Nokʼo nããra jidadapeadata Israelde

Jeowabara jidasi ʉ̃kʉrʉ yumakẽrãra Israeldebemarata juez bamarẽã, mamina israelitarabara kãgapanasi nokʼota. Maʉ̃ba ãya jarasida Samuelʼa: «Pʉwʉrʉra jõmaʉ̃ba erbʉ nokʼota, daibida kãgabʉ aba». Samuelbara krĩchasi ãya mawũã widira biga ẽ basita. Aramaʉ̃ta iya Jeowaʼa widisi, Jeowaba jarasi: «Ãyara wãrĩnu bʼaira mʉ̃trʉ kãgada ẽ. Jarada ãyaʼa nokʼo jʉrʉseapanʉta, mamina maʉ̃ nokʼobara nekʼãrẽ mejãcha widita ãyara». Mawũãsidu pʉwʉrʉraba jarasida: «¡Daitara kʼãrẽ ẽ maʉ̃ra! ¡Daibara kãgabʉ nokʼota diamarẽã!».

Jeowabara jarasi Samuelʼa yumakẽrã ababʉta nokʼo babiseabʉta, maʉ̃ trʉ̃ra Saúlbasi. Saúlbara akʉde jʉ̃ẽsi Samuelta Ramá pʉwʉrʉidu. Mama Samuelbara nokʼo babisi Saúlʼra, aseite Saúl buru ʉ̃rʉ weaside.

Tẽã Samuelbara ãba jʉredasi israelitarãra ũdubita kʼai bʼaita ãyi nokʼora. Mamina kʼawuada ẽ basi Saúlʼra samachuadara. ¿Kʼawuabʉka kʼãrẽa ũduda ẽ basita? Iyira bolso zromane eda mĩrʉbasi baera. Mõbe Saúl bolsodeba ãĩ bʉeda kʼãrãpe israelitara nãã bʉesida. Saúlʼra ẽbẽra mamabemaira audre kĩrãwãreãbasi akʉza yi zromabasi. Samuelba jarasi: «Akʉra kʼaita jidabʉrʉta Jeowabara». Israelitaraba jarasida: «¡Naʉ̃ nokʼora audre yibia!».

Nããra Saúlbara jõma ũrĩbasi Samuelba akʉza Jeowaba jarabadara, mamina tẽã ũrĩ ẽ basi. Nokʼorabara sakripisio diabe ẽ basi Jeowara. Ewari aba Samuelba jarasi iyita jʉ̃ãmarẽã sakripisio oita Jeowaʼa. Mamina Samuelta atia ze ẽ basi baera, Saúlbara jʉ̃ã ẽã diasi sakripisiota Jeowaʼa. ¿Kʼãrẽta osi Samuelbara? Iya jarasi: «Bʉara ũrĩbarabasi Jeowa bedʼeara, mawũãsidu ũrĩ ẽ basi». Bʉmara ¿Saúlbara kʼawuabasika ewari jõmaʉ̃nẽ Jeowa bedʼeara ũrĩbarabasita?

Tẽã Saúlʼra wãsi yõne amalekitarabawara, maʉ̃ne Samuelba jarasi jõma beamarẽã. Mamina Saúlbara zokʼai amaesi nokʼo Agagta. Aramaʉ̃ta Jeowaba jarasi Samuelʼa: «Saúlbara mʉ̃ bedʼeara ũrĩ ẽ». Samuelʼra mejãcha sopʉa kʼãrãpe naʉ̃ta jarasi Saúlʼa: «Jeowaba jʉrʉyi awuru nokʼota, bʉa iyi bedʼeata ũrĩamasi baera». Samuel wãita kĩrã wuadogode, Saúlbara, iyi wuama jidabʉrʉde kõa totosi. Aramaʉ̃ta Samuelba jarasi Saúlʼa: «Kʼãwũã bʉa mʉ̃ wua kõetada kĩrãkʼa, Jeowaba ãĩ bʉeyi bʉ nokʼora». Maʉ̃ba jarakĩrãbasi Jeowabara awuru ẽbẽrata jʉrʉita iyi bedʼea ũrĩbʉta nokʼo bamarẽã.