Jesúsʼra bedʼeabʉ ẽbẽra wẽrã abaʉ̃me pozode

Pascua oda tẽã Jesúsʼra iyi kʼaidubemarabawara jẽda wãsida Galileaʼeda. Ãyi ode wãne Samaria pʉwʉrʉde berabarisida, mõbe enaʉ̃sida Sicar pʉwʉrʉde Jacobʼba oda pozode. Jesúsʼra mama enaʉ̃si iyi kʼaidubemara yiko eda wãena.

Ẽbẽra wẽrã aba zesi pozoeda bania juede, Jesúsba jarasi: «Baniata mʉ̃aʼa diara». Ẽbẽra wẽrãba widisi: «¿Kʼãrẽa bedʼeabʉ bʉra mʉ̃ara, mʉ̃ra samaritanabʉrʉ?». Jesúsba jarasi: «Bʉa kʼawuabasibʉrʉ mʉ̃ra kʼaita, bʉa mʉ̃aʼa bania widikasi akʉza mʉ̃a bania diakasi». Ẽbẽra wẽrãba widisi: «¿Kʼãrẽta jarakĩrãkʉ bʉara? Bʉra neẽ kʼãrẽ bania jueira». Jesúsba jarasi: «Mamina mʉ̃a bania diabʉrʉta dora, wua obisiakabayi». Ẽbẽra wẽrãba widisi: «Mʉ̃a diara maʉ̃ baniara».

Maʉ̃are Jesúsba jarasi: «Jarara bʉ kima zemarẽã». Ẽbẽra wẽrãba jarasi: «Mʉ̃ra kima neẽ». Jesúsba jarasi: «Bʉra kima edada juesomabʉa, atia bʉa erbʉra bʉ kima ẽ». Yuwẽrãba jarasi: «Mʉ̃ara akʉbʉ bʉra propetata. Mʉ̃ pʉwʉrʉbara jarabʉ naʉ̃ katumanebʉrʉ Daizezeʼa yiwidʼibarata, mamina judiorabara jarapanʉ Jerusalénʼnebʉrʉ Daizezeʼa yiwidʼibarata. Mʉ̃a kʼawuaita Dayirã ẽdrʉbibari zebʉrʉdera jaradiayi sãwũã Daizezeʼa yiwidʼibarata». Mawũẽra Jesúsba jarasi bedʼea yãrã jarakata: «Mʉ̃ yi Ẽdrʉbibarira».

Ẽbẽra wẽrãra wẽba wãsi iyi pʉwʉrʉeda, mõbe jarasi samaritanora: «Mʉ̃a ũdusi Dayirã ẽdrʉbibarira. Iyara mʉ̃ ʉ̃rʉ jõma kʼawuabʉ, zeidua mõbe akʉidua». Ẽbẽra wẽrã kʼaidu wãsida ãyara ũrĩta Jesúsba jaradiabʉta.

Mawũẽra samaritanoraba widisida Jesúsʼa ãyibawara bamarẽã. Mawũã pʉwʉrʉde ewari ũmebasi. Mama ne mejãcha jaradiasi akʉza mejãchaʉba ĩjãsida iyi ʉ̃rʉ. Samaritanoraba ẽbẽra wẽrãʼa jarasida: «Naʉ̃ ẽbẽraba jarada tẽãra, wãrĩnu ĩjãpanʉ daibara iyira ẽbẽrarã ẽdrʉbibarita».