Abrahánba Saraʉ̃meba Jeowa bedʼeara ũrĩpanʉ

Babel pʉwʉrʉ kʼawa basi awuru pʉwʉrʉta, maʉ̃ pʉwʉrʉ trʉ̃ra Urbasi. Mamara ẽbẽrarãra Jeowa yiwidʼida ẽ basi, awuarabʉrʉ daizeze zeri ẽãbʉrʉ yiwidʼipanasi. Mamina basi yumakẽrã aba, mama wãrĩnu Jeowa yiwidʼibadata, maʉ̃ trʉ̃ra Abrahánbasi.

Jeowaba Abrahánʼa jarasi: «Wãra bʉ drʉadebara, amaera bʉ mebẽrãta akʉza wãra mʉ̃a bʉaʼa drʉa ũdubima». Akʉza Jeowaba Abrahán kʼarea naʉ̃ta oita jarasi: «Mʉ̃a bʉra pʉwʉrʉ zroma babiyi, adewara wãrĩnu ẽbẽrarãra naʉ̃ drʉa jõmaʉ̃nẽbemata bʉdeba nebiata ũduyi».

Abrahánbara kʼawua ẽ basi Jeowaba iyira sama zokʼaira, mamina mawũãsidu wãrĩnu ĩjãbasi Jeowa ʉ̃rʉ. Abrahánba yi kima Saraba, yi zeze Taréba akʉza yi sobrino Lotba, ũrĩsi Jeowa bedʼeara. Ãyi netatara ãba jãrẽpe jʉ̃drʉsi, mawũã maʉ̃ pʉwʉrʉdebara jĩga wãsida.

Abrahánʼra 75 poagabasi iyi mebẽrãbawara jʉ̃ẽside Jeowaba iyaʼa drʉa ũdubiya adamae, maʉ̃ drʉara Canaánbasi. Maʉ̃ kʼarea Jeowaba jarasi: «Naʉ̃ drʉa bʉa akʉbʉra, mʉ̃a diayi ẽbẽrarã bʉdeba zebʉrʉa». Abrahánta Saraʉ̃mera zõnabasi akʉza wũãwũã neẽbasi. Mõbemata, ¿Jeowabara ãyaʼa bedʼea jaradara sãwũã aripe berabaribarabasi?