabʉ ʉ̃kʉrʉ ẽbẽrarã ʉ̃ta wãita. Ãyi beibʉrʉdera jẽda piradrʉyi jaurede, mawũã ẽbẽra kakuade piradrʉbi ẽ bayi.

²² Nããra jaurede piradrʉda ẽbẽrarã Jesubasi (Juan 3:13). Jeowabara jẽda piradrʉbisi Jesura, iyi beida ewari ũbea babʉrʉde, mamina piradrʉbi ẽ basi ẽbẽra kakuade (Salmo 16:10; Hechos 13:34, 35). Apostol Pablobara jara ũrĩbisi, Jesura beisita yarade, mamina zokʼaibʉta jaurede (1 Pedro 3:18). Jesu jẽda piradrʉsidera zareabara piradrʉsi (1 Corintios 15:3-6). Mamina Daizeze Bedʼeabara jarabʉ Jesutrʉ abapai mawũã berabari ẽ baita.

23, 24. ¿Ẽbẽra sõbebʉbawaraʉba zokʼai Jesubara?

²³ Jesu bei naweda iyi kʼaidubemara jarasi: «Mʉrã wãña sãma bʼaita aribʼaedʼe marãĩta» (Juan 14:2). Naʉ̃bara jarakĩrãbʉ ʉ̃kʉrʉ kristianorãra jẽda piradrʉita iyiʉ̃me ʉ̃tʉ bʼaita. Adewara jarasi maʉ̃ra ẽbẽrarãrã kabana ba ẽ baita (Lucas 12:32). Apostol Juanba kʼãĩmokʼarade ũdusi sõbe ʉ̃ta wãita Jesu kʼaidu, maʉ̃ra Apocalipsis 14:1ba jarabʉ: «Mʉ̃a ũdusia korderota katʉma Sion ʉ̃rʉ edaʉnʉmʉta, iyibawarabasi siento kuarentai kuatro mil».

²⁴ Maʉ̃ra 144.000 kristianorãra, ¿sõbede jẽda piradrʉi? Daizeze Bedʼeabara jarabʉ Jesuba ʉ̃tʉ zokʼa jʉ̃drʉbʉrʉ tẽã jẽda piradrʉbita (1 Corintios 15:23). Idi ewadera Jesubara zokʼanʉmʉ ʉ̃tʉra akʉza maʉ̃ra 144.000 debema beiwãra jẽda piradrʉbʉ iyiʉ̃me ʉ̃tʉ bʼaita. Mamina idibasidu zokʼaipanʉ maʉ̃ranebemara. Maʉ̃ba ãyidebemata beira wãña jẽda piradrʉbʉ jaurede ʉ̃tʉ bʼaita. Mamina yi wuabema ẽbẽrarã jẽda piradrʉira bayi nama egorode, naʉ̃ drʉa ẽjũã kĩrãwãreã babʉrʉde.

25. ¿Kʼãrẽta kʼawuadai yi 8dera?

²⁵ Arakʼaitaba, Jeowaba dayirã ẽdrʉbita beideba akʉza wuara ũdukabayi beipanʉta (akʉra Isaías 25:8). Mamina ¿kʼãrẽta odai 144.000 ẽbẽrarãbara? Daizeze Bedʼeabara jarabʉ Jesuta kʼareba zokʼadaita. Yi 8de kʼawuadaya naʉ̃ nokʼoba sãwũã zokʼaita.