YI 26
¿Ẽbẽrarãra kʼãrẽa nemitia berabaribʉ akʉza kʼãrẽa zʉbʉriabʉ?
«¿Kʼãrẽa?». Ʉ̃kʉrʉ ẽbẽrarãba naʉ̃ta widipanʉ ãyi zʉbʉria berabaribʉrʉde. Mamina sobiapanʉ kʼawuapanʉ baera Daizeze Bedʼeaba panʉbʉta maʉ̃ ʉ̃rʉ.
1. ¿Kʼãrẽta osi Diarubara kʼãwũã zʉbʉriapanamarẽã?
Diarubara ũrĩamasi Daizezeba jarabʉra, iya jõma zokʼakĩrãbasi baera, maʉ̃ kʼarea sewasi Adánta Evaʉ̃me ãyisida Daizeze ʉ̃rʉ bamarẽã iyi kĩrãkʼa (Génesis 3:1-5). Maʉ̃ba Evaʼa krĩchabisi Jeowabara ãyaʼa nekʼãrẽ biata diakĩrã ẽ basita, Diarubara krĩchabisi Daizeze bedʼeata ũrĩ ẽ bʉrʉ, audre sobia bʼaita. Diaruba nãã sewidata jarasi Evaʼa, jaraside bei ẽ baita. Maʉ̃ kʼarea Daizeze Bedʼeaba jarabʉ Diarura sewa nebʉrʉ omia akʉza «sewa nebʉrʉ omia zeze» (Juan 8:44).
2. ¿Kʼãrẽta osida Adán Evaʉ̃mera?
Jeowabara Adán Evaʉ̃mera biʼia edabasi, maʉ̃ kʼarea jarasi komarẽã neta badudebemata, mamina neta abaʉdebemata ko ẽ baita jarasi (Génesis 2:15-17). Mamina maʉ̃ netara ãyara kosi. Evaba netata «bʉedasi, mõbebʉrʉ kosi, maʉ̃are diasi yi kima ãyi yi ũdusidade, maʉ̃bida kosi» (Génesis 3:6). Jeowabara ãyira kʼãrẽ krĩcha mitia neẽã parãsi, maʉ̃ba ãyara nebiata jidaseabasi mamina nekayirua oita jidasi, mawũã Jeowa idu yi zokʼabida ẽ basi. Mawũã odaba mejãcha zʉbʉriata ũdusida (Génesis 3:16-19).
3. Kʼãwũã Adán Evaʉ̃meba odaba, ¿sãwũã zʉbʉriabʉ dayirãra?
Ãya nemitia odadeba nekayiruata obesi, maʉ̃ nekayiruara amaesida ãyi wũãwũãra. Daizeze Bedʼeaba jarabʉ Adán ʉ̃rʉ: «Kʼãwũã yumakẽrã abaʉdeba nekayiruara zezi naʉ̃ drʉa jõmaʉ̃nẽ, mawũã nekayiruadeba jõmaʉ̃ta beibarita amaesi akʉza maʉ̃neba ẽbẽrarã jõmaʉ̃ta beipanʉ» (Romanos 5:12).
Dayirãra zʉbʉriabʉ daya jidabʉta bia jida ẽ baera, adewara zʉbʉriabibʉ wuabemaraba jidabʉde bia jida ẽ baera akʉza dayirã zʉbʉriabʉ daya kʼawua ẽ ewaride neida berabaribʉ baera (akʉra Eclesiastés 9:11).
AUDRE BIʼIA KʼAWUADADRɄ
Kʼawuadaya kʼãrẽa Daizezeba zʉbʉriabibʉ ẽãta akʉza iyira sãwũãbʉta dayirã zʉbʉriabʉ kʼarea.
4. Wãrĩnu dayirã zʉbʉriabibʉta
Ẽbẽra mejãchaʉba krĩchabʉ naʉ̃ drʉara Daizezeba zokʼabʉta mamina, ¿maʉ̃ra wãrĩnuka? Akʉra BIDEOTA.
Akʉra Santiago 1:13 akʉza 1 Juan 5:19, mõbe naʉ̃ta panʉidua:
¿Daizezeba obʉka zʉbʉriara akʉza nemitia berabaribibʉka?
5. ¿Sãwũãpanʉ diaruba zokʼabʉdeba?
Akʉra Génesis 3:1-6, mõbe naʉ̃ta panʉidua:
¿Diarubara kʼãrẽ sewidata jarasi? (Akʉra nejʉacha zake 4 akʉza 5).
¿Diarubara sãwũã ĩjãbisi Evara Daizezeba nekʼãrẽ bia diakĩrã ẽãta ãyaʼa?
Diaruba jaradadebara, ¿dayirãbara nesidabʉka Daizezeba zokʼamarẽã dayirã sobia bʼaira?
Akʉra Eclesiastés 8:9, mõbe naʉ̃ta panʉidua:
Atia kʼãwũã naʉ̃ drʉara Jeowaba zokʼabʉ ẽ baera, ¿kʼãrẽta berabarinʉmʉ?
Adán Evaʉ̃mera ẽjũã kĩrãwãreãnẽ panasi mamina Diaru bedʼeata ũrĩsi baera Daizeze ʉ̃rʉ besi.
Daizeze bedʼea ũrĩ ẽ bada tẽã ũdupanʉ nekayiruata, beibarita akʉza zʉbʉriata.
Jeowaba jõma jõbiyi nekayiruata, zʉbʉriata akʉza beibarita. Adewara ẽbẽrarãra Jẽda nekayirua okata panañi akʉza ẽjũã kĩrãwãreãnẽ bayi.
6. Jeowara krĩcha zroma obʉ dayirã zʉbʉriabʉ kʼarea
Jeowabara dayirã kʼãwũã nemitia berabaribʉra, ¿kʼãrẽ ẽ kĩrãkʼa akʉbʉka? Kʼawuadadrʉ David nokʼoba bʉda ʉ̃rʉ akʉza apostol Pedroba bʉda ʉ̃rʉ. Akʉra Salmo 31:7 akʉza 1 Pedro 5:7, mõbe naʉ̃ta panʉidua:
¿Bʉra sãwũãbʉ kʼawuabʉde Jeowara dayirã kʼarea krĩcha zroma obʉta akʉza zʉbʉriabʉta?
7. Daizezebara jõma jõbiyi zʉbʉriara
Akʉra Isaías 65:17 akʉza Apocalipsis 21:3, 4, mõbe naʉ̃ta panʉidua:
¿Kʼãrẽa sobiapanʉ Daizezeba zʉbʉria Jõbi kʼarea, Adánba oamaenata?
¿Kʼawuabasika?
Diaruba nããbema sewida jaraside, Jeowa ʉ̃rʉ aña jarasi. Maʉ̃ba ẽbẽrarã krĩchabisi Daizezera Nokʼo zerĩ ẽ kĩrãkʼa, daucha zokʼa ẽ baera akʉza kãgaba zokʼa ẽ baera. Daizezeba naʉ̃ zʉbʉria jõbibʉrʉde, ũdubiyi iyara zokʼaseabʉta. Nekʼãrẽ jõmaʉ̃raira audre yibia naʉ̃ drʉade Daizeze trʉ̃ neneẽã erbaita (Mateo 6:9, 10).
Ʉ̃KɄRɄBA KRĨCHAPANɄTA: «Dayirã kʼãwũã zʉbʉriaira Daizezeba osi».
¿Kʼãrẽta panʉĩ?
KĨRÃBEITA
Diaruba akʉza nããbema ẽbẽrarãba kʼãwũã odaba zʉbʉriapanʉ dayirãra. Daizezebara dayirãra arigʉ krĩchabʉba aranʉ jõbiyi zʉbʉriara.
Panʉnadrʉ
¿Diarubara kʼãrẽ sewidata jarasi Evara?
¿Adán Evaʉ̃meba kʼãwũã ũrĩ ẽ badadeba sãwũã zʉbʉriapanʉ dayirãra?
¿Sãwũã kʼawuapanʉ Daizezera krĩcha zroma obʉta dayirã zʉbʉriabʉ kʼarea?
JɄRɄDA AUDRE KʼAWUAITA
Kʼawuara Daizeze Bedʼeaba nekayirua ʉ̃rʉ jarabʉta.
Akʉdrʉ diaruba kʼãrẽ nemitiata ojʉ̃drʉsita ẽjũã kĩrãwãreã Edénʼne.
«¿Kʼãrẽa Daizezebara iduaribibʉ zʉbʉriara?» (Jarakabʉ, 1ne enerode 2014de)
Akʉdaya, bedʼea ẽbẽrarã mejãchaʉba widibʉ panʉbʉta.
«¿Kʼãrẽa Daizezebara iduaribisi Holocausto berabarimarẽã?» (Artikulo jw.org)
Akʉra yumakẽrã abaʉba kʼãrẽta kʼawuasita iyi audu kʼãrẽ berabarinʉmanaba.