Jãba zroma Noéba odata

Ewari berabari wãne ẽbẽrarãta mejãcha eaba wãsi naʉ̃ drʉade. Mamina maʉ̃ra ẽbẽrarã yi audrera ẽbẽra kayiruarabasi. Akʉza ʉ̃kʉrʉ angelerasida angelera kayiruara ba zesi. Maʉ̃ kʼarea ãyi ʉ̃tʉ badata idu amae kʼãrãpe naʉ̃ drʉaeda zesi, ¿kʼawuabʉka kʼãrẽa zesidata? Zesida ẽbẽra kĩrãkʼa bʼaita akʉza wẽrãrabawara mia kʼãĩta.

Ãyira wũãwũãra barasi. Maʉ̃ra wũãwũãrãra wari wãbʉrʉza audre zarea barachu besi akʉza mejãcha ẽbẽra kayiruarabasi. Adewara ẽbẽrarãta mejãcha zʉbʉria opanasi. Jeowabara iduaribi ẽ baibasi maʉ̃ra ẽbẽrarãba wuabʉrʉ kayiruata owãnamarẽãra, maʉ̃ kʼarea bea krĩchasi kue zromaba. Naʉ̃ kue zromabara naʉ̃ drʉara birasi.

Basi ẽbẽra jipa awuarabʉta iya Jeowata kãgabasi baera, maʉ̃ trʉ̃ra Noébasi. Iya erbasi kimata akʉza wũãwũãrata ũbea: Sem, Cam akʉza Jafet. Maʉ̃ra wũãwũãra aba abakaʉba kimata erpanasi. Jeowabara jarasi Noéʼa jãba zromata omarẽã õbaseabʉta, mawũã ãyi ẽdrʉita. Adewara Jeowabara jarasi maʉ̃ jãba zromane nedʉwʉrʉrata mejãcha bʉedamarẽã mawũã ẽdrʉita.

Noébara waña ojʉ̃drʉsi maʉ̃ jãba zromara. Iya akʉza yi mebẽrãbawaraʉba 50 poagabayeda trajasi maʉ̃ oita, osi Jeowaba jarada kĩrãkʼa. Maʉ̃ jãba zroma onʉmʉena, maʉ̃ ewaribaside Noébara jarakasi ẽbẽrarã kue zroma zei ʉ̃rʉ, mamina ẽbẽrarãbara ũrĩna ẽ basi.

Idibʉrʉ zesi ewari jãba zromane eda wãita. Mawũã eda wãna tẽã, ¿kʼawuakĩrãbʉka kʼãrẽ berabaridata?