YI 30
Bʉ mebẽrã kãgabʉ beidarãra jẽda piradrʉyi
Dayi mebẽrã beibʉrʉdera mejãcha zʉbʉriabibʉ adewara sopʉabʉ maʉ̃ kʼarea. Daizeze Bedʼeabara jarabʉ beira dayirã nejʉrata (1 Corintios 15:26). Yi 27de kʼawuasida Jeowabara jõbita maʉ̃ nejʉrara mamina, ¿kʼãrẽta berabari ẽbẽrarã beidarãra? Naʉ̃ne kʼawuayi Daizezeba kʼãrẽ nebia zroma wei ʉ̃rʉ. Iyara jẽda piradrʉbiyi ẽbẽrarã mejãcha beidarãra, maʉ̃rãra ewari jõmaʉ̃nẽ bayi, jẽda piradrʉbiyi. ¿Maʉ̃ra wãrĩnu berabarika? ¿Ẽbẽra jẽda piradrʉbʉrʉdera ʉ̃ta wãika mawũã ẽ bʉrʉ naʉ̃ drʉade piradrʉika?
1. ¿Kʼãrẽta oi Jeowabara dayirã mebẽrã beida kʼareara?
Jeowabara jẽda piradrʉbikĩrãbʉ ẽbẽra beidarãra. Basi yumakẽrã aba Daizeze ʉ̃rʉ ĩjãbʉta, iyi trʉ̃ra Job basi. Iyara ĩjãbasi Daizezeba kĩrãdua ẽãta iyi beida tẽãra. Iya jarasi Daizezeʼa: «Bʉa trʉña, aramaʉ̃ta mʉ̃a panʉña [egoro zobeadeba]» (akʉra Job 14:13-15).
2. ¿Sãwũã kʼawuapanʉ beidarãra jẽda piradrʉita?
Jesu nama naʉ̃ drʉade basidera Daizezebara diasi zareata ẽbẽrarã piradrʉbimarẽã. Jesubara piradrʉbisi wuẽrã zake 12 poagababʉta akʉza pẽdra wauta (Marcos 5:41, 42; Lucas 7:12-15). Maʉ̃are Jesu neũdukʼawua Lázarota beisi, Lázaro joudapeada ewari kĩmare basimina, Jesubara jẽda piradrʉbisi, Daizezeʼa yiwidʼi kʼãrãpe nemi jĩgʉa jarasi: «Lázaro, ãĩ zera». «Aramaʉ̃ta Lázarora ãĩ zesi iyi joudapeadadeba» (Juan 11:43, 44). Krĩchaidua sãwũã Lázaro neũdukʼawuarata akʉza yi mebẽrãta kʼãbãẽã sobiasidata.
3. ¿Bʉ mebẽrã beidarabara kʼãrẽ nebiata jʉ̃ãbʉ ʉ̃ra zeidera?
Daizeze Bedʼeaba jarabʉ: «Beudapeadara jẽda piradrʉbiyi» (Hechos 24:15). Ẽbẽra nãã Jesuba piradrʉbidara ʉ̃ta wã ẽ basi (Juan 3:13). Awuarabʉrʉ sobiapanasi naʉ̃ drʉade jẽda piradrʉsida baera. Maʉ̃ra odakĩrãkʼa, Jesubara ẽbẽrarã mejãchaʉta jẽda piradrʉbiyi ewari jõmaʉ̃nẽ panamarẽã, naʉ̃ drʉa ẽjũã kĩrãwãreã nʉminane. Iya jarasi jõma beidapeada jounʉmera jẽda piradrʉyi, jari ẽbẽrarã beidara darabadarasida Jeowaba jẽda piradrʉbiyi wuabemaraba kĩrãduasidamina (Juan 5:28, 29).
AUDRE BIʼIA KʼAWUADADRɄ
Akʉda, Daizeze Bedʼeaba sãwũã jara ũrĩbibʉta beidara wãrĩnu jẽda piradrʉita. Kʼawuara sãwũã ẽbẽra jẽda piradrʉiba bʉra kʼarebaseabʉta wãrĩnu jʉ̃ãbaita akʉza so zarea erbaita.
4. Jesubara ũdubisi wãrĩnu ẽbẽrarãra jẽda piradrʉbiseabʉta
Audre kʼawuadadrʉ Jesuba kʼãrẽta osita iyi neũdukʼawua Lázaro kʼarea. Akʉra Juan 11:14, 38-44, mõbe naʉ̃ta panʉidua:
¿Sãwũã kʼawuapanʉ Lázarora wãrĩnu beisita? (Akʉra nejʉacha zake 39).
Wãrĩnu Lázarota ʉ̃ta wãsibʉrʉ, ¿Jesubara nama naʉ̃ drʉade bʼaita jẽda piradrʉbikasika?
5. Ẽbẽrarã mejãchaʉta jẽda piradrʉbiyi
Akʉra Salmo 37:29, mõbe naʉ̃ta panʉidua:
¿Sama panai ẽbẽrarã jõma jẽda piradrʉbʉrʉra?
Jesubara piradrʉbiyi ẽbẽrarã Daizeze ode panʉrata akʉza ẽbẽra mejãchaʉta piradrʉbiyi. Akʉra Hechos 24:15, mõbe naʉ̃ta panʉidua:
Bʉara, ¿kʼaita jẽda ũdukĩrãbʉ?
Krĩchara naʉ̃ta: Jesuitara zare ẽ ẽbẽrarã piradrʉbita, yibariraba ãyi wũãwũã urumai kĩrãkʼa.
6. Jẽda piradrʉiba kʼarebabʉ so zarea erbaita akʉza jʉ̃ãbaita
Daizeze Bedʼeaba nebʉrabʉ Jairo kau piradrʉbidata, maʉ̃ba zowaĩnĩgʉata diabʉ ẽbẽra sopʉabʉraʼa. Akʉra wãrĩnu berabaridata Lucas 8:40-42, 49-56.
Jairo kau piradrʉbinaena Jesuba jarasi yi zezeʼa: «Sopʉarãra, awuarabʉrʉ ĩjãta erbara» (akʉra nejʉacha zake 50). ¿Sãwũã beidara jẽda piradrʉiba jʉ̃ãbaita erbaseabʉ?
¿Ẽbẽra daya kãgabʉ beibʉrʉde?
¿Bʉ bebʉdenʉminane?
Akʉra BIDEOTA, mõbe naʉ̃ta panʉidua:
¿Sãwũã beidara jẽda piradrʉi jʉ̃ãiba zareata diasi Felicity yibarirata?
Ʉ̃KɄRɄBA KRĨCHAPANɄTA: «Mʉ̃ara ĩjã ẽ beidara nama egorode jẽda piradrʉira».
¿Bʉara kʼãrẽta panʉi?
Bʉara, ¿saʉ̃ testota zokʼaseabʉ ũdubita beidara wãrĩnu naʉ̃ drʉade jẽda piradrʉita?
KĨRÃBEITA
Daizeze Bedʼeaba jarabʉ wãrĩnu ẽbẽrarã mejãcha beikʉadara jẽda piradrʉita. Jeowabara kãgabʉ ẽbẽrarãra jẽda piradrʉdamarẽã, maʉ̃ba diasi Jesuʼa zareata maʉ̃ oita.
Panʉnadrʉ
¿Bʉra sãwũã krĩchabʉ kʼawuabʉrʉ baera Jeowaba Jesumeba beidara jẽda piradrʉbi kʼarea?
Ẽbẽrarã mejãcha piradrʉbʉrʉdera, ¿sama panai ãyira, ʉ̃tʉ mawũã ẽ bʉrʉ naʉ̃ drʉade? Bʉara, ¿kʼãrẽa mawũã jarabʉ?
Bʉara, ¿kʼãrẽa ĩjãbʉ beidarãra jẽda piradrʉita?
JɄRɄDA AUDRE KʼAWUAITA
Kʼãrẽba kʼarebaseabʉ sopʉa yi edebi ẽ baita.
«Kʼarebata ẽbẽra sopʉabʉraita yi mebẽrã beida kʼarea» (¡Despertad!, num. 3, 2018de)
¿Daizeze Bedʼeadebemabara wãrĩnu kʼarebaika ẽbẽra beida kʼarea sopʉabʉra?
¿Wũãwũãra mebẽrã beibʉrʉdera bʉara kʼãrẽta jaraseabʉ?
¿Bʉka beida ʉ̃tʉ piradrʉira? ¿Kʼairata jipa piradrʉ ẽ bai?